Joshua 13
1ဒီးစီၤယိၤရှူအသးပှၢ်တ့ၢ်,ဒီးလဲၤနုာ်တ့ၢ်လၢနံၣ်တဖၣ်အကျါလီၤ.ဒီးယွၤစံးဘၣ်အီၤ,နသးပှၢ်တ့ၢ်လံ,ဒီးဟီၣ်ခိၣ်လၢပှၤဘၣ်မၤန့ၢ်အီၤန့ၣ်အိၣ်လီၤတဲာ်ဒံးအါအါကလဲာ်လီၤ. 2အအံၤမ့ၢ်ဟီၣ်ခိၣ်လၢအအိၣ်လီၤတဲာ်ဒံးလီၤ. 3ပှၤဖလ့ၡသးဖိအကီၢ်ဃၢၤခဲလၢာ်,ဒီးပှၤကရှူဖိအကီၢ်ဒီဘ့ၣ်ညါလၢၡံဃိၢ်လၢအအိၣ်လၢအဲၤကူပတူးအမဲာ်ညါ,ပၢၢ်လၢဧ့ကြိၣ်အကီၢ်ဃၢၤလၢကလံၤစိးတခီ,လၢတၢ်ပာ်လၢပှၤကနၤဧၣ်ဖိအဂီၢ်,ဖလ့ၡသးဖိအပဒိၣ်ယဲၢ်ဂၤအကီၢ်,ပှၤဂါစၤဖိအကီၢ်,ဒီးပှၤအၤစဒိာ်ဖိအကီၢ်,ပှၤအၤၡကလိၣ်ဖိအကီၢ်ဒီးပှၤကၤသးဖိအကီၢ်,ဒီးဧ့ကြိၣ်ဒီးပှၤဧၤဝံဖိအကီၢ်စ့ၢ်ကီးလီၤ. 4လၢကလံၤထံးတခီန့ၣ်ပှၤကနၤဧၣ်ဖိအကီၢ်ဒီဘ့ၣ်ညါ,ဒီးမၤရါလၢအအိၣ်လၢပှၤစံဒိၣ်ဖိအကီၢ်ဃၢၤပၢၢ်လၢအဖ့း,ပၢၢ်လၢအမိၢ်ဖိအကီၢ်ဃၢၤ, 5ဒီးပှၤကံးဘလးဖိအကီၢ်,ဒီးလဘၤနိၣ်လၢမုၢ်ထီၣ်တခီဒီဖျၢၣ်ညါ,လၢဘဧၤလးကးလၢကစၢၢ်ဃ့ရမိၣ်အခီၣ်ထံးပၢၢ်လၢတၢ်လဲၤနုာ်လၢဃမါသးလီၤ. 6ကယဲၢ်ကစၢၢ်ဖိလၢလဘၤနိၣ်ပၢၢ်လၢမံးစြဖိးမၤယံၣ်,ပှၤစံဒိၣ်ဖိခဲလၢာ်န့ၣ်ယကဟီထီၣ်ကွံာ်အီၤလၢပှၤအံၣ်စရ့လးဖိအမဲာ်ညါလီၤ.မ့မ့ၢ်နဲဒၣ်အံၤဖးတၢ်သတးဒီး,နီၤဖးတၢ်န့ၣ်လၢတၢ်န့ၢ်သါအဂီၢ်,ဒ်ယမၤလိာ်နၤအသိးန့ၣ်တက့ၢ်. 7ဒီးခဲကနံၣ်အံၤနီၤဖးထံဧိၤကီၢ်ဧိၤအံၤလၢတၢ်န့ၢ်သါအလီၢ်လၢပှၤခွံဒူၣ်,ဒီးပှၤမနၤရှ့ၤဖိတခီဒူၣ်အဂီၢ်န့ၣ်တက့ၢ်. 8ဒီးအဝဲသ့ၣ်,ဒီးပှၤရူၤဘ့ၣ်ဖိ,ဒီးပှၤကးဖိန့ၢ်ဘၣ်လံအတၢ်န့ၢ်သါလၢစီၤမိၤရှ့ဟ့ၣ်လီၤအီၤလၢယၢ်ဒ့ၣ်ဝၢ်ဘးခီလၢမုၢ်ထီၣ်တခီ,ဒ်ယွၤအခ့အပှၤစီၤမိၤရှ့ဟ့ၣ်လီၤအီၤအသိးန့ၣ်, 9ဧရိၤဧ့ၢ်လၢအအိၣ်လၢအၢ်နိၣ်အထံနံၤ,ဒီးဝ့ၢ်အိၣ်ဝဲလၢထံကျိအသးကံၢ်ပူၤ,ဒီးတၢ်ပျီပူၤမ့ဒဘၤဒီဘ့ၣ်ညါပၢၢ်လၢဒံဘိၣ်, 10ဒီးပှၤအမိၢ်ဖိအစီၤပၤစံဃိၣ်လၢအပၢတၢ်လၢဃ့ၡဘိၣ်အပူၤတဂၤအဝ့ၢ်တဖၣ်ခဲလၢာ်,ပၢၢ်လၢပှၤဧၣ်မိၣ်ဖိအကီၢ်ဃၢၤ, 11ဒီးကံးလဧး,ဒီးပှၤကရှူၢ်ဖိ,ဒီးပှၤမၤကးဖိအကီၢ်ဃၢၤ,ဃ့ရမိၣ်ဒီဖျၢၣ်ညါ,ဒီးဘၤၡၣ်ဒီဘ့ၣ်ညါပၢၤလၢစၤလကး, 12ဒီးဘၤၡၣ်အစီၤပၤဧိာ်လၢအပၢတၢ်လၢဧၤၡတြိးအပူၤ,ဒီးလၢအ့ဒြံၤအပူၤလၢအအိၣ်လီၤတဲာ်လၢပှၤနီၢ်ဒိၣ်ဖိလၢအအိၣ်လီၤတဲာ်အကျါတဂၤအဘီအမုၢ်ဒီဘ့ၣ်ညါလီၤ.ဒီးစီၤမိၤရှ့ကျီကွံာ်အီၤ,ဒီးဟီထီၣ်ကွံာ်အီၤလီၤ. 13ဘၣ်ဆၣ်ဒီးပှၤအံၣ်စရ့လးဖိတဟီထီၣ်ကွံာ်ဘၣ်ပှၤကရှူၢ်ဖိ,ဒီးပှၤမၤကးဖိဘၣ်,မ့မ့ၢ်ပှၤကရှူၢ်ဖိ,ဒီးပှၤမၤကးဖိအိၣ်ဝဲဆိးဝဲလၢပှၤအံၣ်စရ့လးဖိအကျါတုၤမုၢ်မဆါတနံၤအံၤလီၤ. 14မ့မ့ၢ်ပှၤလ့ၤဝံဖိန့ၣ်တဟ့ၣ်ဘၣ်အီၤလၢတၢ်န့ၢ်သါဘၣ်,ယွၤအံၣ်စရ့လးအကစၢ်အတၢ်လုၢ်မ့ၣ်အူမ့ၢ်အတၢ်န့ၢ်သါ,ဒ်အစံးဘၣ်အီၤအသိးန့ၣ်လီၤ. 15ဒီးစီၤမိၤရှ့ဟ့ၣ်လီၤတၢ်လၢပှၤရူၤဘ့ၣ်ဖိတဒူၣ်,ဒ်အဟံၣ်တဖၣ်အသိးန့ၣ်လီၤ. 16ဒီးအကီၢ်ဃၢၤန့ၣ်မ့ၢ်လၢဧရိၤဧ့ၢ်လၢအအိၣ်လၢထံမိၢ်ပှၢ်အၢ်နိၣ်အနံၤ,ဒီးဝ့ၢ်အိၣ်ဝဲလၢထံကျိအသးကံၢ်ပူၤ,ဒီးတၢ်ပျီပူၤဒီဘ့ၣ်ညါလၢမ့ၤဒဘၤအဃၢၤ, 17ဃ့ၡဘိၣ်,ဒီးအဝ့ၢ်ခဲလၢာ်လၢအအိၣ်ဝဲလၢတၢ်ပျီပူၤ,ဒံၤဘိၣ်,ဒီးဘၤမိးဘဧၤလး,ဒီးဘ့ၤသဘဧၤလးမဧိၣ်, 18ဒီးယးဟစၤ,ဒီးကဒမိး,ဒီးမ့ဖၤ. 19ဒီးကံးရယးသံၣ်,ဒီးစံးဘမၤ,ဒီးစ့ၤရ့းၡဃၢ်လၢတၢ်ကစၢၢ်ကဆူးအကစၢၢ်လိၤ, 20ဒီးဘ့ၤသပဧိၢ်,ဒီးအၤၡဒိးပံးစကၤ,ဒီးဘ့ၤသၤယၡံမိး, 21ဒီးတၢ်ပျီပူၤအဝ့ၢ်ခဲလၢာ်,ဒီးပှၤအမိၢ်ဖိအစီၤပၤစံဃိၣ်လၢအပၢတၢ်လၢဃ့ၡဘိၣ်အပူၤတဂၤအဘီအမုၢ်ဒီဘ့ၣ်ညါ,ပှၤလၢစီၤမိၤရှ့ကျီကွံာ်အိၣ်ဒီးမံးဒယၣ်အပဒိၣ်ဖးဒိၣ်တဖၣ်,စီၤအဝံၤ,ဒီးစီၤရ့က့ၣ်,ဒီးစီၤစူၢ်,ဒီးစီၤဃူၢ်လၢအမ့ၢ်စံဃိၣ်အပဒိၣ်ဖးဒိၣ်တဖၣ်အိၣ်ဝဲဆိးဝဲလၢထံဧိၤကီၢ်ဧိၤအပူၤန့ၣ်လီၤ. 22စီၤဘဧိၢ်အဖိခွါဝံဘံးလၣ်န့ၣ်ပှၤအံၣ်စရ့လးဖိမၤသံအီၤလၢနးလၢပှၤလၢအဘၣ်တၢ်မၤသံလၢအီၤအကျါန့ၣ်လီၤ. 23ဒီးပှၤရူၤဘ့ၣ်ဖိအကီၢ်ဃၢၤန့ၣ်မ့ၢ်ထံယၢ်ဒ့ၣ်ဒီးအသရ့ၤလီၤ.အဝဲန့ၣ်မ့ၢ်ပှၤရူၤဘ့ၣ်ဖိအတၢ်န့ၢ်သါ,ဒ်အဟံၣ်တဖၣ်အသိးန့ၣ်,အဝ့ၢ်တဖၣ်,ဒီးအတဝီတဖၣ်န့ၣ်လီၤ. 24ဒီးစီၤမိၤရှ့ဟ့ၣ်လီၤတၢ်လၢကးတဒူၣ်န့ၣ်,လၢပှၤကးဖိဒ်အဟံၣ်တဖၣ်အသိးန့ၣ်လီၤ. 25ဒီးအကီၢ်ဃၢၤန့ၣ်မ့ၢ်ယၤစ့ၢ်,ဒီးကံးလဧးအဝ့ၢ်ခဲလၢာ်,ဒီးပှၤဧၣ်မိၣ်ဖိအကီၢ်ဖးဖီကီၢ်,ပၢၢ်လၢဧရိၤဧ့ၢ်လၢအအိၣ်လၢရးဘးအမဲာ်ညါ, 26ဒီးလၢဃ့ၡဘိၣ်ပၢၢ်လၢရၤမါမံးစပၤ,ဒီးဘတိနံၣ်,ဒီးလၢမၤဃန့ၤပၢၢ်လၢဒဘံၢ်အကီၢ်ဃၢၤ, 27ဒီးအိၣ်ဝဲလၢကစၢၢ်ကဆူးအပူၤန့ၣ်ဘ့ၤသဟၤရၣ်,ဒီးဘ့ၤသနံးမရၤ,ဒီးစူးကိၤသး,ဒီးစၤဖိၣ်,တၢ်အိၣ်လီၤတဲာ်လၢဃ့ၡဘိၣ်အစီၤပၤစံဃိၣ်အဘီမုၢ်,ထံကျိယၢ်ဒ့ၣ်ဒီးအသရ့ၤပၢၢ်လၢပီၣ်လဲၣ်ကံးန့ၤရ့သးအနံၤလၢယၢ်ဒ့ၣ်ဝၢ်ဘးခီလၢမုၢ်ထီၣ်တခီလီၤ. 28အဝဲန့ၣ်မ့ၢ်ပှၤကးဖိအတၢ်န့ၢ်သါ,ဒ်အဟံၣ်တဖၣ်အသိးန့ၣ်,ဝ့ၢ်တဖၣ်အိၣ်ဒီးအတဝီတဖၣ်လီၤ. 29ဒီးစီၤမိၤရှ့ဟ့ၣ်လီၤတၢ်လၢပှၤမနၤရှ့ၤဖိတခီဒူၣ်,ဒီးအအံၤမ့ၢ်ပှၤမနၤရှ့ၤဖိတခီဒူၣ်အတၢ်,ဒ်အဟံၣ်တဖၣ်အသိးန့ၣ်လီၤ. 30ဒီးအကီၢ်ဃၢၤအိၣ်ဝဲလၢမၤဃန့ၤ,ဘၤၡၣ်ဒီဘ့ၣ်ညါ,ဘၤၡၣ်အစီၤပၤဧိာ်အဘီမုၢ်ဒီဘ့ၣ်ညါ,ဒီးယၤအံၢ်အဝ့ၢ်လၢအအိၣ်လၢဘၤၡၣ်အပူၤခဲလၢာ်,ဝ့ၢ်ဃုဆံလီၤ. 31ဒီးတခီကံးလဧး,ဒီးဧၤၡတြိး,ဒီးအ့ဒြံၤ,ဝ့ၢ်တဖၣ်အိၣ်လၢစီၤဧိာ်အဘီမုၢ်အပူၤလၢဘၤၡၣ်ဘၣ်ဃးဒီးစီၤမနၤရှ့ၤအဖိခွါစီၤမၤကံၢ်အဖိ,လၢစီၤမၤကံၢ်အဖိတခီဟံၣ်,ဒ်အဟံၣ်တဖၣ်အသိးန့ၣ်လီၤ. 32အဝဲန့ၣ်မ့ၢ်တၢ်လၢစီၤမိၤရှ့ဟ့ၣ်နီၤဖးလၢတၢ်န့ၢ်သါအဂီၢ်လၢမိၤအးအတၢ်ပျီပူၤလၢယၢ်ဒ့ၣ်ဝၢ်ဘးခီသဃီၤဒီးယရံၤဃိလၢမုၢ်ထီၣ်တခီလီၤ. 33မ့မ့ၢ်ပှၤလ့ၤဝံတဒူၣ်န့ၣ်စီၤမိၤရှ့တဟ့ၣ်လီၤဘၣ်အီၤလၢတၢ်န့ၢ်သါဘၣ်.ယွၤအံၣ်စရ့လးအကစၢ်မ့ၢ်အတၢ်န့ၢ်သါ,ဒ်အစံးဘၣ်အီၤအသိးန့ၣ်လီၤ.
Copyright information for
KswSKMB