Leviticus 20
1ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 2ဒီးနဘၣ်စံးဘၣ်ပှၤအံၣ်စရ့လးဖိ,ဖဲဒၣ်ပှၤလၢပှၤအံၣ်စရ့လးဖိအကျါမ့ၢ်ဂ့ၤ,ပှၤတခီဘီတခီမုၢ်ဖိလၢအအိၣ်ဝဲလၢပှၤအံၣ်စရ့လးဖိအကျါမ့ၢ်ဂ့ၤ,လၢအဟ့ၣ်အချံအသၣ်လၢမိလးတဂၤဂၤန့ၣ်ကဘၣ်တၢ်မၤသံအီၤသပှၢ်တၢၢ်လီၤ.ပှၤကီၢ်ဖိဘၣ်ကွံာ်အီၤလၢလၢၢ်လီၤ. 3ဒီးယကပာ်ထီဒါယမဲာ်လၢပှၤတဂၤန့ၣ်အလိၤ,ဒီးယကဒီၣ်တဲာ်ကွံာ်အီၤလၢအပှၤတကလုာ်ဒၣ်အီၤန့ၣ်လီၤ.အဂ့ၢ်ဒ်အံၤ,ဟ့ၣ်တၢ်အချံအသၣ်လၢမိလးဒ်သိးအကမၤယလီၢ်စီဆှံတကဆှီဘၣ်,ဒီးမၤဘၣ်အၢယမံၤစီဆှံလီၤ. 4ဒီးပှၤကီၢ်ဖိမ့ၢ်မၤဘ့ၣ်အမဲာ်တစဲးဧိၤလၢပှၤလၢအဟ့ၣ်အချံအသၣ်လၢမိလး,ဒီးတမၤသံဘၣ်အီၤဒီး, 5ယကပာ်ထီဒါယမဲာ်လၢပှၤတဂၤန့ၣ်အလိၤ,ဒီးလၢအပှၤဒူၣ်ဖိအလိၤ,ဒီးယကဒီၣ်တဲာ်ကွံာ်အီၤ,ဒီးကယဲၢ်ပှၤလၢအမၤကမၣ်ထွဲအခံဒ်သိးအကမၤကမၣ်တၢ်ဒီးမိလးခဲလၢာ်,လၢအပှၤတကလုာ်ဒၣ်ဝဲလီၤ. 6ဒီးပှၤလၢအဃၣ်အသးဆူပှၤလၢအမၤန့ၢ်ပှၤသံအကလၤ,ဒီးပှၤအမဲာ်ထံၣ်ဝံလၢအကမၤကမၣ်ထွဲအခံတဂၤဂၤန့ၣ်ယကပာ်ထီဒါယမဲာ်လၢပှၤတဂၤန့ၣ်အလိၤ,ဒီးယကဒီၣ်တဲာ်ကွံာ်အီၤလၢအပှၤတကလုာ်ဒၣ်အီၤလီၤ. 7ဒီးမၤစီဆှံလီၤသုသး,ဒီးကဲထီၣ်ပှၤစီဆှံတက့ၢ်.အဂ့ၢ်ဒ်အံၤ,ယမ့ၢ်ယွၤသုကစၢ်လီၤ. 8ဒီးသုဘၣ်တိၢ်န့ၢ်ယလုၢ်ယလၢ်ဒီးမၤအီၤလီၤ.ယမ့ၢ်ယွၤလၢအမၤစီဆှံသုလီၤ. 9အဂ့ၢ်ဒ်အံၤ,ဖဲဒၣ်ပှၤလၢအဆိၣ်အၢအမိၢ်အပၢ်တဂၤဂၤန့ၣ်ကဘၣ်တၢ်မၤသံအီၤသပှၢ်တၢၢ်လီၤ.ဆိၣ်အၢလံအမိၢ်အပၢ်လံ,အသွံၣ်ကအိၣ်လၢအလိၤလီၤ. 10ဒီးပှၤလၢအမၤကမၣ်ပှၤအမါ,လၢအမၤကမၣ်ပှၤလၢအဃၢၤအမါန့ၣ်,ကဘၣ်တၢ်မၤသံအီၤ,ပှၤလၢအမၤကမၣ်ပှၤအမါဒီးပှၤလၢအအဲၣ်ဘၢအဝၤန့ၣ်ကဘၣ်တၢ်မၤသံအီၤသပှၢ်တၢၢ်လီၤ. 11ဒီးပှၤလၢအမံဃုာ်ဒီးအပၢ်အမါတဂၤန့ၣ်မ့ၣ်အလီၣ်ဖျါထီၣ်အပၢ်အတၢ်ဘ့ၣ်ဆ့လီၤ.ကဘၣ်တၢ်မၤသံအီၤခံဂၤလိာ်လီၤ.အသွံၣ်ကအိၣ်လၢအလိၤလီၤ. 12ဒီးပှၤမ့ၢ်မံဃုာ်ဒီးအဒဲၣ်ဒီး,ကဘၣ်တၢ်မၤသံအီၤခံဂၤလိာ်သပှၢ်တၢၢ်လီၤ.မၤလံတၢ်အၢလံ.အသွံၣ်ကအိၣ်လၢအလိၤလီၤ. 13ဒီးပှၤမ့ၢ်မံဃုာ်ဒီးပိာ်ခွါဒ်အမံဃုာ်ဒီးပိာ်မုၣ်အသိး,ပှၤခံဂၤလိာ်န့ၣ်မၤလံတၢ်သးဘၣ်အၢလံ,ကဘၣ်တၢ်မၤသံအီၤသပှၢ်တၢၢ်လီၤ.အသွံၣ်ကအိၣ်လၢအလိၤလီၤ. 14ဒီးပှၤမ့ၢ်အိၣ်ဃုာ်ဒီးအမါဒီးအမါအမိၢ်ဒီး,မ့ၢ်တၢ်အၢတၢ်သီလီၤ.ကဘၣ်တၢ်ဆူးထီၣ်ကွံာ်အီၤလၢမ့ၣ်အူ,ပိာ်ခွါတဂၤဒီးပိာ်မုၣ်ခံဂၤ,ဒ်သိးတၢ်အၢတၢ်သီအသုတအိၣ်လၢသုကျါတဂ့ၤလီၤ. 15ဒီးပှၤမ့ၢ်မံဃုာ်ဆၣ်ဖိကီၢ်ဖိတဒုဒီး,ကဘၣ်တၢ်မၤသံအီၤသပှၢ်တၢၢ်လီၤ.ဒီးသုဘၣ်မၤသံဆၣ်ဖိကီၢ်ဖိတဒုန့ၣ်လီၤ. 16ဒီးပိာ်မုၣ်မ့ၢ်မၤဘူးအသးဒီးဆၣ်ဖိကီၢ်ဖိ,ဒီးမံလီၤဒီးအီၤဒီး,နဘၣ်မၤသံအီၤသပှၢ်တၢၢ်လီၤ.အသွံၣ်ကအိၣ်လၢအလိၤလီၤ. 17ဒီးပှၤမ့ၢ်ဟံးန့ၢ်အဒီပုၢ်ဝဲၢ်မုၣ်,အပၢ်အဖိမုၣ်မ့ၢ်ဂ့ၤ,အမိၢ်အဖိမုၣ်မ့ၢ်ဂ့ၤ,ဒီးထံၣ်ဘၣ်အတၢ်ဘ့ၣ်ဆ့,ဒီးအဝဲဒၣ်ထံၣ်ဘၣ်ပိာ်ခွါအတၢ်ဘ့ၣ်ဆ့ဒီး,မ့ၢ်တၢ်အၢတၢ်သီလီၤ.ဒီးကဘၣ်တၢ်ဒီၣ်တဲာ်ကွံာ်အီၤလၢအပှၤတကလုာ်ဒၣ်ဝဲအမဲာ်ညါလီၤ.မ့ၢ်အလီၣ်ဖျါထီၣ်အဒီပုၢ်ဝဲၢ်မုၣ်အတၢ်ဘ့ၣ်ဆ့လီၤ.ကဘၣ်အတၢ်ဒဲးဘးလီၤ. 18ဒီးပှၤမ့ၢ်မံဃုာ်ဒီးပိာ်မုၣ်လၢအဆှုၣ်အသးအဖၢမုၢ်ဒီးလီၣ်ဖျါထီၣ်အတၢ်ဘ့ၣ်ဆ့ဒီး,မ့ၢ်အမၤအိၣ်ဖျါအတၢ်ထီၣ်ပၢၢ်,ဒီးလီၣ်ဖျါထီၣ်အသွံၣ်ထီၣ်ပၢၢ်လီၤ.ကဘၣ်တၢ်ဒီၣ်တဲာ်ကွံာ်အီၤလၢအပှၤတကလုာ်ဒၣ်ဝဲခံဂၤလိာ်လီၤ. 19ဒီးနမိၢ်အဒီပုၢ်ဝဲၢ်မုၣ်အတၢ်ဘ့ၣ်ဆ့မ့ၢ်ဂ့ၤ,နပၢ်အဒီပုၢ်ဝဲၢ်မုၣ်အတၢ်ဘ့ၣ်ဆ့မ့ၢ်ဂ့ၤ,လီၣ်ဖျါထီၣ်တဂ့ၤ,အဂ့ၢ်ဒ်အံၤပှၤလၢအလီၣ်ဖျါထီၣ်အဘူးအတံၢ်အတၢ်ဘ့ၣ်ဆ့တဖၣ်န့ၣ်ကဘၣ်အတၢ်ဒဲးဘးလီၤ. 20ဒီးပှၤမ့ၢ်မံဃုာ်ဒီးအဖါတံၢ်အမါဒီး,မ့ၢ်အလီၣ်ဖျါထီၣ်အဖါတံၢ်အတၢ်ဘ့ၣ်ဆ့လီၤ.အဝဲသ့ၣ်တဖၣ်ကဘၣ်အတၢ်ဒဲးဘးလီၤ.ကသံဝဲတူာ်ဖိလီၤ. 21ပှၤမ့ၢ်ဟံးန့ၢ်အဒီပုၢ်ဝဲၢ်ခွါအမါဒီး,မ့ၢ်တၢ်တကဆှီဘၣ်လီၤ.လီၣ်ဖျါထီၣ်အဒီပုၢ်ဝဲၢ်ခွါအတၢ်ဘ့ၣ်ဆ့လီၤ.ကအိၣ်တူာ်ဖိဝဲလီၤ. 22ဒီးသုဘၣ်တိၢ်န့ၢ်ယလုၢ်ယလၢ်ခဲလၢာ်,ဒီးယတၢ်စံၣ်ညီၣ်ခဲလၢာ်,ဒီးမၤအီၤ,ဒ်သိးကီၢ်လၢယဒုးလဲၤနုာ်သုဆူအပူၤလၢသုကအိၣ်ကဆိးဖဲန့ၣ်အသုတဘှိးထီၣ်ကွံာ်သုတဂ့ၤလီၤ. 23ဒီးသုတလဲၤလၢပှၤကလုာ်တဖၣ်လၢယဟီထီၣ်ကွံာ်အီၤလၢသုမဲာ်ညါအလုၢ်အလၢ်အပူၤတဂ့ၤ.အဂ့ၢ်ဒ်အံၤ,အဝဲသ့ၣ်တဖၣ်န့ၣ်မၤတၢ်တဖၣ်န့ၣ်ခဲလၢာ်,ဒီးယသးဘၣ်အၢအီၤလီၤ. 24ဒီးယစံးတ့ၢ်သုလၢသုကန့ၢ်ဘၣ်သါအကီၢ်န့ၣ်,ဒီးယကဟ့ၣ်လီၤအီၤဒ်သိးသုကဟံးန့ၢ်အီၤ,ကီၢ်လၢအယွၤဝဲဒီးတၢ်နုၢ်ထံ,ဒီးကနဲစီန့ၣ်လီၤ.ယဲဒၣ်အံၤယမ့ၢ်ယွၤသုကစၢ်လၢအမၤလီၤဖးသုဒီးပှၤကလုာ်တဖၣ်လီၤ. 25ဒီးသုဘၣ်နီၤဖးဆၣ်ဖိကီၢ်ဖိကဆှီဒီးဆၣ်ဖိကီၢ်ဖိတကဆှီဘၣ်အဆၢ,ဒီးထိၣ်ဧိၤလံၣ်ဧိၤအကဆှီဒီးထိၣ်ဧိၤလံၣ်ဧိၤတကဆှီဘၣ်အဆၢလီၤ.ဒီးသုတမၤဘၣ်အၢသုသးလၢဆၣ်ဖိကီၢ်ဖိမ့ၢ်ဂ့ၤ,ထိၣ်ဧိၤလံၣ်ဧိၤမ့ၢ်ဂ့ၤ,တၢ်အစွါလၢဟီၣ်ခိၣ်ချၢတမံၤမံၤမ့ၢ်ဂ့ၤ,လၢယပာ်လီၤဖးဒီးသုလၢတၢ်တကဆှီဘၣ်န့ၣ်တဂ့ၤ. 26ဒီးသုကစီဆှံလၢယဂီၢ်လီၤ.အဂ့ၢ်ဒ်အံၤ,တၢ်လၢယၤယွၤအံၤ,ယမ့ၢ်စီဆှံ,ဒီးယမၤလီၤဖးသုဒီးပှၤကလုာ်တဖၣ်ဒ်သိးသုကမ့ၢ်ယတၢ်လီၤ. 27ဒီးပိာ်ခွါမ့ၢ်ဂ့ၤ,ပိာ်မုၣ်မ့ၢ်ဂ့ၤ,ပှၤလၢအအိၣ်ဒီးပှၤသံအကလၤမ့ၢ်ဂ့ၤ,ပှၤလၢအမဲာ်ထံၣ်ဝံမ့ၢ်ဂ့ၤ,ကဘၣ်တၢ်မၤသံအီၤသပှၢ်တၢၢ်လီၤ.ပှၤဘၣ်ကွံာ်အီၤလၢလၢၢ်လီၤ.အသွံၣ်ကအိၣ်လၢအလိၤလီၤ.
Copyright information for
KswSKMB