‏ John 4

1မၤသးဒ်န့ၣ်ဒီးတုၤကစၢ်သ့ၣ်ညါလၢပှၤဖၤရံၤၡဲနၢ်ဟူလၢယ့ၣ်ရှူးဒုးကဲထီၣ်အပျဲၢ်အဘီၣ်ဒီးဘျၢ ▼

▼4:1 လၢဟ့းလ့ၣ်အကျိာ်"ဘးပတံစၢ်."

တၢ်အါန့ၢ်စီၤယိၤဟၣ်, 2(ဘၣ်ဆၣ်ဒီး,တမ့ၢ်ဘၣ်ယ့ၣ်ရှူးအကစၢ်ဒၣ်ဝဲဘျၢ ▼

▼4:2 လၢဟ့းလ့ၣ်အကျိာ်"ဘးပတံစၢ်."

တၢ်ဘၣ်,မ့ၢ်အပျဲၢ်အဘီၣ်)ဒီး, 3ဟးထီၣ်လၢကီၢ်ယူဒၤ,ဒီးလဲၤကဒီးဝဲဆူကၤလံၤလါလီၤ. 4ဒီးဘၣ်လဲၤခီဂာ်ကီၢ်ၡၤမရံလီၤ. 5မၤသးဒ်န့ၣ်ဒီးလဲၤဆူဝ့ၢ်တဖျၢၣ်ကိးဝဲလၢစံဃၢ်,အိၣ်လၢၡၤမရံ,ဘူးဒီးဟီၣ်ခိၣ်အကဝီၤလၢစီၤယၤကိာ်ဟ့ၣ်လီၤအဖိခွါစီၤယိၤသးလီၤ. 6ဒီးစီၤယၤကိာ်အထံပူၤအိၣ်ဖဲန့ၣ်လီၤ.မၤသးဒ်န့ၣ်ဒီးယ့ၣ်ရှူးလဲၤတၢ်သတးဒီး,တၢ်ဘှံးအသး,ဒီးဆ့ၣ်နီၤဝဲဖဲထံပူၤအဃၢၤဒ်န့ၣ်လီၤ.ဒီးဘၣ်ဃုနၣ်ရံၣ်ဃၣ်ဃၣ်လီၤ.

7ဒီးပှၤၡၤမရံမုၣ်တဂၤဟဲဒၢၣ်ထံလီၤ.ယ့ၣ်ရှူးစံးဘၣ်အီၤ,ဟ့ၣ်အီယၤလၢထံတက့ၢ်. 8အဂ့ၢ်ဒ်အံၤ,အပျဲၢ်အဘီၣ်တဖၣ်လဲၤလံဆူဝ့ၢ်ပူၤဒ်သိးအကပှ့ၤတၢ်အီၣ်လီၤ. 9မၤသးဒ်န့ၣ်ဒီး,ပှၤၡၤမရံမုၣ်စံးဘၣ်အီၤ,နဲဒၣ်အံၤနမ့ၢ်ပှၤယူဒၤဖိဒီးနဃ့အီထံလၢယၤ,ပှၤၡၤမရံမုၣ်အံၤ,ဘၣ်မနုၤလဲၣ်.အဂ့ၢ်ဒ်အံၤ,ပှၤယူဒၤဖိဒီးပှၤၡၤမရံဖိ,တရ့လိာ်ဘၣ်အသးဘၣ်. 10ယ့ၣ်ရှူးကတိၤဆၢတၢ်ဒီးစံးဘၣ်အီၤ,နမ့ၢ်သ့ၣ်ညါယွၤအတၢ်ဟ့ၣ်,ဒီးပှၤလၢအစံးဘၣ်နၤ,ဟ့ၣ်အီယၤလၢထံတက့ၢ်တဂၤန့ၣ်ဒီး,နကဃ့တ့ၢ်တၢ်လၢအီၤ,ဒီးကဟ့ၣ်တ့ၢ်နၤလၢထံမူလီၤ. 11ပိာ်မုၣ်စံးဘၣ်အီၤ,ကစၢ်ဧၢ,နဒၢၣ်ထံန့ၣ်နတၢ်တအိၣ်ဘၣ်,ဒီးထံပူၤယိာ်မးလီၤ.မၤသးဒ်န့ၣ်ဒီး,နအိၣ်ဒီးထံမူဒ်လဲၣ်. 12မ့ၢ်နဒိၣ်န့ၢ်ပပၢ်စီၤယၤကိာ်လၢအဟ့ၣ်ပှၤလၢထံပူၤ,ဒီးအကစၢ်ပှၢ်ဒၣ်ဝဲ,ဒီးအဖိအလံၤ,ဒီးအဆၣ်ဖိကီၢ်ဖိသ့ၣ်တဖၣ်န့ၣ်,အီတၢ်လၢအပူၤအံၤ,တက့ၢ်ဧါ. 13ယ့ၣ်ရှူးကတိၤဆၢတၢ်ဒီးစံးဘၣ်အီၤ,ကယဲၢ်ပှၤလၢအအီထံအံၤတဂၤလၢ်လၢ်န့ၣ်တၢ်ကသူကဒီးအသးလၢထံလီၤ. 14မ့မ့ၢ်ဖဲဒၣ်ပှၤလၢအအီထံလၢယကဟ့ၣ်အီၤတဂၤဂၤန့ၣ်,တၢ်တသူလၢၤဘၣ်အသးလၢထံနီတခီၣ်ဘၣ်,မ့မ့ၢ်ထံလၢယဟ့ၣ်အီၤန့ၣ်,ကကဲထီၣ်လၢထံထီၣ်ပၢၢ်လၢအပူၤ,ဒီးကထီၣ်ဘးဆူတၢ်မူလီၤထူလီၤယိာ်လီၤ. 15ပိာ်မုၣ်စံးဘၣ်အီၤ,ကစၢ်ဧၢ,ဒ်သိးတၢ်သုတသူယသးလၢထံဒီးယသုတဟဲဒၢၣ်ထံဖဲအံၤတဂ့ၤဒီး,ဟ့ၣ်ယၤလၢထံအဝဲန့ၣ်တက့ၢ်.

16ယ့ၣ်ရှူးစံးဘၣ်အီၤ,က့ၤကိးန့ၢ်နဝၤ,ဒီးဟဲက့ၤဖဲအံၤတက့ၢ်. 17ပိာ်မုၣ်ကတိၤဆၢတၢ်ဒီးစံးဝဲဒၣ်,ယဝၤတအိၣ်ဘၣ်.ယ့ၣ်ရှူးစံးဘၣ်အီၤ,နစံးတၢ်လၢနဝၤတအိၣ်ဘၣ်န့ၣ်ဘၣ်လံ. 18အဂ့ၢ်ဒ်အံၤ,နဝၤအိၣ်တ့ၢ်လံယဲၢ်ဆီလံ.ဒီးပှၤလၢနအိၣ်ဒီးအီၤခဲကနံၣ်အံၤတဂၤန့ၣ်တမ့ၢ်ဘၣ်နဝၤဘၣ်.နစံးတၢ်န့ၣ်မ့ၢ်လံတီလံ.

19ပိာ်မုၣ်စံးဘၣ်အီၤ,ကစၢ်ဧၢ,ယထံၣ်လၢနမ့ၢ်ဝံတဂၤလီၤ. 20ပပၢ်သ့ၣ်ဘူၣ်ထီၣ်ဘါထီၣ်တၢ်ဖဲကစၢၢ်အံၤအလိၤလီၤ.ဒီးသုစံးလၢပဘၣ်ဘါတၢ်အလီၢ်န့ၣ်,မ့ၢ်ယရူၤၡလ့ၣ်လီၤ. 21ယ့ၣ်ရှူးစံးဘၣ်အီၤ,နီၢ်ဧၢ,နာ်ယၤတက့ၢ်.အဆၢကတီၢ်ဘၣ်ဝဲလၢကစၢၢ်အံၤမ့ၢ်ဂ့ၤ,လၢယရူၤၡလ့ၣ်မ့ၢ်ဂ့ၤ,သုတဘါထီၣ်ဘၣ်ပၢ်ဘၣ်. 22သုဝဲသ့ၣ်အံၤ,သုဘူၣ်ထီၣ်ဘါထီၣ်တၢ်လၢသုတသ့ၣ်ညါဘၣ်.ပဝဲဒၣ်အံၤ,ပဘူၣ်ထီၣ်ဘါထီၣ်တၢ်လၢပသ့ၣ်ညါလီၤ.အဂ့ၢ်ဒ်အံၤ,တၢ်အုၣ်က့ၤခီၣ်က့ၤန့ၣ်ဟဲထီၣ်လၢပှၤယူဒၤဖိအပူၤလီၤ. 23မ့မ့ၢ်အဆၢအကတီၢ်ဘၣ်ဝဲ,ဒီးဘၣ်ခဲကနံၣ်အံၤ,ဖဲပှၤဘါတၢ်နီၢ်နီၢ်တဖၣ်န့ၣ်,ကဘူၣ်ထီၣ်ဘါထီၣ်ပၢ်လၢသူၣ်လၢသး,ဒီးလၢတၢ်မ့ၢ်တၢ်တီလီၤ.အဂ့ၢ်ဒ်အံၤ,ပၢ်ဃုပှၤလၢအဘူၣ်ထီၣ်ဘါထီၣ်အီၤဒ်န့ၣ်အသိးတဖၣ်လီၤ. 24ယွၤမ့ၢ်သူၣ်မ့ၢ်သးလီၤ.ဒီးပှၤလၢအဘူၣ်ထီၣ်ဘါထီၣ်အီၤတဖၣ်န့ၣ်,ဘၣ်ဘူၣ်ထီၣ်ဘါထီၣ်လၢသူၣ်လၢသးဒီးတၢ်မ့ၢ်တၢ်တီလီၤ.

25ပိာ်မုၣ်န့ၣ်စံးဘၣ်အီၤ,ယသ့ၣ်ညါလၢမ့းၡံအၤဟဲဝဲ,(လၢပှၤကိးဝဲလၢခရံာ်န့ၣ်),တုၤအဟဲတုၤဝဲဒီး,ကစံးဘၣ်တဲဘၣ်ပှၤလၢတၢ်ခဲလၢာ်လီၤ. 26ယ့ၣ်ရှူးစံးဘၣ်အီၤ,ပှၤလၢအကတိၤတၢ်ဒီးနၤ,ယၤအံၤ,မ့ၢ်အဝဲဒၣ်န့ၣ်လီၤ. 27တုၤနုၤတစုအပျဲၢ်အဘီၣ်ဟဲက့ၤတုၤဝဲဒီး,မ့ၢ်အကတိၤလိာ်အသးဒီးပိာ်မုၣ်န့ၣ်ဒီး,ကမၢကမၣ်ဝဲတကူၢ်သ့ၣ်လီၤ.ဘၣ်ဆၣ်ဒီးနဃုန့ၢ်မနုၤလဲၣ်,နကတိၤလိာ်နသးဒီးအီၤဘၣ်မနုၤလဲၣ်န့ၣ်,ပှၤတစံးဘၣ်ဝဲနီတဂၤဘၣ်. 28မၤသးဒ်န့ၣ်ဒီး,ပိာ်မုၣ်ပာ်လီၤတဲာ်အသပၢၤထံ,ဒီးက့ၤက့ၤဆူဝ့ၢ်ပူၤ,ဒီးစံးဘၣ်ပှၤကညီ, 29ဟဲကွၢ်ပှၤတဂၤလၢအစံးဘၣ်တဲဘၣ်ယၤလၢကယဲၢ်တၢ်လၢယမၤတ့ၢ်တမံၤလၢ်လၢ်န့ၣ်တက့ၢ်.အဝဲဒၣ်န့ၣ်မ့ၢ်ခရံာ်တမ့ၢ်ဘၣ်ဧါ. 30မၤသးဒ်န့ၣ်ဒီးပှၤတဖၣ်န့ၣ်ဟဲထီၣ်လၢဝ့ၢ်ပူၤ,ဒီးလဲၤဆူအအိၣ်လီၤ.

31ဖဲန့ၣ်အဖၢမုၢ်,အပျဲၢ်အဘီၣ်ဃ့ကညးအီၤဒီးစံးဝဲဒၣ်,ရၤဘံဧၢ,အီၣ်တၢ်တက့ၢ်, 32ဒီးအဝဲဒၣ်စံးဘၣ်အီၤ,ယတၢ်အီၣ်လၢသုတသ့ၣ်ညါဘၣ်န့ၣ်အိၣ်ဝဲလီၤ. 33မၤသးဒ်န့ၣ်ဒီးအပျဲၢ်အဘီၣ်စံးလိာ်အသး,မ့ၢ်ပှၤဟဲဟ့ၣ်အီၣ်တ့ၢ်အတၢ်တဂၤဂၤဧါ. 34ယ့ၣ်ရှူးစံးဘၣ်အီၤ,ယတၢ်အီၣ်မ့ၢ်လၢယကမၤတၢ်ဖဲပှၤလၢအမၢလီၤယၤတဂၤန့ၣ်အသး,ဒီးမၤအတၢ်မၤတုၤအဝံၤဝဲန့ၣ်လီၤ. 35သုစံးသုဝဲ,အိၣ်ဒံးလွံၢ်လါဒီးကဘၣ်ကူးတၢ်အကတီၢ်တမ့ၢ်ဘၣ်ဧါ.ကွၢ်ကွၢ်,ယစံးဘၣ်သု,ကျ့ထီၣ်သုမဲာ်ဒီးကွၢ်စံာ်ဧိၤပှဲၤဧိၤတက့ၢ်.အဂ့ၢ်ဒ်အံၤ,ခဲကနံၣ်အံၤဒၣ်လဲာ်,ဘုဂီၤလံလၢတၢ်ကူးအဂီၢ်လံ. 36ဒီးပှၤလၢအကူးတၢ်န့ၣ်,န့ၢ်ဘၣ်အဘူးအလဲ,ဒီးဂၢ်ဖှိၣ်အတၤသူၣ်တၤသၣ်လၢတၢ်မူလီၤထူလီၤယိာ်အဂီၢ်,ဒ်သိးပှၤလၢအဖှံတၢ်ဒီးပှၤလၢအကူးတၢ်န့ၣ်,အသးကခုဝဲခံဂၤလၢာ်လီၤ. 37အဂ့ၢ်ဒ်အံၤ,တၢ်ကတိၤတဘီအံၤ,ပှၤဖှံတၢ်မ့ၢ်တဂၤဒီးပှၤကူးတၢ်မ့ၢ်တဂၤဒၣ်န့ၣ်,မ့ၢ်တၢ်အမ့ၢ်အတီလီၤ. 38ယမၢသုလဲၤကူးတၢ်လၢသုတမၤဘၣ်အလီၢ်ဘၣ်လီၤ.ပှၤဂၤတဖၣ်န့ၣ်မၤတၢ်,ဒီးသုလဲၤနုာ်လၢအဝဲသ့ၣ်အတၢ်မၤအပူၤလီၤ. 39ဒီးပိာ်မုၣ်အုၣ်အသးလၢအဝဲဒၣ်စံးဘၣ်ယၤလၢယမၤတ့ၢ်တၢ်တမံၤလၢ်လၢ်,အတၢ်ကတိၤအဃိဒီး,ပှၤလၢဝ့ၢ်တဖျၢၣ်န့ၣ်ပှၤၡၤမရံဖိအါဂၤစူၢ်က့ၤနာ်က့ၤအီၤလီၤ. 40မၤသးဒ်န့ၣ်ဒီးတုၤပှၤၡၤမရံဖိတဖၣ်ဟဲဆူအအိၣ်ဒီး,ဃ့ကညးအီၤဒ်သိးအကအိၣ်ဒီးအီၤလီၤ.ဒီးအိၣ်ဖဲန့ၣ်ခံသီလီၤ. 41ဒီးမ့ၢ်အကလုၢ်အကထါဒၣ်ဝဲအဃိဒီး,ပှၤစူၢ်က့ၤနာ်က့ၤအါထီၣ်အါဂၤလီၤ. 42ဒီးစံးဘၣ်ပိာ်မုၣ်,အအံၤနုၤအံၤ,တမ့ၢ်လၢၤဘၣ်လၢနကလုၢ်အဃိဒီး,ပစူၢ်က့ၤနာ်က့ၤတၢ်န့ၣ်ဘၣ်.အဂ့ၢ်ဒ်အံၤ,ပနၢ်ဟူဒၣ်ပဝဲ,ဒီးပသ့ၣ်ညါနီၢ်နီၢ်လၢပှၤအံၤမ့ၢ်ပှၤအုၣ်က့ၤခီၣ်က့ၤဟီၣ်ခိၣ်,ခရံာ်န့ၣ်လီၤ.

43ဒီးခံသီအလီၢ်ခံဒီး,ဟးထီၣ်ကွံာ်ဖဲန့ၣ်,ဒီးလဲၤဆူကၤလံၤလါလီၤ. 44အဂ့ၢ်ဒ်အံၤ,ယ့ၣ်ရှူးအကစၢ်ဒၣ်ဝဲအုၣ်အသးလၢဝံ,ဖဲအထံအကီၢ်ဒၣ်ဝဲန့ၣ်,အလၤအကပီၤတအိၣ်ဘၣ်.

45မၤသးဒ်န့ၣ်ဒီးတုၤအလဲၤဆူကၤလံၤလါဒီး,ပှၤကၤလံၤလါဖိတူၢ်လိာ်အီၤလီၤ.အဂ့ၢ်ဒ်အံၤ,အဝဲသ့ၣ်လဲၤဆူဘူၣ်ပူၤလၢယရူၤၡလ့ၣ်,ဒီးထံၣ်ဘၣ်လံအတၢ်မၤခဲလၢာ်လၢဘူၣ်ပူၤလံ. 46မၤသးဒ်န့ၣ်ဒီးယ့ၣ်ရှူးလဲၤကဒီးဆူကၤနါဘၣ်ဃးဒီးကၤလံၤလါ,ဖဲအမၤကဲထီၣ်ထံလၢစပံးထံန့ၣ်လီၤ. 47ဒီးပဒိၣ်တဂၤအဖိခွါမၤတကဲဘၣ်အိၣ်လၢကပ့းရနီၣ်လီၤ.အဝဲဒၣ်နၢ်ဟူလၢယ့ၣ်ရှူးဟဲလၢကီၢ်ယူဒၤဆူကၤလံၤလါ,ဒီးလဲၤဆူအအိၣ်,ဒီးဃ့ကညးအီၤဒ်သိးအကဟဲလီၤမၤဘျါက့ၤအဖိခွါလီၤ.အဂ့ၢ်ဒ်အံၤ,ကသံတ့ၢ်လီၤ. 48မၤသးဒ်န့ၣ်ဒီးယ့ၣ်ရှူးစံးဘၣ်အီၤ,သုမ့ၢ်တထံၣ်ဘၣ်တၢ်ပနီၣ်လီၤလး,ဒီးတၢ်လီၤလိၢ်လီၤလးဘၣ်ဒီး,သုတနာ်ဘၣ်. 49ဒီးပဒိၣ်စံးဘၣ်အီၤ,ကစၢ်ဧၢ,လၢယဖိတချုးသံဒံးဘၣ်ဒီး,ဟဲလီၤလၢ်တက့ၢ်. 50ယ့ၣ်ရှူးစံးဘၣ်အီၤ,က့ၤက့ၤတက့ၢ်.နဖိခွါမူဝဲလီၤ.ဒီးပှၤတဂၤန့ၣ်နာ်တၢ်ကတိၤလၢယ့ၣ်ရှူးစံးဘၣ်အီၤ,ဒီးက့ၤက့ၤဝဲလီၤ. 51ဒီးက့ၤလီၤဝဲအဖၢမုၢ်ဒီး,အခ့အပှၤဟဲသဂၢၢ်အီၤ,ဒီးတဲဘၣ်အီၤ,ဒီးစံးဝဲဒၣ်,နဖိမူဝဲလီၤ. 52မၤသးဒ်န့ၣ်ဒီး,သံကွၢ်အီၤလၢနၣ်ရံၣ်လၢအကိညၢ်ထီၣ်သီဝဲလီၤ.ဒီးစံးဘၣ်အီၤ,မဟါတနံၤလၢနွံနၣ်ရံၣ်န့ၣ်,အတၢ်ညၣ်ဂိၢ်ဘျါက့ၤဝဲလီၤ. 53မၤသးဒ်န့ၣ်ဒီးအပၢ်သ့ၣ်ညါလၢအမ့ၢ်နၣ်ရံၣ်ဖဲယ့ၣ်ရှူးစံးဘၣ်အီၤ,နဖိခွါမူဝဲလီၤ.ဒီးအဝဲဒၣ်စူၢ်က့ၤနာ်က့ၤ,ဒီးအပှၤဟံၣ်ဖိဒီဟံၣ်ညါလီၤ. 54ယ့ၣ်ရှူးဟဲလၢကီၢ်ယူဒၤဆူကၤလံၤလါ,ဒီးမၤတၢ်လီၤလးတမံၤအံၤ,မ့ၢ်ကဒီး,ခံမံၤတမံၤလီၤ.