Leviticus 3
1ဒီးအတၢ်မၤဘူၣ်န့ၣ်မ့မ့ၢ်တၢ်လုၢ်မၤဃူမၤဖိးဒီးမ့ၢ်မၤဘူၣ်ဂီၤဘုၣ်ဂီၤဖံးတဒုဒီး,အမိၢ်ဂ့ၤဂ့ၤ,အဖါဂ့ၤဂ့ၤ,ဘၣ်မၤဘူၣ်တၢ်အလၢအပှဲၤလၢယွၤအမဲာ်ညါလီၤ. 2ဒီးဘၣ်ပာ်အစုလၢအတၢ်မၤဘူၣ်အခိၣ်,ဒီးမၤသံအီၤဖဲတၢ်အိၣ်ဖှိၣ်အဒဲအကျဲစၢၤလီၤ.ဒီးပှၤလုၢ်တၢ်အဒိၣ်,စီၤအၤဟရိၣ်အဖိခွါတဖၣ်,ဘၣ်ဖှံအသွံၣ်ဝးတရံးဝဲလၢတၢ်လုၢ်လီၢ်အဖီခိၣ်လီၤ. 3ဒီးလၢတၢ်လုၢ်မၤဃူမၤဖိးအတၢ်မၤဘူၣ်န့ၣ်ဘၣ်ဟဲစိာ်တၢ်လုၢ်လၢမ့ၣ်အူလၢယွၤအဂီၢ်,သိလၢအပှံာ်သလီအလိၤ,ဒီးကယဲၢ်တၢ်သိလၢအအိၣ်လၢအပှံာ်လိၤ, 4ဒီးအကလ့ၢ်ခံဖျၢၣ်,ဒီးသိလၢအအိၣ်လၢအလိၤ,လၢအအိၣ်လၢယီၢ်ဒ့အဃၢၤဒီးတၢ်အိၣ်လၢအသူၣ်အလိၤန့ၣ်ဘၣ်ဟံးထီၣ်ကွံာ်ဒီးအကလ့ၢ်တဖၣ်လီၤ. 5ဒီးစီၤအၤဟရိၣ်အဖိခွါတဖၣ်ဘၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လၢတၢ်လုၢ်မ့ၣ်အူအဖီခိၣ်လၢအအိၣ်လၢသ့ၣ်မုၣ်အဖီခိၣ်လၢအအိၣ်လၢမ့ၣ်အူအဖီခိၣ်လီၤ.မ့ၢ်တၢ်လုၢ်လၢမ့ၣ်အူ,တၢ်နၢမူလၢယွၤအဂီၢ်လီၤ. 6ဒီးအတၢ်မၤဘူၣ်ယွၤလၢတၢ်လုၢ်မၤဃူမၤဖိးမ့မ့ၢ်သိဂ့ၤ,မဲာ်တဲးလဲးဂ့ၤဒီး,အမိၢ်မ့ၢ်ဂ့ၤ,အဖါမ့ၢ်ဂ့ၤ,ဘၣ်မၤဘူၣ်တၢ်အလၢအပှဲၤလီၤ. 7ဒီးမ့ၢ်ဟဲစိာ်သိဖိတဒုလၢအတၢ်မၤဘူၣ်အဂီၢ်ဒီး,ဘၣ်ဟဲစိာ်အီၤဆူယွၤအမဲာ်ညါလီၤ. 8ဒီးဘၣ်ပာ်အစုလၢအတၢ်မၤဘူၣ်အခိၣ်,ဒီးမၤသံအီၤလၢတၢ်အိၣ်ဖှိၣ်အဒဲအမဲာ်ညါလီၤ.ဒီးစီၤအၤဟရိၣ်အဖိခွါတဖၣ်ဘၣ်ဖှံအသွံၣ်ဝးတရံးဝဲလၢတၢ်လုၢ်လီၢ်အဖီခိၣ်လီၤ. 9ဒီးလၢတၢ်လုၢ်မၤဃူမၤဖိးအတၢ်မၤဘူၣ်န့ၣ်ဘၣ်ဟဲစိာ်တၢ်လုၢ်လၢမ့ၣ်အူလၢယွၤအဂီၢ်,အသိ,ဒီးအမဲၢ်ဘီၣ်ဒီဘိ,(ဘၣ်ဒီၣ်တဲာ်ဝဲဘူးဒီးအချၢဃံ),ဒီးသိအိၣ်လၢအပှံာ်သလီအလိၤ,ဒီးသိအိၣ်လၢအပှံာ်လိၤခဲလၢာ်, 10ဒီးအကလ့ၢ်ခံဖျၢၣ်,ဒီးသိလၢအအိၣ်လၢအလိၤလၢအအိၣ်လၢအယီၢ်ဒ့အဃၢၤ,ဒီးတၢ်အိၣ်လၢအသူၣ်အလိၤန့ၣ်ဘၣ်ဟံးထီၣ်ကွံာ်ဒီးအကလ့ၢ်တဖၣ်လီၤ. 11ဒီးပှၤလုၢ်တၢ်အဒိၣ်ဘၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လီၤ.မ့ၢ်တၢ်လုၢ်လၢမ့ၣ်အူအတၢ်အီၣ်လၢယွၤအဂီၢ်လီၤ. 12ဒီးအတၢ်မၤဘူၣ်န့ၣ်မ့မ့ၢ်မဲာ်တဲးလဲးတဒုဒီး,ဘၣ်ဟဲစိာ်အီၤဆူယွၤအမဲာ်ညါလီၤ. 13ဒီးဘၣ်ပာ်အစုလၢအခိၣ်,ဒီးမၤသံအီၤလၢတၢ်အိၣ်ဖှိၣ်အဒဲအမဲာ်ညါ,ဒီးစီၤအၤဟရိၣ်အဖိခွါတဖၣ်ဘၣ်ဖှံအသွံၣ်ဝးတရံးဝဲလၢတၢ်လုၢ်လီၢ်အဖီခိၣ်လီၤ. 14ဒီးဘၣ်မၤဘူၣ်အတၢ်မၤဘူၣ်န့ၣ်လၢအီၤ,တၢ်လုၢ်လၢမ့ၣ်အူလၢယွၤအဂီၢ်,သိလၢအအိၣ်လၢအပှံာ်သလီအလိၤ,ဒီးကယဲၢ်သိလၢအပှံာ်လိၤ, 15ဒီးအကလ့ၢ်ခံဖျၢၣ်,ဒီးအသိလၢအအိၣ်လၢအလိၤလၢအယီၢ်ဒ့အဃၢၤ,ဒီးတၢ်အိၣ်လၢအသူၣ်အလိၤန့ၣ်ဘၣ်ဟံးထီၣ်ကွံာ်ဒီးအကလ့ၢ်တဖၣ်လီၤ. 16ဒီးပှၤလုၢ်တၢ်အဒိၣ်ဘၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လီၤ.မ့ၢ်တၢ်လုၢ်လၢမ့ၣ်အူအတၢ်အီၣ်လၢတၢ်နၢမူအဂီၢ်လီၤ.ကယဲၢ်တၢ်သိန့ၣ်မ့ၢ်ယွၤအတၢ်ခဲလၢာ်လီၤ. 17တၢ်အလုၢ်အလၢ်အထူအယိာ်လီၤလၢသုစၢၤသုသွဲၣ်အစိၤစိၤအဃၣ်ဃၣ်လၢသုအိၣ်သုဆိးအလီၢ်တပူၤလၢ်လၢ်န့ၣ်မ့ၢ်လၢတၢ်သိဂ့ၤ,တၢ်သွံၣ်ဂ့ၤန့ၣ်သုသုတအီၣ်တဂ့ၤလီၤ.
Copyright information for
KswSKMB