‏ Luke 8

1လၢခံက့ၤဒီးတၢ်မၤအသးလၢအလဲၤစံၣ်တဲၤတဲလီၤယွၤအဘီအမုၢ်အတၢ်သးခုအကစီၣ်လၢဝ့ၢ်ပူၤဒီးလၢသဝီပူၤ,တပူၤဘၣ်တပူၤကွ့ၢ်ကွ့ၢ်,ဒီးပှၤတဆံခံဂၤန့ၣ်လဲၤဒီးအီၤလီၤ. 2ဒီးပှၤလၢတၢ်နါအိၣ်လၢအလိၤ,ဒီးတၢ်ဆါအီၤပိာ်မုၣ်တနီၤနီၤ,လၢအဘၣ်တၢ်မၤဘျါက့ၤအီၤတဖၣ်,ပှၤလၢတၢ်နါနွံဒုဟးထီၣ်လၢအလိၤ,နီၢ်မၤရံကိးဝဲလၢပှၤမၤကဒၤလ့ၣ်ဖိတဂၤ, 3ဒီးစီၤဟ့ၤရိာ်အပှၤကွၢ်တၢ်ဖိ,စီၤဃူၤစါအမါနီၢ်ယိၤအၣ်နၣ်တဂၤ,ဒီးနီၢ်စူၤစၣ်နၤတဂၤ,ဒီးပိာ်မုၣ်အဂၤအါဂၤလၢအလုၢ်အီၣ်လုၢ်အီအီၤလၢအစုလီၢ်ခီၣ်ခိၣ်စ့ၢ်ကီးလီၤ.

4ဒီးပှၤဂီၢ်မုၢ်ဖးဒိၣ်အိၣ်ဖှိၣ်ရိဖှိၣ်,ဒီးပှၤလၢခူလၢဝ့ၢ်တဖၣ်ဟဲဆူအအိၣ်,ဒီးကတိၤဒိတၢ်ဒီးစံးဝဲဒၣ်, 5ပှၤလၢအဖှံတၢ်တဂၤန့ၣ်,လဲၤဖှံလီၤအတၢ်ချံလီၤ.ဒီးဖှံတၢ်န့ၣ်တနီၤနီၤလီၤဘၣ်ဝဲလၢကျဲအသရ့ၤ,ဒီးဘၣ်ယီၢ်ဘၣ်ခါ,ဒီးထိၣ်ဖိလံၣ်ဖိလၢမူကပိာ်လိၤထၢအီၣ်ကွံာ်အီၤလီၤ. 6ဒီးအဂၤတနီၤလီၤဘၣ်ဝဲလၢလၢၢ်ခိၣ်,ဒီးမ့ၢ်တၢ်တစီၣ်ဘၣ်သတးဒီး,တုၤအမဲထီၣ်န့ၣ်,ညွံးကွံာ်ဝဲဒၣ်လီၤ. 7ဒီးအဂၤတနီၤလီၤဘၣ်ဝဲလၢတၤဆှုၣ်တၤမဲအကျါ,ဒီးတၤဆှုၣ်တၤမဲန့ၣ်မဲထီၣ်ဃုာ်ဒီးအီၤ,ဒီးခဲဘၢကွံာ်အီၤလီၤ. 8ဒီးအဂၤတနီၤလီၤဘၣ်ဝဲလၢဟီၣ်ခိၣ်ဂ့ၤ,ဒီးမဲထီၣ်ဝဲ,ဒီးအသူၣ်အသၣ်အါန့ၢ်က့ၤအလီၢ်တကယၤလီၤ.စံးတၢ်ဒ်န့ၣ်ဒီး,ကိးပသူထီၣ်ဝဲ,ပှၤအိၣ်ဒီးအနၢ်လၢအနၢ်ဟူတၢ်န့ၣ်,မ်အနၢ်ဟူတၢ်တက့ၢ်.

9ဒီးအပျဲၢ်အဘီၣ်သံကွၢ်အီၤဒီးစံးဝဲ,တၢ်လၢတၢ်ကတိၤဒိန့ၣ်,မ့ၢ်အမ့ၢ်မနုၤလဲၣ်. 10ဒီးစံးဝဲဒၣ်,တၢ်ခူသူၣ်ဘၣ်ဃးဒီးယွၤအဘီအမုၢ်န့ၣ်,တၢ်ဟ့ၣ်သ့ၣ်ညါသုလီၤ.မ့မ့ၢ်ပှၤဂၤတဖၣ်န့ၣ်တၢ်ဟ့ၣ်အီၤလၢတၢ်ကတိၤဒိ,ဒ်သိးအကကွၢ်တၢ်ဒီးတထံၣ်ဘၣ်တၢ်,ဒ်သိးအကနၢ်ဟူတၢ်ဒီးအနၢ်တပၢၢ်ဘၣ်တၢ်လီၤ. ▼

▼8:10 ၡါ.၆း၉

11တၢ်ကတိၤဒိန့ၣ်မ့ၢ်အအံၤ,တၢ်ချံန့ၣ်မ့ၢ်ယွၤအကလုၢ်အကထါလီၤ. 12ဒီးတၢ်လၢကျဲအသရ့ၤန့ၣ်,မ့ၢ်ပှၤနၢ်ဟူဝဲ,တုၤနုၤတစုဒ်သိးအသုတနာ်,ဒီးသုတတုၤလၢတၢ်အုၣ်က့ၤခီၣ်က့ၤအီၤတဂ့ၤဒီး,မုၣ်ကီၤလံၢ်ဟဲထၢကွံာ်တၢ်အကလုၢ်န့ၣ်လၢအသးကံၢ်ပူၤလီၤ. 13ဒီးတၢ်လၢလၢၢ်ခိၣ်တဖၣ်မုန့ၣ်,မ့ၢ်ပှၤနၢ်ဟူဝဲ,ဒီးဒိးန့ၢ်တၢ်အကလုၢ်လၢအသူၣ်ခုအသးခု,ဒီးမ့ၢ်အဂံၢ်တအိၣ်ဘၣ်ဒီး,စူၢ်က့ၤနာ်က့ၤတၢ်တစိၢ်,ဒီးလၢတၢ်လ့ပစီအခါ,အသးဟးဂီၤဝဲတကူၢ်သ့ၣ်လီၤ. 14ဒီးတၢ်လီၤဘၣ်လၢတၤဆှုၣ်တၤမဲအကျါ,မ့ၢ်ပှၤနၢ်ဟူဝဲ,ဒီးလဲၤတၢ်,ဒီးမ့ၢ်တၢ်ဘၣ်ယိၣ်ဘၣ်ဘီ,ဒီးတၢ်ထူးတၢ်တီၤ,ဒီးတၢ်မုာ်လၤလၢခိအံၤမၤဘၢကွံာ်အီၤသတးဒီး,အသၣ်တကဲထီၣ်ဘၣ်တကူၢ်သ့ၣ်လီၤ. 15ဒီးတၢ်လၢဟီၣ်ခိၣ်ဂ့ၤတဖၣ်န့ၣ်,မ့ၢ်ပှၤလၢအနၢ်ဟူတၢ်အကလုၢ်န့ၣ်,ဒီးဒိးန့ၢ်ဝဲလၢအသးဂ့ၤ,ဒီးအသူၣ်ဂ့ၤအသးဝါ,ဒီးသၣ်ထီၣ်ဝဲလၢအသူၣ်စူၤအသးစူၤလီၤ.

16ပှၤဒွဲၣ်ထီၣ်မ့ၣ်အူဒၢ,ဒီးမၤဘၢဝဲလၢသပၢၤအဖီလာ်မ့ၢ်ဂ့ၤ,ပာ်လီၤဝဲလၢလီၢ်မံခးအဖီလာ်မ့ၢ်ဂ့ၤ,တအိၣ်ဘၣ်နီတဂၤဘၣ်.မ့ၢ်အပာ်ဝဲလၢမ့ၣ်အူဒၢအလီၢ်,ဒ်သိးပှၤလဲၤနုာ်တဖၣ်န့ၣ်,ကထံၣ်ဘၣ်အတၢ်ကပီၤလီၤ. 17အဂ့ၢ်ဒ်အံၤ,တၢ်အိၣ်လၢတၢ်တဒၢလၢအတအိၣ်ဖျါထီၣ်ဘၣ်န့ၣ်,တအိၣ်ဘၣ်နီတမံၤဘၣ်.တၢ်အိၣ်ခူသူၣ်လၢတၢ်တသ့ၣ်ညါထီၣ်ဘၣ်,ဒီးတဟဲဖျါထီၣ်ဘၣ်န့ၣ်,တအိၣ်ဘၣ်နီတမံၤဘၣ်လီၤ. 18မၤသးဒ်န့ၣ်ဒီး,သုနၢ်ဟူတၢ်ဒ်လဲၣ်ဒ်လဲၣ်န့ၣ်,ပလီၢ်သုသးတက့ၢ်.အဂ့ၢ်ဒ်အံၤ,ဖဲဒၣ်ပှၤလၢအတၢ်အိၣ်ဝဲန့ၣ်,တၢ်ကဟ့ၣ်တၢ်လၢအီၤလီၤ.ဒီးဖဲဒၣ်ပှၤလၢအတၢ်တအိၣ်ဘၣ်ဒီး,တၢ်လၢအဆိကမိၣ်လၢအအိၣ်န့ၣ်,တၢ်ကဟံးထီၣ်ကွံာ်လၢအီၤလီၤ.

19ဒီးအမိၢ်ဒီးအဒီပုၢ်ဝဲၢ်တဖၣ်ဟဲဆူအအိၣ်,ဒီးမ့ၢ်ပှၤဂီၢ်မုၢ်အိၣ်ဝဲဒီး,ဟဲတုၤလၢအအိၣ်တသ့ဘၣ်လီၤ. 20ဒီးပှၤစံးဘၣ်အီၤ,ဒီးစံးဝဲဒၣ်,နမိၢ်ဒီးနဒီပုၢ်ဝဲၢ်တဖၣ်တၢ်မိၣ်ထံၣ်ဘၣ်အသးလၢနၤ,ဒီးအိၣ်ဆၢထၢၣ်ဝဲလၢခိလီၤ. 21ဒီးအဝဲဒၣ်ကတိၤဆၢတၢ်ဒီးစံးဘၣ်အီၤ,ယမိၢ်ဒီးယဒီပုၢ်ဝဲၢ်တဖၣ်န့ၣ်,မ့ၢ်ပှၤလၢအနၢ်ဟူယွၤအကလုၢ်အကထါဒီးမၤဝဲတဖၣ်န့ၣ်လီၤ.

22ဒီးလၢမုၢ်နံၤတနံၤန့ၣ်,တၢ်မၤအသးလၢအလဲၤထီၣ်ဒီးအပျဲၢ်အဘီၣ်ဆူကဘီတဘ့ၣ်အပူၤဒီးစံးဘၣ်အီၤ,ခီဂာ်သကိးဆူကွံအဝၢ်ဘးခီတက့ၢ်.ဒီးလဲၤဝဲလီၤ. 23ဒီးခီဂာ်ဝဲအဖၢမုၢ်ဒီး,မံသပ့ၤဝဲလီၤ.ဒီးကလံၤမုၢ်ဟဲလီၤဆူၣ်ဆူၣ်ကလဲာ်လၢကွံပူၤ,ဒီးကဘီန့ၣ်ကပှဲၤတ့ၢ်,ဒီးအဝဲသ့ၣ်ကဟးဂီၤတ့ၢ်ဝဲလီၤ. 24ဒီးအပျဲၢ်အဘီၣ်ဟဲထိၣ်ဂဲၤအီၤဒီးစံးဝဲဒၣ်,ကစၢ်ဧၢ,ကစၢ်ဧၢ,ပကဟးဂီၤတ့ၢ်မးလဲၣ်.ဒီးအဝဲဒၣ်ဂဲၤဆၢထၢၣ်ဒီးဒူကလံၤဒီးထံအတပျုာ်တပျီၤအလိၤ,ဒီးတုာ်ဝဲဒီးအိၣ်က့ၤဂၢၢ်တပၢၢ်လီၤ. 25ဒီးစံးဘၣ်အီၤ,သုတၢ်နာ်အိၣ်ဖဲလဲၣ်.ဒီးပျံၤတၢ်ဒီးကမၢကမၣ်ဝဲတကူၢ်သ့ၣ်ဒီးစံးလိာ်အသး,ပှၤအံၤမ့ၢ်ပှၤဒ်လဲၣ်.မၤလိာ်ကလံၤဒီးထံ,ဒီးတၢ်စူၢ်မးအီၤလဲၣ်.

26ဒီးခီဂာ်ဝဲဆူပှၤကဒါရၤအကီၢ်လၢအအိၣ်လၢကၤလံၤလါအဝၢ်ဘးခီလီၤ. 27ဒီးယုၢ်လီၤလၢခိ,ဒီးပှၤလၢတၢ်နါအိၣ်လၢအလိၤဃဲးဃဲးတ့ၢ်တဂၤ,ဟဲသဂၢၢ်အီၤလၢဝ့ၢ်ပူၤဒီးတကူတသိးဘၣ်တၢ်ဘၣ်.ဒီးတအိၣ်တဆိးဘၣ်လၢဟံၣ်ပူၤဘၣ်.မ့မ့ၢ်အအိၣ်ဝဲလၢလိပူၤလီၤ. 28ဒီးထံၣ်ဘၣ်ယ့ၣ်ရှူး,ဒီးကဲးပသူထီၣ်,ဒီးတီၤလီၤကဒွံကျိာ်လၢအမဲာ်ညါ,ဒီးစံးဝဲဒၣ်လၢအကလုၢ်ဖးဒိၣ်,ယွၤတၢ်ထီကတၢၢ်အဖိခွါယ့ၣ်ရှူးဧၢ,တၢ်ဘၣ်ဃးဒီးပှၤဒီးနၤမ့ၢ်မနုၤတမံၤလဲၣ်ဒ်သိးနသုတမၤနးမၤဖှီၣ်ယၤတဂ့ၤဒီး,ယဃ့ကညးနၤလီၤ. 29အဂ့ၢ်ဒ်အံၤ,မၤလိာ်တ့ၢ်တၢ်နါဒ်သိးအကဟးထီၣ်ကွံာ်လၢပှၤန့ၣ်အလိၤလီၤ.အဂ့ၢ်ဒ်အံၤ,တၢ်နါဟံးဃာ်အီၤအါဘျီလံ,ဒီးဘၣ်တၢ်စၢဃာ်ဝဲလၢထးသွဲ,ဒီးဘၣ်တၢ်သိးဃာ်ဝဲ,ဒီးထုးထီၣ်တဲာ်ကွံာ်အတၢ်စၢဃာ်,ဒီးဘၣ်တၢ်ဟီထီၣ်ကွံာ်လၢတၢ်နါန့ၣ်,ဆူပှၢ်လၢ်ကျါလီၤ.

30ဒီးယ့ၣ်ရှူးသံကွၢ်အီၤဒီးစံးဝဲဒၣ်,နမံၤမ့ၢ်ဒ်လဲၣ်.ဒီးစံးဝဲဒၣ်,လ့းကူၣ်,အဂ့ၢ်ဒ်အံၤ,တၢ်နါအါဒုအိၣ်လၢအလိၤလီၤ. 31ဒီးဃ့ကညးအီၤ,ဒ်သိးအသုတမၤလိာ်အီၤလၢအကလဲၤလီၤဆူတၢ်ယိာ်ပူၤတဂ့ၤလီၤ. 32ဒီးဖဲအလီၢ်န့ၣ်,ထိးတဖုဖးဒိၣ်အီၣ်တၢ်လၢကစၢၢ်အလိၤ,ဒီးအဝဲသ့ၣ်ဃ့ညးဝဲဒ်သိးအကဒုးလဲၤနုာ်အီၤဆူအပူၤလီၤ.ဒီးဒုးလဲၤဝဲလီၤ. 33ဒီးတၢ်နါတဖၣ်ဟးထီၣ်ကွံာ်လၢပှၤတဂၤန့ၣ်အလိၤ,ဒီးလဲၤနုာ်ဆူထိးတဖၣ်အပူၤ,ဒီးထိးတဖုဃ့ၢ်စံၣ်လီၤလၢကၢၢ်ဖးထီအလိၤဆူကွံပူၤ,ဒီးလီၤအုးသံကွံာ်ဝဲလီၤ. 34ဒီးတုၤပှၤကွၢ်တၢ်တဖၣ်န့ၣ်,ထံၣ်တၢ်မၤအသးဒီး,က့ၤဃ့ၢ်ဝဲဒီးစံၣ်တဲၤတဲလီၤတၢ်န့ၣ်လၢဝ့ၢ်ပူၤ,ဒီးလၢပှၢ်လၢ်ကျါလီၤ. 35ဒီးပှၤဟးထီၣ်ဝဲဒ်သိးအကကွၢ်တၢ်မၤအသးတမံၤန့ၣ်,ဒီးဟဲဆူယ့ၣ်ရှူးအအိၣ်,ဒီးထံၣ်ပှၤလၢတၢ်နါဟးထီၣ်လၢအလိၤတဂၤ,ကူသိးတၢ်,ဒီးအသးသပှၢ်ထီၣ်က့ၤ,ဒီးဆ့ၣ်နီၤလၢယ့ၣ်ရှူးအခီၣ်ထံး,ဒီးပျံၤဝဲတကူၢ်သ့ၣ်လီၤ. 36ဒီးပှၤလၢတၢ်နါအိၣ်လၢအလိၤတဂၤ,ဘျါက့ၤဝဲဒ်လဲၣ်ဒ်လဲၣ်န့ၣ်,ပှၤထံၣ်ဝဲတဖၣ်စံးဘၣ်တဲဘၣ်အဝဲသ့ၣ်လီၤ. 37ဒီးပှၤဂီၢ်မုၢ်လၢအအိၣ်ဝးတရံးပှၤကဒါရၤဖိအထံအကီၢ်ခဲလၢာ်န့ၣ်,ဃ့ကညးအီၤဒ်သိးအကဟးထီၣ်လၢအအိၣ်လီၤ.အဂ့ၢ်ဒ်အံၤ,ပျံၤတၢ်ဒိၣ်မးလီၤ.ဒီးလဲၤနုာ်လၢကဘီပူၤဒီးက့ၤက့ၤဝဲလီၤ. 38ဒီးပှၤလၢတၢ်နါဟးထီၣ်လၢအလိၤတဂၤန့ၣ်,ဒ်သိးအကအိၣ်ဒီးအီၤဒီး,ဃ့ကညးဝဲလီၤ.ဘၣ်ဆၣ်ဒီးယ့ၣ်ရှူးပျၢ်ကွံာ်အီၤ,ဒီးစံးဝဲဒၣ်, 39က့ၤဆူနဟံၣ်ဒီးဖဲဒၣ်ယွၤမၤတၢ်လၢနဂီၢ်တဖၣ်န့ၣ်တဲဖျါထီၣ်တက့ၢ်.ဒီးလဲၤစံၣ်တဲၤတဲလီၤဝဲဒီဝ့ၢ်ညါ,လၢကယဲၢ်တၢ်လၢယ့ၣ်ရှူးမၤဝဲလၢအဂီၢ်န့ၣ်လီၤ.

40ဒီးတၢ်မၤအသးလၢယ့ၣ်ရှူးက့ၤတုၤဝဲဒီး,ပှၤဂီၢ်မုၢ်တဖၣ်တူၢ်လိာ်အီၤလီၤ.အဂ့ၢ်ဒ်အံၤ,မ့ၢ်အအိၣ်ကွၢ်လၢ်အကျဲခဲလၢာ်လီၤ. 41ဒီးကွၢ်ကွၢ်,ပှၤဘူၣ်ဘျီၣ်အခိၣ်,အမံၤစီၤယၤအ့ၤရူးတဂၤ,ဟဲတီၤလီၤလၢယ့ၣ်ရှူးအခီၣ်ထံး,ဒီးဃ့ကညးအီၤဒ်သိးအကဟဲဆူအဟံၣ်လီၤ. 42အဂ့ၢ်ဒ်အံၤ,အဖိမုၣ်အိၣ်တဂၤဃီ,လၢအသးပှၢ်တဆံခံနံၣ်ဃၣ်ဃၣ်န့ၣ်,ကသံတ့ၢ်လီၤ.ဒီးလဲၤဝဲအဖၢမုၢ်ဒီးပှၤဂီၢ်မုၢ်တနံးထီၣ်အီၤလီၤ.

43ဒီးပိာ်မုၣ်တဂၤလၢအဆါသွံၣ်လီၤဝဲတဆံခံနံၣ်,လၢအဟ့ၣ်လီၤကွံာ်အတၢ်ခဲလၢာ်လၢကသံၣ်သရၣ်,ဒီးအဝဲသ့ၣ်မၤဘျါက့ၤအီၤတသ့ဘၣ်နီတဂၤဘၣ်, 44ဟဲလၢယ့ၣ်ရှူးအချၢဃံ,ဒီးထိးဘၣ်ဝဲအကူအသိးအသရ့ၤ,ဒီးအသွံၣ်လီၤန့ၣ်တုာ်က့ၤတကီၢ်ခါလီၤ. 45ဒီးယ့ၣ်ရှူးစံးဝဲဒၣ်,မ့ၢ်မတၤထိးဘၣ်ယၤတဂၤလဲၣ်.ဒီးပှၤခဲလၢာ်သမၢဝဲ,ဒီးစီၤပ့းတရူးဒီးပှၤအိၣ်လၢအသိးတဖၣ်စံးဝဲဒၣ်,ကစၢ်ဧၢ,ပှၤဂီၢ်မုၢ်တနံးဃာ်နၤဒီးနစံး,မ့ၢ်မတၤထိးဘၣ်ယၤတဂၤလဲၣ်န့ၣ်ဧါ. 46ဒီးယ့ၣ်ရှူးစံးဝဲဒၣ်,ပှၤတဂၤဂၤထိးဘၣ်လံယၤလံ.အဂ့ၢ်ဒ်အံၤ,ယသ့ၣ်ညါလၢတၢ်အစိအကမီၤဟးထီၣ်လၢယလိၤလီၤ.

47ဒီးတုၤပိာ်မုၣ်သ့ၣ်ညါလၢအအိၣ်တဒၢတသ့လၢၤဘၣ်ဒီး,ကနိးဝဲ,ဒီးဟဲတီၤလီၤလၢအခီၣ်ထံး,ဒီးမ့ၢ်အထိးဘၣ်အီၤလၢမနုၤအဂ့ၢ်လဲၣ်,ဒီးဘျါက့ၤဝဲတကီၢ်ခါဒ်လဲၣ်ဒ်လဲၣ်န့ၣ်စံးဘၣ်တဲဘၣ်အီၤလၢပှၤခဲလၢာ်အမဲာ်ညါလီၤ. 48ဒီးအဝဲဒၣ်စံးဘၣ်အီၤ,ဖိမုၣ်ဧၢ,ပာ်နသးခူတလ့ၢ်တက့ၢ်.နတၢ်နာ်မၤဘျါက့ၤလံနၤလံ.က့ၤမုာ်မုာ်တက့ၢ်.

49ကတိၤတၢ်န့ၣ်အဖၢမုၢ်ဒီး,ပှၤတဂၤဟဲလၢဘူၣ်ဘျီၣ်အခိၣ်အဟံၣ်,ဒီးစံးဘၣ်အီၤ,နဖိမုၣ်သံလံဝဲလံ.မၤတံာ်တာ်သရၣ်န့ၣ်တဂ့ၤ. 50ဒီးယ့ၣ်ရှူးနၢ်ဟူ,ဒီးကတိၤဆၢအီၤ,ဒီးစံးဝဲဒၣ်,ပျံၤတၢ်တဂ့ၤ,ထဲနာ်တၢ်တက့ၢ်,ဒီးကဘၣ်တၢ်အုၣ်က့ၤခီၣ်က့ၤအီၤလီၤ. 51ဒီးလဲၤဝဲတုၤလၢဟံၣ်,ဒီးတဒုးလဲၤနုာ်ဘၣ်ပှၤနီတဂၤဘၣ်,ဒုးလဲၤနုာ်ထဲစီၤပ့းတရူး,စီၤယိၤဟၣ်,ဒီးစီၤယၤကိာ်,ဒီးပိာ်မုၣ်ဖိသၣ်အမိၢ်အပၢ်သ့ၣ်တဖၣ်ဧိၤလီၤ. 52ဒီးပှၤခဲလၢာ်ဟီၣ်တၢ်ယၢၤတၢ်,ဒီးအဝဲဒၣ်စံးဝဲ,ဟီၣ်တဂ့ၤ,အဂ့ၢ်ဒ်အံၤ,တသံဘၣ်.မ့ၢ်အမံသပ့ၤဝဲလီၤ. 53ဒီးပှၤတဖၣ်န့ၣ်သ့ၣ်ညါဝဲလၢအသံဒီး,နံၤဘၣ်ဖၣ်လဲအီၤလီၤ. 54ဒီးအဝဲဒၣ်ဟီထီၣ်ကွံာ်ပှၤခဲလၢာ်ဆူခိ,ဒီးဟံးဃာ်ပိာ်မုၣ်ဖိသၣ်အစု,ဒီးကိးပသူထီၣ်ဒီးစံးဝဲဒၣ်,ပိာ်မုၣ်ဖိသၣ်ဧၢ,ဂဲၤဆၢထၢၣ်တက့ၢ်. 55ဒီးအသးဟဲက့ၤဝဲ,ဒီးဂဲၤဆၢထၢၣ်တကီၢ်ခါလီၤ.ဒီးမၤလိာ်ဝဲဒ်သိးပှၤကဟ့ၣ်ဒုးအီၣ်အတၢ်လီၤ. 56ဒီးအမိၢ်အပၢ်ပာ်မးအသးကမၢကမၣ်လီၤ.ဒီးတၢ်မၤအသးန့ၣ်,ဒ်သိးအသုတစံးဘၣ်တဲဘၣ်ပှၤနီတဂၤတဂ့ၤဒီး,မၤလိာ်အီၤလီၤ.