‏ Leviticus 11

1ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးစံးဘၣ်အီၤ, 2ကတိၤတၢ်ဒီးပှၤအံၣ်စရ့လးဖိဒီးစံး,အအံၤမ့ၢ်ဆၣ်ဖိကီၢ်ဖိလၢသုကအီၣ်ဘၣ်,လၢကယဲၢ်ဆၣ်ဖိကီၢ်ဖိလၢဟီၣ်ခိၣ်ချၢအကျါန့ၣ်လီၤ. 3ကယဲၢ်တၢ်လၢအမၤသ့ၣ်ဖးအခီၣ်,ဒီးအခီၣ်သ့ၣ်ဖး,ဒီးကလိာ်ထီၣ်အဆၣ်,လၢဆၣ်ဖိကီၢ်ဖိတမံၤလၢ်လၢ်န့ၣ်သုကအီၣ်ဘၣ်လီၤ.

4ဘၣ်ဆၣ်ဒီးအအံၤမ့ၢ်တၢ်လၢအကလိာ်ထီၣ်အဆၣ်မ့ၢ်ဂ့ၤ,တၢ်လၢအမၤသ့ၣ်ဖးအခီၣ်မ့ၢ်ဂ့ၤ,လၢသုတဘၣ်အီၣ်ဘၣ်အီၤန့ၣ်ကီၤလၤအူးလီၤ.အဂ့ၢ်ဒ်အံၤ,ကလိာ်ထီၣ်အဆၣ်ဘၣ်ဆၣ်ဒီးတမၤသ့ၣ်ဖးအခီၣ်ဘၣ်,မ့ၢ်တၢ်တကဆှီဘၣ်လၢသုဂီၢ်လီၤ. 5ဒီးၡဖးလီၤ.အဂ့ၢ်ဒ်အံၤ,ကလိာ်ထီၣ်အဆၣ်ဘၣ်ဆၣ်ဒီး,တမၤသ့ၣ်ဖးဘၣ်အခီၣ်ဘၣ်.အဝဲန့ၣ်မ့ၢ်တၢ်တကဆှီဘၣ်လၢသုဂီၢ်လီၤ.

6ဒီးယူၣ်လီၤ.အဂ့ၢ်ဒ်အံၤ,ကလိာ်ထီၣ်အဆၣ်ဘၣ်ဆၣ်ဒီး,တမၤသ့ၣ်ဖးအခီၣ်ဘၣ်,အဝဲန့ၣ်တကဆှီဘၣ်လၢသုဂီၢ်ဘၣ်.

7ဒီးထိးလီၤ.အဂ့ၢ်ဒ်အံၤ,မၤသ့ၣ်ဖးအခီၣ်,ဒီးအခီၣ်သ့ၣ်ဖးဘၣ်ဆၣ်ဒီး,တကလိာ်ထီၣ်အဆၣ်ဘၣ်.အဝဲန့ၣ်တကဆှီဘၣ်လၢသုဂီၢ်ဘၣ်. 8အညၣ်န့ၣ်သုတအီၣ်တဂ့ၤ,ဒီးအစိၣ်န့ၣ်သုတထိးတဂ့ၤ.

9အအံၤမ့ၢ်တၢ်လၢသုကအီၣ်ဘၣ်လၢတၢ်လၢအအိၣ်လၢထံကျါခဲလၢာ်အကျါန့ၣ်လီၤ.ကယဲၢ်တၢ်လၢအအိၣ်ဒီးအဒံး,ဒီးအသဒံၣ်လၢထံကျါ,လၢပီၣ်လဲၣ်ပူၤ,လၢထံကျိတဖၣ်အပူၤ,တမံၤလၢ်လၢ်န့ၣ်သုကအီၣ်ဘၣ်အီၤလီၤ.

10ဒီးကယဲၢ်တၢ်လၢအဒံးတအိၣ်,အသဒံၣ်တအိၣ်လၢပီၣ်လဲၣ်ပူၤ,ဒီးလၢထံကျိတဖၣ်အပူၤ,လၢတၢ်လဲၤတၢ်လၢထံကျါခဲလၢာ်အကျါ,ဒီးတၢ်သးလၢအအိၣ်လၢထံကျါခဲလၢာ်အကျါန့ၣ်မ့ၢ်တၢ်သးဘၣ်အၢလၢသုဂီၢ်လီၤ. 11ကကဲထီၣ်တၢ်သးဘၣ်အၢလၢသုဂီၢ်လီၤ,သုတအီၣ်အညၣ်တဂ့ၤ,ဒီးသုဘၣ်သးဘၣ်အၢအစိၣ်လီၤ. 12ကယဲၢ်တၢ်လၢအဒံးတအိၣ်,အသဒံၣ်တအိၣ်လၢထံကျါတမံၤလၢ်လၢ်န့ၣ်မ့ၢ်တၢ်သးဘၣ်အၢလၢသုဂီၢ်လီၤ.

13အအံၤမ့ၢ်တၢ်လၢသုဘၣ်ပာ်လၢတၢ်သးဘၣ်အၢလၢထိၣ်အကျါန့ၣ်လီၤ.အီၣ်အီၤတဂ့ၤ.မ့ၢ်တၢ်သးဘၣ်အၢလီၤ.လံာ်ကြီကြၣ်,ဒီးလီတာ်ဖးဒိၣ်,ဒီးလံာ်ထိးထံ, 14ဒီးလံာ်ဃး,ဒီးလံာ်ထိးထီၣ်ဒ်အကလုာ်အသိး, 15ကယဲၢ်စိးဝၣ်ဃးဒ်အကလုာ်အသိး, 16ဒီးထိၣ်ကီၤလၤအူး,ဒီးထိၣ်သဘၣ်,ဒီးထိၣ်ၡဃး,ဒီးလံာ်ပီၢ်တ့ဒ်အကလုာ်အသိး, 17ဒီးဒိကအိ,ဒီးထိၣ်ကံၣ်ပီၣ်လဲၣ်ဒီးထိၣ်ဂီၤဖံး, 18ဒီးထိၣ်လဲၤလုးတကုာ်,ဒီးထိၣ်စီၢ်မီ,ဒီးလီတာ်ဝါ, 19ဒီးထိၣ်ဒိၣ်ဃၤစး,ဒီးဝါလၢၢ်ထံဒ်အကလုာ်အသိး,ဒီးဘီစံၣ်ဃီၣ်,ဒီးဘျါဧိၤတြၤဧိၤန့ၣ်လီၤ.

20ကယဲၢ်တၢ်လၢအယူၤ,ဒီးဟးလၢအခီၣ်လွံၢ်ခီန့ၣ်မ့ၢ်တၢ်သးဘၣ်အၢလၢသုဂီၢ်လီၤ. 21ဘၣ်ဆၣ်ဒီးလၢကယဲၢ်တၢ်အယူၤဒီးဟးလၢအခီၣ်လွံၢ်ခီအကျါန့ၣ်သုကအီၣ်ဘၣ်တၢ်တဖၣ်အံၤလီၤ.တၢ်လၢအအိၣ်ဒီးအကံၣ်လၢအခီၣ်အဖီခိၣ်ဒ်သိးအကစံၣ်လၢအီၤလၢဟီၣ်ခိၣ်ချၢလီၤ. 22လၢတၢ်တဖၣ်န့ၣ်အကျါသုကအီၣ်ဘၣ်ဒွဲၣ်ဒ်အကလုာ်အသိး,ဒီးဒွဲၣ်စ့လၣ်ဒ်အကလုာ်အသိးဒီးဒွဲၣ်သဘၣ်ဒ်အကလုာ်အသိး,ဒီးဒွဲၣ်ဃကာ်ဒ်အကလုာ်အသိးန့ၣ်လီၤ. 23ဒီးကယဲၢ်တၢ်အဂၤလၢအယူၤဒီးဟးလၢအခီၣ်လွံၢ်ခီန့ၣ်မ့ၢ်တၢ်သးဘၣ်အၢလၢသုဂီၢ်ခဲလၢာ်လီၤ.

24ဒီးသုကကဲထီၣ်တၢ်တကဆှီဘၣ်လၢအအံၤအဃိ,ဒီးကယဲၢ်ပှၤလၢအထိးဘၣ်အစိၣ်တဂၤလၢ်လၢ်န့ၣ်ကကဲထီၣ်တၢ်တကဆှီဘၣ်တုၤမုၢ်ဟါလီၤ. 25ဒီးကယဲၢ်ပှၤလၢအစိာ်အစိၣ်,ဘၣ်ဆှုၣ်အကူအသိး,ဒီးကကဲထီၣ်တၢ်တကဆှီဘၣ်တုၤမုၢ်ဟါလီၤ.

26ကယဲၢ်ဆၣ်ဖိကီၢ်ဖိလၢအတမၤသ့ၣ်ဖးအခီၣ်,ဒီးအခီၣ်တသ့ၣ်ဖးဘၣ်,ဒီးတကလိာ်ထီၣ်အဆၣ်ဘၣ်တမံၤလၢ်လၢ်အစိၣ်န့ၣ်မ့ၢ်တကဆှီဘၣ်လၢသုဂီၢ်,ဒီးကယဲၢ်ပှၤလၢအထိးဘၣ်အီၤန့ၣ်ကကဲထီၣ်တၢ်တကဆှီဘၣ်တုၤမုၢ်ဟါလီၤ.

27ဒီးလၢကယဲၢ်ဆၣ်ဖိကီၢ်ဖိလၢအဟးလၢအခီၣ်လွံၢ်ခီအကျါန့ၣ်တၢ်လၢအဟးလၢအခီၣ်ညါသးတမံၤလၢ်လၢ်မ့ၢ်တၢ်တကဆှီဘၣ်လၢသုဂီၢ်လီၤ.ကယဲၢ်ပှၤလၢအထိးဘၣ်အစိၣ်န့ၣ်ကကဲထီၣ်တၢ်တကဆှီဘၣ်တုၤမုၢ်ဟါလီၤ. 28ဒီးပှၤလၢအစိာ်အစိၣ်န့ၣ်ဘၣ်ဆှုၣ်အကူအသိး,ဒီးကဲထီၣ်တၢ်တကဆှီဘၣ်တုၤမုၢ်ဟါလီၤ.အဝဲန့ၣ်မ့ၢ်တကဆှီဘၣ်လၢသုဂီၢ်လီၤ.

29ဒီးလၢတၢ်အစွါလၢအစွါလၢဟီၣ်ခိၣ်ချၢအကျါန့ၣ်အအံၤမ့ၢ်တၢ်တကဆှီဘၣ်လၢသုဂီၢ်လီၤ.ခီဃိလး,ဒီးယူၣ်ဧၣ်ကၤဘၢ်,ဒီးပျဲာ်စဘးဒ်အကလုာ်အသိး, 30ဒီးဒီလ့ၢ်,ဒီးခွံၣ်ယဲၤ,ဒီးခွံၣ်လတၤ,ဒီးခွံၣ်ဒိ,ဒီးခွံၣ်ထံၣ်ၡနးလီၤ. 31အန့ၣ်မ့ၢ်တၢ်တကဆှီဘၣ်လၢသုဂီၢ်လၢကယဲၢ်တၢ်လၢအစွါအကျါလီၤ.တုၤအသံဝဲဒီး,ပှၤလၢအထိးဘၣ်အီၤတဂၤလၢ်လၢ်,ကကဲထီၣ်တၢ်တကဆှီဘၣ်တုၤမုၢ်ဟါလီၤ. 32ဒီးတၢ်လၢတၢ်န့ၣ်တမံၤမံၤသံဝံၤဒီးလီၤတဲာ်လၢအလိၤတမံၤလၢ်လၢ်န့ၣ်ကကဲထီၣ်လၢတၢ်တကဆှီဘၣ်လီၤ.လီခီသ့ၣ်မ့ၢ်ဂ့ၤ,တၢ်အကူအသိးမ့ၢ်ဂ့ၤ,တၢ်ဖံးမ့ၢ်ဂ့ၤ,ထၢၣ်မ့ၢ်ဂ့ၤ,ဖဲဒၣ်တၢ်လၢပှၤမၤတၢ်လၢအပူၤမ့ၢ်ဂ့ၤ,ပှၤဘၣ်ပာ်လီၤအီၤလၢထံကျါ,ဒီးကကဲထီၣ်တၢ်တကဆှီဘၣ်တုၤမုၢ်ဟါလီၤ.ဒီးကကဆှီထီၣ်က့ၤလီၤ.

33ဒီးကယဲၢ်လီခီဟီၣ်ခိၣ်ဖဲတၢ်န့ၣ်တမံၤမံၤလီၤတဲာ်လၢအပူၤန့ၣ်တၢ်အိၣ်လၢအပူၤခဲလၢာ်ကကဲထီၣ်တကဆှီဘၣ်,ဒီးသုဘၣ်မၤသ့ၣ်ဖးအီၤလီၤ. 34ဒီးထံလၢလီခီန့ၣ်မ့ၢ်ဘၣ်တၢ်အီၣ်လၢပှၤအီၣ်ဝဲတမံၤမံၤဒီး,ကကဲထီၣ်တၢ်တကဆှီဘၣ်,ဒီးတၢ်အီခဲလၢာ်လၢပှၤအီဝဲလၢလီခီတဖျၢၣ်ဖျၢၣ်န့ၣ်အပူၤကကဲထီၣ်တၢ်တကဆှီဘၣ်လီၤ.

35ဒီးကယဲၢ်တၢ်လၢအစိၣ်လီၤတဲာ်လၢအလိၤန့ၣ်ကကဲထီၣ်တၢ်တကဆှီဘၣ်ခဲလၢာ်လီၤ.ဖၣ်ကပူၤမ့ၢ်ဂ့ၤ,သပၢၤအလီၢ်မ့ၢ်ဂ့ၤ,ကဘၣ်တၢ်မၤဟးဂီၤအီၤလီၤ.မ့ၢ်တၢ်တကဆှီဘၣ်,ဒီးကကဲထီၣ်တၢ်တကဆှီဘၣ်လၢသုဂီၢ်လီၤ. 36ဘၣ်ဆၣ်ဒီးထံထီၣ်ပၢၢ်,ဒီးတၢ်ပူၤလၢထံအိၣ်အါအါကလဲာ်န့ၣ်ကကဆှီလီၤ.မ့မ့ၢ်တၢ်လၢအထိးအစိၣ်,ကကဲထီၣ်တၢ်တကဆှီဘၣ်လီၤ.

37ဒီးအစိၣ်မ့ၢ်လီၤတဲာ်လၢတၢ်ချံလၢအကဘၣ်ဖှံအသးလၢပှၤကဖှံဝဲဒီး,တၢ်ကကဆှီလီၤ. 38မ့မ့ၢ်တၢ်အချံန့ၣ်မ့ၢ်ဘၣ်ဒီးထံ,ဒီးအစိၣ်လီၤတဲာ်လၢအလိၤဒီး,တကဆှီဘၣ်လၢသုဂီၢ်လီၤ.

39ဒီးဆၣ်ဖိကီၢ်ဖိလၢသုကအီၣ်ဘၣ်အီၤမ့ၢ်သံတဒုဒုဒီး,ပှၤလၢအထိးအစိၣ်န့ၣ်ကကဲထီၣ်တၢ်တကဆှီဘၣ်တုၤမုၢ်ဟါလီၤ. 40ဒီးပှၤလၢအအီၣ်အညၣ်န့ၣ်ဘၣ်ဆှုၣ်အကူအသိး,ဒီးကဲထီၣ်တၢ်တကဆှီဘၣ်တုၤမုၢ်ဟါလီၤ.ဒီးပှၤလၢအစိာ်အစိၣ်,ဘၣ်ဆှုၣ်အကူအသိး,ဒီးကဲထီၣ်တၢ်တကဆှီဘၣ်တုၤမုၢ်ဟါလီၤ.

41ဒီးကယဲၢ်တၢ်စွါလၢအစွါလၢဟီၣ်ခိၣ်ချၢ,မ့ၢ်တၢ်သးဘၣ်အၢလီၤ,သုတအီၣ်အီၤတဂ့ၤ. 42ကယဲၢ်တၢ်စွါလၢအဟၢဖၢ,ဒီးကယဲၢ်တၢ်လၢအစွါလၢအခီၣ်လွံၢ်ခီ,ဒီးတၢ်လၢအခီၣ်အိၣ်အါခီလၢတၢ်စွါလၢအစွါလၢဟီၣ်ခိၣ်ချၢအကျါတမံၤလၢ်လၢ်န့ၣ်သုတအီၣ်အီၤနီတမံၤတဂ့ၤ.အဂ့ၢ်ဒ်အံၤ,မ့ၢ်တၢ်သးဘၣ်အၢလီၤ.

43သုတမၤဘၣ်အၢလီၤသုသးဒီးတၢ်စွါလၢအစွါ,ဒီးသုတမၤတကဆှီဘၣ်သုသးဒီးအီၤဒ်သိးသုကကဲထီၣ်တၢ်တကဆှီဘၣ်လၢအီၤတဂ့ၤ.

44အဂ့ၢ်ဒ်အံၤ,ယမ့ၢ်ယွၤသုကစၢ်လီၤ.သုဘၣ်မၤစီဆှံသုသး,ဒီးကဲထီၣ်ပှၤစီဆှံလီၤ.အဂ့ၢ်ဒ်အံၤ,ယမ့ၢ်တၢ်စီဆှံလီၤ.ဒီးသုတမၤတကဆှီဘၣ်သုသးဒီးတၢ်စွါလၢအစွါလၢဟီၣ်ခိၣ်ချၢနီတမံၤတဂ့ၤ. 45အဂ့ၢ်ဒ်အံၤ,ယမ့ၢ်ယွၤလၢအဒုးဟဲထီၣ်သုလၢကီၢ်အဲၤကူပတူးအပူၤ,ဒ်သိးယကကဲထီၣ်သုကစၢ်လီၤ.ဒီးသုဘၣ်စီဆှံလီၤ.အဂ့ၢ်ဒ်အံၤ,ယစီဆှံလီၤ.

46အန့ၣ်မ့ၢ်တၢ်သိၣ်တၢ်သီဘၣ်ဃးဒီးဆၣ်ဖိကီၢ်ဖိ,ဒီးထိၣ်ဖိလံၣ်ဖိ,ဒီးကယဲၢ်တၢ်သးဂဲၤလၢထံကျါ,ဒီးကယဲၢ်တၢ်လၢအစွါလၢဟီၣ်ခိၣ်ချၢခဲလၢာ်လီၤ. 47ဒ်သိးပှၤကနီၤဖးတၢ်ကဆှီ,ဒီးတၢ်တကဆှီဘၣ်အဆၢ,ဒီးဆၣ်ဖိကီၢ်ဖိလၢပှၤကအီၣ်ဘၣ်အီၤ,ဒီးဆၣ်ဖိကီၢ်ဖိလၢပှၤတဘၣ်အီၣ်ဘၣ်အီၤဘၣ်အဂ့ၢ်လီၤ.