Jos 2 | KswSKMB | STEP | ဒီးစီၤနိၣ်အဖိခွါစီၤယိၤရှူမၢပှၤခံဂၤလဲၤတၢ်လၢၡံးတံၣ်ဒ်သိးအကကွၢ်ခူသူၣ်တၢ်,ဒီးစံးဝဲဒၣ်,လဲၤကွၢ်ဟုၣ်ကီၢ်တဘ့ၣ်န့ၣ်,ဒီးယရံၤဃိန့ၣ်တက့ၢ်.ဒီးလဲၤဝဲ,ဒီးလဲၤနုာ်လၢပှၤဃဲသဲမုၣ်နီၢ်ရၤဃးအဟံၣ်ပူၤ,ဒီးမံဖဲန့ၣ်လီၤ.

‏ Joshua 2

1 ဒီးစီၤနိၣ်အဖိခွါစီၤယိၤရှူမၢပှၤခံဂၤလဲၤတၢ်လၢၡံးတံၣ်ဒ်သိးအကကွၢ်ခူသူၣ်တၢ်,ဒီးစံးဝဲဒၣ်,လဲၤကွၢ်ဟုၣ်ကီၢ်တဘ့ၣ်န့ၣ်,ဒီးယရံၤဃိန့ၣ်တက့ၢ်.ဒီးလဲၤဝဲ,ဒီးလဲၤနုာ်လၢပှၤဃဲသဲမုၣ်နီၢ်ရၤဃးအဟံၣ်ပူၤ,ဒီးမံဖဲန့ၣ်လီၤ.

2 ဒီးပှၤစံးဘၣ်ယရံၤဃိအစီၤပၤဒီးစံးဝဲၣ်,ကွၢ်ကွၢ်,လၢမုၢ်နၤအံၤပှၤဟဲဖဲအံၤ,လၢပှၤအံၣ်စရ့လးဖိအကျါတဖၣ်,ဒ်သိးအကဃုကွၢ်ကီၢ်အံၤလီၤ.

3 ဒီးယရံၤဃိအစီၤပၤမၢလီၤပှၤဆူနီၢ်ရၤဃးအအိၣ်ဒီးစံးဝဲဒၣ်,ဟဲစိာ်ထီၣ်ပှၤတဖၣ်လၢအဟဲဆူနအိၣ်,လၢအလဲၤနုာ်လၢနဟံၣ်ပူၤန့ၣ်တက့ၢ်.အဂ့ၢ်ဒ်အံၤ,ဟဲဃုကွၢ်ကီၢ်ဒီဘ့ၣ်ညါအံၤလီၤ.

4 ဒီးပိာ်မုၣ်န့ၣ်ဟံးန့ၢ်ပှၤခံဂၤ,ဒီးပာ်ခူသူၣ်အီၤ,ဒီးစံးဒ်အံၤ,ပှၤခံဂၤဟဲဆူယအိၣ်,ဘၣ်ဆၣ်ဒီးမ့ၢ်အဟဲလၢလဲၣ်လၢလဲၣ်န့ၣ်ယတသ့ၣ်ညါဘၣ်. 5 ဒီးလၢပှၤကးတံာ်ဃာ်ဝ့ၢ်အပဲတရီန့ၣ်,တုၤတၢ်ခံးလီၤဒီး,တၢ်မၤအသးလၢပှၤတဖၣ်န့ၣ်ဟးထီၣ်ကွံာ်ဝဲလီၤ.ဖဲပှၤတဖၣ်လဲၤတၢ်န့ၣ်ယတသ့ၣ်ညါဘၣ်.လူၤပိာ်အခံချ့ချ့တက့ၢ်.အဂ့ၢ်ဒ်အံၤ,သုကချုးန့ၢ်အီၤလီၤ.

6 ဘၣ်ဆၣ်ဒီးအဝဲဒၣ်ဒုးလဲၤထီၣ်တ့ၢ်ပှၤတဖၣ်န့ၣ်ဆူအဟံၣ်ခိၣ်,ဒီးကျၢၢ်ဘၢအီၤဒီးခီမၤအဘိတဖၣ်လၢအကတဲာ်ကတီၤတ့ၢ်ဝဲလၢဟံၣ်ခိၣ်န့ၣ်လီၤ.

7 ဒီးအဝဲသ့ၣ်တဖၣ်န့ၣ်လူၤအီၤလၢကျဲလဲၤဆူယၢ်ဒ့ၣ်ပၢၢ်လၢတၢ်ခီဂာ်အလီၢ်န့ၣ်လီၤ.ဒီးတုၤပှၤလူၤတၢ်တဖၣ်ဟးထီၣ်ကွံာ်ဝဲဒီး,ပှၤကးတံာ်ဃာ်ဝ့ၢ်အပဲတရီလီၤ.

8 ဒီးပှၤခံဂၤန့ၣ်တချုးမံဒံးဘၣ်ဒီး,ပိာ်မုၣ်လဲၤထီၣ်ဆူအအိၣ်လၢဟံၣ်ခိၣ်န့ၣ်, 9 ဒီးစံးဘၣ်ပှၤတဖၣ်န့ၣ်,ယသ့ၣ်ညါလၢယွၤဟ့ၣ်လီၤသုလၢထံဧိၤကီၢ်ဧိၤ,ဒီးတၢ်ပျံၤသုန့ၣ်လီၤဘၣ်ပှၤ,ဒီးပှၤကီၢ်ဖိလီၤဘှါခဲလၢာ်လၢသုဃိလီၤ. 10 အဂ့ၢ်ဒ်အံၤ,ပနၢ်ဟူလၢသုဟဲထီၣ်လၢအဲၤကူပတူးန့ၣ်ယွၤမၤလီၤသံးကွံာ်ပီၣ်လဲၣ်ဆှဲအထံလၢသုဂီၢ်,ဒီးတၢ်လၢသုမၤပှၤအမိၢ်ဖိအစီၤပၤခံဂၤလၢအအိၣ်လၢယၢ်ဒ့ၣ်ဝၢ်ဘးခီ,စီၤစံဃိၣ်,ဒီးစီၤဧိာ်လၢသုမၤဟးဂီၤအီၤသပှၢ်တၢၢ်လီၤ. 11 ဒီးတုၤပနၢ်ဟူဒီးပသးပှံၢ်လီၤကွံာ်,ဒီးပသးတဆၢထၢၣ်လၢၤဘၣ်လၢပပူၤဘၣ်လၢသုဃိလီၤ.အဂ့ၢ်ဒ်အံၤ,ယွၤသုကစၢ်န့ၣ်မ့ၢ်ကစၢ်လၢမူခိၣ်ပူၤလၢထးခီ,ဒီးလၢဟီၣ်ခိၣ်ချၢလာ်ခီလီၤ. 12 ဒီးခဲကနံၣ်အံၤဆိၣ်လီၤသုသးဒီးယၤလၢယွၤအမဲာ်ညါ,လၢ,မ့ၢ်ယမၤသုလၢတၢ်ဘျုးတၢ်ဖှိၣ်ဒီး,သုကမၤတၢ်ဘျုးတၢ်ဖှိၣ်ဒီးယပၢ်အပှၤဟံၣ်ဖိ,ဒီးဟ့ၣ်လီၤယၤလၢတၢ်ပနီၣ်အမ့ၢ်အတီ, 13 ဒီးဒုးမူဒံးယမိၢ်,ဒီးယပၢ်,ဒီးယဒီပုၢ်ဝဲၢ်ပိာ်ခွါ,ဒီးယဒီပုၢ်ဝဲၢ်ပိာ်မုၣ်,ဒီးကယဲၢ်တၢ်အိၣ်ဒီးအီၤ,ဒီးမၤပူၤမၤဖျဲးပသးဒီးတၢ်သံန့ၣ်တက့ၢ်.

14 ဒီးပှၤတဖၣ်န့ၣ်စံးဆၢအီၤ,ပတၢ်တဖၣ်အံၤသုမ့ၢ်တဒုးနဲၣ်ဘၣ်ဒီး,ပသးကသံလၢသုသးအလီၢ်န့ၣ်လီၤ.ဒီးတုၤယွၤဟ့ၣ်လီၤပှၤလၢထံဧိၤကီၢ်ဧိၤဒီး,တၢ်ကမၤအသးလၢပကမၤနၤဒီးတၢ်ဘျုးတၢ်ဖှိၣ်,ဒီးတၢ်မ့ၢ်တၢ်တီလီၤ.

15 ဒီးအဝဲဒၣ်စဲၤလီၤအီၤလၢပျံၤလၢတၢ်ထူၣ်ဖျိတပူၤလီၤ.အဂ့ၢ်ဒ်အံၤ,အဟံၣ်အိၣ်ဝဲလၢဝ့ၢ်ခိၣ်ဒူအဖီခိၣ်,ဒီးအိၣ်ဝဲဆိးဝဲလၢဝ့ၢ်ခိၣ်ဒူအဖီခိၣ်လီၤ.

16 ဒီးပိာ်မုၣ်စံးဘၣ်အီၤ,လဲၤထီၣ်ဆူကစၢၢ်ကလိ,ဒ်သိးပှၤလူၤတၢ်အသုတဘၣ်သဃိာ်ဒီးသုတဂ့ၤ,ဒီးပာ်ခူသူၣ်သုသးဖဲန့ၣ်သၢနံၤ,တုၤပှၤလူၤတၢ်တဖၣ်ဟဲက့ၤကဒါက့ၤန့ၣ်တက့ၢ်.လၢခံက့ၤဒီးသုကလဲၤပိာ်ဘၣ်က့ၤသုကျဲန့ၣ်လီၤ.

17 ဒီးပှၤတဖၣ်န့ၣ်စံးဝဲဒၣ်,တၢ်ဆိၣ်လၢနဒုးဆိၣ်ပှၤအံၤ,ပကအိၣ်ပူၤဖျဲးဒီးအီၤလီၤ. 18 ကွၢ်ကွၢ်,တုၤပဟဲနုာ်လၢထံဧိၤကီၢ်ဧိၤအပူၤဒီး,နဘၣ်စၢဃာ်လုၣ်ဂီၤတဘိအံၤလၢတၢ်ထူၣ်ဖျိလၢနစဲၤလီၤပှၤလၢအပူၤ,ဒီးနဘၣ်ဟဲစိာ်နမိၢ်,ဒီးနပၢ်,ဒီးနဒီပုၢ်ဝဲၢ်,ဒီးနပၢ်အပှၤဟံၣ်ဖိခဲလၢာ်ဆူနအိၣ်လၢဟံၣ်ပူၤလီၤ. 19 ဒီးတၢ်ကမၤအသးလၢကယဲၢ်ပှၤလၢအဟးထီၣ်ကွံာ်လၢနဟံၣ်အတြဲၤဆူကျဲပူၤတဂၤလၢ်လၢ်န့ၣ်အသွံၣ်ကအိၣ်လၢအခိၣ်ဒၣ်ဝဲ,ဒီးပဝဲဒၣ်အံၤပတၢ်ဒဲးဘးတအိၣ်ဘၣ်.ဒီးပှၤလၢအအိၣ်ဒီးနၤလၢဟံၣ်ပူၤကိးဂၤဒဲးန့ၣ်ပှၤအစုမ့ၢ်အိၣ်လၢအလိၤဒီး,အသွံၣ်ကအိၣ်လၢပခိၣ်လီၤ. 20 ဒီးနမ့ၢ်ဒုးနဲၣ်ပတၢ်တဖၣ်အံၤဒီး,ပကပူၤဖျဲးဒီးနတၢ်ဆိၣ်လၢနဒုးဆိၣ်ပှၤလီၤ.

21 ဒီးစံးဝဲဒၣ်,မ်တၢ်မၤအသးဒ်သုတၢ်ကတိၤအသိးန့ၣ်တက့ၢ်.ဒီးပျၢ်အီၤ,ဒီးပှၤတဖၣ်န့ၣ်ဟးထီၣ်ကွံာ်,ဒီးပိာ်မုၣ်န့ၣ်စၢဃာ်လုၣ်ဂီၤတဘိလၢတၢ်ထူၣ်ဖျိန့ၣ်လီၤ.

22 ဒီးပှၤတဖၣ်န့ၣ်လဲၤတၢ်,ဒီးဟဲဝဲဆူကစၢၢ်ကလိ,ဒီးအိၣ်ဝဲဖဲန့ၣ်သၢနံၤတုၤပှၤလူၤတၢ်န့ၣ်က့ၤကဒါက့ၤလီၤ.ဒီးပှၤလူၤတၢ်တဖၣ်န့ၣ်ဃုအီၤလၢကျဲဒီဘိညါ,ဒီးတထံၣ်ဘၣ်ဝဲဘၣ်.

23 ဒီးပှၤခံဂၤန့ၣ်က့ၤက့ၤ,ဒီးလဲၤလီၤလၢကစၢၢ်လိၤ,ဒီးခီဂာ်တၢ်,ဒီးလဲၤဆူစီၤနိၣ်အဖိခွါစီၤယိၤရှူအအိၣ်,ဒီးစံးဘၣ်တဲဘၣ်အီၤလၢကယဲၢ်တၢ်လၢအဘၣ်တ့ၢ်အီၤလီၤ. 24 ဒီးစံးဘၣ်စီၤယိၤရှူ,မ့ၢ်မးယွၤဟ့ၣ်လီၤကီၢ်ဒီဘ့ၣ်ညါလၢပစုပူၤလီၤ.အဂ့ၢ်ဒ်အံၤ,ပှၤကီၢ်ဖိခဲလၢာ်လီၤဘှါလၢပဃိလီၤ.