Judg 15 | KswSKMB | STEP | ဒီးမုၢ်နံၤတဖၣ်န့ၣ်အလီၢ်ခံလၢကူးဘုကၠူၣ်အမုၢ်နံၤတဖၣ်အပူၤန့ၣ်တၢ်မၤအသးလၢစီၤၡံၣ်ၡိၣ်လဲၤအိၣ်သကိးအမါအိၣ်ဒီးမဲာ်တဲးလဲးဖိတဒု,ဒီးစံးဝဲဒၣ်,ယကလဲၤနုာ်ဆူယမါအအိၣ်လၢဒၢးပူၤလီၤ.မ့မ့ၢ်ပိာ်မုၣ်အပၢ်န့ၣ်တပျဲလဲၤနုာ်ဘၣ်အီၤဘၣ်.

‏ Judges 15

1 ဒီးမုၢ်နံၤတဖၣ်န့ၣ်အလီၢ်ခံလၢကူးဘုကၠူၣ်အမုၢ်နံၤတဖၣ်အပူၤန့ၣ်တၢ်မၤအသးလၢစီၤၡံၣ်ၡိၣ်လဲၤအိၣ်သကိးအမါအိၣ်ဒီးမဲာ်တဲးလဲးဖိတဒု,ဒီးစံးဝဲဒၣ်,ယကလဲၤနုာ်ဆူယမါအအိၣ်လၢဒၢးပူၤလီၤ.မ့မ့ၢ်ပိာ်မုၣ်အပၢ်န့ၣ်တပျဲလဲၤနုာ်ဘၣ်အီၤဘၣ်. 2 ဒီးအပၢ်စံးဝဲဒၣ်,ယဆိကမိၣ်နီၢ်နီၢ်လၢနသးဟ့အီၤသပှၢ်တၢၢ်,ဒီးယဟ့ၣ်အီၤလၢနတံၤနသကိးတဂၤန့ၣ်လီၤ.အပုၢ်ပိာ်မုၣ်ဂ့ၤန့ၢ်အီၤတက့ၢ်,တမ့ၢ်ဘၣ်ဧါ.ဟံးန့ၢ်လၢ်အီၤလၢအလီၢ်တက့ၢ်.

3 ဒီးစီၤၡံၣ်ၡိၣ်စံးလၢအဂ့ၢ်အကျိၤ,ယမ့ၢ်မၤပှၤဖလ့ၡသးဖိလၢတၢ်အၢဘၣ်ဆၣ်ဒီး,ယတၢ်ဒဲးဘးတအိၣ်ဘၣ်ထဲသိးဒီးအီၤဘၣ်.

4 ဒီးစီၤၡံၣ်ၡိၣ်လဲၤတၢ်ဒီးဖီၣ်န့ၢ်ထွံၣ်ဟီၣ်ခိၣ်သၢကယၤ,ဒီးဟံးန့ၢ်ဆှီတဖၣ်,ဒီးဃၣ်တၢ်အမဲၢ်ဒီးတၢ်အမဲၢ်,ဒီးပာ်ဆှီတကဒိၣ်လၢမဲၢ်ခံဘိအဘၢၣ်စၢၤလီၤ.

5 ဒီးဒွဲၣ်ထီၣ်ဆှီတဖၣ်လၢမ့ၣ်အူ,ဒီးပျၢ်လီၤအီၤဒ်သိးအကလဲၤလၢပှၤဖလ့ၡသးဖိအဘုလၢအဆၢထၢၣ်အကျါ,ဒီးမ့ၣ်အူအီၣ်ကွံာ်ဘုကဒိၣ်,ဒီးဘုလၢအဆၢထၢၣ်,ဒီးစပံးအလီၢ်တဖၣ်,ဒီးသ့ၣ်စၤယံးအလီၢ်တဖၣ်န့ၣ်လီၤ.

6 ဒီးပှၤဖလ့ၡသးဖိစံးဝဲဒၣ်,မ့ၢ်မတၤမၤတၢ်အံၤလဲၣ်,ဒီးပှၤစံးဆၢဝဲ,ပှၤတံးမနးဖိအမာ်စီၤၡံၣ်ၡိၣ်လီၤ.အဂ့ၢ်ဒ်အ့ၤ,အဝဲဒၣ်ဟံးန့ၢ်အမါ,ဒီးဟ့ၣ်လီၤအီၤလၢအတံၤအသကိးတဂၤန့ၣ်လီၤ.ဒီးပှၤဖလ့ၡသးဖိဟဲထီၣ်,ဒီးဆူးကွံာ်ပိာ်မုၣ်န့ၣ်ဒီးအပၢ်လၢလၢမ့ၣ်အူလီၤ.

7 ဒီးစီၤၡံၣ်ၡိၣ်စံးဘၣ်အီၤ,သုမၤတၢ်ဒ်အံၤသိးဘၣ်ဆၣ်ဒီး,ယကမၤဆၢတၢ်အၢလၢသု,ဒီးလၢတၢ်န့ၣ်အလီၢ်ခံယကဆိတ့ၢ်လီၤ. 8 ဒီးကျီကွံာ်အီၤလၢခီၣ်ဒုၣ်လၢကံၣ်ဒုၣ်အဖီခိၣ်လၢတၢ်ကျီသံကွံာ်ဖးဒိၣ်လီၤ.ဒီးလဲၤလီၤ,ဒီးအိၣ်ဝဲဆိးဝဲလၢလၢၢ်အကဆူးဧ့ၤတၣ်အပူၤလီၤ.

9 ဒီးပှၤဖလ့ၡသးဖိလဲၤထီၣ်,ဒီးသူၣ်ဒဲလၢယူဒၤအပူၤဒီးသလၣ်ထီၣ်အသးလၢလ့ၤဃံအပူၤလီၤ.

10 ဒီးယူဒၤအပှၤကညီစံးဝဲဒၣ်,သုဟဲထီဒါပှၤဘၣ်မနုၤလဲၣ်,ဒီးစံးဆၢအီၤ,ပဟဲထီၣ်ဒ်သိးပကစၢဃာ်စီၤၡံၣ်ၡိၣ်ဒ်သိးပကမၤအီၤဒ်အမၤပှၤအသိးန့ၣ်လီၤ.

11 ဒီးပှၤယူဒၤဖိအပှၤကညီသၢကထိလဲၤထီၣ်ဆူလၢၢ်အကဆူးဧ့ၤတၣ်,ဒီးစံးဘၣ်စီၤၡံၣ်ၡိၣ်,ပှၤဖလ့ၡသးဖိမ့ၢ်ပှၤပၢပှၤန့ၣ်နတသ့ၣ်ညါဘၣ်ဧါ.တၢ်လၢနမၤပှၤမ့ၢ်မနုၤတမံၤအံၤလဲၣ်.ဒီးစံးဘၣ်အီၤ,ဒ်အဝဲသ့ၣ်တဖၣ်မၤယၤအသိးယမၤလံအီၤဒ်န့ၣ်အသိးလံ.

12 ဒီးအဝဲသ့ၣ်တဖၣ်န့ၣ်စံးဘၣ်အီၤ,ပဟဲဒ်သိးပကစၢဃာ်နၤ,လၢပကဟ့ၣ်လီၤနၤလၢပှၤဖလ့ၡသးဖိအစုပူၤအဂ့ၢ်လီၤ.ဒီးစီၤၡံၣ်ၡိၣ်စံးဘၣ်အီၤ,ဆိၣ်တၢ်ဒီးယၤလၢသုတကျီကွံာ်ဘၣ်ယၤ,သုကစၢ်ဒၣ်သုဝဲဘၣ်န့ၣ်တက့ၢ်.

13 ဒီးအဝဲသ့ၣ်ကတိၤတၢ်ဒီးအီၤဒီးစံးဝဲဒၣ်,တမ့ၢ်ဘၣ်,မ့ၢ်ပကစၢဃာ်နၤ,ဒီးဟ့ၣ်လီၤကွံာ်နၤလၢအစုပူၤလီၤ.ဒီးပတမၤသံဘၣ်နၤလ့ၤတက့ၤဘၣ်.ဒီးစၢဃာ်အီၤလၢပျံၤသီခံဘိ,ဒီးဟဲစိာ်ထီၣ်အီၤလၢလၢၢ်န့ၣ်လီၤ.

14 တုၤအတုၤလၢလ့ၤဃံဒီးပှၤဖလ့ၡသးဖိကိးပသူထီၣ်လၢအဖီခိၣ်,ဒီးယွၤအသးလီၤဘၣ်လၢအလိၤဆူၣ်ဆူၣ်ကလဲာ်,ဒီးပျံၤတဖၣ်လၢအအိၣ်လၢအစုဒုၣ်လိၤန့ၣ်ကဲထီၣ်ဝဲဒ်ဘဲဘျံးလၢမ့ၣ်အူအီၣ်ကွံာ်အီၤအသိးန့ၣ်ဒီးတၢ်စၢဃာ်အစုလီၤဃ့ၣ်ကွံာ်ဝဲလီၤ.

15 ဒီးထံၣ်န့ၢ်ဝဲလၢကသ့ၣ်ယီၤအခၣ်ဃံသံကစဲာ်တဘိ,ဒီးယူာ်ထီၣ်အစုဒီးဟံးန့ၢ်အီၤ,ဒီးကျီကွံာ်ပှၤတကထိလၢအီၤလီၤ. 16 ဒီးစီၤၡံၣ်ၡိၣ်စံးဝဲဒၣ်,

လၢကသ့ၣ်ယီၤအခၣ်ဃံ,တပူခံပူ,
လၢကသ့ၣ်ယီၤအခၣ်ဃံယကျီကွံာ်လံပှၤတကထိလံ.

17 ဒီးတုၤအကတိၤတၢ်ဝံၤဒီးတၢ်မၤအသးလၢအကွံာ်တ့ၢ်ကွံာ်တၢ်အခၣ်ဃံလၢအစုပူၤ,ဒီးကိးတၢ်အလီၢ်တပူၤန့ၣ်လၢရၤမးလ့ၤဃံလီၤ.

18 ဒီးတၢ်သူအသးလၢထံဒိၣ်မးလီၤ,ဒီးကိးထီၣ်ယွၤ,ဒီးစံးဝဲဒၣ်,နဟ့ၣ်လီၤလံတၢ်အုၣ်က့ၤခီၣ်က့ၤဖးဒိၣ်တမံၤအံၤလၢနခ့နပှၤအစုပူၤလံ,ဒီးခဲကနံၣ်အံၤယကသံလၢတၢ်သူယသးလၢထံအဃိ,ဒီးလီၤဘၣ်လၢပှၤတဒိးဘၣ်တၢ်ကူးတရံးအစုပူၤစ့ၢ်ကီးဧါ.

19 ဒီးယွၤမၤသ့ၣ်ဖးတၢ်အိပူၤလၢလ့ၤဃံအပူၤ,ဒီးထံဟဲထီၣ်လၢအပူၤ,ဒီးအီဝဲ,ဒီးအသးဟဲက့ၤကဒါက့ၤဒီးအသးကျၢၤထီၣ်လီၤ.မၤသးဒ်န့ၣ်ဒီးယုၢ်ဝဲအမံၤလၢဧ့ၣ်ဟးကိရ့ၤလၢအအိၣ်ဝဲလၢလ့ၤဃံအပူၤတုၤမုၢ်မဆါတနံၤအံၤလီၤ.

20 ဒီးလၢပှၤဖလ့ၡသးဖိအမုၢ်နံၤတဖၣ်န့ၣ်စံၣ်ညီၣ်အံၣ်စရ့လးအနံၣ်ခံဆံလီၤ.