‏ Luke 5

1ဒီးတၢ်မၤအသးလၢပှၤဂီၢ်မုၢ်သနံးအီၤလၢအကနၢ်ဟူယွၤအကလုၢ်အကထါအဂီၢ်ဒီး,အဝဲဒၣ်အိၣ်ဆၢထၢၣ်လၢကွံကံးန့ရ့ၤသးအနံၤဒီး, 2ထံၣ်ကဘီခံဘ့ၣ်ထိးထီၣ်အသးလၢကွံအနံၤ,ဒီးပှၤမၤညၣ်တဖၣ်ဟးထီၣ်လၢအပူၤ,ဒီးသ့ကွံာ်အစၤလီၤ. 3ဒီးလဲၤနုာ်ဝဲလၢကဘီတဘ့ၣ်လၢအမ့ၢ်စီၤၡံမိၣ်အတၢ်,ဒီးဃ့ပှၤသုးစီၤစုၤထီၣ်ဒီးခိန့ၣ်တစဲး,ဒီးဆ့ၣ်နီၤဝဲလၢကဘီပူၤ,ဒီးသိၣ်က့ၤသီက့ၤပှၤဂီၢ်မုၢ်လီၤ.

4ဒီးဆိတ့ၢ်လၢအစံၣ်တဲၤတဲလီၤတၢ်,ဒီးစံးဘၣ်စီၤၡံမိၣ်,သုးဃီၤကဘီဆူထံယိာ်,ဒီးဒ်သိးသုကန့ၢ်အီၣ်ညၣ်ဒီး,ပျၢ်လီၤသုစၤတက့ၢ်. 5ဒီးစီၤၡံမိၣ်ကတိၤဆၢတၢ်ဒီးစံးဘၣ်အီၤ,ကစၢ်ဧၢ,ပမၤတ့ၢ်သီတနၤကျၢၤ,ဒီးပတန့ၢ်ဘၣ်တၢ်နီတမံၤဘၣ်.ဘၣ်ဆၣ်ဒီးမ့ၢ်နကလုၢ်အဃိဒီး,ယကပျၢ်လီၤစၤန့ၣ်လီၤ. 6ဒီးမၤဝဲဒ်န့ၣ်ဒီး,န့ၢ်ညၣ်ဂီၢ်မုၢ်ဖးဒိၣ်,ဒီးအစၤကယာ်တ့ၢ်ဒီး,ဒ်သိးအဂိၤမီၣ်အိၣ်လၢကဘီအဝဲတဘ့ၣ်အပူၤကဟဲမၤစၢၤအီၤဒီး,ဝၢ်ဃီၤအစုလီၤ. 7ဒီးအဝဲသ့ၣ်ဟဲဃီၤ,ဒီးမၤပှဲၤကဘီခံဘ့ၣ်န့ၣ်တုၤအကလီၤဘျၢတ့ၢ်လီၤ. 8ဒီးစီၤၡံမိၣ်ပ့းတရူးထံၣ်တၢ်ဒီး,တီၤလီၤကဒွံကျိာ်လၢယ့ၣ်ရှူးအခီၣ်လ့ၢ်ခိၣ်ဒီးစံးဝဲဒၣ်,ကစၢ်ဧၢ,ဟးထီၣ်စာ်လၢယအိၣ်တက့ၢ်.အဂ့ၢ်ဒ်အံၤ,ယမ့ၢ်ပှၤတၢ်ဒဲးဘးဖိလီၤ. 9အဂ့ၢ်ဒ်အံၤ,အဝဲဒၣ်ဒီးပှၤအိၣ်ဒီးအီၤခဲလၢာ်န့ၣ်ကမၢကမၣ်လၢအမၤန့ၢ်ညၣ်ဂီၢ်မုၢ်အဃိလီၤ. 10ဒီးစီၤစ့းဘ့းဒဲအဖိခွါ,စီၤယၤကိာ်ဒီးစီၤယိၤဟၣ်,လၢအမ့ၢ်စီၤၡံမိၣ်အဂိၤမီၣ်န့ၣ်,မၤစ့ၢ်ကီးအသးဒ်န့ၣ်အသိးလီၤ.ဒီးယ့ၣ်ရှူးစံးဘၣ်စီၤၡံမိၣ်,ပျံၤတၢ်တဂ့ၤ.တုၤအံၤဆူညါန့ၣ်,နကဖီၣ်န့ၢ်ပှၤကညီလီၤ. 11ဒီးတုၤအထိးထီၣ်အကဘီလၢခိဒီး,အဝဲသ့ၣ်ဟးသဒၣ်အတၢ်ခဲလၢာ်,ဒီးပိာ်ထီၣ်အခံလီၤ.

12ဒီးတၢ်မၤအသးဖဲအအိၣ်လၢဝ့ၢ်တဖျၢၣ်အပူၤဒီး,ကွၢ်ကွၢ်,ပှၤဘၣ်တၢ်ဆါအၢပှဲၤအလိၤဒီဂၤညါတဂၤထံၣ်ယ့ၣ်ရှူး,ဒီးတီၤလီၤကဒွံကျိာ်,ဒီးဃ့ကညးအီၤ,ဒီးစံးဝဲဒၣ်,ကစၢ်ဧၢ,နသးမ့ၢ်အိၣ်လၢနကမၤကဆှီထီၣ်က့ၤယၤဒီး,နမၤသ့လီၤ. 13ဒီးယူာ်ဃီၤအစုဒီးထိးဘၣ်အီၤ,ဒီးစံးဝဲဒၣ်,ယသးအိၣ်,မ်နကဆှီထီၣ်တက့ၢ်.ဒီးအတၢ်ဆါအၢန့ၣ်ဟးထီၣ်ကွံာ်လၢအလိၤတကီၢ်ခါလီၤ. 14ဒီးအဝဲဒၣ်မၤလိာ်အီၤ,လၢအသုတစံးဘၣ်ပှၤနီတဂၤတဂ့ၤ.မ့မ့ၢ်လဲၤဒုးနဲၣ်နသးလၢပှၤလုၢ်တၢ်အဒိၣ်,ဒီးဒ်သိးတၢ်အုၣ်အသးလၢအဝဲသ့ၣ်အမဲာ်ညါကအိၣ်ဒီး,မၤဘူၣ်တၢ်ဒ်စီၤမိၤရှ့မၤလိာ်အသိး,လၢနကဆှီထီၣ်အဃိတက့ၢ်.

15ဘၣ်ဆၣ်ဒီးအကစီၣ်ဟူထီသါလီၤအါထီၣ်တခီ,ဒီးပှၤဂီၢ်မုၢ်ဖးဒိၣ်ဟဲအိၣ်ဖှိၣ်ရိဖှိၣ်ဒ်သိးအကနၢ်ဟူတၢ်,ဒီးဒ်သိးအတၢ်ဆူးတၢ်ဆါကဘျါက့ၤလၢအစုပူၤလီၤ. 16ဒီးအဝဲဒၣ်ဟးထီၣ်ဆူပှၢ်လၢ်ကျါဒီးဘါထုကဖၣ်တၢ်လီၤ.

17ဒီးတၢ်မၤအသးလၢမုၢ်နံၤတနံၤအဝဲဒၣ်သိၣ်က့ၤသီက့ၤတၢ်အဖၢမုၢ်ဒီး,ပှၤဖၤရံၤၡဲ,ဒီးပှၤနဲၣ်လိတၢ်သိၣ်တၢ်သီ,လၢအဟဲတ့ၢ်ဝဲလၢကယဲၢ်ကၤလံၤလါဒီးကီၢ်ယူဒၤအသဝီတဖၣ်,ဒီးလၢယရူၤၡလ့ၣ်တဖၣ်န့ၣ်,ဆ့ၣ်နီၤအိၣ်ဝဲ,ဒီးကစၢ်အစိအကမီၤအိၣ်ဝဲလၢအကမၤဘျါက့ၤတၢ်လီၤ. 18ဒီးကွၢ်ကွၢ်,ပှၤပိာ်ခွါတဖၣ်ဟဲစိာ်ပှၤလၢအသံတခီပၤတဂၤလၢအလီၢ်မံပူၤ,ဒီးဃုဝဲဒ်သိးအကဟဲစိာ်ဒီးပာ်လီၤအီၤလၢအမဲာ်ညါလီၤ. 19ဒီးမ့ၢ်ပှၤဂီၢ်မုၢ်အိၣ်ဒီး,ကဟဲစိာ်နုာ်အီၤဒ်လဲၣ်ဒ်လဲၣ်န့ၣ်,ဃုဝဲတထံၣ်ဘၣ်ဒီး,လဲၤထီၣ်ဆူဟံၣ်ခိၣ်,ဒီးစဲၤလီၤအီၤဒီးအလီၢ်မံလၢအူးခဲဘ့ၣ်ဘၣ်အလီၢ်ထူၣ်ဖျိ,ဆူတၢ်သးကံၢ်ပူၤလၢယ့ၣ်ရှူးအမဲာ်ညါလီၤ. 20ဒီးထံၣ်အဝဲသ့ၣ်အတၢ်နာ်ဒီးစံးဝဲဒၣ်,စီဧၢ,နတၢ်ဒဲးဘးပျၢ်လံ. 21ဒီးပှၤကွဲးလံာ်ဒီးပှၤဖၤရံၤၡဲသ့ၣ်တဖၣ်မုန့ၣ်,ကူၣ်တၢ်ဖးတၢ်ဒီးစံးဝဲဒၣ်,ပှၤလၢအကတိၤကမၣ်ယွၤတဂၤအံၤ,မ့ၢ်မတၤလဲၣ်.လၢယွၤအမဲာ်ညါန့ၣ်,မ့ၢ်မတၤပျၢ်တၢ်ဒဲးဘးသ့တဂၤလဲၣ်. 22ဒီးယ့ၣ်ရှူးသ့ၣ်ညါအတၢ်ကူၣ်ထီၣ်ဖးလီၤ,ဒီးကတိၤဆၢတၢ်ဒီးစံးဘၣ်အီၤ,ဘၣ်မနုၤလၢသုကူၣ်တၢ်လၢသုသးကံၢ်ပူၤလဲၣ်. 23မ့ၢ်တၢ်ကတိၤညီဖဲလဲၣ်တမံၤလဲၣ်.မ့ၢ်ပကစံးလၢနတၢ်ဒဲးဘးပျၢ်လံ.မ့ၢ်ပကစံးလၢဂဲၤဆၢထၢၣ်ဟးတက့ၢ်န့ၣ်လဲၣ်. 24ဘၣ်ဆၣ်ဒီးဒ်သိးသုကသ့ၣ်ညါလၢပှၤကညီဖိခွါအံၤ,အိၣ်ဒီးအစိအကမီၤလၢဟီၣ်ခိၣ်ချၢလၢအကပျၢ်တၢ်ဒဲးဘးဒီး,စံးဘၣ်ပှၤလၢအသံတခီပၤတဂၤန့ၣ်,ယစံးဘၣ်နၤ,ဂဲၤဆၢထၢၣ်,ဒီးဟံးထီၣ်နလီၢ်မံ,ဒီးက့ၤက့ၤဆူနဟံၣ်တက့ၢ်. 25ဒီးဂဲၤဆၢထၢၣ်ဝဲတကီၢ်ခါ,လၢပှၤခဲလၢာ်အမဲာ်ညါ,ဒီးဟံးထီၣ်အလီၢ်မံ,ဒီးစံးထီၣ်ပတြၢၤယွၤ,ဒီးက့ၤက့ၤဝဲဆူအဟံၣ်လီၤ. 26ဒီးပှၤခဲလၢာ်ပာ်ထီၣ်အသးကမၢကမၣ်ဒီးစံးထီၣ်ပတြၢၤယွၤ,ဒီးတၢ်ပျံၤတၢ်ဖုးအိၣ်ပှဲၤအသး,ဒီးစံးဝဲဒၣ်,အအံၤတနံၤအံၤ,ပထံၣ်ဘၣ်လံတၢ်လီၤဆီလီၤလးမးလဲၣ်.

27ဒီးတၢ်မၤအသးတဖၣ်န့ၣ်အလီၢ်ခံဒီး,ဟးထီၣ်ကွံာ်ဝဲ,ဒီးထံၣ်ပှၤဃ့သွဲတဂၤအမံၤစီၤလ့ၤဝံ,ဆ့ၣ်နီၤဝဲလၢပှၤဃ့သွဲအလီၢ်,ဒီးစံးဘၣ်အီၤ,ပိာ်ယခံတက့ၢ်. 28ဒီးဂဲၤဆၢထၢၣ်ဝဲ,ဒီးဟးသဒၣ်အတၢ်ခဲလၢာ်,ဒီးပိာ်ထီၣ်အခံလီၤ.

29ဒီးစီၤလ့ၤဝံမၤတၢ်အီၣ်ဖးဒိၣ်လၢအဂီၢ်လၢအဟံၣ်ပူၤ,ဒီးပှၤဃ့သွဲဂီၢ်မုၢ်ဖးဒိၣ်,ဒီးပှၤအဂုၤအဂၤသ့ၣ်တဖၣ်န့ၣ်,ဆ့ၣ်နီၤသန့ၤဒီးအဝဲသ့ၣ်န့ၣ်လီၤ. 30ဒီးပှၤဖၤရံၤၡဲဒီးအပှၤကွဲးလံာ်တဖၣ်,ကဒူးကဒ့ၣ်တၢ်လၢအပျဲၢ်အဘီၣ်အလိၤ,ဒီးစံးဝဲဒၣ်,ဘၣ်မနုၤလၢသုအီၣ်ဃုာ်ဒီးအီဃုာ်တၢ်ဒီးပှၤဃ့သွဲ,ဒီးပှၤတၢ်ဒဲးဘးဖိတဖၣ်လဲၣ်. 31ဒီးယ့ၣ်ရှူးကတိၤဆၢတၢ်ဒီးစံးဘၣ်အီၤ,ပှၤလၢအအိၣ်ဆူၣ်အိၣ်ချ့,မၤကသံၣ်သရၣ်အလီၢ်တအိၣ်ဘၣ်.မ့မ့ၢ်အလီၢ်အိၣ်ပှၤလၢအမၤတကဲဘၣ်တဖၣ်န့ၣ်လီၤ. 32တမ့ၢ်ဘၣ်ယဟဲကိးက့ၤပှၤအတီအလိၤဘၣ်,မ့ၢ်ပှၤတၢ်ဒဲးဘးဖိ,လၢတၢ်ပီၢ်ယၢ်လီၤက့ၤအသးအဂ့ၢ်လီၤ.

33ဒီးပှၤတဖၣ်စံးဘၣ်အီၤ,ဘၣ်မနုၤလၢစီၤယိၤဟၣ်အပျဲၢ်အဘီၣ်ဒုၣ်တၢ်အီၣ်တၢ်အီဒီးမၤတၢ်ထုကဖၣ်အါစု,ဒီးဒ်န့ၣ်အသိးပှၤဖၤရံၤၡဲအပျဲၢ်အဘီၣ်စ့ၢ်ကီး,မ့မ့ၢ်နပျဲၢ်နဘီၣ်တဖၣ်အီၣ်တၢ်အီတၢ်လဲၣ်. 34ဒီးအဝဲဒၣ်စံးဘၣ်အီၤ,တၢ်လၢတလးမူးအပျဲၢ်န့ၣ်,ဖဲတလးမူးပိာ်ခွါအိၣ်ဒီးအီၤအဖၢမုၢ်ဒီး,သုမၢအဒုၣ်တၢ်အီၣ်တၢ်အီဘၣ်ကန့ၢ်ဧါ. 35ဘၣ်ဆၣ်ဒီးမုၢ်နံၤတဖၣ်ကဟဲဝဲ,ဖဲတၢ်ကထုးဖးတလးမူးပိာ်ခွါဒီးအီၤလီၤ.တုၤနုၤတစုကဒုၣ်တၢ်အီၣ်တၢ်အီလၢမုၢ်နံၤတဖၣ်န့ၣ်လီၤ. 36ဒီးစံးဘၣ်အီၤလၢတၢ်ကတိၤဒိ,တၢ်အကူအသိးလီၢ်လံၤန့ၣ်,ပှၤတဆးကျးဘၣ်လၢတၢ်ကူတၢ်သိးအသီန့ၣ်နီတဂၤဘၣ်.မ့ၢ်မၤဝဲဒ်န့ၣ်ဒီးတၢ်အသီမၤယာ်ဝဲ,ဒီးတၢ်လၢအသီဒီးတၢ်အလီၢ်လံၤန့ၣ်,တဘၣ်လိာ်ဘၣ်အသးဘၣ်. 37ဒီးတၢ်လၢထံဒၢတၢ်ဖံးလီၢ်လံၤအပူၤန့ၣ်,ပှၤတဒၢနုာ်ဘၣ်စပံးထံအသီနီတဂၤဘၣ်.ပှၤမ့ၢ်မၤဒ်န့ၣ်ဒီး,စပံးထံအသီကမၤသ့ၣ်ဖးထံဒၢတၢ်ဖံး,ဒီးစပံးထံကယွၤကွံာ်,ဒီးထံဒၢတၢ်ဖံးကဟးဂီၤကွံာ်ဝဲလီၤ. 38မ့မ့ၢ်တၢ်လၢစပံးထံအသီန့ၣ်,ပှၤဘၣ်ဒၢနုာ်အီၤလၢထံဒၢတၢ်ဖံးအသီ,ဒီးအိၣ်ဒၣ်တၢ်ခံမံၤလၢာ်လီၤ. 39ဒီးပှၤလၢအအီစပံးထံအလီၢ်လံၤန့ၣ်,တၢ်တမိၣ်အီဘၣ်အသးလၢအသီတကီၢ်ခါနီတဂၤဘၣ်.အဂ့ၢ်ဒ်အံၤ,စံးဝဲ,အလီၢ်လံၤန့ၣ်ဝံၣ်တက့ၢ်လီၤ.