‏ John 13

1ဒီးဘူၣ်လဲၤကပာ်တချုးဘၣ်ဒံးဘၣ်ဒီး,ဒ်သိးအကဟးထီၣ်လၢဟီၣ်ခိၣ်ချၢအံၤဆူပၢ်အအိၣ်ဒီးယ့ၣ်ရှူးသ့ၣ်ညါလၢအနၣ်ရံၣ်ဘၣ်ဒီး,အဲၣ်အပှၤဒၣ်ဝဲလၢအအိၣ်လၢဟီၣ်ခိၣ်ချၢဒီး,အဲၣ်အီၤတုၤအကတၢၢ်လီၤ. 2ဒီးတၢ်အီၣ်လၢဟါအီၣ်ဘၣ်ဝဲ,ဒီးမုၣ်ကီၤလံၢ်ဒၢနုာ်တ့ၢ်တၢ်ဝံၤလံလၢစီၤၡံမိၣ်အဖိခွါ,စီၤယူဒၤအံၣ်စကၤရံၤအိာ်တဂၤအသး,ဒ်သိးအကဟ့ၣ်လီၤကွံာ်အီၤလီၤ. 3ဒီးယ့ၣ်ရှူးသ့ၣ်ညါလံလၢပၢ်ဟ့ၣ်လီၤကွံာ်တၢ်ခဲလၢာ်လၢအစုပူၤလံ,ဒီးလၢအဟဲလၢယွၤအအိၣ်,ဒီးကက့ၤဆူယွၤအအိၣ်န့ၣ်သတးဒီး, 4ဂဲၤဆၢထၢၣ်လၢတၢ်အီၣ်လၢဟါအီၣ်,ဒီးပာ်ကွံာ်အယၣ်,ဒီးဟံးန့ၢ်တၢ်ဝါဒီးကံၢ်တူာ်ထီၣ်အယီၢ်ဒ့လီၤ. 5အဝဲန့ၣ်ဝံၤဒီး,ဂၢ်လီၤထံလၢသရာ်ပူၤ,ဒီးသ့ကွံာ်အပျဲၢ်အဘီၣ်အခီၣ်,ဒီးတြူာ်ကွံာ်ဝဲလၢတၢ်ဝါလၢအကံၢ်တူၢ်အယီၢ်ဒ့န့ၣ်လီၤ.

6မၤသးဒ်န့ၣ်ဒီးဟဲဆူစီၤၡံမိၣ်ပ့းတရူးအအိၣ်,ဒီးအဝဲဒၣ်စံးဘၣ်အီၤ,ကစၢ်ဧၢ,မ့ၢ်နကသ့ကွံာ်ယခီၣ်ဧါ. 7ယ့ၣ်ရှူးစံးဆၢတၢ်ဒီးစံးဘၣ်အီၤ,တၢ်လၢယမၤခဲကနံၣ်အံၤ,နတသ့ၣ်ညါဘၣ်.တၢ်တဖၣ်အံၤအလီၢ်ခံဒီး,နကသ့ၣ်ညါလီၤ. 8စီၤပ့းတရူးစံးဘၣ်အီၤ,စိၤရီၤနတသ့ကွံာ်ယခီၣ်ဘၣ်.ယ့ၣ်ရှူးစံးဆၢအီၤ,ယမ့ၢ်တသ့ကွံာ်နၤဘၣ်ဒီး,နတဘၣ်ဃးဘၣ်ဒီးယၤဘၣ်. 9စီၤပ့းတရူးစံးဘၣ်အီၤ,ကစၢ်ဧၢ,ထဲယခီၣ်ဧိၤတမ့ၢ်ဘၣ်,မ့ၢ်ယစု,ဒီးယခိၣ်လီၤ. 10ယ့ၣ်ရှူးစံးဘၣ်အီၤ,ပှၤလၢအလုၣ်တ့ၢ်ထံန့ၣ်,သ့ကွံာ်အသးအလီၢ်တအိၣ်ဘၣ်,သ့ကွံာ်အလီၢ်အိၣ်ထဲအခီၣ်ဧိၤ,မ့ၢ်အကဆှီဝဲဒီဂၤညါလီၤ.ဒီးသုဝဲသ့ၣ်အံၤ,သုကဆှီဘၣ်ဆၣ်ဒီး,သုတကဆှီဘၣ်ခဲလၢာ်ဘၣ်. 11အဂ့ၢ်ဒ်အံၤ,သ့ၣ်ညါဝဲလၢပှၤလၢအဟ့ၣ်လီၤကွံာ်အီၤတဂၤ,မၤသးဒ်န့ၣ်ဒီးစံးဝဲဒၣ်,သုတကဆှီဘၣ်ခဲလၢာ်ဘၣ်လီၤ. 12မၤသးဒ်န့ၣ်ဒီး,တုၤအသ့ကွံာ်အခီၣ်ဝံၤဒီး,ဟံးက့ၤအယၣ်ဒီးဆ့ၣ်နီၤသန့ၤကဒီးဝဲ,ဒီးစံးဘၣ်အီၤ,ယမၤသုလၢမနုၤလဲၣ်န့ၣ်,သုနၢ်ပၢၢ်စ့ၢ်ကီးဧါ. 13သုကိးယၤလၢသရၣ်,ဒီးကစၢ်လီၤ.ဒီးသုကတိၤတၢ်န့ၣ်မ့ၢ်အဘၣ်လီၤ.အဂ့ၢ်ဒ်အံၤ,ယမ့ၢ်တၢ်န့ၣ်လီၤ. 14မၤသးဒ်န့ၣ်ဒီး,သုသရၣ်,ဒီးသုကစၢ်ယၤအံၤ,ယမ့ၢ်သ့ကွံာ်သုခီၣ်ဒီး,သုဝဲဒၣ်အံၤ,သုဂ့ၤသ့ကွံာ်လိာ်သုခီၣ်သကိးသကိးလီၤ. 15အဂ့ၢ်ဒ်အံၤ,ဒ်သိးသုကမၤတၢ်ဒ်ယမၤသုအသိးဒီး,ယဟ့ၣ်နဲၣ်သုလၢအဒိအတဲာ်လီၤ. 16ယစံးဘၣ်တဲဘၣ်သုတီတီလိၤလိၤ,ကုၢ်တဒိၣ်န့ၢ်ဘၣ်အကစၢ်ဘၣ်,ဒီးပှၤတၢ်မၢဖိတဒိၣ်န့ၢ်ဘၣ်ပှၤလၢအမၢလီၤအီၤဘၣ်. 17တၢ်န့ၣ်တဖၣ်သုမ့ၢ်သ့ၣ်ညါဒီးသုမ့ၢ်မၤအီၤဒီး,သုဘၣ်ဆိၣ်ဂ့ၤသုဝဲလီၤ.

18တမ့ၢ်ဘၣ်ယစံးလၢသုခဲလၢာ်အဂ့ၢ်ဘၣ်.ပှၤလၢယဃုထၢအီၤတဖၣ်န့ၣ်,ယသ့ၣ်ညါအီၤလီၤ.မ့မ့ၢ်ဒ်သိးလံာ်ကလၢထီၣ်ပှဲၤထီၣ်ဒီးပှၤလၢအအီၣ်ဃုာ်ကိၣ်ဒီးယၤတဂၤန့ၣ်,ထူယၤလၢအခီၣ်နၢၣ်ခံလီၤ. ▼

▼13:18 စံး.၄၁း၉

19ယစံးဘၣ်သုခဲကနံၣ်အံၤ,လၢတၢ်တချုးမၤဒံးဘၣ်အသး,ဒ်သိးတုၤအမၤအသးဒီး,သုကနာ်လၢယမ့ၢ်အဝဲဒၣ်လီၤ. 20ယစံးဘၣ်သုတီတီလိၤလိၤ,ပှၤမ့ၢ်တူၢ်လိာ်ပှၤလၢယမၢလီၤအီၤဒီး,မ့ၢ်အတူၢ်လိာ်ယၤဒီးပှၤလၢအတူၢ်လိာ်ယၤန့ၣ်,မ့ၢ်အတူၢ်လိာ်ပှၤလၢအမၢလီၤယၤလီၤ. 21တၢ်န့ၣ်တဖၣ်ယ့ၣ်ရှူးစံးဝဲဒီး,အသူၣ်ကိၢ်အသးဂီၤ,ဒီးအုၣ်အသးဒီးစံးဝဲဒၣ်,ယစံးဘၣ်တဲဘၣ်သုတီတီလိၤလိၤ,ပှၤအိၣ်လၢသုကျါတဂၤကဟ့ၣ်လီၤကွံာ်ယၤလီၤ.

22မ့ၢ်အစံးမတၤမတၤန့ၣ်ဒီး,အပျဲၢ်အဘီၣ်အသးဒ့ဒီ,ဒီးကွၢ်လိာ်အသးသကိးသကိးလီၤ. 23အပျဲၢ်အဘီၣ်လၢယ့ၣ်ရှူးအဲၣ်အီၤတဂၤန့ၣ်ဆ့ၣ်နီၤသန့ၤဝဲလၢယ့ၣ်ရှူးအသးနါပှၢ်အပူၤလီၤ. 24မၤသးဒ်န့ၣ်ဒီးဒ်သိးအကသံကွၢ်လၢအစံးမတၤတဂၤလဲၣ်န့ၣ်ဒီး,စီၤၡံမိၣ်ပ့းတရူးကျၢၢ်ကျာ်ဆူအအိၣ်လီၤ. 25မၤသးဒ်န့ၣ်ဒီးအဝဲဒၣ်န့ၣ်အခိၣ်သန့ၤအသးဒ်န့ၣ်လၢယ့ၣ်ရှူးအသးနါပှၢ်အလိၤဒီးစံးဘၣ်အီၤ,ကစၢ်ဧၢ,မ့ၢ်မတၤတဂၤလဲၣ်. 26ဒီးယ့ၣ်ရှူးစံးဆၢဝဲဒၣ်,မ့ၢ်ပှၤလၢယကဘျၢလီၤတၢ်တမီ,ဒီးဟ့ၣ်လီၤအီၤတဂၤလီၤ.ဒီးဘျၢလီၤတၢ်တမီ,ဒီးဟ့ၣ်လီၤစီၤၡံမိၣ်အဖိခွါ,စီၤယူဒၤအံၣ်စကၤရံၤအိာ်တဂၤလီၤ. 27ဒီးတၢ်တမီန့ၣ်အလီၢ်ခံဒီး,မုၣ်ကီၤလံၢ်လဲၤနုာ်လၢအပူၤလီၤ.မၤသးဒ်န့ၣ်ဒီးယ့ၣ်ရှူးစံးဘၣ်အီၤ,နမၤတၢ်န့ၣ်မၤရၤရၤတက့ၢ်.

28ဒီးမ့ၢ်အဘၣ်မနုၤမနုၤလၢအစံးတၢ်န့ၣ်လၢအီၤ,ပှၤဆ့ၣ်နီၤသန့ၤလၢအဃၢၤတဖၣ်,တသ့ၣ်ညါဘၣ်နီတဂၤဘၣ်. 29အဂ့ၢ်ဒ်အံၤ,တနီၤနီၤဆိကမိၣ်လၢစီၤယူဒၤစိာ်စ့အထၢၣ်အဃိဒီး,ယ့ၣ်ရှူးစံးဘၣ်အီၤ,ပှ့ၤတၢ်တမံၤမံၤလၢအလီၢ်အိၣ်လၢဘူၣ်အဂီၢ်တက့ၢ်.မ့တမ့ၢ်ဘၣ်ဒီး,ကဘၣ်ဟ့ၣ်ပှၤဖှီၣ်ဖိယာ်ဖိအတၢ်တမံၤမံၤလီၤ.

30မၤသးဒ်န့ၣ်ဒီးဟံးန့ၢ်တၢ်တမီ,ဒီးဟးထီၣ်ကွံာ်ဝဲတကီၢ်ခါ,ဒီးမ့ၢ်လၢမုၢ်နၤလီၤ.

31မၤသးဒ်န့ၣ်ဒီးတုၤအဟးထီၣ်ဒီး,ယ့ၣ်ရှူးစံးဝဲဒၣ်,ပှၤကညီဖိခွါအလၤကပီၤအိၣ်ဖျါထီၣ်ဝဲခဲကနံၣ်အံၤ,ဒီးယွၤအလၤကပီၤအိၣ်ဖျါထီၣ်စ့ၢ်ကီးလၢအပူၤလီၤ. 32(ယွၤအလၤကပီၤမ့ၢ်အိၣ်ဖျါထီၣ်လၢအပူၤ)ဒီး,ယွၤကဒုးလၤကပီၤစ့ၢ်ကီးအီၤလၢအကစၢ်ဒၣ်ဝဲလီၤ.ဒီးကဒုးလၤကပီၤအီၤချ့သဒံးလီၤ. 33ဖိသ့ၣ်လံၤသ့ၣ်ဧၢ,ယအိၣ်ဒံးဒီးသုတစိၢ်ဖိဒီး,သုကဃုယၤ,ဒီးဒ်ယစံးဘၣ်ပှၤယူဒၤဖိအသိးန့ၣ်,ခဲကနံၣ်အံၤယစံးဘၣ်က့ၤသု,တၢ်လၢယလဲၤအလီၢ်န့ၣ်,သုလဲၤတသ့ဘၣ်. 34ယဟ့ၣ်သုလၢတၢ်မၤလိာ်အသီတထံၣ်,ဒ်သိးသုကအဲၣ်လိာ်ကွံလိာ်သုသးသကိးသကိး,ဒ်ယအဲၣ်သုအသိး,ဒ်သိးသုကအဲၣ်လိာ်ကွံလိာ်သုသးသကိးသကိးလီၤ. 35လၢတၢ်အံၤ,လၢသုအဲၣ်လိာ်ကွံလိာ်သုသးအဃိဒီး,ပှၤခဲလၢာ်ကသ့ၣ်ညါလၢသုမ့ၢ်ယပျဲၢ်ယဘီၣ်လီၤ.

36စီၤၡံမိၣ်ပ့းတရူးစံးဘၣ်အီၤ,ကစၢ်ဧၢ,မ့ၢ်နကလဲၤဆူလဲၣ်.ယ့ၣ်ရှူးစံးဆၢအီၤ,မ့ၢ်ယကလဲၤဆူလဲၣ်ဆူလဲၣ်န့ၣ်,ခဲကနံၣ်အံၤနပိာ်ယခံတသ့ဘၣ်.ဆူညါနကပိာ်ယခံလီၤ. 37ဒီးစီၤပ့းတရူးစံးဘၣ်အီၤ,ကစၢ်ဧၢ,ဘၣ်မနုၤလၢယပိာ်နခံခဲကနံၣ်အံၤတသ့ဘၣ်လဲၣ်.ယကပာ်လီၤကွံာ်ယသးသမူလၢနဂီၢ်လီၤ. 38ယ့ၣ်ရှူးစံးဆၢအီၤ,မ့ၢ်နကပာ်လီၤကွံာ်နသးသမူလၢယဂီၢ်ဧါ.ယစံးဘၣ်တဲဘၣ်နၤတီတီလိၤလိၤ,ဆီဖါတချုးအိၣ်အိထီၣ်ဒံးဘၣ်ဒီး,နကသမၢယၤသၢဘျီလီၤ.