Jeremiah 35
1ယွၤအကလုၢ်လၢအဘၣ်စီၤယံးရမံယၤလၢယူဒၤအစီၤပၤစီၤယိၤၡံယၤအဖိခွါစီၤယဟိၤယါကံၣ်အမုၢ်နံၤတဖၣ်န့ၣ်,ဒီးစံးဝဲဒၣ်, 2လဲၤဆူပှၤရ့ကးဖိအဟံၣ်ပူၤ,ဒီးကတိၤတၢ်ဒီးအီၤ,ဒီးဒုးဟဲအီၤဆူယွၤအဟံၣ်အဒၢးတဖျၢၣ်အပူၤ,ဒီးဟ့ၣ်အီအီၤလၢစပံးထံတက့ၢ်. 3ဒီးယဟံးန့ၢ်စီၤဃဘၤစံနယၤအဖိခွါစီၤယံးရမံယၤအဖိခွါစီၤယၤစါနယၤ,ဒီးအဒီပုၢ်ဝဲၢ်,ဒီးအဖိခွါခဲလၢာ်,ဒီးစီၤရ့ကးအပှၤဟံၣ်ဖိခဲလၢာ်, 4ဒီးယဒုးဟဲနုာ်အီၤလၢယွၤအဟံၣ်ပူၤဆူယွၤအပှၤကညီစီၤယံးကဒးလယၤအဖိခွါစီၤဃၤနၣ်အဖိခွါတဖၣ်အဒၢးပူၤလၢအအိၣ်ဝဲလၢပဒိၣ်ဖးဒိၣ်တဖၣ်အဒၢးပူၤလၢအအိၣ်ဝဲလၢပဒိၣ်ဖးဒိၣ်တဖၣ်အဒၢးဃၢၤလၢအအိၣ်ဝဲလၢပှၤပၢၤတြဲၤစီၤၡၤလူၣ်အဖိခွါစီၤမၤစ့ယၤအဒၢးအဖီခိၣ်လီၤ. 5ဒီးယပာ်သလၢပှဲၤဒီးစပံးထံ,ဒီးလီခီတဖၣ်,ဒီးယစံးအီၤ,အီစပံးထံတက့ၢ်. 6ဒီးအဝဲသ့ၣ်တဖၣ်န့ၣ်စံးဝဲဒၣ်,ပတအီဘၣ်စပံးထံဘၣ်.အဂ့ၢ်ဒ်အံၤ,ပပၢ်စီၤရ့ကးအဖိခွါစီၤယိၤနဒာ်မၤလိာ်ပှၤဒီးစံးဝဲဒၣ်,သုတအီစပံးထံတဂ့ၤ,သုဝဲ,ဒီးသုဖိခွါတဖၣ်လီၤထူလီၤယိာ်,အီတဂ့ၤ. 7သုတမၤဟံၣ်တဂ့ၤ,သုတဖှံတၢ်အချံတဂ့ၤ,သုတသူၣ်စပံးအလီၢ်တဂ့ၤ.ဒီးအိၣ်ဒီးအီၤတဂ့ၤ.အိၣ်သုဝဲဆိးသုဝဲလၢဒဲပူၤတစိၤဒၣ်သု,ဒ်သိးသုကမူအါနံၤအါသီလၢကီၢ်ပူၤဖဲသုမ့ၢ်ပှၤတခီဘီမုၢ်ဖိတက့ၢ်. 8ဒီးပစူၢ်ပပၢ်စီၤရ့ကးအဖိခွါစီၤယိၤနဒာ်အကလုၢ်လၢကယဲၢ်အတၢ်မၤလိာ်ပှၤခဲလၢာ်,ဒ်သိးပသုတအီစပံးထံတစိၤဒၣ်ပှၤ,ပဝဲဒၣ်,ဒီးပမါ,ဒီးပဖိခွါ,ဒီးပဖိမုၣ်တဂ့ၤ. 9ဒီးဒ်သိးပသုတမၤဟံၣ်လၢပကအိၣ်ကဆိးလၢအပူၤတဂ့ၤ.ဒီးစပံးအလီၢ်မ့ၢ်ဂ့ၤ,ဟီၣ်ခိၣ်အကဝီၤမ့ၢ်ဂ့ၤ,တၢ်အချံအသၣ်မ့ၢ်ဂ့ၤ,တအိၣ်ဘၣ်ဒီးပှၤဘၣ်. 10မ့ၢ်ပအိၣ်ပဆိးလၢဒဲပူၤ,ဒီးပစူၢ်တ့ၢ်,ဒီးပမၤတ့ၢ်ဒ်ကယဲၢ်တၢ်လၢပပၢ်စီၤယိၤနဒာ်မၤလိာ်ပှၤအသိးန့ၣ်လီၤ. 11ဒီးတုၤဘၤဘူၤလိၣ်အစီၤပၤနဘူၤကးန့စၢ်ဟဲထီၣ်ဆူကီၢ်ပူၤဒီး,တၢ်မၤအသးလၢပစံး,ဟဲ,လဲၤသကိးဆူယရူၤၡလ့ၣ်အပူၤလၢပှၤက့ၤစ့းဖိအသုးမုၢ်အမဲာ်ညါ,ဒီးပှၤစူၤရံဖိအသုးမုၢ်အမဲာ်ညါတက့ၢ်.မၤသးဒ်န့ၣ်ဒီးပအိၣ်ပဆိးလၢယရူၤၡလ့ၣ်အပူၤလီၤ. 12တုၤနုၤတဘျီယွၤအကလုၢ်ဘၣ်စီၤယံးရမံယၤဒီးစံးဝဲဒၣ်, 13တၢ်သုးမုၢ်ဂီၢ်မုၢ်အယွၤအံၣ်စရ့လးအကစၢ်စံးဒ်အံၤ,လဲၤစံးဘၣ်ယူဒၤအပှၤကညီ,ဒီးပှၤယရူၤၡလ့ၣ်ဖိ,သုတဒိးဘၣ်တၢ်သိၣ်က့ၤသီက့ၤဒ်သိးသုကကနၣ်ယကလုၢ်ဘၣ်ဧါ.ယွၤစံးဝဲဒၣ်. 14စီၤရ့ကးအဖိခွါစီၤယိၤနဒာ်အတၢ်ကတိၤလၢအမၤလိာ်အဖိခွါတဖၣ်ဒ်သိးအသုတအီစပံးထံတဂ့ၤန့ၣ်ပှၤတိၢ်န့ၢ်အီၤလီၤ.အဂ့ၢ်ဒ်အံၤ,အဝဲသ့ၣ်တအီဘၣ်ဝဲတုၤမုၢ်မဆါတနံၤအံၤ,ဒီးတိၢ်န့ၢ်အပၢ်အကလုၢ်လီၤ.ဒီးယကတိၤတၢ်ဒီးသု,ယဂဲၤဆၢထၢၣ်ဂီၤဂီၤဒီးယကတိၤတၢ်ဘၣ်ဆၣ်ဒီး,သုတကနၣ်ဘၣ်ယကလုၢ်ဘၣ်. 15ဒီးယမၢလီၤယခ့ယပှၤခဲလၢာ်,ဝံတဖၣ်ဆူသုအိၣ်,ယဂဲၤဆၢထၢၣ်ဂီၤဂီၤဒီးမၢလီၤအီၤ,ဒီးစံးဘၣ်အီၤဃၣ်ကွံာ်သုသးတဂၤလၢအကျဲဒၢဒၣ်ဝဲ,တဂၤလၢအကျဲအၢဒၣ်ဝဲ,ဒီးမၤဂ့ၤထီၣ်သုမၤတၢ်တက့ၢ်.ဒီးလဲၤပိာ်ကစၢ်အဂၤတဖၣ်အခံလၢသုကမၤအတၢ်တဂ့ၤ,ဒီးသုကအိၣ်ကဆိးလၢကီၢ်အပူၤလၢယဟ့ၣ်သုဒီးသုပၢ်တဖၣ်လီၤ.ဘၣ်ဆၣ်ဒီးသုတဒိးနူၤဒိးနၢ်ဘၣ်,ဒီးသုတကနၣ်ဘၣ်ယကလုၢ်ဘၣ်. 16စီၤရ့ကးအဖိခွါစီၤယိၤနဒာ်အဖိခွါတဖၣ်တိၢ်န့ၢ်အပၢ်အတၢ်မၤလိာ်လၢအမၤလိာ်အီၤလီၤ.မ့မ့ၢ်ပှၤဂီၢ်မုၢ်အံၤတကနၣ်ဘၣ်ယကလုၢ်ဘၣ်. 17မၤသးဒ်န့ၣ်ဒီးတၢ်သုးမုၢ်ဂီၢ်မုၢ်အယွၤ,အံၣ်စရ့လးအကစၢ်စံးဒ်အံၤ,ကွၢ်ကွၢ်,ယကဒုးဟဲဘၣ်ပှၤယူဒၤဖိဒီးပှၤယရူၤၡလ့ၣ်ဖိခဲလၢာ်လၢကယဲၢ်တၢ်အၢလၢယကတိၤတၢ်လၢအဂ့ၢ်လီၤ.အဂ့ၢ်ဒ်အံၤ,ယကတိၤလံတၢ်,ဒီးအဝဲသ့ၣ်တကနၣ်ဘၣ်.ယကိးလံအီၤ,ဒီးအဝဲသ့ၣ်တစံးဆၢဘၣ်တၢ်ဘၣ်. 18ဒီးစီၤယံးရမံယၤစံးဘၣ်စီၤရ့ကးအပှၤဟံၣ်ဖိ,တၢ်သုးမုၢ်ဂီၢ်မုၢ်အယွၤ,အံၣ်စရ့လးအကစၢ်စံးဒ်အံၤ,မ့ၢ်သုစူၢ်သုပၢ်စီၤယိၤနဒာ်အတၢ်မၤလိာ်,ဒီးတိၢ်န့ၢ်အတၢ်သိၣ်က့ၤသီက့ၤခဲလၢာ်,ဒီးမၤဒ်ကယဲၢ်တၢ်လၢအမၤလိာ်သုအသိးန့ၣ်ဒီး, 19တၢ်သုးမုၢ်ဂီၢ်မုၢ်အယွၤ,အံၣ်စရ့လးအကစၢ်စံးဒ်အံၤ,စီၤရ့ကးအဖိခွါစီၤယိၤနဒာ်ကအိၣ်ဒီးပှၤကညီလၢအကဆၢထၢၣ်လၢယမဲာ်ညါလီၤထူလီၤယိာ်လီၤ.
Copyright information for
KswSKMB