Leviticus 24
1ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 2မၤလိာ်ပှၤအံၣ်စရ့လးဖိ,လၢအကဟဲစိာ်န့ၢ်နၤလၢသ့ၣ်စၤယံးသိစီတိၢ်အသး,လၢတၢ်ကပီၤအဂီၢ်,ဒ်သိးအကဒုးကဲၤထီၣ်မ့ၣ်အူဒၢတထံၣ်ဃီလီၤ. 3ဒီးစီၤအၤဟရိၣ်ဘၣ်ကတဲာ်ကတီၤအီၤလၢတၢ်အၢၣ်လီၤအီလီၤအယၣ်ဘျးထီၣ်အသးလၢခိ,လၢတၢ်အိၣ်ဖှိၣ်အဒဲပူၤလၢမုၢ်ဟါတုၤလၢမုၢ်ဂီၤ,လၢယွၤအမဲာ်ညါတထံၣ်ဃီလီၤ.မ့ၢ်တၢ်အလုၢ်အလၢ်အထူအယိာ်လီၤလၢသုစၢၤသုသွဲၣ်အစိၤစိၤအဃၣ်ဃၣ်လီၤ. 4ဘၣ်ကတဲာ်ကတီၤမ့ၣ်အူဒၢတဖၣ်လၢမ့ၣ်အူဒၢမိၢ်ပှၢ်စီအဖီခိၣ်လၢယွၤအမဲာ်ညါတထံၣ်ဃီလီၤ. 5ဒီးနဘၣ်ဟံးန့ၢ်ကိၣ်ကမူၣ်,ဒီးကုၢ်ထီၣ်ကိၣ်တဆံခံဘ့ၣ်လၢအီၤလီၤ.ကိၣ်ကမူၣ်ခံအ့စရိၣ်လၢတဘ့ၣ်တဘ့ၣ်အဂီၢ်လီၤ. 6ဘ့ၣ်အဂီၢ်လီၤ.ဒီးနဘၣ်ပာ်အီၤလၢခံဂ့ၢ်,ဃုဘ့ၣ်တဂ့ၢ်,လၢစီၢ်နီၤခိၣ်စီဆှံအဖီခိၣ်လၢယွၤအမဲာ်ညါလီၤ. 7နဘၣ်ပာ်လီၢ်ဘၣ်စီလၢတဂ့ၢ်တဂ့ၢ်အဖီခိၣ်,ဒ်သိးအကအိၣ်လၢကိၣ်အဖီခိၣ်လၢတၢ်သ့ၣ်နီၣ်ထီၣ်က့ၤတၢ်အဂီၢ်,တၢ်လုၢ်လၢမ့ၣ်အူလၢယွၤအဂီၢ်လီၤ. 8ဘၣ်ကတဲာ်ကတီၤအီၤကိးအိၣ်ဘှံးအနံၤဒဲး,လၢယွၤအမဲာ်ညါတထံၣ်ဃီလီၤ.မ့ၢ်လၢပှၤအံၣ်စရ့လးဖိအဂီၢ်လၢတၢ်အၢၣ်လီၤအီလီၤအထူအယိာ်လီၤ. 9ဒီးကကဲထီၣ်စီၤအၤဟရိၣ်ဒီးအဖိခွါတဖၣ်အတၢ်,ဒီးဘၣ်အီၣ်ဝဲလၢတၢ်အလီၢ်စီဆှံအပူၤလီၤ.အဂ့ၢ်ဒ်အံၤ,အဝဲန့ၣ်မ့ၢ်တၢ်စီဆှံကတၢၢ်လၢအဂီၢ်လၢတၢ်လုၢ်မ့ၣ်အူလၢယွၤအဂီၢ်အကျါလီၤ.မ့ၢ်တၢ်အလုၢ်အလၢ်အထူအယိာ်လီၤ. 10ဒီးပှၤအံၣ်စရ့လးမုၣ်အဖိခွါလၢအပၢ်မ့ၢ်ပှၤအဲၤကူပတူးဖိတဂၤဟးထီၣ်လၢပှၤအံၣ်စရ့လးဖိအကျါလီၤ.ဒီးပှၤအံၣ်စရ့လးမုၣ်အဖိခွါတဂၤန့ၣ်အ့ၣ်လိာ်အသးဒီးပှၤအံၣ်စရ့လးဖိတဂၤလၢပှၤသူၣ်ဒဲအလီၢ်ပူၤလီၤ. 11ဒီးပှၤအံၣ်စရ့လးမုၣ်အဖိခွါတဂၤန့ၣ်ဒုၣ်ဒွဲၣ်တၢ်အမံၤ,ဒီးဆိၣ်အၢတၢ်,ဒီးပှၤလဲၤစိာ်အီၤဆူစီၤမိၤရှ့အအိၣ်လီၤ.(ဒီးအမိၢ်အမံၤမ့ၢ်နီၢ်ၡလိမံး,စီၤဒၣ်အဒူၣ်ဖိစီၤဒံးဘရံၤအဖိမုၣ်လီၤ.) 12ဒီးပာ်အီၤလၢပၢၤတၢ်အလီၢ်ပူၤတုၤတၢ်ကဒုးနဲၣ်အီၤလၢယွၤအသးလီၤ. 13ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 14ဟဲစိာ်ထီၣ်ပှၤလၢအဆိၣ်အၢတၢ်ဆူပှၤသူၣ်ဒဲအလီၢ်လၢခိ,ဒီးကယဲၢ်ပှၤလၢအနၢ်ဟူတၢ်န့ၣ်မ်အပာ်အစုလၢအခိၣ်,ဒီးကယဲၢ်တၢ်အိၣ်ဖှိၣ်ခဲလၢာ်န့ၣ်မ်အကွံာ်အီၤလၢလၢၢ်တက့ၢ်. 15ဒီးနဘၣ်ကတိၤတၢ်ဒီးပှၤအံၣ်စရ့လးဖိဒီးစံး,ဖဲဒၣ်ပှၤလၢအဆိၣ်အၢအယွၤတဂၤဂၤန့ၣ်ကဘၣ်အတၢ်ဒဲးဘးလီၤ. 16ဒီးပှၤလၢအဒုၣ်ဒွဲၣ်ယွၤအမံၤန့ၣ်ကဘၣ်တၢ်မၤသံအီၤသပှၢ်တၢၢ်လီၤ.ပှၤအိၣ်ဖှိၣ်ဖိခဲလၢာ်ဘၣ်ကွံာ်အီၤလၢလၢၢ်သပှၢ်တၢၢ်လီၤ.ဒ်ပှၤတခီဘီမုၢ်ဖိအသိး,ပှၤအိၣ်ဖျဲၣ်လၢကီၢ်ပူၤမ့ၢ်ဒ်န့ၣ်သိး,တုၤအဒုၣ်ဒွဲၣ်တၢ်အမံၤဒီး,ကဘၣ်တၢ်မၤသံအီၤသပှၢ်တၢၢ်လီၤ. 17ဒီးပှၤလၢအမၤသံပှၤတဂၤဂၤန့ၣ်ကဘၣ်တၢ်မၤသံအီၤသပှၢ်တၢၢ်လီၤ. 18ဒီးပှၤလၢအမၤသံဆၣ်ဖိကီၢ်ဖိအဒၢတဒုန့ၣ်ဘၣ်ဟ့ၣ်က့ၤအတၢ်,တဒုလၢတဒုအလီၢ်လီၤ. 19ဒီးပှၤမ့ၢ်မၤအိၣ်ထီၣ်တၢ်အမဲၣ်လၢပှၤလၢအဃၢၤအလိၤဒီး,ဒ်အမၤတၢ်အသိးန့ၣ်တၢ်ကမၤဆၢလၢအလိၤဒ်န့ၣ်သိးလီၤ. 20တၢ်ကၢ်လၢတၢ်ကၢ်အဂီၢ်,မဲာ်တတိၣ်လၢမဲာ်တတိၣ်အဂီၢ်,မဲတဘ့ၣ်လၢမဲတဘ့ၣ်အဂီၢ်န့ၣ်လီၤ.ဒ်အမၤအိၣ်ထီၣ်တၢ်အမဲၣ်လၢပှၤအလိၤအသိးန့ၣ်တၢ်ကပာ်လၢအလိၤဒ်န့ၣ်သိးလီၤ. 21ဒီးပှၤလၢအမၤသံဆၣ်ဖိကီၢ်ဖိအဒၢတဒုန့ၣ်ဘၣ်ဟ့ၣ်က့ၤအတၢ်လီၤ.ဒီးပှၤလၢအမၤသံပှၤကညီတဂၤန့ၣ်ကဘၣ်တၢ်မၤသံအီၤလီၤ. 22ဒီးသုဘၣ်အိၣ်ဒီးတၢ်စံၣ်ညီၣ်တမံၤဃီ,ဒ်ပှၤတခီဘီမုၢ်ဖိအသိး,ပှၤအိၣ်ဖျဲၣ်လၢကီၢ်ပူၤဒ်န့ၣ်သိးလီၤ.အဂ့ၢ်ဒ်အံၤ,ယဲဒၣ်အံၤယမ့ၢ်ယွၤသုကစၢ်လီၤ. 23ဒီးစီၤမိၤရှ့စံးဘၣ်တဲဘၣ်ပှၤအံၣ်စရ့လးဖိလၢအဘၣ်ဟဲစိာ်ပှၤအံၣ်စရ့လးဖိလၢအဆိၣ်အၢတၢ်တဂၤဆူပှၤသူၣ်ဒဲအလီၢ်လၢခိ,ဒီးကွံာ်အီၤလၢလၢၢ်လီၤ.ဒီးပှၤအံၣ်စရ့လးဖိမၤဝဲဒ်ယွၤမၤလိာ်စီၤမိၤရှ့အသိးန့ၣ်လီၤ.
Copyright information for
KswSKMB