Jeremiah 41
1ဒီးတၢ်မၤအသးလၢလါနွံလါတလါန့ၣ်စီၤအလံၡမၤအဖိခွါ,စီးနသၤနံယၤအဖိခွါ,စီၤယံးၡမၤအ့လး,စီၤပၤအစၢၤအသွဲၣ်တဂၤ,ဒီးစီၤပၤအပဒိၣ်ဖးဒိၣ်တဖၣ်,ဒီးပှၤဆံဆဲၣ်ဂၤအိၣ်ဒီးအီၤန့ၣ်ဟဲဝဲဆူစီၤအဃံကၣ်အဖိခွါစီၤကဒါလယၤအအိၣ်,ဆူမံးစပၤအပူၤ,ဒီးအီၣ်ကိၣ်တပူၤဃီလၢမံးစပၤအပူၤလီၤ. 2ဒီးစီၤနသၤနံယၤအဖိခွါစီၤယံးၡမၤအ့လး,ဒီးပှၤဆံဆဲၣ်ဂၤလၢအအိၣ်ဒီးအီၤဂဲၤဆၢထၢၣ်ကျီကွံာ်စီၤၡဖၣ်အဖိခွါ,စီၤအဃံကၣ်အဖိခွါ,စီၤကဒါလယၤလၢနး,ဒီးမၤသံပှၤလၢဘၤဘူၤလိၣ်အစီၤပၤပာ်လၢကီၢ်အဖီခိၣ်လီၤ. 3ဒီးစီၤယံးၡမၤအ့လးမၤသံစ့ၢ်ကီးကယဲၢ်ပှၤယူဒၤဖိလၢအအိၣ်ဝဲဒီးစီၤကဒါလယၤလၢမံးစပၤအပူၤခဲလၢာ်,ဒီးပှၤက့ၤစ့းဖိအပှၤသုးဖိလၢအအိၣ်ဖဲန့ၣ်လီၤ. 4ဒီးလၢအမၤသံစီၤကဒါလယၤအလီၢ်ခံပှဲၤထီၣ်ခံနံၤတနံၤ,ဒီးပှၤတသ့ၣ်ညါဘၣ်နီတဂၤဘၣ်န့ၣ်, 5တၢ်မၤအသးလၢပှၤဃိးဆံဟဲဝဲလၢၡက့ၣ်,လၢၡံလိၤ,ဒီးလၢၡၤမရံ,ဒီးအခၣ်ဆူၣ်လူၤအသး,ဒီးအကူအသိးယာ်,ဒီးဂဲာ်လီၤတ့ၢ်ဒၣ်အသး,ဒီးအိၣ်ဝဲဒီးတၢ်မၤဘူၣ်ကိၣ်,ဒီးလီၢ်ဘၣ်လၢအစုပူၤဒ်သိးကဟဲစိာ်ဝဲဆူယွၤအဟံၣ်ပူၤလီၤ. 6ဒီးစီၤနသၤနံယၤအဖိခွါစီၤယံးၡမၤအ့လးလဲၤသဂၢၢ်ထီၣ်အီၤလၢမံးစပၤ,ဒီးလဲၤဟီၣ်လဲၤဟီၣ်,ဒီးတုၤအတုၤလၢအအိၣ်ဒီး,တၢ်မၤအသးလၢအစံးဘၣ်အီၤ,ဟဲဆူစီၤအဃံကၣ်အဖိခွါစီၤကဒါလယၤအအိၣ်တက့ၢ်. 7ဒီးတုၤအဟဲနုာ်လၢဝ့ၢ်အသးကံၢ်ပူၤဒီး,တၢ်မၤအသးလၢစီၤနသၤနံယၤအဖိခွါစီၤယံးၡမၤအ့လးမၤသံအီၤ,ဒီးကွံာ်လီၤကွံာ်အီၤလၢတၢ်ပူၤအသးကံၢ်ပူၤ,အဝဲဒၣ်ဒီးပှၤကညီတဖၣ်လၢအအိၣ်ဝဲဒီးအီၤလီၤ. 8ဘၣ်ဆၣ်ဒီးပှၤဆံဆဲၣ်ဂၤအိၣ်ဝဲလၢအကျါလၢအစံးလၢစီၤယံးၡမၤအ့လး,မၤသံပှၤတဂ့ၤ,အဂ့ၢ်ဒ်အံၤ,ပအိၣ်ဒီးဘုကၠူၣ်,ဒီးဘုမုယီၤ,ဒီးသိဧိၤချါဧိၤ,ဒီးကနဲစီပာ်ဖှိၣ်အသးလၢစံာ်ပူၤလီၤ.ဒီးဆိတ့ၢ်ဝဲ,ဒီးတမၤသံဘၣ်အီၤလၢအဒီပုၢ်ဝဲၢ်အကျါဘၣ်. 9ဒီးတၢ်ပူၤလၢစီၤယံးၡမၤအ့လးကွံာ်လီၤကွံာ်ပှၤကညီအစိၣ်လၢအမၤသံအီၤလၢအအိၣ်ဝဲလၢစီၤကဒါလယၤအဃၢၤန့ၣ်မ့ၢ်တၢ်ပူၤလၢစီၤပၤအၤစါခူၣ်လီၤဝဲလၢပှၤအံၣ်စရ့လးအစီၤပၤဘါၡၤအဃိလီၤ.စီၤနသၤနံယၤအဖိခွါစီၤယံးၡမၤအ့လးန့ၣ်မၤပှဲၤဝဲလၢပှၤဘၣ်တၢ်မၤသံအီၤလီၤ. 10ဒီးစီၤယံးၡမၤအ့လးစိာ်မၢကဲကုၢ်ကယဲၢ်ပှၤဂီၢ်မုၢ်လၢအအိၣ်လီၤတဲာ်လၢမံးစပၤအပူၤ,စီၤပၤအဖိမုၣ်တဖၣ်,ဒီးကယဲၢ်ပှၤဂီၢ်မုၢ်လၢအအိၣ်လီၤတဲာ်လၢမံးစပၤလၢပှၤပၢၤတၢ်ဖိအခိၣ်စီၤနဘူစၢ်ရဒၣ်ပာ်လီၤဝဲလၢစီၤအဃံကၣ်အဖိခွါစီၤကဒါလယၤအစုပူၤလီၤ.ဒီးစီၤနသၤနံယၤအဖိခွါစီၤယံးၡမၤအ့လးစိာ်မၢကဲကုၢ်အီၤ,ဒီးဟးဝဲဒ်သိးအကလဲၤထီၣ်ဝဲဆူပှၤဧၣ်မိၣ်မိအအိၣ်လီၤ. 11ဒီးတုၤစီၤကါရ့ၤအဖိခွါစီၤယိဃၤနၣ်,ဒီးပှၤသုးဖိအခိၣ်လၢအအိၣ်ဝဲဒီးအီၤခဲလၢာ်န့ၣ်နၢ်ဟူဝဲလၢကယဲၢ်တၢ်အၢလၢစီၤနသၤနံယၤအဖိခွါစီၤယံးၡမၤအ့လးမၤဝဲဒီး, 12ဟံးန့ၢ်ပှၤကညီခဲလၢာ်,ဒီးလဲၤဒုးတၢ်ဒီးစီၤနသၤနံယၤအဖိခွါစီၤယံးၡမၤအ့လး,ဒီးထံၣ်န့ၢ်အီၤလၢထံဖးဒိၣ်အဃၢၤလၢအအိၣ်ဝဲလၢကံးဘိၣ်အပူၤလီၤ. 13ဒီးတုၤပှၤဂီၢ်မုၢ်လၢအအိၣ်ဝဲဒီးစီၤယံးၡမၤအ့လးခဲလၢာ်ထံၣ်ဘၣ်စီၤကါရ့ၤအဖိခွါ,စီၤယိဃၤနၣ်,ဒီးပှၤသုးမုၢ်အခိၣ်လၢအအိၣ်ဝဲဒီးအီၤခဲလၢာ်ဒီး,တၢ်မၤအသးလၢအသူၣ်ခုသးခုဝဲလီၤ. 14ဒီးကယဲၢ်ပှၤလၢစီၤယံးၡမၤအ့လးစိာ်ထီၣ်မၢကဲကုၢ်လၢမံးစပၤခဲလၢာ်န့ၣ်ဃၣ်ကဒါက့ၤအသး,ဒီးဟဲက့ၤကဒါက့ၤ,ဒီးလဲၤဝဲဆူစီၤကါရ့ၤအဖိခွါစီၤယိဃၤနၣ်အအိၣ်လီၤ. 15ဘၣ်ဆၣ်ဒီးစီၤနသၤနံယၤအဖိခွါစီၤယံးၡမၤအ့လး,ဒီးပှၤဃိးဂၤန့ၣ်ပူၤဖျဲးလၢစီၤယိဃၤနၣ်အစုပူၤ,ဒီးလဲၤဝဲဆူပှၤဧၣ်မိၣ်ဖိအအိၣ်လီၤ. 16တုၤနုၤတဘျီစီၤကါရ့ၤအဖိခွါစီၤယိဃၤနၣ်,ဒီးပှၤသုးမုၢ်အခိၣ်လၢအအိၣ်ဝဲဒီးအီၤခဲလၢာ်,ဟံးန့ၢ်ပှၤဂီၢ်မုၢ်လၢအအိၣ်လီၤတဲာ်လၢအမၤန့ၢ်လၢစီၤနသၤနံယၤအဖိခွါစီၤယံးၡမၤအ့လးအစုပူၤလၢအမၤသံစီၤအဃံကၣ်အဖိခွါစီၤကဒါလယၤအလီၢ်ခံန့ၣ်,ပှၤအဆူၣ်ပှၤသုးဖိ,ဒီးပိာ်မုၣ်,ဒီးဖိဒံဖိသၣ်,ဒီးပှၤဒ့ဒံၣ်လၢအဟဲက့ၤစိာ်လၢကံးဘိၣ်, 17ဒီးဟးဝဲ,ဒီးအိၣ်ဝဲလၢကံးမဟၣ်အအိၣ်အဆိးအလီၢ်လၢအအိၣ်ဝဲလၢဘ့ၤသလ့ဃ့ၢ်အဃၢၤဒ်သိးအအကလဲၤနုာ်လၢအဲၤကူပတူးအပူၤလၢပှၤက့ၤစ့းဖိအဃိန့ၣ်လီၤ. 18မ့ၢ်အပျံၤအီၤအဂ့ၢ်လီၤ.အဂ့ၢ်ဒ်အံၤ,စီၤနသၤနံယၤအဖိခွါစီၤယံးၡမၤအ့လးမၤသံတ့ၢ်စီၤအဃံကၣ်အဖိခွါစီၤကဒါလယၤလၢဘၤဘူၤလိၣ်အစီၤပၤပာ်လီၤဝဲလၢကီၢ်အဖီခိၣ်လီၤ.
Copyright information for
KswSKMB