Jos 23 | KswSKMB | STEP | ဒီးယွၤဒုးအိၣ်ဘှံးအံၣ်စရ့လးလၢအဒုၣ်အဒါအိၣ်ဝးတရံးအီၤအလီၢ်ခံအါနံၤအါသီဒီး,တၢ်မၤအသးလၢစီၤယိၤရှူအသးပှၢ်တ့ၢ်,ဒီးလဲၤနုာ်တ့ၢ်လၢမုၢ်နံၤတဖၣ်အကျါလီၤ.

‏ Joshua 23

1 ဒီးယွၤဒုးအိၣ်ဘှံးအံၣ်စရ့လးလၢအဒုၣ်အဒါအိၣ်ဝးတရံးအီၤအလီၢ်ခံအါနံၤအါသီဒီး,တၢ်မၤအသးလၢစီၤယိၤရှူအသးပှၢ်တ့ၢ်,ဒီးလဲၤနုာ်တ့ၢ်လၢမုၢ်နံၤတဖၣ်အကျါလီၤ. 2 ဒီးစီၤယိၤရှူကိးန့ၢ်အံၣ်စရ့လးခဲလၢာ်,အပှၤသူၣ်က့သးပှၢ်,ဒီးအခိၣ်တဖၣ်,ဒီးအပှၤစံၣ်ညီၣ်ကွီၢ်,ဒီးအပှၤကွဲးလံာ်,ဒီးစံးဘၣ်အီၤ,ယသးပှၢ်တ့ၢ်လံ.ယလဲၤနုာ်လံလၢမုၢ်နံၤတဖၣ်အကျါလံ. 3 ဒီးသုထံၣ်ဘၣ်လံကယဲၢ်တၢ်လၢယွၤမၤပှၤအကလုာ်တဖၣ်အံၤလၢသုဃိလံ.အဂ့ၢ်ဒ်အံၤ,ယွၤသုကစၢ်မ့ၢ်ပှၤလၢအဒုးတၢ်လၢသုဂီၢ်လီၤ.

4 ကွၢ်ကွၢ်,ဖးတၢ်သတးဒီးယနီၤဖးလံပှၤကလုာ်တဖၣ်လၢအအိၣ်လီၤတဲာ်လၢတၢ်န့ၢ်သါလၢသုဒူၣ်တဖၣ်အဂီၢ်,လၢယၢ်ဒ့ၣ်ဒီးကယဲၢ်ပှၤကလုာ်ခဲလၢာ်လၢယဒီၣ်တဲာ်ကွံာ်အီၤပၢၢ်လၢပီၣ်လဲၣ်ဖးဒိၣ်လၢမုၢ်နုာ်တခီလံ. 5 ဒီးယွၤသုကစၢ်န့ၣ်ကဒုးဃ့ၢ်ထီၣ်ကွံာ်အီၤလၢသုမဲာ်ညါ,ဒီးဟီထီၣ်ကွံာ်အီၤလၢသုမဲာ်ညါ,ဒီးသုကန့ၢ်ဘၣ်သါအကီၢ်,ဒ်ယွၤသုကစၢ်ကတိၤတၢ်အသိးန့ၣ်လီၤ. 6 ဒီးပာ်ဆူၣ်သုသးသပှၢ်တၢၢ်,ဒ်သိးသုကတိၢ်န့ၢ်,ဒီးမၤကယဲၢ်တၢ်ကွဲးအသးလၢလံာ်စီၤမိၤရှ့အတၢ်သိၣ်တၢ်သီအပူၤ,ဒ်သိးဆူစုထွဲမ့ၢ်ဂ့ၤ,ဆူစုစ့ၣ်မ့ၢ်ဂ့ၤ,သုသုတဃၣ်ကပၤလၢအီၤတဂ့ၤ, 7 ဒ်သိးသုသုတလဲၤလၢပှၤကလုာ်လၢအအိၣ်လီၤတဲာ်တဖၣ်အကျါ,ဒီးသုသုတပှ့ၤဘၣ်အကစၢ်တဖၣ်အမံၤ,ဒီးသုသုတဒုးဆိၣ်တၢ်လၢအမဲာ်ညါ,သုသုတမၤအတၢ်,ဒီးသုသုတဘူၣ်ထီၣ်ဘါအီၤန့ၣ်တဂ့ၤလီၤ. 8 မ့မ့ၢ်သုဘၣ်စဲဘူဒီးယွၤသုကစၢ်,ဒ်သုမၤတုၤမုၢ်မဆါတနံၤအံၤအသိးန့ၣ်လီၤ.

9 ဒီးယွၤဟီထီၣ်ကွံာ်ပှၤကလုာ်တဖၣ်ဒိၣ်ဝဲဒီးဆူၣ်ဝဲ,လၢသုမဲာ်ညါလီၤ.မ့မ့ၢ်သုဝဲသ့ၣ်တဖၣ်အံၤပှၤကညီဆၢထၢၣ်လၢသုမဲာ်ညါသ့တအိၣ်ဘၣ်နီတဂၤဘၣ်တုၤမုၢ်မဆါတနံၤအံၤလီၤ. 10 ပှၤလၢသုကျါတဂၤကဒုးဃ့ၢ်ပှၤတကထိလီၤ.အဂ့ၢ်ဒ်အံၤ,ယွၤသုကစၢ်န့ၣ်မ့ၢ်ပှၤလၢအဒုးတၢ်လၢသုဂီၢ်,ဒ်အကတိၤတၢ်အသိးန့ၣ်လီၤ.

11 ပလီၢ်သုသးသပှၢ်တၢၢ်ဒ်သိးသုကအဲၣ်ယွၤသုကစၢ်တက့ၢ်. 12 မ့မ့ၢ်သုမ့ၢ်က့ၤကဒါက့ၤ,ဒီးစဲဘူးဒီးပှၤကလုာ်တဖၣ်လၢအအိၣ်လီၤတဲာ်လၢသုကျါ,ဒီးဖျီလိာ်သုသးဒီးအီၤ,ဒီးလဲၤနုာ်ဆူအအိၣ်,ဒီးအဝဲသ့ၣ်တဖၣ်န့ၣ်ဟဲနုာ်ဆူသုအိၣ်ဒီး, 13 သ့ၣ်ညါသပှၢ်တၢၢ်လၢယွၤသုကစၢ်တဟီထီၣ်ကွံာ်လၢၤဘၣ်ပှၤကလုာ်တဖၣ်န့ၣ်လၢသုမဲာ်ညါဘၣ်,ဒီးအဝဲသ့ၣ်ကကဲထီၣ်ပျံၤသကွီၤ,ဒီးထုဧိၤဃ့ဧိၤလၢသုဂီၢ်,ဒီးနီၣ်ဖျ့လၢသုကပၤအလိၤ,ဒီးတၤဆှုၣ်တၤမဲလၢသုမဲာ်အပူၤတုၤသုတုၤလၢတၢ်ဟးဂူာ်ဟးဂီၤလၢကီၢ်ဂ့ၤတဘ့ၣ်အံၤအပူၤလၢယွၤသုကစၢ်ဟ့ၣ်လီၤတ့ၢ်သုလီၤ.

14 ဒီးကွၢ်ကွၢ်,လၢမုၢ်မဆါတနံၤအံၤယပိာ်ပှၤဟီၣ်ခိၣ်ဖိခဲလၢာ်အကျါ,ဒီးသုသ့ၣ်ညါလၢသုသးခဲလၢာ်,ဒီးလၢသုသူၣ်ကံၢ်သးလဲအပူၤခဲလၢာ်,လၢတၢ်တဟါမၢ်ဘၣ်နီတမံၤလၢကယဲၢ်တၢ်ဂ့ၤလၢယွၤသုကစၢ်ကတိၤတၢ်လၢသုဂ့ၢ်သုကျိၤန့ၣ်ဘၣ်.တၢ်မၤအသးလၢသုဂီၢ်ခဲလၢာ်လီၤ.တၢ်တဟါမၢ်ဘၣ်လၢအကျါနီတမံၤဘၣ်.

15 ဒီးဒ်ယွၤဒုးမၤအသးလၢသုဂီၢ်လၢကယဲၢ်တၢ်အဂ့ၤလၢယွၤသုကစၢ်ကတိၤတၢ်ဒီးသုအသိးန့ၣ်,တၢ်ကမၤအသးလၢယွၤကဒုးမၤအသးလၢသုဂီၢ်လၢကယဲၢ်တၢ်အၢတုၤအမၤဟးဂီၤကွံာ်သုလၢကီၢ်ဂ့ၤတဘ့ၣ်အံၤအပူၤလၢယွၤသုကစၢ်ဟ့ၣ်လီၤတ့ၢ်သုဒ်န့ၣ်အသိးလီၤ.

16 တုၤသုလုၣ်သ့ၣ်ခါပတာ်ယွၤသုကစၢ်အတၢ်အၢၣ်လီၤအီလီၤလၢအမၤလိာ်သု,ဒီးလဲၤမၤကစၢ်အဂၤတဖၣ်အတၢ်,ဒီးဘူၣ်ထီၣ်ဘါထီၣ်အီၤဒီး,ယွၤအသးထီၣ်ကကဲၤထီၣ်ဘၣ်ဖုးသု,ဒီးသုကဟးဂီၤကွံာ်ချ့သဒံးလၢကီၢ်ဂ့ၤတဘ့ၣ်အံၤအပူၤလၢအဟ့ၣ်လီၤတ့ၢ်သုလီၤ.