Lev 4 | KswSKMB | STEP | ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်,

‏ Leviticus 4

1 ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 2 ကတိၤတၢ်ဒီးပှၤအံၣ်စရ့လးဖိဒီးစံး,ပှၤတဂၤဂၤမ့ၢ်ဟးဖျိးတၢ်ဒီးမၤတၢ်ဒဲးဘးလၢတၢ်တမံၤမံၤအပူၤလၢယွၤမၤလိာ်အီၤ,မၤတဂ့ၤန့ၣ်,ဒီးမ့ၢ်မၤအီၤတမံၤမံၤဒီး, 3 ပှၤလုၢ်တၢ်အဒိၣ်လၢအဒိးဖှူအသးန့ၣ်မ့ၢ်မၤကမၣ်တၢ်,ဒီးဒုးဘၣ်ပှၤဂီၢ်မုၢ်လၢတၢ်ဒဲးဘးဒီး,ဘၣ်ဟဲစိာ်ဂီၤဖံးဖါဖိအလၢအပှဲၤတဒုလၢအတၢ်ဒဲးဘးလၢအမၤဝဲအဃိ,ဆူယွၤအအိၣ်လၢတၢ်လုၢ်တၢ်ဒဲးဘးအဂီၢ်လီၤ.

4 ဒီးဘၣ်ဟဲစိာ်ဂီၤဖံးန့ၣ်ဆူတၢ်အိၣ်ဖှိၣ်အဒဲအကျဲစၢၤလၢယွၤအမဲာ်ညါ,ဒီးဘၣ်ပာ်အစုလၢဂီၤဖံးအခိၣ်,ဒီးမၤသံဂီၤဖံးလၢယွၤအမဲာ်ညါလီၤ. 5 ဒီးပှၤလုၢ်တၢ်အဒိၣ်လၢအဒိးဖှူအသးန့ၣ်ဘၣ်ဟံးန့ၢ်ဂီၤဖံးအသွံၣ်,ဒီးစိာ်ဝဲဆူတၢ်အိၣ်ဖှိၣ်အဒဲပူၤ, 6 ဒီးပှၤလုၢ်တၢ်အဒိၣ်ဘၣ်ဘျၢအစုမုၢ်တဘိလၢတၢ်သွံၣ်ပူၤ,ဒီးဖှံအသွံၣ်န့ၣ်နွံစုလၢယွၤအမဲာ်ညါ,လၢတၢ်အလီၢ်စီဆှံအယၣ်ဘျးထီၣ်အသးလၢအမဲာ်ညါလီၤ.

7 ဒီးပှၤလုၢ်တၢ်အဒိၣ်ဘၣ်ပာ်အသွံၣ်လၢတၢ်လုၢ်လီၢ်ဆိၣ်ကဲၤနၢမူအနၢၤတဖၣ်အလိၤလၢယွၤအမဲာ်ညါ,လၢအအိၣ်လၢတၢ်အိၣ်ဖှိၣ်အဒဲပူၤလီၤ.ဒီးဘၣ်လူလီၤဂီၤဖံးအသွံၣ်ခဲလၢာ်လၢတၢ်လုၢ်လီၢ်မ့ၣ်အူအခီၣ်ထံးလၢအအိၣ်လၢတၢ်အိၣ်ဖှိၣ်အဒဲအကျဲစၢၤန့ၣ်လီၤ. 8 ဒီးဘၣ်ဟံးန့ၢ်ကွံာ်တၢ်လုၢ်တၢ်ဒဲးဘးအဂီၤဖံးအသိခဲလၢာ်,သိအိၣ်လၢအပှံာ်သလီအလိၤ,ဒီးသိအိၣ်လၢအပှံာ်လိၤ, 9 ဒီးအကလ့ၢ်ခံဖျၢၣ်,ဒီးအသိလၢအအိၣ်လၢအလိၤလၢအအိၣ်လၢအယီၢ်ဒ့အဃၢၤန့ၣ်,ဒီးတၢ်အိၣ်လၢအသူၣ်အလိၤန့ၣ်ဘၣ်ဟံးထီၣ်ကွံာ်ဒီးကလ့ၢ်တဖၣ်, 10 ဒ်ပှၤဟံးထီၣ်ကွံာ်လၢတၢ်လုၢ်မၤဃူမၤဖိးအဂီၤဖံးအသိးန့ၣ်လီၤ.ဒီးပှၤလုၢ်တၢ်အဒိၣ်ဘၣ်ဆိၣ်ကဲၤအီၤလၢတၢ်လုၢ်လီၢ်မ့ၣ်အူအဖီခိၣ်လီၤ. 11 ဒီးဂီၤဖံးအဖံး,ဒီးအညၣ်ခဲလၢာ်,ဒီးအခိၣ်ဒီးအခီၣ်,ဒီးအပှံာ်,ဒီးအအ့ၣ်, 12 ဂီၤဖံးဒီဒုဒၣ်လဲာ်ဘၣ်လဲၤစိာ်ကွံာ်ဆူပှၤသူၣ်ဒဲအလီၢ်လၢခိ,ဖဲအလီၢ်ကဆှီဖဲပှၤဂၢ်လီၤဖၣ်ဆါ,ဒီးဘၣ်ဆူးထီၣ်ကွံာ်အီၤလၢမ့ၣ်အူလၢသ့ၣ်မုၣ်အဖီခိၣ်လီၤ.ဖဲပှၤဂၢ်လီၤဖၣ်ဆါန့ၣ်ပှၤဘၣ်ဆူးထီၣ်ကွံာ်အီၤဖဲန့ၣ်လီၤ.

13 ဒီးအံၣ်စရ့လးအတၢ်အိၣ်ဖှိၣ်ခဲလၢာ်မ့ၢ်ဟးဖျိးမၤကမၣ်တၢ်တမံၤ,ဒီးတၢ်တမံၤန့ၣ်မ့ၢ်အိၣ်တဒၢဒီးတၢ်အိၣ်ဖှိၣ်အမဲာ်,ဒီးမ့ၢ်မၤတၢ်တမံၤမံၤလၢယွၤမၤလိာ်ဝဲလၢအတဂ့ၤမၤဘၣ်,ဒီးအတၢ်ဒဲးဘးမ့ၢ်အိၣ်ဒီး, 14 တုၤတၢ်ဒဲးဘးလၢအမၤဝဲန့ၣ်အိၣ်ဖျါထီၣ်ဒီး,တၢ်အိၣ်ဖှိၣ်ဘၣ်မၤဘူၣ်ဂီၤဖံးဖါဖိလၢတၢ်ဒဲးဘးအဂီၢ်,ဒီးဟဲစိာ်အီၤဆူတၢ်အိၣ်ဖှိၣ်အဒဲအမဲာ်ညါလီၤ. 15 ဒီးတၢ်အိၣ်ဖှိၣ်အသူၣ်က့သးပှၢ်တဖၣ်ဘၣ်ပာ်အစုလၢဂီၤဖံးအခိၣ်လၢယွၤအမဲာ်ညါ,ဒီးမၤသံဂီၤဖံးလၢယွၤအမဲာ်ညါလီၤ.

16 ဒီးပှၤလုၢ်တၢ်အဒိၣ်လၢအဒိးဖှူအသးန့ၣ်ဘၣ်ဟဲစိာ်ဂီၤဖံးအသွံၣ်ဆူတၢ်အိၣ်ဖှိၣ်အဒဲပူၤ, 17 ဒီးပှၤလုၢ်တၢ်အဒိၣ်ဘၣ်ဘျၢအစုမုၢ်တဘိလၢတၢ်သွံၣ်ပူၤ,ဒီးဖှံအီၤနွံဘျီလၢယွၤအမဲာ်ညါ,လၢယၣ်ဘျးထီၣ်အသးအမဲာ်ညါလီၤ. 18 ဒီးဘၣ်ပာ်တၢ်သွံၣ်လၢတၢ်လုၢ်လီၢ်အနၢၤတဖၣ်အလိၤလၢယွၤအမဲာ်ညါ,လၢအအိၣ်လၢတၢ်အိၣ်ဖှိၣ်အဒဲပူၤလီၤ.ဒီးဘၣ်လူလီၤတၢ်သွံၣ်ခဲလၢာ်လၢတၢ်လုၢ်လီၢ်မ့ၣ်အူအခီၣ်ထံးလၢအအိၣ်လၢတၢ်အိၣ်ဖှိၣ်အဒဲအကျဲစၢၤလီၤ. 19 ဒီးဘၣ်ဟံးန့ၢ်အသိခဲလၢာ်,ဒီးဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်လီၤ.

20 ဒီးဘၣ်မၤဂီၤဖံးန့ၣ်ဒ်အမၤဂီၤဖံးလၢတၢ်လုၢ်တၢ်ဒဲးဘးအဂီၢ်အသိးလီၤ.ဘၣ်မၤအဝဲအံၤဒ်န့ၣ်အသိးလီၤ.ဒီးပှၤလုၢ်တၢ်အဒိၣ်ဘၣ်မၤတၢ်ပူၤဖျဲးလၢအဂီၢ်,ဒီးတၢ်ကပျၢ်အတၢ်လီၤ. 21 ဒီးဘၣ်စိာ်ထီၣ်ကွံာ်ဂီၤဖံးန့ၣ်ဆူပှၤသူၣ်ဒဲအလီၢ်လၢခိ,ဒီးဆူးထီၣ်ကွံာ်အီၤဒ်အဆူးထီၣ်ကွံာ်ဂီၤဖံးလၢအခီၣ်ထံးတဒုအသိးန့ၣ်လီၤ.အဝဲန့ၣ်မ့ၢ်တၢ်အိၣ်ဖှိၣ်အတၢ်လုၢ်တၢ်ဒဲးဘးလီၤ.

22 တုၤပဒိၣ်မၤတၢ်ဒဲးဘး,ဒီးတသ့ၣ်ညါဘၣ်ဒီး,မၤတၢ်တမံၤမံၤလၢယွၤအကစၢ်မၤလိာ်ဝဲလၢတဂ့ၤမၤဘၣ်,ဒီးအတၢ်ဒဲးဘးအိၣ်, 23 ဒီးတခီတၢ်မ့ၢ်ဘိးဘၣ်သ့ၣ်ညါအီၤလၢအတၢ်ဒဲးဘးလၢအမၤဝဲဒီး,ဘၣ်ဟဲစိာ်အတၢ်မၤဘူၣ်,မဲာ်တဲးလဲၤဖိအဖါအလၢအပှဲၤတဒုလီၤ.

24 ဒီးဘၣ်ပာ်အစုလၢမဲာ်တဲးလဲးအခိၣ်,ဒီးမၤသံအီၤဖဲအလီၢ်လၢအမၤသံတၢ်လုၢ်မ့ၣ်အူလၢယွၤအမဲာ်ညါလီၤ.အဝဲန့ၣ်မ့ၢ်တၢ်လုၢ်တၢ်ဒဲးဘးလီၤ.

25 ဒီးပှၤလုၢ်တၢ်အဒိၣ်ဟံးန့ၢ်တၢ်လုၢ်တၢ်ဒဲးဘးအသွံၣ်လၢအစုမုၢ်တဘိ,ဒီးပာ်လၢတၢ်လုၢ်လီၢ်မ့ၣ်အူအနၢၤတဖၣ်အလိၤ,ဒီးဘၣ်လူလီၤအသွံၣ်လၢတၢ်လုၢ်လီၢ်မ့ၣ်အူအခီၣ်ထံးလီၤ.

26 ဒီးဘၣ်ဆိၣ်ကဲၤအသိခဲလၢာ်လၢတၢ်လုၢ်လီၢ်အဖီခိၣ်ဒ်တၢ်လုၢ်မၤဃူမၤဖိးအသိအသိးန့ၣ်,ဒီးပှၤလုၢ်တၢ်အဒိၣ်ဘၣ်မၤတၢ်ပူၤဖျဲးလၢအဂီၢ်လၢအတၢ်ဒဲးဘးအဃိ,ဒီးတၢ်ကပျၢ်အတၢ်လီၤ.

27 ဒီးပှၤကီၢ်ဖိတဂၤဂၤမ့ၢ်မၤတၢ်ဒဲးဘး,ဒီးတသ့ၣ်ညါဘၣ်ဒီး,မၤတၢ်တမံၤမံၤလၢယွၤမၤလိာ်ဝဲလၢအတဂ့ၤမၤဘၣ်,ဒီးအတၢ်ဒဲးဘးအိၣ်ဝဲ, 28 ဒီးတၢ်မ့ၢ်ဘိးဘၣ်သ့ၣ်ညါအီၤလၢအတၢ်ဒဲးဘးလၢအမၤဝဲဒီး,ဘၣ်ဟဲစိာ်အတၢ်မၤဘူၣ်,မဲာ်တဲးလဲးဖိအမိၢ်အလၢအပှဲၤတဒုလၢအတၢ်ဒဲးဘးလၢအမၤဝဲအဃိလီၤ.

29 ဒီးဘၣ်ပာ်အစုလၢတၢ်လုၢ်တၢ်ဒဲးဘးအခိၣ်,ဒီးမၤသံတၢ်လုၢ်တၢ်ဒဲးဘးန့ၣ်ဖဲတၢ်လုၢ်မ့ၣ်အူအလီၢ်လီၤ. 30 ဒီးပှၤလုၢ်တၢ်အဒိၣ်ဘၣ်ဟံးန့ၢ်အသွံၣ်လၢအစုမုၢ်တဘိ,ဒီးပာ်လၢတၢ်လုၢ်လီၢ်မ့ၣ်အူအနၢၤတဖၣ်အလိၤ,ဒီးဘၣ်လူလီၤအသွံၣ်ခဲလၢာ်လၢတၢ်လုၢ်လီၢ်အခီၣ်ထံးလီၤ.

31 ဒီးဘၣ်ဟံးထီၣ်ကွံာ်အသိခဲလၢာ်ဒ်ပှၤဟံးထီၣ်ကွံာ်တၢ်လုၢ်မၤဃူမၤဖိးအသိအသိးန့ၣ်,ဒီးပှၤလုၢ်တၢ်အဒိၣ်ဘၣ်ဆိၣ်ကဲၤကွံာ်လၢတၢ်လုၢ်လီၢ်အဖီခိၣ်,လၢတၢ်နၢမူလၢယွၤအဂီၢ်လီၤ.ဒီးပှၤလုၢ်တၢ်အဒိၣ်ဘၣ်မၤတၢ်မၤပူၤဖျဲးလၢအဂီၢ်,ဒီးတၢ်ကပျၢ်အတၢ်လီၤ.

32 ဒီးမ့ၢ်ဟဲစိာ်သိဖိလၢတၢ်လုၢ်တၢ်ဒဲးဘးအဂီၢ်ဒီး,ဘၣ်ဟဲစိာ်အမိၢ်အလၢအပှဲၤတဒုလီၤ. 33 ဒီးဘၣ်ပာ်အစုလၢတၢ်လုၢ်တၢ်ဒဲးဘးအခိၣ်,ဒီးမၤသံအီၤလၢတၢ်လုၢ်တၢ်ဒဲးဘးအဂီၢ်,ဖဲပှၤမၤသံတၢ်လုၢ်မ့ၣ်အူလီၤ.

34 ဒီးပှၤလုၢ်တၢ်အဒိၣ်ဘၣ်ဟံးန့ၢ်တၢ်လုၢ်တၢ်ဒဲးဘးအသွံၣ်လၢအစုမုၢ်တဘိ,ဒီးပာ်လၢတၢ်လုၢ်လီၢ်မ့ၣ်အူအနၢၤတဖၣ်အလိၤ,ဒီးတၢ်လူလီၤတၢ်သွံၣ်ခဲလၢာ်လၢတၢ်လုၢ်လီၢ်အခီၣ်ထံးလီၤ. 35 ဒီးဘၣ်ဟံးထီၣ်ကွံာ်အသိခဲလၢာ်ဒ်သိဖိအသိဘၣ်တၢ်ဟံးထီၣ်ကွံာ်အီၤလၢတၢ်လုၢ်မၤဃူမၤဖိးအသိးန့ၣ်,ဒီးပှၤလုၢ်တၢ်အဒိၣ်ဘၣ်ဆိၣ်ကဲၤကွံာ်အီၤလၢတၢ်လုၢ်လီၢ်အဖီခိၣ်ဒ်တၢ်လုၢ်မ့ၣ်အူလၢယွၤအဂီၢ်အသိးန့ၣ်လီၤ.ဒီးပှၤလုၢ်တၢ်အဒိၣ်ဘၣ်မၤတၢ်ပူၤဖျဲးလၢအတၢ်ဒဲးဘးလၢအမၤဝဲအဃိ,ဒီးတၢ်ကပျၢ်အတၢ်လီၤ.