‏ Judges 18

1တၢ်လၢမုၢ်နံၤတဖၣ်န့ၣ်စီၤပၤတအိၣ်ဘၣ်လၢအံၣ်စရ့လးအပူၤဘၣ်.ဒီးတၢ်လၢမုၢ်နံၤတဖၣ်န့ၣ်ပှၤဒၣ်ဖိတဒူၣ်ဃုဝဲအတၢ်န့ၢ်သါလၢအကအိၣ်ကဆိးလၢအပူၤလီၤ.အဂ့ၢ်ဒ်အံၤ,တုၤလီၤလၢမုၢ်တနံၤန့ၣ်တၢ်န့ၢ်သါတလီၤဘၣ်လၢအဂီၢ်လၢအံၣ်စရ့လးအဒူၣ်တဖၣ်အကျါဒံးဘၣ်လီၤ.

2ဒီးလၢပှၤဟံၣ်ဖိအကျါန့ၣ်ပှၤဒၣ်ဖိမၢလီၤပှၤယဲၢ်ဂၤလၢအကီၢ်ဃၢၤ,ပှၤသုးဖိလၢစိးရၤဒီးလၢအ့ၤၡတိလးဒ်သိးအကကွၢ်ဟုၣ်ထံဧိၤကီၢ်ဧိၤ,ဒီးကွၢ်ထံအီၤ,ဒီးစံးဘၣ်အီၤ,လဲၤဃုကွၢ်ထံဧိၤကီၢ်ဧိၤတက့ၢ်.ဒီးလဲၤတုၤလၢကစၢၢ်အ့ဖရဲၣ်လၢစီၤမံၤကါအဟံၣ်ပူၤ,ဒီးမံဖဲန့ၣ်လီၤ.

3ဒီးအဝဲသ့ၣ်တဖၣ်န့ၣ်အိၣ်ဝဲလၢစီၤမံၤကါအဟံၣ်ဃၢၤ,ဒီးသ့ၣ်ညါဝဲလၢပှၤဖိၣ်သၣ်ခွါ,ပှၤလ့ၤဝံဖိအကလုၢ်,ဒီးဃၣ်နုာ်ဖဲန့ၣ်,ဒီးစံးဘၣ်အီၤ,မ့ၢ်မတၤဒုးဟဲနၤဖဲအံၤတဂၤလဲၣ်.ဒီးနမၤတၢ်ဖဲအံၤလၢမနုၤလဲၣ်.ဒီးနတၢ်အိၣ်ဖဲအံၤလၢမနုၤလဲၣ်.

4ဒီးအဝဲဒၣ်စံးဘၣ်အီၤ,စီၤမံၤကါမၤယၤဒ်အံၤဒ်နုၤ,ဒီးငါယၤလၢစ့,ဒီးယကဲထီၣ်အပှၤလုၢ်တၢ်အဒိၣ်လီၤ.

5ဒီးအဝဲသ့ၣ်န့ၣ်စံးဘၣ်အီၤ,သံကွၢ်လၢ်တၢ်လၢယွၤ,ပကျဲလၢပလဲၤတၢ်ကဘီၣ်ထီၣ်ကညီထီၣ်ဧါန့ၣ်ဒ်သိးပကသ့ၣ်ညါတက့ၢ်.

6ဒီးပှၤလုၢ်တၢ်အဒိၣ်န့ၣ်စံးဝဲဒၣ်,လဲၤတၢ်မုာ်မုာ်တက့ၢ်.ကျဲလၢသုပိာ်တဘိန့ၣ်အိၣ်ဝဲလၢယွၤအမဲာ်ညါလီၤ.

7ဒီးပှၤယဲၢ်ဂၤန့ၣ်ဟးထီၣ်ဝဲ,ဒီးလဲၤနုာ်လၢလ့ရှ့ၣ်,ဒီးထံၣ်ပှၤဂီၢ်မုၢ်လၢအပူၤ,တပလီၢ်ဘၣ်အသးဒီးအိၣ်ဝဲဆိးဝဲ,ဒ်ပှၤစံဒိၣ်ဖိအသိး,ခုၣ်ခုၣ်မုာ်မုာ်ဒီးတပလီၢ်ဘၣ်အသး,ဒီးပှၤန့ၢ်သါတၢ်စံၣ်ညီၣ်ကွီၢ်လၢအကမၤမဲာ်ဆှးအီၤလၢတၢ်တမံၤမံၤန့ၣ်တအိၣ်ဘၣ်,ဒီးအိၣ်ဝဲယံၤဒီးပှၤစံဒိၣ်ဖိ,ဒီးအတၢ်ဘၣ်ဃးဒီးပှၤဂၤတအိၣ်ဘၣ်.

8ဒီးက့ၤက့ၤဆူအဒီပုၢ်ဝဲၢ်အအိၣ်လၢစိးရၤအပူၤ,ဒီးလၢအ့ၤၡတိလးအပူၤ,ဒီးအဒီပုၢ်ဝဲၢ်စံးဘၣ်အီၤ,သုစံးဒ်လဲၣ်.

9ဒီးစံးဝဲဒၣ်,ဂဲၤဆၢထၢၣ်,ဒီးပကလဲၤထီဒါအီၤလီၤ.အဂ့ၢ်ဒ်အံၤ,ပထံၣ်လံအထံအကီၢ်လံ,ဒီးကွၢ်ကွၢ်,ဂ့ၤဝဲဒိၣ်မးလီၤ.ဒီးသုအိၣ်ဃိကလာ်စ့ၢ်ကီးဧါ.ဒ်သိးသုကမၤန့ၢ်ထံဧိၤကီၢ်ဧိၤဒီး,ပာ်ကၢၣ်သုသးတဂ့ၤ.

10ဒီးတုၤသုလဲၤတၢ်ဒီး,သုကလဲၤနုာ်ဆူပှၤဂီၢ်မုၢ်အကျါလၢအတပလီၢ်ဘၣ်အသး,ဒီးလၢကီၢ်ဖးလဲၢ်တဘ့ၣ်အပူၤလီၤ.အဂ့ၢ်ဒ်အံၤ,ယွၤဟ့ၣ်လီၤအီၤလၢသုစုပူၤလံ.တၢ်အလီၢ်ဖဲပှၤန့ၢ်ဘၣ်အါထီၣ်တၢ်တမံၤမံၤလၢဟီၣ်ခိၣ်ချၢအံၤအလီၢ်တအိၣ်ဘၣ်.

11ဒီးပှၤကညီကတဲာ်ကတီၤအသးဒီးပှၤသုးဖိအစုကဝဲၤ,ပှၤဃုကယၤ,လဲၤထီၣ်ဖဲန့ၣ်လၢပှၤဒၣ်ဖိအဒူၣ်ကျါလၢစိးရၤ,ဒီးအ့ၤၡတိလးအပူၤန့ၣ်လီၤ.

12ဒီးလဲၤထီၣ်ဝဲ,ဒီးသူၣ်ဒဲလၢကံးရယးယဧၤရံၣ်လၢယူဒၤအပူၤလီၤ.မၤသးဒ်န့ၣ်ဒီးကိးဝဲအမံၤလၢမၤဃန့ၤဒၣ်တုၤမုၢ်မဆါတနံၤအံၤလီၤ.ကွၢ်ကွၢ်,အိၣ်ဝဲလၢကံးရယးယဧၤရံၣ်အချၢဃံလီၤ.

13ဒီးဟးဖဲန့ၣ်ဆူကစၢၢ်အ့ဖရဲၣ်,ဒီးဟဲပၢၢ်လၢစီၤမံကါအဟံၣ်လီၤ.

14ဒီးပှၤလၢအလဲၤကွၢ်ဟုၣ်ကီၢ်လ့ရှ့ၣ်ယဲၢ်ဂၤန့ၣ်ကတိၤတၢ်ဒီးစံးဘၣ်အဒီပုၢ်ဝဲၢ်,အ့ဖိး,ဒီးတၢ်ဂီၤတရၤဖး,ဒီးတၢ်ဂီၤစိးပျၤအသး,ဒီးတၢ်ဂီၤသိအသးန့ၣ်အိၣ်ဝဲလၢဟံၣ်တဖၣ်အံၤအပူၤန့ၣ်သုသ့ၣ်ညါစ့ၢ်ကီးဧါ.ဒီးခဲကနံၣ်အံၤတၢ်လၢသုကမၤတမံၤန့ၣ်သ့ၣ်ညါတက့ၢ်.

15ဒီးဃၣ်အသးဆူန့ၣ်,ဒီးဟဲဝဲဆူပှၤလ့ၤဝံဖိပှၤဖိၣ်သၣ်ခွါအဟံၣ်,ဆူစီၤမံၤကါအဟံၣ်,ဒီးကတိၤဒိၣ်အီၤလီၤ.

16ဒီးပှၤကတဲာ်ကတီၤအသးဒီးသုးဖိအစုကဝဲၤ,ပှၤဃုကယၤလၢပှၤဒၣ်ဖိအကျါန့ၣ်ဆၢထၢၣ်ဝဲဖဲတၢ်လဲၤနုာ်လၢပဲတရီန့ၣ်လီၤ.

17ဒီးပှၤလၢအလဲၤကွၢ်ဟုၣ်ထံဧိၤကီၢ်ဧိၤယဲၢ်ဂၤန့ၣ်လဲၤထီၣ်ဟဲနုာ်ဖဲန့ၣ်ဒီးဟံးန့ၢ်တၢ်ဂီၤစိးပျၤအသးဒီးအ့ဖိး,ဒီးတၢ်ဂီၤတရၤဖး,ဒီးတၢ်ဂီၤသိအသးလီၤ.ဒီးပှၤလုၢ်တၢ်အဒိၣ်န့ၣ်ဆၢထၢၣ်လၢတၢ်လဲၤနုာ်လၢပဲတရီအိၣ်ဒီးပှၤဃုကယၤကတဲာ်ကတီၤအသးဒီးသုးဖိအစုကဝဲၤလီၤ. 18ဒီးပှၤတဖၣ်န့ၣ်လဲၤနုာ်လၢစီၤမံၤကါအဟံၣ်ပူၤ,ဒီးဟဲစိာ်တၢ်ဂီၤစိးပျၤအသး,အ့းဖိ,ဒီးတၢ်ဂီၤတရၤဖးဒီးတၢ်ဂီၤသိအသးလီၤ.ဒီးပှၤလုၢ်တၢ်အဒိၣ်န့ၣ်စံးဘၣ်အီၤ,သုမၤဒ်လဲၣ်.

19ဒီးစံးဘၣ်အီၤ,အိၣ်ဘှီၣ်ကလာ်တက့ၢ်.ပာ်နစုလၢနထးခိၣ်ဒီးလဲၤတၢ်ဒီးပှၤ,ဒီးကဲထီၣ်ပပၢ်ဒီးပပှၤလုၢ်တၢ်အဒိၣ်တက့ၢ်.နကဲထီၣ်ပှၤလုၢ်တၢ်အဒိၣ်လၢပှၤတဂၤအဂီၢ်ဂ့ၤတက့ၢ်ဧါ,နကဲထီၣ်ပှၤလုၢ်တၢ်အဒိၣ်လၢပှၤတကလုာ်ဒီးပှၤတဒူၣ်လၢအံၣ်စရ့လးအကျါအဂီၢ်န့ၣ်ဂ့ၤတက့ၢ်လဲၣ်.

20ဒီးပှၤလုၢ်တၢ်အဒိၣ်အသးမုာ်ထီၣ်က့ၤ,ဒီးဟံးန့ၢ်အ့ဖိး,ဒီးတၢ်ဂီၤတရၤဖး,ဒီးတၢ်ဂီၤစိးပျၤအသး,ဒီးလဲၤနုာ်လၢပှၤဂီၢ်မုၢ်အကျါလီၤ.

21ဒီးအဝဲသ့ၣ်တဖၣ်န့ၣ်ဃၣ်အသး,ဒီးဟးထီၣ်ဝဲ,ဒီးပာ်ဖိဒံဖိသၣ်,ဒီးဆၣ်ဖိကီၢ်ဖိအဒၢ,ဒီးတၢ်ဖိတၢ်လံၤလၢအမဲာ်ညါလီၤ.

22ဒီးအဝဲသ့ၣ်အိၣ်ယံၤဒီးစီၤမံၤကါအဟံၣ်,ဒီၤပှၤကညီအိၣ်ဝဲလၢဟံၣ်တဖၣ်ဘူးဒီးစီၤမံၤကါအဟံၣ်န့ၣ်အိၣ်ဖှိၣ်ရိဖှိၣ်,ဒီးလဲၤချုးန့ၢ်ပှၤဒၣ်ဖိလီၤ. 23ဒီးကိးထီၣ်ဝဲဆူပှၤဒၣ်ဖိ,ဒီးအဝဲသ့ၣ်ဃၣ်ဃီၤအမဲာ်,ဒီးစံးဘၣ်စီၤမံၤကါ,မနုၤဘၣ်နၤလၢနဟဲဒီးပှၤဂီၢ်မုၢ်ထဲထဲအံၤလဲၣ်.

24ဒီးစံးဝဲဒၣ်,သုစိာ်ထီၣ်ကွံာ်ယကစၢ်တဖၣ်လၢယတ့အီၤ,ဒီးပှၤလုၢ်တၢ်အဒိၣ်,ဒီးသုဟးထီၣ်ကွံာ်,ဒီးတၢ်အိၣ်ဒံးဒီးယၤလၢမနုၤတမံၤလဲၣ်,ဒီးသုစံးဘၣ်ယၤ,မနုၤဘၣ်နၤလဲၣ်န့ၣ်မ့ၢ်မနုၤတမံၤအံၤလဲၣ်.

25ဒီးပှၤဒၣ်ဖိစံးဘၣ်အီၤ,ဒုးနၢ်ဟူနကလုၢ်လၢပကျါတဂ့ၤ,ပှၤအသးဆါတဖၣ်ကဃ့ၢ်သဖှိဘၣ်ဖုးဆူနအိၣ်,ဒီးနသးဒီးနပှၤဟံၣ်ဖိအသးတဖၣ်ကဟါမၢ်လီၤ.

26ဒီးပှၤဒၣ်ဖိလဲၤတၢ်,ဒီးစီၤမံၤကါထံၣ်ဝဲလၢအဝဲသ့ၣ်ဆူၣ်န့ၢ်အီၤတက့ၢ်,ဒီးဃၣ်အသး,ဒီးက့ၤကဒါက့ၤဆူအဟံၣ်လီၤ.

27ဒီးဟံးန့ၢ်တၢ်လၢစီၤမံၤကါတ့လီၤတ့ၢ်အီၤ,ဒီးအပှၤလုၢ်တၢ်အဒိၣ်,ဒီးလဲၤဝဲဆူလ့ရှ့ၣ်,ဆူပှၤဂီၢ်မုၢ်လၢအအိၣ်မုာ်,ဒီးတပလီၢ်ဘၣ်အသးတဖၣ်,ဒီးကျီကွံာ်အီၤလၢနးအကနၣ်,ဒီးဆူးထီၣ်ဝ့ၢ်န့ၣ်လၢမ့ၣ်အူလီၤ.

28ဒီးပှၤမၤပူၤမၤဖျဲးတၢ်တအိၣ်ဘၣ်,အဂ့ၢ်ဒ်အံၤ,အိၣ်ယံၤဝဲဒီးစံဒိၣ်,ဒီးအတၢ်ဘၣ်ဃးဒီးပှၤဂၤတအိၣ်ဘၣ်.ဒီးအိၣ်ဝဲလၢကစၢၢ်ကဆူးဘ့ၤသရဃိာ်အဃၢၤလီၤ.ဒီးတ့လီၤဝ့ၢ်တဝ့ၢ်,ဒီးအိၣ်ဝဲဆိးဝဲလၢအပူၤလီၤ. 29ဒီးယုၢ်ဝဲအမံၤလၢဒၣ်,ဒ်အပၢ်စီၤဒၣ်အမံၤအသိးလၢစီၤအံၣ်စရ့လးထီၣ်ဖိအီၤလီၤ.ဘၣ်ဆၣ်ဒီးလၢအခီၣ်ထံးန့ၣ်ဝ့ၢ်အမံၤမ့ၢ်လ့ရှ့ၣ်လီၤ.

30ဒီးပှၤဒၣ်ဖိပာ်ထူၣ်ကလာ်တၢ်ဂီၤစိးပျၤအသး,ဒီးစီၤမိၤရှ့အဖိခွါ,စီၤက့ရၡိၣ်အဖိခွါစီၤယိနၤသၣ်,အဝဲဒၣ်ဒီးအဖိခွါတဖၣ်မ့ၢ်ပှၤလုၢ်တၢ်အဒိၣ်လၢဒၣ်တကလုာ်အဂီၢ်တုၤလီၤလၢထံဧိၤကီၢ်ဧိၤဘၣ်တၢ်မၤလူၤမၤဝဲၤအီၤလီၤ.

31ဒီးကယဲၢ်မုၢ်နံၤမုၢ်နၤလၢယွၤအဟံၣ်အိၣ်ဝဲဆိးဝဲလၢၡံလိၣ်အပူၤအဖၢမုၢ်န့ၣ်,ပာ်လီၤဝဲလၢစီၤမံၤကါအတၢ်ဂီၤစိးပျၤအသးလၢအတ့အီၤလီၤ.

Copyright information for KswSKMB