‏ Leviticus 14

1ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 2မုၢ်တနံၤလၢပှၤဘၣ်တၢ်ဆါအၢကဆှီထီၣ်န့ၣ်အအံၤမ့ၢ်တၢ်သိၣ်တၢ်သီဘၣ်ဃးဒီးအီၤလီၤ.ပှၤကဒုးဟဲအီၤဆူပှၤလုၢ်တၢ်အဒိၣ်အအိၣ်, 3ဒီးပှၤလုၢ်တၢ်အဒိၣ်ဘၣ်လဲၤထီၣ်ဆူပှၤသူၣ်ဒဲအလီၢ်လၢခိ,ဒီးပှၤလုၢ်တၢ်အဒိၣ်ဘၣ်ကွၢ်,ဒီးကွၢ်ကွၢ်,တၢ်ဆါအၢအတၢ်တီၢ်မ့ၢ်ဘျါက့ၤလၢပှၤဘၣ်တၢ်ဆါအၢအလိၤဒီး, 4ပှၤလုၢ်တၢ်အဒိၣ်ဘၣ်မၤလိာ်,ဒီးလၢပှၤလၢအကဆှီထီၣ်အဂီၢ်န့ၣ်ပှၤဘၣ်ဟံးန့ၢ်ထိၣ်ကဆှီခံဘ့ၣ်လၢအမူဝဲ,ဒီးသ့ၣ်ဆှိအ့ရ့း,ဒီးတၢ်ဂီၤ,ဒီးကဖျီၣ်အ့စိးလီၤ.

5ဒီးပှၤလုၢ်တၢ်အဒိၣ်ဘၣ်မၤလိာ်လၢပှၤကမၤသံထိၣ်တဘ့ၣ်လၢသပၢၤဟီၣ်ခိၣ်အပူၤလၢထံမူအဖီခိၣ်လီၤ.

6ထိၣ်လၢအမူဝဲတဘ့ၣ်န့ၣ်ဘၣ်ဟံးန့ၢ်အီၤ,ဒီးသ့ၣ်ဆှိအ့ရ့း,ဒီးတၢ်ဂီၤ,ဒီးကဖျီၣ်အ့စိး,ဒီးဘၣ်ဘျၢအီၤဒီးထိၣ်လၢအမူဝဲ,လၢထိၣ်လၢအဘၣ်တၢ်မၤသံအီၤလၢထံမူအဖီခိၣ်တဘ့ၣ်အသွံၣ်ပူၤလီၤ.

7ဒီးဘၣ်ဖှံတၢ်လၢပှၤလၢအကဆှီထီၣ်လၢတၢ်ဆါအၢတဂၤအလိၤနွံဘျီ,ဒီးဘၣ်ပာ်အီၤလၢတၢ်ကဆှီ,ဒီးဘၣ်ပျၢ်ထိၣ်လၢအမူဝဲတဘ့ၣ်လၢပျီပူၤလီၤ.

8ဒီးပှၤလၢအကဆှီထီၣ်တဂၤန့ၣ်ဘၣ်ဆှုၣ်အကူအသိးဒီးလူၤကွံာ်အခိၣ်သူဒီးအဆူၣ်ခဲလၢာ်,ဒီးသ့စီအသးလၢထံကျါ,ဒ်သိးအကကဆှီထီၣ်လီၤ.လၢခံက့ၤန့ၣ်ကဟဲက့ၤဆူပှၤသူၣ်ဒဲအလီၢ်ပူၤ,ဒီးကအိၣ်လၢအဒဲလၢခိနွံနံၤလီၤ.

9ဒီးနွံနံၤတနံၤန့ၣ်ဘၣ်လူၤအခိၣ်ဒီဖျၢၣ်ညါ,ဒီးအခၣ်ဆူၣ်,ဒီးအမဲာ်တူၢ်ခိၣ်အဆူၣ်,ဒီးဘၣ်လူၤကွံာ်အဆူၣ်ခဲလၢာ်,ဒီးဘၣ်ဆှုၣ်အကူအသိး,ဒီးဘၣ်သ့စီအညၣ်လၢထံကျါ,ဒီးကကဆှီထီၣ်ဝဲလီၤ.

10ဒီးဃိးနံၤတနံၤန့ၣ်ဘၣ်ဟံးန့ၢ်သိဖါဖိခံဒုအလၢအပှဲၤ,ဒီးသိမိၢ်ဖိတနံၣ်ဖိအလၢအပှဲၤ,ဒီးကိၣ်ကမူၣ်သၢအ့စရိၣ်ကိၣ်ဃါဃုာ်ဒီးသိလၢတၢ်မၤဘူၣ်ကိၣ်အဂီၢ်,ဒီးသိတလိာ်လီၤ.

11ဒီးပှၤလုၢ်တၢ်အဒိၣ်လၢအပာ်ကဆှီအီၤတဂၤန့ၣ်ဘၣ်ပာ်ပှၤလၢအကဆှီထီၣ်တဂၤ,ဒီးတၢ်တဖၣ်န့ၣ်လၢယွၤအမဲာ်ညါ,ဖဲတၢ်အိၣ်ဖှိၣ်အဒဲအကျဲစၢၤန့ၣ်လီၤ.

12ဒီးပှၤလုၢ်တၢ်အဒိၣ်ဘၣ်ဟံးန့ၢ်သိဖါဖိတဒု,ဒီးလုၢ်ထီၣ်အီၤလၢတၢ်လုၢ်တၢ်ကမၣ်အဂီၢ်,ဒီးသိတလိာ်န့ၣ်,ဒီးဝၢ်အီၤလၢတၢ်ဝၢ်လၢယွၤအမဲာ်ညါလီၤ.

13ဒီးဘၣ်မၤသံသိဖါဖိဖဲအလီၢ်လၢမၤသံတၢ်လုၢ်တၢ်ဒဲးဘး,ဒီးတၢ်လုၢ်မ့ၣ်အူ,လၢတၢ်အလီၢ်စီဆှံအပူၤလီၤ.အဂ့ၢ်ဒ်အံၤ,ဒ်တၢ်လုၢ်တၢ်ဒဲးဘးန့ၣ်မ့ၢ်ပှၤလုၢ်တၢ်အဒိၣ်အတၢ်အသိး,တၢ်လုၢ်တၢ်ကမၣ်မ့ၢ်ဒ်န့ၣ်သိးလီၤ.မ့ၢ်တၢ်စီဆှံကတၢၢ်လီၤ.

14ဒီးပှၤလုၢ်တၢ်အဒိၣ်ဘၣ်ဟံးန့ၢ်တၢ်လုၢ်တၢ်ကမၣ်အသွံၣ်,ဒီးပှၤလုၢ်တၢ်အဒိၣ်ဘၣ်ပာ်ဝဲလၢပှၤလၢအကဆှီထီၣ်အနၢ်ကုခိၣ်အထွဲအဖီခိၣ်,ဒီးလၢအစုမုၢ်ဒိၣ်အထွဲအဖီခိၣ်,ဒီးလၢအခီၣ်မုၢ်ဒိၣ်အထွဲအဖီခိၣ်လီၤ.

15ဒီးပှၤလုၢ်တၢ်အဒိၣ်ဘၣ်ဟံးန့ၢ်သိတလိာ်,ဒီးလူလီၤတနီၤဆူအစုစ့ၣ်ဒၣ်ဝဲအညါသးအပူၤလီၤ.

16ဒီးပှၤလုၢ်တၢ်အဒိၣ်ဘၣ်ဘျုးအစုမုၢ်အထွဲတဘိလၢသိလၢအအိၣ်လၢအစုစ့ၣ်ပူၤ,ဒီးဘၣ်ဖှံသိလၢအစုမုၢ်လၢယွၤအမဲာ်ညါနွံဘျီလီၤ.

17ဒီးသိလၢအအိၣ်လီၤတဲာ်လၢအစုပူၤန့ၣ်ပှၤလုၢ်တၢ်အဒိၣ်ဘၣ်ပာ်လၢပှၤလၢအကဆှီထီၣ်တဂၤအနၢ်ကုခိၣ်အထွဲအဖီခိၣ်,ဒီးလၢအစုမုၢ်ဒိၣ်အထွဲအဖီခိၣ်,ဒီးလၢအခီၣ်မုၢ်ဒိၣ်အထွဲအဖီခိၣ်,လၢတၢ်လုၢ်တၢ်ကမၣ်အသွံၣ်အဖီခိၣ်လီၤ.

18ဒီးသိလၢအအိၣ်လီၤတဲာ်လၢပှၤလုၢ်တၢ်အဒိၣ်အစုပူၤန့ၣ်ဘၣ်လူလီၤလၢပှၤလၢအကကဆှီထီၣ်တဂၤအခိၣ်,ဒီးပှၤလုၢ်တၢ်အဒိၣ်တဂၤဘၣ်မၤတၢ်ပူၤဖျဲးလၢအဂီၢ်လၢယွၤအမဲာ်ညါလီၤ.

19ဒီးပှၤလုၢ်တၢ်အဒိၣ်ဘၣ်လုၢ်တၢ်လုၢ်တၢ်ဒဲးဘး,ဒီးမၤတၢ်ပူၤဖျဲးလၢပှၤလၢအကကဆှီထီၣ်လၢအတၢ်တကဆှီဘၣ်အဂီၢ်လီၤ.လၢခံက့ၤဒီးဘၣ်မၤသံတၢ်လုၢ်မ့ၣ်အူလီၤ.

20ဒီးပှၤလုၢ်တၢ်အဒိၣ်ဘၣ်လုၢ်တၢ်လုၢ်မ့ၣ်အူ,ဒီးတၢ်မၤဘူၣ်ကိၣ်လၢတၢ်လုၢ်လီၢ်အဖီခိၣ်,ဒီးပှၤလုၢ်တၢ်အဒိၣ်ဘၣ်မၤတၢ်ပူၤဖျဲးလၢအဂီၢ်,ဒီးကကဆှီထီၣ်ဝဲလီၤ.

21ဒီးမ့ၢ်ဖှီၣ်မ့ၢ်ယာ်,ဒီးအစုတချုးန့ၢ်ဘၣ်တၢ်တဖၣ်န့ၣ်ဒီး,ဘၣ်ဟံးန့ၢ်သိဖိတဒုလၢတၢ်လုၢ်တၢ်ကမၣ်အဂီၢ်,လၢပှၤကဝၢ်ဝဲဒ်သိးအကမၤတၢ်ပူၤဖျဲးလၢအဂီၢ်,ဒီးကိၣ်ကမူၣ်တအ့စရိၣ်ဃါဃုာ်ဒီးသိလၢတၢ်မၤဘူၣ်အဂီၢ်,ဒီးသိတလိာ်, 22ဒီးထိၣ်လွံၢ်ဘုၣ်ခံဘ့ၣ်မ့ၢ်ဂ့ၤ,ကးက့ၣ်ဖိခံဘ့ၣ်မ့ၢ်ဂ့ၤ,တၢ်လၢအစုကချုးန့ၢ်အီၤလီၤ.ဒီးအဝဲတဘ့ၣ်ကကဲထီၣ်တၢ်လုၢ်တၢ်ဒဲးဘး,ဒီးအဝဲတဘ့ၣ်လၢတၢ်လုၢ်မ့ၣ်အူလီၤ.

23ဒီးဃိးနံၤတနံၤန့ၣ်ဘၣ်ဟဲစိာ်အီၤဆူပှၤလုၢ်တၢ်အဒိၣ်အအိၣ်လၢအကကဆှီထီၣ်အဂီၢ်,ဆူတၢ်အိၣ်ဖှိၣ်အဒဲအကျဲစၢၤလၢယွၤအမဲာ်ညါလီၤ.

24ဒီးပှၤလုၢ်တၢ်အဒိၣ်ဘၣ်ဟံးန့ၢ်သိဖိ,တၢ်လုၢ်တၢ်ကမၣ်,ဒီးသိတလိာ်န့ၣ်,ဒီးပှၤလုၢ်တၢ်အဒိၣ်ဘၣ်ဝၢ်အီၤလၢတၢ်ဝၢ်လၢယွၤအမဲာ်ညါလီၤ.

25ဒီးပှၤလုၢ်တၢ်အဒိၣ်ဘၣ်မၤသံသိဖိ,တၢ်လုၢ်တၢ်ကမၣ်,ဒီးပှၤလုၢ်တၢ်အဒိၣ်ဘၣ်ဟံးန့ၢ်တၢ်လုၢ်တၢ်ကမၣ်အသွံၣ်,ဒီးပာ်ဝဲလၢပှၤလၢအကကဆှီထီၣ်အနၢ်ကုခိၣ်အထွဲအဖီခိၣ်,ဒီးလၢအစုမုၢ်ဒိၣ်အထွဲအဖီခိၣ်,ဒီးလၢအခီၣ်မုၢ်ဒိၣ်အထွဲအဖီခိၣ်လီၤ.

26ဒီးပှၤလုၢ်တၢ်အဒိၣ်ဘၣ်လူလီၤသိတနီၤဆူအစုစ့ၣ်ဒၣ်ဝဲအညါသးအပူၤလီၤ.

27ဒီးပှၤလုၢ်တၢ်အဒိၣ်ဘၣ်ဖှံတၢ်လၢအစုမုၢ်အထွဲတဘိလၢသိအိၣ်လၢအစုစ့ၣ်ပူၤန့ၣ်လၢယွၤအမဲာ်ညါနွံဘျီလီၤ.

28ဒီးပှၤလုၢ်တၢ်အဒိၣ်ဘၣ်ပာ်သိအိၣ်လၢအစုပူၤလၢပှၤလၢအကကဆှီထီၣ်တဂၤအနၢ်ကုခိၣ်အထွဲအဖီခိၣ်,ဒီးလၢအစုမုၢ်ဒိၣ်အထွဲအဖီခိၣ်,ဒီးလၢအခီၣ်မုၢ်ဒိၣ်အထွဲအဖီခိၣ်လၢတၢ်လုၢ်တၢ်ကမၣ်အသွံၣ်လီၢ်အဖီခိၣ်န့ၣ်လီၤ.

29ဒီးသိလၢအအိၣ်လီၤတဲာ်လၢပှၤလုၢ်တၢ်အဒိၣ်အစုပူၤန့ၣ်ဘၣ်ပာ်ဝဲလၢပှၤလၢအကကဆှီထီၣ်တဂၤအခိၣ်,ဒ်သိးအကမၤတၢ်ပူၤဖျဲးလၢအဂီၢ်လၢယွၤအမဲာ်ညါလီၤ. 30ဒီးလၢထိၣ်လွံၢ်ဘုၣ်မ့ၢ်ဂ့ၤ,ကးက့ၣ်ဖိမ့ၢ်ဂ့ၤ,လၢတၢ်လၢအစုချုးန့ၢ်အီၤ,ဘၣ်လုၢ်တဘ့ၣ်, 31ဖဲဒၣ်တၢ်လၢအစုချုးန့ၢ်တဘ့ၣ်လၢတၢ်လုၢ်တၢ်ဒဲးဘးအဂီၢ်,ဒီးတဘ့ၣ်လၢတၢ်လုၢ်မ့ၣ်အူအဂီၢ်အိၣ်ဒီးတၢ်မၤဘူၣ်ကိၣ်လီၤ.ဒီးပှၤလုၢ်တၢ်အဒိၣ်ဘၣ်မၤတၢ်ပူၤဖျဲးလၢပှၤလၢအကကဆှီထီၣ်တဂၤအဂီၢ်,လၢယွၤအမဲာ်ညါလီၤ.

32အန့ၣ်မ့ၢ်တၢ်သိၣ်တၢ်သီဘၣ်ဃးဒီးပှၤလၢတၢ်ဆါအၢအတၢ်တီၢ်အိၣ်လၢအလိၤလၢအစုတချုးန့ၢ်ဘၣ်တၢ်ဘၣ်ဃးဒီးအကကဆှီထီၣ်တဂၤန့ၣ်လီၤ.

33ဒီးယွၤကတိၤတၢ်ဒီးစီၤမိၤရှ့ဒီးစီၤအၤဟရိၣ်,ဒီးစံးဝဲဒၣ်, 34တုၤသုလဲၤနုာ်လၢကီၢ်ကနၤဧၣ်အပူၤလၢယကဟ့ၣ်လီၤသုလၢတၢ်ဟံးဃာ်,ဒီးယပာ်တၢ်ဆါအၢအတၢ်တီၢ်လၢဟံၣ်တဖျၢၣ်အပူၤလၢကီၢ်လၢသုန့ၢ်ဘၣ်အပူၤဒီး, 35ဟံၣ်ကစၢ်ဘၣ်ဟဲစံးဘၣ်ပှၤလုၢ်တၢ်အဒိၣ်,ဒီးဘၣ်စံး,ယကွၢ်ယဲလၢတၢ်တီၢ်အိၣ်ဝဲလၢဟံၣ်ပူၤန့ၣ်လီၤ. 36ဒီးပှၤလုၢ်တၢ်အဒိၣ်ဘၣ်မၤလိာ်လၢပှၤလုၢ်တၢ်အဒိၣ်တချုးလဲၤနုာ်ဒံးဘၣ်ဒီး,ပှၤဘၣ်ကတဲာ်ကတီၤတၢ်ဒ်သိးကယဲၢ်တၢ်အိၣ်လၢဟံၣ်ပူၤအသုတကဲထီၣ်ဘၣ်တၢ်တကဆှီဘၣ်တဂ့ၤလီၤ.လၢခံက့ၤန့ၣ်ပှၤလုၢ်တၢ်အဒိၣ်ကလဲၤနုာ်ကွၢ်ဟံၣ်န့ၣ်လီၤ.

37ဒီးကကွၢ်တၢ်တီၢ်န့ၣ်,ဒီးကွၢ်ကွၢ်,တၢ်တီၢ်န့ၣ်မ့ၢ်အိၣ်လၢဟံၣ်ဒူၣ်အလိၤ,ဒီးအလီၢ်လီၤဆၢၣ်တဖၣ်လါဟ့တစဲးစဲးမ့ၢ်ဂ့ၤ,ဂီၤတစဲးစဲးမ့ၢ်ဂ့ၤ,လၢအလီၢ်လီၤဆၢၣ်လၢဒူၣ်အလိၤဒီး, 38ပှၤလုၢ်တၢ်အဒိၣ်ဘၣ်ဟးထီၣ်လၢဟံၣ်ဆူဟံၣ်အကျဲစၢၤ,ဒီးကးတံာ်ဃာ်အတြဲၤနွံနံၤလီၤ.

39ဒီးနွံနံၤတနံၤန့ၣ်ပှၤလုၢ်တၢ်အဒိၣ်ဘၣ်ဟဲကဒီး,ဒီးကွၢ်,ဒီးကွၢ်ကွၢ်,တၢ်တီၢ်န့ၣ်မ့ၢ်လဲၢ်ထီၣ်လၢဟံၣ်အဒူၣ်လိၤဒီး, 40ပှၤလုၢ်တၢ်အဒိၣ်ဘၣ်မၤလိာ်တၢ်,လၢပှၤကဟံးထီၣ်ကွံာ်လၢၢ်လၢအအိၣ်ဒီးတၢ်တီၢ်န့ၣ်,ဒီးဘၣ်ကွံာ်တ့ၢ်ကွံာ်အီၤလၢအလီၢ်တကဆှီဘၣ်ဖဲဝ့ၢ်လၢခိလီၤ.

41ဒီးဘၣ်မၢပှၤကွးကွံာ်ဟံၣ်အပူၤဝးတရံးဝဲ,ဒီးဘၣ်ဂၢ်ကွံာ်အကမူၣ်လၢအကွးကွံာ်,လၢဝ့ၢ်လၢခိဖဲအလီၢ်တကဆှီဘၣ်လီၤ.

42ဒီးဘၣ်ဟံးန့ၢ်လၢၢ်အဂၤတဖၣ်,ဒီးပာ်ဝဲလၢလၢၢ်တဖၣ်အလီၢ်,ဒီးဘၣ်ဟံးန့ၢ်အီကတ့ၣ်အဂၤ,ဒီးဖှူဟံၣ်န့ၣ်လီၤ.

43ဒီးဟံးထီၣ်ကွံာ်လၢၢ်ဒီးကွးကွံာ်ဟံၣ်ဒီးဖှူအီၤဒီးအီကတ့ၢ်အလီၢ်ခံန့ၣ်တၢ်တီၢ်မ့ၢ်ဟဲထီၣ်ကဒီး,ဒီးအိၣ်ထီၣ်လၢဟံၣ်တဖျၢၣ်န့ၣ်အပူၤဒီး, 44ပှၤလုၢ်တၢ်အဒိၣ်ဘၣ်ဟဲ,ဒီးကွၢ်,ဒီးကွၢ်ကွၢ်,တၢ်တီၢ်မ့ၢ်လဲၢ်ထီၣ်လၢဟံၣ်န့ၣ်ဒီး,မ့ၢ်မးတၢ်ဆါအၢဆိးကဲးလၢဟံၣ်ပူၤန့ၣ်လီၤ.မ့ၢ်တကဆှီဘၣ်လီၤ.

45ဒီးဘၣ်မၤလီၤပှီၢ်ကွံာ်ဟံၣ်န့ၣ်,အလၢၢ်တဖၣ်,ဒီးအသ့ၣ်တဖၣ်,ဒီးဟံၣ်အအီကတ့ၣ်ခဲလၢာ်ဒီးဘၣ်စိာ်ထီၣ်ကွံာ်အီၤဆူဝ့ၢ်လၢခိ,ဆူအလီၢ်တကဆှီဘၣ်လီၤ.

46လၢန့ၣ်အမဲာ်ညါမုၢ်နံၤခဲလၢာ်လၢဟံၣ်ကးတံာ်ဃာ်အသးအဖၢမုၢ်န့ၣ်ဒီး,ပှၤလၢအလဲၤနုာ်န့ၣ်ကကဲထီၣ်တၢ်တကဆှီဘၣ်တုၤမုၢ်ဟါလီၤ.

47ဒီးပှၤလၢအမံလၢဟံၣ်ပူၤန့ၣ်,ဘၣ်ဆှုၣ်အကူအသိး,ဒီးပှၤလၢအအီၣ်တၢ်လၢအဟံၣ်ပူၤန့ၣ်,ဘၣ်ဆှုၣ်အကူအသိးလီၤ.

48ဒီးပှၤလုၢ်တၢ်အဒိၣ်မ့ၢ်ဟဲဒီးကွၢ်ဝဲ,ဒီးကွၢ်ကွၢ်,တၢ်တီၢ်မ့ၢ်တလဲၢ်ထီၣ်ဘၣ်လၢဟံၣ်ပူၤ,လၢအဘၣ်တၢ်ဖှူအီၤဒီးအီကတ့ၣ်အလီၢ်ခံန့ၣ်ဒီး,ပှၤလုၢ်တၢ်အဒိၣ်ဘၣ်ပာ်ဟံၣ်တဖျၢၣ်န့ၣ်လၢအကဆှီလီၤ.အဂ့ၢ်ဒ်အံၤ,တၢ်တီၢ်ဘျါဝဲလံလီၤ.

49ဒီးဒ်သိးအကမၤကဆှီဟံၣ်န့ၣ်ဒီး,ဘၣ်ဟံးန့ၢ်ထိၣ်ခံဘ့ၣ်,ဒီးသ့ၣ်ဆှိအ့ရ့း,ဒီးတၢ်ဂီၤ,ဒီးကဖျီၣ်အ့စိးလီၤ. 50ဒီးဘၣ်မၤသံထိၣ်တဘ့ၣ်လၢသပၢၤဟီၣ်ခိၣ်အပူၤလၢထံမူအဖီခိၣ်လီၤ.

51ဒီးဘၣ်ဟံးန့ၢ်သ့ၣ်ဆှိအ့ရ့း,ဒီးကဖျီၣ်အ့စိး,ဒီးတၢ်ဂီၤ,ဒီးထိၣ်လၢအမူဝဲတဘ့ၣ်,ဒီးဘျၢအီၤလၢထိၣ်လၢတၢ်မၤသံအီၤတဘ့ၣ်အသွံၣ်,ဒီးလၢထံမူအပူၤ,ဒီးဖှံဟံၣ်န့ၣ်နွံဘျီလီၤ.

52ဒီးဘၣ်မၤကဆှီထီၣ်ဟံၣ်လၢထိၣ်အသွံၣ်,ဒီးထံမူ,ဒီးထိၣ်လၢအမူဝဲ,ဒီးသ့ၣ်ဆှိအ့ရ့း,ဒီးကဖျီၣ်အ့စိး,ဒီးတၢ်ဂီၤလီၤ. 53မ့မ့ၢ်ထိၣ်လၢအမူဝဲတဘ့ၣ်န့ၣ်ဘၣ်ပျၢ်ကွံာ်လၢဝ့ၢ်ပူၤဆူပျီပူၤ,ဒီးဘၣ်မၤတၢ်ပူၤဖျဲးလၢဟံၣ်အဂီၢ်,ဒီးကကဆှီထီၣ်လီၤ.

54အန့ၣ်မ့ၢ်တၢ်သိၣ်တၢ်သီဘၣ်ဃးဒီးကယဲၢ်တၢ်ဆါအၢ,ဒီးတၢ်ဃာ်အတၢ်တီၢ်, 55ဒီးတၢ်အကူအသိး,ဒီးဟံၣ်ဧိၤဃီဧိၤအတၢ်ဆါအၢ, 56ဒီးတၢ်ပြုထီၣ်,ဒီးအဖံးလီၤသဘျံးအလီၢ်,ဒီးအလီၢ်ဝါ, 57ဒ်သိးအကသိၣ်လိတၢ်လၢမုၢ်နံၤလၢအတကဆှီဘၣ်,ဒီးမုၢ်နံၤလၢအကဆှီထီၣ်တၢ်န့ၣ်လီၤ.အန့ၣ်မ့ၢ်တၢ်သိၣ်တၢ်သီဘၣ်ဃးဒီးတၢ်ဆါအၢန့ၣ်လီၤ.