Jeremiah 26
1လၢယူဒၤအစီၤပၤစီၤယိၤၡံယၤအဖိခွါစီၤယဟိၤယါကံၣ်ကဲသီစီၤပၤန့ၣ်တၢ်ကတိၤအံၤဟဲထီၣ်လၢယွၤ,ဒီးစံးဝဲဒၣ်, 2ယွၤစံးဒ်အံၤ,ဆၢထၢၣ်လၢယွၤအဟံၣ်အဂၢၤပူၤ,ဒီးစံးဘၣ်ကယဲၢ်ယူဒၤအဝ့ၢ်ခဲလၢာ်လၢအဟဲဘူၣ်ထီၣ်ဘါထီၣ်တၢ်လၢယွၤအဟံၣ်,လၢကယဲၢ်တၢ်ကတိၤလၢယမၤလိာ်နၤတက့ၢ်.ပာ်လီၤတဲာ်နီတဘီတဂ့ၤ. 3ဘၣ်တဘၣ်ကကနၣ်ဝဲ,ဒီးပှၤကဃၣ်ကွံာ်အသးတဂၤလၢအကျဲအၢဒၣ်ဝဲ,တဂၤလၢအကျဲအၢဒၣ်ဝဲစုာ်စုာ်,ဒ်သိးယကပီၢ်ယၢ်လီၤက့ၤယသးလၢတၢ်အၢလၢယကူၣ်ထီၣ်လၢယကဒုးဘၣ်အီၤလၢအမၤတၢ်အၢအဃိန့ၣ်လီၤ. 4ဒီးနဘၣ်စံးဘၣ်အီၤ,ယွၤစံးဒ်အံၤ,သုမ့ၢ်တကနၣ်ယကလုၢ်ဒ်သိးသုကလဲၤလၢတၢ်သိၣ်တၢ်သီ,အပူၤလၢယပာ်လီၤလၢသုမဲာ်ညါ, 5သုမ့ၢ်တကနၣ်ဘၣ်ယခ့ယပှၤဝံတဖၣ်အကလုၢ်လၢယမၢလီၤဆူသုအိၣ်ဒီး,(ယဂဲၤဆၢထၢၣ်ဂီၤဂီၤ,ဒီးမၢလီၤအီၤ,ဒီးသုတကနၣ်ဘၣ်,) 6ယကပာ်ဟံၣ်တဟံၣ်အံၤဒ်ၡံလိၤအသိး,ဒီးယကပာ်ဝ့ၢ်တဝ့ၢ်အံၤလၢတၢ်ဆိၣ်အၢအလီၢ်လၢဟီၣ်ခိၣ်အကလုာ်ခဲလၢာ်အဂီၢ်လီၤ. 7ဒီးပှၤလုၢ်တၢ်အဒိၣ်,ဒီးဝံတဖၣ်,ဒီးပှၤဂီၢ်မုၢ်ခဲလၢာ်န့ၣ်နၢ်ဟူစီၤယံးရမံယၤကတိၤတၢ်ကတိၤန့ၣ်လၢယွၤအဟံၣ်ပူၤလီၤ. 8ဒီးတုၤစီၤယံးရမံယၤကတိၤဝံၤလၢာ်ကယဲၢ်တၢ်လၢယွၤမၤလိာ်အီၤလၢအဘၣ်ကတိၤဒီးပှၤဂီၢ်မုၢ်ခဲလၢာ်ဒီး,တၢ်မၤအသးလၢပှၤလုၢ်တၢ်အဒိၣ်တဖၣ်,ဒီးဝံတဖၣ်,ဒီးပှၤဂီၢ်မုၢ်ခဲလၢာ်ဟံးဃာ်အီၤ,ဒီးစံးဝဲဒၣ်,သံဒီးနကသံလီၤ. 9နကတိၤတၢ်လၢဝံကျိာ်လၢယွၤအမံၤ,ဒီးစံး,ဟံၣ်တဖျၢၣ်အံၤကမၤသးဒ်ၡံလိၤအသိး,ဒီးဝ့ၢ်တဝ့ၢ်အံၤကအိၣ်သယုၢ်,ပှၤအိၣ်ဝဲဆိးဝဲလၢအပူၤတအိၣ်ဘၣ်န့ၣ်မ့ၢ်အဘၣ်မနုၤလဲၣ်.ဒီးပှၤဂီၢ်မုၢ်ခဲလၢာ်အိၣ်ဖှိၣ်ရိဖှိၣ်ထီဒါစီၤယံးရမံယၤလၢယွၤအဟံၣ်ပူၤန့ၣ်လီၤ. 10ဒီးတုၤယူဒၤအပဒိၣ်ဖးဒိၣ်တဖၣ်နၢ်ဟူတၢ်တဖၣ်န့ၣ်ဒီး,ဟဲထီၣ်ဝဲလၢစီၤပၤအဟံၣ်ဆူယွၤအဟံၣ်ပူၤ,ဒီးဆ့ၣ်နီၤလၢကျဲစၢၤလၢယွၤအပဲတရီသီန့ၣ်, 11ဒီးပှၤလုၢ်တၢ်အဒိၣ်,ဒီးဝံတဖၣ်စံးဘၣ်ပဒိၣ်ဖးဒိၣ်,ဒီးပှၤဂီၢ်မုၢ်ခဲလၢာ်,ဒီးစံးဝဲဒၣ်,ပှၤတဂၤအံၤကြၢးဘၣ်တၢ်စံၣ်ညီၣ်သံလီၤ.အဂ့ၢ်ဒ်အံၤ,ကတိၤတၢ်လၢဝံကျိာ်ထီဒါဝ့ၢ်တဝ့ၢ်အံၤ,ဒ်သုနၢ်ဟူလၢသုနၢ်အသိးန့ၣ်လီၤ. 12ဒီးစီၤယံးရမံယၤကတိၤတၢ်ဒီးပဒိၣ်ဖးဒိၣ်ခဲလၢာ်,ဒီးပှၤဂီၢ်မုၢ်ခဲလၢာ်,ဒီးစံးဝဲဒၣ်,ယွၤမၢယကတိၤတၢ်လၢဝံကျိာ်ထီဒါဟံၣ်တဖျၢၣ်အံၤ,ဒီးဝ့ၢ်တဝ့ၢ်အံၤလၢကယဲၢ်တၢ်ကတိၤလၢသုနၢ်ဟူလီၤ. 13ဒီးခဲကနံၣ်အံၤ,မၤဂ့ၤထီၣ်သုကျဲဒီးသုမၤတၢ်,ဒီးကနၣ်ယွၤသုကစၢ်အကလုၢ်တက့ၢ်.ဒီးယွၤကပီၢ်ယၢ်လီၤက့ၤအသးလၢကယဲၢ်တၢ်အၢလၢအကတိၤတၢ်လၢသုဂ့ၢ်လီၤ. 14မ့မ့ၢ်ယဲဒၣ်အံၤ,ကွၢ်ကွၢ်,ယအိၣ်လၢသုစုပူၤလီၤ.မၤယၤဒ်တၢ်ဂ့ၤဝဲ,ဒီးတၢ်လိၤဝဲလၢသုမဲာ်ညါအသိးတက့ၢ်.ဘၣ်ဆၣ်ဒီးသ့ၣ်ညါသပှၢ်တၢၢ်,သုမ့ၢ်မၤသံယၤဒီး,သုကဒုးဟဲဘၣ်သုကစၢ်ဒၣ်သုဝဲ,ဒီးဝ့ၢ်တဝ့ၢ်အံၤ,ဒီးပှၤဝ့ၢ်ဖိတဖၣ်လၢတၢ်သွံၣ်လၢအတၢ်ဒဲးဘးတအိၣ်ဘၣ်တက့ၢ်. 15အဂ့ၢ်ဒ်အံၤ,ဒ်တၢ်မ့ၢ်တၢ်တီအသိးန့ၣ်ယွၤမၢလီၤယၤဆူသုအိၣ်ဒ်သိးယကကတိၤတၢ်ကတိၤခဲလၢာ်အံၤလၢသုနၢ်ပူၤလီၤ. 16ဒီးပဒိၣ်ဖးဒိၣ်တဖၣ်,ဒီးပှၤဂီၢ်မုၢ်ခဲလၢာ်စံးဘၣ်ပှၤလုၢ်တၢ်အဒိၣ်,ဒီးဝံတဖၣ်န့ၣ်,ပှၤတဂၤအံၤတကြၢးဘၣ်တၢ်စံၣ်ညီၣ်သံဘၣ်.အဂ့ၢ်ဒ်အံၤ,ကတိၤတၢ်ဒီးပှၤလၢပကစၢ်အမံၤလီၤ. 17ဒီးကီၢ်အပှၤသးပှၢ်တနီၤဂဲၤဆၢထၢၣ်,ဒီးစံးဘၣ်ပှၤဂီၢ်မုၢ်အတၢ်အိၣ်ဖှိၣ်,ဒီးစံးဝဲဒၣ်, 18ပှၤမိရၤၡးဖိစီၤမံၤကါကတိၤတၢ်လၢဝံကျိာ်လၢယူဒၤအစီၤပၤဃံးစကံယၤအမုၢ်နံၤတဖၣ်,ဒီးကတိၤတၢ်ဒီးယူဒၤအပှၤဂီၢ်မုၢ်ခဲလၢာ်,ဒီးစံးဝဲဒၣ်,တၢ်သုးမုၢ်အယွၤစံးဝဲဒၣ်,ပှၤကထဲၣ်စံယိၣ်ဒ်ဟီၣ်ခိၣ်တကဝီၤအသိး,ဒီးယရူၤၡလ့ၣ်ကကဲထီၣ်တၢ်အပူတဖၣ်,ဒီးဟံၣ်အကစၢၢ်န့ၣ်ကကဲထီၣ်ဒ်တၢ်အလီၢ်ထီၣ်ထီလၢပှၢ်လၢ်ကျါအသိးန့ၣ်လီၤ. 19ယူဒၤအစီၤပၤဃံးစကံယၤ,ဒီးယူဒၤခဲလၢာ်မ့ၢ်အမၤသံအီၤဧါ,မ့ၢ်အပျံၤယွၤဒီး,ဃ့ကညးယွၤအဘျုးအဖှိၣ်,ဒီးယွၤပီၢ်ယၢ်လီၤက့ၤအသးလၢတၢ်နးတၢ်ဖှီၣ်လၢအစံးအကမၤအီၤန့ၣ်တမ့ၢ်ဘၣ်ဧါ.ဒ်န့ၣ်အသိး,ပကမၤတၢ်အၢဖးဒိၣ်ထီဒါလီၤပသးဒၣ်ပဝဲလီၤ. 20ဒီးပှၤလၢအကတိၤတၢ်လၢဝံကျိာ်လၢယွၤအမံၤအိၣ်ဝဲစ့ၢ်ကီးတဂၤ,စီၤအူၤရံယၤ,စီၤၡမါယၤလၢကံးရယးယဧၤရံၣ်အပူၤအဖိခွါ,ဒီးကတိၤတၢ်လၢဝံအကျိာ်ထီဒါဝ့ၢ်တဝ့ၢ်အံၤ,ဒီးထီဒါကီၢ်တဘ့ၣ်အံၤဒ်စီၤယံးရမံယၤအတၢ်ကတိၤခဲလၢာ်အသိးန့ၣ်လီၤ. 21ဒီးတုၤစီၤယဟိၤယါကံၣ်ဒီးအပှၤဆူၣ်ဖိခဲလၢာ်,ဒီးအပဒိၣ်ဖးဒိၣ်ခဲလၢာ်န့ၣ်နၢ်ဟူအတၢ်ကတိၤဒီး,စီၤပၤဃုမၤသံအီၤလီၤ.ဒီးစီၤအူၤရံယၤနၢ်ဟူဝဲ,ဒီးပျံၤတၢ်,ဒီးဃ့ၢ်ဝဲ,ဒီးလဲၤလီၤဆူအဲၤကူပတူးအပူၤလီၤ. 22ဒီးစီၤပၤယဟိၤယါကံၣ်မၢလီၤပှၤကညီဆူအဲၤကူပတူးအပူၤ,စီၤဧးကဘိၢ်အဖိခွါစီၤအ့လနၤသၣ်,ဒီးပှၤတဖၣ်အိၣ်ဒီးအီၤဆူအဲၤကူပတူးအပူၤလီၤ. 23ဒီးအဝဲသ့ၣ်ဟဲစိာ်စီၤအူၤရံယၤလၢအဲၤကူပတူးအပူၤ,ဒီးဟဲစိာ်အီၤဆူစီၤပၤယဟိၤယါကံၣ်အအိၣ်,ဒီးအဝဲဒၣ်မၤသံအီၤလၢနး,ဒီးမၢပှၤကွံာ်တ့ၢ်ကွံာ်အစိၣ်လၢပှၤဖှီၣ်ဖိယာ်ဖိအသွၣ်ခိၣ်ပူၤလီၤ. 24ဘၣ်ဆၣ်ဒီးစီၤၡၤဖၣ်အဖိခွါစီၤအဃံကၣ်အစုအိၣ်ဝဲဒီးစီၤယံးရမံယၤဒ်သိးပှၤအသုတဟ့ၣ်လီၤကွံာ်အီၤဆူပှၤဂီၢ်မုၢ်အစုပူၤလၢအကမၤသံအီၤတဂ့ၤန့ၣ်လီၤ.
Copyright information for
KswSKMB