‏ Judges 9

1ဒီးစီၤယရူဘဧၤလးအဖိခွါစီၤအဘံၤမ့လ့းလဲၤဝဲဆူၡက့ၣ်အပူၤ,ဆူအမိၢ်အဒီပုၢ်ဝဲၢ်အအိၣ်,ဒီးကတိၤလိာ်အသးဒီးအီၤ,ဒီးအမိၢ်အပၢ်အပှၤဟံၣ်ဖိခဲလၢာ်,ဒီးစံးဝဲဒၣ်, 2ကတိၤတၢ်လၢပှၤၡက့ၣ်ဖိခဲလၢာ်အနၢ်ပူၤ,စီၤယရူဘဧၤလးအဖိခွါပှၤနွံဆံခဲလၢာ်ပၢသုဂ့ၤတက့ၢ်ဧါ,ပှၤတဂၤဃီပၢသုဂ့ၤတက့ၢ်လဲၣ်.ဒီးသ့ၣ်နီၣ်ထီၣ်က့ၤလၢယမ့ၢ်သုဃံဒီးသုညၣ်တက့ၢ်.

3ဒီးအမိၢ်အဒီပုၢ်ဝဲၢ်တဖၣ်ကတိၤတၢ်ကတိၤခဲလၢာ်န့ၣ်လၢအဂ့ၢ်အကျိၤလၢပှၤၡက့ၣ်ဖိတဖၣ်အနၢ်ပူၤ,ဒီးအသးအိၣ်လၢအကပိာ်စီၤအဘံၤမ့လ့းအခံလီၤ.အဂ့ၢ်ဒ်အံၤ,စံးဝဲ,အဝဲဒၣ်မ့ၢ်ပဒီပုၢ်ဝဲၢ်လီၤ.

4ဒီးဟ့ၣ်လီၤဝဲလၢအီၤလၢစ့အဘ့ၣ်နွံဆံလၢဘဧၤလးဘရံးအဟံၣ်ပူၤလီၤ.ဒီးစီၤအဘံၤမ့လ့းငါဝဲလၢစ့န့ၣ်လၢပှၤကလီကလီဒီးပှၤမၤတရီတပါတၢ်တဖၣ်လၢအပိာ်အခံလီၤ.

5ဒီးလဲၤဝဲဆူအပၢ်အဟံၣ်လၢဧိးဖြၤ,ဒီးမၤသံအဒီပုၢ်ဝဲၢ်စီၤယရူဘဧၤလးအဖိခွါ,ပှၤနွံဆံလၢလၢၢ်တဖျၢၣ်ဃီအဖီခိၣ်လီၤ.ဘၣ်ဆၣ်ဒီးစီၤယရူဘဧၤလးအဖိသဒါစီၤယိၤသၣ်အိၣ်လီၤတဲာ်ဝဲလီၤ.အဂ့ၢ်ဒ်အံၤ,ပာ်ခူသူၣ်အသးလီၤ.

6ဒီးပှၤၡက့ၣ်ဖိခဲလၢာ်အိၣ်ဖှိၣ်ရိဖှိၣ်,ဒီးကယဲၢ်မံးလိၤအဟံၣ်ဖိ,ဒီးလဲၤဝဲ,ဒီးပာ်စီၤအဘံၤမ့လ့းလၢစီၤပၤလၢတၢ်ထူၣ်အသ့ထိးဖၣ်အခီၣ်ထံးလၢအအိၣ်ဝဲလၢၡက့ၣ်အပူၤလီၤ.

7ဒီးပှၤစံးဘၣ်စီၤယိၤသၣ်,ဒီးအဝဲဒၣ်လဲၤတၢ်ဒီးဆၢထၢၣ်လၢကစၢၢ်ကရံးစံၣ်အဒီခိၣ်,ဒီးထုထီၣ်အကလုၢ်,ဒီးကိးထီၣ်,ဒီးစံးဘၣ်အီၤ,ကနၣ်ယကလုၢ်တက့ၢ်,ၡက့ၣ်အပှၤကညီသ့ၣ်ဧၢ,ဒ်သိးယွၤကကနၣ်သုကလုၢ်အဂ့ၢ်လီၤ.

8သ့ၣ်ဧိၤဝၣ်ဧိၤလဲၤဒီးလဲၤတၢ်,ဒ်သိးအကဖှူစီၤပၤတဂၤလၢအဖီခိၣ်,ဒီးစံးသ့ၣ်စၤယံး,ပၢပှၤတက့ၢ်. 9ဒီးသ့ၣ်စၤယံးန့ၣ်စံးဘၣ်အီၤ,ယကလဲၤသဒၣ်ယသိလၢပှၤမၤလၤကပီၤယွၤဒီးပှၤကညီလၢအီၤ,ဒီးလဲၤဟူးဝးလၢသ့ၣ်ဧိၤဝၣ်ဧိၤအဖီခိၣ်စ့ၢ်ကီးဧါ.

10ဒီးသ့ၣ်ဧိၤဝၣ်ဧိၤန့ၣ်စံးဘၣ်ချၢၣ်ဒၢ,ဟဲနဲ,ပၢပှၤတက့ၢ်. 11ဒီးချၢၣ်ဒၢန့ၣ်စံးဘၣ်အီၤ,ယကလဲၤသဒၣ်ယတၢ်အဆၢ,ဒီးယသၣ်အဂ့ၤ,ဒီးလဲၤဟူးဝးလၢသ့ၣ်ဧိၤဝၣ်ဧိၤအဖီခိၣ်စ့ၢ်ကီးဧါ.

12ဒီးသ့ၣ်ဧိၤဝၣ်ဧိၤန့ၣ်စံးဘၣ်စပံးမုၢ်,ဟဲနဲ,ပၢပှၤတက့ၢ်. 13ဒီးစပံးမုၢ်န့ၣ်စံးဘၣ်အီၤ,ယကလဲၤသဒၣ်ယစပံးထံလၢအဒုးသးခုယွၤဒီးပှၤကညီ,ဒီးလဲၤဟူးဝးလၢသ့ၣ်ဧိၤဝၣ်ဧိၤအဖီခိၣ်စ့ၢ်ကီးဧါ.

14ဒီးသ့ၣ်ဧိၤဝၣ်ဧိၤခဲလၢာ်န့ၣ်စံးဘၣ်မးတီၢ်အၤတၤ,ဟဲနဲ,ပၢပှၤတက့ၢ်. 15ဒီးမးတီၢ်အၤတၤန့ၣ်စံးဘၣ်သ့ၣ်ဧိၤဝၣ်ဧိၤ,သုမ့ၢ်ဖှူယၤလၢစီၤပၤလၢသုဖီခိၣ်နီၢ်နီၢ်ဒီး,ဟဲသန့ၤသုသးလၢယကဒုပူၤတက့ၢ်.ဒီးမ့တမ့ၢ်ဘၣ်ဒီး,မ်မ့ၣ်အူဟဲထီၣ်လၢမးတီၢ်အၤတၤအပူၤ,ဒီးအီၣ်ကွံာ်လဘၤနိၣ်အသ့ၣ်ဆှိအ့ရ့းန့ၣ်တက့ၢ်.

16ဒီးခဲကနံၣ်အံၤလၢသုပာ်စီၤအဘံၤမ့လ့းစီၤပၤန့ၣ်လၢသုမ့ၢ်မၤဒီးတၢ်အမ့ၢ်အတီဒီးတၢ်အလၢအပှဲၤဒီး,သုမ့ၢ်မၤဂ့ၤစီၤယရူဘဧၤလး,ဒီးအပှၤဟံၣ်ဖိ,ဒီးမၤအီၤ,ဒ်အစုကြၢးဝဲအသိးန့ၣ်ဒီး, 17(အဂ့ၢ်ဒ်အံၤ,ယပၢ်ဒုးတၢ်လၢသုဂီၢ်,ဒီးညိကွံာ်အသးလၢသုဂီၢ်,ဒီးမၤပူၤမၤဖျဲးသုဒီးမံးဒယၣ်အစုပူၤလီၤ. 18ဒီးသုဂဲၤဆၢထၢၣ်ထီဒါယပၢ်အပှၤဟံၣ်ဖိလၢမုၢ်မဆါတနံၤအံၤ,ဒီးမၤသံလံအဖိခွါပှၤနွံဆံလၢလၢၢ်တဖျၢၣ်ဃီအဖီခိၣ်,ဒီးပာ်လံအကုၢ်ပိာ်မုၣ်အဖိခွါစီၤအဘံၤမ့လ့းလၢပှၤၡက့ၣ်ဖိတဖၣ်အစီၤပၤလီၤ.အဂ့ၢ်ဒ်အံၤ,မ့ၢ်သုဒီပုၢ်ဝဲၢ်တဂၤလီၤ). 19ဒီးသုမ့ၢ်မၤစီၤယရူဘဧၤလးဒီးအပှၤဟံၣ်ဖိဒီးတၢ်မ့ၢ်တၢ်တီ,ဒီးတၢ်အလၢအပှဲၤလၢမုၢ်မဆါတနံၤအံၤဒီး,သးခုလၢစီၤအဘံၤမ့လ့းအပူၤ,ဒီးမ်အဝဲဒၣ်သးခုလၢသုပူၤတက့ၢ်. 20မ့တမ့ၢ်ဘၣ်ဒ်န့ၣ်ဒီး,မ်မ့ၣ်အူဟဲထီၣ်လၢစီၤအဘံမ့လ့းအပူၤဒီးအီၣ်ကွံာ်ပှၤၡက့ၣ်ဖိတဖၣ်,ဒီးမံးလိၤအပှၤဟံၣ်ဖိ,ဒီးမ်မ့ၣ်အူဟဲထီၣ်လၢပှၤၡက့ၣ်ဖိအပူၤ,ဒီးလၢမံးလိၤအပှၤဟံၣ်ဖိအပူၤ,ဒီးအီၣ်ကွံာ်စီၤအဘံၤမ့လ့းန့ၣ်တက့ၢ်.

21ဒီးစီၤယိၤသၣ်န့ၣ်ဟးထီၣ်ကွံာ်,ဒီးဃ့ၢ်တၢ်,ဒီးလဲၤဝဲဆူဘ့ၢ်,ဒီးအိၣ်ဝဲဆိးဝဲဖဲန့ၣ်လၢအဒီပုၢ်ဝဲၢ်စီၤအဘံၤမ့လ့းအဃိန့ၣ်လီၤ.

22ဒီးစီၤအဘံၤမ့လ့းပၢအံၣ်စရ့လးသၢနံၣ်, 23ဒီးယွၤမၢလီၤသးအၢတဂၤလၢစီၤအဘံၤမ့လ့းဒီးပှၤၡက့ၢ်ဖိတဖၣ်အဘၢၣ်စၢၤ,ဒီးပှၤၡက့ၣ်ဖိတဖၣ်မၤစီၤအဘံၤမ့လ့းဒီးလီတၢ်, 24ဒ်သိးတၢ်မၤအၢစီၤယရူဘဧၤလးအဖိခွါပှၤနွံဆံန့ၣ်ကဟဲ,ဒီးဒ်သိးအသွံၣ်ကဘၣ်အဒီပုၢ်ဝဲၢ်စီၤအဘံၤမ့လ့းလၢအမၤသံအီၤ,ဒီးဘၣ်ပှၤၡက့ၣ်ဖိတဖၣ်လၢအမၤစၢၤအီၤလၢအမၤသံအဒီပုၢ်ဝဲၢ်အပူၤန့ၣ်လီၤ.

25ဒီးပှၤၡက့ၣ်ဖိတဖၣ်ပာ်ပှၤခိးခူသူၣ်တၢ်လၢကစၢၢ်ခိၣ်,ဒီးအဝဲသ့ၣ်မၤန့ၢ်ဆူၣ်ကယဲၢ်ပှၤလၢအလဲၤပူၤတၢ်လၢအဃၢၤခဲလၢာ်အတၢ်လီၤ.ဒီးပှၤစံးဘၣ်တဲဘၣ်စီၤအဘံၤမ့လ့းလီၤ.

26ဒီးစီၤဧ့ဘ့းအဖိခွါစီၤကၤလးဟဲဝဲဒီးအဒီပုၢ်ဝဲၢ်,ဒီးလဲၤပူၤကွံာ်ဆူၡက့ၣ်,ဒီးပှၤၡက့ၣ်ဖိတဖၣ်န့ၣ်သန့ၤအသးလၢအီၤလီၤ.

27ဒီးလဲၤဝဲဆူစံာ်ဧိၤပျီဧိၤ,ဒီးထၢဖှိၣ်တၢ်လၢအစပံးလီၢ်,ဒီးယီၢ်တၢ်,ဒီးမၤသးခုအသး,ဒီးလဲၤနုာ်လၢအကစၢ်အဟံၣ်ပူၤ,ဒီးအီၣ်တၢ်ဒီးအီတၢ်,ဒီးဆိၣ်အၢစီၤအဘံၤမ့လ့းလီၤ.

28ဒီးစီၤဧ့ဘ့းအဖိခွါစီၤကၤလးန့ၣ်စံးဝဲဒၣ်,စီၤအဘံၤမ့လ့းန့ၣ်မ့ၢ်မတၤတဂၤလဲၣ်,ဒီးၡက့ၣ်အံၤမ့ၢ်မတၤလၢပကမၤအတၢ်န့ၣ်တဂၤလဲၣ်.မ့ၢ်စီၤယရူၤဘဧၤလးအဖိခွါ,တမ့ၢ်ဘၣ်ဧါ.ဒီးစီၤစဘူလးမ့ၢ်အပှၤကွၢ်တၢ်တဂၤ,တမ့ၢ်ဘၣ်ဧါ.မၤစီၤၡက့ၣ်အပၢ်စီၤဃမိၢ်အပှၤကညီအတၢ်တက့ၢ်.ပကမၤအဝဲဒၣ်အတၢ်မ့ၢ်အဘၣ်မနုၤလဲၣ်. 29မ်ပှၤဂီၢ်မုၢ်အံၤအိၣ်လၢယစုအဖီလာ်တက့ၢ်.ဒီးယကသုးကွံာ်စီၤအဘံၤမ့လ့းလီၤ.ဒီးစံးဘၣ်စီၤအဘံၤမ့လ့းန့ၣ်မၤအါထီၣ်နပှၤသုးမုၢ်,ဒီးဟဲထီၣ်တက့ၢ်. 30ဒီးဝ့ၢ်အပဒိၣ်ဖးဒိၣ်စီၤစဘူလးန့ၣ်နၢ်ဟူစီၤဧ့ဘ့းအဖိခွါစီၤကၤလးအတၢ်ကတိၤ,ဒီးအသးထီၣ်လီၤ. 31ဒီးမၢကလူးတဖၣ်လဲၤခူသူၣ်ဆူစီၤအဘံၤမ့လ့းအအိၣ်,ဒီးစံးဝဲဒၣ်,ကွၢ်ကွၢ်,စီၤဧ့ဘ့းအဖိခွါစီၤကၤလးဒီးအဒီပုၢ်ဝဲၢ်တဖၣ်ဟဲတုၤလၢၡက့ၣ်,ဒီးကွၢ်ကွၢ်,မၤတံာ်မၤတာ်ဝ့ၢ်ထီဒါနၤလီၤ. 32ဒီးခဲကနံၣ်အံၤဂဲၤဆၢထၢၣ်လၢမုၢ်နၤ,နဲဒၣ်ဒီးပှၤအိၣ်ဒီးနၤ,ဒီးအိၣ်ခိးခူသူၣ်လၢစံာ်ဧိၤပျီဧိၤအပူၤတက့ၢ်. 33ဒီးမုၢ်ဆ့ၣ်ထီၣ်န့ၣ်တုၤမုၢ်ဟဲထီၣ်ဒီး,တၢ်ကမၤအသးလၢနကဂဲၤဆၢထၢၣ်ဂီၤဂီၤ,ဒီးသလၣ်ထီၣ်တၢ်လၢဝ့ၢ်အမဲာ်ညါ,ဒီးကွၢ်ကွၢ်,အဝဲဒၣ်ဒီးပှၤအိၣ်ဒီးအီၤကဟဲထီၣ်ဆူနအိၣ်,ဒီးနကမၤဘၣ်အီၤဒ်နစုကထံၣ်န့ၢ်တၢ်အသိးန့ၣ်လီၤ.

34ဒီးစီၤအဘံၤမ့လ့းဂဲၤဆၢထၢၣ်ဒီးပှၤအိၣ်ဒီးအီၤခဲလၢာ်လၢမုၢ်နၤ,ဒီးခိးခူသူၣ်တၢ်လၢၡက့ၣ်အမဲာ်ညါလၢပှၤလွံၢ်ဖုလီၤ.

35ဒီးစီၤဧ့ဘ့းအဖိခွါစီၤကၤလးဟးထီၣ်,ဒီးဆၢထၢၣ်လၢတၢ်လဲၤနုာ်လၢဝ့ၢ်အပဲတရီအပူၤ,ဒီးစီၤအဘံၤမ့လ့းဂဲၤထၢၣ်ဒီးပှၤအိၣ်ဒီးအီၤလၢအအိၣ်ခိးခူသူၣ်တၢ်အပူၤလီၤ.

36ဒီးစီၤကၤလးန့ၣ်ထံၣ်ပှၤဂီၢ်မုၢ်,ဒီးစံးဘၣ်စီၤစဘူလး,ကွၢ်ကွၢ်,ပှၤဟဲလီၤလၢကစၢၢ်ခိၣ်လီၤ.ဒီးစီၤစဘူလးစံးဘၣ်အီၤ,နထံၣ်ဘၣ်ကစၢၢ်ကလိအကဒုဒ်ပှၤကညီအသိးန့ၣ်လီၤ.

37ဒီးစီၤကၤလးန့ၣ်ကတိၤကဒီးတၢ်,ဒီးစံးဝဲဒၣ်,ကွၢ်ကွၢ်,ပှၤဂီၢ်မုၢ်ဟဲလီၤလၢတၢ်ဒ့ပူၤ,ဒီးပှၤတဖုဒၣ်ဟဲဝဲလၢမဧိနနံအသ့ထိးဖၣ်အခီၣ်ထံးလီၤ.

38ဒီးစီၤစဘူလးန့ၣ်စံးဘၣ်အီၤ,နထးခိၣ်လၢနစံးလၢအီၤ,တၢ်လၢစီၤအဘံၤမ့လ့းမ့ၢ်မတၤလၢပကမၤအတၢ်တဂၤလဲၣ်န့ၣ်မ့ၢ်အအိၣ်ဖဲလဲၣ်.ပှၤဂီၢ်မုၢ်အံၤမ့ၢ်ပှၤလၢနမၤတရီတပါအီၤန့ၣ်တမ့ၢ်ဘၣ်ဧါ.ဟးထီၣ်လၢ်ခဲကနံၣ်အံၤ,ဒီးဒုးတၢ်ဒီးအီၤတက့ၢ်.

39ဒီးစီၤကၤလးဟးထီၣ်လၢပှၤၡက့ၣ်ဖိတဖၣ်အမဲာ်ညါ,ဒီးဒုးတၢ်ဒီးစီၤအဘံၤမ့လ့းလီၤ.

40ဒီးစီၤအဘံၤမ့လ့းလူၤအီၤ,ဒီးအဝဲဒၣ်ဃ့ၢ်ဝဲလၢအမဲာ်ညါ,ဒီးအါဂၤလီၤဃံၤဝဲဒီးဘၣ်တၢ်ဆဲးအီၤ,ပၢၢ်လၢတၢ်လဲၤနုာ်လၢပဲတရီအပူၤလီၤ.

41ဒီးစီၤအဘံၤမ့လ့းအိၣ်ဝဲဆိးဝဲလၢအရူမၤအပူၤ,ဒီးစီၤစဘူလးဟီထီၣ်ကွံာ်စီၤကၤလးဒီးအဒီပုၢ်ဝဲၢ်ဒ်သိးအသုတအိၣ်လၢၤလၢၡက့ၣ်အပူၤတဂ့ၤလီၤ.

42ဒီးမုၢ်ဆ့ၣ်ထီၣ်တနံၤန့ၣ်တၢ်မၤအသးလၢပှၤဂီၢ်မုၢ်လဲၤဝဲဆူစံာ်ဧိၤပျီဧိၤအပူၤ,ဒီးစံးဘၣ်စီၤအဘံၤမ့လ့း. 43ဒီးအဝဲဒၣ်ဟံးန့ၢ်ပှၤဂီၢ်မုၢ်,ဒီးနီၤဖးအီၤလၢပှၤသၢဖု,ဒီးအိၣ်ခိးခူသူၣ်လၢစံာ်ဧိၤပျီဧိၤအပူၤ,ဒီးကွၢ်တၢ်ဒီး,ကွၢ်ကွၢ်,ပှၤဂီၢ်မုၢ်ဟဲထီၣ်လၢဝ့ၢ်ပူၤ,ဒီးအဝဲဒၣ်ဂဲၤဆၢထၢၣ်လၢအဖီခိၣ်,ဒီးကျီကွံာ်အီၤလီၤ. 44ဒီးစီၤအဘံၤမ့လး,ဒီးပှၤတဖုအိၣ်ဒီးအီၤန့ၣ်ဃ့ၢ်သဖှိ,ဒီးဆၢထၢၣ်လၢတၢ်လဲၤနုာ်ဝ့ၢ်အပဲတရီန့ၣ်,ဒီးပှၤခံဖုဒၣ်န့ၣ်ဃ့ၢ်သဖှိလၢကယဲၢ်ပှၤအိၣ်ဝဲလၢတၢ်စံာ်ဧိၤပျီဧိၤအပူၤအဖီခိၣ်,ဒီးကျီသံကွံာ်အီၤလီၤ.

45ဒီးစီၤအဘံၤမ့လ့းဒုးတၢ်ဒီးဝ့ၢ်န့ၣ်သ့တနံၤကျၢၤ,ဒီးမၤန့ၢ်ဝ့ၢ်,ဒီးမၤသံပှၤဂီၢ်မုၢ်လၢအအိၣ်လၢအပူၤ,ဒီးမၤလီၤပှီၢ်ဝ့ၢ်,ဒီးဖှံအံသၣ်လၢအလီၢ်န့ၣ်လီၤ.

46ဒီးၡက့ၣ်အတၢးထီအပှၤကညီခဲလၢာ်နၢ်ဟူတၢ်,ဒီးလဲၤနုာ်လၢတိာ်တတိာ်အပူၤဘၣ်ဃးဒီးအကစၢ်ဘရံးအဟံၣ်န့ၣ်လီၤ.

47ဒီးပှၤစံးဘၣ်တဲဘၣ်စီၤအဘံၤမ့လ့းလၢၡက့ၣ်အတၢးထီအပှၤကညီခဲလၢာ်အိၣ်ဖှိၣ်ရိဖှိၣ်လီၤ. 48ဒီးစီၤအဘံၤမ့လ့းလဲၤထီၣ်ဆူကစၢၢ်စးလမိၣ်,အဝဲဒၣ်ဒီးကယဲၢ်ပှၤအိၣ်ဒီးအီၤ,ဒီးစီၤအဘံၤမ့လ့းဟံးန့ၢ်ကွါလၢအစုပူၤဒီးကူာ်လီၤကွံာ်သ့ၣ်ဒ့တဒ့,ဒီးဟံးန့ၢ်ဝဲ,ဒီးပာ်ဝဲလၢအဖံဘၣ်ခိၣ်,ဒီးစံးဘၣ်ပှၤဂီၢ်မုၢ်လၢအအိၣ်ဒီးအီၤ,တၢ်လၢသုထံၣ်လၢယမၤအံၤ,မၤချ့သဒံးသုဝဲဒ်န့ၣ်အသိးတက့ၢ်.

49ဒီးပှၤဂီၢ်မုၢ်ခဲလၢာ်ကူာ်လီၤကွံာ်စ့ၢ်ကီးတဂၤအသ့ၣ်ဒ့တဒ့,တဂၤအသ့ၣ်ဒ့တဒ့စုာ်စုာ်,ဒီးပိာ်စီၤအဘံၤမ့လ့းအခံ,ဒီးပာ်ဝဲလၢတိာ်န့ၣ်,ဒီးဆူးထီၣ်တိာ်လၢမ့ၣ်အူ,ဒီးပှၤကညီလၢၡက့ၣ်အတၢးထီအပူၤသံဝဲစ့ၢ်ကီးခဲလၢာ်,ပိာ်မုၣ်ဒီးပိာ်ခွါပှၤတကထိဃၣ်ဃၣ်လီၤ.

50ဒီးစီၤအဘံၤမ့လ့းလဲၤဆူတ့ဘ့း,ဒီးမၤန့ၢ်အီၤလီၤ. 51ဒီးတၢးထီခၢၣ်သနၢၣ်တဖျၢၣ်အိၣ်ဝဲလၢဝ့ၢ်ပူၤ,ဒီးပိာ်မုၣ်ဒီးပိာ်ခွါ,ဒီးကယဲၢ်ပှၤလၢဝ့ၢ်ပူၤန့ၣ်ဃ့ၢ်ဝဲဆူအပူၤ,ဒီးကးတံာ်ဃာ်အသး,ဒီးလဲၤထီၣ်ဆူတၢးထီအဖီခိၣ်လီၤ.

52ဒီးစီၤအဘံၤမ့လးလဲၤဆူတၢးထီန့ၣ်အအိၣ်,ဒီးဒုးတၢ်ဒီးအီၤ,ဒီးလဲၤဘူးဒီးတၢးထီအတြဲၤ,ဒ်သိးအကဆူးထီၣ်ကွံာ်အီၤလၢမ့ၣ်အူလီၤ. 53ဒီးပိာ်မုၣ်တဂၤတ့ၢ်လီၤကွံာ်ဆၢၣ်ဂူာ်လၢၢ်တကူာ်လၢစီၤအဘံၤမ့လးအခိၣ်အဖီခိၣ်,ဒီးမၤသ့ၣ်ဖးအခိၣ်သၣ်ဃံန့ၣ်လီၤ.

54ဒီးအဝဲဒၣ်ကိးနၢ့်ချ့သဒံးပှၤဖိၣ်သၣ်ခွါလၢအစိာ်အစုကဝဲၤဒီးစံးဘၣ်အီၤ,ဘီၣ်ထီၣ်နနး,ဒီးမၤသံယၤ,ဒ်သိးပှၤအသုတစံးလၢယဂ့ၢ်လၢပိာ်မုၣ်တဂၤမၤသံအီၤန့ၣ်တဂ့ၤ,ဒီးအပှၤဖိၣ်သၣ်ခွါန့ၣ်ဆဲးဖျိအီၤ,ဒီးသံဝဲလီၤ.

55ဒီးအံၣ်စရ့လးအပှၤကညီထံၣ်ဘၣ်ဝဲလၢစီၤအဘံၤမ့လ့းသံလံ,ဒီးက့ၤက့ၤဝဲတဂၤဆူအလီၢ်ဒၣ်ဝဲ,တဂၤဆူအလီၢ်ဒၣ်ဝဲစုာ်စုာ်လီၤ.

56ဒီးယွၤဟ့ၣ်ကၣ်စီၤအဘံၤမ့လ့းလၢအတၢ်အၢလၢအမၤအပၢ်,လၢအမၤသံအဒီပုၢ်ဝဲၢ်နွံဆံအဃိန့ၣ်လီၤ. 57ဒီးၡက့ၣ်အပှၤကညီအတၢ်အၢခဲလၢာ်န့ၣ်ယွၤဟ့ၣ်ကၣ်အီၤလၢအခိၣ်,ဒီးစီၤယရူဘဧၤလးအဖိခွါစီၤယိၤသၣ်အတၢ်ဆိၣ်အၢန့ၣ်ဘၣ်အီၤလီၤ.