‏ Judges 6

1ဒီးပှၤအံၣ်စရ့လးဖိမၤတၢ်အၢလၢယွၤအမဲာ်,ဒီးယွၤဟ့ၣ်လီၤကွံာ်အီၤဆူမံးဒယၣ်အစုပူၤနွံနံၣ်လီၤ.

2ဒီးမံးဒယၣ်အစုမၤနၢၤအံၣ်စရ့လးလီၤ.ဒီးလၢပှၤမံးဒယၣ်ဖိအဃိန့ၣ်ပှၤအံၣ်စရ့လးဖိမၤန့ၣ်ဝဲလၢတၢ်ကဆူးတဖၣ်လၢကစၢၢ်ကလိအကျါ,ဒီးတၢ်အိပူၤ,ဒီးတိာ်တဖၣ်လီၤ.

3ဒီးအံၣ်စရ့လးဖှံတၢ်ဝံၤဒီးတၢ်မၤအသးလၢပှၤမံးဒယၣ်ဖိဟဲဝဲ,ဒီးပှၤဧမၤလ့းဖိ,ဒီးပှၤမုၢ်ထီၣ်ဖိန့ၣ်ဟဲထီဒါအီၤလီၤ. 4ဒီးသူၣ်ဒဲထီဒါအီၤ,ဒီးမၤဟးဂီၤကယဲၢ်ဟီၣ်ခိၣ်အတၢ်အါထီၣ်ပၢၢ်လၢနလဲၤနုာ်ဆူဂါစၤ,ဒီးသိဂ့ၤ,ဂီၤဖံးဂ့ၤ,ကသ့ၣ်ယီၤဂ့ၤ,တပာ်လီၤတဲာ်ဘၣ်လၢအံၣ်စရ့လးအဂီၢ်ဘၣ်.

5အဂ့ၢ်ဒ်အံၤ,အဝဲသ့ၣ်ဟဲထီၣ်ဒီးအဆၣ်ဖိကီၢ်ဖိအဒၢ,ဒီးအဒဲတဖၣ်,ဒီးဟဲအါဝဲဒ်ဒွဲၣ်ဧိၤသကံၤဧိၤအသိးန့ၣ်လီၤ.အဝဲသ့ၣ်ဒီးအကီၤလၤအူးသ့ၣ်တဖၣ်န့ၣ်ပှၤဂံၢ်အီၤတသ့ဘၣ်,ဒီးဟဲနုာ်ထံဧိၤကီၢ်ဧိၤအပူၤဒ်သိးအကမၤဟးဂီၤအီၤလီၤ. 6ဒီးပှၤအံၣ်စရ့လးဖိဘၣ်ဖှီၣ်နးနးကလဲာ်လၢပှၤမံးဒယၣ်ဖိအဃိလီၤ.ဒီးပှၤအံၣ်စရ့လးဖိကိးထီၣ်ယွၤလီၤ.

7ဒီးတုၤပှၤအံၣ်စရ့လးဖိကိးထီၣ်ယွၤလၢပှၤမံးဒယၣ်ဖိအဃိဒီး, 8တၢ်မၤအသးလၢယွၤမၢလီၤဝံတဂၤဆူပှၤအံၣ်စရ့လးဖိအအိၣ်လၢအစံးဘၣ်အီၤ,ယွၤအံၣ်စရ့လးအကစၢ်စံးတၢ်ဒ်အံၤ,ယဒုးဟဲထီၣ်သုလၢအဲၤကူပတူး,ဒီးယဒုးဟဲထီၣ်သုလၢပှၤကုၢ်ဖိအဟံၣ်ပူၤ, 9ဒီးယမၤပူၤမၤဖျဲးသုလၢပှၤအဲၤကူပတူးဖိအစုပူၤ,ဒီးလၢကယဲၢ်ပှၤလၢအမၤနးမၤဖှီၣ်သုအစုပူၤခဲလၢာ်,ဒီးယဟီထီၣ်ကွံာ်အီၤလၢသုမဲာ်ညါ,ဒီးဟ့ၣ်လီၤသုလၢအထံအကီၢ်, 10ဒီးယစံးဘၣ်သု,ယဲဒၣ်အံၤယမ့ၢ်ယွၤသုကစၢ်လီၤ,ပျံၤပှၤအမိၢ်ဖိအကစၢ်တဖၣ်လၢသုအိၣ်လၢအကီၢ်ပူၤတဂ့ၤ.ဘၣ်ဆၣ်ဒီးသုတဒိကနၣ်ဘၣ်ယကလုၢ်ဘၣ်.

11ဒီးယွၤအကလူးန့ၣ်ဟဲဆ့ၣ်နီၤလၢသ့ထိးဖၣ်တထံးအဖီလာ်လၢအအိၣ်ဝဲလၢဧိၤဖြၤဘၣ်ဃးဒီးပှၤအဘံၤဧ့စ့ၢ်ဖိစီၤယိၤအၣ်လီၤ.ဒီးအဖိခွါစီၤကံးဒဧိၣ်တီၢ်ဘူကၠူၣ်လၢနီၣ်စံၢ်စပံးသၣ်အပူၤ,ဒ်သိးအကပာ်ခူသူၣ်အီၤဒီးပှၤမံးဒယၣ်ဖိန့ၣ်လီၤ.

12ဒီးယွၤအကလူးန့ၣ်လီၣ်ဖျါထီၣ်အသးလၢအမဲာ်ညါ,ဒီးစံးဘၣ်အီၤ,ယွၤအိၣ်ဒီးနၤ,ပှၤသုးဖိအဆူၣ်တဂၤဧၢ.

13ဒီးစီၤကံးဒဧိၣ်စံးဘၣ်အီၤ,ယကစၢ်ဧၢ,ယွၤမ့ၢ်အိၣ်ဒီးပှၤဒီး,တၢ်ခဲလၢာ်အံၤဘၣ်ပှၤမ့ၢ်အဘၣ်မနုၤလဲၣ်.ဒီးအတၢ်လီၤလးခဲလၢာ်လၢပပၢ်စံၣ်တဲၤတဲလီၤပှၤ,ဒီးစံးဝဲ,ယွၤဒုးဟဲထီၣ်ပှၤလၢအဲၤကူပတူးအပူၤ,တမ့ၢ်ဘၣ်ဧါန့ၣ်,မ့ၢ်အအိၣ်ဖဲလဲၣ်.မ့မ့ၢ်ခဲကနံၣ်အံၤယွၤလဲၤသဒၣ်လံပှၤလံ,ဒီးဟ့ၣ်လီၤကွံာ်လံပှၤလၢပှၤမံးဒယၣ်ဖိအစုပူၤလံ.

14ဒီးယွၤကွၢ်အီၤ,ဒီးစံးဝဲဒၣ်,လဲၤတၢ်လၢနဂံၢ်ဆူၣ်နဘါဆူၣ်အံၤတက့ၢ်.ဒီးနကအုၣ်က့ၤခီၣ်က့ၤအံၣ်စရ့လးလၢပှၤမံးဒယၣ်ဖိအစုပူၤလီၤ.ယမၢလီၤနၤတမ့ၢ်ဘၣ်ဧါ.

15ဒီးအဝဲဒၣ်စံးဘၣ်အီၤ,ယကစၢ်ဧၢ,ယကအုၣ်က့ၤခီၣ်က့ၤအံၣ်စရ့လးလၢမနုၤတမံၤလဲၣ်.ကွၢ်ကွၢ်,ယမ့ၢ်ပှၤဖှီၣ်ဖိယာ်ဖိလၢမနၤရှ့ၤအပူၤ,ဒီးယဲဒၣ်အံၤယမ့ၢ်ပှၤအဆံးကတၢၢ်လၢယပၢ်အပှၤဟံၣ်ဖိအကျါလီၤ.

16ဒီးယွၤစံးဘၣ်အီၤ,မ့ၢ်မးယကအိၣ်ဒီးနၤ,ဒီးနကကျီကွံာ်ပှၤမံးဒယၣ်ဖိဒ်ပှၤတဂၤဧိၤအသိးန့ၣ်လီၤ. 17ဒီးအဝဲဒၣ်စံးဘၣ်အီၤ,ယမ့ၢ်ဘၣ်ဘျုးဘၣ်ဖှိၣ်လၢနမဲာ်ညါဒီး,ဒုးနဲၣ်လၢ်ယၤလၢတၢ်အပနီၣ်လီၤလးတမံၤ,လၢနကတိၤတၢ်ဒီးယၤန့ၣ်တက့ၢ်. 18သုတဟးထီၣ်လၢ်ဖဲန့ၣ်တုၤယဟဲက့ၤဆူနအိၣ်,ဒီးဟဲစိာ်ယခိၣ်ဖး,ဒီးပာ်လီၤလၢနမဲာ်ညါန့ၣ်တဂ့ၤ.ဒီးစံးဝဲဒၣ်,ယကအိၣ်တုၤနဟဲက့ၤလီၤ.

19ဒီးစီၤကံးဒဧိၣ်လဲၤနုာ်,ဒီးကတဲာ်ကတီၤမဲာ်တဲးလဲးဖိတဒု,ဒီးကိၣ်ဘ့ၣ်ဘၣ်တအိၣ်ဒီးကိၣ်မံၣ်လၢကိၣ်ကမူၣ်တအ့ဖးလီၤ.တၢ်ညၣ်န့ၣ်ပာ်ဝဲလၢနာ်တဖျၢၣ်အပူၤဒီးတၢ်ညၣ်အထံန့ၣ်ပာ်ဝဲလၢသပၢၤပူၤ,ဒီးဟဲစိာ်ဝဲဆူအအိၣ်လၢသ့ထိးဖၣ်အဖီလာ်,ဒီးပာ်လီၤဝဲလီၤ.

20ဒီးယွၤအကလူးန့ၣ်စံးဘၣ်အီၤ,ဟံးန့ၢ်တၢ်ညၣ်,ဒီးကိၣ်ဘ့ၣ်ဘၣ်တအိၣ်ဒီးကိၣ်မံၣ်,ဒီးပာ်အီၤလၢလၢၢ်တဖျၢၣ်အံၤအဖီခိၣ်,ဒီးလူလီၤတၢ်ညၣ်အထံန့ၣ်တက့ၢ်ဒီးမၤဝဲဒ်န့ၣ်လီၤ.

21ဒီးယွၤအကလူးန့ၣ်ယူာ်ထီၣ်နီၣ်ထိးဘိအနါစ့ၤလၢအအိၣ်လၢအစုပူၤ,ဒီးထိးတၢ်ညၣ်ဒီးကိၣ်ဘ့ၣ်ဘၣ်တအိၣ်ဒီးကိၣ်မံၣ်တဖၣ်န့ၣ်ဒီးမ့ၣ်အူဟဲထီၣ်လၢလၢၢ်ပူၤ,ဒီးအီၣ်ကွံာ်တၢ်ညၣ်,ဒီးကိၣ်ဘ့ၣ်ဘၣ်တအိၣ်ဘၣ်ဒီးကိၣ်မံၣ်တဖၣ်န့ၣ်လီၤ.ဒီးယွၤအကလူးန့ၣ်ဟးထီၣ်ကွံာ်လၢအမဲာ်ညါလီၤ.

22ဒီးတုၤစီၤကံးဒဧိၣ်ထံၣ်ဘၣ်ဝဲလၢအမ့ၢ်ယွၤအကလူးဒီးစီၤကံးဒဧိၣ်စံးဝဲဒၣ်,အၣ်လါ,ကစၢ်ယွၤဧၢ,မ့ၢ်ယကွၢ်ဆၢညါဒီးယွၤအကလူးန့ၣ်အဂ့ၢ်လီၤ. 23ဒီးယွၤစံးဘၣ်အီၤ,မ်နဘၣ်တၢ်အမုာ်တက့ၢ်.ဘၣ်ယိၣ်တၢ်တဂ့ၤ,နတသံဘၣ်.

24ဒီးစီၤကံးဒဧိၣ်မၤတၢ်လုၢ်လီၢ်ဖဲန့ၣ်လၢယွၤအဂီၢ်,ဒီးယုၢ်ဝဲအမံၤလၢယွၤၡၤလိၣ်လီၤ.အိၣ်ဒံးတုၤမုၢ်မဆါတနံၤအံၤလၢဧိးဖြၤလၢပှၤအဘံၤဧ့စ့ၢ်ဖိအကျါန့ၣ်လီၤ. 25ဒီးတၢ်မၤအသးလၢမုၢ်တနၤန့ၣ်လၢယွၤစံးဘၣ်အီၤ,ဟံးန့ၢ်နပၢ်အဂီၤဖံးလၢအသးပှၢ်နွံနံၣ်,ခံဒုတဒု,ဒီးမၤလီၤပှီၢ်ကွံာ်ဘဧၤလးအတၢ်လုၢ်လီၢ်လၢအအိၣ်ဒီးနပၢ်,ဒီးကူာ်လီၤကွံာ်အရှ့ရၤအိၣ်လၢအဃၢၤ, 26ဒီးမၤထီၣ်တၢ်လုၢ်လီၢ်လၢယွၤနကစၢ်အဂီၢ်လၢတိာ်တဖျၢၣ်အံၤအဖီခိၣ်,ကတဲာ်ကတီၤတၢ်,ဒီးဟံးန့ၢ်ဂီးဖံးခံဒုတဒု,ဒီးလုၢ်တၢ်လုၢ်မ့ၣ်အူလၢအရှ့ရၤအသ့ၣ်လၢနကူာ်လီၤကွံာ်န့ၣ်တက့ၢ်.

27ဒီးစီၤကံးဒဧိၣ်ဟံးန့ၢ်ပှၤကညီဆံဆဲၣ်ဂၤလၢအခ့အပှၤအကျါ,ဒီးမၤဝဲဒ်ယွၤကတိၤတၢ်ဒီးအီၤအသိးန့ၣ်လီၤ.ဒီးမ့ၢ်အပျံၤအပၢ်အပှၤဟံၣ်ဖိ,ဒီးပှၤဝ့ၢ်ဖိဒီး,မၤဝဲလၢမုၢ်ဆါခီတသ့ဘၣ်.ဒီးမၤဝဲလၢမုၢ်နၤလီၤ.

28ဒီးမုၢ်ဆ့ၣ်ထီၣ်န့ၣ်ပှၤဝ့ၢ်ဖိဂဲၤဆၢထၢၣ်ဂီၤဂီၤ,ဒီးကွၢ်ကွၢ်,ဘဧၤလးအတၢ်လုၢ်လီၢ်လီၤပှီၢ်ကွံာ်လံ.ဒီးအရှ့ရၤအိၣ်လၢအဃၢၤန့ၣ်ဘၣ်တၢ်ကူာ်လီၤကွံာ်လံအီၤလံ.ဒီးဂီၤဖံးခံဒုတဒုဘၣ်တၢ်လုၢ်လံအီၤလၢတၢ်လုၢ်လီၢ်လၢတၢ်မၤအီၤအဖီခိၣ်လံ.

29ဒီးကတိၤလိာ်အသးတဂၤဒီးတဂၤ,မ့ၢ်မတၤမၤတၢ်အံၤတဂၤလဲၣ်.ဒီးဃုတၢ်,ဒီးသံကွၢ်တၢ်,ဒီးစံးဝဲဒၣ်,စီၤယိၤအၣ်အဖိခွါစီၤကံးဒဧိၣ်မၤတၢ်အံၤလီၤ.

30ဒီးပှၤဝ့ၢ်ဖိစံးဘၣ်စီၤယိၤအၣ်,ဟဲစိာ်နဖိခွါဒ်သိးအကသံန့ၣ်တက့ၢ်.အဂ့ၢ်ဒ်အံၤ,မၤလီၤပှီၢ်ကွံာ်လံဘဧၤလးအတၢ်လုၢ်လီၢ်လံ.ဒီးအဂ့ၢ်ဒ်အံၤ,ကူာ်လီၤကွံာ်လံအရှ့ရၤလၢအအိၣ်လၢအဃၢၤလံ.

31ဒီးစီၤယိၤအၣ်စံးဘၣ်ကယဲၢ်ပှၤလၢအဆၢထၢၣ်ထီဒါအီၤခဲလၢာ်န့ၣ်,သုကကတိၤကွီၢ်လၢဘဧၤလးအဂီၢ်စ့ၢ်ကီးဧါ,သုကအုၣ်က့ၤခီၣ်က့ၤအီၤစ့ၢ်ကီးဧါ.ပှၤလၢအကကတိၤကွီၢ်လၢအဂီၢ်န့ၣ်,မ်အသံလၢမုၢ်ဂီၤဒံးအဖၢမုၢ်အံၤတက့ၢ်.မ့မ့ၢ်ကစၢ်တဂၤဒီး,ကကတိၤကွီၢ်လၢအဂီၢ်ဒၣ်ဝဲလီၤ.အဂ့ၢ်ဒ်အံၤ,ပှၤမၤလီၤပှီၢ်ကွံာ်အတၢ်လုၢ်လီၢ်န့ၣ်လီၤ.

32ဒီးတၢ်လၢမုၢ်တနံၤန့ၣ်,ပှၤယုၢ်ဝဲအမံၤလၢစီၤယရူဘဧၤလး,ဒ်ပစံးတၢ်အသိး,မ်ဘဧၤလးကတိၤကွီၢ်ဒီးအီၤတက့ၢ်.အဂ့ၢ်ဒ်အံၤ,မၤလီၤပှီၢ်ကွံာ်လံအတၢ်လုၢ်လီၢ်လံ.

33ဒီးကယဲၢ်ပှၤမံးဒယၣ်ဖိ,ဒီးပှၤဧမၤလ့းဖိဒီးပှၤမုၢ်ထီၣ်ဖိအိၣ်ဖှိၣ်ရိဖှိၣ်,ဒီးလဲၤခီဂာ်တၢ်,ဒီးသူၣ်ဒဲလၢတၢ်ပျီပူၤယံးစရ့လးအပူၤလီၤ.

34ဒီးတၢ်ဒုးသိးစီၤကံဒဧိၣ်လၢယွၤအသး,ဒီးအဝဲဒၣ်အူကွဲၤ,ဒီးပှၤအဘံၤဧ့စ့ၢ်ဖိအိၣ်ဖှိၣ်ရိဖှိၣ်ထွဲအခံလီၤ.

35ဒီးမၢလီၤကလူးတဖၣ်လဲၤလၢပှၤမနၤရှ့ၤဖိခဲလၢာ်အကျါဒီးအဝဲသ့ၣ်အိၣ်ဖှိၣ်ရိဖှိၣ်စ့ၢ်ကီးထွဲအခံ,ဒီးမၢလီၤကလူးတဖၣ်လၢပှၤအၤရှ့ၢ်ဖိအကျါ,ဒီးလၢပှၤစဘူလိၣ်ဖိအကျါ,ဒီးလၢနးသၤလံဖိအကျါ,ဒီးအဝဲသ့ၣ်ဟဲသဂၢၢ်အီၤလီၤ.

36ဒီးစီၤကံးဒဧိၣ်စံးဘၣ်ယွၤ,နမ့ၢ်အုၣ်က့ၤခီၣ်က့ၤအံၣ်စရ့လးလၢယစုပူၤဒ်နစံးတ့ၢ်အသိးန့ၣ်ဒီး, 37ကွၢ်ကွၢ်,ယကပာ်လီၤသိအဆူၣ်တလိၣ်လၢကြဲၢ်ပူၤလီၤ.ပစီၤထံမ့ၢ်အိၣ်ထဲလၢသိအဆူၣ်တလိၣ်အလိၤဧိၤ,ဒီးဃ့ဝဲလၢဟီၣ်ခိၣ်ခဲလၢာ်အဖီခိၣ်ဒီး,ယကသ့ၣ်ညါလၢနကအုၣ်က့ၤခီၣ်က့ၤအံၣ်စရ့လးလၢယစုပူၤ,ဒ်နစံးတ့ၢ်အသိးန့ၣ်လီၤ.

38ဒီးတၢ်မၤအသးဒ်န့ၣ်လီၤ.ဒီးမုၢ်ဆ့ၣ်ထီၣ်န့ၣ်ဂဲၤဆၢထၢၣ်ဂီၤဂီၤဒီးစံၢ်သိအဆူၣ်တလိၣ်ဒီးဝံာ်လီၤကွံာ်ပစီၤထံလၢသိအဆူၣ်တလိၣ်အပူၤန့ၣ်ပှဲၤသလၢတဖျၢၣ်လီၤ.

39ဒီးစီၤကံးဒဧိၣ်စံးဘၣ်ယွၤ,မ်နသးထီၣ်အသုတကဲၤထီၣ်ဘၣ်ယၤတဂ့ၤ,ယကကတိၤတၢ်ထဲတဘီအံၤ,ဒုးမၤကွၢ်ယၤလၢနၤထဲတဘျီအံၤလၢသိအဆူၣ်တလိၣ်န့ၣ်တက့ၢ်.မ်တၢ်ဃ့ထဲလၢသိအဆူၣ်တလိၣ်အလိၤဧိၤန့ၣ်ဒီးပစီၤထံအိၣ်ဝဲလၢဟီၣ်ခိၣ်န့ၣ်ခဲလၢာ်တက့ၢ်.

40ဒီးလၢမုၢ်တနံၤန့ၣ်ယွၤမၤဝဲဒ်န့ၣ်,ဒီးတၢ်ဃ့ထဲလၢသိအဆူၣ်တလိၣ်အလိၤဧိၤ,ဒီးပစီၤထံအိၣ်ဝဲလၢဟီၣ်ခိၣ်န့ၣ်ခဲလၢာ်လီၤ.