‏ John 18

1ယ့ၣ်ရှူးစံးဘၣ်တဲဘၣ်တၢ်တဖၣ်န့ၣ်ဝံၤဒီးဟးထီၣ်ဝဲဒီးအပျဲၢ်အဘီၣ်ဆူကံဒြိၣ်အကျိဝၢ်ဘးခီ,ဖဲတၤသၣ်အလီၢ်အိၣ်တပူၤ,ဒီးလဲၤနုာ်ဝဲဒီးအပျဲၢ်အဘီၣ်လီၤ. 2ဒီးပှၤလၢအဟ့ၣ်လီၤကွံာ်အီၤ,စီၤယူဒၤန့ၣ်,သ့ၣ်ညါအလီၢ်စ့ၢ်ကီးလီၤ.အဂ့ၢ်ဒ်အံၤ,ယ့ၣ်ရှူးအိၣ်ဖှိၣ်ဝဲဒီးအပျဲၢ်အဘီၣ်ဖဲန့ၣ်အါဘျီလီၤ.

3မၤသးဒ်န့ၣ်ဒီးန့ၢ်ဘၣ်သုးဖိတဖု,ဒီးတၢ်အခိၣ်တဖၣ်,လၢပှၤလုၢ်တၢ်အခိၣ်ဒီးပှၤဖၤရံၤၡဲတဖၣ်အစုပူၤ,ဒီးလဲၤဆူန့ၣ်ဒီးဆှီဒီးမ့ၣ်အူဒၢဒီးတၢ်အစုကဝဲၤလီၤ. 4မၤသးဒ်န့ၣ်ဒီးယ့ၣ်ရှူးသ့ၣ်ညါတၢ်လၢအကဟဲဘၣ်အီၤခဲလၢာ်ဒီး,လဲၤထီၣ်ဆူပှၤတဖၣ်န့ၣ်အအိၣ်,ဒီးစံးဘၣ်အီၤ,သုဃုမတၤတဂၤလဲၣ်.

5ဒီးအဝဲသ့ၣ်စံးဘၣ်အီၤ,ပှၤနစၤရ့းဖိယ့ၣ်ရှူးလီၤ.ဒီးယ့ၣ်ရှူးစံးဘၣ်အီၤ,မ့ၢ်ယၤလီၤ.ဒီးပှၤလၢအဟ့ၣ်လီၤကွံာ်အီၤ,စီၤယူဒၤတဂၤ,အိၣ်ဆၢထၢၣ်စ့ၢ်ကီးဒီးအဝဲသ့ၣ်တဖၣ်လီၤ.

6မၤသးဒ်န့ၣ်ဒီးတုၤအစံးဘၣ်အီၤ,မ့ၢ်ယၤဒီးအဝဲသ့ၣ်တဖၣ်န့ၣ်ဂုၤက့ၤအလီၢ်ခံ,ဒီးလီၤဃံၤဝဲလၢဟီၣ်ခိၣ်အဖီခိၣ်တကူၢ်သ့ၣ်လီၤ.

7မၤသးဒ်န့ၣ်ဒီးယ့ၣ်ရှူးသံကွၢ်ကဒီးအီၤ,သုဃုမတၤတဂၤလဲၣ်.ဒီးစံးဝဲဒၣ်,ပှၤနစၤရ့းဖိယ့ၣ်ရှူးလီၤ. 8ယ့ၣ်ရှူးစံးဆၢဝဲ,ယစံးတ့ၢ်သု,မ့ၢ်ယၤလီၤ.မၤသးဒ်န့ၣ်ဒီးသုမ့ၢ်ဃုယၤဒီး,ဒုးဟးထီၣ်ကွံာ်ပှၤတဖၣ်အံၤတက့ၢ်. 9ဒ်သိးတၢ်အကလုၢ်လၢအစံးဝဲ,လၢပှၤလၢနဟ့ၣ်လီၤယၤတဖၣ်န့ၣ်,ယတမၤဟါမၢ်ကွံာ်ဘၣ်နီတဂၤဘၣ်န့ၣ်,ကလၢထီၣ်ပှဲၤထီၣ်ဝဲလီၤ.

10မၤသးဒ်န့ၣ်ဒီးစီၤၡံမိၣ်ပ့းတရူးတဂၤအိၣ်ဒီးအနးတဘ့ၣ်,ဒီးဘ့ၣ်ထီၣ်ဝဲ,ဒီးကျီပှၤလုၢ်တၢ်အခိၣ်အခ့အပှၤတဂၤ,ဒီးအနၢ်ထွဲတူာ်ကွံာ်လီၤ.အခ့အပှၤအမံၤမ့ၢ်စီၤမါလဃူးလီၤ. 11မၤသးဒ်န့ၣ်ဒီး,ယ့ၣ်ရှူးစံးဘၣ်စီၤပ့းတရူး,ဖျီၣ်နုာ်က့ၤနးဆူအတြိးပူၤတက့ၢ်.လီခီလၢယပၢ်ဟ့ၣ်ယၤန့ၣ်,မ့ၢ်ယတဘၣ်အီဘၣ်ဧါ.

12မၤသးဒ်န့ၣ်ဒီးပှၤသုးဖိတဖု,ဒီးပှၤသုးဖိတကထိအခိၣ်,ဒီးပှၤယူဒၤဖိအတၢ်အခိၣ်တဖၣ်,ဟံးန့ၢ်ယ့ၣ်ရှူးဒီးစၢဃာ်အီၤ,ဒီးလဲၤဆှၢဆိအီၤဆူစီၤအၣ်နၣ်အအိၣ်လီၤ. 13အဂ့ၢ်ဒ်အံၤ,အဝဲဒၣ်မ့ၢ်စီၤကၤယါဖၤလၢအကဲထီၣ်ပှၤလုၢ်တၢ်အခိၣ်လၢနံၣ်အဝဲန့ၣ်အမံၤပှၢ်လီၤ. 14ဒီးစီၤကၤယါဖၤမ့ၢ်ပှၤလၢအသိၣ်လိပှၤယူဒၤဖိလၢပှၤတဂၤဂ့ၤသံလၢပှၤတကလုာ်န့ၣ်အဂီၢ်လီၤ.

15စီၤၡံမိၣ်ပ့းတရူး,ဒီးအပျဲၢ်အဘီၣ်လၢအဂၤတဂၤ,ပိာ်ထီၣ်ယ့ၣ်ရှူးအခံလီၤ.ဒီးအပျဲၢ်အဂၤတဂၤအံၤ,ဘၣ်တၢ်သ့ၣ်ညါအီၤလၢပှၤလုၢ်တၢ်အခိၣ်ဒီး,လဲၤနုာ်ဝဲဒီးယ့ၣ်ရှူးဆူပှၤလုၢ်တၢ်အခိၣ်အဟံၣ်အဂၢၤပူၤလီၤ. 16မ့မ့ၢ်စီၤပ့းတရူးတဂၤန့ၣ်,ဆၢထၢၣ်လၢခိလၢကျဲစၢၤအဃၢၤလီၤ.မၤသးဒ်န့ၣ်ဒီးအပျဲၢ်အဘီၣ်တဂၤလၢပှၤလုၢ်တၢ်အခိၣ်သ့ၣ်ညါအီၤတဂၤန့ၣ်,ဟးထီၣ်ဒီးကတိၤတၢ်ဒီးပှၤပိာ်မုၣ်လၢအပၢၤကျဲစၢၤတဂၤဒီး,ဒုးလဲၤနုာ်စီၤပ့းတရူးလီၤ. 17မၤသးဒ်န့ၣ်ဒီးပိာ်မုၣ်လၢအပၢၤကျဲစၢၤတဂၤစံးဘၣ်စီၤပ့းတရူး,နမ့ၢ်ပှၤတဂၤန့ၣ်အပျဲၢ်အဘီၣ်တမ့ၢ်ဘၣ်ဧါ.အဝဲဒၣ်စံး,တမ့ၢ်ဘၣ်.

18ဒီးမ့ၢ်တၢ်ဂိၢ်ဒီး,ပှၤကုၢ်ဖိဒီးတၢ်အခိၣ်သ့ၣ်တဖၣ်,ဆိၣ်ကဲၤမ့ၣ်အူဒီးဆူးဝဲတကူၢ်သ့ၣ်,ဒီးစီၤပ့းတရူးအိၣ်ဒီးအီၤ,ဒီးဆၢထၢၣ်ဆူးမ့ၣ်အူစ့ၢ်ကီးလီၤ.

19မၤသးဒ်န့ၣ်ဒီးပှၤလုၢ်တၢ်အခိၣ်သံကွၢ်ယ့ၣ်ရှူးလၢအပျဲၢ်အဘီၣ်အဂ့ၢ်အကျိၤ,ဒီးအတၢ်သိၣ်တၢ်သီအဂ့ၢ်အကျိၤလီၤ. 20ယ့ၣ်ရှူးကတိၤဆၢအီၤ,ယကတိၤတၢ်ဒီးဟီၣ်ခိၣ်လၢတၢ်အိၣ်ဖျါ,ယသိၣ်က့ၤသီက့ၤတၢ်တဘိယူၢ်ဃီလၢဘူၣ်ဘျီၣ်ပူၤ,ဒီးလၢတၢ်လုၢ်ဟံၣ်ပူၤ,ဖဲပှၤယူဒၤဖိအိၣ်ဖှိၣ်ရိဖှိၣ်အလီၢ်လီၤ.ဒီးလၢတၢ်ခူသူၣ်အပူၤန့ၣ်ယတကတိၤတၢ်နီတမံၤဘၣ်. 21နသံကွၢ်ယၤဘၣ်မနုၤလဲၣ်.ယကတိၤတၢ်ဒ်လဲၣ်ဒ်လဲၣ်န့ၣ်သံကွၢ်ပှၤလၢအနၢ်ဟူဝဲန့ၣ်တက့ၢ်.ကွၢ်ကွၢ်,တၢ်လၢယစံးဘၣ်အီၤန့ၣ်,အဝဲသ့ၣ်သ့ၣ်ညါလီၤ.

22တၢ်န့ၣ်တဖၣ်ကတိၤဝဲ,ဒီးတၢ်အခိၣ်ဆၢထၢၣ်ဖဲန့ၣ်တဂၤ,ဒဲယ့ၣ်ရှူးဒီးစံးဝဲဒၣ်,နကတိၤဆၢပှၤလုၢ်တၢ်အခိၣ်ဒ်န့ၣ်ဧါ. 23ယ့ၣ်ရှူးစံးဆၢအီၤ,ယမ့ၢ်ကတိၤတၢ်အၢဒီး,အုၣ်နသးလၢတၢ်အၢအဂ့ၢ်န့ၣ်တက့ၢ်.မ့မ့ၢ်တၢ်ဂ့ၤဒီး,ဘၣ်မနုၤလၢနဒဲယၤလဲၣ်.

24မၤသးဒ်န့ၣ်ဒီးစီၤအၣ်နၣ်မၢလီၤအီၤအိၣ်စၢဃာ်အသးဆူပှၤလုၢ်တၢ်အခိၣ်,စီၤကၤယါဖၤအအိၣ်လီၤ. 25ဒီးစီၤၡံမိၣ်ပ့းတရူးဆၢထၢၣ်ဆူးမ့ၣ်အူလီၤ.မၤသးဒ်န့ၣ်ဒီးပှၤစံးဘၣ်အီၤ,နဲဒၣ်အံၤ,နမ့ၢ်အပျဲၢ်အဘီၣ်တမ့ၢ်ဘၣ်ဧါ.အဝဲဒၣ်သမၢတၢ်ဒီးစံးဝဲဒၣ်,တမ့ၢ်ဘၣ်. 26ဒီးပှၤလၢစီၤပ့းတရူးကျီတူာ်ကွံာ်အနၢ်တဂၤန့ၣ်အဘူးအတံၢ်,ပှၤလုၢ်တၢ်အခိၣ်အခ့အပှၤတဂၤ,စံးဝဲဒၣ်,ယထံၣ်တ့ၢ်နၤလၢတၤသၣ်အလီၢ်ဒီးအဝဲဒၣ်န့ၣ်တမ့ၢ်ဘၣ်ဧါ. 27မၤသးဒ်န့ၣ်ဒီးစီၤပ့းတရူးသမၢကဒီးတၢ်,ဒီးဆီဖါအိၣ်အိထီၣ်ဝဲတကီၢ်ခါလီၤ.

28မၤသးဒ်န့ၣ်ဒီးအဝဲသ့ၣ်လဲၤဆှၢယ့ၣ်ရှူးလၢစီၤကၤယါဖၤအအိၣ်ဆူကွီၢ်ဘျီၣ်ပူၤ,ဒီးဘၣ်ဖဲမုၢ်ဆ့ၣ်ထီၣ်လီၤ.ဒီးအဝဲသ့ၣ်,ဒ်သိးအသုတဘၣ်တၢ်တကဆှီဘၣ်တဂ့ၤ,ဒီးဒ်သိးအကအီၣ်ဘူၣ်လဲၤကပာ်သ့ဒီး,တလဲၤနုာ်ဘၣ်ဆူကွီၢ်ဘျီၣ်ပူၤဘၣ်. 29မၤသးဒ်န့ၣ်ဒီးစီၤပံၤလးလဲၤထီၣ်ဆူအအိၣ်ဒီးစံးဝဲဒၣ်ပှၤတဂၤအံၤသုပာ်တၢ်ကမၣ်လၢအလိၤလၢမနုၤတမံၤလဲၣ်. 30ဒီးအဝဲသ့ၣ်စံးဆၢတၢ်ဒီးစံးဘၣ်အီၤ,မ့တမ့ၢ်ဘၣ်ပှၤမၤတၢ်အၢဒီး,ပတဟ့ၣ်လီၤကွံာ်ဘၣ်အီၤလၢနၤဘၣ်. 31မၤသးဒ်န့ၣ်ဒီးစီၤပံၤလးစံးဘၣ်အီၤ,ဟံးန့ၢ်အီၤ,ဒီးစံၣ်ညီၣ်အီၤဒ်သုတၢ်သိၣ်တၢ်သီအသိးန့ၣ်တက့ၢ်.မၤသးဒ်န့ၣ်ဒီးပှၤယူဒၤဖိစံးဘၣ်အီၤ,တၢ်တဒုးမၤသံဘၣ်ပှၤလၢပှၤကညီနီတဂၤဘၣ်. 32ဒ်သိးယ့ၣ်ရှူးအကလုၢ်လၢအစံးဝဲဒီးဒုးနဲၣ်ဝဲလၢအကဘၣ်သံလၢတၢ်သံဒ်လဲၣ်ဒ်လဲၣ်န့ၣ်,ကလၢထီၣ်ပှဲၤထီၣ်လီၤ.

33မၤသးဒ်န့ၣ်ဒီးစီၤပံၤလးက့ၤနုာ်ကဒီးဆူကွီၢ်ဘျီၣ်ပူၤ,ဒီးကိးက့ၤယ့ၣ်ရှူးဒီးစံးဘၣ်အီၤ,နဲဒၣ်အံၤ,နမ့ၢ်ပှၤယူဒၤဖိအစီၤပၤဧါ. 34ယ့ၣ်ရှူးစံးဆၢအီၤ,ဖဲနသးဒၣ်နဲ,မ့ၢ်နစံးတၢ်အံၤဧါ. 35မ့တမ့ၢ်ဘၣ်ဒ်န့ၣ်ဒီး,မ့ၢ်ပှၤဂၤစံးဘၣ်နၤလၢယဂ့ၢ်လဲၣ်.စီၤပံၤလးစံးဆၢဝဲ,ယဲဒၣ်အံၤ,ယမ့ၢ်ပှၤယူဒၤဖိဧါ.နပှၤတကလုာ်ဒၣ်နဲ,ဒီးပှၤလုၢ်တၢ်အခိၣ်သ့ၣ်တဖၣ်န့ၣ်,ဟ့ၣ်လီၤနၤလၢယၤလံ.နမၤတၢ်မနုၤတမံၤလဲၣ်. 36ယ့ၣ်ရှူးစံးဆၢဝဲ,ယဘီယမုၢ်တဘၣ်ဃးဘၣ်ဒီးဟီၣ်ခိၣ်အံၤဘၣ်.ယဘီယမုၢ်မ့ၢ်ဘၣ်ဃးဒီးဟီၣ်ခိၣ်အံၤဒီး,ဒ်သိးယသုတလီၤလၢပှၤယူဒၤဖိအစုပူၤတဂ့ၤဒီး,ယခ့ယပှၤကဒုးတၢ်လီၤ.မ့မ့ၢ်ခဲကနံၣ်အံၤယဘီယမုၢ်တမ့ၢ်ဘၣ်လၢတၢ်ဖဲအံၤဘၣ်. 37မၤသးဒ်န့ၣ်ဒီးစီၤပံၤလးစံးဘၣ်အီၤ,မ့မ့ၢ်ဒ်န့ၣ်ဒီး,နမ့ၢ်စီၤပၤတဂၤဧါ.ယ့ၣ်ရှူးစံးဆၢဝဲ,နစံးတၢ်လၢယမ့ၢ်စီၤပၤတဂၤလီၤ.ဒ်သိးယကအုၣ်ယသးလၢတၢ်မ့ၢ်တၢ်တီအဂ့ၢ်ဒီး,ယအိၣ်ဖျဲၣ်,ဒီးယဟဲလီၤလၢဟီၣ်ခိၣ်ချၢလံ.ကယဲၢ်ပှၤလၢအဘၣ်ဃးဒီးတၢ်မ့ၢ်တၢ်တီန့ၣ်,ဒိကနၣ်ယကလုၢ်ယကထါလီၤ.

38စီၤပံၤလးစံးဘၣ်အီၤ,တၢ်မ့ၢ်တၢ်တီမ့ၢ်တၢ်မနုၤတမံၤလဲၣ်.စံးတၢ်န့ၣ်ဒီး,လဲၤထီၣ်ကဒီးဆူပှၤယူဒၤဖိအအိၣ်ဒီးစံးဘၣ်အီၤ,အဝဲတဂၤန့ၣ်,ယတထံၣ်ဘၣ်တၢ်ကမၣ်လၢအလိၤနီတမံၤဘၣ်. 39ဘၣ်ဆၣ်ဒီးသုလုၢ်သုလၢ်အိၣ်ဝဲ,လၢယဘၣ်ပျၢ်န့ၢ်သုလၢပှၤတဂၤလၢဘူၣ်လဲၤကပာ်အပူၤလီၤ.မၤသးဒ်န့ၣ်ဒီးဘၣ်သုသးလၢယကပျၢ်န့ၢ်သုလၢပှၤယူဒၤဖိအစီၤပၤန့ၣ်ဧါ. 40မၤသးဒ်န့ၣ်ဒီးပှၤခဲလၢာ်ကိးပသူထီၣ်ကဒီး,ဒီးစံးဝဲဒၣ်,အဝဲန့ၣ်တမ့ၢ်ဘၣ်.မ့ၢ်စီၤဘၤရးဘါလီၤ.ဒီးစီၤဘၤရးဘါန့ၣ်မ့ၢ်တမျိးတမျာ်တဂၤလီၤ.