‏ John 19

1မၤသးဒ်န့ၣ်ဒီးအကတီၢ်ဖဲန့ၣ်စီၤပံၤလးဟံးန့ၢ်ယ့ၣ်ရှူး,ဒီးတီၢ်အီၤလီၤ. 2ဒီးပှၤသုးဖိတဖၣ်ထ့ခိၣ်သလုးလၢတၤဆှုၣ်,ဒီးပာ်ထီၣ်ဝဲလၢအခိၣ်,ဒီးဒုးသိးထီၣ်အီၤလၢဆ့လုးတကုာ်, 3ဒီးစံးဝဲဒၣ်,ပှၤယူဒၤဖိအစီၤပၤဧၢ,ဒီးဒဲအီၤလီၤ. 4ဒီးစီၤပံၤလးလဲၤထီၣ်ကဒီးဆူခိဒီးစံးဘၣ်ပှၤတဖၣ်န့ၣ်,ကွၢ်ကွၢ်,ဒ်သိးသုကသ့ၣ်ညါလၢယတထံၣ်ဘၣ်တၢ်ကမၣ်လၢအလိၤနီတမံၤဘၣ်ဒီး,ယဟဲဆှၢထီၣ်အီၤဆူသုအိၣ်လၢခိလီၤ. 5မၤသးဒ်န့ၣ်ဒီးယ့ၣ်ရှူးကုာ်ခိၣ်သလုးတၤဆှုၣ်,ဒီးသိးဆ့လုးတကုာ်,ဒီးလဲၤထီၣ်ဝဲဆူခိလီၤ.ဒီးစံးဘၣ်အဝဲသ့ၣ်,ကွၢ်ကွၢ်,ပှၤကညီတဂၤန့ၣ်လီၤ. 6မၤသးဒ်န့ၣ်ဒီးတုၤပှၤလုၢ်တၢ်အဒိၣ်ဒီးတၢ်အခ့အပှၤသ့ၣ်တဖၣ်ထံၣ်အီၤဒီး,ကိးပသူထီၣ်ဒီးစံးဝဲဒၣ်,ပျၤထီကွံာ်အီၤလၢထူၣ်စုညါအလိၤ,ပျၤထီကွံာ်အီၤလၢထူၣ်စုညါအလိၤတက့ၢ်.စီၤပံၤလးစံးဘၣ်အီၤ,ဟံးန့ၢ်အီၤဒီးပျၤထီကွံာ်အီၤသုဝဲလၢထူၣ်စုညါအလိၤတက့ၢ်.အဂ့ၢ်ဒ်အံၤ,ယဲဒၣ်အံၤယတထံၣ်ဘၣ်တၢ်ကမၣ်လၢအလိၤနီတမံၤဘၣ်. 7ပှၤယူဒၤဖိစံးဆၢအီၤ,ပတၢ်သိၣ်တၢ်သီအိၣ်,ဒီးဒ်ပတၢ်သိၣ်တၢ်သီအသိးန့ၣ်အဝဲဒၣ်ဂ့ၤဘၣ်သံလီၤ.အဂ့ၢ်ဒ်အံၤ,စံးလီၤအသးလၢယွၤအဖိခွါလီၤ.

8မၤသးဒ်န့ၣ်ဒီးတုၤစီၤပံၤလးနၢ်ဟူတၢ်ကတိၤတဘီန့ၣ်ဒီး,အသူၣ်ပျံၤအသးပျံၤဒိၣ်န့ၢ်အလီၢ်တက့ၢ်လီၤ. 9ဒီးက့ၤနုာ်ကဒီးဆူကွီၢ်ဘျီၣ်ပူၤ,ဒီးစံးဘၣ်ယ့ၣ်ရှူး,နအိၣ်ထီၣ်ဖဲလဲၣ်.ဒီးယ့ၣ်ရှူးတစံးဆၢဘၣ်အီၤနီတမံၤဘၣ်. 10မၤသးဒ်န့ၣ်ဒီးစီၤပံၤလးစံးဘၣ်အီၤ,နတစံးဆၢဘၣ်ယၤဘၣ်ဧါ.ယအိၣ်ဒီးယစိယကမီၤလၢယကပျၤထီနၤလၢထူၣ်စုညါအလိၤမ့ၢ်ဂ့ၤ,ယစိယကမီၤလၢယကပျၢ်နၤမ့ၢ်ဂ့ၤန့ၣ်,နတသ့ၣ်ညါဘၣ်ဧါ. 11ယ့ၣ်ရှူးစံးဆၢဝဲ,တၢ်လၢထးန့ၣ်မ့ၢ်တဟ့ၣ်နၤဘၣ်ဒီး,နစိနကမီၤထီဒါယၤအိၣ်တသ့ဘၣ်နီတမံၤဘၣ်.မ်ဒ်န့ၣ်ဒီး,ပှၤတဂၤလၢအဟ့ၣ်လီၤယၤလၢနစုပူၤန့ၣ်,အတၢ်ဒဲးဘးဒိၣ်န့ၢ်အန့ၣ်တက့ၢ်လီၤ. 12လၢန့ၣ်လံၤလံၤဒီး,စီၤပံၤလးဃုပျၢ်ကွံာ်အီၤလီၤ.မ့မ့ၢ်ပှၤယူဒၤဖိကိးပသူထီၣ်ဒီးစံးဝဲဒၣ်,အဝဲတဂၤအံၤ,နမ့ၢ်ပျၢ်ကွံာ်ဒီး,နတမ့ၢ်ဘၣ်ပှၤအဲၣ်ကဲစၢ်ဘၣ်.ကယဲၢ်ပှၤလၢအပာ်အသးလၢစီၤပၤတဂၤလၢ်လၢ်န့ၣ်,မ့ၢ်အကတိၤထီဒါကဲစၢ်လီၤ.

13စီၤပံၤလးနၢ်ဟူအဝဲသ့ၣ်အတၢ်ကတိၤန့ၣ်ဒီး,ဆှၢထီၣ်ယ့ၣ်ရှူးဆူခိ,ဒီးဆ့ၣ်နီၤဝဲလၢကွီၢ်အလီၢ်ပစိာ်,အိၣ်လၢအလီၢ်ကိးဝဲအမံၤလၢလၢၢ်ဘ့ၣ်ဘၣ်,မ့မ့ၢ်ပှၤဧ့ၤဘြံၤဖိအကျိာ်န့ၣ်ကိးဝဲအမံၤလၢကၤဘၤသါလီၤ. 14(ဒီးမ့ၢ်ဘူၣ်လဲၤကပာ်ကတဲာ်ကတီၤတၢ်အနံၤ,ဒီးဘၣ်လၢဃုနၣ်ရံၣ်ဃၣ်ဃၣ်)ဒီးစံးဘၣ်ပှၤယူဒၤဖိ,ကွၢ်ကွၢ်,သုစီၤပၤလီၤ. 15ဒီးအဝဲသ့ၣ်ကိးပသူထီၣ်,စိာ်ကွံာ်,စိာ်ကွံာ်,ပျၤထီအီၤလၢထူၣ်စုညါအလိၤတက့ၢ်.စီၤပံၤလးစံးဘၣ်အီၤ,မ့ၢ်ယကပျၤထီသုစီၤပၤလၢထူၣ်စုညါအလိၤဧါ.ပှၤလုၢ်တၢ်အခိၣ်တဖၣ်စံးဆၢဝဲ,ပစီၤပၤတအိၣ်ဘၣ်,အိၣ်ထဲကဲစၢ်ဧိၤလီၤ. 16မၤသးဒ်န့ၣ်ဒီးတဘျီဃီန့ၣ်,ဒ်သိးအကဘၣ်ပျၤထီအီၤလၢထူၣ်စုညါအလိၤဒီး,ဟ့ၣ်လီၤအီၤလၢအစုပူၤလီၤ.မၤသးဒ်န့ၣ်ဒီးအဝဲသ့ၣ်ဟံးန့ၢ်ယ့ၣ်ရှူးလီၤ.

17ဒီးအဝဲဒၣ်ဟးထီၣ်ယိးအထူၣ်စုညါဆူအလီၢ်ကိးဝဲအမံၤလၢတၢ်ခိၣ်ဃံ,လၢဧ့ၤဘြံၤအကျိာ်န့ၣ်,ကိးဝဲလၢကီၤလၤကီၤသါလီၤ. 18ဒီးပျၤထီအီၤလၢထူၣ်စုညါအလိၤဖဲန့ၣ်,ဒီးပှၤအဂၤခံဂၤဒီးအီၤ,လၢအဝဲတခီတဂၤ,ဒီးလၢအဝဲတခီတဂၤ,ဒီးယ့ၣ်ရှူးလၢအဘၢၣ်စၢၤလီၤ. 19ဒီးစီၤပံၤလးကွဲးစ့ၢ်ကီးလံာ်လၢအခိၣ်တီ,ဒီးစဲထီၣ်ဝဲလၢထူၣ်စုညါအလိၤလီၤ.ဒီးအိၣ်ကွဲးအသး,ပှၤနစၤရ့းဖိယ့ၣ်ရှူးပှၤယူဒၤဖိအစီၤပၤလီၤ.

20မၤသးဒ်န့ၣ်ဒီးလံာ်ခိၣ်တီန့ၣ်,ပှၤယူဒၤဖိဖးဝဲအါဂၤလီၤ.အဂ့ၢ်ဒ်အံၤ,အလီၢ်ဖဲယ့ၣ်ရှူးဘၣ်ပျၤထီလၢထူၣ်စုညါအလိၤ,အိၣ်ဘူးဒီးဝ့ၢ်န့ၣ်လီၤ.ဒီးအိၣ်ကွဲးအသးလၢဧ့ၤဘြံၤအကျိာ်,ဒီးဟ့းလ့ၣ်အကျိာ်,ဒီးရိမ့ၤအကျိာ်လီၤ. 21မၤသးဒ်န့ၣ်ဒီးပှၤယူဒၤဖိအပှၤလုၢ်တၢ်အခိၣ်တဖၣ်န့ၣ်စံးဘၣ်စီၤပံၤလး,ကွဲးလၢပှၤယူဒၤဖိအစီၤပၤတဂ့ၤ,မ့ၢ်လၢအစံးဝဲ,ယမ့ၢ်ပှၤယူဒၤဖိအစီၤပၤန့ၣ်တက့ၢ်. 22စီၤပံၤလးစံးဆၢဝဲ,တၢ်လၢယကွဲးန့ၣ်,ယကွဲးလံလီၤ.

23မၤသးဒ်န့ၣ်ဒီး,တုၤပှၤသုးဖိတဖၣ်ပျၤထီယ့ၣ်ရှူးလၢထူၣ်စုညါအလိၤဝံၤဒီး,ဟံးန့ၢ်အကူအသိး,ဒီးနီၤဖးဝဲလွံၢ်ပူလၢသုးဖိန့ၣ်,တဂၤတပူတဂၤတပူ,ဒီးအဆ့လီၤ.မ့မ့ၢ်အဆ့န့ၣ်ထါပီၤအသးလၢခိၣ်ပၢၢ်လၢခံဒီဘ့ၣ်ညါ,ဒီးအတိၤတအိၣ်ဘၣ်လီၤ. 24မၤသးဒ်န့ၣ်ဒီးစံးလိာ်အသး,မ်ပသုတမၤယာ်အီၤတဂ့ၤ,မ်ပဖးလၢအဂီၢ်တက့ၢ်.ဒ်သိးတၢ်ကွဲးအသးကလၢထီၣ်ပှဲၤထီၣ်လၢအစံးဝဲဒၣ်,အဝဲသ့ၣ်တဖၣ်နီၤဖးယကူယသိးလၢအကျါ,ဒီးဖးဝဲလၢယဆ့အဂီၢ်လီၤ. ▼

▼19:24 စံး.၂၂း၁၈

မၤသးဒ်န့ၣ်ဒီးတၢ်တဖၣ်န့ၣ်ပှၤသုးဖိမၤဝဲလီၤ. 25ဒီးအမိၢ်,ဒီးအမိၢ်အဒီပုၢ်ဝဲၢ်မုၣ်စီၤကျ့းအီၤပၤအမါနီၢ်မၤရံ,ဒီးပှၤမၤကဒၤလ့ၣ်ဖိနီၢ်မၤရံသ့ၣ်တဖၣ်ဆၢထၢၣ်ဝဲလၢယ့ၣ်ရှူးအထူၣ်စုညါအဃၢၤန့ၣ်လီၤ. 26မၤသးဒ်န့ၣ်ဒီး,ယ့ၣ်ရှူးထံၣ်အမိၢ်ဒီးအပျဲၢ်အဘီၣ်လၢအအဲၣ်ဝဲတဂၤန့ၣ်ဆၢထၢၣ်,ဒီးစံးဘၣ်အမိၢ်,ပိာ်မုၣ်ဧၢ,ကွၢ်ကွၢ်,နဖိခွါလီၤ. 27တုၤနုၤတစုစံးဘၣ်အပျဲၢ်အဘီၣ်,ကွၢ်ကွၢ်,နမိၢ်လီၤ.လၢအဆၢအကတီၢ်န့ၣ်အလီၢ်ခံဒီး,အပျဲၢ်အဘီၣ်တဂၤန့ၣ်က့ၤစိာ်အီၤဆူအအိၣ်အလီၢ်ဒၣ်ဝဲလီၤ.

28လၢတၢ်န့ၣ်အလီၢ်ခံဒီး,ယ့ၣ်ရှူးသ့ၣ်ညါလၢအမၤဝံၤတၢ်ခဲလၢာ်ဒီး,ဒ်သိးတၢ်ကွဲးအသးကလၢထီၣ်ပှဲၤထီၣ်ဒီးစံးဝဲဒၣ်,တၢ်သူယသးလၢထံလီၤ. 29ဒီးသပၢၤပှဲၤထီၣ်ဒီးတၤဆံၣ်ထံအိၣ်ဝဲဖဲန့ၣ်,ဒီးပှၤစုၣ်စီၣ်ကုၤပီၣ်လဲၣ်တလိၣ်လၢတၤဆံၣ်အထံန့ၣ်,ဒီးစဲထီၣ်ဝဲလၢသ့ၣ်အ့စိးဒီးယူာ်ထီၣ်ဝဲဆူအထးခိၣ်လီၤ. 30မၤသးဒ်န့ၣ်ဒီး,တုၤယ့ၣ်ရှူးဒိးန့ၢ်တၤဆံၣ်အထံဒီး,စံးဝဲဒၣ်,တၢ်လၢထီၣ်ပှဲၤထီၣ်လံ.ဒီးဖျးလီၤအခိၣ်,ဒီးဟ့ၣ်လီၤကွံာ်အသးလီၤ.

31မၤသးဒ်န့ၣ်ဒီးမ့ၢ်ကတဲာ်ကတီၤတၢ်အမုၢ်တနံၤသတးဒီး,ဒ်သိးအစိၣ်တဖၣ်အသုတအိၣ်လၢထူၣ်စုညါအလိၤလၢအိၣ်ဘှံးအနံၤတဂ့ၤ,(အဂ့ၢ်ဒ်အံၤ,အိၣ်ဘှံးအနံၤန့ၣ်မ့ၢ်တၢ်ဒိၣ်အနံၤ)ဒီး,ပှၤယူဒၤဖိဃ့လၢစီၤပံၤလး,ဒ်သိးတၢ်ကမၤကၢ်ကွံာ်အခီၣ်ဒုၣ်,ဒီးစိာ်ကွံာ်အီၤလီၤ, 32မၤသးဒ်န့ၣ်ဒီးပှၤသုးဖိလဲၤမၤကၢ်အခီၣ်ထံးတဂၤအခီၣ်ဒုၣ်,ဒီးအဝဲတဂၤလၢအဘၣ်ပျၤထီလၢထူၣ်စုညါအလိၤဒီးအီၤလီၤ. 33မ့မ့ၢ်တုၤအတုၤလၢယ့ၣ်ရှူးအအိၣ်ဒီး,ထံၣ်ဝဲလၢအသံတ့ၢ်လံဒီး,တမၤကၢ်ဘၣ်အခီၣ်ဒုၣ်ဘၣ်. 34ဘၣ်ဆၣ်ဒီး,ပှၤသုးဖိတဂၤဆဲးထီၣ်အကပၤလၢဘီ,ဒီးတၢ်သွံၣ်ဒီးထံဟဲလီၤဝဲတကီၢ်ခါလီၤ.

35ပှၤလၢအထံၣ်တၢ်အံၤတဖၣ်အုၣ်အသး,ဒီးအတၢ်အုၣ်အသးန့ၣ်မ့ၢ်အမ့ၢ်အတီ,ဒီးသ့ၣ်ညါဝဲလၢအကတိၤတၢ်မ့ၢ်တၢ်တီ,ဒ်သိးသုကနာ်တၢ်စ့ၢ်ကီးလီၤ. 36အဂ့ၢ်ဒ်အံၤ,တၢ်န့ၣ်တဖၣ်မၤသးဒ်သိးတၢ်ကွဲးအသးကလၢထီၣ်ပှဲၤထီၣ်ဝဲ,အဃံတကၢ်ဘၣ်နီတဘိဘၣ်. ▼

▼19:36 ၂မိၤ.၁၂း၄၆.

37ဒီးတၢ်ကွဲးအသးလၢအဂၤစံးဝဲဒၣ်,အဝဲသ့ၣ်တဖၣ်န့ၣ်ကကွၢ်ပှၤလၢအဆဲးဝဲတဂၤလီၤ. ▼

▼19:37 ကၤ.၁၂း၁၀.

38လၢတၢ်န့ၣ်တဖၣ်အလီၢ်ခံဒီး,ပှၤအရံၤမၤသဲဖိ,စီၤယိၤသးဃ့က့ၤယ့ၣ်ရှူးအစိၣ်လၢစီၤပံၤလးလီၤ.အဝဲဒၣ်န့ၣ်မ့ၢ်ယ့ၣ်ရှူးအပျဲၢ်အဘီၣ်ဘၣ်ဆၣ်ဒီး,မ့ၢ်အပျံၤပှၤယူဒၤဖိဒီး,မ့ၢ်အပျဲၢ်အဘီၣ်အိၣ်ခူသူၣ်လီၤ.ဒီးစီၤပံၤလးဟ့ၣ်မၤအီၤလီၤ.မၤသးဒ်န့ၣ်ဒီး,လဲၤဟံးန့ၢ်ယ့ၣ်ရှူးအစိၣ်လီၤ. 39ဒီးစီၤနံၤကဒ့မူးလၢအဟဲလၢသီလၢယ့ၣ်ရှူးအအိၣ်လၢမုၢ်နၤတဂၤန့ၣ်,ဟဲစ့ၢ်ကီး,ဒီးဟဲစိာ်တၢ်နၢမူမူရၣ်,လၢအဃါဃုာ်ဒီးအကၠီၣ်သၢဆံလံတြၤဃၣ်ဃၣ်လီၤ. 40မၤသးဒ်န့ၣ်ဒီးအဝဲသ့ၣ်ဟံးန့ၢ်ယ့ၣ်ရှူးအစိၣ်,ဒီးဘိၣ်ထီၣ်လၢဖှီဝါကဆှၣ်ဒီးတၢ်နၢမူ,ဒ်ပှၤယူဒၤဖိခူၣ်လီၤကွံာ်တၢ်အလုၢ်အလၢ်အသိးန့ၣ်လီၤ.

41ဒီးဖဲအလီၢ်လၢယ့ၣ်ရှူးဘၣ်ပျၤထီလၢထူၣ်စုညါအလိၤန့ၣ်,တၤသၣ်အလီၢ်အိၣ်ဝဲ,ဒီးလၢတၤသၣ်အလီၢ်န့ၣ်,တၢ်သွၣ်ခိၣ်အသီ,လၢပှၤတဘၣ်ခူၣ်လီၤဒံးဘၣ်လၢအပူၤနီတဂၤဘၣ်,အိၣ်ဝဲတပူၤလီၤ. 42မၤသးဒ်န့ၣ်ဒီးမ့ၢ်အဘၣ်လၢပှၤယူဒၤဖိကတဲာ်ကတီၤတၢ်အနံၤ,ဒီးတၢ်သွၣ်ခိၣ်န့ၣ်အိၣ်ဘူးဝဲအဃိဒီး,ခူၣ်လီၤယ့ၣ်ရှူးဖဲန့ၣ်လီၤ.