Leviticus 21
1ဒီးယွၤစံးဘၣ်စီၤမိၤရှ့,ကတိၤတၢ်ဒီးပှၤလုၢ်တၢ်အဒိၣ်စီၤအၤဟရိၣ်အဖိခွါတဖၣ်,ဒီးစံးဘၣ်အီၤ,မ်အသုတမၤတကဆှီလီၤဘၣ်အသးလၢတၢ်သံအဃိလၢပှၤဂီၢ်မုၢ်အကျါနီတဂၤတဂ့ၤ. 2မ့မ့ၢ်လၢအဘူးအတံၢ်လၢအဘူးဒီးအီၤအဃိ,လၢအမိၢ်အဃိ,ဒီးလၢအပၢ်အဃိ,ဒီးလၢအဖိခွါအဃိဒီးလၢအဖိမုၣ်အဃိ,ဒီးလၢအဒီပုၢ်ဝဲၢ်ခွါအဃိ, 3ဒီးလၢအဒီပုၢ်ဝဲၢ်မုၣ်လိၣ်ဘိလၢအဘူးဒီးအီၤ,ဒီးအဝၤတအိၣ်ဘၣ်န့ၣ်အဃိကမၤတကဆှီလီၤဘၣ်အသးလီၤ. 4မ့မ့ၢ်လၢပှၤအဒိၣ်လၢအပှၤဂီၢ်မုၢ်အကျါအဃိန့ၣ်တဘၣ်မၤတကဆှီဘၣ်အသးလၢအကမၤဘၣ်အၢအသးဘၣ်. 5မ်အသုတမၤအခိၣ်လ့ၤတဂ့ၤ,ဒီးလူၤအခၣ်ဆူၣ်အနၢၣ်တဂ့ၤ,ဒီးဂဲာ်အညၣ်တဂ့ၤ. 6ဒီးဘၣ်စီဆှံလၢအကစၢ်အဂီၢ်,ဒီးတဘၣ်မၤဘၣ်အၢအကစၢ်အမံၤဘၣ်.အဂ့ၢ်ဒ်အံၤ,လုၢ်ယွၤအတၢ်လုၢ်မ့ၣ်အူ,ဒီးအကစၢ်အကိၣ်လီၤ.မၤသးဒ်န့ၣ်ဒီးဘၣ်စီဆှံလီၤ. 7ပှၤဃဲသဲမုၣ်မ့ၢ်ဂ့ၤ,ပိာ်မုၣ်ဟးဂီၤမ့ၢ်ဂ့ၤ,မ်အသုတဟံးနၢ်အမါလၢအီၤတဂ့ၤ,ဒီးတဘၣ်ဟံးန့ၢ်ပိာ်မုၣ်လၢအလီၤဖှၣ်ဒီးအဝၤတဂၤဘၣ်.အဂ့ၢ်ဒ်အံၤ,မ့ၢ်အစီဆှံဝဲလၢအကစၢ်အဂီၢ်လီၤ. 8ဒီးနဘၣ်ပာ်စီဆှံအီၤလီၤ.အဂ့ၢ်ဒ်အံၤ,လုၢ်ထီၣ်နကစၢ်အကိၣ်လီၤ.ကကဲထီၣ်တၢ်စီဆှံလၢသုမဲာ်ညါလီၤ.အဂ့ၢ်ဒ်အံၤ,တၢ်လၢယၤယွၤလၢအမၤစီဆှံသုယစီဆှံဝဲလီၤ. 9ဒီးပှၤလုၢ်တၢ်အဒိၣ်အဖိမုၣ်တဂၤမ့ၢ်မၤဘၣ်အၢလီၤအသးလၢအမၤကမၣ်မုၣ်ကမၣ်ခွါဒီး,မ့ၢ်အမၤဘၣ်အၢအပၢ်လီၤ.ပှၤဘၣ်ဆူးထီၣ်ကွံာ်အီၤလၢမ့ၣ်အူလီၤ. 10ဒီးပှၤလုၢ်တၢ်အခိၣ်လၢအဒိၣ်န့ၢ်အဒီပုၢ်ဝဲၢ်တဖၣ်လၢပှၤလူလီၤသိဖှူတၢ်လၢအခိၣ်,ဒီးတၢ်ပာ်စီဆှံအီၤဒ်သိးအကကူထီၣ်သိးထီၣ်တၢ်ကူတၢ်သိးန့ၣ်တဘၣ်မၤအိၣ်ဘ့ၣ်အခိၣ်,ဒီးတဘၣ်ဖှီဘၣ်အကူအသိးဘၣ်. 11ဒီးတဘၣ်လဲၤနုာ်ဘၣ်ဆူတၢ်သံအအိၣ်,ဒီးလၢအမိၢ်အဃိမ့ၢ်ဂ့ၤ,လၢအပၢ်အဃိမ့ၢ်ဂ့ၤ,တဘၣ်မၤတကဆှီဘၣ်အသးဘၣ်လီၤ. 12ဒီးတဘၣ်ဟးထီၣ်လၢတၢ်အလီၢ်စီဆှံအပူၤ,ဒီးတဘၣ်မၤဘၣ်အၢအကစၢ်အလီၢ်စီဆှံဘၣ်.အဂ့ၢ်ဒ်အံၤ,အကစၢ်အသိဖှူတၢ်အခိၣ်သလုးအိၣ်လၢအလိၤလီၤ.ယဲဒၣ်အံၤယမ့ၢ်ယွၤလီၤ. 13ဒီးဘၣ်ဟံးန့ၢ်အမါလၢပှၤမုၣ်လိၣ်ဘိလီၤ. 14ပှၤမုၣ်ကမဲမ့ၢ်ဂ့ၤ,ပိာ်မုၣ်လၢအလီၤဖှၣ်ဒီးအဝၤမ့ၢ်ဂ့ၤ,ပိာ်မုၣ်လၢအဟးဂီၤမ့ၢ်ဂ့ၤ,ပှၤဃဲသဲမုၣ်မ့ၢ်ဂ့ၤ,မ်အသုတဟံးန့ၢ်တဂ့ၤ.ဘၣ်ဟံးန့ၢ်အမါပှၤမုၣ်လိၣ်ဘိလၢအပှၤတကလုာ်ဒၣ်ဝဲအကျါလီၤ. 15ဒီးမ်အသုတမၤဘၣ်အၢအချံအသၣ်,လၢအပှၤတကလုာ်ဒၣ်ဝဲအကျါတဂ့ၤ.အဂ့ၢ်ဒ်အံၤ,တၢ်လၢယၤယွၤအံၤယမၤစီဆှံအီၤလီၤ. 16ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 17ကတိၤတၢ်ဒီးစီၤအၤဟရိၣ်,ဒီးစံး,ပှၤလၢနချံနသၣ်လၢအစၢၤအသွဲၣ်အကျါလၢအအိၣ်ဒီးအမဲၣ်တဂၤဂၤန့ၣ်,မ်အသုတသုးဘူးအသးဒ်သိးအကလုၢ်ထီၣ်အကစၢ်အတၢ်အီၣ်တဂ့ၤ. 18အဂ့ၢ်ဒ်အံၤ,ဖဲဒၣ်ပှၤလၢအအိၣ်ဒီးအမဲၣ်န့ၣ်တဘၣ်သုးဘူးဘၣ်အသးနီတဂၤဘၣ်.ပှၤမဲာ်ဘျီၣ်ဂ့ၤ,ပှၤအခီၣ်ဟးဂီၤဂ့ၤ,ပှၤအနါဒ့ပၢၤဂ့ၤ,ပှၤအိၣ်ဒီးတၢ်တမံၤမံၤအါကဲၣ်ဆိးဂ့ၤ, 19ပှၤလၢအခီၣ်ကၢ်ဂ့ၤ,ပှၤလၢအစုကၢ်ဂ့ၤ, 20ပှၤအချၢသကူးလီၤအသးဂ့ၤ,ပှၤလၢအနီၢ်ဖုၣ်ဂ့ၤ,ပှၤအိၣ်ဒီးအမဲၣ်လၢအမဲာ်သၣ်ပူၤဂ့ၤ,ပှၤလၢအအိၣ်ဒီးတၢ်လိၤသးအၢဂ့ၤ,ပှၤလၢအဖံးလီၤသဘျံးဂ့ၤ,ပှၤလၢအဒံၣ်သၣ်သဘှံးဂ့ၤ, 21ပှၤလၢအအိၣ်ဒီးအမဲၣ်လၢပှၤလုၢ်တၢ်အဒိၣ်စီၤအၤဟရိၣ်အချံအသၣ်အကျါန့ၣ်တဘၣ်သုးဘူးအသးဒ်သိးအကလုၢ်ထီၣ်ယွၤလၢတၢ်လုၢ်လၢမ့ၣ်အူနီတဂၤဘၣ်.အိၣ်ဝဲဒီးအမဲၣ်လီၤ.မ်အသုတသုးဘူးအသးဒ်သိးအကလုၢ်ထီၣ်အကစၢ်အတၢ်အီၣ်တဂ့ၤ. 22ကအီၣ်အကစၢ်ယွၤအကိၣ်လၢတၢ်စီဆှံကတၢၢ်,ဒီးလၢတၢ်စီဆှံန့ၣ်လီၤ. 23မ့မ့ၢ်လဲၤနုာ်လၢယၣ်ဘျးထီၣ်အသးတမံၤတဘၣ်လဲၤနုာ်ဘၣ်,ဒီးတဘၣ်သုးဘူးဘၣ်အသးဆူတၢ်လုၢ်လီၢ်အအိၣ်ဘၣ်.အဂ့ၢ်ဒ်အံၤ,အိၣ်ဝဲဒီးအမဲၣ်လီၤ.ဒ်သိးအသုတမၤဘၣ်အၢယလီၢ်စီဆှံတဖၣ်တဂ့ၤလီၤ.အဂ့ၢ်ဒ်အံၤ,တၢ်လၢယၤယွၤအံၤယမၤစီဆှံတၢ်န့ၣ်တဖၣ်လီၤ. 24ဒီးစီၤမိၤရှ့စံးဘၣ်တဲဘၣ်စီၤအၤဟရိၣ်,ဒီးအဖိခွါတဖၣ်ဒီးပှၤအံၣ်စရ့လးဖိခဲလၢာ်လီၤ.
Copyright information for
KswSKMB