‏ Luke 22

1ဒီးဘူၣ်ကိၣ်တဘၣ်ဒီးကိၣ်မံၣ်ကိးဝဲလၢဘူၣ်လဲၤကပာ်ကဘၣ်ဘူးတ့ၢ်ဒီး, 2ပှၤလုၢ်တၢ်အခိၣ်ဒီးပှၤကွဲးလံာ်သ့ၣ်တဖၣ်,ဃုဝဲလၢအကမၤသံအီၤဒ်လဲၣ်ဒ်လဲၣ်န့ၣ်လီၤ.အဂ့ၢ်ဒ်အံၤ,ပျံၤပှၤဂီၢ်မုၢ်လီၤ.

3ဒီးပှၤအိၣ်လၢပှၤတဆံခံဂၤအကျါ,စီၤယူဒၤကိးဝဲလၢအံၣ်စကၤရံၤအိာ်တဂၤန့ၣ်,မုၣ်ကီၤလံၢ်လဲၤနုာ်ဝဲဆူအပူၤ, 4ဒီးကဟ့ၣ်လီၤကွံာ်အီၤဒ်လဲၣ်ဒ်လဲၣ်န့ၣ်ဒီး,လဲၤကတိၤလိာ်အသးဒီးပှၤလုၢ်တၢ်အခိၣ်ဒီးပှၤသုးဖိအခိၣ်တဖၣ်လီၤ. 5ဒီးအဝဲသ့ၣ်တဖၣ်န့ၣ်အသးခုဝဲ,ဒီးအၢၣ်လီၤအီလီၤဝဲလၢအကဟ့ၣ်လီၤအစ့လီၤ. 6ဒီးအဝဲဒၣ်အၢၣ်လီၤအီလီၤဝဲ,ဒီးဒ်သိးအကဟ့ၣ်လီၤကွံာ်အီၤလၢပှၤဂီၢ်မုၢ်တအိၣ်ဘၣ်အခါဒီး,ဃုဝဲအဆၢအကတီၢ်လၢအဘၣ်လီၤ.

7ဒီးဘူၣ်ကိၣ်တဘၣ်ဒီးကိၣ်မံၣ်အမုၢ်တနံၤလၢအဘၣ်မၤသံတၢ်လဲၤကပာ်ဘၣ်ဝဲ, 8ဒီးမၢလီၤစီၤပ့းတရူးဒီးစီၤယိၤဟၣ်ဒီးစံးဝဲဒၣ်,လဲၤကတဲာ်ကတီၤတၢ်လဲၤကပာ်,ဒ်သိးပကအီၣ်တၢ်န့ၣ်တက့ၢ်. 9ဒီးအဝဲသ့ၣ်စံးဘၣ်အီၤ,ဘၣ်နသးလၢပကကတဲာ်ကတီၤတၢ်ဖဲလဲၣ်ပူၤလဲၣ်. 10ဒီးအဝဲဒၣ်စံးဘၣ်အီၤ,ကွၢ်ကွၢ်,တုၤသုလဲၤနုာ်လၢဝ့ၢ်ပူၤဒီး,ပှၤလဲၤစိာ်သပၢၤထံတဂၤကသဂၢၢ်သုလီၤ.ပိာ်အခံဆူဟံၣ်ပူၤဖဲအလဲၤနုာ်ဝဲတက့ၢ်. 11ဒီးစံးဘၣ်ဟံၣ်ကစၢ်,သရၣ်စံးဘၣ်နၤ,ဒၢးတဒၢးဖဲယကအီၣ်တၢ်လဲၤကပာ်ဒီးယပျဲၢ်ယဘီၣ်,အိၣ်ဖဲလဲၣ်ပူၤလဲၣ်. 12ဒီးကဒုးနဲၣ်သုလၢဒၢးဖးဒိၣ်,လၢတၢ်ထီၣ်ထီတတီၤ,အိၣ်ကတီၤအသးလီၤ.ကတဲာ်ကတီၤတၢ်ဖဲန့ၣ်တက့ၢ်. 13ဒီးအပျဲၢ်အဘီၣ်လဲၤဝဲ,ဒီးထံၣ်န့ၢ်တၢ်ဒ်အစံးဘၣ်အီၤအသိးန့ၣ်,ဒီးကတဲာ်ကတီၤတၢ်လဲၤကပာ်လီၤ.

14ဒီးတုၤအနၣ်ရံၣ်ဘၣ်ဒီး,ဆ့ၣ်နီၤသန့ၤဃုာ်ဒီးပှၤတၢ်မၢဖိတဆံခံဂၤန့ၣ်, 15ဒီးစံးဘၣ်အီၤ,ယဲဒၣ်အံၤ,ယတချုးဒိးဒံးဘၣ်တၢ်ဒီး,တၢ်မိၣ်အီၣ်ဃုာ်ယသးလၢတၢ်လဲၤကပာ်အံၤဒီးသုဒိၣ်မးလီၤ. 16အဂ့ၢ်ဒ်အံၤ,ယစံးဘၣ်တဲဘၣ်သုလၢအတချုးလၢထီၣ်ပှဲၤထီၣ်ဒံးဘၣ်လၢယွၤအဘီအမုၢ်ဒီး,ယတအီၣ်လၢၤဘၣ်အီၤဘၣ်. 17ဒီးဟံးန့ၢ်လီခီဒီးစံးထီၣ်ပတြၢၤတၢ်အဘျုးအဖှိၣ်,ဒီးစံးဝဲဒၣ်,ဟံးန့ၢ်တၢ်အံၤ,ဒီးနီၤဖးလိာ်သုသးလၢအီၤတက့ၢ်. 18အဂ့ၢ်ဒ်အံၤ,ယစံးဘၣ်သုလၢယွၤအဘီအမုၢ်တချုးဟဲဒံးဘၣ်ဒီး,ယတအီလၢၤဘၣ်လၢစပံးမုၢ်အသၣ်အထံဘၣ်. 19ဒီးဟံးန့ၢ်ကိၣ်ဒီးစံးထီၣ်ပတြၢၤတၢ်အဘျုးအဖှိၣ်,ဒီးစိၢ်ဘျဲးဝဲ,ဒီးဟ့ၣ်လီၤအပျဲၢ်အဘီၣ်,ဒီးစံးဝဲဒၣ်,တၢ်အံၤမ့ၢ်ယနီၢ်ခိလၢအဘၣ်တၢ်ဟ့ၣ်လီၤကွံာ်အီၤလၢသုဂီၢ်လီၤ.မၤတၢ်အံၤလၢသုသ့ၣ်နီၣ်ထီၣ်က့ၤယၤအဂ့ၢ်န့ၣ်တက့ၢ်. 20လၢအအီၣ်တၢ်အီၣ်လၢဟါအီၣ်အလီၢ်ခံဒီး,လီခီဒ်န့ၣ်အသိးစ့ၢ်ကီး,ဒီးစံးဝဲဒၣ်,လီခီအံၤမ့ၢ်တၢ်အၢၣ်လီၤအီလီၤအသီလၢယသွံၣ်လၢအဘၣ်တၢ်ဂၢ်လီၤအီၤလၢသုဂီၢ်လီၤ.

21ဘၣ်ဆၣ်ဒီးကွၢ်ကွၢ်,ပှၤလၢအကဟ့ၣ်လီၤကွံာ်ယၤတဂၤ,အစုအိၣ်ဒီးယၤလၢစီၢ်နီၤခိၣ်အဖီခိၣ်လီၤ. 22မ့ၢ်မးပှၤကညီဖိခွါအံၤလဲၤတၢ်ဒ်တၢ်စံၣ်ညီၣ်ပာ်ဝဲအသိးန့ၣ်လီၤ.ဘၣ်ဆၣ်ဒီးပှၤလၢအဟ့ၣ်လီၤကွံာ်အီၤတဂၤန့ၣ်,ဘၣ်အဖှီၣ်လီၤ. 23ဒီးမ့ၢ်မတၤမတၤလၢအကျါကမၤတၢ်န့ၣ်တမံၤဒီး,အဝဲသ့ၣ်သံကွၢ်လိာ်အသးလီၤ.

24ဒီးမ့ၢ်မတၤမတၤလၢအကျါကဘၣ်တၢ်ပာ်အီၤလၢအဒိၣ်ကတၢၢ်တဂၤဒီး,အဝဲသ့ၣ်ဂ့ၢ်လိာ်ဘှီလိာ်အသးစ့ၢ်ကီးလီၤ. 25ဒီးအဝဲဒၣ်စံးဘၣ်အီၤ,ပှၤကလုာ်တဖၣ်အစီၤပၤန့ၣ်ကဲကစၢ်လၢအဖီခိၣ်လီၤ.ဒီးပှၤအိၣ်ဒီးအစိအကမီၤန့ၣ်,ပှၤကိးလၢပှၤမၤဂ့ၤတၢ်န့ၣ်လီၤ. 26မ့မ့ၢ်သုဝဲသ့ၣ်အံၤတဒ်န့ၣ်အသိးဘၣ်.ပှၤလၢအဒိၣ်တက့ၢ်ဝဲလၢသုကျါန့ၣ်,မ်အကဲထီၣ်ဒ်အဆံးတဂၤအသိးတက့ၢ်.ဒီးပှၤအခိၣ်တဂၤ,မ်အကဲထီၣ်ဒ်တၢ်အခ့အပှၤအသိးတက့ၢ်. 27အဂ့ၢ်ဒ်အံၤ,ပှၤလၢအဒိၣ်တက့ၢ်မ့ၢ်ဖဲလဲၣ်တဂၤလဲၣ်.မ့ၢ်ပှၤလၢအဆ့ၣ်နီၤသန့ၤအီၣ်တၢ်လၢမ့ၤလၣ်ထံးမ့ၢ်တၢ်အခ့အပှၤလဲၣ်.မ့ၢ်ပှၤလၢအဆ့ၣ်နီၤလၢမ့ၤလၣ်ထံးန့ၣ်တမ့ၢ်ဘၣ်ဧါ.မ့မ့ၢ်ယဲဒၣ်အံၤ,ယအိၣ်လၢသုကျါဒ်တၢ်အခ့အပှၤအသိးလီၤ. 28ဒီးလၢယဘၣ်တၢ်လ့ပစီတဖၣ်အပူၤန့ၣ်,သုမ့ၢ်ပှၤလၢအအိၣ်ဝဲဆိးဝဲဒီးယၤလီၤ. 29ဒီးယပာ်လီၤန့ၢ်သုလၢဘီမုၢ်ဒ်ယပၢ်ပာ်လီၤန့ၢ်ယၤအသိး, 30ဒ်သိးသုကဆ့ၣ်နီၤအီၣ်တၢ်ဒီးအီတၢ်လၢယမ့ၤလၣ်ထံးလၢယဘီယမုၢ်အပူၤ,ဒီးသုကဆ့ၣ်နီၤလၢလီၢ်ပစိာ်အဖီခိၣ်,ဒီးစံၣ်ညီၣ်အံၣ်စရ့လးတဆံခံဒူၣ်န့ၣ်လီၤ. 31ဒီးကစၢ်န့ၣ်စံးဝဲဒၣ်,စီၤၡံမိၣ်ဧၢ,စီၤၡံမိၣ်ဧၢ,ကွၢ်ကွၢ်,မုၣ်ကီၤလံၢ်ဃ့ဂုၤသုဒ်ဘုအသိးန့ၣ်လီၤ. 32မ့မ့ၢ်ယဲဒၣ်အံၤ,ဒ်သိးနတၢ်နာ်သုတဟးဂီၤကွံာ်တဂ့ၤဒီး,ယဘါထုကဖၣ်န့ၢ်လံလၢနဂီၢ်လံ.ဒီးတုၤနဃၣ်လိၤက့ၤနသးဒီး,ဒုးဆူၣ်ထီၣ်နဒီပုၢ်ဝဲၢ်အဂံၢ်အဘါတက့ၢ်.

33ဒီးအဝဲဒၣ်စံးဘၣ်အီၤ,ကစၢ်ဧၢ,ဆူဃိာ်ပူၤမ့ၢ်ဂ့ၤ,ဆူတၢ်သံအပူၤမ့ၢ်ဂ့ၤ,ယအိၣ်ကတီၤလံယသးလၢယကလဲၤဃုာ်ဒီးနၤလီၤ. 34ဒီးစံးဝဲဒၣ်,စီၤပ့းတရူးဧၢ,ယစံးဘၣ်နၤ,ခဲမုၢ်နၤအံၤဆီဖါတချုးအိၣ်အိထီၣ်ဒံးဘၣ်ဒီး,နကသမၢယၤ,လၢနတသ့ၣ်ညါဘၣ်ယၤဘၣ်,သၢစုလီၤ.

35ဒီးစံးဘၣ်အဝဲသ့ၣ်,ဖဲယမၢသုလဲၤတၢ်တအိၣ်ဘၣ်ဒီးစ့အထၢၣ်,တၢ်အီၣ်အထၢၣ်,ဒီးခီၣ်ဖံးတဖၣ်ဒီး,သုတၢ်တလၢတပှဲၤဘၣ်န့ၣ်အိၣ်တမံၤမံၤဧါ.ဒီးအဝဲသ့ၣ်စံးဝဲဒၣ်,တအိၣ်ဘၣ်နီတမံၤဘၣ်. 36ဒီးစံးဘၣ်အီၤ,မ့မ့ၢ်ခဲကနံၣ်အံၤ,ပှၤအိၣ်ဒီးစ့အထၢၣ်န့ၣ်,မ်အဟံးန့ၢ်အီၤတက့ၢ်.ဒ်န့ၣ်အသိး,တၢ်အီၣ်အထၢၣ်လီၤ.ဒီးပှၤလၢအနးတအိၣ်ဘၣ်န့ၣ်,မ်အဆါကွံာ်အယၣ်ဒီးပှ့ၤန့ၢ်တဘ့ၣ်တက့ၢ်. 37အဂ့ၢ်ဒ်အံၤ,ယစံးဘၣ်သုလၢတၢ်ကွဲးအသးအံၤ,တၢ်ဂံၢ်အီၤလၢပှၤမၤကမၣ်တၢ်ဖိအကျါ, ▼

▼22:37 ၡါ.၅၃း၁၂

ဘၣ်လၢထီၣ်ပှဲၤထီၣ်ဒံးလၢယပူၤလီၤ.အဂ့ၢ်ဒ်အံၤ,တၢ်လၢအဘၣ်ဃးဒီးယၤအံၤ,အိၣ်ဝဲဒီးအကတၢၢ်လီၤ.

38ဒီးအဝဲသ့ၣ်စံးဝဲဒၣ်,ကစၢ်ဧၢ,ကွၢ်ကွၢ်,နးခံဘ့ၣ်အိၣ်ဖဲအံၤလီၤ.ဒီးအဝဲဒၣ်စံးဘၣ်အီၤ,အါလံလီၤ.

39ဒီးဒ်အလုၢ်အလၢ်အသိးန့ၣ်,လဲၤဝဲဆူကစၢၢ်သ့ၣ်စၤယံးအလိၤ,ဒီးအပျဲၢ်အဘီၣ်ပိာ်ထီၣ်အခံလီၤ. 40ဒီးလဲၤတုၤဖဲအလီၢ်န့ၣ်ဒီးစံးဘၣ်အီၤ,ဒ်သိးသုသုတလဲၤနုာ်ဆူတၢ်လ့ပစီအပူၤတဂ့ၤဒီး,ဘါထုကဖၣ်တၢ်တက့ၢ်. 41ဒီးပာ်စီၤစုၤအသးဒီးအီၤယံၤတကွံာ်လၢၢ်ဃၣ်ဃၣ်,ဒီးချံးလီၤအခီၣ်ဒီးဘါထုကဖၣ်တၢ်, 42ဒီးစံးဝဲဒၣ်,ပၢ်ဧၢ,မ့ၢ်ဘၣ်နသးဒီး,တၢ်လၢလီခီအံၤ,မ်အလဲၤပူၤကွံာ်လၢယၤတက့ၢ်.ဘၣ်ဆၣ်ဒီးဖဲယသးဒၣ်ယဲတမ့ၢ်ဘၣ်,မ့ၢ်ဖဲဒၣ်နသးဒၣ်နဲတက့ၢ်.

43ဒီးကလူးလၢမူခိၣ်တဂၤလီၣ်ဖျါထီၣ်အသးလၢအီၤ,ဒီးဒုးဆူၣ်ထီၣ်အဂံၢ်အဘါလီၤ. 44ဒီးဘၣ်တၢ်ဖှီၣ်အိၣ်ဝဲတကဲဘၣ်ဒီး,ဘါထုကဖၣ်တၢ်သပှၢ်န့ၢ်အလီၢ်လီၤ.ဒီးတၢ်မၤအသးလၢအကပၢၤလီၤဝဲလၢဟီၣ်ခိၣ်အဖီခိၣ်,ဒ်တၢ်သွံၣ်လီၤစီၤအဖျၢၣ်ဖးဒိၣ်အသိးန့ၣ်လီၤ. 45ဒီးဂဲၤဆၢထၢၣ်လၢတၢ်ဘါထုကဖၣ်,ဒီးက့ၤဝဲဆူအပျဲၢ်အဘီၣ်အအိၣ်,ဒီးထံၣ်န့ၢ်လၢအမံသပ့ၤလၢတၢ်သးအုးအဃိ, 46ဒီးစံးဘၣ်အီၤ,သုမံသပ့ၤဘၣ်မနုၤလဲၣ်.ဂဲၤဆၢထၢၣ်ဒီးဘါထုကဖၣ်တၢ်,ဒ်သိးသုသုတလဲၤနုာ်ဆူတၢ်လ့ပစီအပူၤတဂ့ၤန့ၣ်တက့ၢ်.

47ဒီးကတိၤတၢ်အဖၢမုၢ်ဒီး,ကွၢ်ကွၢ်,ပှၤဂီၢ်မုၢ်,ဒီးပှၤအိၣ်လၢပှၤတဆံခံဂၤအကျါကိးဝဲလၢစီၤယူဒၤတဂၤဟဲလၢအမဲာ်ညါ,ဒီးလဲၤဆူယ့ၣ်ရှူးအအိၣ်ဒ်သိးအကနၢမူအီၤလီၤ. 48ဒီးယ့ၣ်ရှူးစံးဘၣ်အီၤ,စီၤယူဒၤဧၢ,နဟ့ၣ်လီၤကွံာ်ပှၤကညီဖိခွါလၢတၢ်နၢမူန့ၣ်ဧါ. 49ဒီးပှၤအိၣ်ဒီးအီၤထံၣ်တၢ်လၢအကမၤအသးဒီးစံးဘၣ်အီၤ,ကစၢ်ဧၢ,မ့ၢ်ပကကျီဒီးနးန့ၣ်ဧါ. 50ဒီးပှၤတဂၤကျီပှၤလုၢ်တၢ်အခိၣ်အခ့အပှၤတဂၤ,ဒီးအနၢ်ထွဲတခီတူာ်ကွံာ်ဝဲလီၤ. 51ဒီးယ့ၣ်ရှူးကတိၤဆၢတၢ်ဒီးစံးဝဲဒၣ်,ပှဲၤန့ၣ်လီၤ.ဒီးထိးဘၣ်အနၢ်,ဒီးမၤဘျါက့ၤအီၤလီၤ.

52ဒီးယ့ၣ်ရှူးစံးဘၣ်ပှၤလုၢ်တၢ်အခိၣ်ဒီးပှၤသုးဖိအခိၣ်ဘၣ်ဃးဒီးတၢ်လုၢ်အဟံၣ်,ဒီးပှၤသးပှၢ်သ့ၣ်တဖၣ်လၢအဟဲဆူအအိၣ်န့ၣ်,ဒ်ပှၤဖီၣ်န့ၢ်တၢ်ဘျၣ်အသိးဒီး,သုဟဲဒီးနး,ဒီးနီၣ်တီၢ်န့ၣ်ဧါ. 53လၢယအိၣ်ဒီးသုလၢတၢ်လုၢ်အဟံၣ်ပူၤသ့သ့တနံၤန့ၣ်,သုတယူာ်ထီၣ်သုစုလၢယလိၤဘၣ်.မ့မ့ၢ်ခဲကနံၣ်အံၤမ့ၢ်သုနၣ်ရံၣ်,ဒီးတၢ်ခံးအစိအကမီၤလီၤ.

54ဒီးအဝဲသ့ၣ်တဖၣ်ဟံးန့ၢ်အီၤဒီးဆှၢအီၤဆူပှၤလုၢ်တၢ်အခိၣ်အဟံၣ်ပူၤလီၤ.ဒီးစီၤပ့းတရူးပိာ်ထီၣ်အခံစီၤစုၤသကွ့ၤလီၤ.

55ဒီးပှၤဆိၣ်ကဲၤမ့ၣ်အူလၢဂၢၤပူၤ,ဒီးဆ့ၣ်နီၤအိၣ်ဝးတရံးဝဲ,ဒီးစီၤပ့းတရူးဆ့ၣ်နီၤလၢအကျါလီၤ. 56ဒီးတၢ်အခ့အပှၤပိာ်မုၣ်တဂၤထံၣ်လၢအဆ့ၣ်နီၤလၢမ့ၣ်အူကပီၤ,ဒီးကွၢ်ဝဲဒၣ်ထံထံဆးဆး,ဒီးစံးဝဲဒၣ်,ပှၤတဂၤအံၤမ့ၢ်အအိၣ်တ့ၢ်ဒီးအဝဲဒၣ်န့ၣ်လီၤ. 57ဒီးအဝဲဒၣ်သမၢဝဲဒီးစံးဝဲဒၣ်,နီၢ်ဧၢ,ယတသ့ၣ်ညါဘၣ်အီၤဘၣ်.

58ဒီးတစိၢ်ဖိပူၤကွံာ်,ပှၤတဂၤဒၣ်ထံၣ်အီၤဒီးစံးဝဲဒၣ်,နဲဒၣ်အံၤ,နဘၣ်ဃးစ့ၢ်ကီးဒီးပှၤတဖၣ်န့ၣ်လီၤ.ဒီးစီၤပ့းတရူးစံးဝဲဒၣ်,တမ့ၢ်ဘၣ်ယၤဘၣ်,စီဧၢ.

59ဒီးတနၣ်ရံၣ်ဃၣ်ဃၣ်ပူၤကွံာ်ဒီး,ပှၤတဂၤဒၣ်ကတိၤသပှၢ်တၢၢ်ဒီးစံးဝဲဒၣ်,အဝဲတဂၤအံၤမ့ၢ်အအိၣ်တ့ၢ်ဒီးအီၤနီၢ်နီၢ်လီၤ.အဂ့ၢ်ဒ်အံၤ,မ့ၢ်ပှၤကၤလံၤလါဖိလီၤ. 60ဒီးစီၤပ့းတရူးစံးဝဲဒၣ်,စီဧၢ,နစံးတၢ်န့ၣ်ယနၢ်တပၢၢ်ဘၣ်.ဒီးကတိၤတၢ်ဒ်န့ၣ်အဖၢမုၢ်ဒီး,ဆီဖါအိၣ်အိထီၣ်ဝဲတကီၢ်ခါလီၤ.

61ဒီးကစၢ်န့ၣ်ဃၣ်ဃီၤအသးဒီးကွၢ်စီၤပ့းတရူးလီၤ.ဒီးစီၤပ့းတရူးသ့ၣ်နီၣ်ထီၣ်က့ၤကစၢ်အကလုၢ်ဒ်အစံးဘၣ်အီၤအသိးန့ၣ်,လၢဆီဖါတချုးအိၣ်အိထီၣ်ဒံးဘၣ်ဒီး,နကသမၢယၤသၢစုလီၤ. 62ဒီးစီၤပ့းတရူးဟးထီၣ်ဆူခိ,ဒီးဟီၣ်ဟ့သးနးမးလီၤ.

63ဒီးပှၤကညီလၢအဟံးန့ၢ်ယ့ၣ်ရှူးတဖၣ်န့ၣ်ဒုၣ်ဒွဲၣ်အီၤ,ဒီးဝ့ၤအီၤတီၢ်အီၤလီၤ. 64ဒီးမၤဘၢဃာ်ဝဲအမဲာ်,ဒီးသံကွၢ်အီၤဒီးစံးဝဲဒၣ်,မ့ၢ်မတၤတီၢ်နၤတဂၤလဲၣ်.စံးဘၣ်တဲဘၣ်ပှၤလၢဝံအကျိာ်တက့ၢ်. 65ဒီးကတိၤဒုၣ်ဒွဲၣ်အီၤလၢတၢ်ကတိၤအဂုၤအဂၤအါမံၤလီၤ.

66ဒီးတုၤမုၢ်ဆ့ၣ်ထီၣ်ဒီး,ပှၤသူၣ်က့သးပှၢ်,ဒီးပှၤလုၢ်တၢ်အခိၣ်,ဒီးပှၤကွဲးလံာ်သ့ၣ်တဖၣ်အိၣ်ဖှိၣ်ရိဖှိၣ်,ဒီးလဲၤဆှၢအီၤဆူအစံၣ်ညီၣ်တၢ်အလီၢ်, 67ဒီးစံးဝဲဒၣ်,နမ့မ့ၢ်ခရံာ်ဒီး,စံးဘၣ်တဲဘၣ်ပှၤတက့ၢ်.ဒီးစံးဘၣ်အီၤ,ယမ့ၢ်စံးဘၣ်တဲဘၣ်နာ်သက့သုဒီး,သုတနာ်ဘၣ်တၢ်ဘၣ်. 68ဒီးယမ့ၢ်သံကွၢ်နာ်သက့သုဒီး,သုတကတိၤဆၢဘၣ်ယၤဘၣ်,ဒီးသုတပျၢ်ဘၣ်ယၤဘၣ်. 69တုၤအံၤဆူညါပှၤကညီဖိခွါအံၤကဆ့ၣ်နီၤလၢယွၤအစိအကမီၤစုထွဲလီၤ. 70ဒီးပှၤခဲလၢာ်စံးဝဲဒၣ်,မ့မ့ၢ်ဒ်န့ၣ်ဒီး,နမ့ၢ်ယွၤအဖိခွါဧါ.ဒီးအဝဲဒၣ်စံးဘၣ်အီၤ,သုစံးလၢယမ့ၢ်တၢ်န့ၣ်လီၤ. 71ဒီးပှၤတဖၣ်စံးဝဲဒၣ်,ပမၤဒံးတၢ်အုၣ်အသးအလီၢ်အိၣ်ဒ်လဲၣ်.အဂ့ၢ်ဒ်အံၤ,ပနၢ်ဟူလၢအထးခိၣ်ဒၣ်ဝဲလီၤ.