Jon 4 | KswSKMB | STEP | ဒီးစီၤယိၤနါအသူၣ်ကိၢ်အသးဂီၤဒိၣ်မး,ဒီးအသးထီၣ်ဝဲလီၤ.ဒီးဘါထုကဖၣ်ယွၤဒီးစံးဝဲဒၣ်,

‏ Jonah 4

1 ဒီးစီၤယိၤနါအသူၣ်ကိၢ်အသးဂီၤဒိၣ်မး,ဒီးအသးထီၣ်ဝဲလီၤ.ဒီးဘါထုကဖၣ်ယွၤဒီးစံးဝဲဒၣ်, 2 ယွၤဧၢ,အဝဲအံၤမ့ၢ်ယကလုၢ်လၢယအိၣ်ဒံးလၢယကီၢ်ဒၣ်ယဲအပူၤ,တမ့ၢ်ဘၣ်ဧါ.မၤသးဒ်န့ၣ်ဒီးယဃ့ၢ်ဆိလၢနမဲာ်ညါဆူတၢ်ၡံၣ်လီၤ.အဂ့ၢ်ဒ်အံၤ,ယသ့ၣ်ညါလၢနမ့ၢ်ကစၢ်လၢအသးကညီၤတၢ်,ဒီးသးအိၣ်တၢ်,လၢအသးထီၣ်ကီ,ဒီးအဘျုးအဖှိၣ်အိၣ်အါ,ဒီးနပီၢ်ယၢ်ဒၣ်နသးလၢတၢ်အၢအဂ့ၢ်လီၤ. 3 ဒီးခဲကနံၣ်အံၤယွၤဧၢ,ဟံးန့ၢ်ယသးသမူလၢယၤတက့ၢ်.အဂ့ၢ်ဒ်အံၤ,ယသံဂ့ၤန့ၢ်ယမူတက့ၢ်လီၤ. 4 ဒီးယွၤစံးဘၣ်အီၤ,နသးထီၣ်န့ၣ်ဂ့ၤစ့ၢ်ကီးဧါ.

5 ဒီးစီၤယိၤနါဟးထီၣ်လၢဝ့ၢ်ပူၤဆူခိ,ဒီးဆ့ၣ်နီၤဝဲလၢဝ့ၢ်လၢမုၢ်ထီၣ်တခီ,ဒီးမၤထီၣ်ဒဲတဖျၢၣ်,ဒီးဆ့ၣ်နီၤဝဲလၢအပူၤလၢအကဒုပူၤတုၤအကထံၣ်ဘၣ်တၢ်လၢအကမၤအသးလၢဝ့ၢ်န့ၣ်လီၤ.

6 ဒီးယွၤကတဲာ်ကတီၤမာ်တိတထံး,ဒီးဒုးဒိးထီၣ်အီၤလၢစီၤယိၤနါအဖီခိၣ်,ဒ်သိးအကလီၤကဒုလၢအခိၣ်,ဒီးမၤပူၤဖျဲးအီၤဒီးတၢ်အၢလီၤ.ဒီးစီၤယိၤနါသးခုလၢမာ်တိအဃိဒိၣ်မးလီၤ.

7 ဒီးမုၢ်ဆ့ၣ်ထီၣ်တနံၤလၢဂီၤဂီၤန့ၣ်ယွၤကတဲာ်ကတီၤတၢ်ဖိဃၢ်တဘိ,ဒီးအတၢ်အီၣ်မာ်တိ,ဒီးအလၣ်လီၤဘဲဝဲလီၤ.

8 ဒီးလၢမုၢ်ဟဲထီၣ်န့ၣ်တၢ်မၤအသးလၢယွၤကတဲာ်ကတီၤကလံၤကိၢ်လၢမုၢ်ထီၣ်တခီ,ဒီးမုၢ်ဆဲးဘၣ်စီၤယိၤနါအခိၣ်,ဒီးလီၤဘှါဝဲ,ဒီးဃ့ဝဲလၢအကသံလီၤ.ဒီးစံးဝဲဒၣ်,ယသံဂ့ၤန့ၢ်ယမူတက့ၢ်လီၤ.

9 ဒီးယွၤစံးလၢစီၤယိၤနါ,နသးထီၣ်လၢမာ်တိအဃိဂ့ၤစ့ၢ်ကီးဧါ.ဒီးစံးဝဲဒၣ်,ယသးထီၣ်တုၤယသံန့ၣ်ဂ့ၤလီၤ.

10 ဒီးယွၤစံးဝဲဒၣ်,နသးလီမာ်တိလၢနတမၤဘၣ်တၢ်လၢအဂီၢ်ဘၣ်,လၢနတဒုးဒိၣ်ထီၣ်ဘၣ်,လၢအမဲထီၣ်လၢမုၢ်တနၤဖိ,ဒီးဟးဂီၤလၢမုၢ်တနၤဖိလီၤ. 11 ဒီးနံၤနဝ့,ဝ့ၢ်ဖးဒိၣ်တဖျၢၣ်န့ၣ်,ဖဲပှၤလၢအတသ့ၣ်ညါအစုထွဲဒီးအစုစ့ၣ်အဆၢဘၣ်,အိၣ်ဝဲတကလးအဘျီတဆံခံဒီးအဘျဲၣ်,ဒီးဆၣ်ဖိကီၢ်ဖိအဒၢအါအါကလဲာ်န့ၣ်ယဲဒၣ်အံၤယတသးလီဘၣ်အီၤဘၣ်ဧါ.