‏ Leviticus 13

1ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးစံးဝဲဒၣ်, 2တုၤပှၤတဂၤအိၣ်ဒီးတၢ်ပြုထီၣ်တဖျၢၣ်မ့ၢ်ဂ့ၤ,အလီၢ်လၢအဖံးလီၤသဘျံးမ့ၢ်ဂ့ၤအလီၢ်လၢအဖံးဝါထီၣ်မ့ၢ်ဂ့ၤ,လၢအညၣ်အဖံးလိၤဒ်တၢ်တီၢ်ဆါအသိးဒီး,ပှၤဘၣ်ဟဲစိာ်အီၤဆူပှၤလုၢ်တၢ်အဒိၣ်စီၤအၤဟရိၣ်အအိၣ်,မ့တမ့ၢ်ဘၣ်ဒ်န့ၣ်ဒီး,ဆူအဖိခွါတဂၤ,ပှၤလုၢ်တၢ်အဒိၣ်တဂၤအအိၣ်လီၤ.

3ဒီးပှၤလုၢ်တၢ်အဒိၣ်ဘၣ်ကွၢ်တၢ်လီၢ်လၢအညၣ်အဖံးလိၤ,ဒီးအဆူၣ်လၢတၢ်တီၢ်လီၢ်မ့ၢ်ဝါထီၣ်ဒီး,တၢ်တီၢ်အလီၢ်မ့ၢ်ယိာ်ဆူအညၣ်အဖံးလာ်ဒီး,မ့ၢ်တၢ်ဆါအၢအတၢ်တီၢ်လီၤ.ဒီးပှၤလုၢ်တၢ်အဒိၣ်ဘၣ်ကွၢ်အီၤ,ဒီးဘၣ်ပာ်အီၤလၢတၢ်တကဆှီဘၣ်လီၤ.

4ဒီးအလီၢ်လၢအဖံးဝါထီၣ်မ့ၢ်ဝါလၢအညၣ်အဖံးလိၤ,ဒီးမ့ၢ်တယိာ်ဘၣ်ဆူအဖံးလာ်,ဒီးအဆူၣ်တဝါထီၣ်ဘၣ်ဒီး,ပှၤလုၢ်တၢ်အဒိၣ်ဘၣ်ကးတံာ်ဃာ်တၢ်တီၢ်န့ၣ်နွံနံၤလီၤ. 5ဒီးနွံနံၤတနံၤန့ၣ်ပှၤလုၢ်တၢ်အဒိၣ်ဘၣ်ကွၢ်ကဒီးအီၤ,ဒီးကွၢ်ကွၢ်,တၢ်တီၢ်လၢအလိၤမ့ၢ်အိၣ်ဒၣ်အတၢ်,ဒီးတၢ်တီၢ်အလီၢ်မ့ၢ်တလဲၢ်ထီၣ်ဘၣ်လၢအဖံးလိၤဒီး,ပှၤလုၢ်တၢ်အဒိၣ်ဘၣ်ကးတံာ်ဃာ်အီၤနွံနံၤဒံးလီၤ.

6ဒီးနွံနံၤတနံၤန့ၣ်ပှၤလုၢ်တၢ်အဒိၣ်ဘၣ်ကွၢ်ကဒီးအီၤ,ဒီးကွၢ်ကွၢ်,တၢ်တီၢ်အလီၢ်န့ၣ်မ့ၢ်ဃးထီၣ်,ဒီးတၢ်တီၢ်အလီၢ်မ့ၢ်တလဲၢ်ထီၣ်ဘၣ်လၢအဖံးလိၤဘၣ်ဒီး,ပှၤလုၢ်တၢ်အဒိၣ်ဘၣ်ပာ်အီၤလၢတၢ်ကဆှီလီၤ.မ့ၢ်အလီၢ်လၢအဖံးလီၤသဘျံးလီၤ.ဒီးဘၣ်ဆှုၣ်အကူအသိး,ဒီးကဆှီထီၣ်ဝဲလီၤ.

7မ့မ့ၢ်အလီၢ်လၢအဖံးလီၤသဘျံးန့ၣ်မ့ၢ်လဲၢ်ထီၣ်အါအါကလဲာ်လၢပှၤလုၢ်တၢ်အဒိၣ်ကွၢ်အီၤလၢအကဆှီထီၣ်အဂ့ၢ်အလီၢ်ခံန့ၣ်ဒီး,ပှၤလုၢ်တၢ်အဒိၣ်ဘၣ်ကွၢ်ကဒီးအီၤလီၤ.

8ဒီးပှၤလုၢ်တၢ်အဒိၣ်မ့ၢ်ကွၢ်,ဒီးကွၢ်ကွၢ်,အလီၢ်လၢအဖံးလီၤသဘျံးန့ၣ်မ့ၢ်လဲၢ်ထီၣ်ဒီး,ပှၤလုၢ်တၢ်အဒိၣ်ဘၣ်ပာ်အီၤလၢတၢ်တကဆှီဘၣ်လီၤ.မ့ၢ်တၢ်ဆါအၢလီၤ.

9တုၤတၢ်ဆါအၢအတၢ်တီၢ်အိၣ်ဝဲလၢပှၤတဂၤအလိၤဒီး,ပှၤဘၣ်ဟဲစိာ်အီၤဆူပှၤလုၢ်တၢ်အဒိၣ်အအိၣ်, 10ဒီးပှၤလုၢ်တၢ်အဒိၣ်ကကွၢ်,ဒီးကွၢ်ကွၢ်,တၢ်ပြုထီၣ်တဖျၢၣ်မ့ၢ်ဝါလၢအဖံးလိၤ,ဒီးမၤဝါထီၣ်အဆူၣ်ဒီးညၣ်မူသံကစဲာ်မ့ၢ်အိၣ်လၢတၢ်ပူၤလီၢ်ဒီး, 11မ့ၢ်တၢ်ဆါအၢလီၢ်လံၤလၢအညၣ်အဖံး,ဒီးပှၤလုၢ်တၢ်အဒိၣ်ပာ်အီၤလၢတၢ်တကဆှီဘၣ်,ဒီးတဘၣ်ကးတံာ်ဃာ်အီၤဘၣ်,အဂ့ၢ်ဒ်အံၤ,မ့ၢ်အတကဆှီဘၣ်လီၤ.

12ဒီးတၢ်ဆါအၢမ့ၢ်လဲၢ်ထီၣ်လၢအဖံးလိၤ,ဒီးတၢ်ဆါအၢမ့ၢ်အိၣ်လၢအဖံးလိၤဒီဂၤညါ,တၢ်တီၢ်န့ၣ်အိၣ်လၢအခိၣ်ပၢၢ်လၢအခီၣ်,ဖဲဒၣ်ပှၤလုၢ်တၢ်အဒိၣ်ကွၢ်ဝဲဒီး, 13ပှၤလုၢ်တၢ်အဒိၣ်ဘၣ်ကွၢ်,ဒီးကွၢ်ကွၢ်,တၢ်ဆါအၢမ့ၢ်အိၣ်လၢအညၣ်လိၤဒီဂၤညါဒီး,ဘၣ်ပာ်တၢ်တီၢ်န့ၣ်လၢတၢ်ကဆှီလီၤ.ဝါထီၣ်ဝဲခဲလၢာ်လီၤ.မ့ၢ်တၢ်ကဆှီလီၤ.

14ဘၣ်ဆၣ်ဒီးတုၤညၣ်သံကစဲာ်အိၣ်ဖျါထီၣ်လၢအလိၤဒီး,ကကဲထီၣ်တၢ်တကဆှီဘၣ်လီၤ. 15ဒီးပှၤလုၢ်တၢ်အဒိၣ်ဘၣ်ကွၢ်အညၣ်မူန့ၣ်,ဒီးပာ်အီၤလၢတၢ်တကဆှီဘၣ်လီၤ.ညၣ်သံကစဲာ်န့ၣ်မ့ၢ်တၢ်တကဆှီဘၣ်,မ့ၢ်တၢ်ဆါအၢလီၤ. 16မ့တမ့ၢ်ဘၣ်ဒ်န့ၣ်ဒီးအညၣ်သံကစဲာ်မ့ၢ်ကဒါအသးဒီးဝါထီၣ်ဒီး,ဘၣ်ဟဲဆူပှၤလုၢ်တၢ်အဒိၣ်အအိၣ်, 17ဒီးပှၤလုၢ်တၢ်အဒိၣ်ဘၣ်ကွၢ်အီၤ,ဒီးကွၢ်ကွၢ်,တၢ်တီၢ်န့ၣ်မ့ၢ်ဝါထီၣ်ဒီး,ပှၤလုၢ်တၢ်အဒိၣ်ဘၣ်ပာ်တၢ်တီၢ်လၢတၢ်ကဆှီလီၤ.ကဆှီဝဲလီၤ.

18ဒီးပှၤအညၣ်လၢတၢ်ဝ့အိၣ်တ့ၢ်လၢအဖံးလိၤ,ဒီးဘျါတ့ၢ်, 19ဒီးလၢဝ့အလီၢ်န့ၣ်တၢ်ပြုထီၣ်ဝါတဖျၢၣ်မ့ၢ်ဂ့ၤ,အလီၢ်ဂီၤဝါမ့ၢ်ဂ့ၤ,မ့ၢ်အိၣ်ဒီး,ပှၤမ့ၢ်ဒုးနဲၣ်အီၤလၢပှၤလုၢ်တၢ်အဒိၣ်, 20ဒီးတုၤပှၤလုၢ်တၢ်အဒိၣ်ထံၣ်ဘၣ်အီၤဒီး,ကွၢ်ကွၢ်,အလီၢ်မ့ၢ်ယိာ်ဆူအဖံးလာ်ဒီးအဆူၣ်မ့ၢ်ဝါထီၣ်ဒီး,ပှၤလုၢ်တၢ်အဒိၣ်ဘၣ်ပာ်အီၤလၢအတကဆှီဘၣ်,မ့ၢ်တၢ်ဆါအၢအတၢ်တီၢ်အိၣ်ထီၣ်လၢတၢ်ဝ့အပူၤလီၤ.

21မ့မ့ၢ်ပှၤလုၢ်တၢ်အဒိၣ်မ့ၢ်ကွၢ်အီၤ,ဒီးကွၢ်ကွၢ်,အဆူၣ်ဝါတအိၣ်ဘၣ်,ဒီးအလီၢ်တယိာ်ဘၣ်ဆူအဖံးလာ်ဒီးမ့ၢ်ဃးထီၣ်ဒီး,ပှၤလုၢ်တၢ်အဒိၣ်ဘၣ်ကးတံာ်ဃာ်အီၤနွံနံၤလီၤ.

22ဒီးမ့ၢ်လဲၢ်ထီၣ်အါအါကလဲာ်လၢအဖံးလိၤဒီး,ပှၤလုၢ်တၢ်အဒိၣ်ဘၣ်ပာ်အီၤလၢတၢ်တကဆှီဘၣ်မ့ၢ်ဝဲလၢတၢ်တီၢ်လီၤ.

23မ့မ့ၢ်အလီၢ်န့ၣ်မ့ၢ်အိၣ်ဒၣ်တၢ်ဒီးတလဲၢ်ထီၣ်ဘၣ်ဒီး,မ့ၢ်ဝဲလၢဝ့အလီၢ်လီၤ.ဒီးပှၤလုၢ်တၢ်အဒိၣ်ဘၣ်ပာ်အီၤလၢတၢ်ကဆှီလီၤ.

24မ့တမ့ၢ်ဘၣ်ဒ်န့ၣ်ဒီးညၣ်ကိၢ်ဃိာ်လၢမ့ၣ်အူမ့ၢ်အိၣ်လၢအဖံးလိၤဒီး,ညၣ်သံကစဲာ်လၢမ့ၣ်အူအီၣ်ဝဲန့ၣ်မ့ၢ်ပြုထီၣ်ဂီၤဝါတဖျၢၣ်မ့ၢ်ဂ့ၤ,ဝါတဖျၢၣ်မ့ၢ်ဂ့ၤဒီး, 25ပှၤလုၢ်တၢ်အဒိၣ်ဘၣ်ကွၢ်အီၤ,ဒီးကွၢ်ကွၢ်,အဆူၣ်လၢတၢ်ဝါအလီၢ်ပူၤမ့ၢ်ဝါထီၣ်,ဒီးဖျါယိာ်ဆူအဖံးလာ်ဒီး,မ့ၢ်တၢ်ဆါအၢလၢအအိၣ်ထီၣ်လၢတၢ်ကိၢ်အူအလီၢ်လီၤ.ဒီးပှၤလုၢ်တၢ်အဒိၣ်ဘၣ်ပာ်အီၤလၢအတကဆှီဘၣ်,မ့ၢ်ဝဲလၢတၢ်ဆါအၢအတၢ်တီၢ်လီၤ.

26မ့မ့ၢ်ပှၤလုၢ်တၢ်အဒိၣ်မ့ၢ်ကွၢ်အီၤ,ဒီးကွၢ်ကွၢ်,အဆူၣ်ဝါတအိၣ်ဘၣ်လၢအလီၢ်ဝါ,ဒီးတယိာ်ဘၣ်ဆူအဖံးလာ်,ဒီးဃးထီၣ်ဒီး,ပှၤလုၢ်တၢ်အဒိၣ်ဘၣ်ကးတံာ်ဃာ်အီၤနွံနံၤလီၤ. 27ဒီးနွံနံၤတနံၤန့ၣ်ပှၤလုၢ်တၢ်အဒိၣ်ဘၣ်ကွၢ်အီၤလီၤ.မ့ၢ်လဲၢ်ထီၣ်အါအါကလဲာ်လၢအဖံးလိၤဒီး,ပှၤလုၢ်တၢ်အဒိၣ်ဘၣ်ပာ်အီၤလၢအတကဆှီဘၣ်,မ့ၢ်ဝဲလၢတၢ်ဆါအၢအတၢ်တီၢ်လီၤ.

28မ့မ့ၢ်တၢ်ဝါအလီၢ်မ့ၢ်အိၣ်ဒၣ်တၢ်,တလဲၢ်ထီၣ်ဘၣ်လၢအဖံးအလိၤ,ဒီးဃးထီၣ်ဒီး,မ့ၢ်ဝဲလၢတၢ်ပြုထီၣ်လၢတၢ်ကိၢ်ဃိာ်အလီၢ်,ဒီးပှၤလုၢ်တၢ်အဒိၣ်ဘၣ်ပာ်အီၤလၢတၢ်ကဆှီလီၤ.အဂ့ၢ်ဒ်အံၤ,မ့ၢ်ဝဲလၢတၢ်ကိၢ်ဃိာ်အလီၢ်လီၤ.

29ပိာ်မုၣ်မ့ၢ်ဂ့ၤ,ပိာ်ခွါမ့ၢ်ဂ့ၤ,လၢအခိၣ်မ့ၢ်ဂ့ၤ,လၢအခၣ်ဆူၣ်မ့ၢ်ဂ့ၤ,မ့ၢ်အိၣ်ဒီးတၢ်တီၢ်ဒီး, 30ပှၤလုၢ်တၢ်အဒိၣ်ဘၣ်ကွၢ်တၢ်တီၢ်န့ၣ်,ဒီးကွၢ်ကွၢ်,အလီၢ်မ့ၢ်လီၤဆၢၣ်လၢအဖံးအလိၤ,ဒီးအဆူၣ်ဘီစှၤဘိမ့ၢ်အိၣ်လၢအပူၤဒီး,ပှၤလုၢ်တၢ်အဒိၣ်ဘၣ်ပာ်အီၤလၢတၢ်တကဆှီဘၣ်လီၤ.မ့ၢ်ဝဲလၢတၢ်ဃာ်,တၢ်ဆါအၢလၢခိၣ်မ့ၢ်ဂ့ၤ,လၢခၣ်ဆူၣ်မ့ၢ်ဂ့ၤလီၤ.

31မ့မ့ၢ်ပှၤလုၢ်တၢ်အဒိၣ်မ့ၢ်ကွၢ်တၢ်ဃာ်အတၢ်တီၢ်,ဒီးကွၢ်ကွၢ်,အလီၢ်တယိာ်ဘၣ်ဆူအဖံးလာ်,ဒီးဆူၣ်သူတအိၣ်ဘၣ်လၢအပူၤဒီး,ပှၤလုၢ်တၢ်အဒိၣ်ဘၣ်ကးတံာ်ဃာ်တၢ်တီၢ်န့ၣ်နွံနံၤလီၤ. 32ဒီးနွံနံၤတနံၤန့ၣ်,ပှၤလုၢ်တၢ်အဒိၣ်ဘၣ်ကွၢ်တၢ်တီၢ်,ဒီးကွၢ်ကွၢ်,တၢ်ဃာ်မ့ၢ်တလဲၢ်ထီၣ်ဘၣ်,ဒီးဆူၣ်ဘီမ့ၢ်တအိၣ်ဘၣ်,ဒီးအလီၢ်မ့ၢ်တယိာ်ဘၣ်ဆူအဖံးလာ်ဒီး, 33ပှၤဘၣ်လူၤအီၤလီၤ.မ့မ့ၢ်တဘၣ်လူၤတၢ်ဃာ်အလီၢ်ဘၣ်.ဒီးပှၤလုၢ်တၢ်အဒိၣ်ဘၣ်ကးတံာ်ဃာ်ဒံးတၢ်တီၢ်န့ၣ်နွံနံၤဒံးလီၤ.

34ဒီးနွံနံၤတနံၤန့ၣ်ပှၤလုၢ်တၢ်အဒိၣ်ဘၣ်ကွၢ်တၢ်ဃာ်,ဒီးကွၢ်ကွၢ်,တၢ်ဃာ်န့ၣ်မ့ၢ်တလဲၢ်ထီၣ်ဘၣ်လၢအဖံးလိၤ,ဒီးအလီၢ်မ့ၢ်တယိာ်ဘၣ်ဆူအဖံးလာ်ဒီး,ပှၤလုၢ်တၢ်အဒိၣ်ဘၣ်ပာ်အီၤလၢတၢ်ကဆှီလီၤ.ဒီးအဝဲဒၣ်ဘၣ်ဆှုၣ်အကူအသိး,ဒီးကဆှီထီၣ်ဝဲလီၤ.

35ဒီးလၢအကဆှီထီၣ်အလီၢ်ခံန့ၣ်တၢ်ဃာ်မ့ၢ်လဲၢ်ထီၣ်သပှၢ်တၢၢ်လၢအဖံးလိၤဒီး, 36ပှၤလုၢ်တၢ်အဒိၣ်ဘၣ်ကွၢ်အီၤ,ဒီးကွၢ်ကွၢ်,တၢ်ဃာ်မ့ၢ်လဲၢ်ထီၣ်လၢအဖံးလိၤဒီး,ပှၤလုၢ်တၢ်အဒိၣ်တဘၣ်ဃုဘၣ်ဆူၣ်ဘီဘၣ်.မ့ၢ်ဝဲလၢတၢ်တကဆှီဘၣ်လီၤ.

37မ့မ့ၢ်တၢ်ဃာ်အလိၤမ့ၢ်အိၣ်ဒၣ်တၢ်,ဆူၣ်သူမ့ၢ်ထီၣ်လၢအပူၤဒီး,တၢ်ဃာ်ဘျါလံဒီးကဆှီထီၣ်လံလီၤ.ဒီးပှၤလုၢ်တၢ်အဒိၣ်ဘၣ်ပာ်အီၤလၢတၢ်ကဆှီလီၤ.

38ဒီးပိာ်မုၣ်မ့ၢ်ဂ့ၤ,ပိာ်ခွါမ့ၢ်ဂ့ၤ,မ့ၢ်အိၣ်ဒီးတၢ်ဖှံ,ဝါလၢအညၣ်အဖံးလိၤဒီး, 39ပှၤလုၢ်တၢ်အဒိၣ်ဘၣ်ကွၢ်ဝဲ,ဒီးကွၢ်ကွၢ်,တၢ်ဖှံလၢအညၣ်အဖံးလိၤမ့ၢ်ဝါသူဒီး,မ့ၢ်ဝဲလၢတၢ်ဖှံလၢအအိၣ်ထီၣ်လၢအဖံးလိၤလီၤ.ကဆှီဝဲလီၤ.

40ဒီးပှၤလၢအခိၣ်လ့ၤန့ၣ်မ့ၢ်အခိၣ်ကျၤဘၣ်ဆၣ်ဒီးကဆှီဝဲလီၤ. 41ဒီးပှၤလၢအခိၣ်လ့ၤလၢအခိၣ်ဒးန့ၣ်မ့ၢ်ဝဲလၢအခိၣ်ကျၤလၢအခိၣ်ဒးလီၤ.ဘၣ်ဆၣ်ဒီးကဆှီဝဲလီၤ.

42ဒီးလၢအခိၣ်လ့ၤလိၤမ့ၢ်ဂ့ၤ,လၢအခိၣ်လ့ၤလၢအခိၣ်ဒးအလိၤမ့ၢ်ဂ့ၤ,တၢ်တီၢ်ဂီၤဝါမ့ၢ်အိၣ်ဒီး,မ့ၢ်တၢ်ဆါအၢလၢအအိၣ်ထီၣ်လၢအခိၣ်လ့ၤမ့ၢ်ဂ့ၤ,အခိၣ်လ့ၤလၢအခိၣ်ဒးမ့ၢ်ဂ့ၤလီၤ.

43ဒီးပှၤလုၢ်တၢ်အဒိၣ်ဘၣ်ကွၢ်အီၤ,ဒီးကွၢ်ကွၢ်,တၢ်တီၢ်အပြုထီၣ်တဖျၢၣ်လၢအခိၣ်လ့ၤအလိၤမ့ၢ်ဂ့ၤ,လၢအခိၣ်လ့ၤလၢအခိၣ်ဒးအလိၤမ့ၢ်ဂ့ၤ,မ့ၢ်ဂီၤဝါမၤအသးဒ်တၢ်ဆါအၢလၢညၣ်အဖံးလိၤအသိးန့ၣ်ဒီး, 44မ့ၢ်ဝဲလၢပှၤဘၣ်တၢ်ဆါအၢ,မ့ၢ်တကဆှီဘၣ်,ပှၤလုၢ်တၢ်အဒိၣ်ဘၣ်ပာ်အီၤတကဆှီဘၣ်သပှၢ်တၢၢ်လီၤ.အတၢ်တီၢ်န့ၣ်အိၣ်ဝဲလၢအခိၣ်လိၤလီၤ.

45ဒီးပှၤဘၣ်တၢ်ဆါအၢလၢအအိၣ်ဒီးတၢ်တီၢ်န့ၣ်ဘၣ်ဖှီအကူအသိး,ဒီးအိၣ်ဘ့ၣ်ခိၣ်,ဒီးကျၢၢ်ဘၢအခၣ်,ဒီးဘၣ်ကိးထီၣ်,တကဆှီဘၣ်,တကဆှီဘၣ်န့ၣ်လီၤ.

46လၢတၢ်တီၢ်အိၣ်လၢအလိၤအမုၢ်နံၤခဲလၢာ်န့ၣ်ဘၣ်မ့ၢ်တၢ်တကဆှီဘၣ်လီၤ.မ့ၢ်ဝဲတၢ်တကဆှီဘၣ်လီၤ.ဘၣ်အိၣ်ဝဲဆိးဝဲတဂၤဃီလီၤ.အအိၣ်အလီၢ်န့ၣ်ကအိၣ်လၢပှၤသူၣ်ဒဲလၢခိလီၤ.

47ဒီးတၢ်အကူအသိးလၢအအိၣ်ဒီးတၢ်ဆါအၢန့ၣ်,သးကလးမ့ၢ်ဂ့ၤ,တၢ်ကံးညာ်မ့ၢ်ဂ့ၤ, 48လုၣ်အထၢၣ်ဂ့ၤ,အဃီၤဂ့ၤ,လၢသးကလးမ့ၢ်ဂ့ၤ,လၢတၢ်ကံးညာ်မ့ၢ်ဂ့ၤ,လၢတၢ်ဖံးမ့ၢ်ဂ့ၤ,လၢတၢ်မၤလၢတၢ်ဖံးမ့ၢ်ဂ့ၤ, 49တၢ်တီၢ်မ့ၢ်လါဟ့ဂ့ၤဂ့ၤ,မ့ၢ်ဂီၤဂ့ၤဂ့ၤ,လၢတၢ်အကူအသိးအလိၤဂ့ၤဂ့ၤ,လၢတၢ်ဖံးအလိၤဂ့ၤဂ့ၤ,လၢလုၣ်အထၢၣ်ဂ့ၤဂ့ၤ,အဃီၤဂ့ၤဂ့ၤ,မ့ၢ်တၢ်ဆါအၢအတၢ်တီၢ်လီၤ.ဒီးပှၤဘၣ်ဒုးနဲၣ်အီၤလၢပှၤလုၢ်တၢ်အဒိၣ်လီၤ.

50ဒီးပှၤလုၢ်တၢ်အဒိၣ်ဘၣ်ကွၢ်တၢ်တီၢ်န့ၣ်,ဒီးကးတံာ်ဃာ်တၢ်တီၢ်န့ၣ်နွံနံၤလီ. 51ဒီးနွံနံၤတနံၤန့ၣ်ဘၣ်ကွၢ်တၢ်တီၢ်န့ၣ်လီၤ.တၢ်တီၢ်န့ၣ်မ့ၢ်လဲၢ်ထီၣ်လၢတၢ်အကူအသိးအလိၤမ့ၢ်ဂ့ၤ,လၢလုၣ်အထၢၣ်မ့ၢ်ဂ့ၤ,အဃီၤဂ့ၤ,လၢတၢ်ဖံးအလိၤမ့ၢ်ဂ့ၤ,လၢတၢ်မၤလၢတၢ်ဖံးမ့ၢ်ဂ့ၤ,မ့ၢ်တၢ်ဆါအၢဆိးကဲးလီၤ.မ့ၢ်ဝဲလၢတၢ်တကဆှီဘၣ်လီၤ.

52ဒီးတၢ်လၢတၢ်ကူတၢ်သိးန့ၣ်လၢလုၣ်အထၢၣ်ဂ့ၤ,အဃီၤဂ့ၤ,လၢသးကလးမ့ၢ်ဂ့ၤ,လၢတၢ်ကံးညာ်မ့ၢ်ဂ့ၤ,တၢ်မၤလၢအဖံးမ့ၢ်ဂ့ၤ,လၢတၢ်တီၢ်အိၣ်လၢအပူၤန့ၣ်ပှၤဘၣ်ဆူးထီၣ်ကွံာ်အီၤလၢမ့ၣ်အူလီၤ.အဂ့ၢ်ဒ်အံၤ,မ့ၢ်တၢ်ဆါအၢဆိးကဲး,တၢ်ကဆူးထီၣ်ကွံာ်အီၤလၢမ့ၣ်အူလီၤ.

53ဒီးပှၤလုၢ်တၢ်အဒိၣ်ဘၣ်ကွၢ်,ဒီးကွၢ်ကွၢ်,တၢ်တီၢ်မ့ၢ်တလဲၢ်ထီၣ်ဘၣ်လၢတၢ်အကူအသိးအလိၤ,လၢလုၣ်အထၢၣ်ဂ့ၤ,အဃီၤဂ့ၤ,လၢတၢ်မၤလၢတၢ်ဖံးအလိၤဂ့ၤ, 54ပှၤလုၢ်တၢ်အဒိၣ်ဘၣ်မၤလိာ်လၢပှၤဘၣ်ဆှုၣ်တၢ်အိၣ်ဒီးတၢ်တီၢ်ဒီးဘၣ်ကးတံာ်ဃာ်ဒံးအီၤနွံနံၤဒံးလီၤ.

55ဒီးလၢအဘၣ်တၢ်ဆှုၣ်အလီၢ်ခံန့ၣ်ပှၤလုၢ်တၢ်အဒိၣ်ဘၣ်ကွၢ်တၢ်တီၢ်,ဒီးကွၢ်ကွၢ်,တၢ်တီၢ်အလွဲၢ်မ့ၢ်တလီၤဆီဘၣ်,ဒီးတၢ်တီၢ်မ့ၢ်တလဲၢ်ထီၣ်ဘၣ်ဒီး,မ့ၢ်တကဆှီဘၣ်လီၤ.ဒီးနဘၣ်ဆူးထီၣ်ကွံာ်အီၤလၢမ့ၣ်အူလီၤ.လ့ၤဝဲလၢညါမ့ၢ်ဂ့ၤ,လၢခိမ့ၢ်ဂ့ၤ,မ့ၢ်တၢ်အီၣ်လၢအပူၤလီၤ.

56ဒီးပှၤလုၢ်တၢ်အဒိၣ်မ့ၢ်ကွၢ်,ဒီးကွၢ်ကွၢ်,လၢတၢ်တီၢ်ဘၣ်ဆှုၣ်အသးအလီၢ်ခံန့ၣ်မ့ၢ်ဃးထီၣ်ဒီး,လၢတၢ်အကူအသိးအပူၤဂ့ၤ,လၢတၢ်ဖံးအပူၤဂ့ၤ,လၢလုၣ်အထၢၣ်ဂ့ၤ,အဃီၤဂ့ၤ,ဘၣ်ဖှီကွံာ်အီၤလီၤ. 57ဒီးမ့ၢ်အိၣ်ဖျါထီၣ်ဒံးလၢတၢ်အကူအသိးအပူၤ,လၢလုၣ်အထၢၣ်ဂ့ၤ,အဃီၤဂ့ၤ,လၢတၢ်မၤလၢတၢ်ဖံးဂ့ၤဒီး,မ့ၢ်လၢအလဲၢ်ထီၣ်ဒၣ်တၢ်လီၤ.နဘၣ်ဆူးထီၣ်ကွံာ်တၢ်လၢအတၢ်တီၢ်အိၣ်လၢအလိၤ,လၢမ့ၣ်အူလီၤ.

58ဒီးတၢ်အကူအသိးလုၣ်အထၢၣ်မ့ၢ်ဂ့ၤ,လုၣ်အဃီၤမ့ၢ်ဂ့ၤ,ဖဲဒၣ်တၢ်လၢတၢ်မၤလၢတၢ်ဖံးတမံၤမံၤမ့ၢ်ဂ့ၤ,လၢနဆှုၣ်အီၤန့ၣ်တၢ်တီၢ်မ့ၢ်ဟးထီၣ်ကွံာ်လၢအလိၤဒီး,ဘၣ်ဆှုၣ်အီၤခံဘျီတဘျီ,ဒီးကကဆှီထီၣ်ဝဲလီၤ.

59လၢတၢ်အကူအသိး,သးကလးမ့ၢ်ဂ့ၤ,တၢ်ကံးညာ်မ့ၢ်ဂ့ၤ,လၢလုၣ်အထၢၣ်မ့ၢ်ဂ့ၤ,လုၣ်အဃီၤဂ့ၤ,လၢတၢ်အဖံးတမံၤမံၤမ့ၢ်ဂ့ၤ,အန့ၣ်မ့ၢ်တၢ်သိၣ်တၢ်သီဘၣ်ဃးဒီးတၢ်ဆါအၢလၢအပူၤန့ၣ်ဒ်သိးတၢ်ကပာ်အီၤလၢတၢ်ကဆှီမ့ၢ်ဂ့ၤ,တကဆှီဘၣ်မ့ၢ်ဂ့ၤလီၤ.