‏ Luke 17

1ဒီးစံးဘၣ်အပျဲၢ်အဘီၣ်တၢ်လီၤဃံၤအလီၢ်တဖၣ်တအိၣ်ဘၣ်ဒီး,အိၣ်တသ့ဘၣ်.ဘၣ်ဆၣ်ဒီး,ပှၤလၢအဒုးအိၣ်ထီၣ်ဝဲတဂၤန့ၣ်,ဘၣ်အဖှီၣ်လီၤ. 2ပှၤမ့ၢ်မၤလီၤဃံၤပှၤတဂၤလၢပှၤဆံးတဖၣ်အံၤအကျါဒီး,ဆၢၣ်ဂူာ်လၢၢ်မ့ၢ်ဘၣ်စၢထီၣ်လၢအကိာ်,ဒီးအဝဲဒၣ်ဘၣ်တၢ်တ့ၢ်လီၤကွံာ်အီၤဆူပီၣ်လဲၣ်ပူၤဒီး,ဂ့ၤဒၣ်တၢ်လၢအဂီၢ်တက့ၢ်လီၤ.

3သုဝဲသ့ၣ်အံၤပလီၢ်သုသးတက့ၢ်.နဒီပုၢ်ဝဲၢ်မ့ၢ်မၤကမၣ်ဘၣ်နၤဒီး,သိၣ်ဃီၤအီၤတက့ၢ်.ဒီးမ့ၢ်ပီၢ်ယၢ်လီၤက့ၤအသးဒီး,ပျၢ်ကွံာ်အတၢ်ကမၣ်တက့ၢ်. 4ဒီးလၢတနံၤအတီၢ်ပူၤ,မ့ၢ်မၤကမၣ်ဘၣ်နၤတုၤအပှဲၤထီၣ်နွံစု,ဒီးမ့ၢ်ဟဲက့ၤကဒါက့ၤဆူနအိၣ်တုၤအပှဲၤထီၣ်နွံစုဒီးစံး,ယပီၢ်ယၢ်လီၤက့ၤယသးလီၤန့ၣ်ဒီး,ပျၢ်ကွံာ်အတၢ်ကမၣ်တက့ၢ်.

5ဒီးပှၤတၢ်မၢဖိတဖၣ်စံးဘၣ်ကစၢ်,မၤအါထီၣ်ပတၢ်နာ်တက့ၢ်. 6ဒီးကစၢ်စံးဝဲဒၣ်,သုတၢ်နာ်မ့ၢ်အိၣ်ထဲသဘၣ်ချံတဖျၢၣ်ဒီး,သုကစံးဘၣ်ဝံာ်တထံးအံၤ,ဟးထီၣ်ကွံာ်,ဒီးအိၣ်သူၣ်လီၤနသးလၢပီၣ်လဲၣ်ပူၤတက့ၢ်န့ၣ်ဒီး,ကစူၢ်သုကလုၢ်လီၤ.

7ဒီးပှၤလၢသုကျါတဂၤဂၤမ့ၢ်အိၣ်ဒီးအခ့အပှၤတဂၤမၤစံာ်မ့ၢ်ဂ့ၤ,ကွၢ်ဆၣ်ဖိကီၢ်ဖိမ့ၢ်ဂ့ၤဒီး,တုၤအဟဲက့ၤလၢစံာ်ပူၤဒီး,ကစံးဘၣ်အီၤတကီၢ်ခါ,ဟဲက့ၤဆ့ၣ်နီၤသန့ၤလၢမ့ၤလၣ်ထံးတက့ၢ်န့ၣ်,မ့ၢ်မတၤတဂၤလဲၣ်. 8မ့မ့ၢ်ကစံးဘၣ်အီၤ,ကတဲာ်ကတီၤတၢ်လၢယကအီၣ်,ဒီးယအီၣ်တၢ်အီတၢ်အဖၢမုၢ်န့ၣ်,ကံၢ်တူာ်နယီၢ်တကိးဒီးမၤယခ့ယပှၤအတၢ်မၤတက့ၢ်.အန့ၣ်ဝံၤဒီး,နကအီၣ်ဒီးနကအီနဲဒၣ်လီၤန့ၣ်,တမ့ၢ်ဘၣ်ဧါ. 9မ့ၢ်အခ့အပှၤမၤဝဲဒ်အမၤလိာ်ဝဲအသိးန့ၣ်ဒီး,မ့ၢ်အစံးထီၣ်ပတြၢၤအီၤဧါ.ယဆိကမိၣ်လၢအတပတြၢၤဘၣ်. 10ဒ်န့ၣ်အသိးသုဝဲဒၣ်အံၤ,ဒ်တၢ်မၤလိာ်သုအသိးန့ၣ်,သုမၤခဲလၢာ်ဝံၤဒီး,စံးသုဝဲလၢပမ့ၢ်တၢ်အခ့အပှၤလၢအတဂိာ်တသီၣ်ဘၣ်တၢ်လီၤ.အဂ့ၢ်ဒ်အံၤ,တၢ်လၢပမၤလံန့ၣ်မ့ၢ်တၢ်လၢပကြၢးမၤန့ၣ်လီၤ.

11ဒီးတၢ်မၤအသးလၢအလဲၤဆူယရူၤၡလ့ၣ်,ဒီးလဲၤခီဂာ်ၡၤမရံဒီးကၤလံၤလါအခၢၣ်သးလီၤ. 12ဒီးကလဲၤနုာ်တ့ၢ်ဝဲလၢသဝီတဖျၢၣ်အပူၤဒီး,ပှၤဘၣ်တၢ်ဆါအၢဆံဆဲၣ်ဂၤဟဲသဂၢၢ်အီၤ,ဒီးဆၢထၢၣ်အိၣ်သကွ့ၤဝဲ, 13ဒီးကိးပသူထီၣ်ဒီးစံးဝဲဒၣ်,ယ့ၣ်ရှူးကစၢ်ဧၢ,သူၣ်ကညီၤသးကညီၤလၢ်ပှၤတက့ၢ်. 14ဒီးထံၣ်ဝဲဒီးစံးဘၣ်အီၤ,လဲၤဒုးနဲၣ်သုသးလၢပှၤလုၢ်တၢ်အဒိၣ်တက့ၢ်.ဒီးတၢ်မၤအသးလၢအလဲၤတၢ်အဖၢမုၢ်ဒီး,ကဆှီထီၣ်က့ၤလီၤ. 15ဒီးလၢပှၤတဖၣ်အကျါတဂၤ,တုၤအသ့ၣ်ညါလၢအဘျါက့ၤဝဲဒီး,ဟဲက့ၤကဒါက့ၤဒီးစံးထီၣ်ပတြၢၤယွၤလၢအကလုၢ်ဖးဒိၣ်လီၤ. 16ဒီးထိၣ်လီၤပှီၤအသးလၢအခီၣ်ထံး,ဒီးစံးထီၣ်ပတြၢၤအဘျုးအဖှိၣ်လီၤ.ဒီးပှၤတဂၤန့ၣ်မ့ၢ်ပှၤၡၤမရံဖိလီၤ. 17ဒီးယ့ၣ်ရှူးကတိၤဆၢတၢ်ဒီးစံးဝဲဒၣ်,မ့ၢ်ပှၤဆံဆဲၣ်ဂၤန့ၣ်ကဆှီထီၣ်ဝဲတမ့ၢ်ဘၣ်ဧါ.ဒီးပှၤခွံဂၤန့ၣ်အိၣ်ဖဲလဲၣ်. 18ပှၤဟဲက့ၤကဒါက့ၤ,ဒီးစံးထီၣ်ပတြၢၤယွၤအဘျုးအဖှိၣ်ပထံၣ်န့ၢ်ထဲပှၤတခီဘီမုၢ်ဖိတဂၤအံၤဧိၤဧါ. 19ဒီးစံးဘၣ်အီၤ,ဂဲၤဆၢထၢၣ်ဒီးက့ၤကၢ်နဲာ်,နတၢ်နာ်န့ၣ်အုၣ်က့ၤခီၣ်က့ၤလံနၤလံ.

20ဒီးပှၤဖၤရံၤၡဲသံကွၢ်အီၤလၢယွၤအဘီအမုၢ်ကဟဲခဲလဲၣ်ခဲလဲၣ်,ဒီးအဝဲဒၣ်ကတိၤဆၢတၢ်ဒီးစံးဝဲဒၣ်,တမ့ၢ်ဘၣ်ယွၤအဘီအမုၢ်ဟဲဝဲအိၣ်ဒီး,တၢ်ကွၢ်ထံကွၢ်ဖျါန့ၣ်ဘၣ်. 21ဒီးပှၤတစံးဘၣ်,ကွၢ်ကွၢ်,ဖဲအံၤ,ကွၢ်ကွၢ်,ဖဲန့ၣ်ဘၣ်.အဂ့ၢ်ဒ်အံၤ,ကွၢ်ကွၢ်,ယွၤအဘီအမုၢ်အိၣ်လၢသုသးကံၢ်ပူၤလီၤ.

22ဒီးစံးဘၣ်အပျဲၢ်အဘီၣ်,အနံၤအသီကဘၣ်လၢသုကဆၢထံၣ်ဘၣ်ပှၤကညီဖိခွါအမုၢ်နံၤအကျါတနံၤ,ဒီးသုတထံၣ်ဘၣ်ဘၣ်. 23ဒီးအဝဲသ့ၣ်ကစံးဘၣ်သု,ကွၢ်ကွၢ်,ဖဲအံၤ,ကွၢ်ကွၢ်,ဖဲန့ၣ်.လဲၤတဂ့ၤ,ပိာ်အခံတဂ့ၤ, 24အဂ့ၢ်ဒ်အံၤ,ဒ်လီဝၢ်ဒံးလၢမူထံးတခီ,ကပီၤထီၣ်ပၢၢ်လၢမူထံးအဝဲတခီအသိးဒီး,ပှၤကညီဖိခွါလၢအမုၢ်နံၤအပူၤန့ၣ်,ကမၤအသးဒ်န့ၣ်အသိးလီၤ. 25ဘၣ်ဆၣ်ဒီးကဘၣ်ဆိတၢ်အါမံၤ,ဒီးကဘၣ်တၢ်ညိကွံာ်အီၤလၢပှၤတစိၤအံၤအစုပူၤလီၤ.

26ဒီးဒ်တၢ်မၤအသးလၢစီၤနိအၤအမုၢ်နံၤတဖၣ်အသိးန့ၣ်,တၢ်ကမၤအသးလၢပှၤကညီဖိခွါအမုၢ်နံၤဒ်န့ၣ်အသိးလီၤ. 27ပှၤအီၣ်တၢ်အီတၢ်,ဒီးန့ၢ်မါန့ၢ်ဝၤတုၤမုၢ်တနံၤလၢစီၤနိအၤလဲၤနုာ်လၢကဘီပူၤ,ဒီးထံလုၣ်ဘၢတၢ်ဟဲဒီးမၤဟးဂီၤကွံာ်အီၤခဲလၢာ်လီၤ. 28ဒ်န့ၣ်အသိးတၢ်မၤအသးလၢစီၤလိာ်အမုၢ်နံၤတဖၣ်န့ၣ်လီၤ.ပှၤအီၣ်တၢ်အီတၢ်,ပှ့ၤတၢ်ဆါတၢ်,သူၣ်တၢ်ဘျၢတၢ်,မၤဟံၣ်မၤဃီလီၤ. 29ဘၣ်ဆၣ်ဒီးမုၢ်တနံၤလၢစီၤလိာ်ဟးထီၣ်ကွံာ်လၢဝ့ၢ်စဒိၣ်အပူၤန့ၣ်,တၢ်ဟဲစူၤလီၤလၢမ့ၣ်အူဒီးကးလၢမူခိၣ်,ဒီးမၤဟးဂီၤကွံာ်ပှၤခဲလၢာ်လီၤ. 30မုၢ်နံၤလၢပှၤကညီဖိခွါအံၤကအိၣ်ဖျါထီၣ်ဒီး,တၢ်ကမၤအသးဒ်န့ၣ်အသိးလီၤ.

31ဒီးတၢ်လၢမုၢ်တနံၤန့ၣ်,ပှၤမ့ၢ်အိၣ်လၢအဟံၣ်ခိၣ်ဒီးအတၢ်ဖိတၢ်လံၤမ့ၢ်အိၣ်လၢအဟံၣ်ပူၤဒီး,မ်အသုတယုၢ်လီၤဟံးန့ၢ်က့ၤအီၤတဂ့ၤ.ဒ်န့ၣ်အသိးပှၤအိၣ်လၢစံာ်ပူၤန့ၣ်,သုတက့ၤကဒါက့ၤဆူအလီၢ်ခံတဂ့ၤ. 32သ့ၣ်နီၣ်ထီၣ်က့ၤစီၤလိာ်အမါတက့ၢ်. 33ဖဲဒၣ်ပှၤလၢအဃုအုၣ်က့ၤခီၣ်က့ၤအသးတဂၤဂၤန့ၣ်,ကမၤဟါမၢ်ကွံာ်အသးလီၤ.ဒီးဖဲဒၣ်ပှၤလၢအဒုးဟါမၢ်ကွံာ်အသးတဂၤဂၤန့ၣ်,ကဒုးမူထီၣ်က့ၤအီၤလီၤ.

34ယစံးဘၣ်သု,တၢ်လၢမုၢ်တနၤန့ၣ်ပှၤပိာ်ခွါခံဂၤကအိၣ်လၢအလီၢ်မံတပူၤဃီဒီး,တၢ်ကဟံးထီၣ်ကွံာ်တဂၤ,ဒီးအဝဲတဂၤကအိၣ်လီၤတဲာ်လီၤ. 35ပှၤပိာ်မုၣ်ခံဂၤကဂူာ်ဆၢၣ်ဂူာ်တပူၤဃီ,ဒီးတၢ်ကဟံးထီၣ်ကွံာ်တဂၤ,ဒီးအဝဲတဂၤကအိၣ်လီၤတဲာ်လီၤ. 37ဒီးအဝဲသ့ၣ်ကတိၤဆၢတၢ်ဒီးစံးဘၣ်အီၤ,ကစၢ်ဧၢ,ဖဲလဲၣ်ပူၤလဲၣ်.ဒီးအဝဲဒၣ်စံးဘၣ်အီၤ,ဖဲဒၣ်တၢ်အစိၣ်အိၣ်ဝဲတပူၤပူၤန့ၣ်,လီတာ်တဖၣ်ကအိၣ်ဖှိၣ်ရိဖှိၣ်ဖဲန့ၣ်လီၤ.