‏ Jeremiah 23

1ပှၤကွၢ်သိလၢအမၤဟးဂီၤ,ဒီးမၤလီၤပြံလီၤပြါယတၢ်အီၣ်ဆၣ်အလီၢ်အသိတဖၣ်န့ၣ်,ဘၣ်အဖှီၣ်လီၤ,ယွၤစံးဝဲဒၣ်. 2မၤသးဒ်န့ၣ်ဒီးယွၤအံၣ်စရ့လးအကစၢ်စံးလၢပှၤကွၢ်သိလၢအကွၢ်ယပှၤဂီၢ်မုၢ်တဖၣ်အဂ့ၢ်,သုမၤလီၤပြံလီၤပြါယသိတဖု,ဒီးဟီထီၣ်ကွံာ်အီၤ,ဒီးတအိၣ်သကိးဘၣ်အီၤဘၣ်.ကွၢ်ကွၢ်,ယကအိၣ်သကိးသုလၢသုမၤတၢ်အၢအဃိ,ယွၤစံးဝဲဒၣ်. 3ဒီးယကထၢဖှိၣ်ယသိတဖုအတၢ်အိၣ်လီၤတဲာ်လၢကယဲၢ်ကီၢ်လၢယဟီထီၣ်ကွံာ်အီၤဆူအပူၤ,ဒီးယကဒုးဟဲက့ၤအီၤဆူကရၢပူၤ,ဒီးကသၣ်ထီၣ်,ဒီးကအါထီၣ်လီၤ. 4ဒီးယကပာ်ပှၤကွၢ်သိလၢအဖီခိၣ်လၢအကကွၢ်အီၤ,ဒီးတပျံၤလၢၤဘၣ်တၢ်ဘၣ်,ဒီးတဘၣ်ယိၣ်လၢၤဘၣ်တၢ်ဘၣ်,ဒီးတဟါမၢ်လၢၤဘၣ်,ယွၤစံးဝဲဒၣ်.

5ကွၢ်ကွၢ်,ယွၤစံးဝဲဒၣ်,မုၢ်နံၤတဖၣ်ဟဲလၢယကဒုးဂဲၤဆၢထၢၣ်တၢ်အဒ့တီလၢစီၤဒၤဝံးအဂီၢ်,ဒီးစီၤပၤတဂၤကပၢတၢ်,ဒီးကဘီၣ်ထီၣ်ညီထီၣ်,ဒီးကမၤတၢ်စံၣ်ညီၣ်ဒီးတၢ်တီတၢ်လိၤလၢကီၢ်န့ၣ်လီၤ. 6တၢ်လၢအမုၢ်နံၤတဖၣ်န့ၣ်ယူဒၤကတုၤလၢတၢ်အုၣ်က့ၤခီၣ်က့ၤ,ဒီးအံၣ်စရ့လးကအိၣ်ဒီးတၢ်သန့ၤအသးအလီၢ်,ဒီးတၢ်ကကိးအမံၤလၢအအံၤ,ယွၤပတၢ်တီတၢ်လိၤလီၤ. 7မၤသးဒ်န့ၣ်ဒီးယွၤစံးဝဲဒၣ်,ကွၢ်ကွၢ်,မုၢ်နံၤတဖၣ်ဟဲလၢပှၤတစံးလၢၤဘၣ်,ယွၤမူဝဲလၢအဒုးဟးထီၣ်ကွံာ်ပှၤအံၣ်စရ့လးဖိလၢကီၢ်အဲၤကူပတူးန့ၣ်ဘၣ်. 8မ့ၢ်အကစံး,ယွၤမူဝဲလၢအဟဲစိာ်ထီၣ်,ဒီးဒုးဟဲနုာ်အံၣ်စရ့လးအပှၤဟံၣ်ဖိအချံအသၣ်လၢကီၢ်လၢကလံၤစိး,ဒီးလၢကီၢ်ခဲလၢာ်ဖဲယဟီထီၣ်ကွံာ်တ့ၢ်အီၤ,ဒီးကအိၣ်ကဆိးဝဲလၢအကီၢ်ဒၣ်ဝဲအပူၤလီၤ.

9လၢဝံတဖၣ်အဂ့ၢ်အကျိၤ.

ယသူၣ်ကၢ်ယသးလီၤလၢယသးကံၢ်ပူၤ,ယဃံခဲလၢာ်ကနိး,ယမၤသးဒ်ပှၤအီမူၤအသးအသိးန့ၣ်,ဒီးမၤသးဒ်ပှၤလၢစပံးထံမၤနၢၤအီၤအသိးန့ၣ်,လၢယွၤအဃိ,ဒီးလၢအကလုၢ်စီဆှံအဃိန့ၣ်လီၤ.

10အဂ့ၢ်ဒ်အံၤ,ကီၢ်ပှဲၤဝဲဒီးပှၤမၤကမၣ်ပမါပဝၤ,ကီၢ်သူၣ်အုးသးအုးလၢတၢ်ဆိၣ်အၢအဃိလီၤ.တၢ်အီၣ်ဆၣ်အလီၢ်လၢပှၢ်လၢ်ကျါန့ၣ်ဃ့ထီၣ်ကွံာ်လီၤ.အဂ့ၢ်ဒ်အံၤ,အဝဲသ့ၣ်ဃ့ၢ်မၤတၢ်အၢ,ဒီးအဂံၢ်အဘါတတီဘၣ်. 11အဂ့ၢ်ဒ်အံၤ,ဝံမ့ၢ်ဂ့ၤ,ပှၤလုၢ်တၢ်အဒိၣ်မ့ၢ်ဂ့ၤ,တယူးတယီၣ်ဘၣ်တၢ်ဘၣ်.မ့ၢ်မးယထံၣ်န့ၢ်အတၢ်အၢလၢယဟံၣ်ပူၤဒၣ်လဲာ်,ယွၤစံးဝဲဒၣ်. 12မၤသးဒ်န့ၣ်ဒီးအကျဲတကဲထီၣ်ဒ်တၢ်အလီၢ်ဘျ့လၢတၢ်ခံးကျါအသိးလၢအဂီၢ်,တၢ်ကဟီထီၣ်ကွံာ်အီၤ,ဒီးကလီၤဃံၤဝဲလၢအပူၤလီၤ.အဂ့ၢ်ဒ်အံၤ,ယကဒုးဘၣ်အီၤလၢတၢ်အၢဖဲတၢ်အိၣ်သကိးအီၤအနံၣ်န့ၣ်,ယွၤစံးဝဲဒၣ်.

13ယထံၣ်ပှၤဟးဂီၤဖိအတၢ်လၢၡၤမရံအဝံတဖၣ်အပူၤလီၤ.ကတိၤတၢ်လၢဝံအကျိာ်လၢဘဧၤလး,ဒီးဒုးမၤကမၣ်ယပှၤဂီၢ်မုၢ်အံၣ်စရ့လးလီၤ. 14ယထံၣ်တ့ၢ်စ့ၢ်ကီးတၢ်အၢနးမးလၢယရူၤၡလ့ၣ်အဝံတဖၣ်အပူၤလီၤ.အဲၣ်ဘၢမါ,ဒီးလဲၤဝဲလၢတၢ်ကဘျံးကဘျၣ်အပူၤ,ဒီးဒုးဆူၣ်ထီၣ်ပှၤလၢအမၤတၢ်အၢအစုတုၤပှၤတဟဲက့ၤလၢအတၢ်ဒဲးဘးနီတဂၤဘၣ်.အဝဲသ့ၣ်ခဲလၢာ်န့ၣ်အိၣ်ဝဲလၢယမဲာ်ညါဒ်စဒိၣ်အသိး,ဒီးအပှၤအိၣ်ဝဲဆိးဝဲန့ၣ်ဒ်ပှၤဂမိရၤဖိအသိးန့ၣ်လီၤ.

15မၤသးဒ်န့ၣ်ဒီးတၢ်သုးမုၢ်ဂီၢ်မုၢ်အယွၤစံးလၢဝံတဖၣ်အဂ့ၢ်ဒ်အံၤ,ကွၢ်ကွၢ်,ယကဒုးအီၣ်အီၤလၢသဘူးအပၤစံၣ်တူး,ဒီးဒုးအီအီၤလၢစုၣ်ထံလီၤ.အဂ့ၢ်ဒ်အံၤ,တၢ်တယူးတယီၣ်ဘၣ်တၢ်ဘၣ်န့ၣ်လဲၤထီၣ်လၢယရူၤၡလ့ၣ်အဝံတဖၣ်အအိၣ်ဆူကီၢ်ဒီဘ့ၣ်ညါအပူၤလီၤ.

16တၢ်သုးမုၢ်ဂီၢ်မုၢ်အယွၤစံးဒ်အံၤ,ကနၣ်ဝံတဖၣ်အကလုၢ်လၢအကတိၤတၢ်လၢဝံအကျိာ်လၢသုကျါတဂ့ၤ.ကလံာ်သုဆူတၢ်ကလီကလီလီၤ.ကတိၤဝဲလၢတၢ်ထံၣ်လၢညါခီလၢအလိၣ်ထီၣ်လၢအသးဒၣ်ဝဲ,တမ့ၢ်ဘၣ်အဟဲလၢယွၤအထးခိၣ်ဘၣ်. 17ဒီးအဝဲသ့ၣ်စံးတထံၣ်ဃီပှၤလၢအတပာ်ကဲဘၣ်ယၤတဖၣ်,ယွၤစံးတ့ၢ်ဝဲ,သုကအိၣ်ဒီးတၢ်ဃူတၢ်ဖိးလီၤ.ဒီးစံးကယဲၢ်ပှၤလၢအပိာ်ထွဲအသးအနၢ်က့ၣ်အခံန့ၣ်,တၢ်အၢတဘၣ်ဘၣ်သုနီတမံၤဘၣ်. 18အဂ့ၢ်ဒ်အံၤ,မ့ၢ်မတၤဆၢထၢၣ်တ့ၢ်လၢယွၤအတၢ်ကူၣ်အပူၤ,ဒီးထံၣ်ဘၣ်,ဒီးနၢ်ဟူဘၣ်အကလုၢ်တဂၤလဲၣ်.မ့ၢ်မတၤကနၣ်ဝဲ,ဒီးနၢ်ဟူအတၢ်ကတိၤတဂၤလဲၣ်.

19ကွၢ်ကွၢ်,ကလံၤသဝံးဘၣ်ဃးဒီးယွၤလဲၤတၢ်ဆူၣ်ဆူၣ်ကလဲာ်,ကလံၤဆူၣ်သဝံးအသးကဘၣ်ပှၤတတီဘၣ်အခိၣ်နးနးကလဲာ်လီၤ. 20ယွၤအသးကဲၤထီၣ်တဃၣ်ကဒါဘၣ်တုၤအမၤတၢ်,ဒီးတုၤအမၤလၢထီၣ်ပှဲၤထီၣ်တၢ်လၢအကူၣ်တၢ်လၢအသးကံၢ်ပူၤလီၤ.လၢမုၢ်နံၤဆူညါန့ၣ်သုနၢ်ကပၢၢ်တၢ်လီၤတံၢ်လီၤဆဲးလီၤ.

21ယတမၢလီၤဝံတဖၣ်န့ၣ်ဘၣ်,ဘၣ်ဆၣ်ဒီးဃ့ၢ်ဝဲလီၤ.ယတကတိၤဘၣ်တၢ်ဒီးအီၤဘၣ်,ဘၣ်ဆၣ်ဒီးကတိၤတၢ်လၢဝံကျိာ်လီၤ. 22ဒီးမ့ၢ်ဆၢထၢၣ်လၢယတၢ်ကူၣ်အပူၤဒီး,ကဒုးနၢ်ဟူယပှၤဂီၢ်မုၢ်လၢယတၢ်ကတိၤ,ဒီးကဒုးဟဲက့ၤအီၤလၢအကျဲအၢ,ဒီၤလၢအမၤတၢ်အၢအအိၣ်န့ၣ်လီၤ.

23ယမ့ၢ်ကစၢ်အိၣ်လၢအဘူး,ဒီးတမ့ၢ်ဘၣ်ကစၢ်လၢအယံၤန့ၣ်ဘၣ်ဧါ,ယွၤစံးဝဲဒၣ်. 24ပှၤပာ်ခူသူၣ်အသးလၢအလီၢ်အိၣ်တဒၢအပူၤဖဲယတထံၣ်ဘၣ်အီၤတဂၤဂၤန့ၣ်ဘၣ်ကသ့ဧါ.ယွၤစံးဝဲဒၣ်.ယမၤပှဲၤဟီၣ်ခိၣ်ဒီးမူခိၣ်န့ၣ်တမ့ၢ်ဘၣ်ဧါ,ယွၤစံးဝဲဒၣ်.

25ဝံတဖၣ်လၢအကတိၤတၢ်လၢဝံကျိာ်ကဘျံးကဘျၣ်လၢယမံၤန့ၣ်ယနၢ်ဟူလံတၢ်လၢအစံးဝဲလံ.စံးဝဲ,ယမံမီၢ်တၢ်,ယမံမီၢ်တၢ်လီၤ. 26တၢ်န့ၣ်ကအိၣ်လၢဝံလၢအကတိၤတၢ်လၢဝံကျိာ်ကဘျံးကဘျၣ်အသးကံၢ်ပူၤဆံးယံာ်လဲၣ်.မ့ၢ်လၢအသးလီတၢ်အဝံလီၤ. 27ဆိကမိၣ်ဝဲလၢအကဒုးသးပ့ၤနီၣ်ယပှၤဂီၢ်မုၢ်လၢယမံၤလၢအတၢ်မံမီၢ်တဖၣ်လၢအစံၣ်တဲၤတဲလီၤတဂၤပှၤလၢအဃၢၤ,တဂၤပှၤလၢအဃၢၤ,ဒ်အပၢ်သးပ့ၣ်နီၣ်ယမံၤလၢဘဧၤလးအဃိအသိးန့ၣ်လီၤ. 28ဝံလၢအအိၣ်ဒီးတၢ်မံမီၢ်,မ်အစံၣ်တဲၤတဲလီၤဒၣ်ဝဲလၢတၢ်မံမီၢ်တက့ၢ်.ဒီးပှၤလၢအအိၣ်ဒီးယကလုၢ်န့ၣ်,မ်အစံၣ်တဲၤတဲလီၤယကလုၢ်တီတီတက့ၢ်.ဖ့ထိၣ်သတြီၤဒီးဟုန့ၣ်မ့ၢ်မနုၤတမံၤလဲၣ်,ယွၤစံးဝဲဒၣ်. 29ယကလုၢ်မၤသးဒ်မ့ၣ်အူအသိးန့ၣ်တမ့ၢ်ဘၣ်ဧါ,ယွၤစံးဝဲဒၣ်,ဒီးမၤသးဒ်ခံၣ်ခူၣ်လၢအမၤလီၤကလဲလၢၢ်ဧိၤလ့ဧိၤအသိးတမ့ၢ်ဘၣ်ဧါ.

30မၤသးဒ်န့ၣ်ဒီး,ကွၢ်ကွၢ်,ယထီဒါဝံတဖၣ်လၢအဟုၣ်န့ၢ်ယကလုၢ်တဂၤလၢအဃၢၤ,တဂၤလၢပှၤလၢအဃၢၤ,ယွၤစံးဝဲဒၣ်. 31ကွၢ်ကွၢ်,ယွၤစံးဝဲဒၣ်,ယထီဒါဝံတဖၣ်လၢအဟံးန့ၢ်အပျ့ၤဒီးစံး,အဝဲဒၣ်စံးဝဲဒၣ်န့ၣ်လီၤ. 32ကွၢ်ကွၢ်,ယွၤစံးဝဲဒၣ်,ယထီဒါပှၤလၢအကတိၤလၢဝံအကျိာ်လၢတၢ်မံမီၢ်ကဘျံးကဘျၣ်,ဒီးစံၣ်တဲၤတဲလီၤဝဲ,ဒီးဒုးလီၤကမၣ်ယပှၤဂီၢ်မုၢ်လၢအတၢ်ကတိၤကဘျံးကဘျၣ်,ဒီးလၢအပာ်ကဖိအသးန့ၣ်လီၤ.ဘၣ်ဆၣ်ဒီးယတမၢလီၤဘၣ်အီၤဘၣ်,ဒီးတမၤလိာ်ဘၣ်အီၤဘၣ်,ဒီးပှၤဂီၢ်မုၢ်အံၤတဘၣ်ဘျုးဘၣ်ဖှိၣ်လၢအီၤနီတမံၤဘၣ်,ယွၤစံးဝဲဒၣ်.

33ဒီးတုၤပှၤဂီၢ်မုၢ်အံၤမ့ၢ်ဂ့ၤ,ဝံမ့ၢ်ဂ့ၤ,ပှၤလုၢ်တၢ်အဒိၣ်မ့ၢ်ဂ့ၤ,ကသံကွၢ်နၤ,ဒီးစံး,ယွၤအတၢ်ဝံတၢ်ယိးမ့ၢ်မနုၤလဲၣ်န့ၣ်ဒီး,နဘၣ်စံးဆၢအီၤ,တၢ်ဝံတၢ်ယိးမနုၤလဲၣ်,ယကညိကွံာ်သု,ယွၤစံးဝဲဒၣ်. 34ဒီးဝံဂ့ၤ,ပှၤလုၢ်တၢ်အဒိၣ်ဂ့ၤ,ပှၤဂီၢ်မုၢ်ဂ့ၤ,လၢအစံးယွၤအတၢ်ဝံတၢ်ယိးန့ၣ်,ယကအိၣ်သကိးပှၤတဂၤန့ၣ်,ဒီးအပှၤဟံၣ်ဖိလီၤ. 35သုဘၣ်စံးဒ်အံၤ,တဂၤတဂၤ,ယွၤစံးဆၢတၢ်ဒ်လဲၣ်,ဒီးယွၤကတိၤတၢ်ဒ်လဲၣ်န့ၣ်လီၤ. 36ဒီးယွၤအတၢ်ဝံတၢ်ယိးန့ၣ်သုတစံးဘၣ်လၢၤဘၣ်.အဂ့ၢ်ဒ်အံၤ,ပှၤကညီအကလုၢ်န့ၣ်ကကဲထီၣ်တဂၤအတၢ်ဝံတၢ်ယိးစုာ်စုာ်လီၤ.အဂ့ၢ်ဒ်အံၤ,သုမၤကဒံကဒါကစၢ်လၢအမူဝဲအကလုၢ်,တၢ်သုးမုၢ်ဂီၢ်မုၢ်အယွၤ,ပကစၢ်လီၤ. 37သုဘၣ်စံးလၢဝံ,ယွၤစံးဆၢနၤဒ်လဲၣ်,ဒီးယွၤကတိၤထီၣ်တၢ်ဒ်လဲၣ်န့ၣ်လီၤ. 38မ့မ့ၢ်သုစံး,ယွၤအတၢ်ဝံတၢ်ယိးန့ၣ်ဒီး,မ့ၢ်မးယွၤစံးဒ်အံၤ,မ့ၢ်သုစံးတၢ်ကတိၤအံၤ,ယွၤအတၢ်ဝံတၢ်ယိး,ဒီးယမၢလီၤတၢ်ဆူသုအိၣ်ဒီးစံး,သုတဘၣ်စံး,ယွၤအတၢ်ဝံတၢ်ယိးန့ၣ်ဘၣ်ဒီး. 39ကွၢ်ကွၢ်,ယကဟးထီၣ်သုစီဖ့ကလ့ၤ,ဒီးယကကွံာ်တ့ၢ်ကွံာ်သု,ဒီးဝ့ၢ်တဝ့ၢ်လၢယဟ့ၣ်လီၤသုပၢ်တဖၣ်လၢယမဲာ်ညါလီၤ. 40ဒီးယကပာ်တၢ်ဒုၣ်ဒွဲၣ်အထူအယိာ်,ဒီးတၢ်မဲာ်ဆှးလီၤစိၤလီၤထီလၢတၢ်တသးပ့ၤနီၣ်ဘၣ်ဝဲဘၣ်လၢသုလိၤလီၤ.