Joh 15 | KswSKMB | STEP | ယဲဒၣ်အံၤ,ယမ့ၢ်စပံးအမုၢ်နီၢ်နီၢ်,ဒီးယပၢ်မ့ၢ်ပှၤပၢၤစပံးမုၢ်အလီၢ်လီၤ.

‏ John 15

1 ယဲဒၣ်အံၤ,ယမ့ၢ်စပံးအမုၢ်နီၢ်နီၢ်,ဒီးယပၢ်မ့ၢ်ပှၤပၢၤစပံးမုၢ်အလီၢ်လီၤ. 2 ကယဲၢ်ဒ့လၢယလိၤလၢအတသၣ်ထီၣ်ဘၣ်ဝဲန့ၣ်,ပဲာ်ကွံာ်ဝဲ,ဒီးကယဲၢ်ဒ့လၢအသၣ်ထီၣ်ဝဲန့ၣ်,ဒ်သိးအကသၣ်အါထီၣ်ဒီး,ပဲာ်ဃိကဆှီထီၣ်ဝဲဒၣ်လီၤ. 3 သုကဆှီလံလၢယကလုၢ်ယကထါလၢယစံးဘၣ်တ့ၢ်သုအဃိလီၤ.

4 အိၣ်သုဝဲဆိးသုဝဲလၢယပူၤ,ဒီးယကအိၣ်ယကဆိးလၢသုပူၤလီၤ.ဒ်ဒ့မ့ၢ်တအိၣ်တဆိးဘၣ်လၢစပံးမုၢ်အလိၤဘၣ်ဒီးသၣ်ဒၣ်တၢ်တသ့ဘၣ်အသိးန့ၣ်,သုဝဲသ့ၣ်အံၤ,သုမ့ၢ်တအိၣ်ဘၣ်လၢယပူၤဘၣ်ဒီး,သုသၣ်ထီၣ်တသ့ဘၣ်ဒ်န့ၣ်အသိးလီၤ. 5 ယဲဒၣ်အံၤ,ယမ့ၢ်စပံးအမုၢ်,သုဝဲသ့ၣ်အံၤ,သုမ့ၢ်အဒ့အဖီလီၤ.ပှၤလၢအအိၣ်လၢယပူၤ,ဒီးယအိၣ်လၢအပူၤန့ၣ်,သၣ်ထီၣ်ဝဲဒၣ်အါဖျၢၣ်လီၤ.အဂ့ၢ်ဒ်အံၤ,မ့တမ့ၢ်ဘၣ်လၢယၤဒီး,သုမၤတၢ်တသ့ဘၣ်နီတမံၤဘၣ်. 6 ပှၤမ့ၢ်တအိၣ်တဆိးဘၣ်လၢယပူၤဘၣ်ဒီး,ကဘၣ်တၢ်ညိကွံာ်အီၤ,ဒ်တၢ်အဒ့အသိး,ဒီးကဃ့ထီၣ်ကွံာ်ဝဲလီၤ.ဒီးပှၤကထၢဖှိၣ်အီၤ,ဒီးဖၢလီၤအီၤလၢမ့ၣ်အူအပူၤ,ဒီးမ့ၣ်အူကအီၣ်ကွံာ်အီၤလီၤ. 7 သုမ့ၢ်အိၣ်လၢယပူၤ,ဒီးယကလုၢ်ယကထါမ့ၢ်အိၣ်လၢသုပူၤဒီး,ဖဲဒၣ်သုသးသုကဃ့တၢ်ဒီး,သုကန့ၢ်ဘၣ်လီၤ.

8 လၢသုသၣ်ထီၣ်အါမးအဃိန့ၣ်,ယပၢ်အလၤကပီၤအိၣ်ဖျါထီၣ်,ဒီးသုကကဲထီၣ်ယပျဲၢ်ယဘီၣ်လီၤ. 9 ဒ်ပၢ်အဲၣ်ယၤအသိးန့ၣ်ယကအဲၣ်သုစ့ၢ်ကီးလီၤ.အိၣ်ဆိးလၢယတၢ်အဲၣ်အပူၤတက့ၢ်. 10 သုမ့ၢ်တိၢ်န့ၢ်ယတၢ်မၤလိာ်တဖၣ်ဒီး,သုကအိၣ်ကဆိးလၢယတၢ်အဲၣ်အပူၤ,ဒ်ယတိၢ်န့ၢ်ယပၢ်အတၢ်မၤလိာ်တဖၣ်,ဒီးယအိၣ်ယဆိးလၢအတၢ်အဲၣ်အပူၤအသိးန့ၣ်လီၤ.

11 ဒ်သိးယတၢ်သးခုကအိၣ်ကဆိးလၢသုပူၤ,ဒီးသုတၢ်သးခုကလၢထီၣ်ပှဲၤထီၣ်ဒီး,ယစံးဘၣ်တဲဘၣ်လံသုလၢတၢ်န့ၣ်တဖၣ်လံ. 12 အဝဲအံၤမ့ၢ်ယတၢ်မၤလိာ်,လၢသုကအဲၣ်လိာ်ကွံလိာ်သုသးသကိးသကိး,ဒ်ယအဲၣ်သုအသိးန့ၣ်လီၤ. 13 ပှၤမ့ၢ်ပာ်လီၤကွံာ်အသးသမူလၢအတံၤအသကိးအဂီၢ်ဒီး,ပှၤတအိၣ်ဘၣ်ဒီးတၢ်အဲၣ်တၢ်ကွံဒိၣ်န့ၢ်အဝဲန့ၣ်နီတဂၤဘၣ်. 14 ဖဲဒၣ်ယမၤလိာ်သုတဖၣ်န့ၣ်,သုမ့ၢ်မၤဒီး,သုမ့ၢ်ယတံၤယသကိးလီၤ.

15 ဒီးယတကိးလၢၤဘၣ်သုလၢကုၢ်လၢပှၤဘၣ်.အဂ့ၢ်ဒ်အံၤ,အကစၢ်မၤမနုၤမနုၤန့ၣ်,ကုၢ်တသ့ၣ်ညါဘၣ်ဝဲဘၣ်.ယကိးက့ၤလံသုလၢတံၤလၢသကိးလံ.အဂ့ၢ်ဒ်အံၤ,ကယဲၢ်ယနၢ်ဟူတၢ်လၢပၢ်အအိၣ်န့ၣ်,ယဘိးဘၣ်သ့ၣ်ညါသုလီၤ. 16 သုဃုထၢလံယၤတမ့ၢ်ဘၣ်.မ့ၢ်ယဃုထၢလံသုဒီးပာ်လီၤသု,ဒ်သိးသုကလဲၤသၣ်ထီၣ်,ဒီးသုတၤသၣ်ကအိၣ်ကဆိး,ဒ်သိးဖဲဒၣ်သုဃ့တၢ်လၢယမံၤလၢပၢ်န့ၣ်ဒီး,အဝဲဒၣ်ကဟ့ၣ်လီၤသုလီၤ.

17 တၢ်တဖၣ်အံၤ,ယမၤလိာ်သု,ဒ်သိးသုကအဲၣ်လိာ်ကွံလိာ်သုသးသကိးသကိးလီၤ. 18 ဟီၣ်ခိၣ်မ့ၢ်သးဟ့သုဒီး,သုသ့ၣ်ညါလၢအသးဟ့ယၤဆိန့ၢ်အသးဟ့သုတက့ၢ်လီၤ. 19 သုမ့ၢ်ဘၣ်ဃးဒီးဟီၣ်ခိၣ်ဒီး,ဟီၣ်ခိၣ်ကအဲၣ်အတၢ်ဒၣ်ဝဲလီၤ.မ့မ့ၢ်သုဝဲသ့ၣ်အံၤ,မ့ၢ်သုတဘၣ်ဃးဘၣ်ဒီးဟီၣ်ခိၣ်,ဒီးမ့ၢ်ယဃုထၢကွံာ်သုလၢဟီၣ်ခိၣ်အဃိဒီး,ဟီၣ်ခိၣ်သးဟ့သုလီၤ. 20 သ့ၣ်နီၣ်ထီၣ်က့ၤတၢ်ကတိၤလၢယစံးဘၣ်သု,ကုၢ်တဒိၣ်န့ၢ်ဘၣ်အကစၢ်ဘၣ်န့ၣ်တက့ၢ်.အဝဲသ့ၣ်မ့ၢ်မၤအၢယၤဒီး,ကမၤအၢသုစ့ၢ်ကီးလီၤ.မ့ၢ်တိၢ်န့ၢ်ယကလုၢ်ဒီး,ကတိၢ်န့ၢ်သုကလုၢ်စ့ၢ်ကီးလီၤ. 21 ဘၣ်ဆၣ်ဒီးကမၤသုလၢတၢ်န့ၣ်တဖၣ်ခဲလၢာ်လၢယမံၤအဃိ,အဂ့ၢ်ဒ်အံၤ,တသ့ၣ်ညါဘၣ်ပှၤလၢအမၢလီၤယၤဘၣ်.

22 ယမ့ၢ်တဟဲစံးဘၣ်တဲဘၣ်အီၤဒီး,အတၢ်ကမၣ်တအိၣ်ဘၣ်.မ့မ့ၢ်ခဲကနံၣ်အံၤ,တၢ်ကတိၤပူၤဖျဲးအတၢ်ကမၣ်,တအိၣ်ဘၣ်ဝဲဘၣ်. 23 ပှၤလၢအသးဟ့ယၤန့ၣ်,မ့ၢ်အသးဟ့ယပၢ်စ့ၢ်ကီးလီၤ. 24 တၢ်မၤလၢပှၤဂၤတမၤဘၣ်နီတဂၤဘၣ်န့ၣ်,ယမ့ၢ်တမၤဘၣ်လၢအဝဲသ့ၣ်အကျါဘၣ်ဒီး,အတၢ်ကမၣ်တအိၣ်ဘၣ်.မ့မ့ၢ်ခဲကနံၣ်အံၤ,ထံၣ်ဝဲဒီးသးဟ့ယၤဒီးယပၢ်ခံဂၤလိာ်လီၤ. 25 တၢ်မၤအသးအံၤဒ်သိးတၢ်ကတိၤကွဲးအသးလၢအတၢ်သိၣ်တၢ်သီအပူၤ,ကလၢထီၣ်ပှဲၤထီၣ်ဝဲ,လၢအသးဟ့ယၤကလီကလီလီၤ. ^{▼▼15:25 စံး.၆၉း၄}

26 ဘၣ်ဆၣ်ဒီးတုၤပှၤမၤစၢၤတၢ်လၢယကမၢလီၤအီၤလၢယပၢ်အအိၣ်,သးလၢအဘၣ်ဃးဒီးတၢ်မ့ၢ်တၢ်တီလၢအဟဲထီၣ်လၢပၢ်အအိၣ်န့ၣ်ဟဲဝဲဒီး,အဝဲဒၣ်ကအုၣ်အသးလၢယဂ့ၢ်ယကျိၤလီၤ. 27 ဒီးသုဝဲသ့ၣ်အံၤသုကအုၣ်သုသးစ့ၢ်ကီးလီၤ.အဂ့ၢ်ဒ်အံၤ,သုအိၣ်ဒီးယၤလၢအခီၣ်ထံးလံၤလံၤလီၤ.