‏ Luke 6

1ဒီးတၢ်မၤအသးလၢမုၢ်အိၣ်ဘှံးအနံၤဒူတ့းရီးပြီၤတူးအနံၤန့ၣ်,အဝဲဒၣ်လဲၤလၢစံာ်ပူၤ,ဒီးအပျဲၢ်အဘီၣ်ဒဲးဘုအစဲၤ,ဒီးလံာ်လူာ်လၢအစု,ဒီးအီၣ်ဝဲလီၤ. 2ဒီးပှၤဖၤရံၤၡဲတနီၤနီၤစံးဘၣ်အီၤ,တၢ်တဂ့ၤမၤဘၣ်လၢမုၢ်အိၣ်ဘှံးအနံၤန့ၣ်,ဘၣ်မနုၤလၢသုမၤလဲၣ်. 3ဒီးယ့ၣ်ရှူးကတိၤဆၢအီၤဒီး,စံးဝဲဒၣ်,စီၤဒၤဝံးတုၤတၢ်သၣ်ဝံၤအသးဒီးပှၤအိၣ်လၢအသိးတဖၣ်န့ၣ်,မၤဝဲဒ်လဲၣ်ဒ်လဲၣ်, 4ဖဲအလဲနုာ်ဆူယွၤအဟံၣ်ပူၤဒီးဟံးန့ၢ်အီၣ်တၢ်မဲာ်ညါအကိၣ်,လၢပှၤတဂ့ၤအီၣ်ဘၣ်နီတဂၤဘၣ်,ဂ့ၤအီၣ်ထဲပှၤလုၢ်တၢ်အဒိၣ်တဖၣ်ဧိၤ,ဒီးဟ့ၣ်အီၣ်စ့ၢ်ကီးပှၤအိၣ်ဒီးအီၤန့ၣ်,မ့ၢ်သုတဖးဒံးဘၣ်ဧါ. 5ဒီးစံးဘၣ်အီၤ,တၢ်လၢပှၤကညီဖိခွါအံၤ,မ့ၢ်မုၢ်အိၣ်ဘှံးအနံၤအကစၢ်စ့ၢ်ကီးလီၤ.

6ဒီးတၢ်မၤအသးလၢမုၢ်အိၣ်ဘှံးအနံၤလၢအဂၤတနံၤန့ၣ်,အဝဲဒၣ်လဲၤနုာ်ဆူဘူၣ်ဘျီၣ်ပူၤ,ဒီးသိၣ်က့ၤသီက့ၤတၢ်,ဒီးပှၤလၢအစုထွဲသံအိၣ်ဖဲန့ၣ်တဂၤလီၤ. 7ဒီးလၢအိၣ်ဘှံးအနံၤမ့ၢ်အကမၤဘျါက့ၤတၢ်,တမၤဘျါက့ၤတၢ်လဲၣ်န့ၣ်,ဒ်သိးအကထံၣ်န့ၢ်အလီၢ်လၢအကဆှိးအီၤဒီး,ပှၤကွဲးလံာ်ဒီးပှၤဖၤရံၤၡဲသ့ၣ်တဖၣ်ကွၢ်ဟုၣ်အီၤလီၤ. 8ဒီးအဝဲဒၣ်သ့ၣ်ညါအတၢ်ကူၣ်ထီၣ်ဖးလီၤ,ဒီးစံးဘၣ်ပှၤလၢအစုသံတဂၤန့ၣ်,ဂဲၤထၢၣ်,ဒီးဆၢထၢၣ်လၢတၢ်သးကံၢ်ပူၤတက့ၢ်.ဒီးအဝဲဒၣ်ဂဲၤထၢၣ်ဒီးဆၢထၢၣ်ဝဲလီၤ. 9အန့ၣ်ဒီး,ယ့ၣ်ရှူးစံးဘၣ်အီၤ,ယကသံကွၢ်သုလီၤ.လၢမုၢ်အိၣ်ဘှံးအနံၤန့ၣ်,ဂ့ၤမၤဒ်လဲၣ်.ဂ့ၤမၤဂ့ၤတၢ်,ဂ့ၤမၤအၢတၢ်လဲၣ်.ဂ့ၤအုၣ်က့ၤခီၣ်က့ၤပှၤကညီအသး,ဂ့ၤမၤသံပှၤကညီအသးလဲၣ်. 10ဒီးကွၢ်တရံးပှၤခဲလၢာ်,ဒီးစံးဘၣ်ပှၤတဂၤန့ၣ်,ယူာ်ထီၣ်နစုတက့ၢ်.ဒီးမၤဝဲဒ်န့ၣ်,ဒီးအစုဘျါက့ၤဒ်အဝဲတခီအသိးန့ၣ်လီၤ. 11ဒီးပှၤတဖၣ်န့ၣ်အသးဒိၣ်ထီၣ်ပှဲၤဆၢၣ်ကလာ်,ဒီးကမၤယ့ၣ်ရှူးဒ်လဲၣ်ဒ်လဲၣ်န့ၣ်,ကူၣ်လိာ်အသးသကိးသကိးလီၤ.

12ဒီးတၢ်မၤအသးလၢမုၢ်နံၤတဖၣ်န့ၣ်,အဝဲဒၣ်လဲၤဘါထုကဖၣ်တၢ်လၢကစၢၢ်တဖျၢၣ်အလိၤ,ဒီးအိၣ်ဝဲဖဲန့ၣ်,ဒီးဘါထုကဖၣ်ယွၤသီတနၤကျၢၤလီၤ. 13ဒီးတုၤမုၢ်ဆ့ၣ်ထီၣ်ဒီး,ကိးက့ၤအပျဲၢ်အဘီၣ်တဖၣ်ဆူအအိၣ်,ဒီးဃုထၢထီၣ်ပှၤတဆံခံဂၤလၢအကျါ,ဒီးယုၢ်ဝဲအမံၤလၢပှၤတၢ်မၢဖိလီၤ. 14စီၤၡံမိၣ်ကိးဝဲအမံၤလၢစီၤပ့းတရူးဒီးအဒီပုၢ်ဝဲၢ်စီၤအၣ်ဒရ့း,စီၤယၤကိာ်ဒီးစီၤယိၤဟၣ်,ဒီးစီၤဖံလံးပူးဒီးစီၤဘၢ်သလီးမဲ, 15စီၤမးသဲဒီးစီၤသိၤမါ,စီၤအၤလဖဲအဖိခွါစီၤယၤကိာ်ဒီးစီၤၡံမိၣ်ကိးက့ၤဝဲလၢစီၤစ့ၤလိၣ်, 16ဒီးစီၤယၤကိာ်အဒီပုၢ်ဝဲၢ်စီၤယူဒၤ,ဒီးပှၤလၢအဟ့ၣ်လီၤကွံာ်အီၤ,စီၤယူဒၤအံၣ်စကၤရံၤအိာ်လီၤ. 17ဒီးဟဲက့ၤလီၤဒီးအီၤလၢကစၢၢ်အလိၤ,ဒီးဆၢထၢၣ်လၢတၢ်အလီၢ်ပၢၤ,ဒီးအပျဲၢ်အဘီၣ်ဂီၢ်မုၢ်,ဒီးပှၤလၢကီၢ်ယူဒၤဒီကီၢ်ညါ,ဒီးလၢယရူၤၡလ့ၣ်,ဒီးလၢပီၣ်လဲၣ်နံၤဘူးဒီးစိၢ်ဒီးစံဒိၣ်သ့ၣ်တဖၣ်,ဂီၢ်မုၢ်ဖးဒိၣ်လၢအဟဲဒ်သိးအကနၢ်ဟူအကလုၢ်,ဒီးဒိးတၢ်မၤဘျါက့ၤအတၢ်ဆူးတၢ်ဆါ, 18ဒီးပှၤလၢအဘၣ်တၢ်မၤတံာ်တာ်အီၤလၢတၢ်နါတဖၣ်,ဒီးအဝဲဒၣ်မၤဘျါက့ၤအီၤလီၤ. 19ဒီးပှၤဂီၢ်မုၢ်ခဲလၢာ်ဂုာ်ထိးဘၣ်အီၤလီၤ.အဂ့ၢ်ဒ်အံၤ,အစိအကမီၤဟဲထီၣ်လၢအလိၤ,ဒီးမၤဘျါက့ၤပှၤခဲလၢာ်လီၤ. 20ဒီးယ့ၣ်ရှူးကွၢ်ထီၣ်အပျဲၢ်အဘီၣ်ဒီးစံးဝဲဒၣ်,ပှၤဖှီၣ်ဖိယာ်ဖိတဖၣ်အံၤ,ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤ,ယွၤအဘီအမုၢ်န့ၣ်မ့ၢ်သုတၢ်လီၤ.

21ပှၤလၢတၢ်သၣ်ဝံၤအသးခဲကနံၣ်အံၤသုဝဲသ့ၣ်အံၤ,သုဘၣ်ဆိၣ်ဂ့ၤလီၤ.အဂ့ၢ်ဒ်အံၤ,သုကအီၣ်ကုးအီပှဲၤလီၤ.ပှၤလၢအဟီၣ်ခဲကနံၣ်အံၤသုဝဲသ့ၣ်အံၤ,သုဘၣ်ဆိၣ်ဂ့ၤလီၤ.အဂ့ၢ်ဒ်အံၤ,သုကနံၤထီၣ်လီၤ. 22တုၤပှၤကညီသးဟ့သု,ဒီးတုၤအဟီထီၣ်ကွံာ်သု,ဒီးဒုၣ်ဒွဲၣ်သု,ဒီးညိကွံာ်သုမံၤဒ်တၢ်အၢအသိးလၢပှၤကညီဖိခွါအံၤအဃိဒီး,သုဘၣ်ဆိၣ်ဂ့ၤသုဝဲလီၤ. 23တၢ်လၢမုၢ်နံၤန့ၣ်,သးခုဒီးစံၣ်တက့ၢ်.အဂ့ၢ်ဒ်အံၤ,ကွၢ်ကွၢ်,သုဘျုးအိၣ်ဝဲလၢမူခိၣ်ဒိၣ်မးလီၤ.အဂ့ၢ်ဒ်အံၤ,အဝဲသ့ၣ်အပၢ်တဖၣ်န့ၣ်,မၤဝံတဖၣ်ဒ်န့ၣ်အသိးလီၤ. 24မ့မ့ၢ်သုဝဲသ့ၣ်လၢအထူးအတီၤတဖၣ်အံၤ,သုဘၣ်အဖှီၣ်လီၤ.အဂ့ၢ်ဒ်အံၤ,သုတၢ်မုာ်တၢ်ခုၣ်န့ၣ်သုန့ၢ်ဘၣ်လံ. 25ပှၤလၢအအီၣ်ကုးအီပှဲၤသုဝဲသ့ၣ်အံၤ,သုဘၣ်အဖှီၣ်လီၤ.အဂ့ၢ်ဒ်အံၤ,သုကအိၣ်ဝံၤအိၣ်စ့ၤလီၤ.ပှၤလၢအနံၤခဲကနံၣ်အံၤသုဝဲသ့ၣ်အံၤ,သုဘၣ်အဖှီၣ်လီၤ.အဂ့ၢ်ဒ်အံၤ,သုသူၣ်ကကၢ်သုသးကလီၤ,ဒီးသုကဟီၣ်လီၤ. 26တုၤပှၤကညီခဲလၢာ်စံးဂ့ၤသုဒီး,သုဘၣ်အဖှီၣ်လီၤ.အဂ့ၢ်ဒ်အံၤ,အဝဲသ့ၣ်အပၢ်တဖၣ်န့ၣ်မၤဝံလၢအလီတၢ်တဖၣ်,ဒ်န့ၣ်အသိးလီၤ.

27မ့မ့ၢ်ယဲဒၣ်အံၤ,ယစံးဘၣ်ပှၤလၢအနၢ်ဟူတၢ်သုဝဲသ့ၣ်အံၤ,အဲၣ်သုဒုၣ်သုဒါတက့ၢ်.ပှၤလၢအသးဟ့သုတဖၣ်န့ၣ်,မၤဂ့ၤအီၤတက့ၢ်. 28ပှၤလၢအဆိၣ်အၢသုတဖၣ်န့ၣ်,ဆိၣ်ဂ့ၤအီၤတက့ၢ်.ပှၤလၢအကတိၤတရီတပါသုတဖၣ်န့ၣ်,ဘါထုကဖၣ်န့ၢ်အဂီၢ်တက့ၢ်. 29ပှၤလၢအဒဲနဘိးတခီန့ၣ်,ဟ့ၣ်အီၤလၢအဝဲတခီတက့ၢ်.ဒီးပှၤလၢအဟံးန့ၢ်နယၣ်န့ၣ်,သုတတြီအဟံးန့ၢ်စ့ၢ်ကီးနဆ့တဂ့ၤ.

30ကယဲၢ်ပှၤလၢအဃ့တၢ်လၢနၤတဂၤလၢ်လၢ်န့ၣ်,ဟ့ၣ်အီၤတက့ၢ်.ဒီးပှၤလၢအဟံးန့ၢ်နတၢ်န့ၣ်,သုတဃ့ကဒါက့ၤတဂ့ၤ. 31ဒီးဒ်သုဆၢလၢပှၤကညီကမၤသုအသိးန့ၣ်,မၤအီၤဒ်န့ၣ်သိးတက့ၢ်.

32ဒီးသုမ့ၢ်အဲၣ်ပှၤလၢအအဲၣ်သုဒီး,မ့ၢ်သုဘျုးအိၣ်မနုၤလဲၣ်.အဂ့ၢ်ဒ်အံၤ,ပှၤတၢ်ဒဲးဘးဖိတဖၣ်အဲၣ်ပှၤလၢအအဲၣ်အီၤစ့ၢ်ကီးလီၤ. 33ဒီးသုမ့ၢ်မၤဂ့ၤပှၤလၢအမၤဂ့ၤသုတဖၣ်ဒီး,သုဘျုးအိၣ်မနုၤလဲၣ်.အဂ့ၢ်ဒ်အံၤ,ပှၤတၢ်ဒဲးဘးဖိတဖၣ်မၤဝဲဒ်န့ၣ်အသိးစ့ၢ်ကီးလီၤ. 34ဒီးသုမ့ၢ်ဒုးလိၢ်တၢ်လၢပှၤလၢသုမုၢ်လၢ်လၢအကလိးက့ၤဝဲတဖၣ်န့ၣ်ဒီး,မ့ၢ်သုဘျုးအိၣ်မနုၤလဲၣ်.အဂ့ၢ်ဒ်အံၤ,ပှၤတၢ်ဒဲးဘးဖိတဖၣ်ဒုးလိၢ်တၢ်လၢပှၤတၢ်ဒဲးဘးဖိ,ဒ်သိးအကန့ၢ်က့ၤဝဲပှဲၤသိးဒီးအလီၢ်စ့ၢ်ကီးလီၤ.

35လၢန့ၣ်အမဲာ်ညါအဲၣ်သုဒုၣ်သုဒါတဖၣ်,ဒီးမၤဂ့ၤတၢ်တက့ၢ်.ဒီးသုတမုၢ်လၢ်ဘၣ်လၢသုကဒိးန့ၢ်က့ၤတၢ်နီတမံၤဘၣ်ဒီး,ဒုးလိၢ်တၢ်တက့ၢ်.ဒီးသုကန့ၢ်ဘၣ်သုဘျုးဖးဒိၣ်,ဒီးသုကကဲထီၣ်တၢ်ထီကတၢၢ်အဖိခွါတဖၣ်လီၤ.အဂ့ၢ်ဒ်အံၤ,အဝဲဒၣ်န့ၣ်မၤဘျုးပှၤလၢအတသ့ၣ်ညါဘၣ်တၢ်ဘျုးဘၣ်,ဒီးပှၤအအၢအသီတဖၣ်လီၤ. 36မၤသးဒ်န့ၣ်ဒီး,ဒ်သုပၢ်သးကညီၤတၢ်အသိးန့ၣ်,သးကညီၤတၢ်သုဝဲစ့ၢ်ကီးတက့ၢ်.

37ဒီးသုတစံၣ်ညီၣ်တၢ်တဂ့ၤ,ဒီးတၢ်တစံၣ်ညီၣ်ဘၣ်သုဘၣ်.သုတစံၣ်ညီၣ်ဃၣ်တၢ်တဂ့ၤ,ဒီးတၢ်တစံၣ်ညီၣ်ဃၣ်ဘၣ်သုဘၣ်.ပျၢ်တၢ်တက့ၢ်.ဒီးတၢ်ကပျၢ်သုတၢ်လီၤ. 38ဟ့ၣ်တၢ်တက့ၢ်.ဒီးတၢ်ကဟ့ၣ်တၢ်လၢသုလီၤ.ပှၤကဃီၣ်ကစီဒီ,ကဆီၣ်လီၤဃာ်,ကဂံၤဂုၤ,ဒီးကမၤပှဲၤစိတရိၤ,ဒီးကဟ့ၣ်လီၤလၢသုသးနါပှၢ်လီၤ.အဂ့ၢ်ဒ်အံၤ,ဒ်သုဃီၣ်ဟ့ၣ်တၢ်အသိးန့ၣ်,တၢ်ကဃီၣ်ဟ့ၣ်က့ၤသုလီၤ.

39ဒီးကတိၤဒိတၢ်ဒီးစံးဘၣ်အီၤ,ပှၤမဲာ်ဘျီၣ်ဒုးနဲၣ်ကျဲလၢပှၤမဲာ်ဘျီၣ်ဘၣ်ကသ့ဧါ.ကလီၤတဲာ်ဆူတၢ်ပူၤခံဂၤလၢာ်,တမ့ၢ်ဘၣ်ဧါ. 40အပျဲၢ်န့ၣ်တအိၣ်ဘၣ်လၢအသရၣ်အဖီခိၣ်ဘၣ်.မ့မ့ၢ်ကယဲၢ်ပှၤလၢအလၢထီၣ်ပှဲၤထီၣ်တဂၤလၢ်လၢ်န့ၣ်,ကဒ်သိးဒီးအသရၣ်လီၤ.

41ကျိၤတဘိအိၣ်လၢနမဲာ်သၣ်ဒၣ်နဲအပူၤန့ၣ်,နတဆိကမိၣ်ဘၣ်ဒီး,ဘၣ်မနုၤလၢနကွၢ်ထံတၢ်အလ့ၣ်အဒ့လၢနဒီပုၢ်ဝဲၢ်အမဲာ်သၣ်ပူၤန့ၣ်လဲၣ်. 42နစံးဘၣ်နဒီပုၢ်ဝဲၢ်,ဒီပုၢ်ဝဲၢ်ဧၢ,ဟ့ၣ်ယခွဲးထီၣ်ကွံာ်တၢ်အလ့ၣ်အဒ့အိၣ်လၢနမဲာ်သၣ်ပူၤတက့ၢ်န့ၣ်,ကသ့ဒ်လဲၣ်.ပှၤလၢအလီတၢ်ဧၢ,ခွဲးထီၣ်ကွံာ်ဆိကျိၤတဘိအိၣ်လၢနမဲာ်သၣ်ဒၣ်နဲအပူၤတက့ၢ်.အန့ၣ်ဒီး,နကထံၣ်တၢ်ထံထံဆးဆးဒ်သိးနကခွဲးထီၣ်ကွံာ်တၢ်အလ့ၣ်အဒ့အိၣ်လၢနဒီပုၢ်ဝဲၢ်အမဲာ်သၣ်ပူၤန့ၣ်လီၤ.

43အဂ့ၢ်ဒ်အံၤ,သ့ၣ်လၢအဂ့ၤန့ၣ်တသၣ်ထီၣ်ဘၣ်လၢအအၢဘၣ်,ဒီးသ့ၣ်လၢအအၢန့ၣ်တသၣ်ထီၣ်ဘၣ်လၢအဂ့ၤဘၣ်. 44အဂ့ၢ်ဒ်အံၤ,သ့ၣ်တထံးလၢ်လၢ်န့ၣ်,ပှၤသ့ၣ်ညါအီၤလၢအသၣ်ဒၣ်ဝဲလီၤ.အဂ့ၢ်ဒ်အံၤ,လၢတၤဆှုၣ်အလိၤန့ၣ်,ပှၤတဒဲးဘၣ်စပံးသၣ်ဘၣ်,ဒီးလၢတၤဆှုၣ်သပှီၤအလိၤန့ၣ်,ပှၤတဒဲးဘၣ်ချၢၣ်ဒၢသၣ်ဘၣ်. 45ပှၤလၢအဂ့ၤန့ၣ်,ဟံးထီၣ်ဆံထီၣ်တၢ်ဂ့ၤလၢအပာ်ဖှိၣ်တၢ်အလီၢ်ဂ့ၤလၢအသးကံၢ်ပူၤလီၤ.ဒီးပှၤလၢအအၢန့ၣ်,ဟံးထီၣ်ဆံထီၣ်တၢ်အၢလၢအပာ်ဖှိၣ်တၢ်အလီၢ်အၢလၢအသးကံၢ်ပူၤလီၤ.အဂ့ၢ်ဒ်အံၤ,ဒ်တၢ်ပှဲၤပသးလုၣ်ကွံာ်အသိး,ပထးခိၣ်ကတိၤတၢ်လီၤ.

46ဒီးတၢ်လၢယမၤလိာ်သုန့ၣ်,သုတမၤဘၣ်ဒီး,ဘၣ်မနုၤလၢသုကိးယၤ,ကစၢ်ဧၢ,ကစၢ်ဧၢလဲၣ်. 47ကယဲၢ်ပှၤလၢအဟဲဆူယအိၣ်,ဒီးနၢ်ဟူယကလုၢ်ယကထါ,ဒီးမၤဝဲတဂၤလၢ်လၢ်န့ၣ်,မၤအသးဒ်တၢ်မနုၤမနုၤအသိးလဲၣ်န့ၣ်,ယကဒုးနဲၣ်သုလီၤ. 48မၤအသးဒ်ပှၤမၤဟံၣ်,ဒီးခူၣ်လီၤဝဲယိာ်,ဒီးပာ်လီၤအခီၣ်ထံးလၢလၢၢ်ခိၣ်အသိးန့ၣ်လီၤ.ဒီးထံထီၣ်,ဒီးထံဆူဘၣ်အဟံၣ်န့ၣ်,ဒီးမၤဟူးမၤဝးအီၤတသ့ဘၣ်.အဂ့ၢ်ဒ်အံၤ,အခီၣ်ထံးသူၣ်အသးလၢလၢၢ်ခိၣ်လီၤ. 49ဒီးပှၤလၢအနၢ်ဟူ,ဒီးတမၤဘၣ်ဝဲန့ၣ်,မၤအသးဒ်ပှၤလၢအမၤဟံၣ်လၢဟီၣ်ခိၣ်,ဒီးအခီၣ်ထံးတအိၣ်ဘၣ်အသိးလီၤ.ဒီးထံဆူဘၣ်အီၤ,ဒီးလီၤပှီၢ်ကွံာ်ဝဲတကီၢ်ခါ,ဒီးဟံၣ်အလီၤပှီၢ်ကွံာ်န့ၣ်နးမးလီၤ.