‏ Luke 18

1ဒီးဒ်သိးပှၤကညီကဘါထုကဖၣ်တၢ်တဘိယူၢ်ဃီ,ဒီးသုတလီၤဘှါတဂ့ၤဒီး,စံးဘၣ်စ့ၢ်ကီးအီၤလၢတၢ်ကတိၤဒိအံၤ, 2ပှၤစံၣ်ညီၣ်ကွီၢ်လၢအတပျံၤဘၣ်ယွၤဒီးတယူးတယီၣ်ဘၣ်ပှၤကညီ,အိၣ်လၢဝ့ၢ်တဝ့ၢ်အပူၤတဂၤလီၤ. 3ဒီးမုၣ်ကမဲအိၣ်လၢဝ့ၢ်ပူၤန့ၣ်တဂၤ,ဒီးလဲၤဝဲဆူအအိၣ်ဒီးစံးဝဲဒၣ်,စံၣ်ညီၣ်တီန့ၢ်ယၤလၢယဒုၣ်ယဒါတက့ၢ်. 4ဒီးတစံၣ်ညီၣ်ဘၣ်ဒီးအိၣ်ဝဲတစိၢ်လီၤ.လၢခံက့ၤဒီး,စံးလီၤအသး,ယဲဒၣ်အံၤ,ယတပျံၤဘၣ်ယွၤဒီးယတယူးတယီၣ်ဘၣ်ပှၤကညီနာ်သက့ဒီး, 5မ့ၢ်မုၣ်ကမဲတဂၤအံၤမၤတံာ်တာ်ယၤအဃိဒီး,ယကစံၣ်ညီၣ်တီန့ၢ်အီၤ,ဒ်သိးအသုတမၤဘှံးယသးလၢအဟဲထီဘိန့ၣ်တဂ့ၤလီၤ.

6ဒီးကစၢ်စံးဝဲဒၣ်,ပှၤစံၣ်ညီၣ်ကွီၢ်လၢအတတီဘၣ်တဂၤစံးတၢ်န့ၣ်ကနၣ်တက့ၢ်. 7ဒီးယွၤကစံၣ်ညီၣ်တီန့ၢ်အပှၤဃုထၢဖိလၢအကိးထီၣ်အီၤလၢမုၢ်ဆါဆဲးလၢမုၢ်နၤ,ဒီးအဝဲဒၣ်ဝံသးစူၤတၢ်လၢအဂ့ၢ်ယံာ်ယံာ်,တမ့ၢ်ဘၣ်ဧါ.ယစံးဘၣ်သုလၢအကစံၣ်ညီၣ်တီန့ၢ်အီၤချ့ချ့လီၤ. 8ဘၣ်ဆၣ်ဒီး,တုၤပှၤကညီဖိခွါအံၤဟဲလီၤဒီး,ကထံၣ်န့ၢ်တၢ်နာ်လၢဟီၣ်ခိၣ်ချၢအံၤဧါ.

9ဒီးပှၤစံးလီၤအသးလၢပှၤတီပှၤလိၤ,ဒီးတယူးတယီၣ်ဘၣ်ပှၤဂၤတနီၤနီၤန့ၣ်,အဝဲဒၣ်စံးဘၣ်အီၤလၢတၢ်ကတိၤဒိအံၤလီၤ. 10ပှၤခံဂၤလဲၤထီၣ်ဘါထုကဖၣ်တၢ်လၢတၢ်လုၢ်ဟံၣ်ပူၤလီၤ.အဝဲတဂၤမ့ၢ်ပှၤဖၤရံၤၡဲ,ဒီးအဝဲတဂၤမ့ၢ်ပှၤဃ့သွဲလီၤ. 11ပှၤဖၤရံၤၡဲတဂၤဆၢထၢၣ်,ဒီးဘါထုကဖၣ်ဝဲလၢအသးဒ်အံၤ,ယွၤဧၢ,ယစံးထီၣ်ပတြၢၤနၤလီၤ.အဂ့ၢ်ဒ်အံၤ,ယတဒ်သိးဘၣ်ဒီးပှၤဂၤဘၣ်,ပှၤဂုာ်ဆူၣ်ပျိဆူၣ်တၢ်,ပှၤတတီတလိၤဘၣ်,ပှၤအဲၣ်ဘၢတၢ်,ဒီးပှၤဃ့သွဲတဂၤအံၤဒၣ်လဲာ်ဘၣ်လီၤ. 12နွံနံၤအတီၢ်ပူၤယဒုၣ်တၢ်အီၣ်တၢ်အီခံနံၤလီၤ.ဖဲဒၣ်ယန့ၢ်တၢ်ခဲလၢာ်ဒီး,အဘျၢၣ်တဆံ,ယမၤဘူၣ်တဘျၢၣ်လီၤ. 13ဒီးပှၤဃ့သွဲတဂၤအိၣ်ဆၢထၢၣ်သကွ့ၤဝဲ,ဒီးတကျ့ထီၣ်ဒၣ်လဲာ်အမဲာ်ဆူမူခိၣ်ဘၣ်,မ့မ့ၢ်ဒဲလီၤအသးနါပှၢ်ဒီးစံးဝဲဒၣ်,ယွၤဧၢ,သူၣ်ကညီၤသးကညီၤပှၤတၢ်ဒဲးဘးဖိယၤအံၤတက့ၢ်. 14ယစံးဘၣ်သု,အအံၤတဂၤဘၣ်တၢ်ပာ်တီပာ်လိၤအီၤဒီး,က့ၤလီၤက့ၤဝဲဆူအဟံၣ်လီၤ.မ့မ့ၢ်အဝဲတဂၤန့ၣ်တမ့ၢ်ဘၣ်.အဂ့ၢ်ဒ်အံၤ,ကယဲၢ်ပှၤလၢအပာ်ထီၣ်ထီအသးန့ၣ်ကဘၣ်တၢ်ဆီၣ်လီၤအီၤလီၤ.ဒီးပှၤလၢအဆီၣ်လီၤအသးန့ၣ်,ကဘၣ်တၢ်ပာ်ထီၣ်ထီအီၤလီၤ.

15ဒီးပှၤဟဲစိာ်ဖိဒံဖိသၣ်စ့ၢ်ကီးဆူအအိၣ်,ဒ်သိးအကထိးဘၣ်အီၤလီၤ.ဒီးအပျဲၢ်အဘီၣ်ထံၣ်ဝဲဒီးတြီအီၤလီၤ. 16ဘၣ်ဆၣ်ဒီးယ့ၣ်ရှူးကိးအီၤဒီးစံးဝဲဒၣ်,ဒုးဟဲဖိသၣ်တဖၣ်န့ၣ်ဆူယအိၣ်ဒီးတြီအီၤတဂ့ၤ.အဂ့ၢ်ဒ်အံၤ,ယွၤအဘီအမုၢ်န့ၣ်မ့ၢ်ပှၤဒ်န့ၣ်အသိးလီၤ. 17ယစံးဘၣ်သုတီတီအံၤ,ဖဲဒၣ်ပှၤလၢအတဒိးန့ၢ်ဘၣ်ယွၤအဘီအမုၢ်ဒ်ဖိသၣ်အသိးန့ၣ်,တလဲၤနုာ်ဘၣ်ဝဲလၢအပူၤလ့ၤတက့ၤဘၣ်.

18ဒီးမတၤတဂၤပဒိၣ်တဂၤသံကွၢ်အီၤဒီးစံးဝဲဒၣ်,သရၣ်လၢအဂ့ၤတဂၤဧၢ,ယဲဒၣ်အံၤ,ဒ်သိးယကန့ၢ်ဘၣ်သါတၢ်မူအထူအယိာ်ဒီး,ယဘၣ်မၤမနုၤလဲၣ်. 19ဒီးယ့ၣ်ရှူးစံးဘၣ်အီၤ,ဘၣ်မနုၤနကိးယၤလၢအဂ့ၤလဲၣ်.ပှၤဂ့ၤတအိၣ်ဘၣ်,အိၣ်ထဲယွၤတဂၤဧိၤလီၤ. 20တၢ်မၤလိာ်တဖၣ်န့ၣ်နသ့ၣ်ညါလီၤ.အဲၣ်ဘၢမါအဲၣ်ဘၢဝၤတဂ့ၤ.မၤသံပှၤကညီတဂ့ၤ.ဟုၣ်တၢ်တဂ့ၤ.အုၣ်နသးလၢတၢ်ကဘျံးကဘျၣ်တဂ့ၤ.ယူးယီၣ်နမိၢ်ဒီးနပၢ်တက့ၢ်. ▼

▼18:20 ၂မိၤ.၂၀း၁၂-၁၆

21ဒီးစံးဝဲဒၣ်,တၢ်န့ၣ်တဖၣ်ခဲလၢာ်ယတိၢ်န့ၢ်လံလၢယဖိၣ်သၣ်ခွါထီၣ်လံၤလံၤလီၤ. 22ဒီးယ့ၣ်ရှူးနၢ်ဟူတၢ်န့ၣ်ဒီးစံးဘၣ်အီၤ,နတလၢတပှဲၤဘၣ်အိၣ်ဒံးတမံၤလီၤ.ကယဲၢ်နစုလီၢ်နခီၣ်ခိၣ်ခဲလၢာ်န့ၣ်,ဆါလီၤကွံာ်ဒီးဟ့ၣ်ပှၤဖှီၣ်ဖိယာ်ဖိ,ဒီးနကအိၣ်ဒီးတၢ်လုၢ်ဒိၣ်ပှ့ၤဒိၣ်လၢမူခိၣ်,ဒီးဟဲပိာ်ယခံတက့ၢ်. 23ဒီးတုၤအနၢ်ဟူတၢ်န့ၣ်တဖၣ်ဒီး,အသူၣ်အုးအသးအုးထီၣ်လီၤ.အဂ့ၢ်ဒ်အံၤ,မ့ၢ်ပှၤအထူးအတီၤဒိၣ်မးလီၤ. 24အသးအုးထီၣ်န့ၣ်,ယ့ၣ်ရှူးထံၣ်ဒီးစံးဝဲဒၣ်,ပှၤအထူးအတီၤလဲၤနုာ်ဆူယွၤအဘီအမုၢ်အပူၤကီဆံးဒိၣ်လဲၣ်. 25အဂ့ၢ်ဒ်အံၤ,ကီၤလၤအူးတဒုဝၣ်ဖျိထးအမဲၢ်ခံညီန့ၢ်ပှၤအထူးအတီၤတဂၤလဲၤနုာ်ဆူမူခိၣ်အဘီအမုၢ်အပူၤတက့ၢ်လီၤ. 26ဒီးပှၤနၢ်ဟူတဖၣ်န့ၣ်စံးဝဲဒၣ်,မ့မ့ၢ်ဒ်န့ၣ်ဒီးမ့ၢ်မတၤကတုၤလၢတၢ်အုၣ်က့ၤခီၣ်က့ၤသ့တဂၤလဲၣ်.

27ဒီးအဝဲဒၣ်စံး,တၢ်လၢပှၤကညီမၤတသ့ဘၣ်န့ၣ်,ယွၤမၤဝဲသ့လီၤ.

28ဒီးစီၤပ့းတရူးစံးဝဲဒၣ်,ကွၢ်ကွၢ်,ပဝဲဒၣ်အံၤ,ပဟးသဒၣ်ပတၢ်ခဲလၢာ်ဒီးပိာ်နခံလံ. 29ဒီးအဝဲဒၣ်စံးဘၣ်အီၤ,ယစံးဘၣ်သုတီတီ,ပှၤလၢအဟးသဒၣ်အဟံၣ်အဃီမ့ၢ်ဂ့ၤ,အမိၢ်အပၢ်မ့ၢ်ဂ့ၤ,အပုၢ်အဝဲၢ်မ့ၢ်ဂ့ၤ,အဖိအမါမ့ၢ်ဂ့ၤ,အဖိအလံၤမ့ၢ်ဂ့ၤ,လၢယွၤအဘီအမုၢ်အဃိတဂၤလၢ်လၢ်န့ၣ်, 30ကန့ၢ်က့ၤဝဲအါန့ၢ်အလီၢ်အါစုလၢအံၤတဃၣ်,ဒီးခဲကိာ်တဃၣ်ကန့ၢ်ဘၣ်တၢ်မူအထူအယိာ်လီၤ.

31ဒီးဟံးန့ၢ်ပှၤတဆံခံဂၤန့ၣ်,ဒီးစံးဘၣ်အီၤ,ကွၢ်ကွၢ်,ပလဲၤထီၣ်ဆူယရူၤၡလ့ၣ်,ဒီးကယဲၢ်တၢ်ကွဲးအသးလၢဝံအစုပူၤလၢပှၤကညီအဖိခွါအံၤအဂ့ၢ်န့ၣ်,ကလၢထီၣ်ပှဲၤထီၣ်ဝဲခဲလၢာ်လီၤ. 32အဂ့ၢ်ဒ်အံၤ,ပှၤကဟ့ၣ်လီၤကွံာ်အီၤဆူပှၤကလုာ်တဖၣ်အစုပူၤ,ဒီးကဒုၣ်ဒွဲၣ်အီၤ,ဒီးကမၤအၢမၤနးအီၤ,ဒီးကထူးပှဲာ်အလိၤ, 33ဒီးကဝ့ၤအီၤတီၢ်အီၤ,ဒီးကမၤသံအီၤလီၤ.ဒီးလၢသၢနံၤတနံၤန့ၣ်ကဂဲၤဆၢထၢၣ်က့ၤဝဲလီၤ. 34ဒီးတၢ်န့ၣ်တဖၣ်အဝဲသ့ၣ်အနၢ်တပၢၢ်ဘၣ်နီတမံၤဘၣ်ဒီးတၢ်ကတိၤန့ၣ်အဂ့ၢ်အိၣ်ခူသူၣ်လၢအီၤ,ဒီးအဝဲဒၣ်စံးတၢ်န့ၣ်အနၢ်တပၢၢ်ဘၣ်ဝဲတကူၢ်သ့ၣ်လီၤ. 35ဒီးတုၤအလဲၤဘူးဒီးယရံၤဃိဒီး,ပှၤမဲာ်ဘျီၣ်ဆ့ၣ်နီၤဃ့တၢ်လၢကျဲအဃၢၤတဂၤ, 36နၢ်ဟူပှၤဂီၢ်မုၢ်ဟဲ,ဒီးသံကွၢ်ဝဲ,မ့ၢ်မနုၤလဲၣ်. 37ဒီးပှၤစံးဘၣ်အီၤလၢပှၤနစၤရ့းဖိယ့ၣ်ရှူးဟဲဝဲလီၤ. 38ဒီးအဝဲဒၣ်ကိးပသူထီၣ်ဒီးစံးဝဲဒၣ်,စီၤဒၤဝံးအဖိခွါယ့ၣ်ရှူးဧၢ,သူၣ်ကညီၤသးကညီၤစာ်ယၤတက့ၢ်. 39ဒီးပှၤလဲၤလၢညါတဖၣ်န့ၣ်,ဒ်သိးအကအိၣ်ဘှီၣ်ကလာ်ဒီး,ဒူအလိၤဘၣ်ဆၣ်ဒီး,အဝဲဒၣ်ကိးပသူထီၣ်အါထီၣ်ဒီးစံးဝဲဒၣ်,စီၤဒၤဝံးအဖိခွါဧၢ,သူၣ်ကညီၤသးကညီၤစာ်ယၤတက့ၢ်. 40ဒီးယ့ၣ်ရှူးအိၣ်ကတီၢ်,ဒီးမၢပှၤဟဲဆှၢအီၤဆူအအိၣ်လီၤ.ဒီးတုၤအဟဲဘူးဒီး,သံကွၢ်အီၤဒီးစံးဝဲဒၣ်,နသးအိၣ်လၢယကမၤနၤလၢမနုၤတမံၤလဲၣ်. 41ဒီးစံးဝဲဒၣ်,ကစၢ်ဧၢ,မ့ၢ်ဒ်သိးယကထံၣ်ထီၣ်က့ၤတၢ်လီၤ. 42ဒီးယ့ၣ်ရှူးစံးဘၣ်အီၤ,ထံၣ်ထီၣ်က့ၤတၢ်တက့ၢ်.နတၢ်နာ်အုၣ်က့ၤခီၣ်က့ၤလံနၤလံ. 43ဒီးထံၣ်ထီၣ်က့ၤတၢ်တကီၢ်ခါ,ဒီးစံးထီၣ်ပတြၢၤယွၤ,ဒီးပိာ်ထီၣ်အခံလီၤ.ဒီးပှၤခဲလၢာ်ထံၣ်ဝဲ,ဒီးစံးထီၣ်ပတြၢၤယွၤလီၤ.