Lev 2 | KswSKMB | STEP | ဒီးတုၤပှၤမၤဘူၣ်တၢ်မၤဘူၣ်ကိၣ်လၢယွၤဒီး,ဘၣ်မ့ၢ်ကိၣ်ကမူၣ်,ဒီးဘၣ်လူလီၤသိလၢအဖီခိၣ်,ဒီးပာ်လီၢ်ဘၣ်လၢအဖီခိၣ်လီၤ.

‏ Leviticus 2

1 ဒီးတုၤပှၤမၤဘူၣ်တၢ်မၤဘူၣ်ကိၣ်လၢယွၤဒီး,ဘၣ်မ့ၢ်ကိၣ်ကမူၣ်,ဒီးဘၣ်လူလီၤသိလၢအဖီခိၣ်,ဒီးပာ်လီၢ်ဘၣ်လၢအဖီခိၣ်လီၤ. 2 ဒီးဘၣ်ဟဲစိာ်အီၤဆူပှၤလုၢ်တၢ်အဒိၣ်,စီၤအၤဟရိၣ်အဖိခွါတဖၣ်အအိၣ်,ဒီးကဟံးန့ၢ်ကိၣ်ကမူၣ်တတၢၤဒုၣ်,ဒီးအသိ,ဒီးလီၢ်ဘၣ်ခဲလၢာ်,ဒီးပှၤလုၢ်တၢ်အဒိၣ်ဘၣ်ဆိၣ်ကဲၤကွံာ်အီၤလၢအတၢ်သ့ၣ်နီၣ်ထီၣ်အဂီၢ်လၢတၢ်လုၢ်လီၢ်အဖီခိၣ်,တၢ်လုၢ်မ့ၣ်အူ,တၢ်နၢမူလၢယွၤအဂီၢ်လီၤ.

3 ဒီးတၢ်အိၣ်လီၤတဲာ်လၢတၢ်မၤဘူၣ်ကိၣ်န့ၣ်ကကဲထီၣ်စီၤအၤဟရိၣ်ဒီးအဖိခွါတဖၣ်အတၢ်လီၤ.မ့ၢ်တၢ်စီဆှံကတၢၢ်လၢတၢ်မၤဘူၣ်ယွၤလၢမ့ၣ်အူအကျါလီၤ.

4 ဒီးနမ့ၢ်ဟဲစိာ်တၢ်မၤဘူၣ်ကိၣ်,ကိၣ်ကုၢ်အသးလၢဖၣ်ကပူၤဒီး,ဘၣ်မ့ၢ်ကိၣ်ကမူၣ်ဃါဃုာ်ဒီးသိဒီးတအိၣ်ဘၣ်ဒီးကိၣ်မံၣ်အဘ့ၣ်ဘၣ်တဖၣ်,မ့တမ့ၢ်ဘၣ်ဒီးကိၣ်တဃါဃုာ်ဘၣ်ဒီးကိၣ်မံၣ်အဘူသလါဖှူအသးဒီးသိလီၤ.

5 ဒီးနတၢ်မၤဘူၣ်န့ၣ်မ့မ့ၢ်ကိၣ်ကုၢ်အသးလၢတၢ်ဘ့ၣ်ဘၣ်အလိၤဒီး,ဘၣ်မ့ၢ်ကိၣ်ကမူၣ်တအိၣ်ဘၣ်ဒီးကိၣ်မံၣ်,ဃါဃုာ်ဒီးသိလီၤ. 6 နဘၣ်စိၢ်ဖးအီၤတလိၣ်တလိၣ်,ဒီးလူလီၤသိလၢအဖီခိၣ်လီၤ.မ့ၢ်တၢ်မၤဘူၣ်ကိၣ်လီၤ.

7 ဒီးနတၢ်မၤဘူၣ်န့ၣ်မ့မ့ၢ်တၢ်မၤဘူၣ်ကိၣ်ကုၢ်အသးလၢသပၢၤပူၤဒီး,ဘၣ်မ့ၢ်ကိၣ်ကမူၣ်ဒီးသိလီၤ.

8 ဒီးနဘၣ်ဟဲစိာ်တၢ်မၤဘူၣ်ကိၣ်လၢတၢ်မၤဝဲလၢတၢ်တဖၣ်န့ၣ်ဆူယွၤအအိၣ်လီၤ.ဒီးတုၤအတုၤလၢပှၤလုၢ်တၢ်အဒိၣ်အအိၣ်ဒီး,အဝဲဒၣ်ဘၣ်ဟဲစိာ်အီၤဆူတၢ်လုၢ်လီၢ်လီၤ. 9 ဒီးပှၤလုၢ်တၢ်အဒိၣ်ဘၣ်ဟံးန့ၢ်အတၢ်သ့ၣ်နီၣ်ထီၣ်က့ၤလၢတၢ်မၤဘူၣ်ကိၣ်အပူၤ,ဒီးဘၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လီၤ.မ့ၢ်တၢ်လုၢ်မ့ၣ်အူ,တၢ်နၢမူလၢယွၤအဂီၢ်လီၤ. 10 ဒီးတၢ်အိၣ်လီၤတဲာ်လၢတၢ်မၤဘူၣ်ကိၣ်န့ၣ်ကကဲထီၣ်စီၤအၤဟရိၣ်ဒီးအဖိခွါတဖၣ်အတၢ်လီၤ.မ့ၢ်တၢ်စီဆှံကတၢၢ်လၢတၢ်မၤဘူၣ်လၢယွၤလၢမ့ၣ်အူအကျါလီၤ.

11 ဒီးတၢ်မၤဘူၣ်ကိၣ်လၢသုဟဲစိာ်အီၤဆူယွၤအအိၣ်န့ၣ်တဘၣ်အိၣ်ဒီးကိၣ်မံၣ်နီတမံၤဘၣ်.အဂ့ၢ်ဒ်အံၤ,ကိၣ်မံၣ်ဂ့ၤ,ကနဲစီဂ့ၤ,သုတဘၣ်ဆိၣ်ကဲၤလၢတၢ်လုၢ်လၢမ့ၣ်အူအပူၤလၢယွၤအဂီၢ်ဘ.

12 တၢ်မၤဘူၣ်သၣ်ဆိန့ၣ်,သုဘၣ်မၤဘူၣ်ယွၤလၢအီၤလီၤ.ဘၣ်ဆၣ်ဒီးတဘၣ်ဆိၣ်ကဲၤဘၣ်အီၤလၢတၢ်လုၢ်လီၢ်အဖီခိၣ်လၢတၢ်နၢမူအဂီၢ်ဘၣ်.

13 ဒီးကယဲၢ်နမၤဘူၣ်တၢ်လၢနတၢ်မၤဘူၣ်ကိၣ်အကျါန့ၣ်နဘၣ်ဒုးဟီအီၤဒီးအံသၣ်ကိးမံၤဒဲးလီၤ.ဒီးအံသၣ်ဘၣ်ဃးဒီးနကစၢ်အတၢ်အၢၣ်လီၤအီလီၤမ့ၢ်တအိၣ်ဘၣ်ဒီး,နတၢ်မၤဘူၣ်ကိၣ်သုတအိၣ်တဂ့ၤ,နဘၣ်မၤဘူၣ်အံသၣ်လၢနတၢ်မၤဘူၣ်ခဲလၢာ်လီၤ.

14 ဒီးနမ့ၢ်မၤဘူၣ်ယွၤလၢတၢ်မၤဘူၣ်တၤသၣ်ဆိဒီး,နဘၣ်မၤဘူၣ်နတၤသၣ်ဆိလၢဘုအစဲၤသံကစဲာ်မၤဃ့ဝဲလၢမ့ၣ်အူ,ဘုတိၢ်အသးလၢအစဲၤပှဲၤအပူၤလီၤ. 15 ဒီးနဘၣ်ပာ်သိလၢအလိၤ,ဒီးပာ်လီၢ်ဘၣ်လၢအဖီခိၣ်လီၤ.မ့ၢ်တၢ်မၤဘူၣ်ကိၣ်လီၤ. 16 ဒီးပှၤလုၢ်တၢ်အဒိၣ်ဘၣ်ဆိၣ်ကဲၤအတၢ်သ့ၣ်နီၣ်ထီၣ်က့ၤ,ဘုလၢအတိၢ်အသးတနီၤ,ဒီးသိတနီၤ,ဒီးအလီၢ်ဘၣ်ခဲလၢာ်လီၤ.မ့ၢ်တၢ်လုၢ်မ့ၣ်အူလၢယွၤအဂီၢ်လီၤ.