‏ Luke 1

1တၢ်ဒိၣ်သီးဖံၤလူးဧၢ,တၢ်တဖၣ်လၢအဘၣ်တၢ်နာ်အီၤသပှၢ်တၢၢ်လၢပကျါ, 2ဒ်ပှၤလၢအထံၣ်တၢ်လၢအမဲာ်ဒီးမၤအကလုၢ်အကထါအတၢ်မၤလၢအခီၣ်ထံးလံၤလံၤ,ဟ့ၣ်လီၤပှၤအသိး,အကူၢ်မ့ၢ်ပှၤအါဂၤပာ်တ့ၢ်အသးလၢအကကတီၤကွဲးဝဲဒီး, 3ယဲဒၣ်အံၤလၢအခီၣ်ထံးလံၤလံၤယဃုတိၢ်န့ၢ်တၢ်န့ၣ်ခဲလၢာ်လီၤတံၢ်လီၤဆဲးဒီး,ဘၣ်ယသးလၢယကကွဲးန့ၢ်နၤ, 4တမံၤဘၣ်တမံၤ,ဒ်သိးနကသ့ၣ်ညါလၢတၢ်လၢနမၤလိတ့ၢ်တဖၣ်န့ၣ်,မ့ၢ်တၢ်အမ့ၢ်အတီလီၤ.

5လၢကီၢ်ယူဒၤအစီၤပၤဟ့ၤရိာ်အစိၤန့ၣ်,မတၤတဂၤပှၤလုၢ်တၢ်အဒိၣ်လၢစီၤအဘံယၤတစိၣ်အကျါ,အမံၤမ့ၢ်စီၤစဃၤရံ,အိၣ်ဝဲတဂၤ,ဒီးအမါမ့ၢ်လၢစီၤအၤဟရိၣ်အဖိမုၣ်အကျါ,ဒီးအမံၤမ့ၢ်နီၢ်အ့းလံၤစါဘ့းလီၤ. 6ဒီးတီဝဲလိၤဝဲလၢယွၤအမဲာ်ညါခံဂၤလၢာ်,ဒီးလဲၤဝဲလၢယွၤအတၢ်မၤလိာ်,ဒီးအတၢ်တီတၢ်လိၤခဲလၢာ်အပူၤ,ဒီးပာ်တၢ်ကမၣ်လၢအလိၤအလီၢ်တအိၣ်ဘၣ်လီၤ. 7ဒီးအဖိတအိၣ်ဘၣ်.အဂ့ၢ်ဒ်အံၤ,နီၢ်အ့းလံၤစါဘ့းန့ၣ်မ့ၢ်ပှၤတူာ်ဖိ,ဒီးသးပှၢ်သဃဲးတ့ၢ်ဝဲခံဂၤလၢာ်လီၤ.

8ဒီးတၢ်မၤအသးလၢအမၤပှၤလုၢ်တၢ်အဒိၣ်အတၢ်မၤလၢအတီၤအတစိၣ်ကျါလၢယွၤအမဲာ်ညါ,ဒ်ပှၤလုၢ်တၢ်အဒိၣ်တဖၣ်အလုၢ်အလၢ်အသိး,ဒီးဖးဝဲသတးဒီး, 9တုၤအလဲၤနုာ်ဆူယွၤအတၢ်လုၢ်ဟံၣ်ပူၤဒီး,ဘၣ်ဆိၣ်ကဲၤတၢ်နၢမူလီၤ. 10ဒီးနၣ်ရံၣ်လၢအဆိၣ်ကဲၤတၢ်နၢမူန့ၣ်,ပှၤဂီၢ်မုၢ်ခဲလၢာ်ဘါထုကဖၣ်တၢ်လၢခိလီၤ. 11ဒီးယွၤအကလူးတဂၤလီၣ်ဖျါထီၣ်အသးလၢအီၤ,ဒီးဆၢထၢၣ်ဝဲလၢတၢ်ဆိၣ်ကဲၤနၢမူအလီၢ်စုထွဲတခီလီၤ. 12ဒီးစီၤစဃၤရံထံၣ်ဘၣ်ဝဲ,ဒီးအသူၣ်ကိၢ်အသးဂီၤ,ဒီးဘၣ်ပျံၤဘၣ်ဖုးဝဲလီၤ. 13ဒီးကလူးန့ၣ်စံးဘၣ်အီၤ,စီၤစဃၤရံဧၢ,ပျံၤတၢ်တဂ့ၤ,အဂ့ၢ်ဒ်အံၤ,တၢ်နၢ်ဟူတ့ၢ်လံနတၢ်ထုကဖၣ်,ဒီးနမါနီၢ်အ့းလံၤစါဘ့းကဆံးစၢ်န့ၢ်နဖိခွါ,ဒီးနဘၣ်ယုၢ်အမံၤလၢစီၤယိၤဟၣ်လီၤ. 14ဒီးကမ့ၢ်တၢ်သူၣ်ခုသးခု,သူၣ်ဖှံသးညီလၢနဂီၢ်,ဒီးပှၤကသူၣ်ခုသးခုလၢအအိၣ်ဖျဲၣ်အဂ့ၢ်န့ၣ်အါဂၤလီၤ. 15အဂ့ၢ်ဒ်အံၤ,ကမ့ၢ်ပှၤအဒိၣ်လၢယွၤအမဲာ်ညါ,ဒီးစပံးထံဒီးတၢ်မူၤပှၤန့ၣ်,တဘၣ်အီဘၣ်ဝဲဘၣ်.ဒီးလၢအမိၢ်အဟၢဖၢပူၤလံၤလံၤန့ၣ်,ကလၢပှဲၤဝဲဒီးသးစီဆှံလီၤ. 16ဒီးကဘိးဃၣ်က့ၤပှၤအံၣ်စရ့လးဖိအါဂၤဆူအကစၢ်ယွၤအအိၣ်လီၤ. 17ဒီးကလဲၤဝဲလၢအမဲာ်ညါလၢစီၤအ့ၤလံယၤအသူၣ်အသးဒီးအစိအကမီၤ,ဒ်သိးအကဘိးဃၣ်က့ၤပၢ်တဖၣ်အသးဆူဖိအအိၣ်,ဒီးပှၤတစူၢ်ဘၣ်တၢ်န့ၣ်ဆူပှၤတီပှၤလိၤအတၢ်ကူၣ်သ့, ▼

▼1:17 မၤ.၄း၅,၆

ဒ်သိးအကကတဲာ်ကတီၤပှၤမၤက့ၤအသးတကလုာ်လၢကစၢ်အဂီၢ်လီၤ.

18ဒီးစီၤစဃၤရံစံးဘၣ်ကလူးန့ၣ်,တၢ်အံၤမ့ၢ်ယကသ့ၣ်ညါဒ်လဲၣ်.အဂ့ၢ်ဒ်အံၤ,ယဲဒၣ်အံၤ,ယမ့ၢ်ပှၤသးပှၢ်,ဒီးယမါန့ၣ်အသးပှၢ်သဃဲးတ့ၢ်လံန့ၣ်လီၤ. 19ဒီးကလူးန့ၣ်ကတိၤဆၢတၢ်ဒီးစံးဘၣ်အီၤ,ယဲဒၣ်အံၤယမ့ၢ်ကၤဘြံၤအ့လး,လၢအဆၢထၢၣ်လၢယွၤအမဲာ်ညါ,ဒီးတၢ်မၢယဟဲကတိၤတၢ်ဒီးနၤ,ဒီးစံးဘၣ်တဲဘၣ်နၤလၢတၢ်သးခုအကစီၣ်အံၤလီၤ. 20ဒီးကွၢ်ကွၢ်,မ့ၢ်နတနာ်ဘၣ်ယကလုၢ်လၢအကလၢထီၣ်ပှဲၤထီၣ်ဖဲအကတီၢ်န့ၣ်ဒီး,လၢအတချုးမၤဒံးဘၣ်အသးဒီး,နကတိၤတၢ်တသ့လၢၤဘၣ်,ဒီးနကအိၣ်တအုၣ်လီၤ.

21ဒီးပှၤဂီၢ်မုၢ်ကွၢ်လၢ်စီၤစဃၤရံအကျဲ,ဒီးမ့ၢ်အအိၣ်ဃဲးဃဲးလၢတၢ်လုၢ်ဟံၣ်ပူၤဒီး,ကမၢကမၣ်ဝဲတကူၢ်သ့ၣ်လီၤ. 22ဒီးဟဲက့ၤထီၣ်ဝဲ,ဒီးကတိၤတၢ်ဒီးအီၤတသ့ဘၣ်ဒီးအဝဲသ့ၣ်သ့ၣ်ညါလၢအထံၣ်တၢ်လၢညါခီလၢတၢ်လုၢ်အဟံၣ်ပူၤ,ဒီးအဝဲဒၣ်ကျၢၢ်ကျာ်တၢ်ဆူအဝဲသ့ၣ်အအိၣ်,ဒီးအိၣ်တအုၣ်ဝဲလီၤ.

23ဒီးတၢ်မၤအသးလၢအနံၤအသီလၢအမၤအတၢ်န့ၣ်လၢထီၣ်ပှဲၤထီၣ်ဒီး,က့ၤဝဲဆူအဟံၣ်လီၤ.

24ဒီးတၢ်လၢမုၢ်နံၤတဖၣ်န့ၣ်အလီၢ်ခံဒီး,အမါနီၢ်အ့းလံၤစါဘ့းဒၢထီၣ်,ဒီးပာ်ခူသူၣ်အသးယဲၢ်လါ,ဒီးစံးဝဲဒၣ်, 25ကစၢ်မၤယၤဒ်အံၤလၢမုၢ်နံၤတဖၣ်ဖဲအကွၢ်ယၤ,ဒ်သိးအကမၤပူၤမၤဖျဲးယၤလၢတၢ်ဒုၣ်ဒွဲၣ်လၢပှၤကညီအကျါလီၤ.

26ဒီးလၢဃုလါတလါအပူၤန့ၣ်,ယွၤမၢကလူးကၤဘြံၤအ့လးလဲၤဆူဝ့ၢ်တဖျၢၣ်လၢကၤလံၤလါအပူၤ,ကိးဝဲအမံၤလၢနစၤရ့း, 27ဆူပှၤမုၣ်ကနီၤအအိၣ်လၢအဘၣ်အဲၣ်တီဒီးပှၤလၢအမံၤမ့ၢ်စီၤယိၤသး,ဘၣ်ဃးဒီးစီၤဒၤဝံးအဟံၣ်လီၤ.ဒီးပှၤမုၣ်ကနီၤအမံၤမ့ၢ်နီၢ်မၤရံလီၤ. 28ဒီးကလူးလဲၤနုာ်ဆူအအိၣ်ဒီးစံးဝဲဒၣ်,ပှၤလၢအဘၣ်ဘျုးအါတဂၤဧၢ,ယွၤအိၣ်ဒီးနၤလီၤ.လၢပိာ်မုၣ်အကျါန့ၣ်နဘၣ်ဆိၣ်ဂ့ၤနဲလီၤ. 29ဒီးတုၤအထံၣ်ဝဲဒီး,အသူၣ်ကိၢ်အသးဂီၤလၢအတၢ်ကတိၤအဃိ,ဒီးမ့ၢ်တၢ်ကတိၤဒိၣ်ဒ်လဲၣ်ဒ်လဲၣ်န့ၣ်,ဆိကမိၣ်ဝဲဒၣ်လီၤ. 30ဒီးကလူးန့ၣ်စံးဘၣ်အီၤ,နီၢ်မၤရံဧၢ,ပျံၤတၢ်တဂ့ၤ,အဂ့ၢ်ဒ်အံၤ,နဘၣ်ဘျုးလၢယွၤလီၤ. 31ဒီးကွၢ်ကွၢ်,နကဒၢထီၣ်ဒီးနကဆံးစၢ်န့ၢ်နဖိခွါ,ဒီးနဘၣ်ယုၢ်အမံၤလၢယ့ၣ်ရှူးလီၤ. 32အဝဲဒၣ်န့ၣ်ကမ့ၢ်ပှၤအဒိၣ်,ဒီးကဘၣ်တၢ်ကိးအီၤလၢတၢ်ထီကတၢၢ်အဖိခွါလီၤ.ဒီးကစၢ်ယွၤကဟ့ၣ်အီၤလၢအပၢ်စီၤဒၤဝံးအလီၢ်ပစိာ်, 33ဒီးကပၢဘၣ်စီၤယၤကိၣ်အဟံၣ်အစိၤစိၤအဃၣ်ဃၣ်လီၤ.ဒီးအဘီအမုၢ်န့ၣ်အကတၢၢ်တအိၣ်ဘၣ်လီၤ.

34ဒီးနီၢ်မၤရံစံးဘၣ်ကလူးန့ၣ်,မ့ၢ်ယတသ့ၣ်ညါဘၣ်ပှၤပိာ်ခွါဘၣ်ဒီး,တၢ်အံၤကမၤအသးဒ်လဲၣ်. 35ဒီးကလူးန့ၣ်ကတိၤဆၢတၢ်ဒီးစံးဘၣ်အီၤ,သးစီဆှံကဟဲလီၤလၢနလိၤ,ဒီးတၢ်ထီကတၢၢ်အစိအကမီၤကကဒုဘၣ်နၤလီၤ.မၤသးဒ်န့ၣ်ဒီးတၢ်စီဆှံလၢအကအိၣ်ဖျဲၣ်ဝဲန့ၣ်,ကဘၣ်တၢ်ကိးအီၤလၢယွၤအဖိခွါစ့ၢ်ကီးလီၤ. 36ဒီးကွၢ်ကွၢ်,ပှၤဒီဘူးဒီတံၢ်ဒီးနၤ,နီၢ်အ့းလံၤစါဘ့းတဂၤ,လၢအသးပှၢ်သဃဲးတ့ၢ်ဝဲ,ဒၢထီၣ်စ့ၢ်ကီးလံအဖိခွါ,ဒီးအအံၤမ့ၢ်လါဃုလါတလါဒီးပှၤလၢတၢ်ကိးအီၤလၢပှၤတူာ်ဖိတဂၤန့ၣ်လီၤ. 37အဂ့ၢ်ဒ်အံၤ,တၢ်လၢယွၤမၤတသ့ဘၣ်န့ၣ်,တအိၣ်ဘၣ်နီတမံၤဘၣ်. 38ဒီးနီၢ်မၤရံစံးဝဲဒၣ်,ကွၢ်ကွၢ်,ကစၢ်အကုၢ်ပိာ်မုၣ်လီၤ.မ်တၢ်ကမၤအသးဒီးယၤဒ်နကလုၢ်အသိးန့ၣ်တက့ၢ်.ဒီးကလူးန့ၣ်ဟးထီၣ်ကွံာ်ဝဲလၢအအိၣ်လီၤ.

39ဒီးလၢမုၢ်နံၤတဖၣ်န့ၣ်,နီၢ်မၤရံဂဲၤဆၢထၢၣ်ဒီးလဲၤချ့သဒံးဝဲဆူကစၢၢ်ကလိအလီၢ်,ဆူဝ့ၢ်အိၣ်လၢကီၢ်ယူဒၤအဝ့ၢ်လီၤ. 40ဒီးလဲၤနုာ်ဆူစီၤစဃၤရံအဟံၣ်ပူၤဒီးကတိၤဒိၣ်နီၢ်အ့းလံၤစါဘ့းလီၤ. 41ဒီးလၢနီၢ်အ့းလံၤစါဘ့းနၢ်ဟူနီၢ်မၤရံအတၢ်ကတိၤဒိၣ်န့ၣ်ဒီး,တၢ်မၤအသးလၢအဖိဂဲၤဝဲလၢအဟၢဖၢပူၤလီၤ. 42ဒီးနီၢ်အ့းလံၤစါဘ့းလၢထီၣ်ပှဲၤထီၣ်ဝဲဒီးသးစီဆှံ,ဒီးကိးထီၣ်လၢအကလုၢ်ဖးဒိၣ်ဒီးစံးဝဲဒၣ်,လၢပိာ်မုၣ်အကျါန့ၣ်,နဘၣ်တၢ်ဆိၣ်ဂ့ၤနဲဒၣ်လီၤ.ဒီးနဟၢဖၢအတၤသၣ်န့ၣ်ဘၣ်ဆိၣ်ဂ့ၤဝဲလီၤ. 43တၢ်အံၤမၤအသးဒီးယၤလၢလဲၣ်,လၢယကစၢ်အမိၢ်ကဟဲဆူယအိၣ်အံၤလဲၣ်. 44အဂ့ၢ်ဒ်အံၤ,ကွၢ်ကွၢ်,လၢနတၢ်ကတိၤဒိၣ်ဟူဘၣ်ယနၢ်ပူၤဒီး,ဖိသၣ်အသူၣ်ဖှံအသးညီဒီးဂဲၤဝဲလၢယဟၢဖၢပူၤလီၤ. 45ဒီးပိာ်မုၣ်လၢအစူၢ်က့ၤနာ်က့ၤလၢတၢ်လၢယွၤစံးဘၣ်အီၤ,ကလၢထီၣ်ပှဲၤထီၣ်ဝဲန့ၣ်,ဘၣ်တၢ်ဆိၣ်ဂ့ၤဝဲလီၤ.

46ဒီးနီၢ်မၤရံစံးဝဲဒၣ်,ယသးအံၤပာ်ယွၤလၢတၢ်အဒိၣ်, 47ဒီးယသူၣ်ကပိၢ်ယသးကဝးလၢပှၤအုၣ်က့ၤခီၣ်က့ၤယၤ,ယွၤအပူၤလီၤ. 48အဂ့ၢ်ဒ်အံၤ,ကွၢ်က့ၤလံအကုၢ်ပိာ်မုၣ်အတၢ်ဖှီၣ်လံ.အဂ့ၢ်ဒ်အံၤ,ကွၢ်ကွၢ်,တုၤအံၤဆူညါဒီး,ပှၤအစိၤစိၤအဃၣ်ဃၣ်ခဲလၢာ်ကကိးယၤလၢပှၤဘၣ်တၢ်ဆိၣ်ဂ့ၤလီၤ. 49အဂ့ၢ်ဒ်အံၤ,ပှၤသ့တၢ်လၢာ်န့ၣ်,မၤတၢ်အဒိၣ်လၢယဂီၢ်,ဒီးအမံၤမ့ၢ်တၢ်စီဆှံလီၤ. 50ဒီးအတၢ်သူၣ်ကညီၤသးကညီၤအိၣ်ဝဲလၢပှၤလၢအပျံၤအီၤအလိၤအစိၤစိၤအဃၣ်ဃၣ်လီၤ. 51ဒီးမၤတၢ်စိတၢ်ကမီၤလၢအစု,ဒီးမၤလီၤပြံလီၤပြါပှၤလၢအပာ်ကဖိအသးတဖၣ်,လၢအတၢ်ကူၣ်ထီၣ်ဖးလီၤန့ၣ်လီၤ. 52ဒီးတ့ၢ်လီၤကွံာ်ပှၤအဒိၣ်တဖၣ်လၢအလီၢ်ပစိာ်အဖီခိၣ်,ဒီးပာ်ထီၣ်ထီပှၤလၢအဘၣ်ဖှီၣ်ဘၣ်ယာ်လီၤ. 53ပှၤလၢတၢ်သၣ်ဝံၤအသးန့ၣ်,ဒုးအီၣ်ဘျဲးအီၣ်ဝဲလၢတၢ်ဝံၣ်တၢ်ဆၢ,မ့မ့ၢ်ပှၤအထူးအတီၤန့ၣ်,ဒုးက့ၤကလီကလီဝဲန့ၣ်လီၤ. 54မၤစၢၤအဖိအံၣ်စရ့လး,လၢတၢ်တိၢ်နီၣ်အတၢ်သးကညီၤဒီးစီၤအၤဘြၤဟၣ်ဒီးအချံအသၣ်လီၤစိၤလီၤဃၣ်, 55ဒ်အစံးပာ်လၢပပၢ်သ့ၣ်အသိးန့ၣ်လီၤ.

56ဒီးနီၢ်မၤရံအိၣ်ဒီးနီၢ်အ့းလံၤစါဘ့းသၢလါဃၣ်ဃၣ်,ဒီးက့ၤက့ၤဝဲဆူအဟံၣ်လီၤ. 57ဒီးနီၢ်အ့းလံၤစါဘ့းအမုၢ်အလါဘၣ်ဝဲ,ဒီးဆံးစၢ်န့ၢ်အဖိခွါလီၤ. 58ဒီးပှၤအိၣ်ဝးတရံးအီၤ,ဒီးအဘူးအတံၢ်တဖၣ်န့ၣ်,နၢ်ဟူလၢယွၤပာ်ဒိၣ်ထီၣ်အတၢ်သးကညီၤလၢအီၤ,ဒီးအသူၣ်ခုသးခုဃုာ်ဒီးအီၤလီၤ.

59ဒီးတၢ်မၤအသးလၢဃိးနံၤတနံၤဒီး,ပှၤဟဲဝဲဒ်သိးအကကူးတရံးဖိသၣ်န့ၣ်,ဒီးသါကယုၢ်ဝဲအမံၤလၢအပၢ်စီၤစဃၤရံအမံၤလီၤ. 60ဒီးအမိၢ်ကတိၤဆၢတၢ်ဒီးစံးဝဲဒၣ်,တမ့ၢ်ဘၣ်,ဘၣ်ယုၢ်အမံၤလၢစီၤယိၤဟၣ်လီၤ. 61ဒီးအဝဲသ့ၣ်စံးဘၣ်အီၤ,လၢနဘူးနတံၢ်အကျါန့ၣ်,ပှၤလၢတၢ်ကိးအမံၤဒ်န့ၣ်တအိၣ်ဘၣ်နီတဂၤဘၣ်. 62ဒီးအပၢ်အသးအိၣ်ယုၢ်အမံၤဒ်လဲၣ်ဒ်လဲၣ်န့ၣ်,အဝဲသ့ၣ်ကျၢၢ်ကျၣ်လၢအီၤလီၤ. 63ဒီးအဝဲဒၣ်ဃ့တၢ်ကွဲးအလီၢ်,ဒီးကွဲးတၢ်,ဒီးစံးဝဲဒၣ်,အမံၤမ့ၢ်စီၤယိၤဟၣ်လီၤ.ဒီးကမၢကမၣ်ဝဲခဲလၢာ်လီၤ. 64ဒီးအထးခိၣ်အိးထီၣ်က့ၤအသးတကီၢ်ခါ,ဒီးအပျ့ၤလီၤဆှၣ်ဝဲ,ဒီးကတိၤတၢ်ဒီးစံးထီၣ်ပတြၢၤယွၤလီၤ. 65ဒီးပှၤအိၣ်ဝးတရံးအီၤတဖၣ်ဘၣ်ပျံၤဘၣ်ဖုး,ဒီးတၢ်မၤအသးန့ၣ်ဟူထီၣ်သါလီၤလၢကစၢၢ်ကလိအလီၢ်လၢကီၢ်ယူဒၤအပူၤသကုၤဆးဒးလီၤ. 66ဒီးပှၤလၢအနၢ်ဟူတၢ်တဖၣ်န့ၣ်,ပာ်ဝဲလၢအသးဒီးစံးဝဲဒၣ်,မၤသးဒ်န့ၣ်ဒီး,တၢ်လၢဖိသၣ်အံၤကကဲထီၣ်ပှၤဒ်လဲၣ်.ဒီးယွၤအစုအိၣ်ဒီးအီၤလီၤ.

67ဒီးအပၢ်စီၤစဃၤရံလၢထီၣ်ပှဲၤထီၣ်ဒီးသးစီဆှံ,ဒီးကတိၤတၢ်လၢဝံအကျိာ်,ဒီးစံးဝဲဒၣ်, 68ကစၢ်,အံၣ်စရ့လးအယွၤန့ၣ်,မ်အဘၣ်တၢ်ဆိၣ်ဂ့ၤတက့ၢ်.အဂ့ၢ်ဒ်အံၤ, 69ဟဲအိၣ်သကိးဒီးမၤပူၤမၤဖျဲးအပှၤဂီၢ်မုၢ်,ဒီးဒုးအိၣ်ထီၣ်အတၢ်အုၣ်က့ၤခီၣ်က့ၤအနၢၤလၢပဂီၢ်လၢအခ့အပှၤစီၤဒၤဝံးအဟံၣ်ပူၤလံ. 70ဒ်အစံးတ့ၢ်လၢအဝံစီဆှံလၢပျၢၤတဖၣ်အထးခိၣ်အသိးန့ၣ်, 71တၢ်အုၣ်က့ၤခီၣ်က့ၤပှၤလၢပဒုၣ်ပဒါဒီးလၢကယဲၢ်ပှၤလၢအသးဟ့ပှၤအစုပူၤ, 72ဒ်သိးအကဒုးနဲၣ်အတၢ်သးကညီၤလၢပပၢ်သ့ၣ်အလိၤ, 73ဒီးသ့ၣ်နီၣ်ထီၣ်က့ၤအတၢ်အၢၣ်လီၤအီလီၤစီဆှံန့ၣ်, 74အတၢ်ဆိၣ်လၢအဆိၣ်တၢ်ဒီးပပၢ်စီၤအၤဘြၤဟၣ်,လၢအကထုးထီၣ်န့ၢ်ပှၤလၢပဒုၣ်ပဒါအစုပူၤသတးဒီး, 75ကဒုးမၤပှၤလၢအတၢ်,လၢပသးခူတလ့ၢ်,လၢတၢ်စီဆှံဒီးတၢ်တီတၢ်လိၤအပူၤ,လၢအမဲာ်ညါတစိၤဒၣ်ပှၤလီၤ.

76ဒီးဖိသၣ်နၤဧၢ,နဲဒၣ်အံၤ,တၢ်ကကိးနၤလၢတၢ်ထီကတၢၢ်အဝံတဂၤန့ၣ်လီၤ.အဂ့ၢ်ဒ်အံၤ,နကလဲၤလၢကစၢ်အမဲာ်ညါ,ဒီးကတဲာ်ကတီၤအကျဲ, 77ဒ်သိးကဟ့ၣ်အပှၤဂီၢ်မုၢ်လၢတၢ်သ့ၣ်ညါတၢ်အုၣ်က့ၤခီၣ်က့ၤလၢတၢ်ပျၢ်အတၢ်ဒဲးဘးအဂ့ၢ်, 78လၢပကစၢ်အတၢ်သးကညီၤဒိၣ်အဃိ,လၢမုၢ်ဆ့ၣ်ဝါလၢထးန့ၣ်ဟဲအိၣ်သကိးပှၤ, 79ဒ်သိးအကမၤကပီၤထီၣ်န့ၢ်ပှၤလၢအဆ့ၣ်နီၤလၢတၢ်ခံးကျါဒီးလၢတၢ်သံအကဒုန့ၣ်,ဒီးဆှၢပခီၣ်ဆူတၢ်ဃူတၢ်ဖိးအကျဲလီၤ.

80ဒီးဖိသၣ်ဒိၣ်ထီၣ်ဒီးအသးဆူၣ်ထီၣ်ဝဲ,ဒီးအိၣ်ဝဲလၢပှၢ်မုၢ်ကနၢတုၤမုၢ်တနံၤလၢအဒုးနဲၣ်ဖျါထီၣ်အသးလၢပှၤအံၣ်စရ့လးဖိလီၤ.