Jos 17 | KswSKMB | STEP | ဒီးတၢ်အဂီၢ်အိၣ်ဝဲလၢမနၤရှ့ၤတဒူၣ်အဂီၢ်လီၤ.အဂ့ၢ်ဒ်အံၤ,မ့ၢ်ဝဲလၢစီၤယိၤသးအဖိဝဲၢ်ကိလီၤ.အိၣ်ဝဲလၢစီၤမနၤရှ့ၤအဖိဝဲၢ်ကိစီၤမၤကံၢ်,စီၤကံးလဧးအပၢ်တဂၤန့ၣ်အဂီၢ်လီၤ.အဂ့ၢ်ဒ်အံၤ,မ့ၢ်ပှၤသုးဖိလီၤ.ဒီးကံးလဧးဒီးဘၤၡၣ်န့ၣ်အိၣ်ဝဲလၢအဂီၢ်လီၤ.

‏ Joshua 17

1 ဒီးတၢ်အဂီၢ်အိၣ်ဝဲလၢမနၤရှ့ၤတဒူၣ်အဂီၢ်လီၤ.အဂ့ၢ်ဒ်အံၤ,မ့ၢ်ဝဲလၢစီၤယိၤသးအဖိဝဲၢ်ကိလီၤ.အိၣ်ဝဲလၢစီၤမနၤရှ့ၤအဖိဝဲၢ်ကိစီၤမၤကံၢ်,စီၤကံးလဧးအပၢ်တဂၤန့ၣ်အဂီၢ်လီၤ.အဂ့ၢ်ဒ်အံၤ,မ့ၢ်ပှၤသုးဖိလီၤ.ဒီးကံးလဧးဒီးဘၤၡၣ်န့ၣ်အိၣ်ဝဲလၢအဂီၢ်လီၤ.

2 ဒီးတၢ်အဂီၢ်အိၣ်လၢစီၤမနၤရှ့ၤအဖိလၢအအိၣ်လီၤတဲာ်တဖၣ်အဂီၢ်,ဒ်အဟံၣ်တဖၣ်အသိးန့ၣ်,လၢစီၤအဘံဧ့စ့ၢ်အဖိအဂီၢ်,ဒီးလၢစီၤဃ့လ့းအဖိအဂီၢ်,ဒီးလၢစီၤအးစရံၤအ့လးအဖိအဂီၢ်,ဒီးလၢစီၤၡက့ၣ်အဖိအဂီၢ်ဒီးလၢစီၤဃ့ဖ့ၢ်အဖိအဂီၢ်,ဒီးလၢစီၤၡမံဒၤအဖိအဂီၢ်န့ၣ်လီၤ.အဝဲသ့ၣ်န့ၣ်မ့ၢ်စီၤယိၤသးအဖိခွါစီၤမနၤရှ့ၤအဖိပိာ်ခွါ,ဒ်အဟံၣ်တဖၣ်အသိးန့ၣ်လီၤ.

3 မ့မ့ၢ်စီၤစလၤဖဃး,စီၤဃ့ဖၢ်အဖိခွါ,စီၤကးလဧးအဖိခွါစီၤမၤကံၢ်အဖိခွါတဂၤန့ၣ်အဖိခွါတအိၣ်ဘၣ်,အိၣ်ဒီးအဖိမုၣ်တဖၣ်လီၤ.ဒီးအဖိမုၣ်အမံၤမ့ၢ်အအံၤ,နီၢ်မၤလၤ,ဒီးနီၢ်နိဧၤ,နီၢ်ဃၤကလၤ,ဒီးနီၢ်မံးလကၤ,ဒီးနီၢ်တံးရစၢ်လီၤ.

4 ဒီးအဝဲသ့ၣ်တဖၣ်သုးဘူးအသးဆူပှၤလုၢ်တၢ်အဒိၣ်စီၤအလၤဧစၢ်အအိၣ်,ဒီးစီၤနိၣ်အဖိခွါစီၤယိၤရှူအအအိၣ်,ဒီးပဒိၣ်တဖၣ်အအိၣ်,ဒီးစံးဝဲဒၣ်,ယွၤမၤလိာ်စီၤမိၤရှ့ဒ်သိးအကဟ့ၣ်လီၤပှၤလၢတၢ်န့ၢ်သါလၢပဒီပုၢ်ဝဲၢ်အကျါလီၤ.ဒီးဒ်တၢ်ဟဲလၢယွၤအထးခိၣ်အသိးန့ၣ်,အဝဲဒၣ်ဟ့ၣ်လီၤအီၤလၢတၢ်န့ၢ်သါလၢအပၢ်အဒီပုၢ်ဝဲၢ်အကျါန့ၣ်လီၤ.

5 ဒီးလၢကီၢ်ကံးလဧး,ဒီးဘၤၡၣ်လၢယၢ်ဒ့ၣ်ဝၢ်ဘးခီအမဲာ်ညါန့ၣ်အဂီၢ်ဆံဆဲၣ်ပူလီၤဘၣ်လၢမနၤရှ့ၤအဂီၢ်လီၤ. 6 အဂ့ၢ်ဒ်အံၤ,စီၤမနၤရှ့ၤအဖိမုၣ်တဖၣ်န့ၣ်န့ၢ်ဘၣ်တၢ်န့ၢ်သါလၢအဖိခွါအကျါ,ဒီးအဖိခွါလၢအအိၣ်လီၤတဲာ်တဖၣ်န့ၣ်န့ၢ်ဘၣ်ကီၢ်ကံးလဧးလီၤ.

7 ဒီးမနၤရှ့ၤအကီၢ်ဃၢၤန့ၣ်အိၣ်ဝဲလၢအၤရှ့ၢ်ပၢၢ်လၢမံးကမ့သၤလၢအအိၣ်ဝဲလၢၡက့ၣ်အမဲာ်ညါ,ဒီးကီၢ်အဃၢၤန့ၣ်လဲၤတၢ်ဆူစုထွဲဆူပှၤဧ့ၣ်တးပူၤဖိအအိၣ်လီၤ.

8 မနၤရှ့ၤန့ၢ်ဘၣ်ကီၢ်တးပူၤလီၤ.မ့မ့ၢ်ဝ့ၢ်တးပူၤအိၣ်ဝဲလၢမနၤရှ့ၤအကီၢ်ဃၢၤန့ၣ်ပှၤအ့ဖရဲၣ်ဖိန့ၢ်ဘၣ်ဝဲလီၤ.

9 ဒီးကီၢ်အဃၢၤန့ၣ်လဲၤလီၤဆူထံကျိကၤနၤ,ထံကျိလၢကလံၤထံးတခီလီၤ.အ့ဖရဲၣ်အဝ့ၢ်တဖၣ်န့ၣ်အိၣ်ဝဲလၢမနၤရှ့ၤအဝ့ၢ်တဖၣ်အကျါလီၤ.မနၤရှ့ၤအကီၢ်ဃၢၤန့ၣ်အိၣ်ဝဲလၢထံကျိလၢကလံၤစိးတခီ,ဒီးဟးထီၣ်ကွံာ်ဝဲန့ၣ်ဖဲပီၣ်လဲၣ်နံၤလီၤ. 10 လၢကလံၤထံးတခီန့ၣ်မ့ၢ်အ့ၤဖရဲၣ်အတၢ်,ဒီးလၢကလံၤစိးတခီန့ၣ်မ့ၢ်မနၤရှ့ၤအတၢ်,ဒီးပီၣ်လဲၣ်န့ၣ်မ့ၢ်အကီၢ်ဃၢၤလီၤ.ဒီးဘၣ်သဃိာ်လိာ်အသးလၢအၤရှ့ၢ်လၢကလံၤစိးတခီ,ဒီးလၢယံးစၣ်ကၢ်လၢမုၢ်ထီၣ်တခီလီၤ.

11 ဒီးလၢယံးစၢ်ကၢ်အကီၢ်ပူၤ,ဒီးလၢအၤရှ့ၢ်အကီၢ်ပူၤန့ၣ်မနၤရှ့ၤအိၣ်ဒီးဘ့ၤသၡၣ်ဒီးအတဝီတဖၣ်,ဒီးယံးဘျၣ်ဒီးအတဝီတဖၣ်,ဒီးပှၤဒိၢ်ဖိဒီးအတဝီတဖၣ်,ဒီးပှၤဧ့ၣ်ဒိၢ်ဖိဒီးအတဝီတဖၣ်,ဒီးပှၤတၤနးဖိဒီးအတဝီတဖၣ်,ဒီးပှၤမကးဒိၤဖိဒီးအတဝီတဖၣ်,အကီၢ်သၢဘ့ၣ်လီၤ.

12 ဒီးပှၤမနၤရှ့ၤဖိဟီထီၣ်ကွံာ်ပှၤဝ့ၢ်ဖိတသ့ဘၣ်.ပှၤကနၤဧၣ်ဖိအိၣ်ဒၣ်တၢ်လၢကီၢ်ပူၤန့ၣ်လီၤ. 13 ဒီးတုၤပှၤအံၣ်စရ့လးဖိဆူၣ်ထီၣ်ဒီး,တၢ်မၤအသးလၢအမၢပှၤကနၤဧၣ်ဖိဟ့ၣ်သွဲလီၤ.ဒီးတဟီထီၣ်ကွံာ်ဘၣ်အီၤသပှၢ်တၢၢ်ဘၣ်.

14 ဒီးစီၤယိၤသးအဖိတဖၣ်န့ၣ်ကတိၤတၢ်ဒီးစီၤယိၤရှူဒီးစံးဝဲဒၣ်,နဟ့ၣ်ယၤလၢတၢ်အဂီၢ်ထဲတမံၤ,ဒီးတၢ်နီၤဖးထဲတပူဧိၤလၢယကန့ၢ်ဘၣ်သါန့ၣ်မ့ၢ်အဘၣ်မနုၤလဲၣ်.ယမ့ၢ်ပှၤဂီၢ်မုၢ်ဖးဒိၣ်လီၤ.အဂ့ၢ်ဒ်အံၤတုၤခဲကနံၣ်အံၤယွၤဆိၣ်ဂ့ၤယၤလီၤ.

15 ဒီးစီၤယိၤရှူစံးဆၢအီၤ,နမ့မ့ၢ်ပှၤဂီၢ်မုၢ်ဖးဒိၣ်,ဒီးကစၢၢ်အ့ဖရဲၣ်မ့ၢ်အံၣ်ကဲၣ်ဆိးလၢနဂီၢ်ဒီး,လဲၤထီၣ်ဆူသ့ၣ်ကျါဒီးကူာ်လီၤကွံာ်လၢနဂီၢ်ဒၣ်နဲဖဲန့ၣ်,လၢပှၤပရးစၤဖိ,ဒီးပှၤနီၢ်ဒိၣ်ဖိအကီၢ်ပူၤန့ၣ်တက့ၢ်.

16 ဒီးစီၤယိၤသးအဖိတဖၣ်စံးဝဲဒၣ်,ကစၢၢ်တဖျၢၣ်န့ၣ်ပမၤတန့ၢ်ဘၣ်.အဂ့ၢ်ဒ်အံၤ,ပှၤကနၤဧၣ်ဖိလၢအအိၣ်လၢကစၢၢ်ကဆူးအကီၢ်ပူၤန့ၣ်အိၣ်ဝဲဒီးလ့ၣ်ကဟၣ်ထး,ပှၤလၢဘ့ၤသၡၣ်ဒီးအတဝီတဖၣ်,ဒီးပှၤလၢယံးစရ့လးအကစၢၢ်ကဆူးအပူၤန့ၣ်လီၤ.

17 ဒီးစီၤယိၤရှူကတိၤတၢ်ဒီးစီၤယိၤသးအပှၤဟံၣ်ဖိ,ဒီးစီၤအ့ဖရဲၣ်,ဒီးစီၤမနၤရှ့ၤ,ဒီးစံးဝဲဒၣ်,နမ့ၢ်ပှၤဂီၢ်မုၢ်ဖးဒိၣ်,ဒီးနစိနကမီၤဒိၣ်ဝဲလီၤ.နကန့ၢ်ဘၣ်ထဲတၢ်အဂီၢ်တမံၤဧိၤတမ့ၢ်ဘၣ်. 18 ဒီးကစၢၢ်တဖျၢၣ်န့ၣ်ကကဲထီၣ်နတၢ်လီၤ.အဂ့ၢ်ဒ်အံၤ,မ့ၢ်သ့ၣ်အလီၢ်လီၤ.ဒီးနဘၣ်ကူာ်လီၤကွံာ်အီၤ,ဒီးအကတၢၢ်န့ၣ်ကကဲထီၣ်နတၢ်လီၤ.အဂ့ၢ်ဒ်အံၤ,ပှၤကနၤဧၣ်ဖိအိၣ်ဒီးလ့ၣ်ကဟၣ်ထး,ဒီးအဂံၢ်ဆူၣ်အဘါဆူၣ်ဘၣ်ဆၣ်ဒီး,နကဟီထီၣ်ကွံာ်အီၤလီၤ.