Jos 3 | KswSKMB | STEP | ဒီးမုၢ်ဆ့ၣ်ထီၣ်န့ၣ်စီၤယိၤရှူဂဲၤဆၢထၢၣ်ဂီၤဂီၤ,ဒီးဟးဝဲလၢၡံးတံၣ်,ဒီးဟဲဝဲဆူယၢ်ဒ့ၣ်အနံၤ,အဝဲဒၣ်ဒီးပှၤအံၣ်စရ့လးဖိခဲလၢာ်,ဒီးအိၣ်ဝဲဖဲန့ၣ်သီတနၤကျၢၤလၢအတချုးခီဂာ်ဒံးဘၣ်လီၤ.

‏ Joshua 3

1 ဒီးမုၢ်ဆ့ၣ်ထီၣ်န့ၣ်စီၤယိၤရှူဂဲၤဆၢထၢၣ်ဂီၤဂီၤ,ဒီးဟးဝဲလၢၡံးတံၣ်,ဒီးဟဲဝဲဆူယၢ်ဒ့ၣ်အနံၤ,အဝဲဒၣ်ဒီးပှၤအံၣ်စရ့လးဖိခဲလၢာ်,ဒီးအိၣ်ဝဲဖဲန့ၣ်သီတနၤကျၢၤလၢအတချုးခီဂာ်ဒံးဘၣ်လီၤ.

2 ဒီးလၢသၢနံၤအလီၢ်ခံန့ၣ်တၢ်မၤအသးလၢပှၤကွဲးလံာ်တဖၣ်လဲၤခီဂာ်ပှၤသူၣ်ဒဲအလီၢ်န့ၣ်လီၤ. 3 ဒီးမၤလိာ်ပှၤဂီၢ်မုၢ်ဒီးစံးဝဲဒၣ်,တုၤသုထံၣ်ဘၣ်ယွၤသုကစၢ်အတၢ်အၢၣ်လီၤအီလီၤအတလါ,ဒီးပှၤလုၢ်တၢ်အဒိၣ်ဒီးပှၤလ့ၤဝံဖိတဖၣ်စိာ်အီၤဒီး,သုဘၣ်ဟးလၢသုလီၢ်,ဒီးလဲၤပိာ်အခံလီၤ. 4 ဘၣ်ဆၣ်ဒီးတၢ်အဘၢၣ်စၢၤဘၣ်အိၣ်လၢသုဒီးအဝဲန့ၣ်အဘၢၣ်စၢၤလီၤ.ထိၣ်ဝဲသတးဒီး,ဘၣ်အိၣ်အပျၢ်ခံကထိဃၣ်ဃၣ်လီၤ.သုဘူးသုသးဆူအအိၣ်တဂ့ၤ.ဒ်သိးသုကသ့ၣ်ညါကျဲလၢသုဘၣ်လဲၤအဂ့ၢ်လီၤ.အဂ့ၢ်ဒ်အံၤ,သုတပိာ်ဘၣ်ကျဲအံၤလၢထံးလၢမကိာ်ဘၣ်.

5 ဒီးစီၤယိၤရှူစံးဘၣ်ပှၤဂီၢ်မုၢ်,မၤစီဆှံလီၤသုသးတက့ၢ်အဂ့ၢ်ဒ်အံၤ,ယွၤကမၤတၢ်လီၤလးတဖၣ်လၢသုကျါခဲဂီၤကိာ်န့ၣ်လီၤ.

6 ဒီးစီၤယိၤရှူကတိၤတၢ်ဒီးပှၤလုၢ်တၢ်အဒိၣ်,ဒီးစံးဝဲဒၣ်,ဟံးထီၣ်တၢ်အၢၣ်လီၤအီလီၤအတလါ,ဒီးခီဂာ်တၢ်လၢပှၤဂီၢ်မုၢ်အမဲာ်ညါတက့ၢ်.ဒီးအဝဲသ့ၣ်ဟံးထီၣ်တၢ်အၢၣ်လီၤအီလီၤအတလါ,ဒီးလဲၤဝဲလၢပှၤဂီၢ်မုၢ်အမဲာ်ညါလီၤ.

7 ဒီးယွၤစံးဘၣ်စီၤယိၤရှူ,တၢ်လၢမုၢ်မဆါတနံၤအံၤယကပာ်ဒိၣ်သီနၤလၢအံၣ်စရ့လးအမဲာ်ညါ,ဒ်သိးအဝဲသ့ၣ်ကသ့ၣ်ညါဒ်ယအိၣ်ဒီးစီၤမိၤရှ့အသိးန့ၣ်ယကအိၣ်ဒီးနၤလီၤ. 8 ဒီးနဘၣ်မၤလိာ်ပှၤလုၢ်တၢ်အဒိၣ်လၢအစိာ်တၢ်အၢၣ်လီၤအီလီၤအတလါ,ဒီးစံး,တုၤသုလဲၤတုၤလၢယၢ်ဒ့ၣ်အထံနံၤဒီး,သုဘၣ်ဆၢထၢၣ်အိၣ်ထူၣ်ကလာ်လၢယၢ်ဒ့ၣ်အပူၤလီၤ.

9 ဒီးယိၤရှူစံးဘၣ်ပှၤအံၣ်စရ့လးဖိ,ဟဲဖဲအံၤ,ဒီးကနၣ်ယွၤသုကစၢ်အကလုၢ်ကထါန့ၣ်တက့ၢ်. 10 ဒီးစီၤယိၤရှူစံးဝဲဒၣ်,လၢတၢ်အံၤသုကသ့ၣ်ညါလၢကစၢ်မူအိၣ်ဝဲလၢသုကျါ,ဒီးလၢသုမဲာ်ညါန့ၣ်ကဟီထီၣ်ကွံာ်သပှၢ်တၢၢ်ပှၤကနၤဧၣ်ဖိ,ဒီးပှၤဃ့ၤသးဖိ,ဒီးပှၤဃံၤဝံဖိ,ဒီးပှၤပရးစၤဖိ,ဒီးပှၤကံၢ်ကၣ်ဖိ,ဒီးပှၤအမိၢ်ဖိ,ဒီးပှၤယဘူၣ်ဖိန့ၣ်လီၤ.

11 ကွၢ်ကွၢ်,ဟီၣ်ခိၣ်ဒီဘ့ၣ်ညါအကစၢ်အတၢ်အၢၣ်လီၤအီလီၤအတလါန့ၣ်လဲၤခီဂာ်တၢ်လၢသုမဲာ်ညါဆူယၢ်ဒ့ၣ်အပူၤလီၤ. 12 ဒီးခဲကနံၣ်အံၤဟံးန့ၢ်ပှၤတဆံခံဂၤလၢပှၤအံၣ်စရ့လးဖိအဒူၣ်တဖၣ်အကျါတဒူၣ်တဂၤတဒူၣ်တဂၤန့ၣ်တက့ၢ်. 13 ဒီးတုၤပှၤလုၢ်တၢ်အဒိၣ်လၢအစိာ်ယွၤ,ဟီၣ်ခိၣ်ဒီဘ့ၣ်ညါအကစၢ်,အတလါန့ၣ်အခီၣ်ညါသးအိၣ်ဘှံးဝဲလၢယၢ်ဒ့ၣ်အထံပူၤဒီး,တၢ်ကမၤအသးလၢယၢ်ဒ့ၣ်အထံကဒီၣ်တဲာ်ကွံာ်အသးဒီးထံလၢအဟဲလီၤလၢထးခီ,ဒီးကအိၣ်ဆၢထၢၣ်တပူဒၣ်လီၤ.

14 ဒီးတုၤပှၤဂီၢ်မုၢ်ဟးထီၣ်ကွံာ်လၢအဒဲပူၤဒ်သိးအကခီဂာ်ယၢ်ဒ့ၣ်,ဒီးပှၤလုၢ်တၢ်အဒိၣ်စိာ်တၢ်အၢၣ်လီၤအီလီၤအတလါလၢပှၤဂီၢ်မုၢ်အမဲာ်ညါ, 15 ဒီးတုၤပှၤလၢအစိာ်တလါအခီၣ်တဖၣ်လီၤဘျၢလၢထံကျါဒီး,(အဂ့ၢ်ဒ်အံၤ,လၢကူးဘုအကတီၢ်န့ၣ်ယၢ်ဒ့ၣ်အထံလုၣ်ဘၢအနံၤခဲလၢာ်), 16 ထံလၢအဟဲလီၤန့ၣ်ဆၢထၢၣ်ဝဲလၢတၢ်တပူအိၣ်ဝဲယံၤယံၤကလဲာ်ဖဲဝ့ၢ်အၤဒၣ်လၢအအိၣ်ဘူးဒီးစၤရတၣ်,ဒီးထံလၢအလဲၤလီၤဆူတၢ်ပျီပူၤအပီၣ်လဲၣ်,ပီၣ်လဲၣ်အံသၣ်န့ၣ်,လၢာ်ကွံာ်ဝဲဒီးဒီၣ်တဲာ်ကွံာ်အသး,ဒီးပှၤဂီၢ်မုၢ်ခီဂာ်တၢ်သဃီၤဒီးယရံၤဃိလီၤ.

17 ဒီးပှၤလုၢ်တၢ်အဒိၣ်လၢအစိာ်ယွၤအတၢ်အၢၣ်လီၤအီလီၤအတလါန့ၣ်ဆၢထၢၣ်အိၣ်ကျၢၤဝဲလၢခိလၢယၢ်ဒ့ၣ်အသးကံၢ်ပူၤ,ဒီးအံၣ်စရ့လးခဲလၢာ်ခီဂာ်တၢ်လၢခိလီၤ.ဒီးပှၤဂီၢ်မုၢ်ခီဂာ်ယၢ်ဒ့ၣ်တုၤအလၢာ်လီၤ.