‏ John 12

1မၤသးဒ်န့ၣ်ဒီးဘူၣ်လဲၤကပာ်တချုးဘၣ်ဒံးဘၣ်ဃုနံၤဒီး,ယ့ၣ်ရှူးလဲၤဆူဘ့ၤသနံ,ဖဲစီၤလါစရူးလၢအသံတ့ၢ်ဒီးယ့ၣ်ရှူးမၤဂဲၤဆၢထၢၣ်က့ၤအီၤတဂၤန့ၣ်,အိၣ်ဝဲအလီၢ်လီၤ. 2မၤသးဒ်န့ၣ်ဒီးပှၤသ့ၣ်တဖၣ်မၤတၢ်အီၣ်တၢ်အီလၢအဂီၢ်ဖဲန့ၣ်,ဒီးနီၢ်မၢ်သၤမၤတၢ်လုၢ်အီၣ်လုၢ်အီ,ဒီးစီၤလါစရူးအိၣ်ဒီးပှၤဆ့ၣ်နီၤသန့ၤဃုာ်ဒီးအီၤအကျါလီၤ.

3မၤသးဒ်န့ၣ်ဒီးနီၢ်မၤရံဟံးန့ၢ်သိနၢမူနၢ်ဒး,လၢအလုၢ်ဒိၣ်ပှ့ၤဒိၣ်,တလံတြၤ,ဒီးဖှူယ့ၣ်ရှူးအခီၣ်,ဒီးတြူာ်ကွံာ်အခီၣ်လၢအခိၣ်သူလီၤ.ဒီးသိန့ၣ်အနၢမူမၤပှဲၤဟံၣ်န့ၣ်လီၤ. 4မၤသးဒ်န့ၣ်ဒီးပှၤအိၣ်လၢအပျဲၢ်အဘီၣ်အကျါ,လၢအကဟ့ၣ်လီၤကွံာ်အီၤ,စီၤယူဒၤအံၣ်စကၤရံၤအိာ်တဂၤ,စံးဝဲဒၣ်, 5သိနၢမူအံၤဘၣ်မနုၤလၢပှၤတဆါကွံာ်လၢဒန့ၤရံၤသၢကယၤ,ဒီးဟ့ၣ်လီၤလၢပှၤဖှီၣ်ဖိယာ်ဖိန့ၣ်လဲၣ်. 6ဘၣ်ဆၣ်ဒီးတမ့ၢ်ဘၣ်အသးအိၣ်ပှၤဖှီၣ်ဖိယာ်ဖိ,ဒီးစံးတၢ်န့ၣ်ဘၣ်.မ့ၢ်အမ့ၢ်ပှၤဟုၣ်တၢ်,ဒီးအိၣ်ဒီးစ့အထၢၣ်ဒီးစိာ်ထီၣ်ကွံာ်တၢ်လၢပှၤဒၢနုာ်လၢအပူၤအဃိလီၤ. 7မၤသးဒ်န့ၣ်ဒီးယ့ၣ်ရှူးစံးဝဲဒၣ်,ပျဲအီၤတက့ၢ်.လၢယဘၣ်တၢ်ခူၣ်လီၤအမုၢ်နံၤအဂီၢ်န့ၣ်မ့ၢ်အပာ်န့ၢ်တၢ်အံၤလီၤ. 8အဂ့ၢ်ဒ်အံၤ,ပှၤဖှီၣ်ဖိယာ်ဖိတဖၣ်န့ၣ်အိၣ်ဒီးသုတထံၣ်ဃီလီၤ.မ့မ့ၢ်ယဲဒၣ်အံၤယတအိၣ်ဒီးသုတထံၣ်ဃီဘၣ်.

9မၤသးဒ်န့ၣ်ဒီး,ပှၤယူဒၤဖိ,ဒီးပှၤဂီၢ်မုၢ်ဖးဒိၣ်,သ့ၣ်ညါလၢယ့ၣ်ရှူးအိၣ်ဖဲန့ၣ်,ဒီးဟဲဝဲ,တမ့ၢ်ဘၣ်ထဲယ့ၣ်ရှူးအဃိဘၣ်,မ့ၢ်ဒ်သိးအကထံၣ်စ့ၢ်ကီးစီၤလါစရူးလၢအမၤဂဲၤဆၢထၢၣ်က့ၤလၢတၢ်သံန့ၣ်လီၤ.

10ဒီးပှၤလုၢ်တၢ်အခိၣ်သ့ၣ်တဖၣ်,ဒ်သိးအကမၤသံစ့ၢ်ကီးစီၤလါစရူးဒီး,ကူၣ်လိာ်အသးလီၤ. 11အဂ့ၢ်ဒ်အံၤ,မ့ၢ်လၢအဝဲဒၣ်အဃိဒီး,ပှၤယူဒၤဖိအါဂၤဟးထီၣ်ကွံာ်,ဒီးစူၢ်က့ၤနာ်က့ၤယ့ၣ်ရှူးလီၤ.

12မုၢ်ဆ့ၣ်ထီၣ်တနံၤဒီး,ပှၤဂီၢ်မုၢ်လၢအဟဲဆူဘူၣ်ပူၤတဖၣ်န့ၣ်,နၢ်ဟူလၢယ့ၣ်ရှူးဟဲဆူယရူၤၡလ့ၣ်, 13ဒီးဟံးန့ၢ်စူၣ်ပလိၣ်အဒ့,ဒီးလဲၤသဂၢၢ်အီၤ,ဒီးကိးပသူထီၣ်,မ်အအုၣ်က့ၤခီၣ်က့ၤခဲကနံၣ်အံၤတက့ၢ်.အံၣ်စရ့လးအစီၤပၤလၢအဟဲလၢယွၤအမံၤန့ၣ်,မ်အဘၣ်ဆိၣ်ဂ့ၤတက့ၢ်. 14ဒီးယ့ၣ်ရှူးထံၣ်န့ၢ်ကသ့ၣ်ယီၤအဖိတဒု,ဒီးဒိးထီၣ်ဝဲ,ဒ်တၢ်ကွဲးအသးအသိးန့ၣ်,

15စံယိၣ်အဖိမုၣ်ဧၢ,ပျံၤတၢ်တဂ့ၤ.
ကွၢ်ကွၢ်,နစီၤပၤဟဲ,
ဒိးကသ့ၣ်ယီၤဖိ,ဆူနအိၣ်လီၤ. ▼

▼12:15 ကၤ.၉း၉

16တၢ်တဖၣ်န့ၣ်,အပျဲၢ်အဘီၣ်အနၢ်တပၢၢ်ဘၣ်လၢသီဘၣ်ဆၣ်ဒီး,တုၤယ့ၣ်ရှူးအလၤအကပီၤအိၣ်ဖျါထီၣ်ဒီး,သ့ၣ်နီၣ်ထီၣ်က့ၤဝဲလၢတၢ်န့ၣ်အိၣ်ကွဲးအသးလၢအဂ့ၢ်,ဒီးလၢအမၤအီၤလၢတၢ်န့ၣ်တဖၣ်လီၤ.

17မၤသးဒ်န့ၣ်ဒီးပှၤဂီၢ်မုၢ်လၢအအိၣ်ဒီးအီၤတဖၣ်န့ၣ်,အုၣ်အသးလၢအကိးထီၣ်စီၤလါစရူးလၢအသွၣ်ခိၣ်ပူၤ,ဒီးဒုးဂဲၤဆၢထၢၣ်က့ၤအီၤလၢတၢ်သံန့ၣ်လီၤ. 18မ်ဒ်န့ၣ်ဒီးပှၤဂီၢ်မုၢ်ဟဲသဂၢၢ်အီၤလီၤ.အဂ့ၢ်ဒ်အံၤ,နၢ်ဟူလၢအမၤတ့ၢ်တၢ်လီၤလးအံၤလီၤ. 19မၤသးဒ်န့ၣ်ဒီး,ပှၤဖၤရံၤၡဲသ့ၣ်တဖၣ်စံးလိာ်အသး,သုထံၣ်လၢသုမၤတၢ်တဂိာ်တသီၣ်တၢ်နီတမံၤဘၣ်.ကွၢ်ကွၢ်,ပှၤဟီၣ်ခိၣ်ဖိခဲလၢာ်လဲၤပိာ်လံမးအခံလဲၣ်.

20ဒီးပှၤဟ့းလ့ၣ်ဖိတနီၤနီၤအိၣ်လၢပှၤဟဲဘါတၢ်လၢဘူၣ်ပူၤအကျါလီၤ. 21မၤသးဒ်န့ၣ်ဒီးအဝဲသ့ၣ်တဖၣ်န့ၣ်,ဟဲဆူပှၤကၤလံၤလါဖိ,ပှၤဘ့ၤသစဲဒၤဖိ,စီၤဖံလံးပူးအအိၣ်,ဒီးသံကွၢ်အီၤဒီးစံးဝဲဒၣ်,ကစၢ်ဧၢ,တၢ်မိၣ်ထံၣ်ဘၣ်ပသးလၢယ့ၣ်ရှူးလီၤ. 22စီၤဖံလံးပူးစံးဘၣ်စီၤအၣ်ဒရ့း,ဒီးစီၤအၣ်ဒရ့းဒီးစီၤဖံလံးပူးလဲၤစံးဘၣ်က့ၤယ့ၣ်ရှူးလီၤ.

23ဒီးယ့ၣ်ရှူးကတိၤဆၢအီၤဒီးစံးဝဲဒၣ်,နၣ်ရံၣ်လၢပှၤကညီဖိခွါအလၤအကပီၤကအိၣ်ဖျါန့ၣ်,ဘၣ်လံဝဲလံ. 24ယစံးဘၣ်တဲဘၣ်သုတီတီလိၤလိၤ,ဘုချံတဖျၢၣ်မ့ၢ်တလီၤတဲာ်လၢဟီၣ်ခိၣ်ဒီးအုၣ်သံဘၣ်ဒီးအိၣ်ဒၣ်အတၢ်တဖျၢၣ်ဧိၤလီၤ.မ့မ့ၢ်,မ့ၢ်အုၣ်သံဒီး,သၣ်ထီၣ်ဝဲအါဖျၢၣ်လီၤ. 25ပှၤလၢအသးလီအသးန့ၣ်,မၤဟါမၢ်ကွံာ်အီၤလီၤ.ဒီးပှၤလၢအသးဟ့လီၤအသးလၢဟီၣ်ခိၣ်ချၢအံၤ,ကန့ၢ်က့ၤအသးလီၤထူလီၤယိာ်လီၤ. 26ပှၤမ့ၢ်မၤယတၢ်တဂၤဂၤဒီး,မ်အပိာ်ယခံတက့ၢ်.ဒီးဖဲယအိၣ်အလီၢ်န့ၣ်ယခ့ယပှၤကအိၣ်ဝဲဖဲန့ၣ်စ့ၢ်ကီးလီၤ.ဒီးပှၤမ့ၢ်မၤယတၢ်တဂၤဂၤဒီး,ပၢ်ကဒုးလၤကပီၤအီၤလီၤ.

27ခဲကနံၣ်အံၤ,ယသူၣ်ကိၢ်ယသးကိၢ်လီၤ.ဒီးယကစံးတၢ်ဒ်လဲၣ်.မ့ၢ်ယကစံး,ပၢ်ဧၢ,အုၣ်က့ၤခီၣ်က့ၤယၤလၢနၣ်ရံၣ်အံၤတက့ၢ်ဧါ.မ့မ့ၢ်လၢတၢ်အံၤအဃိယဟဲဆူနၣ်ရံၣ်အံၤလီၤ.ပၢ်ဧၢ,ဒုးလၤကပီၤနမံၤတက့ၢ်. 28မၤသးဒ်န့ၣ်ဒီးတၢ်အကလုၢ်သီၣ်လီၤလၢမူခိၣ်,ယဒုးလၤကပီၤလံ,ဒီးယကဒုးလၤကပီၤကဒီးလီၤ.

29မၤသးဒ်န့ၣ်ဒီးပှၤဂီၢ်မုၢ်လၢအဆၢထၢၣ်ဒီးနၢ်ဟူတၢ်န့ၣ်,စံးဝဲလၢလီသီၣ်လီၤ.အဂၤတနီၤစံးဝဲဒၣ်,မ့ၢ်ကလူးတဂၤကတိၤတၢ်ဒီးအီၤလီၤ. 30ယ့ၣ်ရှူးကတိၤဆၢတၢ်ဒီးစံးဝဲဒၣ်,တၢ်အကလုၢ်သီၣ်န့ၣ်တမ့ၢ်လၢယဂီၢ်ဘၣ်.မ့ၢ်လၢသုဂီၢ်လီၤ. 31ခဲကနံၣ်အံၤဟီၣ်ခိၣ်ဘၣ်တၢ်စံၣ်ညီၣ်လီၤ.ခဲကနံၣ်အံၤ,ဟီၣ်ခိၣ်အခိၣ်ဘၣ်တၢ်ဟီထီၣ်ကွံာ်အီၤလီၤ. 32ယဲဒၣ်အံၤ,ယမ့ၢ်ဘၣ်ယူာ်ထီၣ်ယသးလၢဟီၣ်ခိၣ်ချၢဒီး,ယကမိၤဃီၤပှၤခဲလၢာ်ဆူယအိၣ်လီၤ. 33ကတိၤတၢ်န့ၣ်မ့ၢ်အဒုးနဲၣ်ဝဲလၢအကသံဒ်လဲၣ်ဒ်လဲၣ်အဂ့ၢ်န့ၣ်လီၤ.

34ဒီးပှၤဂီၢ်မုၢ်စံးဆၢအီၤ,ပနၢ်ဟူလၢလံာ်တၢ်သိၣ်တၢ်သီအပူၤ,လၢခရံာ်ကအိၣ်အစိၤစိၤအဃၣ်ဃၣ်လီၤ.ဒီးဘၣ်မနုၤလၢနစံးနဲလၢပှၤကညီဖိခွါကဘၣ်ယူာ်ထီၣ်အသးလဲၣ်.ပှၤကညီဖိခွါန့ၣ်မ့ၢ်မတၤတဂၤလဲၣ်. 35မၤသးဒ်န့ၣ်ဒီးယ့ၣ်ရှူးစံးဘၣ်အီၤ,တၢ်ကပီၤအိၣ်ဒံးဒီးသုတစိၢ်ဒံးလီၤ.တၢ်ကပီၤအိၣ်ဒံးဝဲအဖၢမုၢ်န့ၣ်,ဒ်သိးတၢ်သုတခံးန့ၢ်သုတဂ့ၤဒီး,ဟးတၢ်တက့ၢ်.ဒီးပှၤဟးတၢ်လၢတၢ်ခံးကျါန့ၣ်,မ့ၢ်အလဲၤဆူလဲၣ်ဆူလဲၣ်န့ၣ်တသ့ၣ်ညါဘၣ်ဝဲဘၣ်. 36သုအိၣ်ဒီးတၢ်ကပီၤအဖၢမုၢ်န့ၣ်,ဒ်သိးသုကကဲထီၣ်ပှၤတၢ်ကပီၤဖိခွါတဖၣ်ဒီးစူၢ်က့ၤနာ်က့ၤတၢ်ကပီၤတက့ၢ်.ယ့ၣ်ရှူးစံးတၢ်တဖၣ်န့ၣ်ဒီး,ဟးထီၣ်ကွံာ်,ဒီးပာ်ခူသူၣ်ကွံာ်အသးလၢအဝဲသ့ၣ်လီၤ.

37ဒီးမၤတၢ်လီၤလးအါထဲန့ၣ်လၢအဝဲသ့ၣ်အမဲာ်ညါဘၣ်ဆၣ်ဒီး,အဝဲသ့ၣ်တနာ်ဘၣ်အီၤဘၣ်. 38မၤသးဒ်န့ၣ်ဒီးဝံယၡါယၤအကလုၢ်အကထါလၢထီၣ်ပှဲၤထီၣ်လၢအစံးဝဲဒၣ်,

ကစၢ်ဧၢ,မ့ၢ်မတၤနာ်လံပကစီၣ်တဂၤလဲၣ်.
ယွၤအစုဒုၣ်အိၣ်ဖျါထီၣ်လံလၢမတၤတဂၤအမဲာ်ညါလဲၣ်. ▼

▼12:38 ၡါ.၅၃း၁.

39မ်ဒ်န့ၣ်ဒီးစူၢ်က့ၤနာ်က့ၤတၢ်တသ့ဘၣ်.အဂ့ၢ်ဒ်အံၤစီၤယၡါယၤစံးဝဲ,

40ဒ်သိးအသုတထံၣ်တၢ်လၢအမဲာ်,
ဒီးအသုတသ့ၣ်ညါတၢ်လၢအသး,
ဒီးအသုတဃၣ်လိၤအသး,
ဒီးယသုတမၤဘျါက့ၤအီၤတဂ့ၤဒီး,တၢ်မၤခံးအမဲာ်,
ဒီးမၤကိၤအသးလီၤ. ▼

▼12:40 ၡါ.၆း၁၀

41လၢစီၤယၡါယၤထံၣ်ဘၣ်အလၤကပီၤ,ဒီးစံၣ်တဲၤတဲလီၤတၢ်လၢအဂ့ၢ်အကျိၤအဃိန့ၣ်,စံးတၢ်တဖၣ်အံၤလီၤ. 42မ့ၢ်နာ်သက့ဒ်န့ၣ်ဒီးပဒိၣ်ပပှၢ်ဒၣ်လဲာ်စူၢ်က့ၤနာ်က့ၤအီၤအါဂၤလီၤ.မ့မ့ၢ်လၢပှၤဖၤရံၤၡဲသ့ၣ်တဖၣ်အဃိ,ဒ်သိးအသုတဘၣ်တၢ်ဟီထီၣ်ကွံာ်အီၤလၢဘူၣ်ဘျီၣ်ပူၤတဂ့ၤဒီး,တအၢၣ်လီၤအီလီၤဘၣ်ဝဲဘၣ်. 43အဂ့ၢ်ဒ်အံၤ,အဲၣ်ဒိးပှၤကညီအတၢ်စံးထီၣ်ပတြၢၤဒိၣ်န့ၢ်အအဲၣ်ဒိးယွၤအတၢ်စံးထီၣ်ပတြၢၤတက့ၢ်လီၤ.

44ဒီးယ့ၣ်ရှူးကိးပသူထီၣ်ဒီးစံးဝဲဒၣ်,ပှၤလၢအစူၢ်က့ၤနာ်က့ၤယၤအံၤ,တမ့ၢ်ဘၣ်အစူၢ်က့ၤနာ်က့ၤယၤဘၣ်,မ့ၢ်အစူၢ်က့ၤနာ်က့ၤပှၤလၢအမၢလီၤယၤတဂၤလီၤ. 45ဒီးပှၤလၢအထံၣ်ယၤအံၤ,မ့ၢ်အထံၣ်ပှၤလၢအမၢလီၤယၤတဂၤလီၤ. 46ယမ့ၢ်တၢ်ကပီၤဟဲဆူဟီၣ်ခိၣ်ချၢဒ်သိးကယဲၢ်ပှၤလၢအစူၢ်က့ၤနာ်က့ၤယၤတဂၤလၢ်လၢ်န့ၣ်,အသုတအိၣ်တဆိးလၢတၢ်ခံးကျါတဂ့ၤလီၤ. 47ပှၤမ့ၢ်နၢ်ဟူယကလုၢ်ကထါ,ဒီးတတိၢ်န့ၢ်ဘၣ်န့ၣ်,ယတစံၣ်ညီၣ်ဘၣ်အီၤဘၣ်.အဂ့ၢ်ဒ်အံၤ,တမ့ၢ်ဘၣ်ယဟဲဒ်သိးယကစံၣ်ညီၣ်ဟီၣ်ခိၣ်ဘၣ်.မ့ၢ်ဒ်သိးယကအုၣ်က့ၤခီၣ်က့ၤအီၤလီၤ. 48ပှၤလၢအညိကွံာ်ယၤဒီးတဟံးန့ၢ်ဘၣ်ယကလုၢ်ကထါဘၣ်န့ၣ်,တၢ်စံၣ်ညီၣ်အီၤအိၣ်ဝဲလီၤ.တၢ်ကလုၢ်လၢယကတိၤတၢ်န့ၣ်,အဝဲန့ၣ်ကစံၣ်ညီၣ်အီၤလၢမုၢ်နံၤကတၢၢ်လီၤ. 49အဂ့ၢ်ဒ်အံၤ,တမ့ၢ်ဘၣ်ယကတိၤတၢ်ဒၣ်ယဲဘၣ်.မ့ၢ်ပၢ်လၢအမၢလီၤယၤန့ၣ်မၤလိာ်ယကစံးတၢ်ဒ်လဲၣ်ဒ်လဲၣ်,ဒီးယကကတိၤတၢ်ဒ်လဲၣ်ဒ်လဲၣ်န့ၣ်လီၤ. 50ဒီးယသ့ၣ်ညါလၢအတၢ်မၤလိာ်မ့ၢ်တၢ်မူအထူအယိာ်လီၤ.မၤသးဒ်န့ၣ်ဒီးယကတိၤတၢ်န့ၣ်,ဒ်ယပၢ်စံးဘၣ်တဲဘၣ်ယၤအသိးန့ၣ်ယကတိၤတၢ်ဒ်န့ၣ်အသိးလီၤ.