‏ Luke 10

1တၢ်န့ၣ်တဖၣ်အလီၢ်ခံဒီး,ကစၢ်ပာ်လီၤစ့ၢ်ကီးပှၤလၢအဂၤနွံဆံဂၤ,ဒီးမၢအလဲၤခံဂၤတပူၤခံဂၤတပူၤ,လၢအမဲာ်ညါဆူကယဲၢ်ခူကယဲၢ်ဝ့ၢ်,ဒီးကယဲၢ်အလီၢ်လၢအကစၢ်ဒၣ်ဝဲကလဲၤန့ၣ်လီၤ. 2မ်ဒ်န့ၣ်ဒီး,စံးဘၣ်အီၤ,ကူးတၢ်အလီၢ်အိၣ်အါမး,မ့မ့ၢ်ပှၤမၤတၢ်ဖိန့ၣ်အိၣ်စှၤဂၤလီၤ.မၤသးဒ်န့ၣ်ဒီး,ဘါထုကဖၣ်ကူးတၢ်အလီၢ်အကစၢ်ဒ်သိးအကမၢလီၤန့ၢ်ပှၤမၤတၢ်ဖိဆူအကူးတၢ်အလီၢ်န့ၣ်တက့ၢ်. 3လဲၤတက့ၢ်,ကွၢ်ကွၢ်,ယမၢလီၤသုလဲၤတၢ်ဒ်သိဖိလၢထွံၣ်မံၤအကျါအသိးန့ၣ်လီၤ. 4စ့အထၢၣ်မ့ၢ်ဂ့ၤ,တၢ်အီၣ်အထၢၣ်မ့ၢ်ဂ့ၤ,ခီၣ်ဖံးတဖၣ်မ့ၢ်ဂ့ၤ,သုတစိာ်တဂ့ၤ,ဒီးကတိၤဒိၣ်ပှၤလၢကျဲနီတဂၤတဂ့ၤ. 5ဒီးဖဲဒၣ်သုလဲၤနုာ်ဟံၣ်တဖျၢၣ်ဖျၢၣ်ဒီး,စံးဆိသုဝဲ,မ်တၢ်ဃူတၢ်ဖိးဘၣ်ဟံၣ်တဖျၢၣ်အံၤတက့ၢ်.

6ဒီးတၢ်ဃူတၢ်ဖိးအဖိခွါမ့ၢ်အိၣ်ဖဲန့ၣ်ဒီး,သုတၢ်ဃူတၢ်ဖိးကအိၣ်ဝဲလၢအလိၤလီၤ.မ့တမ့ၢ်ဘၣ်ဒီး,ကဟဲဘၣ်ကဒါက့ၤသုလီၤ. 7ဒီးအိၣ်လၢဟံၣ်တဖျၢၣ်ဃီအဝဲန့ၣ်,ဒီးအီၣ်တၢ်ဒီးအီတၢ်ဖဲဒၣ်တၢ်လၢပှၤပာ်လီၤဝဲတက့ၢ်.အဂ့ၢ်ဒ်အံၤ,ပှၤမၤတၢ်ဖိန့ၣ်ဂ့ၤန့ၢ်ဘၣ်အဘူးအလဲလီၤ.တဟံၣ်ဘၣ်တဟံၣ်,တဟံၣ်ဘၣ်တဟံၣ်,သုတလဲၤတဂ့ၤ. 8ဒီးဖဲဒၣ်ဝ့ၢ်တဖျၢၣ်ဖျၢၣ်လၢသုလဲၤနုာ်န့ၣ်,ပှၤမ့ၢ်တူၢ်လိာ်သုဒီး,တၢ်လၢအပာ်လီၤန့ၢ်သုန့ၣ်အီၣ်တက့ၢ်. 9ဒီးမၤဘျါက့ၤပှၤဘၣ်ဆူးဘၣ်ဆါအိၣ်လၢအပူၤ,ဒီးစံးဘၣ်တဲဘၣ်ပှၤတဖၣ်လၢယွၤအဘီအမုၢ်န့ၣ်ဟဲဘူးလံဒီးသုလံ. 10ဒီးဖဲဒၣ်ဝ့ၢ်တဖျၢၣ်ဖျၢၣ်လၢသုလဲၤနုာ်န့ၣ်,ပှၤမ့ၢ်တတူၢ်လိာ်ဘၣ်သုဒီး,လဲၤဆူအကျဲပူၤဒီးစံးသုဝဲ, 11သုဝ့ၢ်အဟီၣ်ကမူၣ်စဲဘူးလၢပလိၤအံၤ,ပတြူာ်ကွံာ်ထီဒါသုလီၤ.ဘၣ်ဆၣ်ဒီးသ့ၣ်ညါတၢ်အံၤတက့ၢ်.ယွၤအဘီအမုၢ်န့ၣ်ဟဲဘူးလံ. 12ဒီးယစံးဘၣ်သု,လၢမုၢ်နံၤတနံၤန့ၣ်,စဒိၣ်ကဘၣ်တၢ်ဘီၣ်န့ၢ်ဝ့ၢ်န့ၣ်တက့ၢ်လီၤ.

13ဃရၤစံၣ်ဧၢ,နဲဒၣ်အံၤ,နဘၣ်အဖှီၣ်လီၤ.ဘ့ၤသစဲဒၤဧၢ,နဲဒၣ်အံၤနဘၣ်အဖှီၣ်လီၤ.အဂ့ၢ်ဒ်အံၤ,တၢ်လီၤလးမၤအသးလၢသုပူၤတဖၣ်န့ၣ်,မ့ၢ်အမၤအသးလၢစိၢ်ဒီးစံဒိၣ်အပူၤဒီး,အဝဲသ့ၣ်ကကူသိးထီၣ်ထၢၣ်တၢ်ကံးညာ်,ဒီးဆ့ၣ်နီၤလၢဖၣ်ဆါအကျါ,ဒီးပီၢ်ယၢ်လီၤက့ၤအသးဃဲးဃဲးတ့ၢ်လံလီၤ. 14ဘၣ်ဆၣ်ဒီးလၢတၢ်စံၣ်ညီၣ်အပူၤန့ၣ်,စိၢ်ဒီးစံဒိၣ်ကဘၣ်တၢ်ဘီၣ်န့ၢ်သုတက့ၢ်လီၤ. 15ဒီးနဲဒၣ်ကပ့းရနီၣ်လၢအထီၣ်ဘးလၢမူခိၣ်ဧၢ,နကဘၣ်တၢ်ဆီၣ်လီၤပၢၢ်လၢလရာ်ပူၤလီၤ.

16ပှၤလၢအနၢ်ဟူသုကလုၢ်န့ၣ်,မ့ၢ်အနၢ်ဟူယကလုၢ်,ဒီးပှၤလၢအညိကွံာ်သုန့ၣ်မ့ၢ်အညိကွံာ်ယၤ,ဒီးပှၤလၢအညိကွံာ်ယၤအံၤ,မ့ၢ်အညိကွံာ်ပှၤလၢအမၢလီၤယၤတဂၤလီၤ.

17ဒီးပှၤနွံဆံဂၤန့ၣ်ဟဲက့ၤကဒါက့ၤအိၣ်ဒီးအသူၣ်ခုအသးခုဒီးစံးဝဲဒၣ်,ကစၢ်ဧၢ,မ့ၢ်နမံၤသတးဒီး,တၢ်နါတဖၣ်ဒၣ်လဲာ်အိၣ်လၢပဖီလာ်လီၤ. 18ဒီးစံးဘၣ်အီၤ,ဒ်လီဝၢ်ဒံးအသိးန့ၣ်,ယထံၣ်မုၣ်ကီၤလံၢ်လီၤတဲာ်လၢမူခိၣ်လီၤ. 19ဒီးကွၢ်ကွၢ်,ယဟ့ၣ်သုစိသုကမီၤ,ဒ်သိးသုကယီၢ်ဂုၢ်ဧိၤဒးဧိၤ,ပတ့ၤတၢၢ်ပတ့ၤချဲး,ဒီးလၢဒုၣ်ဒါအစိကမီၤခဲလၢာ်အဖီခိၣ်လီၤ.ဒီးတၢ်တမၤအၢမၤနးဘၣ်သုနီတမံၤဘၣ်. 20ဘၣ်ဆၣ်ဒီးမ့ၢ်သးတဖၣ်အိၣ်လၢသုဖီလာ်အဃိဒီး,သုတသးခုတဂ့ၤ.မ့ၢ်သုမံၤဆဲးလီၤအသးလၢမူခိၣ်အဃိဒီး,သးခုတက့ၢ်.

21ဒီးယ့ၣ်ရှူးအသူၣ်ဖှံအသးညီတစုဃီဖဲန့ၣ်,ဒီးစံးဝဲဒၣ်,မူခိၣ်ဒီးဟီၣ်ခိၣ်အကစၢ်,ပၢ်ဧၢ,ယစံးထီၣ်ပတြၢၤနၤလီၤ.အဂ့ၢ်ဒ်အံၤ,တၢ်တဖၣ်အံၤ,နပာ်ခူသူၣ်လၢပှၤကူၣ်တၢ်သ့,ဒီးပှၤအသူၣ်ဆးသးဆးတဖၣ်အမဲာ်ညါ,ဒီးနမၤဖျါထီၣ်အီၤလၢဖိသၣ်အမဲာ်ညါလီၤ.မ့ၢ်လံ,ပၢ်ဧၢ,မ့ၢ်အဘၣ်နသးဒ်န့ၣ်လီၤ. 22ဒီးဃၣ်ဃီၤအသးဆူအပျဲၢ်အဘီၣ်အအိၣ်ဒီးစံးဝဲဒၣ်,ယပၢ်န့ၣ်ဟ့ၣ်လီၤလံယၤလၢတၢ်ခဲလၢာ်လံ.ဒီးမ့တမ့ၢ်ဘၣ်ပၢ်န့ၣ်ဒီး,ပှၤတသ့ၣ်ညါဘၣ်ဖိခွါနီတဂၤဘၣ်.ဒီးမ့တမ့ၢ်ဘၣ်ဖိခွါ,ဒီးပှၤလၢဖိခွါဘၣ်အသးလၢအကလီၣ်ဖျါပၢ်လၢအီၤတဖၣ်န့ၣ်ဒီး,ပှၤတသ့ၣ်ညါဘၣ်ပၢ်နီတဂၤဘၣ်.

23ဒီးဃၣ်ဃီၤအသးဆူအပျဲၢ်အဘီၣ်အအိၣ်,ဒီးစံးဘၣ်အီၤကစုဒု,မဲာ်လၢအထံၣ်တၢ်လၢသုထံၣ်ဘၣ်န့ၣ်,ဘၣ်ဆိၣ်ဂ့ၤဝဲလီၤ. 24အဂ့ၢ်ဒ်အံၤ,ယစံးဘၣ်သု,ဝံဒီးစီၤပၤအါဂၤ,တၢ်မိၣ်ထံၣ်ဘၣ်အသးလၢတၢ်လၢသုထံၣ်န့ၣ်ဒီး,တထံၣ်ဘၣ်ဝဲဘၣ်.ဒီးတၢ်မိၣ်နၢ်ဟူဘၣ်အသးလၢတၢ်လၢသုနၢ်ဟူန့ၣ်,ဒီးတနၢ်ဟူဘၣ်ဝဲဘၣ်.

25ဒီးကွၢ်ကွၢ်,မတၤတဂၤပှၤသ့လံာ်တၢ်သိၣ်တၢ်သီတဂၤ,ဂဲၤဆၢထၢၣ်ဒီးလ့ပစီအီၤဒီးစံးဝဲဒၣ်,သရၣ်ဧၢ,ဒ်သိးယကန့ၢ်ဘၣ်သါတၢ်မူအထူအယိာ်ဒီး,ယဘၣ်မၤမနုၤတမံၤလဲၣ်. 26ဒီးအဝဲဒၣ်စံးဘၣ်အီၤ,လၢလံာ်တၢ်သိၣ်တၢ်သီအပူၤန့ၣ်,တၢ်ကွဲးဒ်လဲၣ်,နဖးဒ်လဲၣ်. 27ဒီးကတိၤဆၢတၢ်ဒီးစံးဝဲဒၣ်,အဲၣ်ယွၤနကစၢ်လၢနသူၣ်ကံၢ်နသးလဲ,ဒီးနသးဒီဖျၢၣ်ညါ,ဒီးနတၢ်ကူၣ်တၢ်ဆးတုၤအလၢာ်,ဒီးနဂံၢ်နဘါခဲလၢာ်တက့ၢ်.ဒီးအဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိးန့ၣ်တက့ၢ်. ▼

▼10:27 ၅မိၤ.၆း၅

28ဒီးစံးဘၣ်အီၤ,နကတိၤတၢ်ကစီဒီလီၤ.မၤတၢ်ဒ်န့ၣ်,ဒီးနကမူလီၤ. 29ဘၣ်ဆၣ်ဒီး,တၢ်မိၣ်ပာ်တီပာ်လိၤဒၣ်အသးဒီး,စံးဘၣ်ယ့ၣ်ရှူး,ဒီးပှၤလၢယဃၢၤန့ၣ်မ့ၢ်မတၤတဂၤလဲၣ်.

30ဒီးယ့ၣ်ရှူးကတိၤဆၢအီၤဒီးစံးဝဲဒၣ်,မတၤတဂၤလဲၤလီၤလၢယရူၤၡလ့ၣ်ဆူယရံၤဃိ,ဒီးလီၤဘၣ်လၢတမျိးတမျာ်အကျါ,ဒီးအဝဲသ့ၣ်ဘ့ၣ်လီၤကွံာ်အကူအသိး,ဒီးတီၢ်အီၤတုၤအကသံတ့ၢ်ဒီးလဲၤသဒၣ်အီၤလီၤ. 31ဒီးပှၤလုၢ်တၢ်အဒိၣ်တဂၤလဲၤတၢ်လၢကျဲန့ၣ်,ဒီးတုၤအထံၣ်အီၤဒီးလဲၤဝဲလၢကျဲအဝၢ်ဘးခီလီၤ. 32ဒ်န့ၣ်အသိး,ပှၤလ့ၤဝံဖိတဂၤတုၤဖဲန့ၣ်,ဒီးလဲၤထံၣ်ဝဲဝံၤဒီး,လဲၤပူၤကွံာ်ဝဲလၢကျဲအဝၢ်ဘးခီစ့ၢ်ကီးလီၤ.

33မ့မ့ၢ်ပှၤၡၤမရံဖိတဂၤလဲၤတၢ်ဒီး,တုၤဝဲလၢအအိၣ်,ဒီးထံၣ်အီၤ,ဒီးသးကညီၤအီၤလီၤ. 34ဒီးလူလီၤသိဒီးစပံးထံလၢအပူၤလီၢ်,ဒီးဘိၣ်ဘံဝဲ,ဒီးဒုးဒိးအီၤလၢအဆၣ်ဖိကီၢ်ဖိဒၣ်ဝဲတဒု,ဒီးဆှၢအီၤဆူပှၤတမှံၤအဘျီၣ်တဖျၢၣ်,ဒီးအံးက့ၤကွၢ်က့ၤအီၤလီၤ. 35ဒီးမုၢ်ဆ့ၣ်ထီၣ်တနံၤ,ဖဲအဟးထီၣ်န့ၣ်,ဟံးန့ၢ်စ့ဒန့ၤရံၤခံဘ့ၣ်ဒီးဟ့ၣ်လီၤပှၤဘျီၣ်ခိၣ်ဒီးစံးဘၣ်အီၤ,အံးက့ၤကွၢ်က့ၤအီၤတက့ၢ်.ဒီးဖဲဒၣ်နလၢာ်အါန့ၢ်အအံၤတက့ၢ်န့ၣ်,တုၤယဟဲက့ၤဒီး,ယကဟ့ၣ်က့ၤနၤလီၤ.

36မၤသးဒ်န့ၣ်ဒီးနဆိကမိၣ်ဒ်လဲၣ်.လၢပှၤသၢဂၤအကျါန့ၣ်,မ့ၢ်အကဲလၢပှၤလီၤဘၣ်လၢတမျာ်အကျါတဂၤအပှၤလၢအဃၢၤဖဲလဲၣ်တဂၤလဲၣ်. 37ဒီးစံးဝဲဒၣ်,မ့ၢ်ပှၤလၢအသးကညီၤအီၤတဂၤလီၤ.ဒီးယ့ၣ်ရှူးစံးဘၣ်အီၤ,လဲၤမၤနဲဒ်န့ၣ်သိးတက့ၢ်.

38ဒီးတၢ်မၤအသးဖဲအလဲၤတၢ်အဖၢမုၢ်ဒီး,အဝဲဒၣ်လဲၤနုာ်ဆူသဝီတဖျၢၣ်အပူၤ,ဒီးပိာ်မုၣ်အမံၤနီၢ်မၢ်သၤတဂၤတူၢ်လိာ်အီၤလၢအဟံၣ်ပူၤလီၤ. 39ဒီးပိာ်မုၣ်န့ၣ်အဒီပုၢ်ဝဲၢ်မုၣ်,ကိးဝဲလၢနီၢ်မၤရံအိၣ်ဝဲတဂၤလီၤ.အဝဲဒၣ်န့ၣ်ဆ့ၣ်နီၤလၢကစၢ်အခီၣ်ထံး,ဒီးကနၣ်အကလုၢ်လီၤ. 40မ့မ့ၢ်နီၢ်မၢ်သၤန့ၣ်လၢအတၢ်မၤအါအဃိဒီး,အသးကိၢ်ထီၣ်ဒီးလဲၤဆူအအိၣ်ဒီးစံးဝဲဒၣ်,ကစၢ်ဧၢ,ယမၤတၢ်တဂၤဃီဒီးယဒီပုၢ်ဝဲၢ်မုၣ်အိၣ်ဒၣ်အတၢ်န့ၣ်,နတပာ်ဘၣ်လၢတၢ်နီတမံၤဘၣ်ဧါ.မၤသးဒ်န့ၣ်ဒီးဒ်သိးအကမၤစၢၤယၤဒီး,စံးဘၣ်အီၤတက့ၢ်. 41ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,နီၢ်မၢ်သၤဧၢ,နီၢ်မၢ်သၤဧၢ,နဲဒၣ်အံၤ,နဘၣ်ယိၣ်တၢ်ဒီးနသးကိၢ်တၢ်လၢတၢ်အါမံၤအဃိလီၤ. 42ဘၣ်ဆၣ်ဒီးတၢ်လၢပှၤကြၢးန့ၢ်ဘၣ်ဝဲန့ၣ်,အိၣ်တမံၤလီၤ.ဒီးနီၢ်မၤရံဃုထၢလံတၢ်အဂ့ၤတမံၤန့ၣ်,လၢပှၤတဟံးထီၣ်ကွံာ်ဘၣ်လၢအီၤနီတဂၤဘၣ်.