‏ Luke 11

1ဒီးတၢ်မၤအသးဖဲအအိၣ်ဘါထုကဖၣ်တၢ်လၢအလီၢ်တပူၤန့ၣ်တုၤအဆိတ့ၢ်ဒီး,အပျဲၢ်အဘီၣ်တဂၤစံးဘၣ်အီၤ,ကစၢ်ဧၢ,သိၣ်လိပှၤလၢပဘါထုကဖၣ်တၢ်အဂ့ၢ်,ဒ်စီၤယိၤဟၣ်သိၣ်လိစ့ၢ်ကီးအပျဲၢ်အဘီၣ်အသိးန့ၣ်တက့ၢ်. 2ဒီးစံးဘၣ်အီၤ,တုၤသုဘါထုကဖၣ်တၢ်ဒီး,စံး,အိၣ်လၢမူခိၣ်ပပၢ်ဧၢ,မ်နမံၤဘၣ်တၢ်ပာ်စီဆှံအီၤတက့ၢ်.နဘီနမုၢ်န့ၣ်,မ်အဟဲတက့ၢ်. 3ဒ်လၢမူခိၣ်အသိးန့ၣ်မ်တၢ်မၤအသးလၢဟီၣ်ခိၣ်ချၢဖဲဒၣ်နသးတက့ၢ်.ကိၣ်လၢတနံၤအဂီၢ်တနံၤအဂီၢ်န့ၣ်,ဟ့ၣ်လီၤပှၤလၢတနံၤဘၣ်တနံၤတနံၤဘၣ်တနံၤတက့ၢ်.ဒီးပျၢ်ကွံာ်ပတၢ်ဒဲးဘးတက့ၢ်. 4အဂ့ၢ်ဒ်အံၤ,ပပျၢ်စ့ၢ်ကီးကယဲၢ်ပှၤလၢအကမၢ်အိၣ်ဒီးပှၤခဲလၢာ်လီၤ.ဒီးသုတဒုးဟဲနုာ်ပှၤဆူတၢ်လ့ပစီအပူၤတဂ့ၤ,ဒီးထုးထီၣ်ကွံာ်လၢ်ပှၤလၢတၢ်အၢတၢ်သီအပူၤတက့ၢ်.

5ဒီးစံးဘၣ်အီၤ,မတၤတဂၤလၢသုကျါ,အိၣ်ဒီးအတံၤသကိး,ဒီးလၢဖးဖီမုၢ်လဲၤဆူအအိၣ်ဒီးစံးဘၣ်အီၤ,ခွါဧၢ,ယန့ၢ်ဘၣ်ကိၣ်သၢဖျၢၣ်အလီၢ်အိၣ်လီၤ. 6အဂ့ၢ်ဒ်အံၤ,ယတံၤသကိးတဂၤလဲၤတၢ်ဒီးဟဲတုၤလံလၢယအိၣ်ဒီးတၢ်လၢယကပာ်လီၤလၢအမဲာ်ညါတအိၣ်ဘၣ်နီတမံၤဘၣ်. 7ဒီးပှၤအိၣ်လၢဟံၣ်ပူၤကတိၤဆၢတၢ်ဒီးစံးဝဲဒၣ်,မၤတံာ်တာ်ယၤတဂ့ၤ,တြဲၤကးတံာ်ဃာ်အသးလံ,ဒီးယဖိယလံၤအိၣ်လံဒီးယၤလၢယလီၢ်မံပူၤလံ,ယဂဲၤဆၢထၢၣ်ဟ့ၣ်တၢ်လၢနၤတသ့ဘၣ်. 8ယစံးဘၣ်သု,အဝဲတဂၤလၢအမ့ၢ်အတံၤသကိးအဃိတဂဲၤဆၢထၢၣ်ဟ့ၣ်ဘၣ်အတၢ်နာ်သက့ဒီး,မ့ၢ်အဃ့ဝဲသပှၢ်ပှၢ်အဃိဒီးကဂဲၤဆၢထၢၣ်ဟ့ၣ်လီၤအီၤ,ဖဲအန့ၢ်တၢ်အလီၢ်အိၣ်တဖၣ်န့ၣ်လီၤ. 9ဒီးယစံးဘၣ်သု,ဃ့တက့ၢ်,ဒီးတၢ်ကဟ့ၣ်သုလီၤ.ဃုတက့ၢ်,ဒီးသုကထံၣ်န့ၢ်တၢ်လီၤ.ဒိတကျိာ်တက့ၢ်.ဒီးတၢ်ကအိးထီၣ်န့ၢ်သုလီၤ. 10အဂ့ၢ်ဒ်အံၤ,ကယဲၢ်ပှၤလၢအဃ့တၢ်တဂၤလၢ်လၢ်န့ၣ်,န့ၢ်ဘၣ်တၢ်လီၤ.ဒီးပှၤလၢအဃုတၢ်န့ၣ်,ထံၣ်န့ၢ်တၢ်လီၤ.ဒီးပှၤလၢအဒိတကျိာ်တၢ်န့ၣ်တၢ်ကအိးထီၣ်န့ၢ်အဂီၢ်လီၤ.

11ပၢ်တဂၤလၢသုကျါ,အဖိခွါမ့ၢ်ဃ့ကိၣ်ဒီး,ကဟ့ၣ်အီၤလၢလၢၢ်န့ၣ်,မ့ၢ်မတၤတဂၤလဲၣ်.ဒီးမ့ၢ်ဃ့ညၣ်တဘ့ၣ်ဒီး,လၢညၣ်အလီၢ်န့ၣ်,ကဟ့ၣ်အီၤလၢဂုၢ်တဘိဧါ. 12မ့ၢ်ဃ့တၢ်အဒံၣ်တဖျၢၣ်ဒီး,ကဟ့ၣ်အီၤလၢပတ့ၤချဲးန့ၣ်ဧါ. 13မၤသးဒ်န့ၣ်ဒီးသုဝဲဒၣ်လၢအမ့ၢ်ပှၤအအၢအသီန့ၣ်,သုမ့ၢ်သ့ၣ်ညါဟ့ၣ်သုဖိသုလံၤလၢတၢ်ဟ့ၣ်အဂ့ၤဒီး,သုပၢ်အိၣ်လၢမူခိၣ်န့ၣ်,ကဟ့ၣ်ပှၤလၢအဃ့တၢ်လၢအီၤတဖၣ်လၢသးစီဆှံန့ၣ်အါန့ၢ်အန့ၣ်တက့ၢ်ဆံးဒိၣ်လဲၣ်.

14ဒီးဟီထီၣ်ကွံာ်တၢ်နါတဒု,ဒီးမ့ၢ်ပှၤတအုၣ်လီၤ.ဒီးတၢ်မၤအသးလၢတၢ်နါဟးထီၣ်ကွံာ်,ဒီးပှၤတအုၣ်န့ၣ်ကတိၤထီၣ်တၢ်,ဒီးပှၤဂီၢ်မုၢ်ကမၢကမၣ်တကူၢ်သ့ၣ်လီၤ. 15ဒီးပှၤအိၣ်လၢအကျါတနီၤနီၤစံးဝဲဒၣ်,မ့ၢ်အဟီထီၣ်ကွံာ်တၢ်နါလၢတၢ်နါအခိၣ်,ဘၤဧၤလစဘူာ်လီၤ. 16ဒီးအဂၤတနီၤလ့ပစီတၢ်ဒီးဃ့တၢ်ပနီၣ်လၢမူခိၣ်,လၢအီၤလီၤ. 17ဒီးအဝဲဒၣ်သ့ၣ်ညါအတၢ်ကူၣ်တၢ်ဖးဒီးစံးဘၣ်အီၤ,ကယဲၢ်ဘီမုၢ်လၢအမၤလီၤဖးထီဒါလီၤအသးဒၣ်ဝဲန့ၣ်,ကအိၣ်သယုၢ်လီၤ.ဒီးဟံၣ်မ့ၢ်မၤလီၤဖးထီဒါလီၤအသးဒၣ်ဝဲဒီး,ကလီၤပှီၢ်လီၤ. 18ဒီးမုၣ်ကီၤလံၢ်စ့ၢ်ကီးမ့ၢ်မၤလီၤဖးထီဒါလီၤအကစၢ်ဒၣ်ဝဲဒီး,အဘီအမုၢ်ကကျၢၤဝဲဒ်လဲၣ်.အဂ့ၢ်ဒ်အံၤ,သုစံးလၢယဟီထီၣ်ကွံာ်တၢ်နါလၢဘၤဧၤလစဘူာ်လီၤ. 19ဒီးယမ့ၢ်ဟီထီၣ်ကွံာ်တၢ်နါလၢဘၤဧၤလစဘူာ်ဒီး,သုဖိခွါတဖၣ်ဟီထီၣ်ကွံာ်တၢ်နါလၢမတၤတဂၤလဲၣ်.မၤသးဒ်န့ၣ်ဒီးအဝဲသ့ၣ်ကမ့ၢ်ပှၤစံၣ်ညီၣ်သုလီၤ. 20မ့မ့ၢ်ယမ့ၢ်ဟီထီၣ်ကွံာ်တၢ်နါလၢယွၤအစုမုၢ်စုနၢဒီး,မ့ၢ်မးယွၤအဘီအမုၢ်ဟဲချုးန့ၢ်သုလီၤ.

21ပှၤအဆူၣ်အိၣ်ဒီးအစုကဝဲၤပၢၤအဟံၣ်ဒၣ်ဝဲအဖၢမုၢ်ဒီး,အတၢ်ဖိတၢ်လံၤအိၣ်ကျၢၤဝဲလီၤ. 22ဘၣ်ဆၣ်ဒီးတုၤပှၤအဂံၢ်အဘါဆူၣ်န့ၢ်အီၤတဂၤဟဲဒီးမၤနၢၤအီၤဒီး,ကဟံးန့ၢ်ကွံာ်ကယဲၢ်အစုကဝဲၤလၢအသန့ၤအသးလၢအီၤ,ဒီးနီၤဖးအတၢ်ဖိတၢ်လံၤလီၤ.

23ပှၤလၢအတအိၣ်ဘၣ်ဒီးယၤအံၤ,မ့ၢ်အထီဒါယၤလီၤ.ဒီးပှၤလၢအတထၢဖှိၣ်ဘၣ်တၢ်ဒီးယၤအံၤ,မ့ၢ်အမၤလီၤပြံလီၤပြါတၢ်လီၤ.

24တုၤတၢ်နါတဒုဟးထီၣ်ကွံာ်လၢပှၤကညီအလိၤ,ဒီးဟးဝဲလၢဃဲာ်ခိၣ်ဃဲာ်လာ်ဃုတၢ်အိၣ်ဘှံးအလီၢ်,ဒီးတထံၣ်န့ၢ်ဘၣ်ဝဲဒီး,စံးဝဲဒၣ်,ယကက့ၤက့ၤဆူယဟံၣ်လၢယဟးထီၣ်ကွံာ်လၢအပူၤလီၤ. 25ဒီးက့ၤက့ၤဝဲ,ဒီးထံၣ်န့ၢ်ဝဲလၢအအိၣ်ခွဲအသး,ဒီးကတဲာ်ကတီၤအသးလီၤ. 26တုၤနုၤတစုလဲၤဟံးန့ၢ်တၢ်နါလၢအအၢန့ၢ်အကစၢ်ဒၣ်ဝဲနွံဒု,ဒီးလဲၤနုာ်က့ၤဝဲ,ဒီးအိၣ်ဝဲဆိးဝဲလၢအပူၤလီၤ.ဒီးတၢ်လၢပှၤတဂၤန့ၣ်အကတၢၢ်မ့ၢ်အနးန့ၢ်အခီၣ်ထံးတက့ၢ်လီၤ.

27ဒီးဖဲအကတိၤတၢ်အဖၢမုၢ်ဒီး,တၢ်မၤအသးလၢပှၤဂီၢ်မုၢ်အကျါ,ပိာ်မုၣ်တဂၤကိးပသူထီၣ်ဒီးစံးဘၣ်အီၤ,ဒၢလီၢ်လၢအဒၢနၤ,ဒီးနုၢ်လၢနအီၣ်န့ၣ်,ဘၣ်ဆိၣ်ဂ့ၤဝဲလီၤ. 28ဒီးအဝဲဒၣ်စံး,မ့ၢ်မးပှၤလၢအနၢ်ဟူယွၤအကလုၢ်အကထါ,ဒီးတိၢ်န့ၢ်ဝဲတဖၣ်န့ၣ်,ဘၣ်ဆိၣ်ဂ့ၤဝဲလီၤ.

29ဒီးပှၤဂီၢ်မုၢ်အိၣ်ဖှိၣ်ရိဖှိၣ်ကတံာ်ကတူာ်,ဒီးစံးဝဲဒၣ်,ပှၤတစိၤအံၤမ့ၢ်အအၢအသီလီၤ.ဃုဝဲလၢတၢ်ပနီၣ်လီၤလး,ဒီးမ့တမ့ၢ်ဘၣ်စီၤယိၤနါအတၢ်ပနီၣ်လီၤလးန့ၣ်ဒီး,တၢ်တဟ့ၣ်ဘၣ်တၢ်ပနီၣ်လီၤလးလၢအီၤဘၣ်. 30အဂ့ၢ်ဒ်အံၤ,ဒ်စီၤယိၤနါကဲတၢ်ပနီၣ်လီၤလးလၢပှၤနံၤနဝ့ဖိအမဲာ်ညါအသိးန့ၣ်,ပှၤကညီဖိခွါအံၤကကဲထီၣ်တၢ်ပနီၣ်လၢပှၤတစိၤအံၤအမဲာ်ညါ,ဒ်န့ၣ်အသိးလီၤ.

31လၢတၢ်စံၣ်ညီၣ်အပူၤန့ၣ်,ကလံၤထံးအနီၢ်ပၤမုၣ်ကဂဲၤဆၢထၢၣ်ဒီးပှၤတစိၤအံၤ,ဒီးကစံၣ်ညီၣ်ဃၣ်အီၤလီၤ.အဂ့ၢ်ဒ်အံၤ,ဒ်သိးအကနၢ်ဟူဘၣ်စီၤၡလိၤမိၤအတၢ်ကူၣ်ဘၣ်ကူၣ်သ့ဒီး,ဟဲမးဝဲလၢဟီၣ်ခိၣ်အသနၢၣ်လီၤ.ဒီးကွၢ်ကွၢ်,ပှၤလၢအဒိၣ်န့ၢ်စီၤၡလိၤမိၤအိၣ်ဝဲဖဲအံၤတဂၤလီၤ. 32လၢတၢ်စံၣ်ညီၣ်အပူၤန့ၣ်,ပှၤနံၤနဝ့ဖိကဂဲၤဆၢထၢၣ်ဒီးပှၤတစိၤအံၤ,ဒီးကစံၣ်ညီၣ်ဃၣ်အီၤလီၤ.အဂ့ၢ်ဒ်အံၤ,မ့ၢ်စီၤယိၤနါစံၣ်တဲၤတဲလီၤတၢ်ဒီး,အဝဲသ့ၣ်ပီၢ်ယၢ်လီၤက့ၤအသးလီၤ.ဒီးကွၢ်ကွၢ်,ပှၤလၢအဒိၣ်န့ၢ်စီၤယိၤနါအိၣ်ဝဲဖဲအံၤတဂၤလီၤ.

33ပှၤတဒွဲၣ်ထီၣ်ဘၣ်မ့ၣ်အူဒၢ,ဒီးပာ်လၢတၢ်တဒၢမ့ၢ်ဂ့ၤ,လၢနာ်ဖိအဖီလာ်မ့ၢ်ဂ့ၤ,နီတဂၤဘၣ်.မ့မ့ၢ်ဒ်သိးပှၤဟဲနုာ်တဖၣ်ကထံၣ်အတၢ်ကပီၤဒီး,ပာ်ထီၣ်ဝဲလၢမ့ၣ်အူဒၢအလီၢ်အဖီခိၣ်လီၤ. 34ပနီၢ်ခိအမ့ၣ်အူဒၢအံၤ,မ့ၢ်ပမဲာ်လီၤ.မၤသးဒ်န့ၣ်ဒီးနမဲာ်မ့ၢ်ဆးဒီး,နနီၢ်ခိကအိၣ်ဒီးတၢ်ကပီၤဒီဂၤညါလီၤ,မ့မ့ၢ်နမဲာ်မ့ၢ်ယုာ်ဒီး,နနီၢ်ခိကခံးဝဲလီၤ. 35မၤသးဒ်န့ၣ်ဒီးတၢ်ကပီၤအိၣ်လၢနပူၤန့ၣ်,ဒ်အသုတမ့ၢ်တၢ်ခံးတဂ့ၤဒီး,ပလီၢ်နသးတက့ၢ်. 36မၤသးဒ်န့ၣ်ဒီးတၢ်ကပီၤမ့ၢ်အိၣ်လၢနနီၢ်ခိဒီဂၤညါဒီး,တၢ်ခံးမ့ၢ်တအိၣ်ဘၣ်နီတပူၤဘၣ်ဒီး,တၢ်ခဲလၢာ်ကန့ၢ်တၢ်ကပီၤထီၣ်ဒ်မ့ၣ်အူဒၢအဧူၢ်ကပီၤထီၣ်ဘၣ်နၤအသိးန့ၣ်လီၤ.

37ကတိၤတၢ်အဖၢမုၢ်ဒီး,ပှၤဖၤရံၤၡဲတဂၤဃ့အီၤဒ်သိးအကဟဲအီၣ်တၢ်အီၣ်လၢဂီၤအီၣ်လၢအသိးလီၤ.ဒီးလဲၤနုာ်ဆ့ၣ်နီၤဝဲလၢမ့ၤလၣ်ထံးလီၤ. 38ဒီးတဘျၢ ▼

▼11:38 လၢဟ့းလ့ၣ်အကျိာ်"ဘးပတံစၢ်."

ဘၣ်ဝဲလၢအတချုးအီၣ်တၢ်န့ၣ်ပှၤဖၤရံၤၡဲထံၣ်ဝဲဒီးကမၢကမၣ်လီၤ. 39ဒီးကစၢ်စံးဘၣ်အီၤ,ခဲကနံၣ်အံၤပှၤဖၤရံၤၡဲသုဝဲသ့ၣ်အံၤ,သုမၤကဆှီထီၣ်လီခီအချၢ,ဒီးသီတ့ၤအချၢလီၤ.မ့မ့ၢ်သုပူၤလၢညါန့ၣ်,လၢပှဲၤဝဲဒီးတၢ်အီၣ်ကဘျံးအီၣ်ကဘျၣ်,ဒီးတၢ်အၢတၢ်သီလီၤ. 40ပှၤဟးဂီၤဖိသ့ၣ်ဧၢ,ပှၤလၢအတ့တၢ်အချၢန့ၣ်,တမ့ၢ်ဘၣ်အတ့စ့ၢ်ကီးအပူၤဘၣ်ဧါ. 41မ့မ့ၢ်တၢ်အိၣ်လၢအပူၤတဖၣ်န့ၣ်,ဟ့ၣ်သးကညီၤတၢ်တက့ၢ်.ဒီးကွၢ်ကွၢ်,တၢ်ခဲလၢာ်မ့ၢ်တၢ်ကဆှီလၢသုဂီၢ်လီၤ. 42မ့မ့ၢ်ပှၤဖၤရံၤၡဲသ့ၣ်ဧၢ,သုဘၣ်အဖှီၣ်လီၤ.အဂ့ၢ်ဒ်အံၤ,သုမၤဘူၣ်ကဖီကဘီ,ဒီးပံကနၣ်အဒိး,ဒီးတၢ်ဒိးတၢ်လၣ်တမံၤလၢ်လၢ်,အဘျၢၣ်တဆံန့ၣ်တဘျၢၣ်လီၤ.ဒီးသုလဲၤကပာ်တၢ်စံၣ်ညီၣ်,ဒီးယွၤအတၢ်အဲၣ်တၢ်ကွံလီၤ.အအံၤတဖၣ်သုဂ့ၤမၤ,ဒီးအန့ၣ်တဖၣ်သုတဂ့ၤလဲၤကပာ်ဘၣ်သုဝဲဘၣ်.

43ပှၤဖၤရံၤၡဲသ့ၣ်ဧၢ,သုဘၣ်အဖှီၣ်လီၤ.အဂ့ၢ်ဒ်အံၤ,သုအဲၣ်ဒိးလီၢ်ဆ့ၣ်နီၤအဂ့ၤကတၢၢ်လၢဘူၣ်ဘျီၣ်ပူၤ,ဒီးတၢ်ကတိၤဒိၣ်သုလၢဖၠါပူၤလီၤ.

44(ပှၤကွဲးလံာ်,ဒီးပှၤဖၤရံၤၡဲ,ပှၤလီတၢ်ဖိသ့ၣ်ဧၢ,)သုဘၣ်အဖှီၣ်လီၤ.အဂ့ၢ်ဒ်အံၤ,သုလီၤဂာ်လၢပှၤသွၣ်ခိၣ်အပူၤလၢအတအိၣ်ဖျါဘၣ်ဒီး,ပှၤကညီလဲၤတၢ်က့ၤတၢ်လၢအဖီခိၣ်န့ၣ်,ဒီးတသ့ၣ်ညါဘၣ်ဝဲဘၣ်.

45ဒီးပှၤသ့လံာ်တၢ်သိၣ်တၢ်သီတဂၤ,ကတိၤဆၢတၢ်ဒီးစံးဘၣ်အီၤ,သရၣ်ဧၢ,နစံးတၢ်ဒ်အံၤဒီး,မ့ၢ်နဒုၣ်ဒွဲၣ်ပှၤစ့ၢ်ကီးလီၤ. 46ဒီးစံးဝဲဒၣ်,ပှၤသ့လံာ်တၢ်သိၣ်တၢ်သီသုဝဲသ့ၣ်ဧၢ,သုဘၣ်အဖှီၣ်လီၤ.အဂ့ၢ်ဒ်အံၤ,တၢ်ဝံတၢ်ယိးလၢအကီမးန့ၣ်သုပာ်ထီၣ်လၢပှၤကညီအလိၤ,ဒီးသုကစၢ်ဒၣ်သုဝဲန့ၣ်,သုတထိးဘၣ်တၢ်ဝံတၢ်ယိးန့ၣ်လၢသုစုမုၢ်စုနၢနီတဘိဘၣ်. 47သုဝဲသ့ၣ်ဧၢ,သုဘၣ်အဖှီၣ်လီၤ.အဂ့ၢ်ဒ်အံၤ,သုမၤထီၣ်ဝံအသွၣ်ခိၣ်အပနီၣ်,ဒီးသုပၢ်သ့ၣ်မၤသံအီၤလီၤ. 48မ့ၢ်မးသုအုၣ်သုသး,ဒီးအၢၣ်လီၤအီလီၤသုပၢ်အတၢ်မၤလီၤ.အဂ့ၢ်ဒ်အံၤ,အဝဲသ့ၣ်မၤသံအီၤ,ဒီးသုဝဲသ့ၣ်,သုမၤထီၣ်အသွၣ်ခိၣ်အပနီၣ်လီၤ. 49မၤသးဒ်န့ၣ်ဒီး,ယွၤအတၢ်ကူၣ်သ့ကူၣ်ဘၣ်စံးဝဲဒၣ်,ယကမၢလီၤဝံဒီးပှၤတၢ်မၢဖိသ့ၣ်တဖၣ်ဆူအအိၣ်,ဒီးအဝဲသ့ၣ်ကမၤသံအီၤတနီၤ,ဒီးကမၤအၢမၤနးအီၤတနီၤ, 50ဒ်သိးလၢစီၤဟ့းဘ့းလးအသွံၣ်တုၤလီၤလၢစီၤစကၤရယၤလၢတၢ်မၤသံအီၤလၢတၢ်လုၢ်အလီၢ်ဒီးတၢ်လုၢ်အဟံၣ်အဘၢၣ်စၢၤန့ၣ်,ကယဲၢ်ဝံတဖၣ်အသွံၣ်ဂၢ်လီၤအသးလၢဟီၣ်ခိၣ်အခီၣ်ထံးလံၤလံၤန့ၣ်, 51တၢ်ကဃုအီၤလၢပှၤတစိၤအံၤအစုပူၤလီၤ.မ့ၢ်မးယစံးဘၣ်သု,တၢ်ကဃုဝဲလၢပှၤတစိၤအံၤအလိၤလီၤ. 52ပှၤသ့လံာ်တၢ်သိၣ်တၢ်သီသ့ၣ်ဧၢ,သုဘၣ်အဖှီၣ်လီၤ.အဂ့ၢ်ဒ်အံၤ,တၢ်သ့ၣ်ညါအနီၣ်ဝံာ်န့ၣ်,သုစိာ်ကွံာ်လံ.သုတလဲၤနုာ်ဘၣ်သုကစၢ်ဒၣ်သုဝဲဘၣ်,ဒီးပှၤလဲၤနုာ်ဝဲတဖၣ်န့ၣ်,သုတြီအီၤလီၤ.

53ဒီးစံးဘၣ်အီၤလၢတၢ်န့ၣ်တဖၣ်အဖၢမုၢ်ဒီး,ပှၤကွဲးလံာ်ဒီးပှၤဖၤရံၤၡဲသ့ၣ်တဖၣ်,မၤတံာ်တာ်အီၤသပှၢ်ပှၢ်,ဒီးသံကွၢ်အီၤလၢတၢ်အါမံၤ, 54ဒီးကွၢ်ဟုၣ်အီၤ,ဒီးဃုတုၢ်န့ၢ်အတၢ်ကတိၤ,ဒ်သိးအကဆှိးအီၤလီၤ.