‏ Jeremiah 48

လၢမိၤအးအဂ့ၢ်.

1တၢ်သုးမုၢ်ဂီၢ်မုၢ်အယွၤစံး,အံၣ်စရ့လးအကစၢ်စံးဒ်အံၤ,နဘိဘၣ်အဖှီၣ်လီၤ.အဂ့ၢ်ဒ်အံၤ,အိၣ်သယုၢ်ဝဲလီၤ.ကံးရယးသံၣ်ပာ်ဆှးအမဲာ်,ပှၤမၤန့ၢ်အီၤ,မးစကာ်ပာ်ဆှးအမဲာ်,ဒီးဘၣ်ယိၣ်တၢ်လီၤ.

2မိၤအးအစံးထီၣ်ပတြၢၤလီၤအသးလၢဃ့ၡဘိၣ်အဃိန့ၣ်တအိၣ်လၢၤဘၣ်.ပှၤကူၣ်လံတၢ်အၢထီဒါအီၤလီၤ.စံးဝဲဒၣ်,ဟဲ,ဒီၣ်တဲာ်သကိးအီၤလၢပှၤကလုာ်တဖၣ်အကျါတက့ၢ်.ဒီးမးဒမၣ်ဧၢ,နကတုၤလၢတၢ်ဟးဂီၤ,နးဧိၤဘီဧိၤကလူၤနၤလီၤ.

3တၢ်ကဲးပသူထီၣ်အသီၣ်ဟူထီၣ်ဝဲလၢဃိရနဲၣ်,တၢ်မၤသယုၢ်,ဒီးတၢ်မၤဟးဂီၤဖးဒိၣ်လီၤ. 4မိၤအးဟးဂီၤလံ,အဖိဒံဖိသၣ်ကဲးပသူထီၣ်လီၤ.

5မ့ၢ်မးဖဲတၢ်လဲၤထီၣ်ဆူလူဃံးန့ၣ်ပှၤဟီၣ်ဝဲပိာ်ပှၤဟီၣ်ဝဲအခံလီၤ.မ့ၢ်မးဖဲတၢ်လဲၤလီၤဆူဃိရနဲၣ်န့ၣ်တၢ်အဒုၣ်အဒါနၢ်ဟူတၢ်ဟးဂီၤအသီၣ်လီၤ.

6ဃ့ၢ်တၢ်,မၤပူၤမၤဖျဲးသုသး,ဒီးအိၣ်ဒ်ပထိးသ့ၣ်ဧၢ်ရၢ်အသိးန့ၣ်တက့ၢ်.

7အဂ့ၢ်ဒ်အံၤ,မ့ၢ်နသန့ၤနသးလၢနမၤတၢ်,ဒီးနပာ်ဖှိၣ်တၢ်ဒီး,တၢ်ကမၤန့ၢ်နၤစ့ၢ်ကီးလီၤ.ဒီးကမိၣ်ကဘၣ်လဲၤကဲကုၢ်,အပှၤလုၢ်တၢ်အဒိၣ်တဖၣ်,ဒီးအပဒိၣ်ဖးဒိၣ်တဖၣ်တပူၤဃီလီၤ. 8ဒီးတၢ်မၤဟးဂီၤတၢ်ကဟဲထီၣ်ဘၣ်ဝ့ၢ်ကိးဖျၢၣ်ဒဲး,ဒီးဝ့ၢ်တပူၤတဖျဲးဘၣ်နီတဖျၢၣ်ဘၣ်.ကစၢၢ်ကဆူးကဟးဂီၤစ့ၢ်ကီး,ဒီးတၢ်ကမၤဟးဂီၤတၢ်ပျီပူၤ,ဒ်ယွၤကတိၤတၢ်အသိးန့ၣ်လီၤ.

9ဟ့ၣ်မိၤအးလၢဒံးဆ့ဒ်သိးအကယူၤဝဲဒီးပူၤဖျဲးတက့ၢ်.အဂ့ၢ်ဒ်အံၤ,အဝ့ၢ်တဖၣ်န့ၣ်ကအိၣ်သယုၢ်,ဒီးပှၤအိၣ်ဝဲဆိးဝဲလၢအပူၤတအိၣ်ဘၣ်နီတဂၤဘၣ်.

10ပှၤလၢအမၤယွၤအတၢ်မၤလၢတၢ်ကၢၣ်တၢ်ကျူန့ၣ်,မ်အဘၣ်ဆိၣ်အၢတက့ၢ်.ဒီးပှၤလၢအတြီအနးဒီးတၢ်သွံၣ်န့ၣ်မ်အဘၣ်ဆိၣ်အၢတက့ၢ်.

11မိၤအးအိၣ်ဘှံးဝဲလၢအဖိၣ်သၣ်ခွါထီၣ်လံၤလံၤ,ဒီးအိၣ်ဝဲဆိးဝဲလၢအသံးအကာ်အဖီခိၣ်,ဒီးတၢ်တလူလီၤအီၤလၢလီခီအပူၤဆူလီခီအပူၤဘၣ်,ဒီးတလဲၤကဲကုၢ်ဘၣ်,မၤသးဒ်န့ၣ်ဒီးအတၢ်ဝံၣ်တၢ်ဆၢန့ၣ်အိၣ်ဝဲဒီးအီၤ,ဒီးအစိအိၣ်ဒၣ်တၢ်လီၤ.

12မၤသးဒ်န့ၣ်ဒီးကွၢ်ကွၢ်,ယွၤစံးဝဲဒၣ်,မုၢ်နံၤတဖၣ်ကဟဲလၢယကမၢလီၤပှၤဘိးတခံၣ်ဖိလၢအကဘိးတခံၣ်အီၤ,ဒီးကမၤစီအတၢ်ပူၤတၢ်လီၢ်,ဒီးကမၤဟးဂီၤအထံဒၢတၢ်ဖံးလီၤ.

13ဒီးမိၤအးအမဲာ်ကဆှးလၢကမိၣ်အဃိ,ဒ်အံၣ်စရ့လးအပှၤဟံၣ်ဖိအမဲာ်ဆှးလၢတၢ်လၢအသန့ၤအသးလၢအီၤ,ဘ့ၤသ့လးအဃိအသိးန့ၣ်လီၤ.

14ပမ့ၢ်ပှၤအဆူၣ်,ဒီးပှၤအိၣ်ဒီးအဂံၢ်ဆူၣ်အဘါဆူၣ်လၢဒုးသုးအဂီၢ်န့ၣ်သုစံးကသ့ဒ်လဲၣ်. 15မိၤအးဟးဂီၤလံ,ဒီးအဝ့ၢ်တဖၣ်န့ၣ်လဲၤထီၣ်လံလၢမ့ၣ်ခုၣ်လံ.ဒီးအဖိၣ်သၣ်ခွါလၢတၢ်ဃုထၢအီၤတဖၣ်န့ၣ်လဲၤလီၤလံဆူတၢ်မၤသံအပူၤလံ.စီၤပၤလၢအမံၤမ့ၢ်တၢ်သုးမုၢ်ဂီၢ်မုၢ်အယွၤစံးဝဲဒၣ်. 16တၢ်မၤဟးဂီၤမိၤအးအိၣ်ဘူးတ့ၢ်လံ,ဒီးအတၢ်မၤအၢအီၤန့ၣ်ဟဲချ့ချ့လီၤ. 17ကယဲၢ်ပှၤအိၣ်ဝးတရံးအီၤခဲလၢာ်သ့ၣ်ဧၢ,ဟီၣ်လၢအဃိတက့ၢ်.ဒီးကယဲၢ်ပှၤလၢအသ့ၣ်ညါအမံၤခဲလၢာ်န့ၣ်မ်အစံး,စီၤပၤအနီၣ်ထိးဆူၣ်,နီၣ်ထိးဘိအဃံအလၤန့ၣ်ကၢ်ဝဲဒ်လဲၣ်.

18ဖိမုၣ်လၢအအိၣ်အဆိးလၢဒံၤဘိၣ်တဂၤဧၢ,ဟဲလီၤလၢနတၢ်လၤကပီၤ,ဒီးဆ့ၣ်နီၤလၢတၢ်သူနသးလၢထံအပူၤတက့ၢ်.အဂ့ၢ်ဒ်အံၤ,တၢ်မၤဟးဂီၤမိၤအးကဟဲထီၣ်ဘၣ်နၤ,ကမၤဟးဂီၤနတိာ်နတာ်လီၤ. 19ပှၤအိၣ်ဝဲဆိးဝဲလၢဧရိၤဧ့ၢ်ဧၢ,ဆၢထၢၣ်လၢကျဲပူၤ,ဒီးကွၢ်တၢ်ဒီးသံကွၢ်ပှၤလၢအဃ့ၢ်ဝဲ,ဒီးပှၤလၢအပူၤဖျဲးဝဲ,ဒီးစံး,တၢ်မၤအသးဒ်လဲၣ်.

20မိၤအးအမဲာ်ဆှးလံ.အဂ့ၢ်ဒ်အံၤ,လီၤပှီၢ်လံ.ဟီၣ်ပသူထီၣ်,ဒီးကိးထီၣ်တက့ၢ်.စံၣ်တဲၤတဲလီၤ,မိၤအးဟးဂီၤလံန့ၣ်လၢအၢ်နိၢ်အပူၤတက့ၢ်. 21ဒီးတၢ်စံၣ်ညီၣ်ဘၣ်တၢ်ပၢၤခိၣ်,လၢဃိလိၣ်အလိၤ,ဒီးလၢယးဟစၤအလိၤ,ဒီးလၢမ့ဖၤအလိၤ, 22ဒီးလၢဒံၤဘိၣ်အလိၤ,ဒီးလၢနဘိအလိၤ,ဒီးလၢဘ့ၤသဒံးဘလၤသံၣ်အလိၤ, 23ဒီးလၢကံးယရးသံၣ်အလိၤ,ဒီးလၢဘ့ၤသကၤမူလးအလိၤ,ဒီးလၢဘ့ၤသမဧိၣ်အလိၤ. 24ဒီးလၢကရံးယိးအလိၤ,ဒီးလၢဘိးစရၤအလိၤ,ဒီးလၢအယံၤမ့ၢ်ဂ့ၤ,လၢအဘူးမ့ၢ်ဂ့ၤလၢကီၢ်မိၤအးအဝ့ၢ်ခဲလၢာ်အလိၤလီၤ. 25တၢ်ဒီၣ်တဲာ်လံမိၤအးအနၢၤလံ,ဒီးအစုကၢ်လံ,ယွၤစံးဝဲဒၣ်.

26ဒုးအီမူၤအီၤတက့ၢ်.အဂ့ၢ်ဒ်အံၤ,ပာ်ဒိၣ်ထီၣ်အသးလၢယွၤအဖီခိၣ်လီၤ.ဒိးမိၤအးကကလိာ်အသးလၢအဘှိးထီၣ်တၢ်အပူၤ,ဒီးကကဲထီၣ်တၢ်နံၤဘၣ်ဖၣ်လဲအလီၢ်လီၤ.

27အဂ့ၢ်ဒ်အံၤ,အံၣ်စရ့လးကဲထီၣ်တၢ်နံၤဘၣ်ဖၣ်လဲအလီၢ်လၢနဂီၢ်,တမ့ၢ်ဘၣ်ဧါ.ပှၤထံၣ်န့ၢ်အီၤလၢပှၤဟုၣ်တၢ်ဖိအကျါစ့ၢ်ကီးဧါ.အဂ့ၢ်ဒ်အံၤ,ဖဲဒၣ်နကတိၤတၢ်လၢအဂ့ၢ်ဒီး,နဂံၤဂုၤနခိၣ်လီၤ.

28ပှၤလၢအအိၣ်ဝဲဆိးဝဲလၢမိၤအးအပူၤသ့ၣ်ဧၢ,လဲၤသဒၣ်ဝ့ၢ်တဖၣ်,ဒီးအိၣ်ဒီးဆိးလၢလၢၢ်အိပူၤတက့ၢ်.ဒီးအိၣ်ဒ်ထိၣ်လွံၢ်လၢအမၤအသွံလၢတၢ်အိပူၤအခိၣ်ထိးအကပၤအသိးန့ၣ်တက့ၢ်.

29ပနၢ်ဟူလံလၢမိၤအးအသးထီၣ်ထီန့ၣ်အဂ့ၢ်အကျိၤ,လၢအပာ်အသးထီၣ်ထီနးမး,ပာ်ဒိၣ်အသး,ဒီးပာ်အသးကဖိလိ,ဒီးပာ်ကဖိအသး,ဒီးပာ်အသးကဖၢလၢန့ၣ်လီၤ.

30ယွၤစံးဝဲဒၣ်,အသးကဲၤထီၣ်န့ၣ်ယသ့ၣ်ညါလၢအမ့ၢ်တၢ်ကလီကလီ,ဒီးအပာ်ကဖၢလၢအသးန့ၣ်တမၤကဲထီၣ်တၢ်နီတမံၤဘၣ်လီၤ.

31မၤသးဒ်န့ၣ်ဒီးယကဟီၣ်လၢမိၤအးအဃိ,ဒီးယကကိးပသူထီၣ်လၢမိၤအးခဲလၢာ်အဃိလီၤ.ဟီၣ်တၢ်ယၢၤတၢ်လၢကံၢ်ဃ့ရ့းအပှၤကညီအဃိတက့ၢ်.

32စံဘမၤအစပံးမုၢ်ဧၢ,ယကဟီၣ်လၢနဃိလၢယၤစ့ၢ်အတၢ်ဟီၣ်လီၤ.နဒ့နဖီလဲၤခီဂာ်ပီၣ်လဲၣ်ပၢၢ်လၢပီၣ်လဲၣ်ယၤစ့ၢ်လီၤ.တၢ်မၤဟးဂီၤတၢ်လီၤဘၣ်လၢနတၢ်ကိၢ်အကတီၢ်အတၤသၣ်အဖီခိၣ်,ဒီးလၢနစပံးသၣ်အဖီခိၣ်န့ၣ်လီၤ.

33တၢ်ထုးထီၣ်ကွံာ်တၢ်သူၣ်ခုသးခု,ဒီးတၢ်သူၣ်ဖှံသးညီလၢတၤသၣ်အလီၢ်,ဒီးလၢကီၢ်မိၤအးအပူၤလီၤ.ယမၤလၢာ်စပံးထံလၢနီၢ်စံၢ်စပံးသၣ်အပူၤလီၤ.ပှၤတယီၢ်လၢၤဘၣ်အိၣ်ဒီးတၢ်ကိးပသူထီၣ်န့ၣ်ဘၣ်.တၢ်ကိးပသူထီၣ်န့ၣ်တမ့ၢ်လၢၤဘၣ်တၢ်ကိးပသူထီၣ်ဘၣ်.

34ထုထီၣ်အကလုၢ်လၢဃ့ၡဘိၣ်လၢအကိးထီၣ်ပၢၢ်လၢအ့လဧၤလ့ၤ,ပၢၢ်လၢယၤစ့ၢ်န့ၣ်,လၢစိဧၢ်ပၢၢ်လၢဃိရနဲၣ်,ဂီၤဖံးမိၢ်အသးပှၢ်သၢနံၣ်လီၤ.အဂ့ၢ်ဒ်အံၤ,နံးမရံအထံတဖၣ်အိၣ်သယုၢ်ဝဲလီၤ. 35ဒီးယွၤစံးဝဲဒၣ်,ယကမၤလၢာ်ပှၤလၢအလုၢ်တၢ်လၢတၢ်ထီၣ်ထီ,ဒီးလၢအဆိၣ်ကဲၤမ့ၣ်အူလၢအကစၢ်တဖၣ်အဂီၢ်လၢမိၤအးအပူၤလီၤ.

36မၤသးဒ်န့ၣ်ဒီးယသးသီၣ်ထီၣ်ဒ်ပံဧိၤမီဧိၤအသိးလၢမိၤအးအဃိ,ယသးသီၣ်ထီၣ်ဒ်ပံဧိၤမီဧိၤအသိးလၢကံၢ်ဃ့ရ့းအပှၤကညီအဃိလီၤ.အဂ့ၢ်ဒ်အံၤ,အတၢ်ဖိတၢ်လံၤလၢအအိၣ်လီၤတဲာ်န့ၣ်ဟါမၢ်လံ. 37ကယဲၢ်ပှၤအခိၣ်လ့ၤ,ကယဲၢ်ပှၤအခၣ်ဆူၣ်တံာ်အသး,တၢ်ဂဲာ်အလီၢ်အိၣ်ဝဲလၢကယဲၢ်ပှၤအစု,ဒီးထၢၣ်အတၢ်ကံးညာ်အိၣ်ဝဲလၢပှၤအယီၢ်ဒ့အလိၤလီၤ.

38ပှၤဟီၣ်ဝဲလၢမိၤအးအဟံၣ်ခိၣ်ခဲလၢာ်,ဒီးလၢအကျဲပူၤခဲလၢာ်လီၤ.အဂ့ၢ်ဒ်အံၤ,ယမၤသ့ၣ်ဖးမိၤအးဒ်လီခီလၢအတဘၣ်ဘၣ်တၢ်အသးအသိးန့ၣ်ယွၤစံးဝဲဒၣ်.

39ဟီၣ်ပသူတက့ၢ်.လီၤပှီၢ်ဝဲဒ်လဲၣ်.မိၤအးဃၣ်ဒူၣ်ချၢအသးလၢအမဲာ်ဆှးအဃိဒ်လဲၣ်.ဒ်န့ၣ်အသိးမိၤအးကကဲထီၣ်ဝဲလၢတၢ်နံၤဘၣ်ဖၣ်လဲအလီၢ်,ဒီးဒုးပျံၤတၢ်အလီၢ်လၢကယဲၢ်ပှၤလၢအအိၣ်ဝးတရံးအီၤအဂီၢ်လီၤ.

40အဂ့ၢ်ဒ်အံၤ,ယွၤစံးဒ်အံၤ,ကွၢ်ကွၢ်,အဝဲဒၣ်ကယူၤဝဲဒ်လံာ်ကြီကြာ်အသိးန့ၣ်,ဒီးကသလၣ်ထီၣ်အဒံးဆ့လၢမိၤအးအဖီခိၣ်လီၤ. 41တၢ်မၤန့ၢ်ကရံယိး,ဒီးတၢ်ဖီၣ်န့ၢ်တိာ်ဧိၤတာ်ဧိၤ,ဒီးမိၤအးအပှၤဆူၣ်အသးကမၤအသးလၢမုၢ်တနံၤန့ၣ်ဒ်ပိာ်မုၣ်လၢအဘၣ်တၢ်ဟုးဆါအသးသိးန့ၣ်လီၤ. 42ဒီးတၢ်ကမၤဟးဂီၤမိၤအးဒ်သိးအသုတတမ့ၢ်လၢၤပှၤတကလုာ်တဂ့ၤ.အဂ့ၢ်ဒ်အံၤ,ပာ်ဒိၣ်အသးလၢယွၤအဖီခိၣ်လီၤ. 43တၢ်ပျံၤ,ဒီးတၢ်ပူၤ,ဒီးတၢ်ပျံၤသကွီၤန့ၣ်ဘၣ်နၤ,ပှၤအိၣ်ဝဲဆိးဝဲလၢမိၤအးအပူၤဧၢ,ယွၤစံးဝဲဒၣ်.

44ပှၤလၢအဃ့ၢ်ဝဲလၢတၢ်ပျံၤအမဲာ်ညါန့ၣ်ကလီၤတဲာ်လၢတၢ်ပူၤ,ဒီးပှၤလၢအဟဲထီၣ်လၢတၢ်ပူၤန့ၣ်ကဘၣ်တၢ်ပျံၤသကွီၤလီၤ.အဂ့ၢ်ဒ်အံၤ,ယကဒုးဘၣ်မိၤအးလၢတၢ်အိၣ်သကိးအီၤအနံၤလီၤ.ယွၤစံးဝဲဒၣ်.

45ပှၤလၢအဃ့ၢ်တဖၣ်န့ၣ်ဆၢထၢၣ်ဒီးအဂံၢ်အဘါတအိၣ်ဘၣ်လၢဃ့ၡဘိၣ်အကဒုပူၤလီၤ.ဘၣ်ဆၣ်ဒီးမ့ၣ်အူဟဲထီၣ်လၢဃ့ၡဘိၣ်,ဒီးမ့ၣ်အူလၣ်လၢစံယိၣ်အသးကံၢ်ပူၤ,ဒီးအီၣ်ကွံာ်မိၤအးအဃၢၤ,ဒီးပှၤတၢထီၣ်တၢလီၤတဖၣ်အခိၣ်ဒးလီၤ.

46မိၤအးဧၢ,နဘၣ်အဖှီၣ်လီၤ.ကမိၣ်အပှၤဂီၢ်မုၢ်ဟးဂီၤလံ.အဂ့ၢ်ဒ်အံၤ,တၢ်မၤန့ၢ်မၢကဲကုၢ်နဖိခွါတဖၣ်,ဒီးမၢကဲကုၢ်နဖိမုၣ်တဖၣ်လီၤ.

47ဘၣ်ဆၣ်လၢမုၢ်နံၤအကတၢၢ်တဖၣ်,ယကဒုးဟဲက့ၤမိၤအးလၢအလဲၤကဲကုၢ်န့ၣ်လီၤ.ယွၤစံးဝဲဒၣ်,တုၤဖဲအံၤမ့ၢ်မိၤအးအတၢ်စံၣ်ညီၣ်လီၤ.