John 21
1လၢတၢ်တဖၣ်န့ၣ်အလီၢ်ခံဒီး,ယ့ၣ်ရှူးဒုးနဲၣ်ကဒီးအသးလၢအပျဲၢ်အဘီၣ်ဖဲပီၣ်လဲၣ်တံၤဘ့ၤရံအနံၤလီၤ.ဒီးဒုးနဲၣ်အသးဒ်အံၤ. 2စီၤၡံမိၣ်ပ့းတရူးဒီးစီၤသိၤမါကိးဝဲလၢစီၤဒံဒူၤမူး,ဒီးပှၤကၤနါဖိလၢကၤလံၤလါ,စီၤနၤသန့လး,ဒီးစီၤစ့းဘ့းဒဲအဖိခွါတဖၣ်,ဒီးအပျဲၢ်အဘီၣ်လၢအဂၤခံဂၤသ့ၣ်တဖၣ်န့ၣ်,အိၣ်ဝဲတပူၤဃီလီၤ. 3စီၤၡံမိၣ်ပ့းတရူးစံးဘၣ်အီၤ,ယကလဲၤမၤအီၣ်ညၣ်လီၤ.အဝဲသ့ၣ်တဖၣ်စံးဘၣ်အီၤ,ပလဲၤစ့ၢ်ကီးဒီးနၤလီၤ.ဒီးဟးထီၣ်ဒီးလဲၤနုာ်လၢကဘီပူၤဒီးလၢမုၢ်တနၤန့ၣ်တမၤန့ၢ်ဘၣ်တၢ်နီတမံၤဘၣ်. 4ဒီးဖဲမုၢ်ဆ့ၣ်ထီၣ်န့ၣ်,ယ့ၣ်ရှူးဆၢထၢၣ်လၢထံနံၤလီၤ.ဘၣ်ဆၣ်ဒီးအပျဲၢ်အဘီၣ်တသ့ၣ်ညါဘၣ်လၢအမ့ၢ်ယ့ၣ်ရှူးဘၣ်. 5မၤသးဒ်န့ၣ်ဒီးယ့ၣ်ရှူးစံးဘၣ်အီၤ,ဖိသ့ၣ်လံၤသ့ၣ်ဧၢ,တၢ်အီၣ်အိၣ်တမံၤမံၤဧါ.ဒီးစံးဆၢအီၤ,တအိၣ်ဘၣ်. 6ဒီးစံးဘၣ်အီၤ,တ့ၢ်လီၤစၤလၢကဘီအဃၢၤစုထွဲတခီ,ဒီးသုကထံၣ်န့ၢ်တၢ်လီၤ.မၤသးဒ်န့ၣ်ဒီးအဝဲသ့ၣ်တ့ၢ်လီၤဝဲ,ဒီးဘၣ်ညၣ်ဂီၢ်မုၢ်ဒီးထုးစၤတန့ၢ်ဘၣ်လၢညၣ်ဂီၢ်မုၢ်အဃိလီၤ. 7မၤသးဒ်န့ၣ်ဒီးအပျဲၢ်အဘီၣ်လၢယ့ၣ်ရှူးအဲၣ်အီၤတဂၤစံးဘၣ်စီၤပ့းတရူး,မ့ၢ်ကစၢ်လီၤ.မၤသးဒ်န့ၣ်ဒီးစီၤပ့းတရူးနၢ်ဟူလၢအမ့ၢ်ကစၢ်န့ၣ်ဒီး,မ့ၢ်လၢအအိၣ်ဘ့ၣ်ဆ့ဒီး,သိးထီၣ်က့ၤအဆ့ဖးဒိၣ်,ဒီးကံၢ်တူာ်ဝဲ,ဒီးစံၣ်လီၤဝဲလၢပီၣ်လဲၣ်အပူၤလီၤ. 8ဒီးအပျဲၢ်အဘီၣ်လၢအဂၤတဖၣ်န့ၣ်ဟဲလၢကဘီပူၤ,အဂ့ၢ်ဒ်အံၤ,တယံၤဘၣ်ဒီးခိဘၣ်.မ့ၢ်အယံၤအပျၢ်ခံကယၤဃၣ်ဃၣ်,ဒီးထုးစၤအိၣ်ဒီးညၣ်န့ၣ်လီၤ. 9မၤသးဒ်န့ၣ်ဒီးတုၤအဝဲသ့ၣ်လဲၤထီၣ်လၢခိဒီး,ထံၣ်မ့ၣ်အူကဖးဒီးညၣ်အိၣ်လၢအဖီခိၣ်,ဒီးကိၣ်လီၤ. 10ယ့ၣ်ရှူးစံးဘၣ်အီၤ,ဟဲစိာ်ညၣ်လၢသုမၤန့ၢ်ခဲကနံၣ်အံၤတနီၤတက့ၢ်. 11စီၤၡံမိၣ်ပ့းတရူးလဲၤထီၣ်,ဒီးထုးထီၣ်စၤ,လၢပှဲၤထီၣ်ဒီးညၣ်ဖးဒိၣ်တကယၤယဲၢ်ဆံသၢဘ့ၣ်,ဆူခိလီၤ.အါထဲန့ၣ်ဘၣ်ဆၣ်ဒီးစၤတယာ်ဘၣ်ဝဲဘၣ်. 12ယ့ၣ်ရှူးစံးဘၣ်အီၤ,ဟဲအီၣ်တၢ်အီၣ်လၢဂီၤအီၣ်တက့ၢ်.ဒီးအပျဲၢ်အဘီၣ်သံကွၢ်အီၤလၢနမ့ၢ်မတၤမတၤန့ၣ်,တဘူၣ်ဘၣ်နီတဂၤဘၣ်.အဂ့ၢ်ဒ်အံၤ,သ့ၣ်ညါလၢအမ့ၢ်ကစၢ်န့ၣ်လီၤ. 13မၤသးဒ်န့ၣ်ဒီးယ့ၣ်ရှူးဟဲဃီၤ,ဒီးဟံးန့ၢ်ကိၣ်,ဒီးဟ့ၣ်အီၤ,ဒီးညၣ်ဒ်န့ၣ်အသိးလီၤ. 14ယ့ၣ်ရှူးဂဲၤဆၢထၢၣ်က့ၤလၢတၢ်သံဝံၤဒီး,ဒုးနဲၣ်အသးလၢအပျဲၢ်အဘီၣ်တစုအံၤ,မ့ၢ်အပှဲၤထီၣ်သၢစုတစုလီၤ. 15မၤသးဒ်န့ၣ်ဒီးတုၤအအီၣ်တၢ်အီၣ်လၢဂီၤအီၣ်ဝံၤဒီး,ယ့ၣ်ရှူးစံးဘၣ်စီၤၡံမိၣ်ပ့းတရူး,စီၤယိၤနါအဖိခွါ,စီၤၡံမိၣ်ဧၢ,မ့ၢ်နအဲၣ်ယၤအါန့ၢ်အဝဲသ့ၣ်တဖၣ်န့ၣ်ဧါ.ဒီးစံးဘၣ်အီၤ,မ့ၢ်လံ.ကစၢ်ဧၢ,နသ့ၣ်ညါလၢယအဲၣ်နၤလီၤ.ဒီးစံးဘၣ်အီၤ,လုၢ်အီၣ်လုၢ်အီယသိဖိတက့ၢ်. 16စံးဘၣ်ကဒီးအီၤပှဲၤထီၣ်ခံဘျီတဘျီ,စီၤယိၤနါအဖိခွါ,စီၤၡံမိၣ်ဧၢ,နအဲၣ်ယၤဧါ.ဒီးစံးဘၣ်အီၤ,မ့ၢ်လံ,ကစၢ်ဧၢ,နသ့ၣ်ညါလၢယအဲၣ်နၤလိၤ.ဒီးစံးဘၣ်အီၤ,အံးက့ၤကွၢ်က့ၤယသိတက့ၢ်. 17စံးဘၣ်အီၤသၢဘျီတဘျီ,စီၤယိၤနါအဖိခွါ,စီၤၡံမိၣ်ဧၢ,နအဲၣ်ယၤဧါ.ဒီးစီၤပ့းတရူးအသးတမုာ်ဘၣ်လၢအစံးဘၣ်အီၤနအဲၣ်ယၤဧါ,ပှဲၤထီၣ်သၢဘျီဒီးစံးဘၣ်အီၤ,ကစၢ်ဧၢ,နသ့ၣ်ညါတၢ်လၢာ်,နသ့ၣ်ညါလၢယအဲၣ်နၤလီၤ.ယ့ၣ်ရှူးစံးဘၣ်အီၤ,လုၢ်အီၣ်လုၢ်အီယသိတက့ၢ်. 18ယစံးဘၣ်နၤတီတီလိၤလိၤ,ဖဲနသးစၢ်ဒံးဒီး,နကံၢ်တူာ်ထီၣ်နသး,ဒီးဖဲဒၣ်နသးန့ၣ်,နဟးလီၤ.မ့မ့ၢ်တုၤနသးပှၢ်ဒီး,နကယူာ်ထီၣ်နစုဒီးပှၤဂၤကကံၢ်တူာ်နၤ,ဒီးကလဲၤစိာ်နၤဖဲတၢ်တမိၣ်လဲၤဘၣ်နသးအလီၢ်န့ၣ်လီၤ. 19ဒီးစံးတၢ်န့ၣ်,မ့ၢ်အဒုးနဲၣ်လၢအဝဲဒၣ်ကမၤလၤမၤကပီၤယွၤလၢအသံဒ်အံၤဒ်နုၤအဂ့ၢ်လီၤ. 20ဒီးစံးတၢ်န့ၣ်ဒီး,စံးဘၣ်အီၤ,ပိာ်ယခံတက့ၢ်.ဒီးစီၤပ့းတရူးဃၣ်ဃီၤအသး,ဒီးထံၣ်အပျဲၢ်အဘီၣ်လၢယ့ၣ်ရှူးအဲၣ်အီၤတဂၤ,ပိာ်ဝဲအခံလီၤ.(ဒီးအဝဲဒၣ်မ့ၢ်ပှၤလၢအသန့ၤအသးလၢအသးနါပှၢ်အလိၤလၢတၢ်အီၣ်တၢ်အီအပူၤဒီးစံးဘၣ်အီၤ,ကစၢ်ဧၢ,မ့ၢ်မတၤကဟ့ၣ်လီၤကွံာ်နၤတဂၤလဲၣ်န့ၣ်လီၤ.) 21စီၤပ့းတရူးထံၣ်အဝဲတဂၤဒီး,စံးဘၣ်ယ့ၣ်ရှူး,ကစၢ်ဧၢ,ဒီးအဝဲတဂၤအံၤ,တၢ်ကမၤအသးလၢအီၤဒ်လဲၣ်. 22ယ့ၣ်ရှူးစံးဘၣ်အီၤ,အဝဲတဂၤအံၤ,ယသးမ့ၢ်အိၣ်လၢအကအိၣ်တုၤယဟဲက့ၤဒီး,မ့ၢ်အဘၣ်ဃးဒီးနၤဒ်လဲၣ်.နဲဒၣ်အံၤ,ပိာ်ယခံတက့ၢ်. 23မၤသးဒ်န့ၣ်ဒီးတၢ်ဟူထီသါလီၤလၢဒီပုၢ်ဝဲၢ်အကျါ,လၢအပျဲၢ်အဘီၣ်တဂၤန့ၣ်တသံဘၣ်ဝဲဘၣ်.ဘၣ်ဆၣ်ဒီးလၢအတသံဘၣ်န့ၣ်ယ့ၣ်ရှူးတစံးဘၣ်.မ့ၢ်အစံးဝဲ,အဝဲတဂၤအံၤယသးမ့ၢ်အိၣ်လၢအကအိၣ်တုၤယဟဲက့ၤဒီး,မ့ၢ်အဘၣ်ဃးဒီးနၤဒ်လဲၣ်. 24အဝဲတဂၤအံၤမ့ၢ်အပျဲၢ်အဘီၣ်,လၢအအုၣ်အသးလၢတၢ်န့ၣ်တဖၣ်,ဒီးကွဲးတၢ်တဖၣ်အံၤလီၤ.ဒီးပသ့ၣ်ညါလၢအတၢ်အုၣ်အသးန့ၣ်မ့ၢ်အမ့ၢ်အတီလီၤ. 25ဒီးတၢ်အဂုၤအဂၤလၢယ့ၣ်ရှူးမၤဝဲန့ၣ်အိၣ်စ့ၢ်ကီးအါမံၤလီၤ.ဒီးကယဲၢ်တၢ်တဖၣ်န့ၣ်,မ့ၢ်ဘၣ်ကွဲးအသးကိးမံၤဒဲးဒီး,ယဆိကမိၣ်လၢလံာ်လၢအကဘၣ်ကွဲးအသးန့ၣ်ဟီၣ်ခိၣ်တတြီၢ်ဘၣ်ဝဲဘၣ်.
Copyright information for
KswSKMB