Lev 16 | KswSKMB | STEP | ဒီးစီၤအၤဟရိၣ်အဖိခွါခံဂၤဖဲအလုၢ်တၢ်လၢယွၤအမဲာ်ညါဒီးသံဝဲအလီၢ်ခံန့ၣ်,ယွၤကတိၤတၢ်ဒီးစီၤမိၤရှ့,

‏ Leviticus 16

1 ဒီးစီၤအၤဟရိၣ်အဖိခွါခံဂၤဖဲအလုၢ်တၢ်လၢယွၤအမဲာ်ညါဒီးသံဝဲအလီၢ်ခံန့ၣ်,ယွၤကတိၤတၢ်ဒီးစီၤမိၤရှ့, 2 ဒီးယွၤစံးဘၣ်စီၤမိၤရှ့,စံးဘၣ်နဒီပုၢ်ဝဲၢ်စီၤအၤဟရိၣ်,လၢအသုတလဲၤနုာ်ကိးအဆၢအကတီၢ်ဒဲးဆူတၢ်အလီၢ်စီဆှံအပူၤလၢယၣ်ဘျးထီၣ်အသးလၢညါခီ,လၢတၢ်မၤပူၤဖျဲးအလီၢ်အမဲာ်ညါလၢအအိၣ်လၢတလါအဖီခိၣ်,ဒ်သိးအသုတသံတဂ့ၤ.အဂ့ၢ်ဒ်အံၤ,ယကအိၣ်ဖျါထီၣ်လၢတၢ်အၢၣ်အပူၤလၢတၢ်မၤပူၤဖျဲးအလီၢ်အဖီခိၣ်လီၤ.

3 စီၤအၤဟရိၣ်ဘၣ်လဲၤဆူတၢ်အလီၢ်စီဆှံအပူၤအိၣ်ဒီးတၢ်အံၤ,ဂီၤဖံးဖိလၢတၢ်လုၢ်တၢ်ဒဲးဘးအဂီၢ်,ဒီးသိဖါလၢတၢ်လုၢ်မ့ၣ်အူအဂီၢ်လီၤ.

4 ဒီးဘၣ်သိးဆ့ဖှီဝါစီဆှံ,ဒီးအိၣ်ဒီးအတၢ်ဖျီၣ်ခံဖှီဝါလၢအညၣ်လိၤ,ဒီးအိၣ်ကံၢ်တူာ်အယီၢ်ဒ့ဒီးယီၢ်တကိးဖှီဝါ,ဒီးအိၣ်ဒီးခိၣ်သလုးဖှီဝါလီၤ.တၢ်တဖၣ်န့ၣ်မ့ၢ်တၢ်အကူအသိးစီဆှံ,ဒီးဘၣ်သ့စီအညၣ်လၢထံ,ဒီးကူထီၣ်သိးထီၣ်ဝဲလီၤ.

5 ဒီးဘၣ်ဟံးန့ၢ်မဲာ်တဲးလဲးဖါခံဒုလၢပှၤအံၣ်စရ့လးဖိအတၢ်အိၣ်ဖှိၣ်အစုပူၤလၢတၢ်လုၢ်တၢ်ဒဲးဘးအဂီၢ်,ဒီးသိဖါတဒုလၢတၢ်လုၢ်မ့ၣ်အူအဂီၢ်လီၤ.

6 ဒီးစီၤအၤဟရိၣ်ဘၣ်လုၢ်အဂီၤဖံးတဒုလၢတၢ်လုၢ်တၢ်ဒဲးဘးအဂီၢ်လၢအဂီၢ်ဒၣ်ဝဲ,ဒီးမၤတၢ်ပူၤဖျဲးလၢအဂီၢ်ဒၣ်ဝဲ,ဒီးလၢအပှၤဟံၣ်ဖိအဂီၢ်လီၤ.

7 ဒီးဘၣ်ဟံးန့ၢ်မဲာ်တဲးလဲးခံဒု,ဒီးပာ်အီၤလၢယွၤအမဲာ်ညါဖဲတၢ်အိၣ်ဖှိၣ်အဒဲအကျဲစၢၤန့ၣ်လီၤ.

8 ဒီးစီၤအၤဟရိၣ်ဘၣ်ဖးတၢ်လၢမဲာ်တဲးလဲးအဂီၢ်,တဂီၢ်လၢယွၤအဂီၢ်,ဒီးတဂီၢ်လၢဧ့စ့ၤစ့လးအဂီၢ်, 9 ဒီးစီၤအၤဟရိၣ်ဘၣ်ဟဲစိာ်မဲာ်တဲးလဲးလၢအလီၤဘၣ်လၢယွၤအဂီၢ်တဒု,ဒီးလုၢ်အီၤလၢတၢ်လုၢ်တၢ်ဒဲးဘးအဂီၢ်လီၤ.

10 မ့မ့ၢ်မဲာ်တဲးလဲးလၢအလီၤဘၣ်လၢဧ့စ့ၤစ့လးအဂီၢ်တဒုန့ၣ်ကဘၣ်တၢ်ပာ်အီၤအိၣ်မူလၢယွၤအမဲာ်ညါဒ်သိးကမၤတၢ်ပူၤဖျဲးဒီးအီၤ,ဒီးပျၢ်အီၤဆူပှၢ်မုၢ်ကနၢလၢဧ့စ့ၤစ့လးအဂီၢ်လီၤ.

11 ဒီးစီၤအၤဟရိၣ်ဘၣ်ဟဲစိာ်ဂီၤဖံးလၢတၢ်လုၢ်တၢ်ဒဲးဘးအဂီၢ်,လၢအမ့ၢ်လၢအဂီၢ်ဒၣ်ဝဲတဒု,ဒီးဘၣ်မၤတၢ်ပူၤဖျဲးလၢအဂီၢ်ဒၣ်ဝဲ,ဒီးလၢအပှၤဟံၣ်ဖိအဂီၢ်,ဒီးဘၣ်မၤသံဂီၤဖံးလၢတၢ်လုၢ်တၢ်ဒဲးဘးလၢအဂီၢ်ဒၣ်ဝဲလီၤ.

12 ဒီးဘၣ်မၤပှဲၤသပၢၤမ့ၣ်အူလၢမ့ၣ်အူကဖး,လၢအဟံးန့ၢ်လၢတၢ်လုၢ်လီၢ်အဖီခိၣ်အိၣ်လၢယွၤအမဲာ်ညါ,ဒီးအစုပှဲၤဒီးတၢ်နၢမူဆိၣ်ကဲၤ,တိၢ်ကမူၣ်အသး,ဒီးစိာ်ဝဲဆူတၢ်ယၣ်ဘျးထီၣ်အသးလၢညါခီလီၤ.

13 ဒီးဘၣ်ပာ်တၢ်နၢမူဆိၣ်ကဲၤလၢမ့ၣ်အူအဖီခိၣ်လၢယွၤအမဲာ်ညါ,ဒ်သိးတၢ်နၢမူဆိၣ်ကဲၤအခုၣ်ကကျၢၢ်ဘၢတၢ်မၤပူၤဖျဲးအလီၢ်လၢအအိၣ်လၢတၢ်အၢၣ်လီၤအီလီၤအဖီခိၣ်,လၢအသုတသံတဂ့ၤန့ၣ်လီၤ.

14 ဒီးဘၣ်ဟံးန့ၢ်ဂီၤဖံးအသွံၣ်တနီၤ,ဒီးဖှံလၢအစုမုၢ်တဘိလၢတၢ်မၤပူၤဖျဲးအလီၢ်အဖီခိၣ်လၢမုၢ်ထီၣ်တခီ,ဒီးလၢတၢ်မၤပူၤဖျဲးအလီၢ်အမဲာ်ညါန့ၣ်ဘၣ်ဖှံတၢ်သွံၣ်လၢအစုမုၢ်တဘိနွံဘျီလီၤ.

15 ဒီးဘၣ်မၤသံမဲာ်တဲးလဲးလၢတၢ်လုၢ်တၢ်ဒဲးဘးအဂီၢ်လၢအမ့ၢ်လၢပှၤဂီၢ်မုၢ်အဂီၢ်,ဒီးစိာ်နုာ်အသွံၣ်လၢယၣ်ဘျးထီၣ်အသးလၢညါခီ,ဒီးမၤအသွံၣ်ဒ်အမၤဂီၤဖံးအသွံၣ်အသိးန့ၣ်,ဒီးဖှံအီၤလၢတၢ်မၤပူၤဖျဲးအလီၢ်အဖီခိၣ်,ဒီးလၢတၢ်မၤပူၤဖျဲးအလီၢ်အမဲာ်ညါလီၤ.

16 ဒီးဘၣ်မၤတၢ်မၤပူၤဖျဲးလၢတၢ်အလီၢ်စီဆှံအဂီၢ်,လၢပှၤအံၣ်စရ့လးဖိအတၢ်တကဆှီဘၣ်အဃိ,ဒီးလၢအတၢ်ကမၣ်လၢအတၢ်ဒဲးဘးခဲလၢာ်အဃိ,ဒီးဘၣ်မၤဒ်န့ၣ်သိးလၢတၢ်အိၣ်ဖှိၣ်အဒဲအဂီၢ်လၢအအိၣ်လၢအကျါလၢအတၢ်တကဆှီဘၣ်အသးကံၢ်ပူၤလီၤ.

17 ဒီးတုၤအလဲၤနုာ်ဒ်သိးအကမၤတၢ်ပူၤဖျဲးလၢတၢ်အလီၢ်စီဆှံအပူၤဒီး,ပှၤတဘၣ်အိၣ်လၢတၢ်အိၣ်ဖှိၣ်အဒဲပူၤနီတဂၤဘၣ်တုၤလီၤလၢအမၤတၢ်ပူၤဖျဲးလၢအဂီၢ်ဒၣ်ဝဲ,ဒီးလၢအပှၤဟံၣ်ဖိအဂီၢ်,ဒီးလၢပှၤအံၣ်စရ့လးဖိခဲလၢာ်အဂီၢ်,ဒီးဟဲက့ၤထီၣ်ဝဲန့ၣ်လီၤ.

18 ဒီးဘၣ်ဟဲထီၣ်ဆူတၢ်လုၢ်လီၢ်လၢအအိၣ်လၢယွၤအမဲာ်ညါ,ဒီးမၤတၢ်ပူၤဖျဲးလၢအဂီၢ်,ဒီးဘၣ်ဟံးန့ၢ်ဂီၤဖံးအသွံၣ်,ဒီးမဲာ်တဲးလဲးအသွံၣ်,ဒီးပာ်ဝဲလၢတၢ်လုၢ်လီၢ်အနၢၤတဖၣ်ဝးတရံးအီၤလီၤ. 19 ဒီးဘၣ်ဖှံတၢ်သွံၣ်လၢအဖီခိၣ်လၢအစုမုၢ်တဘိနွံဘျီ,ဒီးမၤကဆှီထီၣ်အီၤ,ဒီးမၤစီဆှံထီၣ်အီၤလၢပှၤအံၣ်စရ့လးဖိအတၢ်တကဆှီဘၣ်အဃိန့ၣ်လီၤ.

20 ဒီးတုၤအမၤတၢ်ပူၤဖျဲးလၢတၢ်အလီၢ်စီဆှံအဂီၢ်,ဒီးတၢ်အိၣ်ဖှိၣ်အဒဲအဂီၢ်,ဒီးတၢ်လုၢ်လီၢ်အဂီၢ်ဝံၤဒီး,ဘၣ်ဟဲစိာ်မဲာ်တဲးလဲးလၢအမူတဒုလီၤ. 21 ဒီးစီၤအၤဟရိၣ်ဘၣ်ပာ်အစုခံခီလၢမဲာ်တဲးလဲးလၢအမူဝဲတဒုအခိၣ်,ဒီးတဲလီၤကျဲၤလီၤပှၤအံၣ်စရ့လးဖိအတၢ်အၢတၢ်သီခဲလၢာ်,ဒီးအတၢ်ကမၣ်ခဲလၢာ်,အတၢ်ဒဲးဘးတဖၣ်ခဲလၢာ်ဒၣ်လဲာ်,ဒီးပာ်အီၤလၢမဲာ်တဲးလဲးအခိၣ်,ဒီးပျၢ်ဝဲလၢပှၤဘၣ်တၢ်ဃုထၢအီၤတဂၤအစုပူၤဆူပှၢ်မုၢ်ကနၢလီၤ.

22 မဲာ်တဲးလဲးတဒုန့ၣ်ကစိာ်ထီၣ်ကွံာ်ကယဲၢ်အတၢ်သရူးတၢ်ကမၣ်ဆူကီၢ်အိၣ်သယုၢ်တဘ့ၣ်,ဒီးအဝဲဒၣ်ဘၣ်ပျၢ်ကွံာ်မဲာ်တဲးလဲးန့ၣ်ဆူပှၢ်မုၢ်ကနၢလီၤ.

23 ဒီးစီၤအၤဟရိၣ်ဘၣ်ဟဲနုာ်လၢတၢ်အိၣ်ဖှိၣ်အဒဲပူၤ,ဒီးအကူအသိးဖှီဝါလၢအကူထီၣ်သိးထီၣ်ဖဲအလဲၤနုာ်လၢတၢ်အလီၢ်စီဆှံန့ၣ်ဘၣ်ဘ့ၣ်ကွံာ်ဒီးပာ်လီၤတဲာ်အီၤဖဲန့ၣ်လီၤ.

24 ဒီးဘၣ်သ့စီအညၣ်လၢထံလၢတၢ်အလီၢ်စီဆှံအပူၤ,ဒီးကူထီၣ်သိးထီၣ်အကူအသိးဒီးဟဲထီၣ်,ဒီးလုၢ်အတၢ်လုၢ်မ့ၣ်အူ,ဒီးပှၤဂီၢ်မုၢ်အတၢ်လုၢ်မ့ၣ်အူ,ဒီးမၤတၢ်ပူၤဖျဲးလၢအဂီၢ်ဒၣ်ဝဲဒီးလၢပှၤဂီၢ်မုၢ်အဂီၢ်လီၤ.

25 ဒီးဘၣ်ဆိၣ်ကဲၤကွံာ်တၢ်လုၢ်တၢ်ဒဲးဘးအသိန့ၣ်လၢတၢ်လုၢ်လီၢ်အဖီခိၣ်လီၤ.

26 ဒီးပှၤလၢအပျၢ်ကွံာ်မဲာ်တဲးလဲးလၢဧ့စ့ၤစ့လးအဂီၢ်တဂၤန့ၣ်ဘၣ်ဆှုၣ်အကူအသိး,ဒီးသ့စီအညၣ်လၢထံ,ဒီးလၢခံက့ၤန့ၣ်ကဟဲက့ၤနုာ်ဘၣ်ဆူပှၤသူၣ်ဒဲအလီၢ်ပူၤလီၤ.

27 ဒီးဂီၤဖံးလၢတၢ်လုၢ်တၢ်ဒဲးဘးအဂီၢ်တဒု,ဒီးမဲာ်တဲးလဲးလၢတၢ်လုၢ်တၢ်ဒဲးဘးအဂီၢ်တဒု,လၢပှၤဟဲစိာ်အသွံၣ်ဆူအလီၢ်စီဆှံအပူၤဒ်သိးအကမၤတၢ်ပူၤဖျဲးန့ၣ်ပှၤဘၣ်စိာ်ထီၣ်ကွံာ်အီၤဆူပှၤသူၣ်ဒဲအလီၢ်လၢခိ,ဒီးဘၣ်ဆူးထီၣ်ကွံာ်အဖံး,ဒီးအညၣ်,ဒီးအအ့ၣ်လၢမ့ၣ်အူလီၤ.

28 ဒီးပှၤလၢအဆူးထီၣ်ကွံာ်အီၤတဂၤန့ၣ်ဘၣ်ဆှုၣ်အကူအသိး,ဒီးသ့စီအညၣ်လၢထံလီၤ.လၢခံက့ၤဒီးကဟဲနုာ်ဘၣ်လၢပှၤသူၣ်ဒဲအလီၢ်ပူၤလီၤ.

29 အအံၤမ့ၢ်တၢ်အလုၢ်အလၢ်အထူအယိာ်လၢသုဂီၢ်,လၢလါနွံဘ့ၣ်တဘ့ၣ်,လါထီၣ်ဆံဆဲၣ်နံၤတနံၤန့ၣ်သုဘၣ်ဆီၣ်လီၤသုသး,ဒီးပှၤလၢသုကလုာ်ဒၣ်ဝဲမ့ၢ်ဂ့ၤ,ပှၤတခီဘီတခီမုၢ်ဖိလၢအအိၣ်လၢသုကျါမ့ၢ်ဂ့ၤ,တဘၣ်မၤတၢ်မၤနီတမံၤဘၣ်.

30 အဂ့ၢ်ဒ်အံၤ,တၢ်လၢမုၢ်တနံၤန့ၣ်တၢ်ကမၤတၢ်ပူၤဖျဲးလၢသုဂီၢ်ဒ်သိးသုကကဆှီထီၣ်လၢသုတၢ်ဒဲးဘးခဲလၢာ်လၢယွၤအမဲာ်ညါလီၤ.

31 ကကဲထီၣ်အိၣ်ဘှံးအနံၤအတၢ်အိၣ်ဘှံးလၢသုဂီၢ်,ဒီးသုဘၣ်ဆီၣ်လီၤသုသးလီၤ.မ့ၢ်တၢ်မၤလိာ်အထူအယိာ်လီၤ.

32 ဒီးပှၤလုၢ်တၢ်အဒိၣ်လၢတၢ်ဖှူအီၤဒီးပာ်စီဆှံအီၤဒ်သိးအကမၤပှၤလုၢ်တၢ်အဒိၣ်အတၢ်လၢအပၢ်အလီၢ်တဂၤန့ၣ်ဘၣ်မၤတၢ်ပူၤဖျဲး,ဒီးကူထီၣ်သိးထီၣ်တၢ်အကူအသိးဖှီဝါ,တၢ်အကူအသိးစီဆှံလီၤ.

33 ဒီးဘၣ်မၤတၢ်ပူၤဖျဲးလၢတၢ်အလီၢ်စီဆှံအဂီၢ်,ဒီးဘၣ်မၤတၢ်ပူၤဖျဲးလၢတၢ်အိၣ်ဖှိၣ်အဒဲအဂီၢ်,ဒီးလၢတၢ်လုၢ်လီၢ်အဂီၢ်,ဒီးဘၣ်မၤတၢ်ပူၤဖျဲးလၢပှၤလုၢ်တၢ်အဒိၣ်တဖၣ်အဂီၢ်,ဒီးလၢတၢ်အိၣ်ဖှိၣ်အပှၤဂီၢ်မုၢ်ခဲလၢာ်အဂီၢ်လီၤ.

34 ဒီးအန့ၣ်ကကဲထီၣ်တၢ်အလုၢ်အလၢ်အထူအယိာ်လၢသုဂီၢ်,လၢအကမၤတၢ်ပူၤဖျဲးလၢပှၤအံၣ်စရ့လးဖိအဂီၢ်,လၢအတၢ်ဒဲးဘးခဲလၢာ်အဂီၢ်တနံၣ်တဘျီတနံၣ်တဘျီလီၤ.ဒီးမၤဝဲဒ်ယွၤမၤလိာ်စီၤမိၤရှ့အသိးန့ၣ်လီၤ.