Jer 8 | KswSKMB | STEP | အကတီၢ်ဖဲန့ၣ်ယွၤစံးဝဲဒၣ်,ပှၤကဟဲစိာ်ယူဒၤအစီၤပၤတဖၣ်အဃံ,ဒီးအပဒိၣ်ဖးဒိၣ်တဖၣ်အဃံ,ဒီးပှၤလုၢ်တၢ်အဒိၣ်အဃံ,ဒီးဝံတဖၣ်အဃံ,ဒီးပှၤယရူၤၡလ့ၣ်ဖိတဖၣ်အဃံလၢအသွၣ်ခိၣ်အပူၤလီၤ.

‏ Jeremiah 8

1 အကတီၢ်ဖဲန့ၣ်ယွၤစံးဝဲဒၣ်,ပှၤကဟဲစိာ်ယူဒၤအစီၤပၤတဖၣ်အဃံ,ဒီးအပဒိၣ်ဖးဒိၣ်တဖၣ်အဃံ,ဒီးပှၤလုၢ်တၢ်အဒိၣ်အဃံ,ဒီးဝံတဖၣ်အဃံ,ဒီးပှၤယရူၤၡလ့ၣ်ဖိတဖၣ်အဃံလၢအသွၣ်ခိၣ်အပူၤလီၤ. 2 ဒီးကဒါလီၤအီၤလၢမုၢ်အမဲာ်ညါ,ဒီးလါအမဲာ်ညါ,ဒီးမူခိၣ်အသုးမုၢ်ဂီၢ်မုၢ်အမဲာ်ညါလၢအအဲၣ်တ့ၢ်ဝဲ,လၢအမၤအတၢ်,လၢအအပိာ်အခံ,လၢအဃုဝဲ,ဒီးလၢအဘူၣ်ဝဲဘါဝဲလီၤ.ဒီးတၢ်တထၢဖှိၣ်ဘၣ်အီၤဘၣ်,ဒီးတၢ်တခူၣ်လီၤကွံာ်ဘၣ်အီၤဘၣ်.ကအိၣ်ဝဲဒ်တၢ်အ့ၣ်အသိးန့ၣ်လၢဟီၣ်ခိၣ်ချၢလီၤ. 3 ဒီးပှၤလၢအအိၣ်လီၤတဲာ်လၢပှၤအၢတစိၤအံၤအကျါလၢအအိၣ်လီၤတဲာ်လၢအလီၢ်ပူၤခဲလၢာ်ဖဲယဟီထီၣ်ကွံာ်အီၤခဲလၢာ်န့ၣ်ကဃုထၢတၢ်သံအါန့ၢ်တၢ်မူတက့ၢ်လီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်.

4 ဒီးနဘၣ်စံးလၢအီၤ,ယွၤစံးဒ်အံၤ,ကလီၤဃံၤ,ဒီးတဂဲၤဆၢထၢၣ်က့ၤဘၣ်ဧါ.ကဃၣ်ကွံာ်အသးဒီးတဟဲက့ၤဘၣ်ဧါ. 5 ယရူၤၡလ့ၣ်အပှၤဂီၢ်မုၢ်အသးဟးဂီၤဒၣ်တၢ်ဒီးအသးဟးဂီၤတထံၣ်ဃီန့ၣ်မ့ၢ်အဘၣ်မနုၤလဲၣ်.ဟံးဃာ်ဝဲလၢလီတၢ်,ဟဲက့ၤန့ၣ်အသးတအိၣ်ဘၣ်.

6 ယကနၣ်တၢ်,ဒီးယနၢ်ဟူတၢ်,ဒီးတကတိၤဘၣ်ဝဲလၢအတီအလိၤဘၣ်,ပှၤတပီၢ်ယၢ်လီၤက့ၤအသးလၢတၢ်အၢဘၣ်.ဒီးယမၤမနုၤလဲၣ်န့ၣ်တစံးဘၣ်ဝဲဘၣ်.ပှၤဃၣ်ဃီၤအသးဆူအကျဲဒၣ်ဝဲကိးဂၤဒဲး,ဒ်ကသ့ၣ်ဃ့ၢ်သဖှိဆူဒုးသုးအပူၤအသိးန့ၣ်လီၤ. 7 မ့ၢ်မးထိၣ်ဒိၣ်လၢမူကပိာ်လိၤန့ၣ်သ့ၣ်ညါအကတီၢ်,ဒီးထိၣ်လွံၢ်,ဒီးထိၣ်ဘျ့ၣ်ဘျီၣ်ဧိၤ,ဒီးထိၣ်ကၠိကၠၣ်န့ၣ်တိၢ်န့ၢ်အဆၢကတီၢ်လၢအကဟဲလီၤ.မ့မ့ၢ်ယပှၢ်ဂီၢ်မုၢ်တသ့ၣ်ညါဘၣ်ယွၤအတၢ်စံၣ်ညီၣ်ဘၣ်.

8 ပကူၣ်တၢ်သ့,ဒီးယွၤအတၢ်သိၣ်တၢ်သီအိၣ်ဝဲဒီးပှၤန့ၣ်သုကစံးဒ်လဲၣ်.ကွၢ်ကွၢ်,မၤဝဲကလီကလီလီၤ.ပှၤကွဲးဆဲလံာ်အနီၣ်ကွဲးတၢ်န့ၣ်အိၣ်ဝဲကလီကလီလီၤ. 9 ပှၤကူၣ်တၢ်သ့န့ၣ်အမဲာ်ဆှးလီၤ.အသးကတုၤ,ဒီးဘၣ်တၢ်ဖီၣ်န့ၢ်အီၤလီၤ.ကွၢ်ကွၢ်,တပးကဲဘၣ်ယွၤအအလုၢ်ဘၣ်.မၤသးဒ်န့ၣ်ဒီးတၢ်ကူၣ်သ့အိၣ်ဝဲလၢအပူၤမနုၤလဲၣ်.

10 မၤသးဒ်န့ၣ်ဒီးယကဟ့ၣ်အမါလၢပှၤဂၤ,အဟီၣ်ခိၣ်အကဝီၤတဖၣ်လၢပှၤလၢအကန့ၢ်သါအီၤလီၤ.အဂၢ်ဒ်အံၤ,လၢအဆံးပၢၢ်လၢအဒိၣ်န့ၣ်သးကွံတၢ်ကိးဂၤဒဲးလီၤ.လၢဝံဧိၤမီၣ်ဧိၤပၢၢ်လၢပှၤလုၢ်တၢ်အဒိၣ်န့ၣ်မၤဝဲဒီးလီတၢ်ကိးဂၤဒဲးလီၤ. 11 အဂ့ၢ်ဒ်အံၤ,မၤဘျါက့ၤယပှၤဂီၢ်မုၢ်အဖိမုၣ်အပူၤလီၢ်ကလီကလီ,ဒီးစံး,တၢ်အမုာ်,တၢ်အမုာ်,ဒီးတၢ်အမုာ်တအိၣ်ဘၣ်. 12 တုၤအမၤတၢ်သးဘၣ်အၢဒီး,မ့ၢ်အမဲာ်ဆှးစ့ၢ်ကီးဧါ.အမဲာ်တဆှးဘၣ်လ့ၤတက့ၤဘၣ်.တသ့ၣ်ညါဘၣ်တၢ်မဲာ်ဆှးဘၣ်.မၤသးဒ်န့ၣ်ဒီးကလီၤဃံၤဝဲလၢပှၤလၢအလီၤဃံၤတဖၣ်အကျါလီၤ.အဆၢကတီၢ်လၢတၢ်အအိၣ်သကိးအီၤန့ၣ်အခီၣ်ကဘၣ်တိၢ်လီၤ,ယွၤစံးဝဲဒၣ်. 13 မ့ၢ်မးယကမၤလၢာ်ကွံာ်အီၤစီဖ့ကလ့ၤ,ယွၤစံးဝဲဒၣ်.စပံးသၣ်တအိၣ်ဘၣ်လၢစပံးမုၢ်အလိၤ,ချၢၣ်ဒၢသၣ်တအိၣ်ဘၣ်လၢသ့ၣ်ချၢၣ်ဒၢအလိၤဘၣ်,ဒီးအလၣ်ကဃ့ထီၣ်,ဒီးတၢ်လၢယဟ့ၣ်အီၤတဖၣ်န့ၣ်ကလဲၤပူၤကွံာ်အီၤလီၤ.

14 ပဆ့ၣ်နီၤအိၣ်ဃိကလာ်မ့ၢ်အဘၣ်အနုၤလဲၣ်.အိၣ်ဖှိၣ်ရိဖှိၣ်,ဒီးလဲၤနုာ်သကိးဝ့ၢ်အိၣ်ဒီးအခိၣ်ဒူ,ဒီးအိၣ်ဘှီၣ်ကလာ်သကိးဖဲန့ၣ်တက့ၢ်.အဂ့ၢ်ဒ်အံၤ,ယွၤပကစၢ်ဒုးအိၣ်ဘီှၣ်ပှၤ,ဒီးဟ့ၣ်အီပှၤလၢစုၣ်ထံလီၤ.အဂ့ၢ်ဒ်အံၤ,ပမၤကမၣ်ဘၣ်ယွၤလီၤ. 15 ပကွၢ်လၢ်တၢ်ဃူတၢ်ဖိးအကျဲ,ဒီးတၢ်အဂ့ၤတဟဲဘၣ်.လၢတၢ်မၤဘျါက့ၤအကတီၢ်,ဒီးကွၢ်ကွၢ်,တၢ်မၤပျံၤမၤဖုးတၢ်လီၤ.

16 အကသ့ၣ်သီၣ်ထီၣ်န့ၣ်ဟူထီၣ်ဝဲလၢဒၣ်,ဒီးကီၢ်ဟူးဝးဝဲဒီဘ့ၣ်ညါလၢအတၢ်ဆူၣ်တဖၣ်အကဟံာ်ကဟဲးအသီၣ်ဟဲဝဲအဃိလီၤ.အဂ့ၢ်ဒ်အံၤ,ဟဲဝဲဒီးအီၣ်ကွံာ်ကီၢ်,ဒီးကယဲၢ်တၢ်အိၣ်ဝဲလၢအပူၤ,ဝ့ၢ်န့ၣ်ဒီးပှၤလၢအအိၣ်အဆိးလၢအပူၤလီၤ. 17 အဂ့ၢ်ဒ်အံၤ,ကွၢ်ကွၢ်,ယကမၢလီၤဂုၢ်ဧိၤဒးဧိၤ,ဂုၢ်မိာ်အိးဆူသုကျါလၢပှၤမၤအီၤလၢတၢ်အူတၢ်သမူတသ့ဘၣ်.ဒီးကဖျးသု,ယွၤစံးဝဲဒၣ်.

18 မ်တၢ်မၤမုာ်ထီၣ်က့ၤယၤလၢယသူၣ်အုးသးအုးတက့ၢ်.ယသးလီၤဘှါလၢယပူၤလီၤ.ကွၢ်ကွၢ်,ယပှၤဂီၢ်မုၢ်အဖိမုၣ်အကိးပသူထီၣ်လၢထံယံၤကီၢ်ယံၤလီၤ.ယွၤအိၣ်ဝဲလၢစံယိၣ်အပူၤတမ့ၢ်ဘၣ်ဧါ.အစီၤပၤအိၣ်ဝဲလၢအပူၤတမ့ၢ်ဘၣ်ဧါ.

19 မၤသးထီၣ်ယၤလၢအတၢ်ဂီၤတၢ်ဖီၣ်,လၢပှၤတခီဘီမုၢ်ဖိအတၢ်ကလီကလီန့ၣ်မ့ၢ်အဘၣ်မနုၤလဲၣ်.

20 တၢ်ကူးဘုအကတီၢ်ပူၤကွံာ်လံ.တၢ်ကိၢ်အကတီၢ်လၢာ်လံ.ဒီးပတတုၤဒံးဘၣ်လၢတၢ်အုၣ်က့ၤခီၣ်က့ၤဘၣ်.

21 လၢယပှၤဂီၢ်မုၢ်အဖိမုၣ်ဘၣ်ဒိဆါအဃိန့ၣ်ယဘၣ်ဆါယဲလီၤ.ယသူၣ်အုးသးအုး,ယသးကတုၤလီၤ. 22 သ့ၣ်စရံအထုးတအိၣ်ဘၣ်လၢကံးလဧးအပူၤဘၣ်ဧါ.ကသံၣ်သရၣ်တအိၣ်ဘၣ်ဖဲန့ၣ်ဧါ.မ့မ့ၢ်ဒ်န့ၣ်ဒီးယပှၤဂီၢ်မုၢ်အဖိမုၣ်အတၢ်ဆါတဘျါက့ၤဘၣ်န့ၣ်မ့ၢ်အဘၣ်မနုၤလဲၣ်.