John 14
1သုဝဲသ့ၣ်အံၤ,သုတသူၣ်ကိၢ်သးဂီၤတဂ့ၤ,စူၢ်က့ၤနာ်က့ၤယွၤဒီးစူၢ်က့ၤနာ်က့ၤယၤစ့ၢ်ကီးတက့ၢ်. 2တၢ်အိၣ်အလီၢ်လၢယပၢ်အဟံၣ်ပူၤန့ၣ်,အိၣ်အါပူၤလီၤ.မ့တမ့ၢ်ဘၣ်ဒီး,ယကစံးဘၣ်တဲဘၣ်တ့ၢ်သုလီၤ.ယလဲၤကတဲာ်ကတီၤသုလီၢ်တပူၤလီၤ. 3ဒီးယမ့ၢ်လဲၤကတဲာ်ကတီၤသုလီၢ်တပူၤဒီး,ယကဟဲက့ၤကဒီးဆူသုအိၣ်လီၤ.ဒီးယကဟံးက့ၤသုဆူယကစၢ်ဒၣ်ယဲအအိၣ်ဒ်သိးဖဲယအိၣ်အလီၢ်န့ၣ်,သုကအိၣ်စ့ၢ်ကီးလီၤ. 4ဒီးဖဲယလဲၤန့ၣ်,သုသ့ၣ်ညါ,ဒီးကျဲန့ၣ်သုသ့ၣ်ညါလီၤ. 5စီၤသိၤမါစံးဘၣ်အီၤ,ကစၢ်ဧၢ,မ့ၢ်နကလဲၤဆူလဲၣ်ဆူလဲၣ်န့ၣ်,ပတသ့ၣ်ညါဘၣ်,ဒီးပသ့ၣ်ညါကျဲကသ့ဒ်လဲၣ်. 6ယ့ၣ်ရှူးစံးဘၣ်အီၤ,ယဲဒၣ်အံၤယမ့ၢ်ကျဲ,ဒီးတၢ်မ့ၢ်တၢ်တီ,ဒီးတၢ်မူလီၤ.မ့တမ့ၢ်ဘၣ်ယၤဒီး,ပှၤတဟဲဘၣ်ဆူပၢ်အအိၣ်နီတဂၤဘၣ်. 7သုမ့ၢ်သ့ၣ်ညါယၤဒီး,သုသ့ၣ်ညါယပၢ်စ့ၢ်ကီးလီၤ.ဒီးတုၤအံၤဆူညါ,သုသ့ၣ်ညါအီၤ,ဒီးသုထံၣ်အီၤလီၤ. 8စီၤဖံလံးပူးစံးဘၣ်အီၤ,ကစၢ်ဧၢ,ဒုးနဲၣ်ပှၤလၢပၢ်,ဒီးကမံသူၣ်မံသးပှၤလီၤ. 9ယ့ၣ်ရှူးစံးဘၣ်အီၤ,စီၤဖံလံးပူးဧၢ,ယအိၣ်တ့ၢ်ဒီးသုယံာ်ထဲအံၤဒီး,နတသ့ၣ်ညါယၤဘၣ်ဧါ.ပှၤလၢအထံၣ်ယၤန့ၣ်,မ့ၢ်အထံၣ်လံပၢ်န့ၣ်လီၤ.မ့မ့ၢ်ဒ်န့ၣ်ဒီး,ဘၣ်မနုၤလၢနစံး,ဒုးနဲၣ်ပၢ်လၢပှၤန့ၣ်လဲၣ်. 10မ့ၢ်နတနာ်ဘၣ်လၢယအိၣ်လၢပၢ်အပူၤ,ဒီးပၢ်အိၣ်လၢယပူၤဘၣ်ဧါ.တၢ်ကတိၤလၢယကတိၤဒီးသုန့ၣ်,တမ့ၢ်ဘၣ်ယကတိၤဒၣ်ယဲဘၣ်.တၢ်လၢယမၤတဖၣ်န့ၣ်,မ့ၢ်ပၢ်အိၣ်လၢယပူၤမၤဝဲဒၣ်လီၤ. 11နာ်ယၤလၢယအိၣ်လၢပၢ်အပူၤ,ဒီးပၢ်အိၣ်လၢယပူၤတက့ၢ်.မ့တမ့ၢ်ဘၣ်ဒီး,နာ်ယၤလၢယတၢ်မၤတဖၣ်န့ၣ်အဃိတက့ၢ်. 12ယစံးဘၣ်တဲဘၣ်သုတီတီလိၤလိၤ,ပှၤလၢအစူၢ်က့ၤနာ်က့ၤယၤန့ၣ်တၢ်မၤလၢယမၤန့ၣ်ကမၤစ့ၢ်ကီးဝဲ,ဒီးကမၤတၢ်ဒိၣ်န့ၢ်အန့ၣ်တက့ၢ်လီၤ.အဂ့ၢ်ဒ်အံၤ,ယက့ၤထီၣ်ဆူယပၢ်အအိၣ်, 13ဒီးဖဲဒၣ်သုဃ့တၢ်လၢယမံၤတမံၤလၢ်လၢ်န့ၣ်,ယကမၤအဝဲန့ၣ်,ဒ်သိးပၢ်အလၤအကပီၤကအိၣ်ဖျါဝဲလၢအဖိခွါအပူၤလီၤ. 14သုမ့ၢ်ဃ့တၢ်တမံၤမံၤလၢယမံၤဒီး,ယကမၤလီၤ. 15သုမ့ၢ်အဲၣ်ယၤဒီး,တိၢ်န့ၢ်ယတၢ်မၤလိာ်တဖၣ်တက့ၢ်. 16ဒီးယကဃ့တၢ်လၢပၢ်ဒီးကဟ့ၣ်သုလၢပှၤမၤစၢၤတၢ်လၢအဂၤတဂၤဒ်သိးအကအိၣ်ဒီးသုလီၤထူလီၤယိာ်လီၤ. 17အဝဲန့ၣ်မ့ၢ်သးလၢအဘၣ်ဃးဒီးတၢ်မ့ၢ်တၢ်တီလၢဟီၣ်ခိၣ်ဖိတူၢ်လိာ်အီၤတသ့ဘၣ်.အဂ့ၢ်ဒ်အံၤ,တထံၣ်ဘၣ်အီၤဒီးတသ့ၣ်ညါဘၣ်အီၤဘၣ်.မ့မ့ၢ်သုဝဲသ့ၣ်အံၤသုသ့ၣ်ညါအီၤလီၤ.အဂ့ၢ်ဒ်အံၤ,အိၣ်ဝဲဆိးဝဲဒီးသု,ဒီးကအိၣ်ဝဲလၢသုပူၤလီၤ. 18ယတပာ်လီၤတဲာ်ဖိၣ်ဃဲဘၣ်သုဘၣ်,ယကဟဲက့ၤဆူသုအိၣ်လီၤ. 19တစိၢ်ဖိပူၤကွံာ်ဒီး,ဟီၣ်ခိၣ်တထံၣ်လၢၤဘၣ်ယၤဘၣ်.မ့မ့ၢ်သုဝဲသ့ၣ်အံၤ,သုကထံၣ်ယၤလီၤ.မ့ၢ်ယမူဒီး,သုကမူစ့ၢ်ကီးလီၤ. 20လၢမုၢ်တနံၤန့ၣ်သုကသ့ၣ်ညါလၢယအိၣ်လၢပၢ်အပူၤ,ဒီးသုအိၣ်လၢယပူၤ,ဒီးယအိၣ်လၢသုပူၤလီၤ. 21ပှၤလၢအအိၣ်ဒီးယတၢ်မၤလိာ်ဒီးတိၢ်န့ၢ်ဝဲန့ၣ်,အဝဲဒၣ်မ့ၢ်ပှၤလၢအအဲၣ်ယၤလီၤ.ဒီးပှၤလၢအအဲၣ်ယၤန့ၣ်,ယပၢ်ကအဲၣ်အီၤ,ဒီးယဲဒၣ်အံၤ,ယကအဲၣ်အီၤ,ဒီးယကဒုးနဲၣ်ယသးလၢအီၤလီၤ. 22စီၤယူဒၤ,(တမ့ၢ်ဘၣ်အံၣ်စကၤရံၤအိာ်)တဂၤစံးဘၣ်အီၤ,ကစၢ်ဧၢ,နကဒုးနဲၣ်နသးလၢပဝဲဒၣ်အံၤ,ဒီးတမ့ၢ်ဘၣ်လၢပှၤဟီၣ်ခိၣ်ဖိဘၣ်န့ၣ်မ့ၢ်ဒ်လဲၣ်. 23ယ့ၣ်ရှူးစံးဆၢတၢ်ဒီးစံးဘၣ်အီၤ,ပှၤမ့ၢ်အဲၣ်ယၤဒီး,ကတိၢ်န့ၢ်ယကလုၢ်ကထါ,ဒီးယပၢ်ကအဲၣ်အီၤ,ဒီးပကဟဲဆူအအိၣ်,ဒီးမၤန့ၢ်ပအိၣ်အလီၢ်ဒီးအီၤလီၤ. 24ပှၤလၢအတအဲၣ်ဘၣ်ယၤဘၣ်န့ၣ်,တတိၢ်န့ၢ်ဘၣ်ယကလုၢ်ကထါဘၣ်.ဒီးတၢ်ကတိၤလၢသုနၢ်ဟူန့ၣ်,တမ့ၢ်ဘၣ်ယကလုၢ်ဘၣ်.မ့ၢ်ပၢ်လၢအမၢလီၤယၤအကလုၢ်လီၤ. 25ယအိၣ်ဒီးသုအဖၢမုၢ်ဒီး,ယစံးဘၣ်တဲဘၣ်သုလၢတၢ်န့ၣ်တဖၣ်လံလီၤ. 26ဘၣ်ဆၣ်ဒီးပှၤမၤစၢၤတၢ်,သးစီဆှံလၢပၢ်မၢလီၤအီၤလၢယမံၤ,အဝဲဒၣ်ကသိၣ်လိသုလၢတၢ်ခဲလၢာ်,ဒီးကဒုးသ့ၣ်နီၣ်ထီၣ်က့ၤသုလၢတၢ်လၢယစံးဘၣ်တဲဘၣ်သုခဲလၢာ်လီၤ. 27ယပာ်လီၤတဲာ်တၢ်ဃူတၢ်ဖိးဒီးသု,ယတၢ်ဃူတၢ်ဖိးန့ၣ်,ယဟ့ၣ်လီၤသုလီၤ.ယတဟ့ၣ်ဘၣ်သုဒ်ဟီၣ်ခိၣ်ဟ့ၣ်တၢ်အသိးဘၣ်.သုသးန့ၣ်သုတကိၢ်သုတဂီၤတဂ့ၤ,ဒီးသုသုတသးအုးတဂ့ၤ. 28သုနၢ်ဟူလံလၢယစံးဘၣ်သု,ယလဲၤတၢ်,ဒီးယဟဲက့ၤဆူသုအိၣ်န့ၣ်,သုမ့ၢ်အဲၣ်ယၤဒီး,မ့ၢ်ယစံးလၢယကလဲၤထီၣ်ဆူပၢ်အအိၣ်ဒီး,သုကသးခုလီၤ.အဂ့ၢ်ဒ်အံၤ,ယပၢ်ဒိၣ်န့ၢ်ယၤတက့ၢ်လီၤ. 29ဒီးခဲကနံၣ်အံၤယစံးဘၣ်ပာ်သုလၢအတချုးမၤဒံးဘၣ်အသး,ဒ်သိးတုၤမ့ၢ်အမၤအသးဒီး,သုကနာ်တၢ်လီၤ. 30ဆူညါယတကတိၤလၢၤဘၣ်ဒီးသုလၢအအါဘၣ်.အဂ့ၢ်ဒ်အံၤ,ဟီၣ်ခိၣ်အခိၣ်တဂၤဟဲဝဲဒီးအတၢ်တအိၣ်ဘၣ်လၢယပူၤနီတမံၤဘၣ်. 31မ့မ့ၢ်ဒ်သိးဟီၣ်ခိၣ်ကသ့ၣ်ညါလၢယအဲၣ်ပၢ်,ဒီးဒ်ပၢ်မၤလိာ်ယၤအသိးန့ၣ်,ယမၤယဲဒ်န့ၣ်အသိးလီၤ.ဂဲၤဆၢထၢၣ်ဟးထီၣ်ကွံာ်သကိးဖဲအံၤတက့ၢ်.
Copyright information for
KswSKMB