Leviticus 17
1ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 2ကတိၤတၢ်ဒီးစီၤအၤဟရိၣ်ဒီးအဖိခွါတဖၣ်,ဒီးပှၤအံၣ်စရ့လးဖိခဲလၢာ်,ဒီးစံးဘၣ်အီၤ,အအံၤမ့ၢ်တၢ်လၢယွၤမၤလိာ်ဒီးစံး, 3ဂီၤဖံးမ့ၢ်ဂ့ၤ,သိဖိမ့ၢ်ဂ့ၤ,မဲာ်တဲးလဲးမ့ၢ်ဂ့ၤ,ဖဲဒၣ်ပှၤလၢအမၤသံအီၤလၢပှၤသူၣ်ဒဲအလီၢ်ပူၤမ့ၢ်ဂ့ၤ,လၢအမၤသံအီၤလၢပှၤသူၣ်ဒဲအလီၢ်လၢခိမ့ၢ်ဂ့ၤ, 4ဒီးတဟဲစိာ်ဘၣ်ဆူတၢ်အိၣ်ဖှိၣ်အဒဲအကျဲစၢၤ,ဒ်သိးအကမၤဘူၣ်တၢ်မၤဘူၣ်လၢယွၤ,လၢယွၤအတၢ်အိၣ်အလီၢ်တဂၤဂၤန့ၣ်တၢ်ကပာ်လၢအလိၤလၢအဂၢ်လီၤတၢ်သွံၣ်,ဒီးကဘၣ်တၢ်ဒီၣ်တဲာ်ကွံာ်အီၤဒီးအပှၤတကလုာ်ဒၣ်ဝဲန့ၣ်လီၤ. 5အဝဲန့ၣ်မ့ၢ်ဒ်သိးပှၤအံၣ်စရ့လးဖိကဟဲစိာ်အတၢ်လုၢ်တဖၣ်လၢအလုၢ်ဝဲလၢပျီပူၤ,ဒီးဟဲစိာ်အီၤဆူယွၤအအိၣ်ဖဲတၢ်အိၣ်ဖှိၣ်အဒဲအကျဲစၢၤ,ဆူပှၤလုၢ်တၢ်အဒိၣ်အအိၣ်,ဒီးလုၢ်အီၤလၢတၢ်လုၢ်တၢ်မၤဃူမၤဖိးလၢယွၤအဂီၢ်လီၤ. 6ဒီးပှၤလုၢ်တၢ်အဒိၣ်ဘၣ်ဖှံတၢ်သွံၣ်လၢယွၤအတၢ်လုၢ်လီၢ်အဖီခိၣ်,ဖဲတၢ်အိၣ်ဖှိၣ်အဒဲအကျဲစၢၤ,ဒီးဆိၣ်ကဲၤသိလၢတၢ်နၢမူအဂီၢ်လၢယွၤအဂီၢ်လီၤ. 7ဒီးတဘၣ်လုၢ်လၢၤဘၣ်အတၢ်လုၢ်လၢတၢ်အိၣ်ဒီးအဆူၣ်တဖၣ်,လၢအမၤကမၣ်မုၣ်ကမၣ်ခွါထွဲအခံဘၣ်,အဝဲနၣ်မ့ၢ်တၢ်မၤလိာ်အထူအယိာ်လၢအဂီၢ်လီၤလၢအစၢၤအသွဲၣ်အစိၤစိၤအဃၣ်ဃၣ်လီၤ. 8ဒီးနဘၣ်စံးဘၣ်အီၤ,ဖဲဒၣ်ပှၤလၢပှၤအံၣ်စရ့လးအဟံၣ်ဖိအကျါမ့ၢ်ဂ့ၤ,လၢပှၤတခီဘီမုၢ်ဖိလၢအအိၣ်လၢသုကျါမ့ၢ်ဂ့ၤ,လၢအလုၢ်တၢ်လုၢ်မ့ၣ်အူ,တၢ်လုၢ်ဂ့ၤ, 9ဒီးတဟဲစိာ်ဘၣ်ဆူတၢ်အိၣ်ဖှိၣ်အဒဲအကျဲစၢၤ,ဒ်သိးအကလုၢ်အီၤလၢယွၤန့ၣ်ကဘၣ်တၢ်ဒီၣ်တဲာ်ကွံာ်အီၤဒီးအပှၤတကလုာ်ဒၣ်ဝဲန့ၣ်လီၤ. 10ဒီးပှၤလၢပှၤအံၣ်စရ့လးအဟံၣ်ဖိအကျါမ့ၢ်ဂ့ၤ,ပှၤလၢတခီဘီမုၢ်ဖိလၢအအိၣ်လၢသုကျါမ့ၢ်ဂ့ၤ,ဖဲဒၣ်ပှၤလၢအီၣ်တၢ်သွံၣ်တမံၤမံၤန့ၣ်ယကပာ်ယမဲာ်ထီဒါပှၤလၢအအီၣ်တၢ်သွံၣ်န့ၣ်,ဒီးယကဒီၣ်တဲာ်ကွံာ်အီၤလၢပှၤတကလုာ်ဒၣ်ဝဲန့ၣ်လီၤ. 11အဂ့ၢ်ဒ်အံၤ,တၢ်ညၣ်အသးသမူအိၣ်လၢအသွံၣ်,ဒီးယဟ့ၣ်အီၤလၢသုလၢတၢ်လုၢ်လီၢ်အဖီခိၣ်,ဒ်သိးအကမၤတၢ်ပူၤဖျဲးလၢသုသးအဂီၢ်လီၤ.အဂ့ၢ်ဒ်အံၤ,တၢ်သွံၣ်န့ၣ်မၤတၢ်မၤပူၤဖျဲးလၢပှၤအသးအဂီၢ်လီၤ. 12မၤသးဒ်န့ၣ်ဒီးယစံးဘၣ်ပှၤအံၣ်စရ့လးဖိ,ပှၤလၢသုကျါတဘၣ်အီၣ်တၢ်သွံၣ်နီတဂၤဘၣ်,ဒီးပှၤတခီဘီမုၢ်ဖိလၢအအိၣ်လၢသုကျါတဘၣ်အီၣ်တၢ်သွံၣ်နီတဂၤဘၣ်န့ၣ်လီၤ. 13ပှၤအံၣ်စရ့လးဖိမ့ၢ်ဂ့ၤ,ပှၤတခီဘီမုၢ်ဖိလၢအအိၣ်လၢသုကျါမ့ၢ်ဂ့ၤ,ဖဲဒၣ်ပှၤလၢအခိးခးတၢ်,ဒီးမၤန့ၢ်ဆၣ်ဖိကီၢ်ဖိမ့ၢ်ဂ့ၤ,ထိၣ်ဧိၤလံၣ်ဧိၤမ့ၢ်ဂ့ၤ,လၢပှၤဂ့ၤအီၣ်ဘၣ်တမံၤမံၤ,ဘၣ်ဂၢ်လီၤကွံာ်အသွံၣ်,ဒီးကျၢၢ်ဘၢအီၤဒီးဟီၣ်ခိၣ်အကမူၣ်လီၤ. 14အဂ့ၢ်ဒ်အံၤ,ဖဲအဘၣ်ဃးဒီးတၢ်ညၣ်ခဲလၢာ်အသးသမူန့ၣ်အသွံၣ်န့ၣ်မ့ၢ်တၢ်တမံၤဃီဒီးအသးသမူလီၤ.မ့ၢ်ဝဲလၢအသးသမူလီၤ.မၤသးဒ်န့ၣ်ဒီးယစံးဘၣ်တ့ၢ်ပှၤအံၣ်စရ့လးဖိ,သုတအီၣ်တၢ်ညၣ်အသွံၣ်နီတမံၤတဂ့ၤ,အဂ့ၢ်ဒ်အံၤ,ကယဲၢ်တၢ်ညၣ်အသးသမူမ့ၢ်အသွံၣ်လီၤ.ဖဲဒၣ်ပှၤလၢအအီၣ်အီၤတဂၤဂၤန့ၣ်ကဘၣ်တၢ်ဒီၣ်တဲာ်ကွံာ်ဝဲလီၤ. 15ဒီးတၢ်လၢအသံဒၣ်တၢ်မ့ၢ်ဂ့ၤ,တၢ်လၢဆၣ်ဖိကီၢ်ဖိအ့ၣ်ဖှီသံအီၤမ့ၢ်ဂ့ၤ,ကယဲၢ်ပှၤလၢအအီၣ်ဝဲ,ပှၤကီၢ်ဖိမ့ၢ်ဂ့ၤ,ပှၤတခီဘီမုၢ်ဖိမ့ၢ်ဂ့ၤ,ဘၣ်ဆှုၣ်အကူအသိး,ဒီးလုၣ်ထံ,ဒီးကဲထီၣ်တၢ်တကဆှီဘၣ်တုၤမုၢ်ဟါလီၤ.ဒီးကကဆှီထီၣ်ဝဲလီၤ. 16ဒီးမ့ၢ်တဆှုၣ်ဘၣ်ဝဲဘၣ်,ဒီးမ့ၢ်တလုၣ်ထံဘၣ်ဒီး,ကဘၣ်အတၢ်ဒဲးဘးလီၤ.
Copyright information for
KswSKMB