Joshua 1
1ဒီးယွၤအခ့အပှၤစီၤမိၤရှ့သံဝဲအလီၢ်ခံန့ၣ်,တၢ်မၤအသးလၢယွၤကတိၤတၢ်ဒီးစီၤမိၤရှ့အခ့အပှၤစီၤနိၣ်အဖိခွါစီၤယိၤရှူ,ဒီးစံးဝဲဒၣ်, 2ယခ့ယပှၤစီၤမိၤရှ့သံလံဝဲလံ,ဒီးခဲကနံၣ်အံၤဂဲၤဆၢထၢၣ်လဲၤခီဂာ်ယၢ်ဒ့ၣ်အံၤ,နဲဒၣ်,ဒီးပှၤဂီၢ်မုၢ်ခဲလၢာ်အံၤဆူကီၢ်လၢယဟ့ၣ်လီၤလၢအီၤ,လၢပှၤအံၣ်စရ့လးဖိန့ၣ်တက့ၢ်. 3ကယဲၢ်တၢ်အလီၢ်ဖဲသုခီၣ်ညါသးယီၢ်အီၤတပူၤလၢ်လၢ်န့ၣ်ယဟ့ၣ်သု,ဒ်ယစံးဘၣ်စီၤမိၤရှ့အသိးန့ၣ်လီၤ. 4လၢပှၢ်မုၢ်ကနၢဒီးလဘၤနိၣ်အံၤတုၤလၢထံမိၢ်ပှၢ်ဖးဒိၣ်ဖရၤသး,ပှၤဃ့ၤသးဖိအကီၢ်ဒီဘ့ၣ်ညါ,ဒီးတုၤလၢပီၣ်လဲၣ်ဖးဒိၣ်လၢမုၢ်နုာ်တခီန့ၣ်ကကဲထီၣ်သုကီၢ်အဃၢၤတဖၣ်န့ၣ်လီၤ. 5ပှၤဆၢထၢၣ်လၢနမဲာ်ညါသ့တအိၣ်ဘၣ်နီတဂၤတစိၤဒၣ်နၤဘၣ်.ဒ်ယအိၣ်ဒီးစီၤမိၤရှ့အသိးန့ၣ်ယကအိၣ်ဒီးနၤလီၤ.ယတလီၤစၢ်ဘၣ်လၢနဂီၢ်ဘၣ်,ယတလဲၤသဒၣ်ဘၣ်နၤဘၣ်. 6ပာ်ဆူၣ်နသး,ဒီးတံးတဟီၣ်တက့ၢ်.အဂ့ၢ်ဒ်အံၤ,နကနီၤဖးထံဧိၤကီၢ်ဧိၤလၢယဆိၣ်ဒီးအပၢ်တဖၣ်လၢယကဟ့ၣ်လီၤအီၤလၢပှၤဂီၢ်မုၢ်အံၤအန့ၢ်ဘၣ်သါတၢ်အဂီၢ်လီၤ. 7ထဲပာ်ဆူၣ်နသး,ဒီးတံးတဟီၣ်တက့ၢ်.ဒ်သိးနကပလီၢ်နသး,ဒီးမၤတၢ်ဒ်ကယဲၢ်တၢ်သိၣ်တၢ်သီလၢယခ့ယပှၤစီၤမိၤရှ့မၤလိာ်နၤန့ၣ်တက့ၢ်.စုထွဲမ့ၢ်ဂ့ၤ,စုစ့ၣ်မ့ၢ်ဂ့ၤ,ဃၣ်ကပၤလၢအီၤတဂ့ၤ,ဒ်သိးဖဲနလဲၤတၢ်တပူၤလၢ်လၢ်န့ၣ်နကဘီၣ်ထီၣ်လီၤ. 8လံာ်တၢ်သိၣ်တၢ်သီအံၤတဘၣ်ဟးထီၣ်ကွံာ်လၢနထးခိၣ်ဘၣ်,မ့မ့ၢ်နဘၣ်ဆိကမိၣ်လၢအပူၤလၢမုၢ်ဆါဒီးလၢမုၢ်နၤ,ဒ်သိးနကပလီၢ်နသး,ဒီးမၤတၢ်ဒ်ကယဲၢ်တၢ်ကွဲးအသးလၢအပူၤလီၤ.အဂ့ၢ်ဒ်အံၤ,တုၤနုၤတစုနကဒုးဘီၣ်ထီၣ်ညီထီၣ်နကျဲ,ဒီးနကမၤဒီးတၢ်ကူၣ်သ့လီၤ. 9ယမၤလိာ်လံနၤလံ,တမ့ၢ်ဘၣ်ဧါ.ပာ်ဆူၣ်နသးဒီးတံးတဟီၣ်တက့ၢ်.ပျံၤတၢ်တဂ့ၤ,ဘၣ်ယိၣ်တၢ်တဂ့ၤအဂ့ၢ်ဒ်အံၤ,ယွၤနကစၢ်အိၣ်ဒီးနၤဖဲနလဲၤတၢ်တပူၤလၢ်လၢ်လီၤ. 10ဒီးစီၤယိၤရှူမၤလိာ်ပှၤဂီၢ်မုၢ်အပှၤကွဲးလံာ်ဒီးစံးဝဲဒၣ်, 11လဲၤခီဂာ်ပှၤသူၣ်ဒဲအလီၢ်,ဒီးမၤလိာ်ပှၤဂီၢ်မုၢ်ဒီးစံးကတဲာ်ကတီၤသုတၢ်အီၣ်တၢ်အီတက့ၢ်.အဂ့ၢ်ဒ်အံၤ,လၢသၢနံၤအတီၢ်ပူၤန့ၣ်သုကခီဂာ်ယၢ်ဒ့ၣ်အံၤဒ်သိးသုကလဲၤနုာ်မၤန့ၢ်ထံဧိၤကီၢ်ဧိၤလၢယွၤသုကစၢ်ဟ့ၣ်လီၤသုလၢသုကမၤန့ၢ်အီၤလီၤ. 12ဒီးစီၤယိၤရှူကတိၤတၢ်ဒီးပှၤရူၤဘ့ၣ်ဖိ,ဒီးပှၤကးဖိ,ဒီးပှၤမနၤရှ့ၤဖိတခီဒူၣ်,ဒီးစံးဝဲဒၣ်, 13သ့ၣ်နီၣ်ထီၣ်က့ၤတၢ်ကတိၤလၢယွၤအခ့အပှၤစီၤမိၤရှ့မၤလိာ်သုဒီးစံးယွၤသုကစၢ်ဟ့ၣ်လီၤသုလၢတၢ်အိၣ်ဘှံး,ဒီးဟ့ၣ်လီၤသုလၢကီၢ်တဘ့ၣ်အံၤလီၤ. 14သုဖိသုမါ,သုဖိသုလံၤ,ဒီးသုဆၣ်ဖိကီၢ်ဖိအဒၢတဖၣ်န့ၣ်ကအိၣ်လီၤတဲာ်လၢကီၢ်တဘ့ၣ်အပူၤလၢစီၤမိၤရှ့ဟ့ၣ်လီၤသုလၢယၢ်ဒ့ၣ်လၢအအံၤတခီလီၤ.မ့မ့ၢ်သုဝဲသ့ၣ်အံၤသုဘၣ်လဲၤခီဂာ်တၢ်လၢသုဒီပုၢ်ဝဲၢ်အမဲာ်ညါအိၣ်ဒီးသုစုကဝဲၤ,ကယဲၢ်ပှၤသုးဖိ,ပှၤအဆူၣ်ခဲလၢာ်ဒီးမၤစၢၤအီၤ, 15တုၤလီၤလၢယွၤဟ့ၣ်လီၤသုဒီပုၢ်ဝဲၢ်လၢတၢ်အိၣ်ဘှံးဒ်သုဝဲဒၣ်အသိးန့ၣ်,ဒီးအဝဲသ့ၣ်မၤန့ၢ်စ့ၢ်ကီးကီၢ်တဘ့ၣ်လၢယွၤသုကစၢ်ဟ့ၣ်လီၤအီၤလီၤ.တုၤနုၤတစုသုကက့ၤက့ၤဆူသုကီၢ်လၢသုမၤန့ၢ်အီၤတဘ့ၣ်,ဒီးသုကအိၣ်လၢအကီၢ်ပူၤ,လၢယွၤအခ့အပှၤစီၤမိၤရှ့ဟ့ၣ်လီၤသုလၢယၢ်ဒ့ၣ်လၢအအံၤတခီ,ဆူမုၢ်ထီၣ်တခီလီၤ. 16ဒီးအဝဲသ့ၣ်စံးဆၢစီၤယိၤရှူ,ဒီးစံးဝဲဒၣ်,ကယဲၢ်တၢ်လၢနမၤလိာ်ပှၤခဲလၢာ်န့ၣ်ပကမၤ,ဒီးဖဲဒၣ်နမၢလီၤပှၤတပူၤလၢ်လၢ်န့ၣ်ပကလဲၤလီၤ. 17ဒ်ပဒိကနၣ်စီၤမိၤရှ့အကလုၢ်လၢတၢ်ကိးမံၤဒဲးအသိးန့ၣ်,ပကဒိကနၣ်နကလုၢ်ဒ်န့ၣ်သိးလီၤ.မ်ယွၤကစၢ်အိၣ်ဒီးနၤ,ဒ်အအိၣ်ဒီးစီၤမိၤရှ့အသိးန့ၣ်တက့ၢ်. 18ကယဲၢ်ပှၤလၢအပူထီၣ်နတၢ်မၤလိာ်,ဒီးတဒိကနၣ်ဘၣ်နကလုၢ်နကထါလၢနမၤလိာ်တၢ်ခဲလၢာ်န့ၣ်ကဘၣ်တၢ်မၤသံအီၤကိးဂၤဒဲးလီၤ.ထဲပာ်ဆူၣ်နသးဒီးတံးတဟီၣ်တက့ၢ်.
Copyright information for
KswSKMB