Joshua 22
1တုၤနုၤတစုစီၤယိၤရှူကိးန့ၢ်ပှၤရူၤဘ့ၣ်ဖိဒီးပှၤကးဖိ,ဒီးပှၤမနၤရှ့ၤဖိတခီဒူၣ်, 2ဒီးစံးဘၣ်အီၤ,သုတိၢ်န့ၢ်လံကယဲၢ်တၢ်လၢယွၤအခ့အပှၤစီၤမိၤရှ့မၤလိာ်သုဒီးသုဒိကနၣ်လံယကလုၢ်လၢကယဲၢ်တၢ်လၢယမၤလိာ်သုလံ. 3အါနံၤအါသီတုၤမုၢ်မဆါတနံၤအံၤ,သုတလဲၤသဒၣ်ဘၣ်သုဒီပုၢ်ဝဲဘၣ်.သုတိၢ်န့ၢ်လံတၢ်ကွၢ်အလီၢ်ဘၣ်ဃးဒီးယွၤသုကစၢ်အတၢ်မၤလိာ်လီၤ. 4ဒီးခဲကနံၣ်အံၤယွၤသုကစၢ်ဟ့ၣ်လီၤလံတၢ်အိၣ်ဘှံးလၢသုဒီပုၢ်ဝဲၢ်လံ,ဒ်အကတိၤတၢ်ဒီးအီၤအသိးန့ၣ်လီၤ.ဒီးခဲကနံၣ်အံၤက့ၤက့ၤသုဝဲဆူသုဒဲပူၤ,ဆူသုကီၢ်လၢသုန့ၢ်ဘၣ်သါအီၤန့ၣ်လၢယွၤအခ့အပှၤစီၤမိၤရှ့ဟ့ၣ်လီၤသုလၢယၢ်ဒ့ၣ်ဝၢ်ဘးခီန့ၣ်တက့ၢ်. 5ဒီးပလီၢ်သုသးသပှၢ်တၢၢ်ဒ်သိးသုကတိၢ်န့ၢ်တၢ်မၤလိာ်သု,လၢသုကအဲၣ်ယွၤသုကစၢ်,ဒီးပိာ်အကျဲခဲလၢာ်,ဒီးတိၢ်န့ၢ်အတၢ်မၤလိာ်,ဒီးစဲဘူးဒီးအီၤ,ဒီးမၤအတၢ်လၢသုသူၣ်ကံၢ်သးလဲဒီးသုသးဒီဖျၢၣ်ညါန့ၣ်တက့ၢ်. 6ဒီးစီၤယိၤရှူဆိၣ်ဂ့ၤအီၤ,ဒီးပျၢ်အီၤ,ဒီးအဝဲသ့ၣ်က့ၤက့ၤဝဲဆူအဒဲတဖၣ်အပူၤလီၤ. 7ဒီးစီၤမိၤရှ့ဟ့ၣ်လီၤတၢ်လၢမနၤရှ့ၤတခီဒူၣ်လၢဘၤၡၣ်အပူၤ,ဒီးစီၤယိၤရှူဟ့ၣ်လီၤတၢ်လၢအဝဲတခီတဒူၣ်လၢယၢ်ဒ့ၣ်အအံၤတခီလၢမုၢ်နုာ်တခီလီၤ.တုၤစီၤယိၤရှူပျၢ်စ့ၢ်ကီးအီၤ,ဒ်သိးအကလဲၤဆူအဒဲပူၤဒီးဆိၣ်ဂ့ၤဆိၣ်ဝါအီၤလီၤ. 8ဒီးကတိၤတၢ်ဒီးအီၤ,ဒီးစံးဝဲဒၣ်က့ၤကဒါက့ၤဆူသုဒဲပူၤအိၣ်ဒီးတၢ်စုလီၢ်ခိၣ်ခိၣ်လၢအအါ,ဒီးဆၣ်ဖိကီၢ်ဖိအဒၢအါအါကလဲာ်,ဒီးကျိၣ်ဧိၤစ့ဧိၤ,ဒီးထူဧိၤလွဲဧိၤ,ဒီးတိၢ်ဧိၤပှာ်ဧိၤ,ဒီးထးဧိၤတြၤဧိၤ,ဒီးတၢ်အကူအသိးအါအါကလဲာ်တက့ၢ်.တၢ်ဂုာ်န့ၢ်လၢသုဒုၣ်သုဒါန့ၣ်နီၤဖးအီၤဒီးသုဒီပုၢ်ဝဲၢ်တဖၣ်န့ၣ်တက့ၢ်. 9ဒီးပှၤရူၤဘ့ၣ်ဖိ,ဒီးပှၤကးဖိ,ဒီးမနၤရှ့ၤတခီဒူၣ်န့ၣ်က့ၤကဒါက့ၤဝဲ,ဒီးဟးထီၣ်ဝဲလၢပှၤအံၣ်စရ့လးဖိအအိၣ်လၢၡံလိၤအပူၤလၢအအိၣ်လၢကီၢ်ကနၤဧၣ်အပူၤ,ဒ်သိးအကလဲၤထီၣ်ဆူကီၢ်ကံးလဧးအတၢ်န့ၢ်သါအဟီၣ်ခိၣ်လၢအန့ၢ်ဘၣ်ဝဲဖဲယွၤအထးခိၣ်လၢစီၤမိၤရှ့အစုပူၤန့ၣ်လီၤ. 10ဒီးတုၤအဟဲတုၤလၢယၢ်ဒ့ၣ်အနံၤလၢကီၢ်ကနၤဧၣ်အပူၤန့ၣ်ဒီး,ပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိတခီဒူၣ်န့ၣ်မၤထီၣ်တၢ်လုၢ်လီၢ်လၢယၢ်ဒ့ၣ်အနံၤ,တၢ်လုၢ်လီၢ်အိၣ်ဖျါဖးဒိၣ်တဖျၢၣ်လီၤ. 11ဒီးပှၤအံၣ်စရ့လးဖိနၢ်ဟူပှၤစံး,ကွၢ်ကွၢ်,ပှၤရူၤဘ့ၣ်ဖိဒီးပှၤကးဖိ,ဒီးပှၤမနၤရှ့ၤဖိတခီဒူၣ်န့ၣ်မၤထီၣ်လံတၢ်လုၢ်လီၢ်သဃီၤဒီးကီၢ်ကနၤဧၣ်အပူၤလၢယၢ်ဒ့ၣ်အနံၤဖဲပှၤအံၣ်စရ့လးဖိခီဂာ်တၢ်န့ၣ်လီၤ. 12ဒီးတုၤပှၤအံၣ်စရ့လးဖိနၢ်ဟူဝဲဒီးပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်န့ၣ်အိၣ်ဖှိၣ်ရိဖှိၣ်လၢၡံလိၤအပူၤဒ်သိးအကလဲၤဒုးသုးဒီးအီၤလီၤ. 13ဒီးပှၤအံၣ်စရ့လးမၢလီၤပှၤလုၢ်တၢ်အဒိၣ်စီၤအလၤဧစၢ်အဖိခွါစီၤဖံၤနဃၣ်တဂၤဆူပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိတခီဒူၣ်အအိၣ်လၢကီၢ်ကံးလဧးအပူၤ, 14ဒီးအိၣ်ဒီးအီၤလၢပဒိၣ်ဆံဆဲၣ်ဂၤတဟံၣ်အခိၣ်တဂၤ,တဟံၣ်အခိၣ်တဂၤလၢအံၣ်စရ့လးအဒူၣ်ခဲလၢာ်အကျါ,ဒီးတဂၤမ့ၢ်အပၢ်အဟံၣ်အခိၣ်,တဂၤမ့ၢ်အပၢ်အဟံၣ်အခိၣ်လၢအံၣ်စရ့လးအကထိတဖၣ်အကျါန့ၣ်စုာ်စုာ်လီၤ. 15ဒီးဟဲဝဲဆူပှၤရူၤဘ့ၣ်ဖိ,ပှၤကးဖိ,ပှၤမနၤရှ့ၤဖိတခီဒူၣ်အအိၣ်,ဆူကီၢ်ကံးလဧး,ဒီးကတိၤတၢ်ဒီးအီၤဒီးစံးဝဲဒၣ်, 16ယွၤအတၢ်အိၣ်ဖှိၣ်ခဲလၢာ်စံးဒ်အံၤ,တၢ်ကမၣ်လၢသုမၤကမၣ်ဘၣ်အံၣ်စရ့လးအကစၢ်အံၤမ့ၢ်ဒ်လဲၣ်.လၢသုဃၣ်သုသးလၢတၢ်ပိာ်ယွၤအကျဲလၢမုၢ်မဆါတနံၤအံၤ,လၢသုမၤထီၣ်တၢ်လုၢ်လီၢ်ဒ်သိးသုကပူထီၣ်ယွၤလၢမုၢ်အဆါတနံၤအံၤမးလဲၣ်. 17ပဧိၢ်အတၢ်အၢလၢပတကဆှီဒံးဘၣ်တုၤမုၢ်မဆါတနံၤအံၤမ့ၢ်ဆံးကဲၣ်ဆိးလၢပဂီၢ်စ့ၢ်ကီးဧါ,တၢ်သံသတြိာ်အိၣ်တ့ၢ်လၢယွၤအတၢ်အိၣ်ဖှိၣ်ဘၣ်ဆၣ်ဒီး, 18သုဘၣ်ဃၣ်ကွံာ်သုသးလၢတၢ်ပိာ်ယွၤအကျဲလၢမုၢ်မဆါတနံၤအံၤဧါ.ဒီးတၢ်ကမၤအသးလၢသုကပူထီၣ်ယွၤလၢမုၢ်မဆါတနံၤအံၤ,ဒီးခဲဂီၤတနံၤန့ၣ်ကသးထီၣ်ဘၣ်အံၣ်စရ့လးအတၢ်အိၣ်ဖှိၣ်ခဲလၢာ်လီၤ. 19ဘၣ်ဆၣ်ဒီးသုတၢ်ဟံးဃာ်အကီၢ်မ့ၢ်တကဆှီဘၣ်ဒီး,ခီဂာ်ဆူယွၤအတၢ်န့ၢ်သါအကီၢ်ပူၤ,ဖဲယွၤအအိၣ်အလီၢ်န့ၣ်အိၣ်ဝဲ,ဒီးမၤန့ၢ်တၢ်လၢပကျါတက့ၢ်.မ့မ့ၢ်မ်သုသုတပူထီၣ်ယွၤဒီးပူထီၣ်ပှၤ,လၢသုမၤတၢ်လုၢ်လီၢ်လၢယွၤပကစၢ်အတၢ်လုၢ်လီၢ်အမဲာ်ညါအဃိန့ၣ်တဂ့ၤ. 20စီၤစ့ရၤအဖိခွါစီၤဧၤကၣ်မၤကမၣ်တၢ်လၢတၢ်ဘၣ်ဆိၣ်အၢ,ဒီးတၢ်သးထီၣ်လီၤဘၣ်လၢအံၣ်စရ့လးအတၢ်အိၣ်ဖှိၣ်ခဲလၢာ်အလိၤတမ့ၢ်ဘၣ်ဧါ.ဒီးပှၤတဂၤန့ၣ်တဟးဂီၤဘၣ်တဂၤဃီလၢအတၢ်အၢအပူၤဘၣ်. 21ဒီးပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိတခီဒူၣ်စံးဆၢတၢ်,ဒီးစံးဘၣ်အံၣ်စရ့လးအထိတဖၣ်အခိၣ်တဖၣ်, 22ယွၤ,ကစၢ်တဖၣ်အကစၢ်,ယွၤ,ကစၢ်တဖၣ်အကစၢ်န့ၣ်သ့ၣ်ညါဝဲ,ဒီးအံၣ်စရ့လးကသ့ၣ်ညါဝဲလီၤ,မ့မ့ၢ်တၢ်ပူထီၣ်ဒီးတၢ်မၤကမၣ်ဘၣ်ယွၤဒီးအုၣ်က့ၤခီၣ်က့ၤပှၤလၢမုၢ်မဆါတနံၤအံၤတဂ့ၤ. 23ပမ့ၢ်မၤထီၣ်တၢ်လုၢ်လီၢ်အံၤဒ်သိးပကဃၣ်ပသးလၢတၢ်ပိာ်ယွၤအကျဲ,ဒ်သိးပကလုၢ်တၢ်လုၢ်မ့ၣ်အူမ့ၢ်ဂ့ၤ,တၢ်မၤဘူၣ်ကိၣ်မ့ၢ်ဂ့ၤ,လၢအဖီခိၣ်,ဒ်သိးပကလုၢ်တၢ်လုၢ်မၤဃူမၤဖိးလၢအဖီခိၣ်ဒီး,မ်ယွၤအကစၢ်ဒၣ်ဝဲဃုတၢ်တက့ၢ်. 24မ့ၢ်ပမၤလၢပဘၣ်ယိၣ်တၢ်အံၤအဃိ,ခဲကိာ်န့ၣ်သုဖိသုလံၤကကတိၤတၢ်ဒီးပဖိပလံၤ,ဒီးကစံး,သုဘၣ်ဃးဒီးယွၤအံၣ်စရ့လးအကစၢ်န့ၣ်ဒ်လဲၣ်. 25ဒီးယွၤပာ်ယၢ်ဒ့ၣ်လၢတၢ်အဃၢၤလၢသုဒီးပှၤအဘၢၣ်စၢၤ,ပှၤရူၤဘ့ၣ်ဖိ,ဒီးပှၤကးဖိသ့ၣ်ဧၢ,သုဂီၢ်တအိၣ်ဘၣ်လၢယွၤအပူၤဘၣ်လီၤ.ဒီးသုဖိသုလံၤတဒုးပျံၤလၢၤဘၣ်ပဖိပလံၤလၢယွၤဘၣ်. 26ဒီးပစံး,ကတဲာ်ကတီၤသကိးပသးတက့ၢ်.ဒ်သိးပကမၤထီၣ်တၢ်လုၢ်လီၢ်လၢတၢ်လုၢ်မ့ၣ်အူအဂီၢ်တမ့ၢ်ဘၣ်,လၢတၢ်လုၢ်အဂီၢ်တမ့ၢ်ဘၣ်. 27မ့ၢ်ဒ်သိးအကကဲထီၣ်တၢ်အုၣ်အသးလၢပဘၢၣ်စၢၤ,ဒီးသုဘၢၣ်စၢၤဒီးပစၢၤပသွဲၣ်လၢပလီၢ်ခံ,ဒ်သိးပကမၤယွၤအတၢ်လၢအမဲာ်ညါဒီးပတၢ်လုၢ်မ့ၣ်အူ,ဒီးပတၢ်လုၢ်,ဒီးပတၢ်မၤဃူမၤဖိး,ဒ်သိးခဲကိာ်န့ၣ်သုဖိသုလံၤအသုတစံးဘၣ်ပဖိပလံ,သုဂီၢ်တအိၣ်ဘၣ်လၢယွၤအပူၤဘၣ်န့ၣ်တဂ့ၤလီၤ. 28မၤသးဒ်န့ၣ်ဒီးပစံး,ခဲကိာ်န့ၣ်တုၤအကစံးတၢ်လၢပှၤမ့ၢ်ဂ့ၤ,ပစၢၤပသွဲၣ်မ့ၢ်ဂ့ၤဒီး,တၢ်ကမၤအသးလၢပကစံးပဝဲ,ကွၢ်ကွၢ်,ယွၤအတၢ်လုၢ်လီၢ်အဂီၢ်လၢပပၢ်တဖၣ်မၤဝဲလၢတၢ်လုၢ်မ့ၣ်အူအဂီၢ်တမ့ၢ်ဘၣ်,ဒီးလၢတၢ်လုၢ်တၢ်အဂီၢ်တမ့ၢ်ဘၣ်,မ့ၢ်တၢ်အုၣ်အသးလၢသုဒီးပှၤအဘၢၣ်စၢၤန့ၣ်လီၤ. 29လၢယွၤပကစၢ်အတၢ်လုၢ်လီၢ်လၢအအိၣ်ဝဲလၢအအိၣ်အဆိးအလီၢ်အဖီခိၣ်န့ၣ်တၢ်လုၢ်လီၢ်လၢတၢ်လုၢ်မ့ၣ်အူအဂီၢ်မ့ၢ်ဂ့ၤ,လၢတၢ်မၤဘူၣ်ကိၣ်အဂီၢ်မ့ၢ်ဂ့ၤ,လၢတၢ်လုၢ်အဂီၢ်မ့ၢ်ဂ့ၤ,မ်ပသုတမၤထီၣ်အီၤ,ဒီးပူထီၣ်ဘၣ်ယွၤဒီးဃၣ်ပသးလၢတၢ်ပိာ်ယွၤအကျဲလၢမုၢ်မဆါတနံၤအံၤတဂ့ၤ. 30ဒီးတုၤပှၤလုၢ်တၢ်အဒိၣ်,စီၤဖံၤနဃၣ်,ဒီးတၢ်အိၣ်ဖှိၣ်အပဒိၣ်,ဒီးအံၣ်စရ့လးအခိၣ်တဖၣ်လၢအအိၣ်ဒီးအီၤသ့ၣ်တဖၣ်န့ၣ်နၢ်ဟူတၢ်ကတိၤလၢပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိကတိၤဝဲန့ၣ်ဒီး,ဂ့ၤဝဲလၢအမဲာ်လီၤ. 31ဒီးပှၤလုၢ်တၢ်အဒိၣ်စီၤအလၤဧစၢ်အဖိခွါစီၤဖံၤနဃၣ်န့ၣ်စံးဘၣ်ပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိ,တၢ်လၢမုၢ်မဆါတနံၤအံၤပသ့ၣ်ညါလၢယွၤအိၣ်ဝဲလၢပကျါလီၤ.အဂ့ၢ်ဒ်အံၤ,သုတမၤကမၣ်ဘၣ်ယွၤလၢတၢ်ကမၣ်အံၤဘၣ်.မ့ၢ်သုမၤပူၤမၤဖျဲးလံပှၤအံၣ်စရ့လးဖိလၢယွၤအစုပူၤလံ. 32ဒီးပှၤလုၢ်တၢ်အဒိၣ်စီၤအလၤဧစၢ်အဖိခွါစီၤဖံၤနဃၣ်,ဒီးပဒိၣ်သ့ၣ်တဖၣ်န့ၣ်က့ၤကဒါက့ၤလၢပှၤရူၤဘ့ၣ်ဖိဒီးပှၤကးဖိအအိၣ်,လၢကီၢ်ကံးလဧးအပူၤဆူကီၢ်ကနၤဧၣ်အပူၤ,ဆူပှၤအံၣ်စရ့လးဖိအအိၣ်,ဒီးက့ၤစိာ်အီၤလၢတၢ်ကတိၤန့ၣ်လီၤ. 33ဒီးဂ့ၤဝဲလၢပှၤအံၣ်စရ့လးဖိအမဲာ်,ဒီးပှၤအံၣ်စရ့လးဖိစံးထီၣ်ပတြၢၤယွၤ,ဒီးတစံးလၢၤဘၣ်လၢအကလဲၤဒုးသုးဒ်သိးအကမၤဟးဂီၤထံဧိၤကီၢ်ဧိၤဖဲပှၤရူၤဘ့ၣ်ဖိဒီးပှၤကးဖိ,အိၣ်ဝဲဆိးဝဲလၢအပူၤဘၣ်. 34ဒီးပှၤရူၤဘ့ၣ်ဖိဒီးပှၤကးဖိယုၢ်တၢ်လုၢ်လီၢ်အမံၤလၢဧ့ဒးလီၤ.အဂ့ၢ်ဒ်အံၤ,မ့ၢ်တၢ်အုၣ်အသးလၢပဘၢၣ်စၢၤလၢယွၤမ့ၢ်ပကစၢ်လီၤ.
Copyright information for
KswSKMB