‏ Leviticus 26

1တၢ်ဂီၤတၢ်ဖီၣ်မ့ၢ်ဂ့ၤ,တၢ်ဂီၤစိးပျၤအသးမ့ၢ်ဂ့ၤ,သုတတ့လၢသုဂီၢ်တဂ့ၤ.ဒီးသုတပာ်ဆၢထၢၣ်တၢ်အထူၣ်အိၣ်ဒီးတၢ်ဂီၤတဂ့ၤ.ဒီးသုတပာ်လၢၢ်အိၣ်ဒီးတၢ်ဂီၤတဖၣ်လၢအလိၤလၢသုကီၢ်ပူၤ,ဒ်သိးသုကဘါအီၤန့ၣ်တဂ့ၤ.အဂ့ၢ်ဒ်အံၤ,ယဲဒၣ်အံၤယမ့ၢ်ယွၤသုကစၢ်လီၤ.

2သုဘၣ်တိၢ်န့ၢ်ယအိၣ်ဘှံးအနံၤတဖၣ်,ဒီးယူးယီၣ်ယလီၢ်စီဆှံလီၤ.ယဲဒၣ်အံၤယမ့ၢ်ယွၤလီၤ.

3သုမ့ၢ်လဲၤတၢ်လၢယလုၢ်ယလၢ်အပူၤ,ဒီးတိၢ်န့ၢ်ယတၢ်မၤလိာ်,ဒီးမၤအီၤဒီး, 4ယကဟ့ၣ်လီၤသုလၢတၢ်စူၤလၢအဆၢအကတီၢ်ဒၣ်ဝဲ,ဒီးဟီၣ်ခိၣ်ကဟ့ၣ်အတၢ်အါထီၣ်ဒီးသ့ၣ်လၢပှၢ်လၢ်ကျါန့ၣ်အတၤသၣ်, 5ဒီးသုယီၢ်ဘုကချုးန့ၢ်တၢ်ထၢဖှိၣ်စပံးသၣ်,ဒီးတၢ်ထၢဖှိၣ်စပံးသၣ်ကချုးန့ၢ်တၢ်ဖှံတၢ်အဆၢအကတီၢ်,ဒီးသုကအီၣ်ကုးအီပှဲၤ,ဒီးအိၣ်လၢသုကီၢ်ပူၤကျၢၤကျၢၤလီၤ. 6ဒီးယကပာ်လီၤတၢ်ဃူတၢ်ဖိးလၢထံဧိၤကီၢ်ဧိၤအပူၤ,ဒီးသုကမံလီၤ,ဒီးပှၤတမၤပျံၤမၤဖုးသုနီတဂၤဘၣ်,ဒီးယကဒုးဟးထီၣ်ကွံာ်ဆၣ်ဖိကီၢ်ဖိအအၢလၢသုကီၢ်ပူၤ,ဒီးနးဧိၤဘီဧိၤတလဲၤခီဂာ်ဘၣ်သုကီၢ်ဘၣ်.

7ဒီးသုကလူၤဟီထီၣ်ကွံာ်သုဒုၣ်သုဒါ,ဒီးကလီၤဃံၤလၢသုမဲာ်ညါလၢနးဧိၤဘီဧိၤလီၤ. 8ဒီးပှၤယဲၢ်ဂၤလၢသုကျါကလူၤဟီထီၣ်ကွံာ်ပှၤတကယၤ,ဒီးပှၤတကယၤလၢသုကျါကလူၤဟီထီၣ်ကွံာ်ပှၤတကလး,ဒီးသုဒုၣ်သုဒါကလီၤဃံၤလၢသုမဲာ်ညါလၢနးဧိၤဘီဧိၤလီၤ.

9အဂ့ၢ်ဒ်အံၤ,ယကကွၢ်မဲာ်သု,ဒီးယကဒုးသၣ်ထီၣ်သု,ဒီးမၤအါထီၣ်သု,ဒီးဒုးအိၣ်ဂၢၢ်ဆိးကျၢၤယတၢ်အၢၣ်လီၤအီလီၤဒီးသုလီၤ.

10ဒီးသုကအီၣ်တၢ်လီၢ်လံၤ,ဒီးစိာ်ထီၣ်ကွံာ်တၢ်လီၢ်လံၤလၢတၢ်အသီအဃိလီၤ.

11ဒီးယကပာ်ယအိၣ်ယဆိးအလီၢ်လၢသုကျါ,ဒီးယတသးဘၣ်အၢဘၣ်သုဘၣ်. 12ဒီးယကလဲၤတၢ်လၢသုကျါ,ဒီးယကမ့ၢ်သုကစၢ်,ဒီးသုမ့ၢ်ယပှၤဂီၢ်မုၢ်လီၤ.

13ယဲဒၣ်အံၤယမ့ၢ်ယွၤသုကစၢ်လၢအဒုးဟးထီၣ်ကွံာ်သုလၢကီၢ်အဲၤကူပတူးအပူၤ,ဒ်သိးသုသုတမ့ၢ်လၢၤအဝဲသ့ၣ်အကုၢ်အပှၤတဂ့ၤ.ဒီးယမၤကၢ်လံသုနီၣ်ယိးအဘိဒီးဒုးလဲၤထူၣ်ကလာ်သုလီၤ.

14မ့မ့ၢ်သုမ့ၢ်တဒိကနၣ်ဘၣ်ယကလုၢ်,ဒီးတတိၢ်န့ၢ်ဘၣ်ယတၢ်မၤလိာ်ခဲလၢာ်. 15ဒီးသုမ့ၢ်မၤတရီတပါယလုၢ်ယလၢ်,ဒီးသုမ့ၢ်သးဘၣ်အၢယတၢ်စံၣ်ညီၣ်တုၤသုတတိၢ်န့ၢ်ဘၣ်ကယဲၢ်ယတၢ်မၤလိာ်ဘၣ်,ဒီးလုၣ်သ့ၣ်ခါပတာ်ယတၢ်အၢၣ်လီၤအီလီၤဒီး, 16မ့ၢ်မးယကမၤသုလၢတၢ်အံၤလီၤ,ယကဒုးအိၣ်သကိးသုလၢတၢ်ပျံၤတၢ်ဖုး,တၢ်ဃဲၤလီၤကွံာ်,ဒီးတၢ်ညၣ်ဂိၢ်ကိၢ်လၢအကမၤလၢာ်သုမဲာ်,ဒီးဒုးအိၣ်ထီၣ်တၢ်သူၣ်အုးသးအုး,ဒီးသုကဖှံသုချံကလီကလီလီၤ.အဂ့ၢ်ဒ်အံၤသုဒုၣ်သုဒါကအီၣ်ကွံာ်အီၤလီၤ.

17ဒီးယကပာ်ထီဒါယမဲာ်လၢသုလိၤ,ဒီးသုကဘၣ်တၢ်မၤသံသုလၢသုဒုၣ်သုဒါအမဲာ်ညါလီၤ.ပှၤလၢအသးဟ့သုကပၢသုလီၤ.တုၤပှၤတလူၤဘၣ်သုနီတဂၤဘၣ်ဒီး,သုကဃ့ၢ်လီၤ.

18ဒီးလၢတၢ်န့ၣ်တဖၣ်အဃိသုမ့ၢ်တဒိကနၣ်ဘၣ်ယကလုၢ်ဒီး,ယကသိၣ်ဃီၣ်ဒံးသုလၢသုတၢ်ဒဲးဘးအဃိနွံဘျီဒံးလီၤ. 19ဒီးယကမၤကၢ်ကွံာ်သုစိသုကမီၤအတၢ်ထီၣ်ထီ,ဒီးပာ်သုမူခိၣ်ဒ်ထးအသိး,ဒီးသုဟီၣ်ခိၣ်ဒ်တိၢ်အသိးန့ၣ်လီၤ. 20ဒီးသုကလၢာ်ဂံၢ်လၢာ်ဘါကလီကလီလီၤ.အဂ့ၢ်ဒ်အံၤ,ဟီၣ်ခိၣ်တဟ့ၣ်ဘၣ်အတၢ်အါထီၣ်ဘၣ်,ဒီးသ့ၣ်လၢဟီၣ်ခိၣ်န့ၣ်တသၣ်ထီၣ်ဘၣ်အတၤသၣ်ဘၣ်. 21ဒီးသုမ့ၢ်လဲၤတၢ်ထီဒါဒီးယၤ,ဒီးတဒိကနၣ်ဘၣ်ယကလုၢ်ဘၣ်ဒီး,ယကဒုးဟဲဘၣ်ဒံးသုလၢတၢ်နးတၢ်ဖှီၣ်နွံဘျီဒံး,ဒ်သုတၢ်ဒဲးဘးအိၣ်ဝဲအသိးန့ၣ်လီၤ. 22ဒီးယကမၢလီၤဆၣ်ဖိကီၢ်ဖိအမံၤလၢသုကျါလၢအကမၤန့ၢ်ဆူသုဖိသုလံၤ,ဒီးမၤဟးဂီၤကွံာ်သုဆၣ်ဖိကီၢ်ဖိအဒၢ,ဒီးမၤစှၤလီၤသု,ဒီးသုကျဲဧိၤကပူၤဧိၤကအိၣ်သယုၢ်လီၤ.

23ဒီးသုမ့ၢ်တဃၣ်လိၤက့ၤဘၣ်သုသးလၢတၢ်န့ၣ်တဖၣ်အဃိ,ဒီးလဲၤတၢ်ထီဒါယၤဒီး,ယကလဲၤတၢ်ထီဒါစ့ၢ်ကီးသု, 24ဒီးသိၣ်ဃီၣ်ဒံးသုလၢသုတၢ်ဒဲးဘးအဃိနွံဘျီဒံးလီၤ. 25ဒီးယကဒုးလဲၤနုာ်နးလၢသုကျါလၢအကမၤကၣ်တၢ်လၢယတၢ်အၢၣ်လီၤအီလီၤအဃိလီၤ.ဒီးတုၤသုအိၣ်ဖှိၣ်ရိဖှိၣ်လၢသုဝ့ၢ်တဖၣ်အပူၤဒီး,ယကမၢလီၤတၢ်သံသတြိာ်လၢသုကျါလီၤ.ဒီးတၢ်ကဟ့ၣ်လီၤကွံာ်သုဆူသုဒုၣ်သုဒါအစုပူၤလီၤ.

26ဒီးတုၤယမၤကၢ်သုကိၣ်အနီၣ်ထိးဘိဒီး,ပိာ်မုၣ်ဆံဆဲၣ်ဂၤကကုၢ်ကိၣ်လၢဖၣ်ကပူၤတပူၤ,ဒီးပှၤကဟ့ၣ်လီၤသုကိၣ်လၢတၢ်လီၤတယၢၢ်,ဒီးသုကအီၣ်တၢ်,ဒီးတဘျဲးအီၣ်ဘၣ်လီၤ.

27ဒီးလၢတၢ်ခဲလၢာ်အဃိန့ၣ်သုမ့ၢ်တဒိကနၣ်ယကလုၢ်ဘၣ်,ဒီးလဲၤထီဒါယၤဒီး, 28ယကလဲၤထီဒါသုစ့ၢ်ကီးလၢတၢ်သးထီၣ်ဆူၣ်,ဒီးယကသိၣ်ဃီၣ်သု,လၢသုတၢ်ဒဲးဘးအဃိနွံဘျီလီၤ. 29ဒီးသုကအီၣ်သုဖိခွါတဖၣ်အညၣ်,ဒီးသုဖိမုၣ်တဖၣ်အညၣ်န့ၣ်,သုကအီၣ်အီၤလီၤ. 30ဒီးယကမၤဟးဂီၤသုလီၢ်ထီၣ်ထီ,ဒီးယကကူာ်လီၤကွံာ်သုတၢ်ဂီၤဃမၣ်,ဒီးယကကွံာ်တ့ၢ်ကွံာ်သုစိၣ်,လၢသုတၢ်ဂီၤအမိၢ်ပှၢ်အဖီခိၣ်,ဒီးယကသးဘၣ်အၢသုလီၤ. 31ဒီးယကမၤသယုၢ်သုဝ့ၢ်တဖၣ်,ဒီးမၤဟးဂီၤကွံာ်သုလီၢ်စီဆှံ,ဒီးယတနၢဘၣ်သုတၢ်နၢမူဘၣ်.

32ဒီးယကမၤသယုၢ်ထံဧိၤကီၢ်ဧိၤ,ဒီးသုဒုၣ်သုဒါလၢအအိၣ်အဆိးလၢအပူၤန့ၣ်ကပာ်အသးကမၢကမၣ်လီၤ.

33ဒီးယကမၤပြံပြါသုလၢပှၤကလုာ်ဂၤအကျါ,ဒီးယကဘီၣ်ထီၣ်နးတဘ့ၣ်လၢသုလီၢ်ခံ,ဒီးသုကီၢ်ကအိၣ်သယုၢ်,ဒီးသုဝ့ၢ်တဖၣ်ကဟးဂီၤလီၤ.

34တုၤနုၤတစုထံဧိၤကီၢ်ဧိၤကမုာ်လၤဝဲလၢအတၢ်အိၣ်ဘှံးအနံၤတဖၣ်,ကယဲၢ်မုၢ်နံၤလၢအအိၣ်သယုၢ်,ဒီးသုအိၣ်လၢသုဒုၣ်သုဒါအကီၢ်ပူၤလီၤ.တုၤနုၤတစုထံဧိၤကီၢ်ဧိၤကအိၣ်ဘှံး,ဒီးမုာ်လၤလၢအအိၣ်ဘှံးအနံၤတဖၣ်အပူၤလီၤ.

35မုၢ်နံၤခဲလၢာ်လၢကီၢ်အိၣ်သယုၢ်န့ၣ်ကအိၣ်ဘှံး,လၢအတအိၣ်ဘှံးဘၣ်လၢအိၣ်ဘှံးအနံၤလၢသုအိၣ်လၢအပူၤအဖၢမုၢ်အဃိလီၤ.

36ဒီးသုပှၤလၢအအိၣ်လီၤတဲာ်တဖၣ်န့ၣ်ယကဒုးလီၤဘှါအီၤလၢအဒုၣ်အဒါအကီၢ်ပူၤ,ဒီးသ့ၣ်လၣ်ဟူးဝးအသီၣ်ကလူၤအီၤ,ဒီးကဃ့ၢ်ကွံာ်ဒ်လၢနးတဘ့ၣ်အအိၣ်အသိး,ဒီးပှၤမ့ၢ်တလူၤဘၣ်အီၤနီတဂၤဘၣ်ဒီး,ကလီၤဃံၤဝဲလီၤ.

37ဒီးပှၤတလူၤအီၤနီတဂၤဘၣ်ဒီး,ကလီၤဃံၤလိာ်အသးတဂၤလၢတဂၤအဖီခိၣ်,ဒ်အအိၣ်လၢနးဧိၤဘီဧိၤအမဲာ်ညါအသိးန့ၣ်လီၤ.ဒီးသုဆၢထၢၣ်လၢသုဒုၣ်သုဒါအမဲာ်ညါတကဲဘၣ်လီၤ.

38ဒီးသုကတုၤလၢတၢ်ဟးဂူာ်ဟးဂီၤလၢပှၤကလုာ်တဖၣ်အကျါ,ဒီးသုဒုၣ်သုဒါအကီၢ်န့ၣ်ကအီၣ်ကွံာ်သုလီၤ.

39ဒီးသုပှၤလၢအအိၣ်လီၤတဲာ်တဖၣ်ကဃဲၤလီၤကွံာ်လၢအတၢ်ဒဲးဘးအပူၤ,လၢသုဒုၣ်သုဒါအကီၢ်ပူၤ,ဒီးလၢအပၢ်တဖၣ်အတၢ်ဒဲးဘးစ့ၢ်ကီးအပူၤန့ၣ်ကဃဲၤလီၤကွံာ်ဝဲဒီးအီၤလီၤ.

40ဒီးကအၢၣ်လီၤအီလီၤအတၢ်ဒဲးဘး,ဒီးအပၢ်တဖၣ်အတၢ်ဒဲးဘး,ဒီးအတၢ်ကမၣ်လၢအမၤကမၣ်ယၤ,ဒီးလၢအလဲၤထီဒါယၤဒီး, 41ယလဲၤထီဒါအီၤ,ဒီးဒုးလဲၤအီၤဆူအဒုၣ်အဒါအကီၢ်ပူၤန့ၣ်လီၤ.တုၤနုၤတစုအသးလၢအတဒိးတၢ်ကူးတရံးဘၣ်မ့ၢ်ဆီၣ်လီၤအသး,ဒီးမ့ၢ်တူၢ်လိာ်တၢ်ဒဲးဘးလၢယဒုးဘၣ်အီၤဒီး, 42ယကသ့ၣ်နီၣ်ထီၣ်က့ၤယတၢ်အၢၣ်လီၤအီလီၤဒီးစီၤယၤကိာ်,ဒီးယတၢ်အၢၣ်လီၤအီၤလီၤဒီးစီၤအံၤစဲးစ့ၢ်ကီး,ဒီးယတၢ်အၢၣ်လီၤအီလီၤဒီးစီၤအၤဘြၤဟၣ်စ့ၢ်ကီး,ဒီးယကသ့ၣ်နီၣ်ထီၣ်က့ၤအီၤ,ဒီးယကသ့ၣ်နီၣ်ထီၣ်က့ၤထံဧိၤကီၢ်ဧိၤလီၤ.

43ဒီးထံဧိၤကီၢ်ဧိၤကဘၣ်တၢ်လဲၤသဒၣ်အီၤ,ဒီးကမုာ်လၤလၢအအိၣ်ဘှံးအနံၤ,ဖဲအအိၣ်သယုၢ်လၢအဝဲသ့ၣ်တအိၣ်ဘၢအဖၢမုၢ်န့ၣ်,ဒီးအဝဲသ့ၣ်တဖၣ်န့ၣ်ကတူၢ်လိာ်တၢ်ဒဲးဘးလၢအဘၣ်အီၤလီၤ.အဂ့ၢ်ဒ်အံၤ,မၤတရီတပါယတၢ်စံၣ်ညီၣ်တဖၣ်,ဒီးသးဘၣ်အၢယလုၢ်ယလၢ်လီၤ.

44ဘၣ်ဆၣ်ဒီးတုၤအအိၣ်လၢအဒုၣ်အဒါအကီၢ်ပူၤဒီး,ယတကွံာ်တ့ၢ်ကွံာ်ဘၣ်အီၤဘၣ်.ဒီးယတသးဘၣ်အၢအီၤတုၤယကမၤဟးဂီၤအီၤခဲလၢာ်,ဒီးမၤဟးဂီၤယတၢ်အၢၣ်လီၤအီလီၤဒီးအီၤဘၣ်.အဂ့ၢ်ဒ်အံၤ,ယမ့ၢ်ယွၤအကစၢ်လီၤ.

45ဒီးလၢအဂီၢ်န့ၣ်ယကသ့ၣ်နီၣ်ထီၣ်က့ၤအထူအထံးအတၢ်အၢၣ်လီၤအီလီၤ,လၢယဒုးဟးထီၣ်အီၤလၢကီၢ်အဲၤကူပတူးအပူၤလၢပှၤကလုာ်တဖၣ်အမဲာ်ညါဒ်သိးယကမ့ၢ်အကစၢ်လီၤ.ယဲဒၣ်အံၤယမ့ၢ်ယွၤလီၤ.

46အန့ၣ်မ့ၢ်တၢ်အလုၢ်အလၢ်,ဒီးတၢ်စံၣ်ညီၣ်,ဒီးတၢ်သိၣ်တၢ်သီတဖၣ်,လၢယွၤပာ်လီၤလၢအဘၢၣ်စၢၤဒီးပှၤအံၣ်စရ့လးဖိအဘၢၣ်စၢၤ,လၢစီၤမိၤရှ့အစုပူၤလၢကစၢၢ်စံၤနါအလိၤလီၤ.