‏ Jeremiah 51

1ယွၤစံးဒ်အံၤ,ကွၢ်ကွၢ်,ယကဒုးဟဲထီၣ်ကလံၤမၤဟးဂီၤတၢ်ထီဒါဘၤဘူၤလိၣ်,ဒီးထီဒါပှၤလၢအအိၣ်ဝဲဆိးဝဲလၢယဒုၣ်ယဒါအကျါလီၤ.

2ဒီးယကမၤလီၤပှၤဂုၤဃၤတၢ်ဖိဆူဘၤဘူၤလိၣ်,ဒီးကဂုၤဃၤအီၤ,ဒီးမၤအိၣ်ကလီအကီၢ်လီၤ.အဂ့ၢ်ဒ်အံၤ,လၢတၢ်ကိၢ်တၢ်ဂီၤအမုၢ်တနံၤန့ၣ်ကအိၣ်ဝးတရံးထီဒါအီၤလီၤ.

3မ်ပှၤခးတၢ်ဖိသူထီၣ်အချံၣ်ထီဒါပှၤလၢအသူထီၣ်တၢ်,ဒီးထီဒါပှၤလၢအပာ်ထီၣ်ထီအသးလၢအသဃိးအပူၤန့ၣ်တက့ၢ်,ဒီးသးလီအပှၤဖိၣ်သၣ်ခွါတဂ့ၤ.မၤဟးဂီၤအပှၤသုးမုၢ်ခဲလၢာ်စီဖ့ကလ့ၤတက့ၢ်. 4ဒီးပှၤဘၣ်တၢ်မၤသံအီၤကလီၤဃံၤလၢပှၤက့ၤစ့းဖိအကီၢ်ပူၤ,ဒီးပှၤလၢအဘၣ်တၢ်ဆဲးဖျိအီၤကလီၤဃံၤလၢကျဲအပူၤလီၤ.

5အဂ့ၢ်ဒ်အံၤ,တၢ်တပာ်ဘၣ်အံၣ်စရ့လးလၢပှၤကမဲဘၣ်,ဒီးယူဒၤအကစၢ်,တၢ်သုးမုၢ်ဂီၢ်မုၢ်အယွၤတပာ်ဘၣ်အီၤလၢပှၤကမဲဘၣ်.အဂ့ၢ်ဒ်အံၤ,အထံအကီၢ်ပှဲၤဒီးတၢ်မၤသရူးမၤကမၣ်ဘၣ်အံၣ်စရ့လးအတၢ်စီဆှံတဂၤလီၤ.

6ဃ့ၢ်ထီၣ်ကွံာ်လၢဘၤဘူၤလိၣ်အသးကံၢ်ပူၤ,ဒီးမၤပူၤမၤဖျဲးတဂၤအသးသမူဒၣ်ဝဲ,တဂၤအသးသမူဒၣ်ဝဲတက့ၢ်.ဘၣ်တၢ်ဒီၣ်တဲာ်ကွံာ်သုလၢအတူၢ်တၢ်ဒဲးဘးအပူၤတဂ့ၤ.အဂ့ၢ်ဒ်အံၤ,အဝဲအံၤမ့ၢ်ယွၤမၤဆၢတၢ်အၢအကတီၢ်လီၤ.ဟ့ၣ်ကၣ်ဝဲလၢအီၤလီၤ. 7ဘၤဘူၤလိၣ်မ့ၢ်လီခီထူလၢယွၤအစုပူၤလၢအဒုးအီမူၤပှၤဟီၣ်ခိၣ်ဖိခဲလၢာ်လီၤ.ပှၤကလုာ်တဖၣ်အီအစပံးထံလီၤ.မၤသးဒ်န့ၣ်ဒီးပှၤကလုာ်တဖၣ်ပျုၢ်ထီၣ်ဝဲလီၤ.

8ဘၤဘူၤလိၣ်လီၢ်ပှီၢ်သတူၢ်ကလာ်,ဒီးဟးဂီၤဝဲလီၤ.ဟီၣ်ပသူထီၣ်လၢအဃိတက့ၢ်.ဟံးန့ၢ်သ့ၣ်စရံအထုးလၢအပူၤလီၢ်အဂီၢ်တက့ၢ်.ဘၣ်တဘၣ်ကဘျါက့ၤလီၤ.

9ပဘှီဘၤဘူၤလိၣ်အတၢ်ဆါဘၣ်ဆၣ်ဒီး,ဘျါတသ့ဘၣ်.လဲၤသဒၣ်အီၤတက့ၢ်,လဲၤသကိးတဂၤဆူအကီၢ်ဒၣ်ဝဲ,တဂၤဆူအကီၢ်ဒၣ်ဝဲတက့ၢ်.အဂ့ၢ်ဒ်အံၤ,အတၢ်စံၣ်ညီၣ်ထီၣ်ဆူမူခိၣ်,ဒီထီၣ်ထီပၢၢ်လၢတၢ်အၢၣ်လီၤ. 10ယွၤဒုးဟဲထီၣ်ပတၢ်တီတၢ်လိၤလီၤ.ဟဲ,စံၣ်တဲၤတဲလီၤသကိးယွၤပကစၢ်အမၤတၢ်လၢစံယိၣ်အပူၤန့ၣ်တက့ၢ်.

11ကျ့ကဆှၣ်ပျၢ်အကနၣ်န့ၣ်,မၤပှဲၤကတီၤတက့ၢ်.ယွၤထိၣ်ဂဲၤမၤဒဲအစီၤပၤတဖၣ်အသးလီၤ.အဂ့ၢ်ဒ်အံၤ,ကူၣ်ထီၣ်တၢ်ထီဒါဘၤဘူၤလိၣ်ဒ်သိးအကမၤဟးဂီၤအီၤလီၤ.အဂ့ၢ်ဒ်အံၤ,မ့ၢ်ဝဲလၢယွၤအမၤဆၢတၢ်အၢ,တၢ်မၤဆၢတၢ်အၢလၢအနူၢ်အစီၤအဃိန့ၣ်လီၤ.

12ပာ်သုအလၣ်လၢဘၤဘူၤလိၣ်အခိၣ်ဒူဖီခိၣ်,မၤဆူၣ်ထီၣ်ပှၤပၢၤတၢ်ဖိတတီၤ,ပာ်ပှၤပၢၤတၢ်ဖိလၢအလီၢ်,ကတဲာ်ကတီၤပှၤခိးတၢ်ခူသူၣ်တက့ၢ်.အဂ့ၢ်ဒ်အံၤ,ယွၤကူၣ်တၢ်,ဒီးမၤတၢ်လၢအကတိၤတၢ်လၢပှၤဘၤဘူၤလိၣ်ဖိအဂ့ၢ်လီၤ.

13တၢ်လၢအအိၣ်ဝဲဆိးဝဲလၢထံဒိၣ်အနံၤ,လၢအလုၢ်ဒိၣ်ပှ့ၤဒိၣ်အါတဂၤဧၢ,နကတၢၢ်န့ၣ်ဘၣ်လံ,ဒီးနသးကွံတၢ်အနီၣ်ဃီၣ်ပှဲၤထီၣ်လံ. 14ယွၤတၢ်သုးမုၢ်အကစၢ်ဆိၣ်တၢ်လၢအကစၢ်ဒၣ်ဝဲအမဲာ်ညါ,ဒီးစံးဝဲဒၣ်မ့ၢ်မးယကမၤပှဲၤနၤဒီးပှၤကညီဒ်လၢဒွဲၣ်ယ့ၤလ့းအသိးန့ၣ်,ဒီးကကိးထီၣ်တၢ်ဒုးသုးအကိးပသူထီၣ်ထီဒါနၤလီၤ.

15တ့လီၤဝဲဟီၣ်ခိၣ်လၢအစိအကမီၤ,မၤကျၢၤလၢာ်ခိၣ်လၢအတၢ်ကူၣ်သ့,ဒီးသလၣ်ထီၣ်မူခိၣ်လၢအတၢ်ကူၣ်တၢ်ဆးလီၤ.

16တုၤအကလုၢ်သီၣ်ဒီး,ထံဂီၢ်မုၢ်အိၣ်ဝဲလၢမူကပိာ်လိၤ,ဒီးဒုးဟဲထီၣ်တၢ်ဘှ့ၣ်လၢဟီၣ်ခိၣ်အကတၢၢ်န့ၣ်လီၤ.တ့လီၤဝၢ်အဒံးအိၣ်ဒီးတၢ်စူၤ,ဒီးဟဲစိာ်ကလံၤလၢအတၢ်ပာ်ဖှိၣ်အလီၢ်ပူၤလီၤ. 17တသ့ၣ်ညါဘၣ်တၢ်ဘၣ်ဒီး,ပှၤကညီခဲလၢာ်လီၤဂာ်ဆၣ်ဖိကီၢ်ဖိလီၤ.ကယဲၢ်ပှၤသိတၢ်အတၢ်ဂီၤန့ၣ်မဲာ်ဆှးလီၤ.အဂ့ၢ်ဒ်အံၤ,အတၢ်ဂီၤသိအသးမ့ၢ်တၢ်ကဘျံးကဘျၣ်,ဒီးအသါတအိၣ်ဘၣ်လၢအပူၤဘၣ်. 18မ့ၢ်ဝဲလၢတၢ်ကလီကလီ,တၢ်ဒုၣ်ဒွဲၣ်အလီၢ်လီၤ.တုၤတၢ်အိၣ်သကိးအီၤဒီး,ကဟးဂီၤဝဲလီၤ. 19စီၤယၤကိာ်အဂီၢ်န့ၣ်တလီၤဂာ်ဘၣ်အီၤဘၣ်.မ့ၢ်တၢ်တ့လီၤတၢ်ခဲလၢာ်,ဒီး(အံၣ်စရ့လး)မ့ၢ်အတၢ်န့ၢ်သါအနီၣ်ထိၣ်လီၤ.တၢ်သုးမုၢ်ဂီၢ်မုၢ်အယွၤန့ၣ်မ့ၢ်အမံၤလီၤ.

20နမ့ၢ်တ့ၢ်ယဒုးတၢ်အခံၣ်ခူၣ်,ယဒုးသုးအစုကဝဲၤလီၤ.အဂ့ၢ်ဒ်အံၤ,ယကမၤကၢ်လီၤကလဲပှၤအကလုာ်ကလုာ်လၢနၤ,ဒီးယကမၤဟးဂီၤဘီဧိၤမုၢ်ဧိၤလၢနၤ, 21ဒီးယကမၤကၢ်လီၤကသ့ၣ်ဒီးပှၤဒိးကသ့ၣ်လၢနၤ,ဒီးယကမၤကၢ်လီၤလ့ၣ်ကဟၣ်ဒီးပှၤဒိးလ့ၣ်ကဟၣ်လၢနၤ, 22ဒီးယကမၤကၢ်လီၤပှၤပိာ်ခွါဒီးပှၤပိာ်မုၣ်လၢနၤ,ဒီးယကမၤကၢ်လီၤပှၤသးပှၢ်ဒီးပှၤသးစၢ်လၢနၤ,ဒီးယကမၤကၢ်လီၤပှၤမုၣ်ကနီၤဒီးပှၤဖိၣ်သၣ်ခွါလၢနၤ, 23ဒီးယကမၤကၢ်လီၤပှၤကွၢ်သိဒီးအသိတဖုလၢနၤ,ဒီးယကမၤကၢ်လီၤပှၤမၤဟီၣ်ခိၣ်ဖိဒီးအဂီၤဖံးဖါတဆိလၢနၤ,ဒီးယကမၤကၢ်လီၤပဒိၣ်ဖးဒိၣ်ဒီးပဒိၣ်ပပှၢ်လၢနၤလီၤ.

24ဒီးယကဟ့ၣ်ကၣ်တၢ်လၢဘၤဘူၤလိၣ်,ဒီးလၢပှၤက့ၤစ့းဖိလၢကယဲၢ်တၢ်အၢလၢအမၤဘၣ်စံယိၣ်လၢသုမဲာ်ညါလီၤ,ယွၤစံးဝဲဒၣ်.

25ယွၤစံးဝဲဒၣ်,ကွၢ်ကွၢ်,ယထီဒါနၤ,ကစၢၢ်လၢအမၤဟးဂီၤတၢ်,လၢအမၤဟးဂီၤဟီၣ်ခိၣ်ဒီဘ့ၣ်ညါနၤဧၢ,ယကယူာ်ထီၣ်ယစုလၢနဖီခိၣ်,ဒီးတလ့ၣ်လီၤနၤလၢလၢၢ်ဧိၤလ့ဧိၤအဖီခိၣ်,ဒီးယကမၤနၤလၢကစၢၢ်လၢမ့ၣ်အူအီၣ်ကွံာ်အီၤလီၤ. 26ဒီးလၢၢ်တဖျၢၣ်လၢတၢ်အသနၢၣ်အဂီၢ်မ့ၢ်ဂ့ၤ,လၢၢ်လၢတၢ်ခီၣ်ထံးအဂီၢ်မ့ၢ်ဂ့ၤ,ပှၤတဟံးန့ၢ်ဘၣ်လၢနၤဘၣ်.မ့ၢ်နကအိၣ်သယုၢ်လီၤထူလီၤယိာ်လီၤ,ယွၤစံးဝဲဒၣ်.

27ပာ်ထီၣ်သုးအလၣ်လၢထံဧိၤကီၢ်ဧိၤအပူၤ,အူထီၣ်ကွဲၤလၢပှၤကလုာ်တဖၣ်အကျါ,ထိၣ်ဂဲၤပှၤကလုာ်တဖၣ်ထီဒါအီၤ,ကိးဖှိၣ်ထီဒါအီၤလၢအရၤရ့း,မံးနံး,ဒီးအၤၡကံနးအဘီအမုၢ်တဖၣ်တက့ၢ်.ပာ်ထီၣ်သုးဖိအခိၣ်ထီဒါအီၤ,ဒီးဒုးဟဲထီၣ်ကသ့ၣ်သုးဖိဒ်ဒွဲၣ်ယ့ၤလ့းလၢအဆူၣ်စဃိးအသိးန့ၣ်, 28ထိၣ်ဂဲၤထီဒါအီၤလၢပှၤကလုာ်တဖၣ်,မၤဒဲအစီၤပၤ,အပဒိၣ်ဖးဒိၣ်,ဒီးအပဒိၣ်ပပှၢ်ဒီးအပှၤကီၢ်ဖိလၢအပၢဝဲခဲလၢာ်တက့ၢ်. 29ဒီးဟီၣ်ခိၣ်ကဟူးဝး,ဒီးကဟူးဝးဆှဲးဆှိးလီၤ.အဂ့ၢ်ဒ်အံၤ,ယွၤအကူၣ်တၢ်ထီဒါဘၤဘူၤလိၣ်န့ၣ်ကမၤအသးလၢအကမၤသယုၢ်ဘၤဘူၤလိၣ်န့ၣ်ကမၤအသးလၢအကမၤသယုၢ်ဘၤဘူၤလိၣ်,ဒီးပှၤတအိၣ်တဆိးဘၣ်လၢအပူၤဘၣ်လီၤ.

30ဘၤဘူၤလိၣ်အပှၤဆူၣ်န့ၣ်ဆိတ့ၢ်ဒုးတၢ်,အိၣ်ဒၣ်အတၢ်လၢအတိာ်အတာ်အပူၤ,အဂံၢ်အဘါလီၤစၢ်ကွံာ်လံ.မၤအသးဒ်ပိာ်မုၣ်အသိးန့ၣ်လီၤ.မ့ၣ်အူအီၣ်ကွံာ်လံအအိၣ်အဆိးအလီၢ်လံ.အနီၣ်ဘိတဖၣ်ကၢ်ကွံာ်လံ. 31ပှၤဃ့ၢ်တၢ်ဖိသဂၢၢ်ပှၤဃ့ၢ်တၢ်ဖိ,ဒီးပှၤသလိတၢ်ကတိၤသဂၢၢ်ပှၤသလိတၢ်ကတိၤ,ဒ်သိးအကစံးဘၣ်တဲဘၣ်ဘၤဘူၤလိၣ်အစီၤပၤလၢအဝ့ၢ်ဘၣ်တၢ်မၤန့ၢ်အီၤခဲလၢာ်လီၤ. 32ကျဲလဲၤနုာ်တၢ်တဖၣ်န့ၣ်တၢ်မၤန့ၢ်လံအီၤလံ,ဒီးတပိၢ်တဖၣ်န့ၣ်မ့ၣ်အူအီၣ်ကွံာ်လံ,ဒီးပှၤသုးဖိပျံၤတၢ်ဖုးတၢ်လီၤ.

33အဂ့ၢ်ဒ်အံၤ,တၢ်သုးမုၢ်ဂီၢ်မုၢ်အယွၤအံၣ်စရ့လးအကစၢ်စံးဒ်အံၤ,ဘၤဘူၤလိၣ်အဖိမုၣ်မၤသးဒ်တၢ်ယီၢ်ဘုအလီၢ်ဖဲတၢ်ယီၢ်အီၤလီၤ.အိၣ်ဒံးတစိၢ်ဖိ,ဒီးတၢ်ကူးဘုအကတီၢ်ကဘၣ်လၢအဂီၢ်လီၤ.

34ဘၤဘူၤလိၣ်အစီၤပၤနဘူၤကးန့စၢ်န့ၣ်အီၣ်ကွံာ်ယၤလံ,မၤလၢာ်ယၤလံ,ပာ်ယၤလၢလီခီအိၣ်ကလီလံ,ယူၢ်လီၤကွံာ်ယၤဒ်ပယိၤအသိးလံ.အီၣ်ဘျဲးအီၣ်ကွံာ်ယတၢ်အီၣ်ဝံၣ်လံ,ဟီထီၣ်ကွံာ်ယၤလံ.

35ပှၤစံယိၣ်ဖိကစံး,တၢ်မၤဆူၣ်ယၤဒီးယဖံးယညၣ်န့ၣ်မ်အဘၣ်ဘၤဘူၤလိၣ်တက့ၢ်,ဒီးယရူၤၡလ့ၣ်ဖိကစံး,မ်ယသွၣ်ဘၣ်ပှၤက့ၤစ့းဖိအလိၤတက့ၢ်.

36မၤသးဒ်န့ၣ်ဒီးယွၤစံးဒ်အံၤ,ကွၢ်ကွၢ်,ယကလိာ်နကွီၢ်,ဒီးမၤဘၣ်တၢ်အၢလၢနဂီၢ်,ဒီးယကမၤလီၤသံးကွံာ်အပီၣ်လဲၣ်,ဒီးယကမၤလၢာ်ကွံာ်အထံထီၣ်ပၢၢ်လီၤ. 37ဒီးဘၤဘူၤလိၣ်ကကဲထီၣ်လၢတၢ်ပူတဖၣ်,ထွံၣ်ဟီၣ်ခိၣ်အအိၣ်အလီၢ်,ပှၤကမၢကမၣ်တၢ်အလီၢ်,ဒီးတၢ်ဒုၣ်ဒွဲၣ်အလီၢ်,ဒီးပှၤတအိၣ်တဆိးဘၣ်လၢအပူၤနီတဂၤဘၣ်. 38သီၣ်ထီၣ်ရုၢ်ရုၢ်တပူၤဃီဒ်ခ့ယုၢ်အသိး,ကိးပသူထီၣ်ဒ်ခ့ယုၢ်အသိးန့ၣ်လီၤ. 39လၢအသူၣ်ပိၢ်သးဝးန့ၣ်ယကပာ်အတၢ်အီ,ဒီးယကဒုးအီမူၤအီၤဒ်သိးအကသူၣ်ဖှံသးညီ,ဒီးမံလီၤထူလီၤယိာ်,ဒီးတဖုသံနီၣ်ဘၣ်,ယွၤစံးဝဲဒၣ်. 40ယကဒုးဟဲလီၤအီၤဒ်သိဖိဆူတၢ်မၤသံတၢ်အသိး,ဒ်သိဖါဒီးမဲာ်တဲးလဲးဖါအသိးန့ၣ်လီၤ.

41တၢ်မၤန့ၢ်ၡံၡးဒ်လဲၣ်,ဒီးတၢ်ဖီၣ်န့ၢ်ဟီၣ်ခိၣ်ဒီဘ့ၣ်ညါအတၢ်စံးထီၣ်ပတြၢၤဒ်လဲၣ်.ဘၤဘူၤလိၣ်ကဲထီၣ်တၢ်ကမၢကမၣ်အလီၢ်လၢပှၤကလုာ်တဖၣ်အကျါဒ်လဲၣ်. 42ပီၣ်လဲၣ်ဟဲထီၣ်ဘၤဘူၤလိၣ်,လီၤဘျၢဝဲလၢအလပီဂီၢ်မုၢ်အကျါလီၤ. 43အဝ့ၢ်တဖၣ်န့ၣ်ကဲထီၣ်တၢ်အိၣ်သယုၢ်,ပှၢ်မုၢ်ကနၢ,တၢ်မံၤခိၣ်သိၣ်လာ်လၢကီၢ်တဘ့ၣ်ဖဲပှၤကညီတအိၣ်တဆိးလၢအပူၤ,ဒီးပှၤကညီဖိတလဲၤခီဂာ်ဘၣ်ဝဲဘၣ်. 44ဒီးယကအိၣ်သကိးဘ့လးလၢဘၤဘူၤလိၣ်အပူၤ,ဒီးယကထုးထီၣ်လၢအကိာ်ပူၤတၢ်လၢအယူၢ်လီၤဝဲလီၤ,ဒီးပှၤကလုာ်တဖၣ်တအိၣ်ဖှိၣ်လၢၤဘၣ်ဆူအအိၣ်ဘၣ်.ဒီးဘၤဘူၤလိၣ်အခိၣ်ဒူကလီၤပှီၢ်ဝဲလီၤ.

45ယပှၤဂီၢ်မုၢ်သ့ၣ်ဧၢ,ဟးထီၣ်ကွံာ်လၢအကျါ,ဒီးမၤပူၤမၤဖျဲးတဂၤအသးဒၣ်ဝဲ,တဂၤအသးဒၣ်ဝဲလၢယွၤအသးကဲၤထီၣ်အဃိန့ၣ်တက့ၢ်. 46ဒီးမ်သုသးအသုတလီၤဘှါတဂ့ၤ,ဒီးသုတဘၣ်ယိၣ်တၢ်လၢတၢ်အကစီၣ်လၢအကဟူထီၣ်ဝဲလၢကီၢ်ပူၤအဃိန့ၣ်တဂ့ၤ.အအံၤတနံၣ်တၢ်အကစီၣ်ကဟဲဝဲ,ဒီးခဲကိာ်တနံၣ်တၢ်အကစီၣ်ကဟဲဝဲတမံၤဒၣ်,ဒီးတၢ်မၤန့ၢ်ဆူၣ်ကအိၣ်ဝဲလၢကီၢ်ပူၤ,ပဒိၣ်ဖးဒိၣ်ထီဒါပဒိၣ်ဖးဒိၣ်လီၤ.

47မၤသးဒ်န့ၣ်ဒီးကွၢ်ကွၢ်,မုၢ်နံၤတဖၣ်ဟဲဝဲလၢယကအိၣ်သကိးဘၤဘူၤလိၣ်အတၢ်ဂီၤတၢ်ဖီၣ်,ဒီးအပှၤကီၢ်ဖိခဲလၢာ်ကမဲာ်ဆှး,ဒီးအပှၤလၢအဘၣ်တၢ်မၤသံအီၤခဲလၢာ်န့ၣ်ကလီၤဃံၤလၢအကျါလီၤ. 48တုၤနုၤတစုမူခိၣ်ဒီးဟီၣ်ခိၣ်,ဒီးကယဲၢ်တၢ်လၢအအိၣ်ဝဲလၢအပူၤခဲလၢာ်န့ၣ်ကသးခုလၢဘၤဘူၤလိၣ်အလိၤလီၤ.အဂ့ၢ်ဒ်အံၤ,ပှၤမၤဟးဂီၤတၢ်တဖၣ်န့ၣ်ကဟဲထီဒါအီၤလၢကလံၤစိးန့ၣ်လီၤ,ယွၤစံးဝဲဒၣ်. 49ပှၤလၢအဘၣ်တၢ်မၤသံအီၤလၢအံၣ်စရ့လးအကျါသ့ၣ်ဧၢ,ဘၤဘူၤလိၣ်ကလီၤဃံၤစ့ၢ်ကီး,ပှၤလၢအဘၣ်တၢ်မၤသံအီၤလၢဟီၣ်ခိၣ်ဒီဘ့ၣ်ညါသ့ၣ်ဧၢ,ပှၤလၢဘၤဘူၤလိၣ်တဖၣ်ကလီၤဃံၤဝဲလီၤ. 50ပှၤလၢအပူၤဖျဲးလၢနးသ့ၣ်ဧၢ,ဟးထီၣ်တက့ၢ်,အိၣ်ကတီၢ်တဂ့ၤ,သ့ၣ်နီၣ်ထီၣ်က့ၤယွၤအိၣ်လၢအယံၤ,ဒီးဒုးအိၣ်ထီၣ်ယရူၤၡလ့ၣ်လၢသုသးကံၢ်ပူၤတက့ၢ်.

51မ့ၢ်ပနၢ်ဟူတၢ်ဒုၣ်ဒွဲၣ်ဒီး,ပသးကတုၤလီၤ.တၢ်မဲာ်ဆှးကျၢၢ်ဘၢပမဲာ်လီၤ.အဂ့ၢ်ဒ်အံၤ,ပှၤတခီဘီမုၢ်ဖိဟဲနုာ်လၢယွၤအဟံၣ်အလီၢ်စီဆှံတဖၣ်အပူၤလီၤ. 52မၤသးဒ်န့ၣ်ဒီးယွၤစံးဝဲဒၣ်,ကွၢ်ကွၢ်,မုၢ်နံၤတဖၣ်ဟဲဝဲလၢယကအိၣ်သကိးအတၢ်ဂီၤတၢ်ဖီၣ်,ဒီးပှၤဘၣ်ဆဲးအသးတဖၣ်ကကအုကစွါလၢအကီၢ်ဒီဘ့ၣ်ညါအပူၤလီၤ.

53ဘၤဘူၤလိၣ်မ့ၢ်ထီၣ်ဘးမူခိၣ်,ဒီးမၤဆူၣ်ထီၣ်အဂံၢ်အဘါအလီၢ်ထီၣ်ထီဘၣ်ဆၣ်ဒီး,ပှၤမၤဟးဂီၤတၢ်တဖၣ်ကဟဲထီဒါအီၤလၢယၤလီၤ,ယွၤစံးဝဲဒၣ်.

54ကနၣ်တက့ၢ်.တၢ်သီၣ်လၢဘၤဘူၤလိၣ်,ဒီးတၢ်မၤဟးဂီၤဖးဒိၣ်အသီၣ်လၢပှၤက့ၤစ့းဖိအကီၢ်ပူၤန့ၣ်ဟူထီၣ်လံ. 55အဂ့ၢ်ဒ်အံၤ,ယွၤမၤဟးဂီၤဘၤဘူၤလိၣ်,ဒီးမၤဘှီၣ်အသီၣ်ဖးဒိၣ်လီၤ.အလပီတဖၣ်ဟးထီၣ်သွးသွးဒ်ထံဖးဒိၣ်အသိးန့ၣ်အတၢထီၣ်တၢလီၤအသီၣ်န့ၣ်ဟူထီၣ်ဝဲလီၤ. 56အဂ့ၢ်ဒ်အံၤ,တၢ်မၤဟးဂီၤဟဲထီဒါဘၤဘူၤလိၣ်,ဒီးတၢ်ကမၤန့ၢ်အပှၤဆူၣ်ဖိ,အချံၣ်အပျၢ်ကကၢ်ကွံာ်ဝဲလီၤ.အဂ့ၢ်ဒ်အံၤ,ယွၤမ့ၢ်တၢ်မၤကၣ်တၢ်အၢအကစၢ်လီၤ,အဝဲဒၣ်ကဟ့ၣ်ကၣ်တၢ်လၢလၢပှဲၤပှဲၤလီၤ. 57ဒီးယကဒုးအီမူၤအပှၤအခိၣ်ဒီးအပှၤကူၣ်သ့,အပဒိၣ်ဖးဒိၣ်,ဒီးအပဒိၣ်ပပှၢ်,ဒီးအပှၤဆူၣ်ဖိလီၤ.ဒီးကမံလီၤထူလီၤယိာ်,ဒီးတဖုသံနီၣ်လၢၤဘၣ်,စီၤပၤလၢအမံၤမ့ၢ်တၢ်သုးမုၢ်ဂီၢ်မုၢ်အယွၤစံးဝဲဒၣ်.

58တၢ်သုးမုၢ်ဂီၢ်မုၢ်အယွၤစံးဝဲဒၣ်,ဘၤဘူၤလိၣ်အခိၣ်ဒူဖးလဲၢ်ကလီၤပှီၢ်လၢာ်လ့ၤတက့ၤ,ဒီးမ့ၣ်အူကအီၣ်ကွံာ်အတြဲၤဖးထီလီၤ.ဒီးပှၤဂီၢ်မုၢ်ကမၤတၢ်လၢတၢ်ကလီကလီအဂီၢ်,ဒီးပှၤကလုာ်တဖၣ်ကမၤဘှံးတ့ၢ်အသးလၢမ့ၣ်အူအဂီၢ်လီၤ.

59တၢ်ကတိၤလၢဝံယံးရမံယၤမၤလိာ်စီၤစရါယၤ,စီၤန့ၤရံယၤအဖိခွါ,စီၤမၤစ့ယၤအဖိခွါ,ဖဲအလဲၤတၢ်ဒီးယူဒၤအစီၤပၤစီၤစံးဒကံယၤဆူဘၤဘူၤလိၣ်လၢအကဲထီၣ်စီၤပၤပှဲၤထီၣ်လွံၢ်နံၣ်တနံၣ်န့ၣ်လီၤ.ဒီးစီၤစရါယၤမ့ၢ်ပဒိၣ်ဖးဒိၣ်လၢအမၤမုာ်တၢ်တဂၤလီၤ. 60ဒီးစီၤယံးရမံယၤကွဲးဝဲလၢလံာ်ပူၤကယဲၢ်တၢ်အၢလၢအကဟဲဘၣ်ဘၤဘူၤလိၣ်,ကယဲၢ်တၢ်ကတိၤခဲလၢာ်န့ၣ်လၢအကွဲးအသးဘၤဘူၤလိၣ်အဂ့ၢ်လီၤ. 61ဒီးဝံယံးရမံယၤစံးဘၣ်စီၤစရါယၤ,တုၤနတုၤလၢဘၤဘူၤလိၣ်,ဒီးနထံၣ်ဘၣ်တၢ်ဒီးဖးတၢ်ကတိၤအံၤခဲလၢာ်ဒီး, 62နဘၣ်စံး,ယွၤဧၢ,နကတိၤတၢ်ထီဒါတၢ်အလီၢ်အံၤလၢနကမၤဟးဂီၤအီၤ,လၢပှၤကညီမ့ၢ်ဂ့ၤ,ဆၣ်ဖိကီၢ်ဖိမ့ၢ်ဂ့ၤ,တအိၣ်လီၤတဲာ်ဘၣ်လၢအပူၤဘၣ်,လၢအကအိၣ်သယုၢ်လီၤထူလီၤယိာ်လီၤ.

63ဒီးတုၤနဖးလံာ်အံၤဝံၤဒီး,တၢ်ကမၤအသးလၢနဘၣ်စၢဃာ်လၢၢ်တဖျၢၣ်ဒီးအီၤ,ဒီးကွံာ်တ့ၢ်ကွံာ်အီၤဆူထံမိၢ်ပှၢ်ဖရၤသးအပူၤ, 64ဒီးနဘၣ်စံး,ဘၤဘူၤလိၣ်ကလီၤဒးဒ်အံၤအသိး,ဒီးတထီၣ်ဖီဘၣ်လၢတၢ်အၢလၢယကဒုးဟဲဘၣ်အီၤန့ၣ်ဘၣ်.ဒီးတၢ်ကဘှံးအသးလီၤ.တုၤဖဲအံၤမ့ၢ်စီၤယံးရမံယၤအတၢ်ကတိၤလီၤ.