Joshua 4
1ဒီးတုၤပှၤဂီၢ်မုၢ်ခီဂာ်ယၢ်ဒ့ၣ်တုၤအလၢာ်ဒီး,တၢ်မၤအသးလၢယွၤကတိၤတၢ်ဒီးစီၤယိၤရှူဒီးစံးဝဲဒၣ်, 2ဟံးန့ၢ်ပှၤတဆံခံဂၤလၢပှၤဂီၢ်မုၢ်အကျါ,တဒူၣ်တဂၤ,တဒူၣ်တဂၤန့ၣ်တက့ၢ်, 3ဒီးမၤလိာ်အီၤ,ဒီးစံး,ဟံးထီၣ်လၢၢ်တဆံခံဖျၢၣ်လၢယၢ်ဒ့ၣ်အပူၤ,လၢအလီၢ်ဖဲပှၤလုၢ်တၢ်အဒိၣ်အခီၣ်တဖၣ်ဆၢထၢၣ်အိၣ်ကျၢၤန့ၣ်တက့ၢ်,ဒီးသုဘၣ်စိာ်ကွံာ်အီၤဒီးသု,ဒီးပာ်လီၤတဲာ်အီၤလၢတၢ်မံအလီၢ်ပူၤဖဲသုကမံခဲမုၢ်နၤအံၤလီၤ. 4ဒီးစီၤယိၤရှူကိးန့ၢ်ပှၤတဆံခံဂၤလၢအကတဲာ်ကတီၤအီၤလၢပှၤအံၣ်စရ့လးဖိအကျါတဒူၣ်တဂၤ,တဒူၣ်တဂၤ, 5ဒီးစီၤယိၤရှူစံးဘၣ်အီၤ,ခီဂာ်တၢ်လၢယွၤသုကစၢ်အတလါအမဲာ်ညါလၢယၢ်ဒ့ၣ်အသးကံၢ်ပူၤ,ဒီးဟံးထီၣ်လၢၢ်တဂၤတဖျၢၣ်,တဂၤတဖျၢၣ်ဒီးစိာ်လၢသုဖံဘၣ်ခိၣ်,ဒ်ပှၤအံၣ်စရ့လးဖိအဒူၣ်အတၢ်ဂံၢ်အသိးန့ၣ်တက့ၢ်, 6ဒ်သိးတၢ်အံၤကကဲထီၣ်တၢ်ပနီၣ်လၢသုကျါ,ဒ်သိးတုၤသုဖိသုလံၤသံကွၢ်တၢ်ခဲကိာ်,ဒီးစံး,လၢၢ်တဖၣ်အံၤမ့ၢ်ဒ်လဲၣ်န့ၣ်ဒီး, 7သုကစံးဆၢအီၤ,ယၢ်ဒ့ၣ်အထံဒီၣ်တဲာ်ကွံာ်အသးလၢယွၤအတၢ်အၢၣ်လီၤအီလီၤအတလါအမဲာ်ညါ,တုၤအခီဂာ်ယၢ်ဒ့ၣ်ဒီး,ယၢ်ဒ့ၣ်အထံဒီၣ်တဲာ်ကွံာ်အသးလီၤ.ဒီးလၢၢ်တဖၣ်အံၤကကဲထီၣ်နီၣ်သ့ၣ်နီၣ်ထီၣ်က့ၤလၢပှၤအံၣ်စရ့လးဖိအဂီၢ်လီၤထူလီၤယိာ်လီၤ. 8ဒီးပှၤအံၣ်စရ့လးဖိမၤဝဲဒ်စီၤယိၤရှူမၤလိာ်တၢ်အသိး,ဒီးဟံးထီၣ်လၢၢ်တဆံခံဖျၢၣ်လၢယၢ်ဒ့ၣ်အသးကံၢ်ပူၤ,ဒ်ယွၤကတိၤတၢ်ဒီးစီၤယိၤရှူအသိး,ဒ်ပှၤအံၣ်စရ့လးဖိအဒူၣ်တဖၣ်အတၢ်ဂံၢ်အသိး,ဒီးစိာ်ခီဂာ်အီၤလၢအသိးဆူတၢ်အလီၢ်ဖဲအမံ,ဒီးပာ်လီၤဝဲဖဲန့ၣ်လီၤ. 9ဒီးစီၤယိၤရှူပာ်လၢၢ်ထူၣ်ကလာ်တဆံခံဖျၢၣ်လၢယၢ်ဒ့ၣ်အသးကံၢ်ပူၤဖဲအလီၢ်လၢပှၤလုၢ်တၢ်အဒိၣ်လၢအစိာ်တၢ်အၢၣ်လီၤအီလီၤအတလါအခီၣ်ဆၢထၢၣ်,ဒီးအိၣ်ဝဲဖဲန့ၣ်တုၤမုၢ်မဆါတနံၤအံၤလီၤ. 10အဂ့ၢ်ဒ်အံၤ,ပှၤလုၢ်တၢ်အဒိၣ်လၢအစိာ်တလါန့ၣ်ဆၢထၢၣ်လၢယၢ်ဒ့ၣ်အသးကံၢ်ပူၤတုၤပှၤမၤဝံၤကယဲၢ်တၢ်လၢယွၤမၤလိာ်စီၤယိၤရှူစံးဘၣ်ပှၤဂီၢ်မုၢ်,ဒ်ကယဲၢ်တၢ်လၢစီၤမိၤရှ့မၤလိာ်စီၤယိၤရှူအသိးန့ၣ်,ဒီးပှၤဂီၢ်မုၢ်မၤချ့ချ့,ဒီးခီဂာ်တၢ်လီၤ. 11ဒီးတုၤပှၤဂီၢ်မုၢ်ခီဂာ်ကွံာ်တုၤအလၢာ်ဒီး,တၢ်မၤအသးလၢယွၤအတလါ,ဒီးပှၤလုၢ်တၢ်အဒိၣ်တဖၣ်ခီဂာ်တၢ်လၢပှၤဂီၢ်မုၢ်အမဲာ်ညါန့ၣ်လီၤ. 12ဒီးပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိတခီဒူၣ်ခီဂာ်တၢ်အိၣ်ဒီးအစုကဝဲၤလၢပှၤအံၣ်စရ့လးဖိအမဲာ်ညါ,ဒ်စီၤမိၤရှ့ကတိၤတၢ်ဒီးအီၤအသိးန့ၣ်လီၤ. 13ပှၤလွံၢ်ကလးဃၣ်ဃၣ်ကတဲာ်ကတီၤအသးလၢတၢ်ဒုးသုးအဂီၢ်န့ၣ်ခီဂာ်တၢ်လၢယွၤအမဲာ်ညါဆူတၢ်ဒုးသုးအပူၤလၢယရံၤဃိအပျီန့ၣ်လီၤ. 14တၢ်လၢမုၢ်တနံၤန့ၣ်ယွၤပာ်ဒိၣ်စီၤယိၤရှူလၢအံၣ်စရ့လးခဲလၢာ်အမဲာ်ညါ,ဒီးအဝဲသ့ၣ်ပျံၤအီၤ,ဒ်အပျံၤစီၤမိၤရှ့အသိးန့ၣ်တစိၤဒၣ်အီၤလီၤ. 15ဒီးယွၤကတိၤတၢ်ဒီးစီၤယိၤရှူ,ဒီးစံးဝဲဒၣ်, 16မၤလိာ်ပှၤလုၢ်တၢ်အဒိၣ်လၢအစိာ်တၢ်အၢၣ်လီၤအီလီၤအတလါန့ၣ်ဒ်သိးအကဟဲထီၣ်လၢယၢ်ဒ့ၣ်အပူၤန့ၣ်တက့ၢ်. 17ဒီးစီၤယိၤရှူမၤလိာ်ပှၤလုၢ်တၢ်အဒိၣ်တဖၣ်န့ၣ်,ဒီးစံးဝဲဒၣ်,ဟဲထီၣ်လၢယၢ်ဒ့ၣ်အပူၤန့ၣ်တက့ၢ်. 18ဒီးတုၤပှၤလုၢ်တၢ်အဒိၣ်လၢအစိာ်ယွၤအတၢ်အၢၣ်လီၤအီလီၤအတလါဟဲထီၣ်လၢယၢ်ဒ့ၣ်အသးကံၢ်ပူၤဝံၤဒီး,ပှၤလုၢ်တၢ်အဒိၣ်အခီၣ်ညါသးခါထီၣ်လၢခိဒီး,တၢ်မၤအသးလၢယၢ်ဒ့ၣ်အထံဟဲက့ၤလီၤဆူအလီၢ်,ဒီးလုၣ်ဘၢထံနံၤဒ်လၢထံးလၢမကိာ်အသိးန့ၣ်လီၤ. 19ဒီးလၢလါခီၣ်ထံး,လါထီၣ်ဆံဆဲၣ်နံၤတနံၤန့ၣ်ပှၤဂီၢ်မုၢ်ဟဲထီၣ်လၢယၢ်ဒ့ၣ်အပူၤ,ဒီးသူၣ်ဒဲလၢကံးလကၤလးအပူၤလၢယရံၤဃိအဃၢၤလၢမုၢ်ထီၣ်တခီလီၤ. 20ဒီးလၢၢ်တဆံခံဖျၢၣ်လၢအဟံးထီၣ်လၢယၢ်ဒ့ၣ်အပူၤန့ၣ်စီၤယိၤရှူပာ်ဝဲလၢကံးလကၤလးအပူၤလီၤ. 21ဒီးကတိၤတၢ်ဒီးပှၤအံၣ်စရ့လးဖိဒီးစံးဝဲဒၣ်,တုၤသုဖိသုလံၤကသံကွၢ်အပၢ်ခဲကိာ်ဒီးစံး,လၢၢ်တဖၣ်အံၤမ့ၢ်ဒ်လဲၣ်န့ၣ်ဒီး, 22သုဘၣ်ဘိးဘၣ်သ့ၣ်ညါသုဖိသုလံၤ,ဒီးစံး,အံၣ်စရ့လးဟဲခီဂာ်ယၢ်ဒ့ၣ်အံၤလၢခိလီၤ. 23အဂ့ၢ်ဒ်အံၤ,ယွၤသုကစၢ်မၤလီၤသံးကွံာ်ယၢ်ဒ့ၣ်အထံလၢသုမဲာ်ညါတုၤသုခီဂာ်တၢ်,ဒ်ယွၤသုကစၢ်မၤပီၣ်လဲၣ်ဆှဲအသိးန့ၣ်,လၢအမၤလီၤသံးကွံာ်လၢပမဲာ်ညါတုၤပခီဂာ်ကွံာ်, 24ဒ်သိးပှၤဟီၣ်ခိၣ်ဖိခဲလၢာ်ကသ့ၣ်ညါယွၤအစုအဂ့ၢ်အကျိၤ,လၢအဆူၣ်ဝဲ,ဒ်သိးသုကပျံၤယွၤသုကစၢ်ကိးမုၢ်နံၤမုၢ်နၤဒဲးလီၤ.
Copyright information for
KswSKMB