Joel 3
1အဂ့ၢ်ဒ်အံၤ,ကွၢ်ကွၢ်,တၢ်လၢမုၢ်နံၤတဖၣ်,ဒီးတၢ်လၢအကတီၢ်န့ၣ်တုၤယဒုးဟဲက့ၤယူဒၤဒီးယရူၤၡလ့ၣ်လၢအလဲၤကဲကုၢ်ဒီး, 2ယကဒုးအိၣ်ဖှိၣ်ရိဖှိၣ်ပှၤကိးကလုာ်ဒဲး,ဒီးယကဒုးဟဲလီၤအီၤဆူကစၢၢ်ကဆူးယဟိၡၤဖး,ဒီးယကစံၣ်ညီၣ်အီၤဖဲန့ၣ်လၢယပှၤဂီၢ်မုၢ်ဒီးယတၢ်န့ၢ်သါအံၣ်စရ့လး,လၢအဝဲသ့ၣ်မၤလီၤပြံလီၤပြါအီၤလၢပှၤကလုာ်တဖၣ်အကျါအဃိ,ဒီးနီၤဖးယထံယကီၢ်လီၤ. 3ဒီးအဝဲသ့ၣ်ဖးဝဲလၢယပှၤဂီၢ်မုၢ်အဂီၢ်,ဒီးဟ့ၣ်လီၤဖိသၣ်ပိာ်ခွါတဂၤလၢပှၤဃဲသဲမုၣ်တဂၤအဂီၢ်,ဒီးဆါကွံာ်ဖိသၣ်ပိာ်မုၣ်တဂၤလၢစပံးထံအဂီၢ်,ဒ်သိးအကအီတၢ်လီၤ. 4သုဒီးယၤမ့ၢ်ဒ်လဲၣ်,စိၢ်,ဒီးစံဒိၣ်,ဒီးဖလ့ၡသးအကီၢ်ဃၢၤခဲလၢာ်သ့ၣ်ဧၢ,သုကမၤဆၢတၢ်လၢယၤဧါ.ဒီးသုမ့ၢ်မၤဆၢတၢ်လၢယၤဒီး,ယကဟ့ၣ်လီၤသုမၤဆၢတၢ်လၢသုခိၣ်ဒၣ်သုဝဲချ့မးဒီးချ့သဒံးလီၤ. 5မ့ၢ်သုစိာ်ထီၣ်ကွံာ်ယစ့ဒီးယထူ,ဒီးစိာ်ယတၢ်ဂ့ၤဒီးတၢ်ဘၣ်တၢ်အသးတဖၣ်ဆူသုတၢ်ဂီၤအနူၢ်ပူၤ, 6ဒီးသုဆါကွံာ်ပှၤယူဒၤဖိ,ပှၤယရူၤၡလ့ၣ်ဖိဆူပှၤယၤဝၣ်ဖိအစုပူၤ,ဒ်သိးအကအိၣ်ယံၤဒီးအကီၢ်ဃၢၤဒၣ်ဝဲဒီး, 7ကွၢ်ကွၢ်,ယကထိၣ်ဂဲၤဆၢထၢၣ်အီၤလၢအလီၢ်ဖဲသုဆါကွံာ်အီၤ,ဒီးယကဟ့ၣ်ကဒါက့ၤသုမၤဆၢတၢ်လၢသုခိၣ်ဒၣ်သုဝဲအဖီခိၣ်, 8ဒီးအဝဲသ့ၣ်ကဆါကွံာ်အီၤဆူပှၤစဘၤဖိ,ပှၤတကလုာ်အိၣ်ဝဲလၢအယံၤအစုပူၤလီၤ.အဂ့ၢ်ဒ်အံၤ,ယွၤကတိၤလံတၢ်လံ. 9ကိးထီၣ်တၢ်အံၤလၢပှၤကလုာ်တဖၣ်အကျါ,ကတဲာ်ကတီၤတၢ်ဒုးသုး,ထိၣ်ဂဲၤပှၤအဆူၣ်,ဒုးဟဲဘူးပှၤသုးဖိခဲလၢာ်,ဒုးဟဲထီၣ်အီၤတက့ၢ်. 10ပိာ်က့ၤသုထဲၣ်အကနၣ်လၢနး,ဒီးသုဒီပဲာ်သ့ၣ်လၢဘီတက့ၢ်.မ်ပှၤအဂံၢ်စၢ်အဘါစၢ်စံး,ယမ့ၢ်ပှၤအဆူၣ်တက့ၢ်. 11ပှၤကလုာ်အိၣ်ဝးတရံးခဲလၢာ်သ့ၣ်ဧၢ,မၤချ့ချ့,ဒီးဟဲ,ဒီးအိၣ်ဖှိၣ်ရိဖှိၣ်တက့ၢ်.ယွၤဧၢ,ဒုးဟဲလီၤနပှၤအဆူၣ်တဖၣ်ဖဲန့ၣ်တက့ၢ်. 12မ်ပှၤကလုာ်တဖၣ်ဖုသံနီၣ်,ဒီးဟဲထီၣ်ဆူကစၢၢ်ကဆူးယဟိၡၤဖးအပူၤတက့ၢ်.အဂ့ၢ်ဒ်အံၤ,ယကဆ့ၣ်နီၤစံၣ်ညီၣ်ပှၤကလုာ်အိၣ်ဝးတရံးခဲလၢာ်ဖဲန့ၣ်လီၤ. 13ဒၢနုာ်ထါဂဲာ်တက့ၢ်.အဂ့ၢ်ဒ်အံၤ,ဘုဂီၤလံ.ဟဲ,ယီၢ်တၢ်တက့ၢ်.အဂ့ၢ်ဒ်အံၤ,နီၣ်စံၢ်စပံးသၣ်ပှဲၤလံ,အစပံးထံပှဲၤလုၣ်ကွံာ်အတၢ်ပူၤလီၤ.အဂ့ၢ်ဒ်အံၤ,အတၢ်ဒဲးဘးဒိၣ်မးလီၤ. 14ပှၤဂီၢ်မုၢ်,ပှၤဂီၢ်မုၢ်လၢတၢ်စံၣ်ညီၣ်တဲာ်အကစၢၢ်ကဆူးအပူၤလီၤ.အဂ့ၢ်ဒ်အံၤ,ယွၤအမုၢ်တနံၤအိၣ်ဘူးထီၣ်လံလၢတၢ်စံၣ်ညီၣ်တဲာ်အကစၢၢ်ကဆူးပူၤလံ. 15မုၢ်ဒီးလါကခံးလီၤဝဲ,ဒီးဆၣ်ဧိၤဖီဧိၤတကပီၤဘၣ်, 16ယွၤကကိးပသူထီၣ်လၢစံယိၣ်,ဒီးထုထီၣ်အကလုၢ်လၢယရူၤၡလ့ၣ်အပူၤ,ဒီးမူခိၣ်,ဒီးဟီၣ်ခိၣ်ကဟူးဝးဝဲလီၤ.ဘၣ်ဆၣ်ဒီးယွၤမ့ၢ်တၢ်အိၣ်တဒၢအလီၢ်လၢအပှၤဂီၢ်မုၢ်အဂီၢ်,ဒီးတိာ်ဧိၤတာ်ဧိၤလၢပှၤအံၣ်စရ့လးဖိအဂီၢ်လီၤ. 17ဒီးသုကသ့ၣ်ညါလၢယၤယွၤအံၤ,ယမ့ၢ်သုကစၢ်လၢအအိၣ်အဆိးလၢယကစၢၢ်စီဆှံစံယိၣ်အလိၤလီၤ.ဒီးယရူၤၡလ့ၣ်ကစီဆှံဝဲ,ဒီးပှၤတခီဘီမုၢ်ဖိတခီဂာ်လၢၤဘၣ်အီၤဘၣ်. 18လၢမုၢ်တနံၤန့ၣ်တၢ်ကမၤအသးလၢကစၢၢ်ကလိကလီၤစီၤလၢစပံးထံအသီ,ဒီးတၢ်နုၢ်ထံကယွၤလီၤလၢတၢ်စိခိၣ်,ဒီးထံကယွၤလီၤလၢယူဒၤအထံကျိခဲလၢာ်,ဒီးထံထီၣ်ပၢၢ်ကပၢၢ်ထီၣ်လၢယွၤအဟံၣ်ပူၤ,ဒီးကယွၤလီၤလၢကစၢၢ်ကဆူးၡံးတံၣ်လီၤ. 19အဲၤကူပတူးကအိၣ်သယုၢ်,ဒီးအဒိၣ်ကကဲထီၣ်ပှၢ်မုၢ်ကနၢအိၣ်သယုၢ်လၢတၢ်မၤန့ၢ်ဆူၣ်ပှၤယူဒၤဖိအဃိ,လၢအလူလီၤတၢ်သွံၣ်လၢတၢ်ဒဲးဘးတအိၣ်ဘၣ်လၢအကီၢ်ပူၤအဃိလီၤ. 20မ့မ့ၢ်ယူဒၤန့ၣ်ပှၤကအိၣ်ကဆိးလၢအပူၤလီၤထူလီၤယိာ်,ဒီးလၢယရူၤၡလ့ၣ်န့ၣ်အစိၤစိၤအဃၣ်ဃၣ်လီၤ. 21ဒီးအသွံၣ်လၢယတပာ်တ့ၢ်ဘၣ်လၢအတၢ်ဒဲးဘးတအိၣ်ဘၣ်န့ၣ်ယကပာ်လၢအတၢ်ဒဲးဘးတအိၣ်ဘၣ်,ဒီးယွၤကအိၣ်ဝဲဆိးဝဲလၢစံယိၣ်အပူၤလီၤ.
Copyright information for
KswSKMB